Новый Завет (на цсл., гражданский шрифт, с ударениями) [Сборник] (fb2) читать онлайн

Ева́нгелие от Матфе́я

Глава 1

¹ Кни́га родства́ Иису́са Христа́, Сы́на Дави́дова, Сы́на Авраа́мля.

² Авраа́м роди́ Исаа́ка. Исаа́к же роди́ Иа́кова. Иа́ков же роди́ Иу́ду и бра́тию его́.

³ Иу́да же роди́ Фаре́са и За́ра от Фама́ры. Фаре́с же роди́ Есро́ма. Есро́м же роди́ Ара́ма.

⁴ Ара́м же роди́ Аминада́ва. Аминада́в же роди́ Наассо́на. Наассо́н же роди́ Салмо́на.

⁵ Салмо́н же роди́ Воо́за от Раха́вы. Воо́з же роди́ Ови́да от Ру́фы. Ови́д же роди́ Иессе́я.

⁶ Иессе́й же роди́ Дави́да царя́. Дави́д же царь роди́ Соломо́на от Ури́ины.

⁷ Соломо́н же роди́ Ровоа́ма. Ровоа́м же роди́ Ави́я. Ави́я же роди́ А́са.

⁸ А́са же роди́ Иосафа́та. Иосафа́т же роди́ Иора́ма. Иора́м же роди́ Ози́ю.

⁹ Ози́я же роди́ Иоафа́ма. Иоафа́м же роди́ Аха́за. Аха́з же роди́ Езеки́ю.

¹⁰ Езеки́я же роди́ Манасси́ю. Манасси́я же роди́ Амо́на. Амо́н же роди́ Иоси́ю.

¹¹ Иоси́я же роди́ Иехо́нию и бра́тию его́, в преселе́ние Вавило́нское. ^[1]

¹² По преселе́нии же Вавило́нстем, Иехо́ния роди́ Салафи́иля. Салафи́иль же роди́ Зорова́веля.

¹³ Зорова́вель же роди́ Авиу́да. Авиу́д же роди́ Елиаки́ма. Елиаки́м же роди́ Азо́ра.

¹⁴ Азо́р же роди́ Садо́ка. Садо́к же роди́ Ахи́ма. Ахи́м же роди́ Елиу́да.

¹⁵ Елиу́д же роди́ Елеаза́ра. Елеаза́р же роди́ Матфа́на. Матфа́н же роди́ Иа́кова.

¹⁶ Иа́ков же роди́ Ио́сифа, му́жа Мари́ина, из Нея́же роди́ся Иису́с, глаго́лемый Христо́с.

¹⁷ Всех же родо́в от Авраа́ма до Дави́да, ро́дове четырена́десяте, и от Дави́да до преселе́ния Вавило́нскаго, ро́дове четырена́десяте, и от преселе́ния Вавило́нскаго до Христа́, ро́дове четырена́десяте.

¹⁸ Иису́с Христо́во Рождество́ си́це бе: обруче́нней у́бо бы́вши Ма́тери Его́ Мари́и Ио́сифови, пре́жде да́же не сни́тися и́ма, обре́теся иму́щи во чре́ве от Ду́ха Свя́та.

¹⁹ Ио́сиф же, муж Ея́, пра́веден сый и не хотя́ Ея́ обличи́ти, восхоте́ тай пусти́ти Ю́.

²⁰ Сия́ же ему́ помы́слившу, се А́нгел Госпо́день во сне яви́ся ему́, глаго́ля: Ио́сифе, сы́не Дави́дов, не убо́йся прия́ти Мариа́м, жены́ твоея́, ро́ждшее бо ся в Ней от Ду́ха есть Свя́та.

²¹ Роди́т же Сы́на, и нарече́ши и́мя Ему́ Иису́с. Той бо спасе́т лю́ди Своя́ от грех их.

²² Сие́ же все бысть, да сбу́дется рече́нное от Го́спода проро́ком, глаго́лющим:

²³ Се Де́ва во чре́ве прии́мет и роди́т Сы́на, и нареку́т и́мя Ему́ Емману́ил, е́же есть сказа́емо, с на́ми Бог.

²⁴ Воста́в же Ио́сиф от сна, сотвори́, я́коже повеле́ ему́ А́нгел Госпо́день, и прия́т Жену́ свою́.

²⁵ И не зна́яше Ея́, до́ндеже роди́ Сы́на Своего́ пе́рвенца, и нарече́ и́мя Ему́ Иису́с.

Глава 2

¹ Иису́су же ро́ждшуся в Вифлее́ме Иуде́йстем во дни И́рода царя́, се волсви́ ^[2] от восто́к приидо́ша во Иерусали́м, глаго́люще:

² Где есть рожде́йся Царь Иуде́йский? Ви́дехом бо звезду́ Его́ на восто́це и приидо́хом поклони́тися Ему́.

³ Слы́шав же, И́род царь смути́ся, и весь Иерусали́м с ним.

⁴ И собра́в вся первосвяще́нники и кни́жники людски́я, вопроша́ше от них: где Христо́с ражда́ется?

⁵ Они́ же реко́ша ему́: в Вифлее́ме Иуде́йстем. Та́ко бо пи́сано есть проро́ком:

⁶ И ты, Вифлее́ме, земле́ Иу́дова, ничи́мже ме́ньши еси́ во влады́ках Иу́довых, из тебе́ бо изы́дет Во́ждь, и́же упасе́т лю́ди Моя́ Изра́иля.

⁷ Тогда́ И́род тай призва́ волхвы́ и испытова́ше от них вре́мя я́вльшияся звезды́.

⁸ И посла́в их в Вифлее́м, рече́: ше́дше, испыта́йте изве́стно о Отроча́ти; егда́ же обря́щете, возвести́те ми, я́ко да и аз, шед, поклоню́ся Ему́.

⁹ Они́ же, послу́шавше царя́, идо́ша. И се звезда́, ю́же ви́деша на восто́це, идя́ше пред ни́ми, до́ндеже, прише́дше, ста верху́, иде́же бе Отроча́.

¹⁰ Ви́девше же звезду́, возра́довашася ра́достию ве́лиею зело́.

¹¹ И прише́дше в хра́мину, ви́деша Отроча́ с Мари́ею, Ма́терию Его́, и па́дше, поклони́шася Ему́, и отве́рзше сокро́вища своя́, принесо́ша Ему́ да́ры: зла́то, и лива́н, и смν́рну.

¹² И весть прие́мше во сне, не возврати́тися ко И́роду, ины́м путе́м отыдо́ша во страну́ свою́.

¹³ Отше́дшим же им, се А́нгел Госпо́день во сне яви́ся Ио́сифу, глаго́ля: воста́в, поими́ Отроча́ и Ма́терь Его́, и бежи́ во Еги́пет, и бу́ди та́мо, до́ндеже реку́ ти, хо́щет бо И́род иска́ти Отроча́те, да погуби́т Е́.

¹⁴ Он же, воста́в, поя́т Отроча́ и Ма́терь Его́ но́щию и оты́де во Еги́пет.

¹⁵ И бе та́мо до уме́ртвия И́родова, да сбу́дется рече́нное от Го́спода проро́ком, глаго́лющим: от Еги́пта воззва́х Сы́на Моего́.

¹⁶ Тогда́ И́род, ви́дев, я́ко пору́ган бысть от волхво́в, разгне́вася зело́ и посла́в, изби́ вся де́ти, су́щия в Вифлее́ме и во всех преде́лех его́, от двою́ ле́ту и нижа́йше по вре́мени, е́же изве́стно испыта́ от волхво́в.

¹⁷ Тогда́ сбы́стся рече́нное Иереми́ем проро́ком, глаго́лющим:

¹⁸ Глас в Ра́ме слы́шан бысть, плачь, и рыда́ние, и вопль мног. Рахи́ль пла́чущися чад свои́х и не хотя́ше уте́шитися, я́ко не суть.

¹⁹ Уме́ршу же И́роду, се А́нгел Госпо́день во сне яви́ся Ио́сифу во Еги́пте,

²⁰ Глаго́ля: воста́в, поими́ Отроча́ и Ма́терь Его́ и иди́ в зе́млю Изра́илеву, изомро́ша бо и́щущии ду́шу Отроча́те.

²¹ Он же воста́в, поя́т Отроча́ и Ма́терь Его́ и прии́де в зе́млю Изра́илеву.

²² Слы́шав же, я́ко Архела́й ца́рствует во Иуде́и вме́сто И́рода, отца́ своего́, убоя́ся та́мо ити́. Весть же прие́мь во сне, оты́де в преде́лы Галиле́йския.

²³ И прише́д, всели́ся во гра́де, нарица́емем Назаре́т. Я́ко да сбу́дется рече́нное проро́ки, я́ко Назоре́й нарече́тся.

Глава 3

¹ Во дни же о́ны прии́де Иоа́нн Крести́тель, пропове́дуя в пусты́ни Иуде́йстей

² И глаго́ля: пока́йтеся, прибли́жи бо ся Ца́рство Небе́сное.

³ Сей бо есть рече́нный Иса́ием проро́ком, глаго́лющим: глас вопию́щаго в пусты́ни, угото́вайте путь Госпо́день, пра́вы твори́те стези́ Его́.

⁴ Сам же Иоа́нн имя́ше ри́зу свою́ от влас вельблу́ждь и по́яс усме́н о чресле́х свои́х, снедь же его́ бе пру́жие и мед ди́вий.

⁵ Тогда́ исхожда́ше к нему́ Иерусали́ма и вся Иуде́я, и вся страна́ Иорда́нская.

⁶ И креща́хуся во Иорда́не от него́, испове́дающе грехи́ своя́.

⁷ Ви́дев же [Иоа́нн] мно́ги фарисе́и и саддуке́и, гряду́ща на Креще́ние его́, рече́ им: рожде́ния ехи́днова, кто сказа́ вам бежа́ти от бу́дущаго гне́ва?

⁸ Сотвори́те у́бо плод, досто́ин покая́ния.

⁹ И не начина́йте глаго́лати в себе́: отца́ и́мамы Авраа́ма. Глаго́лю бо вам, я́ко мо́жет Бог от ка́мения сего́ воздви́гнути ча́да Авраа́му.

¹⁰ Уже́ бо и секи́ра при ко́рени дре́ва лежи́т: вся́ко у́бо дре́во, е́же не твори́т плода́ добра́, посека́емо быва́ет и во огнь вмета́емо.

¹¹ Аз у́бо креща́ю вы водо́ю в покая́ние, Гряды́й же по мне, кре́плий мене́ есть, Ему́же несмь досто́ин сапоги́ понести́, Той вы крести́т Ду́хом Святы́м [и огне́м].

¹² Ему́же лопа́та ^[3] в руце́ Его́, и потреби́т гумно́ Свое́, и собере́т пшени́цу Свою́ в жи́тницу, пле́вы же сожже́т огне́м негаса́ющим.

¹³ Тогда приходит Иису́с от Галиле́и на Иорда́н ко Иоа́нну крести́тися от него́.

¹⁴ Иоа́нн же возбраня́ше Ему́, глаго́ля: аз тре́бую Тобо́ю крести́тися, и Ты ли гряде́ши ко мне?

¹⁵ Отвеща́в же, Иису́с рече́ к нему́: оста́ви ны́не, та́ко бо подо́бно есть нам испо́лнити вся́ку пра́вду. Тогда́ оста́ви Его́.

¹⁶ И крести́вся, Иису́с взы́де а́бие от воды́, и се отверзо́шася Ему́ Небеса́, и ви́де Ду́ха Бо́жия, сходя́ща, я́ко го́лубя, и гряду́ща на Него́.

¹⁷ И се глас с Небесе́, глаго́ля: Сей есть Сын Мой возлю́бленный, о Не́мже благоволи́х.

Глава 4

¹ Тогда́ Иису́с возведе́н бы́сть Ду́хом в пусты́ню искуси́тися от диа́вола.

² И пости́вся дний четы́редесять и но́щий четы́редесять, последи́ взалка́.

³ И присту́пль к Нему́ искуси́тель рече́: а́ще Сын еси́ Бо́жий, рцы, да ка́мение сие́ хле́бы бу́дут.

⁴ Он же отвеща́в рече́: пи́сано есть, не о хле́бе еди́ном жив бу́дет челове́к, но о вся́ком глаго́ле исходя́щем изоу́ст Бо́жиих.

⁵ Тогда́ поя́т Его́ диа́вол во святы́й град, и поста́ви Его́ на криле́ церко́внем,

⁶ И глаго́ла Ему́: а́ще Сын еси́ Бо́жий, ве́рзися ни́зу. Пи́сано бо есть, я́ко А́нгелом Свои́м запове́сть о Тебе́ сохрани́ти Тя, и на рука́х во́змут Тя, да не когда́ преткне́ши о ка́мень но́гу Твою́.

⁷ Рече́ же ему́ Иису́с: па́ки пи́сано есть, не иску́сиши Го́спода Бо́га твоего́.

⁸ Па́ки поя́т Его́ диа́вол на гору́ высоку́ зело́, и показа́ Ему́ вся ца́рствия міра и сла́ву их,

⁹ И глаго́ла Ему́: сия́ вся Тебе́ дам, а́ще пад поклони́ши ми ся.

¹⁰ Тогда́ глаго́ла ему́ Иису́с: иди́ за Мно́ю, ^[4] сатано́. Пи́сано бо есть: Го́споду Бо́гу твоему́ поклони́шися и Тому́ еди́ному послу́жиши.

¹¹ Тогда́ оста́ви Его́ диа́вол, и се А́нгели приступи́ша и служа́ху Ему́.

¹² Слы́шав Иису́с, я́ко Иоа́нн пре́дан бысть, оты́де в Галиле́ю,

¹³ И оста́вль Назаре́т, прише́д всели́ся в Капернау́м в помо́рие, в преде́лех Завуло́них и Неффали́млих.

¹⁴ Да сбу́дется рече́нное Иса́ием проро́ком, глаго́лющим:

¹⁵ Земля́ Завуло́ня и земля́ Неффали́мля, путь мо́ря об он пол Иорда́на, Галиле́а язы́к,

¹⁶ Лю́дие седя́щии во тме ви́деша свет ве́лий, и седя́щим в стране́ и се́ни сме́ртней, свет возсия́ им.

¹⁷ Отто́ле нача́т Иису́с пропове́дати и глаго́лати: пока́йтеся, прибли́жися бо Ца́рство Небе́сное.

¹⁸ Ходя́ же при мо́ри Галиле́йстем, ви́де два бра́та, Си́мона глаго́лемаго Петра́, и Андре́а бра́та его́, вмета́юща мре́жи в мо́ре, бе́ста бо ры́баря.

¹⁹ И глаго́ла и́ма: гряди́та по Мне, и сотворю́ вы ловца́ челове́ком.

²⁰ О́на же а́бие оста́вльша мре́жи, по Нем идо́ста.

²¹ И преше́д отту́ду, ви́де и́на два бра́та, Иа́кова Зеведе́ева, и Иоа́нна бра́та его́, в корабли́ с Зеведе́ом отце́м ею́, завязу́юща мре́жи своя́, и воззва́ я́.

²² О́на же а́бие оста́вльша кора́бль и отца́ своего́, по Нем идо́ста.

²³ И прохожда́ше всю Галиле́ю Иису́с, учя́ на со́нмищих их и пропове́дая Ева́нгелие Ца́рствия, изцеля́я всяк неду́г и вся́ку я́зю в лю́дех.

²⁴ И изы́де слух Его́ по всей Си́рии: и приведо́ша к Нему́ вся боля́щия, разли́чными неду́ги и страстьми́ одержи́мы, и бе́сны, и ме́сячныя, и разсла́бленныя [жилами]: и изцели́ их.

²⁵ И по Не́м идо́ша наро́ди мно́зи от Галиле́и и десяти́ град, и от Иерусали́ма и Иуде́и, и со о́наго по́лу Иорда́на.

Глава 5

¹ Узре́в же наро́ды, взы́де на гору́, и се́дшу Ему́, приступи́ша к Нему́ ученицы́ Его́.

² И отве́рз уста́ Своя́, уча́ше их, глаго́ля:

³ Блаже́ни ни́щии ду́хом, я́ко тех есть Ца́рствие Небе́сное.

⁴ Блаже́ни пла́чущии, я́ко ти́и уте́шатся.

⁵ Блаже́ни кро́тцыи, я́ко ти́и насле́дят зе́млю.

⁶ Блаже́ни а́лчущии и жа́ждущии пра́вды, я́ко ти́и насы́тятся.

⁷ Блаже́ни ми́лостивии, я́ко ти́и поми́ловани бу́дут.

⁸ Блаже́ни чи́стии се́рдцем, я́ко ти́и Бо́га у́зрят.

⁹ Блаже́ни миротво́рцы, я́ко ти́и сы́нове Бо́жии нареку́тся.

¹⁰ Блаже́ни изгна́ни пра́вды ра́ди, я́ко тех есть Ца́рствие Небе́сное.

¹¹ Блаже́ни есте́, егда́ поно́сят вам, и иждену́т, и реку́т всяк зол глаго́л на вы лжу́ще, Мене́ ра́ди.

¹² Ра́дуйтеся и весели́теся, я́ко мзда ва́ша мно́га на небесе́х, та́ко бо изгна́ша проро́ки, и́же [бе́ша] пре́жде вас.

¹³ Вы есте́ соль земли́, а́ще же соль обуя́ет, чим осоли́тся? Ни во что́же бу́дет ктому́, то́чию да изсы́пана бу́дет вон и попира́ема челове́ки.

¹⁴ Вы есте́ свет міра, не мо́жет град укры́тися верху́ горы́ стоя́.

¹⁵ Ниже́ вжига́ют свети́льника и поставля́ют его́ под спу́дом, но на све́щнице, и све́тит всем, и́же в хра́мине суть.

¹⁶ Та́ко да просвети́тся свет ваш пред челове́ки, я́ко да ви́дят ва́ша до́брая дела́ и просла́вят Отца́ ва́шего, И́же на небесе́х.

¹⁷ [Да] не мни́те, я́ко приидо́х разори́ти зако́н, или́ проро́ки: не приидо́х разори́ти, но испо́лнити.

¹⁸ Ами́нь бо глаго́лю вам: до́ндеже пре́йдет не́бо и земля́, ио́та еди́на, или́ еди́на черта́ не пре́йдет от зако́на, до́ндеже вся бу́дут.

¹⁹ И́же а́ще разори́т еди́ну за́поведий сих ма́лых и нау́чит та́ко челове́ки, мний нарече́тся в Ца́рствии Небе́снем, а и́же сотвори́т и нау́чит, сей ве́лий нарече́тся в Ца́рствии Небе́снем.

²⁰ Глаго́лю бо вам: я́ко а́ще не избу́дет пра́вда ва́ша па́че кни́жник и фарисе́й, не вни́дете в Ца́рствие Небе́сное.

²¹ Слы́шасте, я́ко рече́но бысть дре́вним: не убие́ши, и́же бо а́ще убие́т, пови́нен есть суду́.

²² Аз же глаго́лю вам, я́ко всяк гне́ваяйся на бра́та своего́ всу́е пови́нен есть суду́: и́же бо а́ще рече́т бра́ту своему́: рака́, ^[5] пови́нен есть со́нмищу, ^[6] а и́же рече́т: уро́де, пови́нен есть гее́нне о́гненней.

²³ А́ще у́бо принесе́ши дар твой ко олтарю́ и ту помяне́ши, я́ко брат твой и́мать не́что на тя:

²⁴ Оста́ви ту́ дар твой пред олтаре́м и шед пре́жде смири́ся с бра́том твои́м, и тогда́ прише́д принеси́ дар твой.

²⁵ Бу́ди увещава́яся с сопе́рником твои́м ско́ро, до́ндеже еси́ на пути́ с ним, да не преда́ст тебе́ сопе́рник судии́, и судия́ тя преда́ст слузе́, и в темни́цу вве́ржен бу́деши.

²⁶ Ами́нь глаго́лю тебе́: не изы́деши отту́ду, до́ндеже возда́си после́дний кодра́нт.

²⁷ Слы́шасте, я́ко рече́но бысть дре́вним: не прелюбы́ сотвори́ши.

²⁸ Аз же глаго́лю вам, я́ко всяк, и́же воззри́т на жену́ ко е́же вожделе́ти ей, уже́ любоде́йствова с не́ю в се́рдце свое́м.

²⁹ А́ще же о́ко твое́ десно́е соблажня́ет тя, изми́ е́ и ве́рзи от себе́, у́не бо ти есть, да поги́бнет еди́н от уд твои́х, а не все те́ло твое́ вве́ржено бу́дет в гее́нну о́гненную.

³⁰ И а́ще десна́я твоя́ рука́ соблажня́ет тя, усецы́ ю́ и ве́рзи от себе́, у́не бо ти есть, да поги́бнет еди́н от уд твои́х, а не все те́ло твое́ вве́ржено бу́дет в гее́нну.

³¹ Рече́но же бысть, я́ко и́же а́ще пу́стит жену́ свою́, да даст ей кни́гу распу́стную.

³² Аз же глаго́лю вам, я́ко всяк отпуща́яй жену́ свою́, ра́зве словесе́ любоде́йнаго, твори́т ю́ прелюбоде́йствовати. И и́же пущени́цу по́ймет, прелюбоде́йствует.

³³ Па́ки слы́шасте, я́ко рече́но бысть дре́вним: не во лжу клене́шися, возда́си же Го́сподеви кля́твы твоя́.

³⁴ Аз же глаго́лю вам не кля́тися вся́ко: ни не́бом, я́ко престо́л есть Бо́жий:

³⁵ Ни земле́ю, я́ко подно́жие есть нога́ма Его́, ни Иерусали́мом, я́ко град есть вели́каго Царя́.

³⁶ Ниже́ главо́ю твое́ю клени́ся, я́ко не мо́жеши вла́са еди́наго бе́ла или́ че́рна сотвори́ти.

³⁷ Бу́ди же сло́во ва́ше: ей – ей, ни – ни, ли́шше же сею́ от неприя́зни есть.

³⁸ Слы́шасте, я́ко рече́но бысть: о́ко за о́ко, и зуб за зуб.

³⁹ Аз же глаго́лю вам не проти́витися злу, но а́ще тя кто уда́рит в десну́ю твою́ лани́ту, обрати́ ему́ и другу́ю.

⁴⁰ И хотя́щему суди́тися с тобо́ю и ри́зу твою́ взя́ти, отпусти́ ему́ и срачи́цу.

⁴¹ И а́ще кто тя по́ймет по си́ле по́прище еди́но, иди́ с ним два.

⁴² Прося́щему у тебе́ дай, и хотя́щаго от тебе́ зая́ти не отврати́.

⁴³ Слы́шасте, я́ко рече́но есть: возлю́биши и́скренняго твоего́ и возненави́диши врага́ твоего́.

⁴⁴ Аз же глаго́лю вам: люби́те враги́ ва́ша, благослови́те клену́щия вы, добро́ твори́те ненави́дящим вас, и моли́теся за творя́щих вам напа́сть и изгоня́щия вы.

⁴⁵ Я́ко да бу́дете сы́нове Отца́ ва́шего, И́же есть на небесе́х, я́ко со́лнце Свое́ сия́ет на злы́я и благи́я и дожди́т на пра́ведныя и на непра́ведныя.

⁴⁶ А́ще бо лю́бите лю́бящих вас, ку́ю мзду и́мате? Не и мытари́ ^[7] ли то́жде творя́т?

⁴⁷ И а́ще целу́ете дру́ги ва́ша то́кмо, что ли́шше творите́? Не и язы́чницы ли та́кожде творя́т?

⁴⁸ Бу́дите у́бо вы соверше́ни, я́коже Оте́ц ваш Небе́сный соверше́н есть.

Глава 6

¹ Внемли́те ми́лостыни ва́шея не твори́ти пред челове́ки, да ви́дими бу́дете и́ми, а́ще ли же ни, мзды не и́мате от Отца́ ва́шего, И́же есть на небесе́х.

² Егда́ у́бо твори́ши ми́лостыню, не воструби́ пред собо́ю, я́коже лицеме́ри творя́т в со́нмищах и в сто́гнах, я́ко да просла́вятся от челове́к. Ами́нь глаго́лю вам, восприе́млют мзду свою́.

³ Тебе́ же творя́щу ми́лостыню, да не уве́сть шу́йца твоя́, что твори́т десни́ца твоя́.

⁴ Я́ко да бу́дет ми́лостыня твоя́ вта́йне, и Оте́ц твой, ви́дяй вта́йне, той возда́ст тебе́ я́ве.

⁵ И егда́ мо́лишися, не бу́ди я́коже лицеме́ри, я́ко лю́бят в со́нмищах и в сто́гнах пути́й стоя́ще моли́тися, я́ко да явя́тся челове́ком. Ами́нь глаго́лю вам, я́ко восприе́млют мзду свою́.

⁶ Ты же, егда́ мо́лишися, вни́ди в клеть твою́, и затвори́в две́ри твоя́, помоли́ся Отцу́ твоему́, И́же вта́йне, и Оте́ц твой, ви́дяй вта́йне, возда́ст тебе́ я́ве.

⁷ Моля́щеся же не ли́шше глаго́лите, я́коже язы́чницы:

⁸ Мнят бо, я́ко во многоглаго́лании свое́м услы́шани бу́дут. Не подо́битеся у́бо им, весть бо Оте́ц ваш, и́хже тре́буете, пре́жде проше́ния ва́шего.

⁹ Си́це у́бо моли́теся вы: О́тче наш, и́же еси́ на небесе́х, да святи́тся и́мя Твое́,

¹⁰ Да прии́дет Ца́рствие Твое́, да бу́дет во́ля Твоя́, я́ко на небеси́, и на земли́.

¹¹ Хлеб наш насу́щный даждь нам днесь,

¹² И оста́ви нам до́лги на́ша, я́ко и мы оставля́ем должнико́м на́шим.

¹³ И не введи́ нас в напа́сть, но изба́ви нас от лука́ваго, я́ко Твое́ есть Ца́рствие и си́ла и сла́ва во ве́ки. Ами́нь.

¹⁴ А́ще отпуща́ете челове́ком согреше́ния их, отпу́стит и вам Оте́ц ваш Небе́сный.

¹⁵ А́ще ли не отпуща́ете челове́ком согреше́ния их, ни Оте́ц ваш отпу́стит вам согреше́ний ва́ших.

¹⁶ Егда́ же постите́ся, не бу́дите я́коже лицеме́ри се́тующе: помрача́ют бо ли́ца своя́, я́ко да явя́тся челове́ком постя́щеся. Ами́нь глаго́лю вам, я́ко восприе́млют мзду свою́.

¹⁷ Ты же постя́ся пома́жи главу́ твою́, и лице́ твое́ умы́й,

¹⁸ Я́ко да не яви́шися челове́ком постя́ся, но Отцу́ твоему́, И́же вта́йне, и Оте́ц твой, ви́дяй вта́йне, возда́ст тебе́ я́ве.

¹⁹ Не скрыва́йте себе́ сокро́вищ на земли́, иде́же червь и тля тлит, и иде́же та́тие подко́пывают и кра́дут.

²⁰ Скрыва́йте же себе́ сокро́вище на небеси́, иде́же ни червь, ни тля тлит, и иде́же та́тие не подко́пывают, ни кра́дут.

²¹ Иде́же бо есть сокро́вище ва́ше, ту бу́дет и се́рдце ва́ше.

²² Свети́льник те́лу есть о́ко. А́ще у́бо бу́дет о́ко твое́ про́сто, все те́ло твое́ све́тло бу́дет.

²³ А́ще ли о́ко твое́ лука́во бу́дет, все те́ло твое́ те́мно бу́дет. А́ще у́бо свет, и́же в тебе́, тма есть, то тма кольми́?

²⁴ Никто́же мо́жет двема́ господи́нома рабо́тати: лю́бо еди́наго возлю́бит, а друга́го возненави́дит, или́ еди́наго держи́тся, о друзе́м же нераде́ти на́чнет. Не мо́жете Бо́гу рабо́тати и мамо́не. ^[8]

²⁵ Сего́ ра́ди глаго́лю вам: не пецы́теся душе́ю ва́шею, что я́сте, или́ что пие́те, ни те́лом ва́шим, во что облече́теся. Не душа́ ли бо́льши есть пи́щи, и те́ло оде́жди?

²⁶ Воззри́те на пти́цы небе́сныя, я́ко не се́ют, ни жнут, ни собира́ют в жи́тницы, и Оте́ц ваш Небе́сный пита́ет их. Не вы ли па́че лу́чши их есте́?

²⁷ Кто же от вас пеки́йся мо́жет приложи́ти во́зрасту своему́ ла́коть еди́н?

²⁸ И о оде́жди что пече́теся? Смотри́те крин се́льных, ка́ко расту́т, не тружда́ются, ни пряду́т.

²⁹ Глаго́лю же вам, я́ко ни Соломо́н во всей сла́ве свое́й облече́ся, я́ко еди́н от сих.

³⁰ А́ще же се́но се́льное, днесь су́ще и у́тре в пещь вмета́емо, Бог та́ко одева́ет, не мно́го ли па́че вас, малове́ри?

³¹ Не пецы́теся у́бо, глаго́люще: что я́мы, или́ что пие́м, или́ чим оде́ждемся?

³² Всех бо сих язы́цы и́щут, весть бо Оте́ц ваш Небе́сный, я́ко тре́буете сих всех.

³³ Ищи́те же пре́жде Ца́рствия Бо́жия и пра́вды Его́, и сия́ вся приложа́тся вам.

³⁴ Не пецы́теся у́бо на у́трей, у́трений бо собо́ю пече́тся, довле́ет дне́ви зло́ба ^[9] его́.

Глава 7

¹ Не суди́те, да не суди́ми бу́дете.

² И́мже бо судо́м су́дите, су́дят вам, и в ню́же ме́ру ме́рите, возме́рится вам.

³ Что же ви́диши суче́ц, и́же во о́це бра́та твоего́, бервна́ же, е́же есть во о́це твое́м, не чу́еши?

⁴ Или́ ка́ко рече́ши бра́ту твоему́: оста́ви, да изму́ суче́ц из очесе́ твоего́, и се бервно́ во о́це твое́м?

⁵ Лицеме́ре, изми́ пе́рвее бервно́ из очесе́ твоего́, и тогда́ у́зриши изъя́ти суче́ц из очесе́ бра́та твоего́.

⁶ Не дади́те свята́я псом, ни помета́йте би́сер ва́ших пред свиния́ми, да не поперу́т их нога́ми свои́ми и вра́щшеся расто́ргнут вы.

⁷ Проси́те и да́стся вам, ищи́те и обря́щете, толцы́те и отве́рзется вам.

⁸ Всяк бо прося́й прие́млет, и ищя́й обрета́ет, и толку́щему отве́рзется.

⁹ Или́ кто есть от вас челове́к, его́же а́ще воспро́сит сын его́ хле́ба, еда́ ка́мень пода́ст ему́?

¹⁰ Или́ а́ще ры́бы про́сит, еда́ змию́ пода́ст ему́?

¹¹ А́ще у́бо вы, лука́ви су́ще, уме́ете дая́ния бла́га дая́ти ча́дом ва́шим, ко́льми па́че Оте́ц ваш Небе́сный даст бла́га прося́щим у Него́.

¹² Вся у́бо ели́ка а́ще хо́щете, да творя́т вам челове́цы, та́ко и вы твори́те им, се бо есть зако́н и проро́цы.

¹³ Вни́дите у́зкими враты́, я́ко простра́нная врата́ и широ́кий путь вводя́й в па́губу, и мно́зи суть входя́щии им.

¹⁴ Что у́зкая врата́, и те́сный путь вводя́й в живо́т, и ма́ло их есть, и́же обрета́ют его́.

¹⁵ Внемли́те же от лжи́вых проро́к, и́же прихо́дят к вам во оде́ждах о́вчих, внутрь же суть во́лцы хи́щницы.

¹⁶ От плод их позна́ете их. Еда́ объе́млют от те́рния гро́зды, или́ от ре́пия смо́квы?

¹⁷ Та́ко вся́ко дре́во до́брое плоды́ добры́ твори́т, а зло́е дре́во плоды́ злы твори́т.

¹⁸ Не мо́жет дре́во добро́ плоды́ злы твори́ти, ни дре́во зло плоды́ добры́ твори́ти.

¹⁹ Вся́ко у́бо дре́во, е́же не твори́т плода́ добра́, посека́ют е́ и во огнь вмета́ют.

²⁰ Те́мже у́бо от плод их позна́ете их.

²¹ Не всяк глаго́ляй Ми: Го́споди, Го́споди, вни́дет в Ца́рствие Небе́сное, но творя́й во́лю Отца́ Моего́, И́же есть на небесе́х.

²² Мно́зи реку́т Мне во он день: Го́споди, Го́споди, не в Твое́ ли и́мя проро́чествовахом, и Твои́м и́менем бе́сы изгони́хом, и Твои́м и́менем си́лы мно́ги сотвори́хом?

²³ И тогда́ испове́м им, я́ко николи́же знах вас, отиди́те от Мене́, де́лающии беззако́ние.

²⁴ Всяк у́бо, и́же слы́шит словеса́ Моя́ сия́ и твори́т я́, уподо́блю его́ му́жу му́дру, и́же созда́ хра́мину свою́ на ка́мени.

²⁵ И сни́де дождь, и приидо́ша ре́ки, и возве́яша ве́три, и нападо́ша на хра́мину ту, и не паде́ся, основана́ бо бе на ка́мени.

²⁶ И всяк слы́шай словеса́ Моя́ сия́, и не творя́ их, уподо́бится му́жу уро́диву, и́же созда́ хра́мину свою́ на песце́.

²⁷ И сни́де дождь, и приидо́ша ре́ки, и возве́яша ве́три, и опро́шася хра́мине той, и паде́ся, и бе разруше́ние ея́ ве́лие.

²⁸ И бысть егда́ сконча́ Иису́с словеса́ сия́, дивля́хуся наро́ди о уче́нии Его́.

²⁹ Бе бо учя́ их я́ко власть име́я, и не я́ко кни́жницы и фарисе́е.

Глава 8

¹ Сше́дшу же Ему́ с горы́, вслед Его́ идя́ху наро́ди мно́зи.

² И се прокаже́н прише́д кла́няшеся Ему́, глаго́ля: Го́споди, а́ще хо́щеши, мо́жеши мя очи́стити.

³ И просте́р ру́ку Иису́с, косну́ся ему́, глаго́ля: хощу́, очи́стися. И а́бие очи́стися ему́ прока́за.

⁴ И глаго́ла ему́ Иису́с: виждь, ни кому́же пове́ждь, но шед покажи́ся иере́ови и принеси́ дар, его́же повеле́ в зако́не Моисе́й, во свиде́тельство им.

⁵ Вше́дшу же Ему́ в Капернау́м, приступи́ к Нему́ со́тник, моля́ Его́

⁶ И глаго́ля: Го́споди, о́трок мой лежи́т в дому́ осла́блен, лю́те стражда́.

⁷ И глаго́ла ему́ Иису́с: Аз прише́д изцелю́ его́.

⁸ И отвеща́в со́тник, рече́ Ему́: Го́споди, несмь досто́ин, да под кров мой вни́деши, но то́кмо рцы сло́во, и изцеле́ет о́трок мой.

⁹ И́бо аз челове́к есмь под вла́стию, имы́й под собо́ю во́ины, и глаго́лю сему́: иди́, и и́дет. И друго́му: прииди́, и прии́дит. И рабу́ моему́: сотвори́ сие́, и сотвори́т.

¹⁰ Слы́шав же Иису́с, удиви́ся, и рече́ гряду́щим по Нем: ами́нь глаго́лю вам, ни во Изра́или толи́ки ве́ры обрето́х.

¹¹ Глаго́лю же вам, я́ко мно́зи от восто́к и за́пад прии́дут и возля́гут со Авраа́мом и Исаа́ком и Иа́ковом во Ца́рствии Небе́снем.

¹² Сы́нове же ца́рствия изгна́ни бу́дут во тму кроме́шнюю, ту бу́дет плачь и скре́жет зубо́м.

¹³ И рече́ Иису́с со́тнику: иди́, и я́коже ве́ровал еси́, бу́ди тебе́. И изцеле́ о́трок его́ в той час.

¹⁴ И прише́д Иису́с в дом Петро́в, ви́де те́щу его́ лежа́щу и огне́м жего́му.

¹⁵ И прикосну́ся руце́ ея́, и оста́ви ю́ огнь, и воста́ и служа́ше ему́.

¹⁶ По́зде же бы́вшу, приведо́ша к Нему́ бе́сны мно́ги, и изгна́ ду́хи сло́вом и вся боля́щия исцели́.

¹⁷ Да сбу́дется рече́нное Иса́ием проро́ком, глаго́лющим: Той неду́ги на́ша прия́т и боле́зни понесе́.

¹⁸ Ви́дев же Иису́с мно́ги наро́ды о́крест Себе́, повеле́ ити́ на он пол.

¹⁹ И присту́пль еди́н кни́жник, рече́ Ему́: Учи́телю, иду́ по Тебе́, а́може а́ще и́деши.

²⁰ Глаго́ла ему́ Иису́с: ли́си я́звины и́мут, и пти́цы небе́сныя гне́зда, Сын же Челове́ческий не и́мать где главы́ подклони́ти.

²¹ Други́й же от учени́к Его́ рече́ Ему́: Го́споди, повели́ ми пре́жде ити́ и погребсти́ отца́ моего́.

²² Иису́с же рече́ ему́: гряди́ по Мне и оста́ви ме́ртвых погребсти́ своя́ мертвецы́.

²³ И вле́зшу Ему́ в кора́бль, по Нем идо́ша ученицы́ Его́.

²⁴ И се трус вели́к бысть в мо́ри, я́коже кораблю́ покрыва́тися волна́ми, То́йже же спа́ше.

²⁵ И прише́дше ученицы́ Его́ возбуди́ша Его́, глаго́люще: Го́споди, спаси́ ны, погиба́ем.

²⁶ И глаго́ла им: что страшли́ви есте́, малове́ри? Тогда́ воста́в запрети́ ве́тром и мо́рю, и бысть тишина́ ве́лия.

²⁷ Челове́цы же чуди́шася, глаго́люще: кто есть Сей, я́ко и ве́три и мо́ре послу́шают Его́?

²⁸ И прише́дшу Ему́ на о́н пол, ^[10] в страну́ Гергеси́нскую, срето́ста Его́ два бе́сна от гроб ^[11] исходя́ща, лю́та зело́, я́ко не мощи́ ни кому́ мину́ти путе́м тем.

²⁹ И се возопи́ста глаго́люще: что нам и Тебе́, Иису́се Сы́не Бо́жий? Прише́л еси́ се́мо пре́жде вре́мене му́чити нас.

³⁰ Бя́ше же дале́че от нею́ ста́до свини́й мно́го пасо́мо.

³¹ Бе́си же моля́ху Его́, глаго́люще: а́ще изго́ниши ны, повели́ нам ити́ в ста́до свино́е.

³² И рече́ им: иди́те. Они́ же изше́дше идо́ша в ста́до свино́е, и се а́бие устреми́ся ста́до все по бре́гу в мо́ре, и утопо́ша в вода́х.

³³ Пасу́щии же бежа́ша, и ше́дше во град, возвести́ша вся, и о бесно́ю.

³⁴ И се весь град изы́де в сре́тение Иису́сови, и ви́девше Его́, моли́ша, я́ко дабы́ преше́л от преде́л их.

Глава 9

¹ И влез в кора́бль, пре́йде и прии́де во Свой град.

² И се принесо́ша Ему́ разсла́блена жи́лами, на одре́ лежа́ща, и ви́дев Иису́с ве́ру их, рече́ разсла́бленному: дерза́й, ча́до, отпуща́ются ти греси́ твои́.

³ И се не́цыи от кни́жник ре́ша в себе́: Сей ху́лит.

⁴ И ви́дев Иису́с помышле́ния их, рече́: вску́ю вы мы́слите лука́вая в сердца́х свои́х?

⁵ Что бо есть удо́бее рещи́: отпуща́ются ти греси́, или́ рещи́: воста́ни и ходи́?

⁶ Но да уве́сте, я́ко власть и́мать Сын Челове́ческий на земли́ отпуща́ти грехи́, тогда́ глаго́ла разсла́бленному: воста́ни, возми́ твой одр и иди́ в дом твой.

⁷ И воста́в, взем одр свой, и́де в дом свой.

⁸ Ви́девше же наро́ди чуди́шася и просла́виша Бо́га, да́вшаго власть такову́ю челове́ком.

⁹ И преходя́ Иису́с отту́ду, ви́де челове́ка седя́ща на мы́тнице, Матфе́а глаго́лема, и глаго́ла ему́: по Мне гряди́. И воста́в по Нем и́де.

¹⁰ И бысть Ему́ возлежа́щу в дому́, и се мно́зи мытари́ и гре́шницы прише́дше возлежа́ху со Иису́сом и со ученики́ Его́.

¹¹ И ви́девше фарисе́е, глаго́лаху ученико́м Его́: почто́ с мытари́ и гре́шники Учи́тель ваш яст и пие́т?

¹² Иису́с же слы́шав рече́ им: не тре́буют здра́вии врача́, но боля́щии.

¹³ Ше́дше же научи́теся, что есть: ми́лости хощу́, а не же́ртвы? Не приидо́х бо призва́ти пра́ведники, но гре́шники на покая́ние.

¹⁴ Тогда́ приступи́ша ко Нему́ ученицы́ Иоа́нновы, глаго́люще: почто́ мы и фарисе́и пости́мся мно́го, ученицы́ же Твои́ не постя́тся?

¹⁵ И рече́ им Иису́с: еда́ мо́гут сы́нове бра́чнии пла́кати, ели́ко вре́мя с ни́ми есть жени́х? Прии́дут же дни́е, егда́ оты́мется от них жени́х, и тогда́ постя́тся.

¹⁶ Никто́же бо приставля́ет приставле́ния пла́та небе́лена ри́зе ве́тсе: во́змет бо кончи́ну свою́ от ри́зы, и го́рша дира́ бу́дет. ^[12]

¹⁷ Ниже́ влива́ют вина́ но́ва в ме́хи ве́тхи, а́ще ли же ни, то просадя́тся ме́си, и вино́ пролие́тся, и ме́си поги́бнут, но влива́ют вино́ но́во в ме́хи но́вы, и обое́ соблюде́тся.

¹⁸ Сия́ ему́ глаго́лющу к ним, се князь не́кий прише́д кла́няшеся Ему́ глаго́ля, я́ко дщи моя́ ны́не у́мре, но прише́д возложи́ на ню ру́ку Твою́, и оживе́т.

¹⁹ И воста́в Иису́с по нем и́де, и ученицы́ Его́.

²⁰ И се жена́ кровоточи́ва двана́десяте лет, присту́пльши созади́, прикосну́ся воскри́лию ри́зы Его́.

²¹ Глаго́лаше бо в себе́: а́ще то́кмо прикосну́ся ри́зе Его́, спасе́на бу́ду.

²² Иису́с же обра́щься и ви́дев ю́, рече́: дерза́й, дщи, ве́ра твоя́ спасе́ тя. И спасе́на бысть жена́ от часа́ того́.

²³ И прише́д Иису́с в дом княжь, и ви́де сопца́ и наро́д мо́лвящь,

²⁴ Глаго́ла им: отиди́те, не у́мре бо деви́ца, но спит. И руга́хуся Ему́.

²⁵ Егда́ же изгна́н бысть наро́д, вшед я́т ю́ за ру́ку, и воста́ деви́ца.

²⁶ И изы́де весть сия́ по всей земли́ той.

²⁷ И преходя́щу отту́ду Иису́сови, по Нем идо́ста два слепца́, зову́ща и глаго́люща: поми́луй ны, Иису́се сы́не Дави́дов.

²⁸ Прише́дшу же Ему́ в дом, приступи́ста к Нему́ слепца́, и глаго́ла и́ма Иису́с: ве́руета ли, я́ко могу́ сие́ сотвори́ти? Глаго́ласта Ему́: ей, Го́споди.

²⁹ Тогда́ прикосну́ся о́чию их, глаго́ля: по ве́ре ва́ю бу́ди ва́ма.

³⁰ И отверзо́стася о́чи и́ма, и запрети́ и́ма Иису́с, глаго́ля: блюди́та, да никто́же уве́сть.

³¹ О́на же изше́дша просла́виста Его́ по всей земли́ той.

³² Те́ма же исходя́щема, се приведо́ша к Нему́ челове́ка не́ма бесну́ема.

³³ И изгна́ну бе́су, проглаго́ла немы́й. И диви́шася наро́ди, глаго́люще, я́ко николи́же яви́ся та́ко во Изра́или.

³⁴ Фарисе́е же глаго́лаху: о кня́зе бесо́встем изго́нит бе́сы.

³⁵ И прохожда́ше Иису́с гра́ды вся и ве́си, учя́ на со́нмищах их, и пропове́дая Ева́нгелие Ца́рствия, и целя́ всяк неду́г и вся́ку я́зю в лю́дех.

³⁶ Ви́дев же наро́ды, милосе́рдова о них, я́ко бя́ху смяте́ни и отве́ржени, я́ко о́вцы не иму́щия па́стыря.

³⁷ Тогда́ глаго́ла ученико́м Свои́м: жа́тва у́бо мно́га, де́лателей же ма́ло.

³⁸ Моли́теся у́бо Господи́ну жа́твы, я́ко да изведе́т де́латели на жа́тву Свою́.

Глава 10

¹ И призва́ обана́десять ученики́ Своя́, даде́ им власть на дусе́х нечи́стых, я́ко да изго́нят их, и цели́ти всяк неду́г и вся́ку боле́знь.

² Двана́десятих же Апо́столов имена́ суть сия́: пе́рвый Си́мон, и́же нарица́ется Петр, и Андре́й брат его́, Иа́ков Зеведе́ев и Иоа́нн брат его́,

³ Фили́пп и Варфоломе́й, Фома́ и Матфе́й мыта́рь, Иа́ков Алфе́ев и Левве́й, нарече́нный Фадде́й,

⁴ Си́мон Канани́т и Иу́да Искарио́тский, и́же и предаде́ Его́.

⁵ Сия́ обана́десять посла́ Иису́с, запове́да им, глаго́ля: на путь язы́к не иди́те и во град Самаря́нский не вни́дите.

⁶ Иди́те же па́че ко овца́м поги́бшим до́му Изра́илева.

⁷ Ходя́ще же пропове́дуйте, глаго́люще, я́ко прибли́жися Ца́рствие Небе́сное.

⁸ Боля́щия изцеля́йте, прокаже́нныя очища́йте, ме́ртвыя воскреша́йте, бе́сы изгоня́йте, ту́не прия́сте, ту́не дади́те.

⁹ Не стяжи́те зла́та, ни сребра́, ни ме́ди при поясе́х ва́ших,

¹⁰ Ни пи́ры на пути́, ни двою́ ри́зу, ни сапо́г, ни жезл, досто́ин бо есть де́латель мзды своея́.

¹¹ Во́ньже а́ще [коли́ждо] град или́ весь вни́дете, испыта́йте, кто в нем досто́ин есть, и ту пребу́дите, до́ндеже изы́дете.

¹² Входя́ще же в дом целу́йте его́, [глаго́люще: мир до́му сему́],

¹³ И а́ще у́бо бу́дет дом досто́ин, прии́дет мир ваш нань, а́ще ли же не бу́дет досто́ин, мир ваш к вам возврати́тся.

¹⁴ И и́же а́ще не прии́мет вас, ниже́ послу́шает слове́с ва́ших, исходя́ще из до́му или́ из гра́да того́, оттряси́те прах ног ва́ших.

¹⁵ Ами́нь, глаго́лю вам, отра́днее бу́дет земли́ Содо́мстей и Гомо́ррстей в день су́дный, не́же гра́ду тому́.

¹⁶ Се Аз посыла́ю вас я́ко о́вцы посреде́ волко́в, бу́дите у́бо му́дри я́ко змия́, и це́ли я́ко го́лубие.

¹⁷ Внемли́те же от челове́к, предадя́т бо вы на со́нмы, и на собо́рищах их бию́т вас.

¹⁸ И пред влады́ки же и цари́ веде́ни бу́дете Мене́ ра́ди, во свиде́тельство им и язы́ком.

¹⁹ Егда́ же предаю́т вы, не пецы́теся, ка́ко или́ что возглаго́лете: даст бо ся вам в той час, что возглаго́лете.

²⁰ Не вы бо бу́дете глаго́лющии, но Дух Отца́ ва́шего глаго́ляй в вас.

²¹ Преда́ст же брат бра́та на смерть и оте́ц ча́до, и воста́нут ча́да на роди́тели и убию́т их.

²² И бу́дете ненави́дими все́ми и́мени Моего́ ра́ди. Претерпе́вый же до конца́, той спасе́н бу́дет.

²³ Егда́ же го́нят вы во гра́де сем, бе́гайте в други́й. Ами́нь бо, глаго́лю вам, не и́мате сконча́ти гра́ды Изра́илевы, до́ндеже прии́дет Сын Челове́ческий.

²⁴ Несть учени́к над учи́телем свои́м, ниже́ раб над господи́ном свои́м.

²⁵ Довле́ет ученику́, да бу́дет я́ко учи́тель его́, и раб я́ко госпо́дь его́. А́ще господи́на до́му веельзеву́ла нареко́ша, кольми́ па́че дома́шния его́?

²⁶ Не убо́йтеся у́бо их, ничто́же бо есть покрове́но, е́же не откры́ется, и та́йно, е́же не уве́дено бу́дет.

²⁷ Е́же глаго́лю вам во тме, рцы́те во све́те: и е́же во у́ши слы́шите, пропове́дите на кро́вех.

²⁸ И не убо́йтеся от убива́ющих те́ло, ду́шу же не могу́щих уби́ти, убо́йтеся же па́че могу́щаго и ду́шу и те́ло погуби́ти в гее́нне.

²⁹ Не две ли пти́це цени́теся еди́ному асса́рию? ^[13] И ни еди́на от нею́ паде́т на земли́ без Отца́ ва́шего.

³⁰ Вам же и вла́си главни́и вси изочте́ни суть.

³¹ Не убо́йтеся у́бо, мно́зех птиц лу́чши есте́ вы.

³² Всяк и́же испове́сть Мя пред челове́ки, испове́м его́ и Аз пред Отце́м Мои́м, и́же на небесе́х.

³³ А и́же отве́ржется Мене́ пред челове́ки, отве́ргуся его́ и Аз пред Отце́м Мои́м, и́же на небесе́х.

³⁴ Не мни́те, я́ко приидо́х воврещи́ ми́р на зе́млю: не приидо́х воврещи́ ми́р, но мечь:

³⁵ Приидо́х бо разлучи́ти челове́ка на отца́ своего́, и дщерь на ма́терь свою́, и неве́сту на свекро́вь свою́.

³⁶ И врази́ челове́ку дома́шнии его́.

³⁷ И́же лю́бит отца́ или́ ма́терь па́че Мене́, несть Мене́ досто́ин, и и́же лю́бит сы́на или́ дщерь па́че Мене́, несть Мене́ досто́ин,

³⁸ И и́же не прии́мет креста́ своего́ и вслед Мене́ гряде́т, несть Мене́ досто́ин.

³⁹ Обреты́й ду́шу свою́ погуби́т ю́, а и́же погуби́т ду́шу свою́ Мене́ ра́ди, обря́щет ю́.

⁴⁰ И́же вас прие́млет, Мене́ прие́млет, и и́же прие́млет Мене́, прие́млет Посла́вшаго Мя.

⁴¹ Прие́мляй проро́ка во и́мя проро́че, мзду проро́чу прии́мет, и прие́мляй пра́ведника во и́мя пра́ведниче, мзду пра́ведничу прии́мет.

⁴² И и́же а́ще напои́т еди́наго от ма́лых сих ча́шу студены́ воды́ то́кмо, во и́мя ученика́, ами́нь глаго́лю вам, не погуби́т мзды своея́.

Глава 11

¹ И бысть, егда́ соверши́ Иису́с запове́дая обемана́десяте ученико́ма Свои́ма, пре́йде отту́ду учи́ти и пропове́дати во гра́дех их.

² Иоа́нн же слы́шав во узи́лищи дела́ Христо́ва, посла́ два от учени́к свои́х,

³ Рече́ Ему́: Ты ли еси́ Гряды́й, или́ ино́го ча́ем?

⁴ И отвеща́в Иису́с рече́ им: ше́дша возвести́та Иоа́ннови, я́же слы́шита и ви́дита.

⁵ Слепи́и прозира́ют и хро́мии хо́дят, прокаже́ннии очища́ются и глуси́и слы́шат, ме́ртвии востаю́т и ни́щии благовеству́ют.

⁶ И блаже́н есть, и́же а́ще не соблазни́тся о Мне.

⁷ Те́ма же исходя́щема, нача́т Иису́с наро́дом глаго́лати о Иоа́нне: чесо́ изыдо́сте в пусты́ню ви́дети? Трость ли ве́тром коле́блему?

⁸ Но чесо́ изыдо́сте ви́дети? Челове́ка ли в мя́гки ри́зы облече́нна? Се, и́же мя́гкая нося́щии, в доме́х ца́рских суть.

⁹ Но чесо́ изыдо́сте ви́дети? Проро́ка ли? Ей, глаго́лю вам, и ли́шше проро́ка.

¹⁰ Сей бо есть, о не́мже есть пи́сано: се Аз посыла́ю А́нгела Моего́ пред лице́м Твои́м, и́же угото́вит путь Твой пред Тобо́ю.

¹¹ Ами́нь глаго́лю вам, не воста́ в рожде́нных жена́ми бо́лий Иоа́нна Крести́теля, мний же во Ца́рствии Небе́снем бо́лий его́ есть.

¹² От дний же Иоа́нна Крести́теля досе́ле Ца́рствие Небе́сное ну́дится, ^[14] и ну́ждницы восхища́ют е́.

¹³ Вси бо проро́цы и зако́н до Иоа́нна прореко́ша.

¹⁴ И а́ще хо́щете прия́ти, той есть Илиа́ хотя́й приити́.

¹⁵ Име́яй у́ши слы́шати да слы́шит.

¹⁶ Кому́ же уподо́блю род сей? Подо́бен есть де́тем седя́щим на то́ржищих, и возглаша́ющим друго́м свои́м,

¹⁷ И глаго́лющим: писка́хом вам, и не пляса́сте, пла́кахом вам, и не рыда́сте.

¹⁸ Прии́де бо Иоа́нн ни яды́й, ни пия́й, и глаго́лют: бе́са и́мать.

¹⁹ Прии́де Сын Челове́ческий яды́й и пия́й, и глаго́лют: се челове́к я́дца и винопи́йца, мытаре́м друг и гре́шником. И оправди́ся прему́дрость от чад свои́х.

²⁰ Тогда́ нача́т Иису́с поноша́ти градово́м, в ни́хже бы́ша мно́жайшия си́лы Его́, зане́ не пока́яшася:

²¹ Го́ре тебе́, Хорази́не, го́ре тебе́, Вифсаи́до, я́ко а́ще в Ти́ре и Сидо́не бы́ша си́лы бы́ли бы́вшия в вас, дре́вле у́бо во вре́тищи и пе́пеле пока́ялися бы́ша.

²² Оба́че глаго́лю вам Ти́ру и Сидо́ну отра́днее бу́дет в день су́дный, не́же вам.

²³ И ты, Капернау́ме, и́же до небе́с вознесы́йся, до а́да сни́деши, зане́ а́ще в Содо́мех бы́ша си́лы бы́ли бы́вшия в тебе́, пребы́ли у́бо бы́ша до дне́шняго дне.

²⁴ Оба́че глаго́лю вам, я́ко земли́ Содо́мстей отра́днее бу́дет в день су́дный, не́же тебе́.

²⁵ В то вре́мя отвеща́в Иису́с рече́: испове́даю Ти ся, О́тче, Го́споди небесе́ и земли́, я́ко утаи́л еси́ сия́ от прему́дрых и разу́мных и откры́л еси́ та младе́нцем.

²⁶ Ей, О́тче, я́ко та́ко бысть благоволе́ние пред Тобо́ю.

²⁷ Вся Мне предана́ суть Oтце́м Мои́м, и никто́же зна́ет Сы́на, то́кмо Oте́ц, ни Oтца́ кто зна́ет, то́кмо Сын, и ему́же а́ще во́лит Сын откры́ти.

²⁸ Прииди́те ко Мне вси тружда́ющиися и обремене́ннии, и Аз упоко́ю вы.

²⁹ Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим.

³⁰ И́го бо Мое́ бла́го, и бре́мя Мое́ легко́ есть.

Глава 12

¹ В то вре́мя и́де Иису́с в суббо́ты сквозе́ се́яния, ученицы́ же Его́ взалка́ша и нача́ша востерза́ти кла́сы и я́сти.

² Фарисе́е же ви́девше ре́ша Ему́: се ученицы́ Твои́ творя́т, его́же не досто́ит твори́ти в суббо́ту.

³ Он же рече́ им: не́сте ли чли, что сотвори́ Дави́д, егда́ взалка́ сам и су́щии с ним?

⁴ Ка́ко вни́де в храм Бо́жий и хле́бы предложе́ния снеде́, и́хже не досто́йно бе ему́ я́сти, ни су́щим с ним, то́кмо иере́ем еди́ным?

⁵ Или́ не́сте чли в зако́не, я́ко в суббо́ты свяще́нницы в це́ркви суббо́ты скверня́т и непови́нни суть?

⁶ Глаго́лю же вам, я́ко це́ркве бо́ле есть зде.

⁷ А́ще ли бы́сте ве́дали, что есть: ми́лости хощу́, а не же́ртвы, николи́же у́бо бы́сте осужда́ли непови́нных.

⁸ Госпо́дь бо есть и суббо́ты Сын Челове́ческий.

⁹ И преше́д отту́ду, прии́де на со́нмище ^[15] их.

¹⁰ И се челове́к бе ту, ру́ку имы́й су́ху. И вопроси́ша Его́, глаго́люще: а́ще досто́ит в суббо́ты цели́ти? Да на Него́ возглаго́лют.

¹¹ Он же рече́ им: кто есть от вас челове́к, и́же и́мать овча́ еди́но, и а́ще впаде́тся в суббо́ты в я́му, не и́мет ли е́ и и́змет?

¹² Кольми́ у́бо лу́чше есть челове́к овча́те? Те́мже досто́ит в суббо́ты добро́ твори́ти.

¹³ Тогда́ глаго́ла челове́ку: простри́ ру́ку твою́. И простре́, и утверди́ся цела́ я́ко друга́я.

¹⁴ Фарисе́е же ше́дше сове́т сотвори́ша на него́, ка́ко Его́ погубя́т. Иису́с же разуме́в оты́де отту́ду.

¹⁵ И по Нем идо́ша наро́ди мно́зи, и исцели́ их всех.

¹⁶ И запрети́ им, да не я́ве Его́ творя́т.

¹⁷ Я́ко да сбу́дется рече́нное Иса́ием проро́ком, глаго́лющим:

¹⁸ Се О́трок Мой, Его́же изво́лих, Возлю́бленный Мой, Нань же благоволи́ душа́ Моя́. Положу́ дух Мой на Нем, и суд язы́ком возвести́т.

¹⁹ Не пререче́т, ни возопие́т, ниже́ услы́шит кто на распу́тиих гла́са Его́.

²⁰ Тро́сти сокруше́нны не прело́мит и ле́на вне́мшася ^[16] не угаси́т, до́ндеже изведе́т в побе́ду суд.

²¹ И на и́мя Его́ язы́цы упова́ют.

²² Тогда́ приведо́ша к Нему́ бесную́щася сле́па и не́ма, и исцели́ его́, я́ко слепо́му и немо́му глаго́лати и гля́дати.

²³ И дивля́хуся вси наро́ди глаго́люще: еда́ Сей есть Христо́с сын Дави́дов?

²⁴ Фарисе́е же слы́шавше ре́ша: Сей не изго́нит бе́сы, то́кмо о веельзеву́ле кня́зе бесо́встем.

²⁵ Ве́дый же Иису́с мы́сли их, рече́ им: вся́кое ца́рство разде́льшееся на ся запусте́ет, и всяк град или́ дом раздели́выйся на ся не ста́нет.

²⁶ И а́ще сатана́ сатану́ изго́нит, на ся раздели́лся есть: ка́ко у́боста́нет ца́рство его́?

²⁷ И а́ще Аз о веельзеву́ле изгоню́ бе́сы, сы́нове ва́ши о ком изго́нят? Сего́ ра́ди ти́и вам бу́дут судии́.

²⁸ А́ще ли же Аз о Ду́се Бо́жии изгоню́ бе́сы, у́бо пости́же на вас Ца́рствие Бо́жие.

²⁹ Или́ ка́ко мо́жет кто вни́ти в дом кре́пкаго и сосу́ды его́ расхи́тити, а́ще не пе́рвее свя́жет кре́пкаго, и тогда́ дом его́ расхи́тит?

³⁰ И́же несть со Мно́ю, на Мя есть, и и́же не собира́ет со Мно́ю, расточа́ет.

³¹ Сего́ ра́ди глаго́лю вам: всяк грех и хула́ отпу́стится челове́ком, а я́же на Ду́ха хула́ не отпу́стится челове́ком.

³² И и́же а́ще рече́т сло́во на Сы́на Челове́ческаго, отпу́стится ему́, а и́же рече́т на Ду́ха Свята́го, не отпу́стится ему́ ни в сий век, ни в бу́дущий.

³³ Или́ сотворите́ дре́во добро́ и плод его́ добр, или́ сотворите́ дре́во зло и плод его́ зол, от плода́ бо дре́во позна́но бу́дет.

³⁴ Порожде́ния ехи́днова, ка́ко мо́жете добро́ глаго́лати, зли су́ще? От избы́тка бо се́рдца уста́ глаго́лют.

³⁵ Благи́й челове́к от блага́го сокро́вища изно́сит блага́я, и лука́вый челове́к от лука́ваго сокро́вища изно́сит лука́вая.

³⁶ Глаго́лю же вам, я́ко вся́ко сло́во пра́здное, е́же а́ще реку́т челове́цы, воздадя́т о нем сло́во в день су́дный.

³⁷ От слове́с бо свои́х оправди́шися, и от слове́с свои́х осу́дишися.

³⁸ Тогда́ отвеща́ша не́цыи от кни́жник и фарисе́й, глаго́люще: Учи́телю, хо́щем от Тебе́ зна́мение ви́дети.

³⁹ Он же отвеща́в рече́ им: род лука́в и прелюбоде́й зна́мения и́щет, и зна́мение не да́стся ему́, то́кмо зна́мение Ио́ны проро́ка.

⁴⁰ Я́коже бо бе Ио́на во чре́ве ки́тове три дни и три но́щи, та́ко бу́дет и Сын Челове́ческий в се́рдцы земли́ три дни и три но́щи.

⁴¹ Му́жие Ниневи́тстии воста́нут на суд с ро́дом сим и осу́дят его́, я́ко пока́яшася про́поведию Ио́ниною, и се бо́ле Ио́ны зде.

⁴² Цари́ца ю́жская воста́нет на суд с ро́дом сим и осу́дит и я́ко прии́де от коне́ц земли́ слы́шати прему́дрость Соломо́нову, и се бо́ле Соломо́на зде.

⁴³ Егда́ же нечи́стый дух изы́дет от челове́ка, прехо́дит сквозе́ безво́дная ме́ста, ищя́ поко́я, и не обрета́ет.

⁴⁴ Тогда́ рече́т: возвращу́ся в дом мой, отню́дуже изыдо́х. И прише́д обря́щет пра́зден, помете́н и укра́шен.

⁴⁵ Тогда́ и́дет и по́ймет с собо́ю седмь ины́х духо́в люте́йших себе́, и вше́дше живу́т ту, и бу́дут после́дняя челове́ку тому́ го́рша пе́рвых. Та́ко бу́дет и ро́ду сему́ лука́вому.

⁴⁶ Еще́ же Ему́ глаго́лющу к наро́дом, се Ма́ти Его́ и бра́тия Его́ стоя́ху вне, и́щуще глаго́лати Ему́.

⁴⁷ Рече́ же не́кий Ему́: се Ма́ти Твоя́ и бра́тия Твоя́ вне стоя́т, хотя́ще глаго́лати Тебе́.

⁴⁸ Он же отвеща́в рече́ ко глаго́лющему Ему́: кто есть Ма́ти Моя́, и кто суть бра́тия Моя́?

⁴⁹ И просте́р ру́ку Свою́ на ученики́ Своя́, рече́: се ма́ти Моя́ и бра́тия Моя́.

⁵⁰ И́же бо а́ще сотвори́т во́лю Отца́ Моего́, И́же есть на небесе́х, той брат Мой, и сестра́, и ма́ти Ми есть.

Глава 13

¹ В день же той изше́д Иису́с из до́му, седя́ше при мо́ри.

² И собра́шася к Нему́ наро́ди мно́зи, я́коже Ему́ в кора́бль вле́зти и се́сти, и весь наро́д на бре́зе стоя́ше.

³ И глаго́ла им при́тчами мно́го, глаго́ля: се изы́де се́яй, да се́ет.

⁴ И се́ющу ему́, о́ва падо́ша при пути́, и приидо́ша пти́цы и позоба́ша я́.

⁵ Друга́я же падо́ша на ка́менных, иде́же не име́яше земли́ мно́ги, и а́бие прозябо́ша, зане́ не име́яше глубины́ земли́.

⁶ Со́лнцу же возсия́вшу присвя́нуша, и зане́ не име́яху коре́ния, изсхо́ша.

⁷ Друга́я же падо́ша в те́рнии, и взы́де те́рние и подави́ их.

⁸ Друга́я же падо́ша на земли́ до́брей и дая́ху плод, о́во у́бо сто, о́во же шестьдеся́т, о́во же три́десять.

⁹ Име́яй у́ши слы́шати да слы́шит.

¹⁰ И приступи́вше ученицы́ [Его́] реко́ша Ему́: почто́ при́тчами глаго́леши им?

¹¹ Он же отвеща́в рече́ им: я́ко вам дано́ есть разуме́ти та́йны Ца́рствия Небе́снаго, о́нем же не дано́ есть.

¹² И́же бо и́мать, да́стся ему́ и преизбу́дет ему́, а и́же не и́мать, и е́же и́мать, во́змется от него́.

¹³ Сего́ ра́ди в при́тчах глаго́лю им, я́ко ви́дяще не ви́дят, и слы́шаще не слы́шат, ни разуме́ют.

¹⁴ И сбыва́ется в них проро́чество Иса́иино, глаго́лющее: слу́хом услы́шите, и не и́мате разуме́ти, и зря́ще у́зрите, и не и́мате ви́дети.

¹⁵ Отолсте́ бо се́рдце люде́й сих, и уши́ма тя́жко слы́шаша, и о́чи свои́ смежи́ша, да не когда́ у́зрят очи́ма, и уши́ма услы́шат, и се́рдцем уразуме́ют, и обратя́тся, и изцелю́ их.

¹⁶ Ва́ша же блаже́нна очеса́, я́ко ви́дят, и у́ши ва́ши, я́ко слы́шат.

¹⁷ Ами́нь бо глаго́лю вам, я́ко мно́зи проро́цы и пра́ведницы вожделе́ша ви́дети, я́же ви́дите, и не ви́деша, и слы́шати, я́же слы́шите, и не слы́шаша.

¹⁸ Вы же услы́шите при́тчу се́ющаго.

¹⁹ Вся́кому слы́шащему сло́во Ца́рствия и не разумева́ющу, прихо́дит лука́вый и восхища́ет все́янное в се́рдце его́, сие́ есть, [и́же] при пути́ се́янное.

²⁰ А на ка́мени се́янное, сие́ есть слы́шай сло́во и а́бие с ра́достию прие́млет е́;

²¹ Не и́мать же ко́рене в себе́, но привре́менен есть, бы́вши же печа́ли или́ гоне́нию словесе́ ра́ди, а́бие соблажня́ется.

²² А се́янное в те́рнии, се есть слы́шай сло́во, и печа́ль ве́ка сего́ и лесть бога́тства подавля́ет сло́во, и без плода́ быва́ет.

²³ А се́янное на до́брей земли́, се есть слы́шай сло́во и разумева́я, и́же у́бо плод прино́сит и твори́т о́во сто, о́во же шестьдеся́т, о́во три́десять.

²⁴ И́ну при́тчу предложи́ им, глаго́ля: уподо́бися Ца́рствие Небе́сное челове́ку, се́явшу до́брое се́мя на селе́ ^[17] свое́м.

²⁵ Спя́щим же челове́ком, прии́де враг его́ и все́я пле́велы посреде́ пшени́цы и оты́де.

²⁶ Егда́ же прозябе́ трава́ и плод сотвори́, тогда́ яви́шася и пле́велие.

²⁷ Прише́дше же раби́ господи́на, ре́ша ему́: го́споди, не до́брое ли се́мя сеял еси́ на селе́ [твое́м]? Отку́ду у́бо и́мать пле́велы?

²⁸ Он же рече́ им: враг челове́к сие́ сотвори́. Раби́ же ре́ша ему́: хо́щеши ли у́бо, да ше́дше исплеве́м я́?

²⁹ Он же рече́ [им]: ни, да не когда́ восторга́юще пле́велы, восто́ргнете ку́пно с ни́ми [и] пшени́цу.

³⁰ Оста́вите расти́ обое́ ку́пно до жа́твы, и во вре́мя жа́твы реку́ жа́телем: собери́те пе́рвее пле́велы и свяжи́те их в снопы́, я́ко сожещи́ я́, а пшени́цу собери́те в жи́тницу мою́.

³¹ И́ну при́тчу предложи́ им, глаго́ля: подо́бно есть Ца́рствие Небе́сное зе́рну гору́шичну, е́же взем челове́к все́я на селе́ свое́м.

³² Е́же ма́лейше у́бо есть от всех се́мен, егда́ же возрасте́т, бо́лее [всех] зе́лий есть и быва́ет дре́во, я́ко приити́ пти́цам небе́сным и вита́ти на ве́твех его́.

³³ И́ну при́тчу глаго́ла им: подо́бно есть Ца́рствие Небе́сное ква́су, и́же взе́мши жена́ скры в мучны́х са́тех три, до́ндеже вскисо́ша вся.

³⁴ Сия́ вся глаго́ла Иису́с в при́тчах наро́дом, и без при́тчи ничесо́же глаго́лаше к ним.

³⁵ Я́ко да сбу́дется рече́нное проро́ком, глаго́лющим: отве́рзу в при́тчах уста́ Моя́, отры́гну сокрове́нная от сложе́ния міра.

³⁶ Тогда́ оста́вль наро́ды, прии́де в дом Иису́с. И приступи́ша к Нему́ ученицы́ Его́, глаго́люще: скажи́ нам при́тчу пле́вел се́льных.

³⁷ Он же отвеща́в рече́ им: се́явый до́брое се́мя есть Сын Челове́ческий,

³⁸ А село́ есть міръ. До́брое же се́мя, си́и суть сы́нове Ца́рствия, а пле́велие суть сы́нове неприя́зненнии,

³⁹ А враг все́явый их есть диа́вол, а жа́тва кончи́на ве́ка есть, а жа́тели А́нгели суть.

⁴⁰ Я́коже у́бо собира́ют пле́велы и огне́м сожига́ют, та́ко бу́дет в сконча́ние ве́ка сего́.

⁴¹ По́слет Сын Челове́ческий А́нгелы Своя́, и соберу́т от Ца́рствия Его́ вся собла́зны и творя́щия беззако́ние;

⁴² И вве́ргут их в пещь о́гненну, ту бу́дет плачь и скре́жет зубо́м.

⁴³ Тогда́ пра́ведницы просветя́тся я́ко со́лнце в Ца́рствии Отца́ их. Име́яй у́ши слы́шати да слы́шит.

⁴⁴ Па́ки подо́бно есть Ца́рствие Небе́сное сокро́вищу сокрове́ну на селе́, е́же обре́т челове́к скры, и от ра́дости его́ и́дет, и вся, ели́ка и́мать, продае́т, и купу́ет село́ то.

⁴⁵ Па́ки подо́бно есть Ца́рствие Небе́сное челове́ку купцу́, и́щущу до́брыя би́серы,

⁴⁶ И́же обре́т еди́н многоце́нен би́сер, шед продаде́ вся, ели́ка имя́ше, и купи́ его́.

⁴⁷ Па́ки подо́бно есть Ца́рствие Небе́сное не́воду вве́ржену в мо́ре и от вся́каго ро́да собра́вшу,

⁴⁸ И́же егда́ испо́лнися, извлеко́ша и на край, и се́дше избра́ша до́брыя в сосу́ды, а злы́я изверго́ша вон.

⁴⁹ Та́ко бу́дет в сконча́ние ве́ка: изы́дут А́нгели, и отлуча́т злы́я от среды́ пра́ведных,

⁵⁰ И вве́ргут их в пещь о́гненную, ту бу́дет плачь и скре́жет зубо́м.

⁵¹ Глаго́ла им Иису́с: разуме́сте ли сия́ вся? Глаго́лаша Ему́: ей, Го́споди.

⁵² Он же рече́ им: сего́ ра́ди всяк кни́жник, научи́вся Ца́рствию Небе́сному, подо́бен есть челове́ку домови́ту, и́же изно́сит от сокро́вища своего́ но́вая и ве́тхая.

⁵³ И бысть, егда́ сконча́ Иису́с при́тчи сия́, пре́йде отту́ду.

⁵⁴ И прише́д во оте́чествие Свое́, уча́ше их на со́нмищи их, я́ко диви́тися им и глаго́лати: отку́ду Сему́ прему́дрость сия́ и си́лы?

⁵⁵ Не Сей ли есть текто́нов сын? Не Ма́ти ли Его́ нарица́ется Мариа́м, и бра́тия Его́ Иа́ков и Иоси́й, и Си́мон и Иу́да?

⁵⁶ И сестры́ Его́ не вся ли в нас суть? Отку́ду у́бо Сему́ сия́ вся?

⁵⁷ И блажня́хуся о Нем. Иису́с же рече́ им: несть проро́к без че́сти, то́кмо во оте́чествии свое́м и в дому́ свое́м.

⁵⁸ И не сотвори́ ту сил мно́ги за неве́рство их.

Глава 14

¹ В то вре́мя услы́шав И́род четвертовла́стник слух Иису́сов,

² И рече́ отроко́м свои́м: Сей есть Иоа́нн Крести́тель, той воскре́се от ме́ртвых, и сего́ ра́ди си́лы де́ются о нем.

³ И́род бо есмь Иоа́нна, связа́ его́, и всади́ в темни́цу, Иродиа́ды ра́ди жены́ Фили́ппа бра́та своего́.

⁴ Глаго́лаше бо ему́ Иоа́нн: не досто́ит ти име́ти ея́.

⁵ И хотя́ше его́ уби́ти, убоя́ся наро́да, зане́ я́ко проро́ка его́ име́яху.

⁶ Дни же бы́вшу рождества́ И́родова, пляса́ дщи Иродиа́дина посреде́, и угоди́ И́родови.

⁷ Те́мже и с кля́твою изрече́ ей да́ти, его́же а́ще воспро́сит.

⁸ Она́ же нава́ждена ма́терию свое́ю, даждь ми, рече́, зде на блю́де главу́ Иоа́нна Крести́теля.

⁹ И печа́лен бысть царь, кля́твы же ра́ди, и за возлежа́щих с ним, повеле́ да́ти ей.

¹⁰ И посла́в усе́кну Иоа́нна в темни́це.

¹¹ И принесо́ша главу́ его́ на блю́де, и да́ша деви́це, и отнесе́ ма́тери свое́й.

¹² И присту́пльше ученицы́ его́, взя́ша те́ло его́, и погребо́ша е́, и прише́дше возвести́ша Иису́сови.

¹³ И слы́шав Иису́с оты́де отту́ду в корабли́, в пу́сто ме́сто еди́н. ^[18] И слы́шавше наро́ди, по Нем идо́ша пе́ши от градо́в.

¹⁴ И изше́д Иису́с ви́де мног наро́д, и милосе́рдова о них, и исцели́ неду́жныя их.

¹⁵ По́зде же бы́вшу, приступи́ша к Нему́ ученицы́ Его́, глаго́люще: пу́сто есть ме́сто, и час уже́ мину́, отпусти́ наро́ды, да ше́дше в ве́си ку́пят бра́шна себе́.

¹⁶ Иису́с же рече́ им: не тре́буют отити́, дади́те им вы я́сти.

¹⁷ Они́ же глаго́лаша Ему́: не и́мамы зде то́кмо пять хлеб и две ры́бе.

¹⁸ Он же рече́: принеси́те Ми их се́мо. ^[19]

¹⁹ И повеле́в наро́дом возлещи́ на траве́, и прие́м пять хлеб и о́бе ры́бе, воззре́в на не́бо, благослови́ и преломи́в даде́ ученико́м хле́бы, ученицы́ же наро́дом.

²⁰ И ядо́ша вси и насы́тишася, и взя́ша избы́тки укру́х, двана́десять ко́шя испо́лнь.

²¹ Яду́щих же бе муже́й я́ко пять ты́сящ, ра́зве жен и дете́й.

²² И а́бие пону́ди Иису́с ученики́ Своя́ вле́зти в кора́бль и вари́ти Его́ на о́ном полу́, ^[20] до́ндеже отпу́стит наро́ды.

²³ И отпусти́в наро́ды, взы́де на гору́ еди́н помоли́тися. По́зде же бы́вшу, еди́н бе ту.

²⁴ Кора́бль же бе посреде́ мо́ря вла́яся волна́ми, бе бо проти́вен ветр.

²⁵ В четве́ртую же стра́жу но́щи и́де к ним Иису́с, ходя́ по мо́рю.

²⁶ И ви́девше Его́ ученицы́ по мо́рю ходя́ща, смути́шася, глаго́люще, я́ко призра́к есть, и от стра́ха возопи́ша.

²⁷ А́бие же рече́ им Иису́с, глаго́ля: дерза́йте, Аз есмь, не бо́йтеся.

²⁸ Отвеща́в же Петр рече́: Го́споди, а́ще Ты еси́, повели́ ми приити́ к Тебе́ по вода́м.

²⁹ Он же рече́: прииди́. И изле́з из корабля́ Петр, хожда́ше по вода́м, приити́ ко Иису́сови.

³⁰ Ви́дя же ветр кре́пок, убоя́ся, и наче́н утопа́ти, возопи́, глаго́ля: Го́споди, спаси́ мя.

³¹ И а́бие Иису́с просте́р ру́ку, ят его́ и глаго́ла ему́: малове́ре, почто́ усумне́лся еси́?

³² И вле́зшема и́ма в кора́бль, преста́ ветр.

³³ Су́щии же в корабли́ прише́дше поклони́шася Ему́, глаго́люще: вои́стинну Бо́жий Сын еси́.

³⁴ И преше́дше приидо́ша в зе́млю Геннисаре́фскую.

³⁵ И позна́вше Его́ му́жие ме́ста того́, посла́ша во всю страну́ ту, и принесо́ша к Нему́ вся боля́щия.

³⁶ И моля́ху Его́, да то́кмо прико́снутся вскри́лию ри́зы Его́, и ели́цы прикосну́шася, спасе́ни бы́ша.

Глава 15

¹ Тогда́ приступи́ша ко Иису́сови и́же от Иерусали́ма кни́жницы и фарисе́е, глаго́люще:

² Почто́ ученицы́ Твои́ преступа́ют преда́ние ста́рец? Не умыва́ют бо рук свои́х, егда́ хлеб ядя́т.

³ Он же отвеща́в рече́ им: почто́ и вы преступа́ете за́поведь Бо́жию за преда́ние ва́ше?

⁴ Бог бо запове́да, глаго́ля: чти отца́ и ма́терь, и и́же злосло́вит отца́ или́ ма́терь, сме́ртию да у́мрет.

⁵ Вы же глаго́лете: и́же а́ще рече́т отцу́ или́ ма́тери: дар, е́же а́ще от мене́ по́льзовался еси́.

⁶ И да не почти́т отца́ своего́ или́ ма́тере. ^[21] И разори́сте за́поведь Бо́жию за преда́ние ва́ше.

⁷ Лицеме́ри, до́бре проро́чествова о вас Иса́иа, глаго́ля:

⁸ Приближа́ются Мне лю́дие си́и усты́ свои́ми и устна́ми чтут Мя, се́рдце же их дале́че отстои́т от Мене́.

⁹ Всу́е же чтут Мя, уча́ще уче́нием, за́поведем челове́ческим.

¹⁰ И призва́в наро́ды, рече́ им: слы́шите и разуме́йте:

¹¹ Не входя́щее во уста́ скверни́т челове́ка, но исходя́щее изоу́ст, то скверни́т челове́ка.

¹² Тогда́ присту́пльше ученицы́ Его́, ре́ша Ему́: ве́си ли, я́ко фарисе́е слы́шавше сло́во соблазни́шася?

¹³ Он же отвеща́в рече́: всяк сад, его́же не насади́ Оте́ц Мой Небе́сный, искорени́тся.

¹⁴ Оста́вите их, вожди́ суть сле́пи слепце́м, слепе́ц же слепца́ а́ще во́дит, о́ба в я́му впаде́тася.

¹⁵ Отвеща́в же Петр рече́ Ему́: скажи́ нам при́тчу сию́.

¹⁶ Иису́с же рече́ [им]: едина́че ^[22] ли и вы без ра́зума есте́?

¹⁷ Не у́ ли разумева́ете, я́ко вся́ко, е́же вхо́дит во уста́, во чре́во вмеща́ется и афедро́ном исхо́дит?

¹⁸ Исходя́щая же изоу́ст, от се́рдца исхо́дят, и та скверня́т челове́ка.

¹⁹ От се́рдца бо исхо́дят помышле́ния зла́я, уби́йства, прелюбодея́ния, любодея́ния, татьбы́, лжесвиде́тельства, хулы́.

²⁰ Сия́ суть скверня́щая челове́ка, а е́же неумове́нныма рука́ма я́сти, не скверни́т челове́ка.

²¹ И изше́д отту́ду Иису́с, оты́де во страны́ Ти́рския и Сидо́нския.

²² И се жена́ Ханане́йска, от преде́л тех изше́дши, возопи́ к Нему́ глаго́лющи: поми́луй мя, Го́споди, сы́не Дави́дов, дщи моя́ зле бесну́ется.

²³ Он же не отвеща́ ей словесе́. И присту́пльше ученицы́ Его́, моля́ху Его́, глаго́люще: отпусти́ ю́, я́ко вопие́т в след нас.

²⁴ Он же отвеща́в рече́: несмь по́слан, то́кмо ко овца́м поги́бшим до́му Изра́илева.

²⁵ Она́ же прише́дши поклони́ся Ему́, глаго́лющи: Го́споди, помози́ ми.

²⁶ Он же отвеща́в рече́: несть добро́ отя́ти хле́ба ча́дом и поврещи́ псом.

²⁷ Она́ же рече́: ей, Го́споди, и́бо и пси ядя́т от крупи́ц па́дающих от трапе́зы господе́й свои́х.

²⁸ Тогда́ отвеща́в Иису́с рече́ ей: о, же́но, ве́лия ве́ра твоя́, бу́ди тебе́ я́коже хо́щеши. И изцеле́ дщи ея́ от того́ часа́.

²⁹ И преше́д отту́ду Иису́с, прии́де на мо́ре Галиле́йское, и возше́д на гору́, се́де ту.

³⁰ И приступи́ша к Нему́ наро́ди мно́зи, иму́ще с собо́ю хромы́я, слепы́я, немы́я, бе́дныя и и́ны мно́ги, и приверго́ша их к нога́ма Иису́совыма, и исцели́ их.

³¹ Я́коже наро́дом диви́тися, ви́дящим немы́я глаго́люща, бе́дныя здра́вы, хромы́я ходя́щя и слепы́я ви́дящя, и сла́вляху Бо́га Изра́илева.

³² Иису́с же призва́в ученики́ Своя́, рече́ [им]: милосе́рдую о наро́де [сем], я́ко уже́ дни три приседя́т Мне и не и́мут чесо́ я́сти, и отпусти́ти их не я́дша не хощу́, да не ка́ко ослабе́ют на пути́.

³³ И глаго́лаша Ему́ ученицы́ Его́: отку́ду нам в пусты́ни хле́би толи́цы, я́ко да насы́тится толи́к наро́д?

³⁴ И глаго́ла им Иису́с: коли́ко хле́бы и́мате? Они́ же ре́ша: седмь, и ма́ло ры́биц.

³⁵ И повеле́ наро́дом возлещи́ на земли́.

³⁶ И прие́м седмь хле́бы и ры́бы, хвалу́ возда́в преломи́ и даде́ ученико́м Свои́м, ученицы́ же наро́дом.

³⁷ И ядо́ша вси и насы́тишася, и взя́ша избы́тки укру́х, седмь ко́шниц испо́лнь.

³⁸ Я́дших же бя́ше четы́ре ты́сящи муже́й, ра́зве жен и дете́й.

³⁹ И отпусти́в наро́ды, вле́зе в кора́бль и прии́де в преде́лы Магдали́нски.

Глава 16

¹ И приступи́ша к Нему́ фарисе́е и саддуке́е, искуша́юще вопроси́ша Его́ зна́мение с небесе́ показа́ти им.

² Он же отвеща́в рече́ им: ве́черу бы́вшу, глаго́лете, ве́дро, чермну́ет бо ся не́бо.

³ И у́тру, днесь зима́, чермну́ет бо ся дряселу́я не́бо. Лицеме́ри, лице́ у́бо небесе́ уме́ете разсужда́ти, зна́мений же времено́м не мо́жете искуси́ти.

⁴ Род лука́в и прелюбоде́йный зна́мения и́щет, и зна́мение не да́стся ему́, то́кмо зна́мение Ио́ны проро́ка. И оста́вль их, оты́де.

⁵ И преше́дше ученицы́ Его́ на он пол, забы́ша хле́бы взя́ти.

⁶ Иису́с же рече́ им: внемли́те и блюди́теся от ква́са фарисе́йска и саддуке́йска.

⁷ Они́ же помышля́ху в себе́, глаго́люще: я́ко хле́бы не взя́хом.

⁸ Разуме́в же Иису́с рече́ им: что мы́слите в себе́, малове́ри, я́ко хле́бы не взя́сте?

⁹ Не у́ ли разуме́ете, ниже́ по́мните пять хле́бы пяти́м ты́сящам, и коли́ко кош взя́сте?

¹⁰ Ни ли седмь хле́бы четы́рем ты́сящам, и коли́ко ко́шниц взя́сте?

¹¹ Ка́ко не разуме́ете, я́ко не о хле́бех рех вам внима́ти, [но] от ква́са фарисе́йска и саддуке́йска?

¹² Тогда́ разуме́ша, я́ко не рече́ храни́тися от ква́са хле́бнаго, но от уче́ния фарисе́йска и саддуке́йска.

¹³ Прише́д же Иису́с во страны́ Кесари́и Фили́пповы, вопроша́ше ученики́ Своя́, глаго́ля: кого́ Мя глаго́лют челове́цы бы́ти, Сы́на Челове́ческаго?

¹⁴ Они́ же ре́ша: о́ви у́бо Иоа́нна Крести́теля, ини́и же Илию́, друзи́и же Иереми́ю, или́ еди́наго от проро́к.

¹⁵ Глаго́ла им Иису́с: вы же кого́ Мя глаго́лете бы́ти?

¹⁶ Отвеща́в же Си́мон Петр рече́: Ты еси́ Христо́с, Сын Бо́га жива́го.

¹⁷ И отвеща́в Иису́с рече́ ему́: блаже́н еси́, Си́моне, вар Ио́на, я́ко плоть и кровь не яви́ тебе́, но Оте́ц Мой, и́же на Небесе́х.

¹⁸ И Аз же тебе́ глаго́лю, я́ко ты еси́ Петр, ^[23] и на сем ка́мени сози́жду Це́рковь Мою́, и врата́ а́дова не одоле́ют ей.

¹⁹ И дам ти ключи́ Ца́рства Небе́снаго, и е́же а́ще свя́жеши на земли́, бу́дет свя́зано на Небесе́х, и е́же а́ще разреши́ши на земли́, бу́дет разреше́но на Небесе́х.

²⁰ Тогда́ запрети́ Иису́с ученико́м Свои́м, да ни кому́же реку́т, я́ко Сей есть Иису́с Христо́с.

²¹ Отто́ле нача́т Иису́с ска́зовати ученико́м Свои́м, я́ко подоба́ет Ему́ ити́ во Иерусали́м и мно́го пострада́ти от ста́рец и архиере́й и кни́жник, и убие́ну бы́ти, и тре́тий день воста́ти.

²² И пое́м Его́ Петр, нача́т пререца́ти Ему́ глаго́ля: милосе́рд Ты, Го́споди, не и́мать бы́ти Тебе́ сие́.

²³ Он же обра́щся рече́ Петро́ви: иди́ за Мно́ю, ^[24] сатано́, собла́зн Ми еси́, я́ко не мы́слиши я́же [суть] Бо́жия, но челове́ческая.

²⁴ Тогда́ Иису́с рече́ ученико́м Свои́м: а́ще кто хо́щет по Мне ити́, да отве́ржется себе́ и во́змет крест свой и по Мне гряде́т.

²⁵ И́же бо а́ще хо́щет ду́шу ^[25] свою́ спасти́, погуби́т ю́, и и́же а́ще погуби́т ду́шу свою́ Мене́ ра́ди, обря́щет ю́.

²⁶ Ка́я бо по́льза челове́ку, а́ще міръ весь приобря́щет, ду́шу же свою́ отщети́т? Или́ что даст челове́к изме́ну за ду́шу свою́?

²⁷ Приити́ бо и́мать Сын Челове́ческий во сла́ве Отца́ Своего́ со А́нгелы Свои́ми, и тогда́ возда́ст кому́ждо по дея́нием его́.

²⁸ Ами́нь глаго́лю вам, [я́ко] суть не́цыи от зде стоя́щих, и́же не и́мут вкуси́ти сме́рти, до́ндеже ви́дят Сы́на Челове́ческаго гряду́ща во Ца́рствии Свое́м.

Глава 17

¹ И по днех шести́х, поя́т Иису́с Петра́ и Иа́кова и Иоа́нна бра́та его́, и возведе́ их на гору́ высоку́ еди́ны.

² И преобрази́ся пред ни́ми, и просвети́ся лице́ Его́ я́ко со́лнце, ри́зы же Его́ бы́ша белы́ я́ко свет.

³ И се яви́стася им Моисе́й и Илиа́, с Ним глаго́люща.

⁴ Отвеща́в же Петр рече́ [ко] Иису́сови: Го́споди, добро́ есть нам зде бы́ти, а́ще хо́щеши, сотвори́м зде три се́ни, Тебе́ еди́ну, и Моисе́ови еди́ну, и еди́ну Илии́.

⁵ Еще́ [же] ему́ глаго́лющу, се о́блак све́тел осени́ их, и се глас из о́блака глаго́ля: Сей есть Сын Мой Возлю́бленный, о Не́мже благоволи́х, Того́ послу́шайте.

⁶ И слы́шавше ученицы́, падо́ша ни́цы, и убоя́шася зело́.

⁷ И присту́пль Иису́с, прикосну́ся их, и рече́: воста́ните, и не бо́йтеся.

⁸ Возве́дше же о́чи свои́, никого́же ви́деша, то́кмо Иису́са еди́наго.

⁹ И сходя́щим им с горы́, запове́да им Иису́с, глаго́ля: никому́же пове́дите виде́ния, до́ндеже Сын Челове́ческий из ме́ртвых воскре́снет.

¹⁰ И вопроси́ша Его́ ученицы́ Его́, глаго́люще: что у́бо кни́жницы глаго́лют, я́ко Илии́ подоба́ет приити́ пре́жде?

¹¹ Иису́с же отвеща́в рече́ им: Илиа́ у́бо прии́дет пре́жде и устро́ит вся.

¹² Глаго́лю же вам, я́ко Илиа́ уже́ прии́де, и не позна́ша его́, но сотвори́ша о нем, ели́ка восхоте́ша, та́ко и Сын Челове́ческий и́мать пострада́ти от них.

¹³ Тогда́ разуме́ша ученицы́, я́ко о Иоа́нне Крести́тели рече́ им.

¹⁴ И прише́дшим им к наро́ду, приступи́ к Нему́ челове́к, кла́няяся Ему́,

¹⁵ И глаго́ля: Го́споди, поми́луй сы́на моего́, я́ко на но́вы ме́сяцы бесну́ется и зле стра́ждет, мно́жицею бо па́дает во огнь и мно́жицею в во́ду.

¹⁶ И приведо́х его́ ко ученико́м Твои́м, и не возмого́ша его́ исцели́ти.

¹⁷ Отвеща́в же Иису́с рече́: о, ро́де неве́рный и развраще́нный, доко́ле бу́ду с ва́ми? Доко́ле терплю́ вас? Приведи́те Ми его́ се́мо.

¹⁸ И запрети́ ему́ Иису́с, и изы́де из него́ бес, и изцеле́ о́трок от часа́ того́.

¹⁹ Тогда́ присту́пльше ученицы́ Иису́сови еди́ному, ре́ша: почто́ мы не возмого́хом изгна́ти его́?

²⁰ Иису́с же рече́ им: за неве́рствие ва́ше. Ами́нь бо глаго́лю вам, а́ще и́мате ве́ру я́ко зе́рно гору́шно, рече́те горе́ сей: прейди́ отсю́ду та́мо, и пре́йдет, и ничто́же невозмо́жно бу́дет вам.

²¹ Сей же род не исхо́дит, то́кмо моли́твою и посто́м.

²² Живу́щим же им в Галиле́и, рече́ им Иису́с: пре́дан и́мать бы́ти Сын Челове́ческий в ру́це челове́ком,

²³ И убию́т Его́, и в тре́тий день воста́нет. И ско́рбни бы́ша зело́.

²⁴ Прише́дшим же им в Капернау́м, приступи́ша прие́млющии дидра́хма ^[26] к Петро́ви и ре́ша: Учи́тель ваш не даст ли дидра́хма?

²⁵ Глаго́ля: ей. И егда́ вни́де в дом, предвари́ его́ Иису́с, глаго́ля: что ти мни́тся, Си́моне? Ца́рие зе́мстии от ки́их прие́млют да́ни или́ кинсо́н? ^[27] От свои́х ли сыно́в, или́ от чужи́х?

²⁶ Глаго́ла Ему́ Петр: от чужи́х. Рече́ ему́ Иису́с: у́бо свобо́дни суть сы́нове.

²⁷ Но да не соблазни́м их, шед на мо́ре, ве́рзи у́дицу, и ю́же пре́жде и́меши ры́бу, возми́, и отве́рз уста́ ей, обря́щеши стати́р, ^[28] той взем даждь им за Мя и за ся.

Глава 18

¹ В той час приступи́ша ученицы́ ко Иису́су, глаго́люще: кто у́бо бо́лий есть в Ца́рствии Небе́снем?

² И призва́в Иису́с отроча́, поста́ви е́ посреде́ их,

³ И рече́: ами́нь глаго́лю вам, а́ще не обратите́ся и бу́дете я́ко де́ти, не вни́дете в Ца́рство Небе́сное.

⁴ И́же бо смири́тся я́ко отроча́ сие́, той есть бо́лий во Ца́рствии Небе́снем.

⁵ И и́же а́ще прии́мет отроча́ таково́ во и́мя Мое́, Мене́ прие́млет,

⁶ А и́же а́ще соблазни́т еди́наго ма́лых сих ве́рующих в Мя, у́не есть ему́, да обе́сится же́рнов осе́льский на вы́и его́, и пото́нет в пучи́не морсте́й.

⁷ Го́ре міру от собла́зн, ну́жда бо есть приити́ собла́зном, оба́че го́ре челове́ку тому́, и́мже собла́зн прихо́дит.

⁸ А́ще ли рука́ твоя́ или́ нога́ твоя́ соблажня́ет тя, отсецы́ ю́ и ве́рзи от себе́, добре́йше ти есть вни́ти в живо́т хро́му или́ бе́дну, ^[29] не́жели две ру́це и две но́зе иму́щу вве́ржену бы́ти во огнь ве́чный.

⁹ И а́ще о́ко твое́ соблажня́ет тя, изми́ е́ и ве́рзи от себе́, добре́йше ти есть со еди́нем о́ком в живо́т вни́ти, не́же две о́це иму́щу вве́ржену бы́ти в гее́нну о́гненную.

¹⁰ Блюди́те, да не пре́зрите еди́наго [от] ма́лых сих, глаго́лю бо вам, я́ко А́нгели их на небесе́х вы́ну ви́дят лице́ Отца́ Моего́ Небе́снаго.

¹¹ Прии́де бо Сын Челове́ческий взыска́ти и спасти́ поги́бшаго.

¹² Что вам мни́тся? А́ще бу́дет не́коему челове́ку сто ове́ц, и заблу́дит еди́на от них, не оста́вит ли де́вятьдесят и де́вять в гора́х и шед и́щет заблу́ждшия?

¹³ И а́ще бу́дет ^[30] обрести́ ю́, ами́нь глаго́лю вам, я́ко ра́дуется о ней па́че, не́же о девяти́десятих и девяти́ незаблу́ждших.

¹⁴ Та́ко несть во́ля пред Отце́м ва́шим Небе́сным, да поги́бнет еди́н от ма́лых сих.

¹⁵ А́ще же согреши́т к тебе́ брат твой, иди́ и обличи́ его́ между́ тобо́ю и тем еди́нем. А́ще тебе́ послу́шает, приобре́л еси́ бра́та твоего́.

¹⁶ А́ще ли тебе́ не послу́шает, пойми́ с собо́ю па́ки еди́наго или́ два, да при усте́х двою́ или́ трие́х свиде́телей ста́нет всяк глаго́л.

¹⁷ А́ще же не послу́шает их, пове́ждь це́ркви, а́ще же и це́рковь преслу́шает, бу́ди тебе́ я́коже язы́чник и мыта́рь.

¹⁸ Ами́нь бо глаго́лю вам, ели́ка а́ще свя́жете на земли́, бу́дут свя́зана на небеси́, и ели́ка а́ще разрешите́ на земли́, бу́дут разреше́на на небесе́х.

¹⁹ Па́ки ами́нь глаго́лю вам, я́ко а́ще два от вас совеща́ета на земли́ о вся́кой ве́щи, е́же а́ще про́сита, бу́дет и́ма от Отца́ Моего́, И́же на небесе́х.

²⁰ Иде́же бо еста́ два или́ трие́ со́брани во и́мя Мое́, ту есмь посреде́ их.

²¹ Тогда́ присту́пль к Нему́ Петр рече́: Го́споди, коль кра́ты а́ще согреши́т в мя брат мой, и отпущу́ ли ему́ до седмь крат?

²² Глаго́ла ему́ Иису́с: не глаго́лю тебе́ до седмь крат, но до се́дмьдесят крат седмери́цею.

²³ Сего́ ра́ди уподо́бися Ца́рствие Небе́сное челове́ку царю́, и́же восхоте́ стяза́тися о словеси́ с рабы́ свои́ми.

²⁴ Наче́ншу же ему́ стяза́тися, приведо́ша ему́ еди́наго должника́ тмо́ю тала́нт. ^[31]

²⁵ Не иму́щу же ему́ возда́ти, повеле́ и госпо́дь его́ прода́ти, и жену́ его́, и ча́да, и вся, ели́ка име́яше, и отда́ти.

²⁶ Пад у́бо раб [той], кла́няшеся ему́, глаго́ля: го́споди, потерпи́ на мне, и вся ти возда́м.

²⁷ Милосе́рдовав же госпо́дь раба́ того́, прости́ его́ и долг отпусти́ ему́.

²⁸ Изше́д же раб той, обре́те еди́наго от клевре́т свои́х, и́же [бе] до́лжен ему́ стом пе́нязь, и ем его́ давля́ше, глаго́ля: отда́ждь ми, и́мже [ми] еси́ до́лжен.

²⁹ Пад у́бо клевре́т его́ на но́зе его́, моля́ше его́, глаго́ля: потерпи́ на мне, и вся возда́м ти.

³⁰ Он же не хотя́ше, но вед всади́ его́ в темни́цу, до́ндеже возда́ст до́лжное.

³¹ Ви́девше же клевре́ти его́ бы́вшая, сжа́лиша си зело́ и прише́дше сказа́ша господи́ну своему́ вся бы́вшая.

³² Тогда́ призва́в его́ господи́н его́, глаго́ла ему́: ра́бе лука́вый, весь долг он отпусти́х тебе́, поне́же умоли́ мя еси́,

³³ Не подоба́ше ли и тебе́ поми́ловати клевре́та твоего́, я́коже и аз тя поми́ловах?

³⁴ И прогне́вався госпо́дь его́, предаде́ его́ мучи́телем, до́ндеже возда́ст весь долг свой.

³⁵ Та́ко и Оте́ц Мой Небе́сный сотвори́т вам, а́ще не отпустите́ ко́ждо бра́ту своему́ от серде́ц ва́ших прегреше́ния их.

Глава 19

¹ И бысть егда́ сконча́ Иису́с словеса́ сия́, пре́йде от Галиле́и и прии́де в преде́лы Иуде́йския об он пол Иорда́на.

² И по Нем идо́ша наро́ди мно́зи, и исцели́ их ту.

³ И приступи́ша к Нему́ фарисе́е искуша́юще Его́ и глаго́лаша Ему́: а́ще досто́ит челове́ку пусти́ти жену́ свою́ по вся́кой вине́?

⁴ Он же отвеща́в рече́ им: не́сте ли чли, я́ко Сотвори́вый искони́, му́жеский пол и же́нский сотвори́л я́ [есть]?

⁵ И рече́: сего́ ра́ди оста́вит челове́к отца́ [своего́] и ма́терь и прилепи́тся [к] жене́ свое́й, и бу́дета о́ба в плоть еди́ну,

⁶ Я́коже ктому́ не́ста два, но плоть еди́на. Е́же у́бо Бог сочета́, челове́к да не разлуча́ет.

⁷ Глаго́лаша Ему́: что у́бо Моисе́й запове́да да́ти кни́гу распу́стную и отпусти́ти ю́?

⁸ Глаго́ла им: я́ко Моисе́й по жестосе́рдию ва́шему повеле́ вам пусти́ти жены́ ва́ша, изнача́ла же не бысть та́ко.

⁹ Глаго́лю же вам, я́ко и́же а́ще пу́стит жену́ свою́, ра́зве словесе́ прелюбоде́йна, и оже́нится ино́ю, прелюбы́ твори́т, и женя́йся пущени́цею прелюбы́ де́ет.

¹⁰ Глаго́лаша Ему́ ученицы́ Его́: а́ще та́ко есть вина́ челове́ку с жено́ю, лу́чше [есть] не жени́тися.

¹¹ Он же рече́ им: не вси вмеща́ют словесе́ сего́, но и́мже дано́ [есть].

¹² Суть бо скопцы́, и́же из чре́ва ма́терня роди́шася та́ко, и суть скопцы́, и́же скопи́шася от челове́к, и суть скопцы́, и́же искази́ша са́ми себе́ Ца́рствия ра́ди Небе́снаго. Моги́й вмести́ти да вмести́т.

¹³ Тогда́ приведо́ша к Нему́ де́ти, да ру́це возложи́т на них и помо́лится, ученицы́ же запрети́ша им.

¹⁴ Иису́с же рече́ [им]: оста́вите дете́й и не возбраня́йте им приити́ ко Мне, таковы́х бо есть Ца́рство Небе́сное.

¹⁵ И возло́жь на них ру́це, оты́де отту́ду.

¹⁶ И се, еди́н [не́кий] приступль рече́ Ему́: Учи́телю благи́й, что бла́го сотворю́, да и́мам живо́т ве́чный?

¹⁷ Он же рече́ ему́: что Мя глаго́леши бла́га? Никто́же благ, то́кмо еди́н Бог. А́ще ли хо́щеши вни́ти в живо́т, соблюди́ за́поведи.

¹⁸ Глаго́ла Ему́: ки́я? Иису́с же рече́: е́же не убие́ши, не прелюбы́ сотвори́ши, не укра́деши, не лжесвиде́тельствуеши.

¹⁹ Чти отца́ и ма́терь, и возлю́биши и́скренняго твоего́ я́ко сам себе́.

²⁰ Глаго́ла Ему́ ю́ноша: вся сия́ сохрани́х от ю́ности моея́, что есмь еще́ не доконча́л?

²¹ Рече́ ему́ Иису́с: а́ще хо́щеши соверше́н бы́ти, иди́, прода́ждь име́ние твое́ и даждь ни́щим, и име́ти и́маши сокро́вище на небеси́, и гряди́ вслед Мене́.

²² Слы́шав же ю́ноша сло́во, оты́де скорбя́, бе бо име́я стяжа́ния мно́га.

²³ Иису́с же рече́ ученико́м Свои́м: ами́нь глаго́лю вам, я́ко неудо́бь бога́тый вни́дет в Ца́рствие Небе́сное.

²⁴ Па́ки же глаго́лю вам: удо́бее есть вельбу́ду сквозе́ иглины́ у́ши проити́, не́же бога́ту в Ца́рствие Бо́жие вни́ти.

²⁵ Слы́шавше же ученицы́ Его́, дивля́хуся зело́, глаго́люще: кто у́бо мо́жет спасе́н бы́ти?

²⁶ Воззре́в же Иису́с рече́ им: у челове́к сие́ не возмо́жно есть, у Бо́га же вся возмо́жна.

²⁷ Тогда́ отвеща́в Петр рече́ Ему́: се, мы оста́вихом вся и вслед Тебе́ идо́хом: что́ у́бо бу́дет нам?

²⁸ Иису́с же рече́ им: ами́нь глаго́лю вам, я́ко вы ше́дшии по Мне, в пакибытие́, егда́ ся́дет Сын Челове́ческий на престо́ле сла́вы Своея́, ся́дете и вы на двоюна́десяте престо́лу, судя́ще обемана́десяте коле́нома Изра́илевома:

²⁹ И всяк, и́же оста́вит дом, или́ бра́тию, или́ сестры́, или́ отца́, или́ ма́терь, или́ жену́, или́ ча́да, или́ се́ла, и́мене моего́ ра́ди, стори́цею прии́мет и живо́т ве́чный насле́дит:

³⁰ Мно́зи же бу́дут пе́рви после́днии, и после́дни пе́рвии.

Глава 20

¹ Подо́бно бо есть Ца́рствие Небе́сное челове́ку домови́ту, и́же изы́де ку́пно ^[32] у́тро ная́ти де́латели в виногра́д свой.

² И совеща́в с де́латели по пе́нязю на день, посла́ их в виногра́д свой.

³ И изше́д в тре́тий час, ви́де и́ны стоя́щя на то́ржищи пра́здны.

⁴ И тем рече́: иди́те и вы в виногра́д мой, и е́же бу́дет пра́вда, дам вам. Они́ же идо́ша.

⁵ Па́ки же изше́д в шесты́й и девя́тый час, сотвори́ та́коже.

⁶ Во еди́ный же на́десять час изше́д, обре́те други́я стоя́щя пра́здны и глаго́ла им: что зде стоите́ весь день пра́здни?

⁷ Глаго́лаша ему́: я́ко никто́же нас ная́т. И глаго́ла им: иди́те и вы в виногра́д [мой], и е́же бу́дет пра́ведно, прии́мете.

⁸ Ве́черу же бы́вшу, глаго́ла господи́н виногра́да к приста́внику своему́: призови́ де́латели и даждь им мзду, наче́н от после́дних до пе́рвых.

⁹ И прише́дше и́же во единыйна́десять час, прия́ша по пе́нязю.

¹⁰ Прише́дше же пе́рвии мня́ху вя́щше прия́ти, и прия́ша и ти́и по пе́нязю.

¹¹ Прие́мше же ропта́ху на господи́на,

¹² Глаго́люще, я́ко си́и после́днии еди́н час сотвори́ша, и ра́вны нам сотвори́л их еси́, поне́сшим тяготу́ дне и вар.

¹³ Он же отвеща́в рече́ еди́ному их: дру́же, не оби́жу тебе́, не по пе́нязю ли совеща́ со мно́ю?

¹⁴ Возми́ твое́ и иди́, хощу́ же и сему́ после́днему да́ти, я́коже и тебе́.

¹⁵ Или́ несть ми леть сотвори́ти, е́же хощу́, во свои́х ми? А́ще о́ко твое́ лука́во есть, я́ко аз благ есмь?

¹⁶ Та́ко бу́дут после́днии пе́рви, и пе́рвии после́дни, мно́зи бо суть зва́ни, ма́ло же избра́нных.

¹⁷ И восходя́ Иису́с во Иерусали́м, поя́т обана́десять ученика́ еди́ны ^[33] на пути́ и рече́ им:

¹⁸ Се восхо́дим во Иерусали́м, и Сын Челове́ческий пре́дан бу́дет архиере́ем и кни́жником, и осу́дят Его́ на смерть;

¹⁹ И предадя́т Его́ язы́ком на поруга́ние и бие́ние и пропя́тие, и в тре́тий день воскре́снет.

²⁰ Тогда́ приступи́ к Нему́ ма́ти сы́ну Зеведе́ову с сыно́ма свои́ма, кла́няющися и прося́щи не́что от Него́.

²¹ Он же рече́ ей: чесо́ хо́щеши? Глаго́ла Ему́: рцы, да ся́дета сия́ о́ба сы́на моя́, еди́н одесну́ю Тебе́, и еди́н ошу́юю Тебе́, во Ца́рствии Твое́м.

²² Отвеща́в же Иису́с рече́: не ве́стася, чесо́ про́сита. Мо́жета ли пи́ти ча́шу, ю́же Аз и́мам пи́ти, или́ креще́нием, и́мже Аз креща́юся, крести́тися? Глаго́ласта Ему́: мо́жева.

²³ И глаго́ла и́ма: ча́шу у́бо Мою́ испие́та, и креще́нием, и́мже Аз креща́юся, крести́тися, а е́же се́сти одесну́ю Мене́ и ошу́юю Мене́, несть Мое́ да́ти, но и́мже угото́вася от Отца́ Моего́.

²⁴ И слы́шавше де́сять, негодова́ша о обою́ бра́ту.

²⁵ Иису́с же призва́в их, рече́: ве́сте, я́ко кня́зи язы́к госпо́дствуют и́ми, и вели́цыи облада́ют и́ми.

²⁶ Не та́ко же бу́дет в вас, но и́же а́ще хо́щет в вас вя́щший бы́ти, да бу́дет вам слуга́.

²⁷ И и́же а́ще хо́щет в вас бы́ти пе́рвый, бу́ди вам раб.

²⁸ Я́коже Сын Челове́ческий не прии́де, да послу́жат Ему́, но послужи́ти и да́ти ду́шу Свою́ избавле́ние за мно́гих.

²⁹ И исходя́щу Ему́ от Иерихо́на, по Нем и́де наро́д мног.

³⁰ И се два слепца́ седя́ща при пути́, слы́шавша, я́ко Иису́с мимохо́дит, возопи́ста, глаго́люща: поми́луй ны, Го́споди, Сы́не Дави́дов.

³¹ Наро́д же запрети́ и́ма, да умолчи́та, о́на же па́че вопия́ста, глаго́люща: поми́луй ны, Го́споди, Сы́не Дави́дов.

³² И воста́в Иису́с возгласи́ я́ и рече́: что хо́щета, да сотворю́ ва́ма?

³³ Глаго́ласта Ему́: Го́споди, да отве́рзетеся о́чи на́ю.

³⁴ Милосе́рдовав же Иису́с прикосну́ся о́чию и́ма, и а́бие прозре́ста и́ма о́чи, и по Нем идо́ста.

Глава 21

¹ И егда́ прибли́жися Иису́с во Иерусали́м и приидо́ша в Вифсфаги́ю к горе́ Елео́нстей, тогда́ Иису́с посла́ два ученика́,

² Глаго́ля и́ма: иди́та в весь, я́же пря́мо ва́ма, и а́бие обря́щета осля́ привя́зано, и жребя́ с ним, отреши́вша приведи́та Ми.

³ И а́ще ва́ма кто рече́т что, рече́та, я́ко Госпо́дь ею́ тре́бует, а́бие же по́слет я́.

⁴ Сие́ же все бысть, да сбу́дется рече́нное проро́ком, глаго́лющим:

⁵ Рцы́те дще́ри Сио́нове, се Царь твой гряде́т тебе́ кро́ток, и всед на осля́ и жребя́, сы́на подъяре́мнича.

⁶ Ше́дша же ученика́ и сотво́рша, я́коже повеле́ и́ма Иису́с,

⁷ Приведо́ста осля́ и жребя́, и возложи́ша верху́ ею́ ри́зы своя́, и все́де верху́ их.

⁸ Мно́жайшии же наро́ди постила́ху ри́зы своя́ по пути́, друзи́и же ре́заху ве́тви от древ и постила́ху по пути́.

⁹ Наро́ди же предходя́щии [ему́] и всле́дствующии зва́ху, глаго́люще: оса́нна ^[34] Сы́ну Дави́дову, благослове́н Гряды́й во и́мя Госпо́дне, оса́нна в вы́шних.

¹⁰ И вше́дшу Ему́ во Иерусали́м, потрясе́ся весь град, глаго́ля: кто есть Сей?

¹¹ Наро́ди же глаго́лаху: Сей есть Иису́с Проро́к, и́же от Назаре́та Галиле́йска.

¹² И вни́де Иису́с в це́рковь Бо́жию и изгна́ вся продаю́щия и купу́ющия в це́ркви, и трапе́зы торжнико́м испрове́рже и седа́лища продаю́щих го́луби.

¹³ И глаго́ла им: пи́сано есть, храм Мой храм моли́твы нарече́тся, вы же сотвори́сте и верте́п разбо́йником.

¹⁴ И приступи́ша к Нему́ хро́мии и слепи́и в це́ркви, и исцели́ их.

¹⁵ Ви́девше же архиере́е и кни́жницы чудеса́, я́же сотвори́, и о́троки зову́щя в це́ркви и глаго́лющя: оса́нна Сы́ну Дави́дову, негодова́ша.

¹⁶ И ре́ша Ему́: слы́шиши ли, что си́и глаго́лют? Иису́с же рече́ им: ей, не́сте ли чли николи́же, я́ко изоу́ст младе́нец и ссу́щих соверши́л еси́ хвалу́?

¹⁷ И оста́вль их, изы́де вон из гра́да в Вифа́нию и водвори́ся ту.

¹⁸ У́тру же возвра́щься во град, взалка́.

¹⁹ И узре́в смоко́вницу еди́ну при пути́, прии́де к ней, и ничто́же обре́те на ней, то́кмо ли́ствие еди́но, и глаго́ла ей: да николи́же от тебе́ плода́ бу́дет во ве́ки. И а́бие и́зсше смоко́вница.

²⁰ И ви́девше ученицы́ диви́шася, глаго́люще: ка́ко а́бие и́зсше смоко́вница?

²¹ Отвеща́в же Иису́с рече́ им: ами́нь глаго́лю вам, а́ще и́мате ве́ру и не усумните́ся, не то́кмо смоко́вничное сотворите́, но а́ще и горе́ сей рече́те: дви́гнися и ве́рзися в мо́ре, бу́дет.

²² И вся, ели́ка а́ще воспро́сите в моли́тве ве́рующе, прии́мете.

²³ И прише́дшу Ему́ в це́рковь, приступи́ша к Нему́ уча́щу архиере́е и ста́рцы людсти́и, глаго́люще: ко́ею вла́стию сия́ твори́ши? И кто Ти даде́ власть сию́?

²⁴ Отвеща́в же Иису́с рече́ им: вопрошу́ вы и Аз сло́во еди́но, е́же а́ще рече́те Мне, и Аз вам реку́, ко́ею вла́стию сия́ творю́.

²⁵ Креще́ние Иоа́нново отку́ду бе? С небесе́ ли, или́ от челове́к? Они́ же помышля́ху в себе́, глаго́люще: а́ще рече́м, с небесе́, рече́т нам: почто́ у́бо не ве́ровасте ему́?

²⁶ А́ще ли рече́м, от челове́к, бои́мся наро́да, вси бо и́мут Иоа́нна я́ко проро́ка.

²⁷ И отвеща́вше Иису́сови ре́ша: не ве́мы. Рече́ им и Той: ни Аз вам глаго́лю, ко́ею вла́стию сия́ творю́.

²⁸ Что же ся вам мнит? Челове́к не́кий имя́ше два сы́на, и прише́д к пе́рвому, рече́: ча́до, иди́ днесь, де́лай в виногра́де мое́м.

²⁹ Он же отвеща́в рече́: не хощу́, последи́ же раска́явся, и́де.

³⁰ И присту́пль к друго́му, рече́ та́коже. Он же отвеща́в рече́: аз, го́споди иду́, и не и́де.

³¹ Кий от обою́ сотвори́ во́лю о́тчу? Глаго́лаша Ему́: пе́рвый. Глаго́ла им Иису́с: ами́нь глаго́лю вам, я́ко мытари́ и любоде́йцы варя́ют вы в Ца́рствии Бо́жии.

³² Прии́де бо к вам Иоа́нн Крести́тель путе́м пра́ведным, и не ве́ровасте ему́, мытари́ же и любоде́йцы ве́роваша ему́, вы же ви́девше, не раска́ястеся последи́ ве́ровати ему́.

³³ И́ну при́тчу слы́шите. Челове́к не́кий бе домови́т, и́же насади́ виногра́д, и опло́том огради́ его́, и ископа́ в нем точи́ло, и созда́ столп, и вдаст и де́лателем, и оты́де.

³⁴ Егда́ же прибли́жися вре́мя плодо́в, посла́ рабы́ своя́ к де́лателем прия́ти плоды́ его́.

³⁵ И е́мше де́лателе рабы́ его́, о́ваго у́бо би́ша, о́ваго же уби́ша, о́ваго же ка́мением поби́ша.

³⁶ Па́ки посла́ и́ны рабы́ мно́жайшя пе́рвых, и сотвори́ша им та́коже.

³⁷ Последи́ же посла́ к ним сы́на своего́, глаго́ля: усрамя́тся сы́на моего́.

³⁸ Де́лателе же ви́девше сы́на, ре́ша в себе́: сей есть насле́дник, прииди́те, убие́м его́ и удержи́м достоя́ние его́.

³⁹ И е́мше его́ изведо́ша вон из виногра́да и уби́ша.

⁴⁰ Егда́ у́бо прии́дет господи́н виногра́да, что сотвори́т де́лателем тем?

⁴¹ Глаго́лаша Ему́: злых зле погуби́т их, и виногра́д преда́ст ины́м де́лателем, и́же воздадя́т ему́ плоды́ во времена́ своя́.

⁴² Глаго́ла им Иису́с: не́сте ли чли николи́же в Писа́ниих, ка́мень, его́же не в ряду́ сотвори́ша ^[35] зи́ждущии, сей бысть во главу́ у́гла? От Го́спода бысть сие́, и есть ди́вно во о́чию ва́шею.

⁴³ Сего́ ра́ди глаго́лю вам, я́ко оты́мется от вас Ца́рствие Бо́жие и да́стся язы́ку творя́щему плоды́ его́.

⁴⁴ И пады́й на ка́мени сем сокруши́тся, а на не́мже паде́т, сотры́ет и́.

⁴⁵ И слы́шавше архиере́е и фарисе́е при́тчи Его́, разуме́ша, я́ко о них глаго́лет.

⁴⁶ И и́щуще Его́ я́ти, убоя́шася наро́да, поне́же я́ко Проро́ка Его́ име́яху.

Глава 22

¹ И отвеща́в Иису́с, па́ки рече́ им в при́тчах, глаго́ля:

² Уподо́бися Ца́рствие Небе́сное челове́ку царю́, и́же сотвори́ бра́ки сы́ну своему́.

³ И посла́ рабы́ своя́ призва́ти зва́нныя на бра́ки, и не хотя́ху приити́.

⁴ Па́ки посла́ и́ны рабы́, глаго́ля: рцы́те зва́нным, се обе́д мой угото́вах, юнцы́ мои́ и упита́нная исколе́на, и вся гото́ва, прииди́те на бра́ки.

⁵ Они́ же небре́гше отыдо́ша, ов у́бо насело́ свое́, ов же на ку́пли своя́.

⁶ Про́чии же е́мше рабы́ его́, досади́ша им и уби́ша их.

⁷ И слы́шав царь той разгне́вася, и посла́в во́я своя́, погуби́ уби́йцы о́ны и град их зажже́.

⁸ Тогда́ глаго́ла рабо́м свои́м: брак у́бо гото́в есть, зва́ннии же не бы́ша досто́йни.

⁹ Иди́те у́бо на исхо́дища путе́й, и ели́цех а́ще обря́щете, призови́те на бра́ки.

¹⁰ И изше́дше раби́ они́ на распу́тия, собра́ша всех, ели́цех обрето́ша, злы́я же и до́брыя, и испо́лнися брак возлежа́щих.

¹¹ Вшед же царь ви́дети возлежа́щих, ви́де ту челове́ка не оболче́на во одея́ние бра́чное.

¹² И глаго́ла ему́: дру́же, ка́ко вшел еси́ се́мо не имы́й одея́ния бра́чна? Он же умолча́.

¹³ Тогда́ рече́ царь слуга́м: связа́вше ему́ ру́це и но́зе, возьми́те его́ и вве́рзите во тму кроме́шнюю, ту бу́дет плачь и скре́жет зубо́м.

¹⁴ Мно́зи бо суть зва́ни, ма́ло же избра́нных.

¹⁵ Тогда́ ше́дше фарисе́е, совет прие́мше, я́ко да обольстя́т Его́ сло́вом.

¹⁶ И посыла́ют к Нему́ ученики́ своя́ со иродиа́ны, глаго́люще: Учи́телю, ве́мы, я́ко и́стинен еси́, и пути́ Бо́жию вои́стинну учи́ши, и неради́ши ни о ко́мже, не зри́ши бо на лице́ челове́ком.

¹⁷ Рцы у́бо нам, что Ти ся мнит? Досто́йно ли есть да́ти кинсо́н ке́сареви, или́ ни?

¹⁸ Разуме́в же Иису́с лука́вство их, рече́: что Мя искуша́ете, лицеме́ри?

¹⁹ Покажи́те Ми злати́цу кинсо́нную. Они́ же принесо́ша Ему́ пе́нязь.

²⁰ И глаго́ла им: чий о́браз сей и написа́ние?

²¹ И глаго́лаша Ему́: ке́сарев. Тогда́ глаго́ла им: воздади́те у́бо ке́сарева ке́сареви, и Бо́жия Бо́гови.

²² И слы́шавше диви́шася, и оста́вльше Его́ отыдо́ша.

²³ В той день приступи́ша к Нему́ саддуке́е, и́же глаго́лют не бы́ти воскресе́нию, и вопроси́ша Его́, глаго́люще:

²⁴ Учи́телю, Моисе́й рече́, а́ще кто у́мрет не имы́й чад, да по́ймет брат его́ жену́ его́ и воскреси́т се́мя бра́та своего́.

²⁵ Бе́ша же в нас седмь бра́тия, и пе́рвый оже́нься у́мре, и не имы́й се́мене, оста́ви жену́ свою́ бра́ту своему́.

²⁶ Та́кожде же и вторы́й, и тре́тий, да́же до седма́го.

²⁷ Последи́ же всех у́мре и жена́.

²⁸ В воскреше́ние у́бо, кото́раго от седми́х бу́дет жена́? Вси бо име́ша ю́.

²⁹ Отвеща́в же Иису́с рече́ им: прельща́етеся, не ве́дуще Писа́ния, ни си́лы Бо́жия.

³⁰ В воскресе́ние бо ни же́нятся, ни посяга́ют, но я́ко А́нгели Бо́жии на небеси́ суть.

³¹ О воскресе́нии же ме́ртвых не́сте ли чли рече́ннаго вам Бо́гом, глаго́лющим:

³² Аз есмь Бог Авраа́мов, и Бог Исаа́ков, и Бог Иа́ковль? Несть Бог Бог ме́ртвых, но Бог живы́х.

³³ И слы́шавше наро́ди дивля́хуся о уче́нии Его́.

³⁴ Фарисе́е же слы́шавше, я́ко посрами́ саддуке́и, собра́шася вку́пе.

³⁵ И вопроси́ еди́н от них законоучи́тель, искуша́я Его́ и глаго́ля:

³⁶ Учи́телю, ка́я за́поведь бо́льши есть в зако́не?

³⁷ Иису́с же рече́ ему́: возлю́биши Го́спода Бо́га твоего́ всем се́рдцем твои́м, и все́ю душе́ю твое́ю, и все́ю мы́слию твое́ю.

³⁸ Сия́ есть пе́рвая и бо́льшая за́поведь.

³⁹ Втора́я же подо́бна ей: возлю́биши и́скренняго твоего́ я́ко сам себе́.

⁴⁰ В сию́ обою́ за́поведию весь зако́н и проро́цы ви́сят.

⁴¹ Со́браном же фарисе́ом, вопроси́ их Иису́с, глаго́ля:

⁴² Что ся вам мни́т о Христе́? Чий есть Сын? Глаго́лаша Ему́: Дави́дов.

⁴³ Глаго́ла им: ка́ко у́бо Дави́д Ду́хом Го́спода Его́ нарица́ет, глаго́ля:

⁴⁴ Рече́ Госпо́дь Го́сподеви моему́, седи́ одесну́ю Мене́, до́ндеже положу́ враги́ Твоя́ подно́жие нога́ма Твои́ма?

⁴⁵ А́ще у́бо Дави́д нарица́ет Его́ Го́спода, ка́ко сын ему́ есть?

⁴⁶ И никто́же можа́ше отвеща́ти Ему́ словесе́, ниже́ сме́я кто от того́ дне вопроси́ти Его́ ктому́.

Глава 23

¹ Тогда́ Иису́с глаго́ла к наро́дом и ученико́м Свои́м,

² Глаго́ля: на Моисе́ове седа́лищи седо́ша кни́жницы и фарисе́е.

³ Вся у́бо, ели́ка а́ще реку́т вам блюсти́, соблюда́йте и твори́те, по дело́м же их не твори́те. Глаго́лют бо, и не творя́т.

⁴ Связу́ют бо бремена́ тя́жка и бе́дне носи́ма, и возлага́ют на плеща́ челове́ческа, пе́рстом же свои́м не хотя́т дви́гнути их.

⁵ Вся же дела́ своя́ творя́т, да ви́дими бу́дут челове́ки, разширя́ют же храни́лища ^[36] своя́ и велича́ют воскри́лия ^[37] риз свои́х.

⁶ Лю́бят же преждевозлега́ния на ве́черях, и преждеседа́ния на со́нмищах,

⁷ И целова́ния на то́ржищах, и зва́тися от челове́к: учи́телю, учи́телю.

⁸ Вы же не нарица́йтеся учи́тели, еди́н бо есть ваш Учи́тель, Христо́с, вси же вы бра́тия есте́.

⁹ И отца́ не зови́те себе́ на земли́, еди́н бо есть Оте́ц ваш, И́же на небесе́х.

¹⁰ Ниже́ нарица́йтеся наста́вницы, еди́н бо есть Наста́вник ваш, Христо́с.

¹¹ Бо́лий же в вас да бу́дет вам слуга́.

¹² И́же бо вознесе́тся, смири́тся, и смиря́яйся вознесе́тся.

¹³ Го́ре вам, кни́жницы и фарисе́е, лицеме́ри, я́ко снеда́ете до́мы вдови́ц, и вино́ю дале́че моли́твы творя́ще, ^[38] сего́ ра́ди ли́шшее прии́мете осужде́ние.

¹⁴ Го́ре вам, кни́жницы и фарисе́е, лицеме́ри, я́ко затворя́ете Ца́рствие Небе́сное пред челове́ки, вы бо не вхо́дите, ни входя́щих оставля́ете вни́ти.

¹⁵ Го́ре вам, кни́жницы и фарисе́е, лицеме́ри, я́ко прехо́дите мо́ре и су́шу, сотвори́ти еди́наго прише́льца, и егда́ бу́дет, твори́те его́ сы́на гее́нны сугу́бейша вас.

¹⁶ Го́ре вам, вожди́ слепи́и, глаго́лющии, и́же а́ще клене́тся це́рковию, ничесо́же есть, а и́же клене́тся зла́том церко́вным, до́лжен есть.

¹⁷ Бу́и и слепи́и, ко́е бо бо́ле есть, зла́то ли, или́ це́рковь, святя́щая зла́то?

¹⁸ И и́же а́ще клене́тся олтаре́м, ничесо́же есть, а и́же клене́тся да́ром, и́же верху́ его́, до́лжен есть.

¹⁹ Бу́и и слепи́и, что бо бо́ле, дар ли, или́ олта́рь, святя́й дар?

²⁰ И́же у́бо клене́тся олтаре́м, клене́тся им и Су́щим верху́ его́.

²¹ И и́же клене́тся це́рковию, клене́тся ею́ и Живу́щим в ней.

²² И клены́йся небесе́м клене́тся Престо́лом Бо́жиим и Седя́щим на нем.

²³ Го́ре вам, кни́жницы и фарисе́е, лицеме́ри, я́ко одеся́тствуете мя́тву и копр и ки́мин, и оста́висте вя́щшая зако́ну, суд и ми́лость и ве́ру, сия́ же подоба́ше твори́ти, и о́нех не оставля́ти.

²⁴ Вожди́ слепи́и, оцежда́ющии комары́, вельблу́ды же пожира́юще.

²⁵ Го́ре вам, кни́жницы и фарисе́е лицеме́ри, я́ко очища́ете вне́шнее сткля́ницы и блю́да, внутрью́ду же суть по́лни хище́ния и непра́вды.

²⁶ Фарисе́е слепы́й, очи́сти пре́жде вну́треннее сткля́ницы и блю́да, да бу́дет и вне́шнее и́ма чи́сто.

²⁷ Го́ре вам, кни́жницы и фарисе́е, лицеме́ри, я́ко подо́битеся гробо́м пова́пленым, и́же внеу́ду у́бо явля́ются красны́, внутрью́ду же по́лни суть косте́й ме́ртвых и вся́кия нечистоты́.

²⁸ Та́ко и вы, внеу́ду у́бо явля́етеся челове́ком пра́ведни, внутрью́ду же есте́ по́лни лицеме́рия и беззако́ния.

²⁹ Го́ре вам, кни́жницы и фарисе́е, лицеме́ри, я́ко зи́ждете гро́бы проро́ческия, и кра́сите ра́ки пра́ведных,

³⁰ И глаго́лете: а́ще бы́хом бы́ли во дни оте́ц на́ших, не бы́хом у́бо о́бщницы им бы́ли в кро́ви проро́к.

³¹ Те́мже са́ми свиде́тельствуете себе́, я́ко сы́нове есте́ изби́вших проро́ки.

³² И вы испо́лните ме́ру оте́ц ва́ших.

³³ Змия́, порожде́ния ехи́днова, ка́ко убежите́ от суда́ огня́ гее́нскаго?

³⁴ Сего́ ра́ди, се Аз послю́ к вам проро́ки и прему́дры и кни́жники, и от них убие́те и ра́спнете, и от них бие́те на со́нмищах ва́ших, и изжене́те от гра́да во град.

³⁵ Я́ко да прии́дет на вы вся́ка кровь пра́ведна, пролива́емая на земли́, от кро́ве А́веля пра́веднаго до кро́ве Заха́рии сы́на Варахи́ина, его́же уби́сте между́ це́рковию и олтаре́м.

³⁶ Ами́нь глаго́лю вам, я́ко прии́дут вся сия́ на род сей.

³⁷ Иерусали́ме, Иерусали́ме, изби́вый проро́ки и ка́мением побива́яй по́сланныя к тебе́, колькра́ты восхоте́х собра́ти ча́да твоя́, я́коже собира́ет ко́кош птенцы́ своя́ под криле́, и не восхоте́сте?

³⁸ Се, оставля́ется вам дом ваш пуст.

³⁹ Глаго́лю бо вам, я́ко не и́мате Мене́ ви́дети отсе́ле, до́ндеже рече́те: благослове́н Гряды́й во и́мя Госпо́дне.

Глава 24

¹ И изше́д Иису́с идя́ше от це́ркве, и приступи́ша ко Иису́су ученицы́ Его́ показа́ти Ему́ зда́ния церко́вная.

² Иису́с же рече́ им: не ви́дите ли вся сия́? Ами́нь глаго́лю вам, не и́мать оста́ти зде ка́мень на ка́мени, и́же не разори́тся.

³ Седя́щу же Ему́ на го́ре Елео́нстей, приступи́ша к Нему́ ученицы́ на едине́, глаго́люще: рцы нам, когда́ сия́ бу́дут? И что есть зна́мение Твоего́ прише́ствия и кончи́на ве́ка?

⁴ И отвеща́в Иису́с рече́ им: блюди́те, да никто́же вас прельсти́т.

⁵ Мно́зи бо прии́дут во и́мя Мое́, глаго́люще: Аз есмь Христо́с, и мно́ги прельстя́т.

⁶ Услы́шати же и́мате бра́ни и слы́шания бра́нем. Зри́те, не ужаса́йтеся, подоба́ет бо всем сим бы́ти, но не тогда́ есть кончи́на.

⁷ Воста́нет бо язы́к на язы́к, и ца́рство на ца́рство, и бу́дут гла́ди и па́губы и тру́си по ме́стом,

⁸ Вся же сия́ нача́ло боле́знем.

⁹ Тогда́ предадя́т вы в ско́рби и убию́т вы, и бу́дете ненави́дими все́ми язы́ки и́мене Моего́ ра́ди.

¹⁰ И тогда́ соблазня́тся мно́зи, и друг дру́га предадя́т, и возненави́дят друг дру́га,

¹¹ И мно́зи лжепроро́цы воста́нут и прельстя́т мно́гия,

¹² И за умноже́ние беззако́ния, изся́кнет любы́ мно́гих.

¹³ Претерпе́вый же до конца́, той спасе́тся.

¹⁴ И пропове́стся сие́ Ева́нгелие Ца́рствия по всей вселе́нней, во свиде́тельство всем язы́ком, и тогда́ прии́дет кончи́на.

¹⁵ Егда́ у́бо у́зрите ме́рзость запусте́ния, рече́нную Дании́лом проро́ком, стоя́щу на ме́сте свя́те, и́же чтет, да разуме́ет,

¹⁶ Тогда́ су́щии во Иуде́и да бежа́т на го́ры.

¹⁷ И и́же на кро́ве, да не схо́дит взя́ти я́же в дому́ его́,

¹⁸ И и́же на селе́, да не возврати́тся вспять взя́ти риз свои́х.

¹⁹ Го́ре же непра́здным и доя́щим в ты́я дни.

²⁰ Моли́теся же, да не бу́дет бе́гство ва́ше в зиме́, ни в суббо́ту.

²¹ Бу́дет бо тогда́ скорбь ве́лия, якова́ же несть была́ от нача́ла міра досе́ле, ниже́ и́мать бы́ти.

²² И а́ще не бы́ша прекрати́лися дни́е о́ны, не бы у́бо спасла́ся вся́ка плоть, избра́нных же ра́ди прекратя́тся дни́е о́ны.

²³ Тогда́ а́ще кто рече́т вам: се зде Христо́с, или́ о́нде, не ими́те ве́ры.

²⁴ Воста́нут бо лжехри́сти и лжепроро́цы и дадя́т зна́мения ве́лия и чудеса́, я́коже прельсти́ти, а́ще возмо́жно, и избра́нныя.

²⁵ Се, пре́жде рех вам.

²⁶ А́ще у́бо реку́т вам: се в пусты́ни есть, не изыди́те, се в сокро́вищих, не ими́те ве́ры.

²⁷ Я́коже бо мо́лния исхо́дит от восто́к и явля́ется до за́пад, та́ко бу́дет прише́ствие Сы́на Челове́ческаго;

²⁸ Иде́же бо а́ще бу́дет труп, та́мо соберу́тся орли́.

²⁹ А́бие же, по ско́рби дний тех, со́лнце поме́ркнет, и луна́ не даст све́та своего́, и зве́зды спа́днут с небесе́, и си́лы небе́сныя подви́гнутся;

³⁰ И тогда́ яви́тся зна́мение Сы́на Челове́ческаго на небеси́, и тогда́ воспла́чутся вся коле́на земна́я и у́зрят Сы́на Челове́ческаго гряду́ща на о́блацех небе́сных с си́лою и сла́вою мно́гою;

³¹ И по́слет А́нгелы Своя́ с тру́бным гла́сом ве́лиим, и соберу́т избра́нныя Его́ от четы́рех ветр, от коне́ц небе́с до коне́ц их.

³² От смоко́вницы же научи́теся при́тчи: егда́ уже́ ва́ия ея́ бу́дут мла́да, и ли́ствие прозя́бнет, ве́дите, я́ко близ есть жа́тва.

³³ Та́ко и вы, егда́ ви́дите сия́ вся, ве́дите, я́ко близ есть, при две́рех.

³⁴ Ами́нь глаго́лю вам, не мимои́дет род сей, до́ндеже вся сия́ бу́дут.

³⁵ Не́бо и земля́ мимои́дет, словеса́ же Моя́ не мимои́дут.

³⁶ О дни же том и часе́ никто́же весть, ни А́нгели небе́снии, то́кмо Оте́ц Мой еди́н.

³⁷ Я́коже бо бысть во дни Но́евы, та́ко бу́дет и прише́ствие Сы́на Челове́ческаго.

³⁸ Я́коже бо бе́ху во дни пре́жде пото́па яду́ще и пию́ще, женя́щеся и посяга́юще, до него́же дне вни́де Но́е в ковче́г,

³⁹ И не уве́деша, до́ндеже прии́де вода́ и взят вся, та́ко бу́дет и прише́ствие Сы́на Челове́ческаго.

⁴⁰ Тогда́ два бу́дета на селе́, еди́н пое́млется, а други́й оставля́ется.

⁴¹ Две ме́люще в же́рновех, еди́на пое́млется, и еди́на оставля́ется.

⁴² Бди́те у́бо, я́ко не ве́сте, в кий час Госпо́дь ваш прии́дет.

⁴³ Сие́ же ве́дите, я́ко а́ще бы ве́дал до́му влады́ка, в ку́ю стра́жу тать прии́дет, бдел у́бо бы и не бы дал подкопа́ти хра́ма своего́.

⁴⁴ Сего́ ра́ди и вы бу́дите гото́ви, я́ко, во́ньже час не мните́, Сын Челове́ческий прии́дет.

⁴⁵ Кто у́бо есть ве́рный раб и му́дрый, его́же поста́вит господи́н его́ над до́мом свои́м, е́же дая́ти им пи́щу во вре́мя их?

⁴⁶ Блаже́н раб той, его́же, прише́д господи́н его́, обря́щет та́ко творя́ща.

⁴⁷ Ами́нь глаго́лю вам, я́ко над всем име́нием свои́м поста́вит его́.

⁴⁸ А́ще ли же рече́т злый раб той в се́рдцы свое́м: косни́т господи́н мой приити́,

⁴⁹ И на́чнет би́ти клевре́ты своя́, я́сти же и пи́ти с пия́ницами,

⁵⁰ Прии́дет господи́н раба́ того́ в день, во́ньже не ча́ет, и в час, во́ньже не весть.

⁵¹ И проте́шет его́ полма́, и часть его́ с неве́рными положи́т, ту бу́дет плачь и скре́жет зубо́м.

Глава 25

¹ Тогда́ уподо́бися Ца́рствие Небе́сное десяти́м де́вам, я́же прия́ша свети́льники своя́ и изыдо́ша в сре́тение жениху́.

² Пять же бе от них мудры́ и пять юро́дивы.

³ Юро́дивыя же, прие́мшя свети́льники своя́, не взя́ша с собо́ю еле́а.

⁴ Му́дрыя же прия́ша еле́й в сосу́дех со свети́льники свои́ми.

⁵ Косня́щу же жениху́, воздрема́шася вся и спа́ху.

⁶ Полу́нощи же вопль бысть: се жени́х гряде́т, исходи́те в сре́тение его́.

⁷ Тогда́ воста́вша вся де́вы ты́я и украси́ша свети́льники своя́.

⁸ Юроди́выя же му́дрым ре́ша: дади́те нам от еле́а ва́шего, я́ко свети́льницы на́ши угаса́ют.

⁹ Отвеща́ша же му́дрыя, глаго́люще: еда́ ка́ко не доста́нет нам и вам, иди́те же па́че к продаю́щим и купи́те себе́.

¹⁰ Иду́щим же им купи́ти, прии́де жени́х, и гото́выя внидо́ша с ним на бра́ки, и затворе́ны бы́ша две́ри.

¹¹ Последи́ же приидо́ша и про́чыя де́вы, глаго́люще: Го́споди, Го́споди, отве́рзи нам.

¹² Он же отвеща́в рече́ им: ами́нь глаго́лю вам, не вем вас.

¹³ Бди́те у́бо, я́ко не ве́сте дне ни часа́, во́ньже Сын Челове́ческий прии́дет.

¹⁴ Я́коже бо челове́к не́кий отходя́ призва́ своя́ рабы́ и предаде́ им име́ние свое́.

¹⁵ И о́вому у́бо даде́ пять тала́нт, о́вому же два, о́вому же еди́н, кому́ждо проти́ву си́лы его́, и оты́де а́бие.

¹⁶ Шед же прие́мый пять тала́нт, де́ла в них и сотвори́ други́я пять тала́нт.

¹⁷ Та́кожде и и́же два, приобре́те и той друга́я два.

¹⁸ Прие́мый же еди́н, шед вкопа́ его́ в зе́млю и скры сребро́ господи́на своего́.

¹⁹ По мно́зе же вре́мени прии́де господи́н раб тех и стяза́ся с ни́ми о словеси́.

²⁰ И присту́пль пять тала́нт прие́мый, принесе́ други́я пять тала́нт, глаго́ля: го́споди, пять тала́нт ми еси́ пре́дал, се други́я пять тала́нт приобрето́х и́ми.

²¹ Рече́ же ему́ госпо́дь его́: до́брый, ра́бе благи́й и ве́рный, о ма́ле был еси́ ве́рен, над мно́гими тя поста́влю, вни́ди в ра́дость го́спода твоего́.

²² Присту́пль же и и́же два тала́нта прие́мый, рече́: го́споди, два тала́нта ми еси́ пре́дал, се друга́я два тала́нта приобрето́х и́ма.

²³ Рече́ же ему́ госпо́дь его́: до́брый ра́бе, благи́й и ве́рный, о ма́ле ми был еси́ ве́рен, над мно́гими тя поста́влю, вни́ди в ра́дость го́спода твоего́.

²⁴ Присту́пль же и прие́мый еди́н тала́нт, рече́: го́споди, ве́дях тя, я́ко же́сток еси́ челове́к, жне́ши, иде́же не се́ял еси́, и собира́еши ю́дуже не расточи́л еси́.

²⁵ И убоя́вся, шед скрых тала́нт твой в земли́, и се и́маши твое́.

²⁶ Отвеща́в же госпо́дь его́ рече́ ему́: лука́вый ра́бе и лени́вый, ве́дяше, я́ко жну иде́же не се́ях, и собира́ю иде́же не расточи́х;

²⁷ Подоба́ше у́бо тебе́ вда́ти сребро́ мое́ торжнико́м, и прише́д аз взял бых свое́ с ли́хвою.

²⁸ Возми́те у́бо от него́ тала́нт и дади́те иму́щему де́сять тала́нт.

²⁹ Иму́щему бо везде́ дано́ бу́дет и преизбу́дет, от неиму́щаго же, и е́же мни́тся име́я, взя́то бу́дет от него́.

³⁰ И неключи́маго раба́ вве́рзите во тму кроме́шнюю, ту бу́дет плачь и скре́жет зубо́м. Сия́ глаго́ля возгласи́: име́яй у́ши слы́шати да слы́шит.

³¹ Егда́ же прии́дет Сын Челове́ческий в сла́ве Свое́й и вси святи́и А́нгели с Ним, тогда́ ся́дет на престо́ле сла́вы Своея́,

³² И соберу́тся пред Ним вси язы́цы, и разлучи́т их друг от дру́га, я́коже па́стырь разлуча́ет о́вцы от ко́злищ,

³³ И поста́вит о́вцы одесну́ю Себе́, а ко́злища ошу́юю.

³⁴ Тогда́ рече́т Царь су́щим одесну́ю Его́: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния міра.

³⁵ Взалка́хся бо, и да́сте Ми я́сти, возжада́хся, и напои́сте Мя, стра́нен бех, и введо́сте Мене́,

³⁶ Наг, и оде́ясте Мя, бо́лен, и посети́сте Мене́, в темни́це бех, и приидо́сте ко Мне.

³⁷ Тогда́ отвеща́ют Ему́ пра́ведницы, глаго́люще: Го́споди, когда́ Тя ви́дехом а́лчуща, и напита́хом? Или́ жа́ждуща, и напои́хом?

³⁸ Когда́ же Тя ви́дехом стра́нна, и введо́хом? Или́ на́га, и оде́яхом?

³⁹ Когда́ же Тя ви́дехом боля́ща, или́ в темни́це, и приидо́хом к Тебе́?

⁴⁰ И отвеща́в Царь рече́т им: ами́нь глаго́лю вам, поне́же сотвори́сте еди́ному сих бра́тий Мои́х ме́ньших, Мне сотвори́сте.

⁴¹ Тогда́ рече́т и су́щим ошу́юю Его́: иди́те от Мене́, прокля́тии, во огнь ве́чный, угото́ванный диа́волу и а́ггелом его́.

⁴² Взалка́хся бо, и не да́сте Ми я́сти, возжада́хся, и не напои́сте Мене́,

⁴³ Стра́нен бех, и не введо́сте Мене́, наг, и не оде́ясте Мене́, бо́лен и в темни́це, и не посети́сте Мене́.

⁴⁴ Тогда́ отвеща́ют Ему́ и ти́и, глаго́люще: Го́споди, когда́ Тя ви́дехом а́лчуща, или́ жа́ждуща, или́ стра́нна, или́ на́га, или́ бо́льна, или́ в темни́це, и не послужи́хом Тебе́?

⁴⁵ Тогда́ отвеща́ет им, глаго́ля: ами́нь глаго́лю вам, поне́же не сотвори́сте еди́ному сих ме́ньших, ни Мне сотвори́сте.

⁴⁶ И и́дут си́и в му́ку ве́чную, пра́ведницы же в живо́т ве́чный.

Глава 26

¹ И бысть, егда́ сконча́ Иису́с вся словеса́ сия́, рече́ ученико́м Свои́м:

² Ве́сте, я́ко по двою́ дню Па́сха бу́дет, и Сын Челове́ческий пре́дан бу́дет на пропя́тие.

³ Тогда́ собра́шася архиере́е, и кни́жницы и ста́рцы людсти́и во двор архиере́ов, глаго́лемаго Каиа́фы.

⁴ И совеща́ша, да Иису́са ле́стию и́мут, и убию́т.

⁵ Глаго́лаху же: но не в пра́здник, да не молва́ бу́дет в лю́дех.

⁶ Иису́су же бы́вшу в Вифа́нии, в дому́ Си́мона прокаже́ннаго.

⁷ Приступи́ к Нему́ жена́, сткля́ницу мν́ра иму́щи многоце́ннаго, и возлива́ше на главу́ Его́, возлежа́щу.

⁸ Ви́девше же ученицы́ Его́, негодова́ша, глаго́люще: чесо́ ра́ди ги́бель сия́ бысть?

⁹ Можа́ше бо сие́ мν́ро продано́ бы́ти на мно́зе, и да́тися ни́щим.

¹⁰ Разуме́в же Иису́с рече́ им: что тружда́ете жену́? Де́ло бо добро́ соде́ла о Мне.

¹¹ Всегда́ бо ни́щия и́мате с собо́ю, Мене́ же не всегда́ и́мате.

¹² Возлия́вши бо сия́ мν́ро сие́ на те́ло Мое́, на погребе́ние Мя сотвори́.

¹³ Ами́нь глаго́лю вам, иде́же а́ще пропове́дано бу́дет Ева́нгелие сие́ во всем міре, рече́тся, и е́же сотвори́ сия́, в па́мять ея́.

¹⁴ Тогда́ шед еди́н от oбоюна́десяте, глаго́лемый Иу́да Искарио́тский, ко архиере́ом.

¹⁵ Рече́: что ми хо́щете да́ти, и аз вам преда́м Его́? Oни́ же поста́виша ему́ три́десять сре́бреник.

¹⁶ И отто́ле иска́ше подо́бна вре́мене, да Его́ преда́ст.

¹⁷ В пе́рвый же день опресно́чный приступи́ша ученицы́ Иису́сови, глаго́люще Ему́: где хо́щеши, угото́ваем Ти я́сти па́сху?

¹⁸ Oн же рече́: иди́те во град ко óнсице. И рцы́те ему́: Учи́тель глаго́лет, вре́мя Мое́ близ есть, у тебе́ сотворю́ па́сху со ученики́ Мои́ми.

¹⁹ И сотвори́ша ученицы́, я́коже повеле́ им Иису́с, и угото́ваша па́сху.

²⁰ Ве́черу же бы́вшу возлежа́ше со oбемана́десяте ученико́ма.

²¹ И яду́щим им, рече́: ами́нь глаго́лю вам, я́ко еди́н от вас преда́ст Мя.

²² И скорбя́ще зело́, нача́ша глаго́лати Ему́ еди́н ки́йждо их: еда́ аз есмь, Го́споди?

²³ Oн же отвеща́в рече́: омочи́вый со Мно́ю в соли́ло ру́ку, той Мя преда́ст.

²⁴ Сын же Челове́ческий и́дет, я́коже есть пи́сано о Нем. Го́ре же челове́ку тому́, и́мже Сын Челове́ческий преда́стся, добро́ бы бы́ло ему́, а́ще не бы роди́лся челове́к той.

²⁵ Отвеща́в же Иу́да предая́й Его́, рече́: еда́ аз есмь, Равви́? Глаго́ла ему́: ты рече́.

²⁶ Яду́щим же им, прие́м Иису́с хлеб, и благослови́в преломи́, и дая́ше ученико́м, и рече́: приими́те, яди́те, сие́ есть Те́ло Мое́.

²⁷ И прие́м ча́шу, хвалу́ возда́в, даде́ им, глаго́ля: пи́йте от нея́ вси.

²⁸ Сия́ бо есть Кровь Моя́, Но́ваго Заве́та, я́же за мно́гия излива́ема, во оставле́ние грехо́в.

²⁹ Глаго́лю же вам: я́ко не и́мам пи́ти от ны́не от сего́ плода́ ло́знаго, до дне того́, егда́ и пию́ с ва́ми но́во во Ца́рствии Oтца́ Моего́.

³⁰ И воспе́вше, изыдо́ша в го́ру Елео́нску.

³¹ Тогда́ глаго́ла им Иису́с: вси вы соблазните́ся о Мне в нощь сию́. Пи́сано бо есть: поражу́ па́стыря, и разы́дутся о́вцы ста́да.

³² По воскресе́нии же Мое́м, варя́ю вы в Галиле́и.

³³ Отвеща́в же Петр рече́ Ему́: а́ще и вси соблазня́тся о Тебе́, аз никогда́же соблажню́ся.

³⁴ Рече́ ему́ Иису́с: ами́нь глаго́лю тебе́, я́ко в сию́ нощь, пре́жде да́же але́ктор не возгласи́т, трикра́ты отве́ржешися Мене́.

³⁵ Глаго́ла Ему́ Петр: а́ще ми есть и умре́ти с Тобо́ю, не отве́ргуся Тебе́. Та́кожде и вси ученицы́ ре́ша.

³⁶ Тогда́ прии́де с ни́ми Иису́с в весь, нарица́емую Гефсима́ниа, и глаго́ла ученико́м: седи́те ту, до́ндеже шед помолю́ся та́мо.

³⁷ И пое́м Петра́ и óба сы́на Зеведе́ова, нача́т скорбе́ти и тужи́ти.

³⁸ Тогда́ глаго́ла им Иису́с: приско́рбна есть душа́ Моя́ до сме́рти, пожди́те зде, и бди́те со Мно́ю.

³⁹ И преше́д ма́ло, паде́ на лице́ Свое́м, моля́ся и глаго́ля: Óтче Мой, а́ще возмо́жно есть, да мимои́дет от Мене́ ча́ша сия́, oба́че не я́коже Аз хощу́, но я́коже Ты.

⁴⁰ И прише́д ко ученико́м, и обре́те их спя́ща, и глаго́ла Петро́ви: та́ко ли не возмого́сте еди́наго часа́ побде́ти со Мно́ю?

⁴¹ Бди́те и моли́теся, да не вни́дете в напа́сть, дух бо бодр, плоть же немощна́.

⁴² Па́ки втори́цею шед помоли́ся, глаго́ля: Óтче мой, а́ще не мо́жет сия́ ча́ша мимоити́ от Мене́, а́ще не пию́ ея́, бу́ди во́ля Твоя́.

⁴³ И прише́д обре́те их па́ки спя́ща, бе́ста бо им óчи отяготе́не.

⁴⁴ И оста́вль их, шед па́ки помоли́ся трети́цею, то́жде сло́во рек.

⁴⁵ Тогда́ прии́де ко ученико́м Свои́м и глаго́ла им: спи́те про́чее, и почива́йте, се прибли́жися час, и Сын Челове́ческий предае́тся в ру́ки гре́шников.

⁴⁶ Воста́ните, и́дем, се прибли́жися предая́й Мя.

⁴⁷ И еще́ Ему́ глаго́лющу, се Иу́да, еди́н от обоюна́десяте прии́де, и с ним наро́д мног, со oру́жием и дреко́льми, от архиере́й и ста́рец людски́х.

⁴⁸ Предая́й же Его́, даде́ им зна́мение, глаго́ля: Его́же а́ще лобжу́, Той есть, ими́те Его́.

⁴⁹ И а́бие присту́пль ко Иису́сови, рече́: ра́дуйся, Равви́, и облобыза́ Его́.

⁵⁰ Иису́с же рече́ ему́: дру́же, твори́ на не́же еси́ прише́л. ^[39] Тогда́ присту́пльше возложи́ша ру́це на Иису́са, и я́ша Его́.

⁵¹ И се еди́н от су́щих со Иису́сом, просте́р ру́ку, извлече́ нож свой, и уда́ри раба́ архиере́ова, и уре́за ему́ у́хо.

⁵² Тогда́ глаго́ла ему́ Иису́с: возврати́ нож твой в ме́сто его́, вси бо прие́мшии нож ноже́м поги́бнут.

⁵³ Или́ мни́тся ти, я́ко не могу́ ны́не умоли́ти Oтца́ Моего́, и предста́вит Ми вя́щше или́ двана́десяте легео́на А́нгел?

⁵⁴ Ка́ко у́бо сбу́дутся писа́ния, я́ко та́ко подоба́ет бы́ти?

⁵⁵ В той час рече́ Иису́с наро́дом: я́ко на разбо́йника ли изыдо́сте со ору́жием и дреко́льми, я́ти Мя; по вся дни при вас седе́х уча́ в це́ркви, и не я́сте Мене́.

⁵⁶ Се же все бысть, да сбу́дутся писа́ния проро́ческая. Тогда́ ученицы́ вси оста́вльше Его́, бежа́ша.

⁵⁷ Во́ини же е́мше Иису́са ведо́ша к Каиа́фе архиере́ови, иде́же кни́жницы и ста́рцы собра́шася.

⁵⁸ Петр же идя́ше по Нем издале́ча, до двора́ архиере́ова, и вшед внутрь, седя́ше со слуга́ми, ви́дети кончи́ну.

⁵⁹ Архиере́е же и ста́рцы, и сонм весь иска́ху лжесвиде́тельства на Иису́са, я́ко да убию́т Его́.

⁶⁰ И не обрета́ху, и мно́гим лжесвиде́телем присту́пльшим, не обрето́ша. По́слежде же приступи́ша два лжесвиде́теля,

⁶¹ Ре́ста: Сей рече́, могу́ разори́ти це́рковь Бо́жию и треми́ де́ньми созда́ти ю́.

⁶² И воста́в архиере́й, рече́ Ему́: ничесо́же ли отвещава́еши, что си́и на Тя свиде́тельствуют?

⁶³ Иису́с же молча́ше. И отвеща́в архиере́й, рече́ Ему́: заклина́ю Тя Бо́гом живы́м, да рече́ши нам, а́ще Ты еси́ Христо́с, Сын Бо́жий?

⁶⁴ Глаго́ла ему́ Иису́с: ты рече́. Oба́че глаго́лю вам: отсе́ле у́зрите Сы́на Челове́ческаго седя́ща одесну́ю си́лы, и гряду́ща на о́блацех небе́сных.

⁶⁵ Тогда́ архиере́й растерза́ ри́зы своя́, глаго́ля, я́ко хулу́ глаго́ла, что еще́ тре́буем свиде́телей? Се ны́не слы́шасте хулу́ Его́.

⁶⁶ Что ся вам мнит? Oни́ же отвеща́вше, ре́ша: пови́нен есть сме́рти.

⁶⁷ Тогда́ заплева́ша лице́ Его́, и па́кости Ему́ де́яху, ^[40] óвии же за лани́ту уда́риша, ^[41]

⁶⁸ Глаго́люще: прорцы́ нам, Христе́, кто есть ударе́й Тя?

⁶⁹ Петр же вне седя́ше во дворе́, и приступи́ к нему́ еди́на рабы́ня, глаго́лющи: и ты бе со Иису́сом Галиле́йским.

⁷⁰ Oн же отве́ржеся пред все́ми, глаго́ля: не вем, что глаго́леши.

⁷¹ Изше́дшу же ему́ ко врато́м, узре́ его́ друга́я, и глаго́ла им ту: и сей бе со Иису́сом Назоре́ом.

⁷² И па́ки отве́ржеся с кля́твою: я́ко не зна́ю Челове́ка.

⁷³ По ма́ле же приступи́вше стоя́щии, ре́ша Петро́ви: вои́стинну и ты от них еси́, и́бо бесе́да твоя́ я́ве тя твори́т.

⁷⁴ Тогда́ нача́т роти́тися и кля́тися, я́ко не зна́ю Челове́ка. И а́бие пе́тель возгласи́.

⁷⁵ И помяну́ Петр глаго́л Иису́сов, рече́нный ему́: я́ко пре́жде да́же пе́тель не возгласи́т, трикра́ты отве́ржешися Мене́. И изше́д вон пла́кася го́рько.

Глава 27

¹ У́тру же бы́вшу, сове́т сотвори́ша вси архиере́е и ста́рцы людсти́и на Иису́са, я́ко уби́ти Его́.

² И связа́вше Его́ ведо́ша, и преда́ша Его́ Понти́йскому Пила́ту иге́мону.

³ Тогда́ ви́дев Иу́да преда́вый Его́, я́ко осуди́ша Его́, раска́явся возврати́ три́десять сре́бреники архиере́ем и ста́рцем,

⁴ Глаго́ля: согреши́х преда́в кровь непови́нную. Они́ же ре́ша: что есть нам? Ты у́зриши.

⁵ И пове́рг сре́бреники в це́ркви, оты́де, и шед удави́ся.

⁶ Архиере́е же прие́мше сре́бреники, ре́ша: недосто́йно есть вложи́ти их в корва́ну, поне́же цена́ кро́ве есть.

⁷ Сове́т же сотво́рше, купи́ша и́ми село́ скуде́льничо, в погреба́ние стра́нным.

⁸ Те́мже нарече́ся село́ то село́ кро́ве, до сего́ дне.

⁹ Тогда́ сбы́стся рече́нное Иереми́ем проро́ком, глаго́лющим: и прия́ша три́десять сре́бреник, це́ну Цене́ннаго, Его́же цени́ша от сыно́в Изра́илев,

¹⁰ И да́ша я́ на селе́ скуде́льничи, я́коже сказа́ мне Госпо́дь.

¹¹ Иису́с же ста пред иге́моном. И вопроси́ Его́ иге́мон, глаго́ля: Ты ли еси́ Царь Иуде́йский? Иису́с же рече́ ему́: ты глаго́леши.

¹² И егда́ Нань глаго́лаху архиере́е и ста́рцы, ничесо́же отвещава́ше.

¹³ Тогда́ глаго́ла Ему́ Пила́т: не слы́шиши ли, коли́ко на Тя свиде́тельствуют?

¹⁴ И не отвеща́ ему́ ни к еди́ному глаго́лу, я́ко диви́тися иге́мону зело́.

¹⁵ На всяк же пра́здник обы́чай бе иге́мону отпуща́ти еди́наго наро́ду свя́зня, его́же хотя́ху.

¹⁶ Имя́ху же тогда́ свя́зана наро́чита, глаго́лемаго Вара́вву.

¹⁷ Со́бранным же им, рече́ им Пила́т: кого́ хо́щете от обою́ отпущу́ вам, Вара́вву ли, или́ Иису́са глаго́лемаго Христа́?

¹⁸ Ве́дяше бо, я́ко за́висти ра́ди преда́ша Его́.

¹⁹ Седя́щу же ему́ на суди́щи, посла́ к нему́ жена́ его́, глаго́лющи, ничто́же тебе́ и Пра́веднику Тому́, мно́го бо пострада́х днесь во сне Его́ ра́ди.

²⁰ Архиере́е же и ста́рцы наусти́ша наро́ды, да испро́сят Вара́вву, Иису́са же погубя́т.

²¹ Отвеща́в же иге́мон рече́ им: кого́ хо́щете от обою́ отпущу́ вам? Они́ же ре́ша: Вара́вву.

²² Глаго́ла им Пила́т: что у́бо сотворю́ Иису́су глаго́лемому Христу́? Глаго́лаша ему́ вси: да ра́спят бу́дет.

²³ Иге́мон же рече́: ко́е у́бо зло сотвори́? Они́ же и́злиха вопия́ху, глаго́люще: да про́пят бу́дет.

²⁴ Ви́дев же Пила́т, я́ко ничто́же успева́ет, но па́че молва́ быва́ет, прие́мь во́ду, умы́ ру́це пред наро́дом, глаго́ля: непови́нен есмь от кро́ве Пра́веднаго Сего́, вы у́зрите.

²⁵ И отвеща́вше вси лю́дие ре́ша: кровь Его́ на нас и на ча́дех на́ших.

²⁶ Тогда́ отпусти́ им Вара́вву, Иису́са же бив предаде́ им, да Его́ про́пнут.

²⁷ Тогда́ во́ини иге́моновы, прие́мше Иису́са на суди́ще, ^[42] собра́ша Нань все мно́жество во́ин.

²⁸ И совле́кше Его́, оде́яша Его́ хлами́дою червле́ною.

²⁹ И спле́тше вене́ц от те́рния, возложи́ша на главу́ Его́, и трость в десни́цу Его́, и покло́ньшеся на коле́ну пред Ним руга́хуся Ему́, глаго́люще: ра́дуйся, Царю́ Иуде́йский.

³⁰ И плю́нувше Нань, прия́ша трость и бия́ху по главе́ Его́.

³¹ И егда́ поруга́шася Ему́, совлеко́ша с Него́ багряни́цу и облеко́ша Его́ в ри́зы Его́, и ведо́ша Его́ на пропя́тие.

³² Исходя́ще же обрето́ша челове́ка Кирине́йска, и́менем Си́мона, и сему́ заде́ша понести́ крест Его́.

³³ И прише́дше на ме́сто нарица́емое Голго́фа, е́же есть глаго́лемо Кра́ниево ме́сто,

³⁴ Да́ша Ему́ пи́ти о́цет с же́лчию сме́шен, и вкушь, не хотя́ше пи́ти.

³⁵ Распе́ншии же Его́ раздели́ша ри́зы Его́, ве́ргше жре́бия,

³⁶ И седя́ще стрежа́ху Его́ ту.

³⁷ И возложи́ша верху́ главы́ Его́ вину́ Его́ напи́сану: Сей есть Иису́с, Царь Иуде́йский.

³⁸ Тогда́ распя́ша с Ним два разбо́йника: еди́наго одесну́ю, и еди́наго ошу́юю.

³⁹ Мимоходя́щии же ху́ляху Его́, покива́юще глава́ми свои́ми,

⁴⁰ И глаго́люще: Разоря́яй це́рковь и треми́ де́ньми Созида́яй, спаси́ся Сам, а́ще Сын еси́ Бо́жий, сни́ди со креста́.

⁴¹ Та́кожде же и архиере́е руга́ющеся с кни́жники и ста́рцы и фарисе́и, глаго́лаху:

⁴² Ины́я спасе́, Себе́ ли не мо́жет спасти́? А́ще Царь Изра́илев есть, да сни́дет ны́не со креста́, и ве́руем в Него́.

⁴³ Упова́ на Бо́га, да изба́вит ны́не Его́, а́ще хо́щет Ему́. Рече́ бо, я́ко Бо́жий есмь Сын.

⁴⁴ То́жде же и разбо́йника распя́тая с Ним поноша́ста Ему́.

⁴⁵ От шеста́го же часа́ тма бысть по всей земли́ до часа́ девя́таго.

⁴⁶ О девя́том же часе́ возопи́ Иису́с гла́сом ве́лиим, глаго́ля: Или́, Или́, лима́ савахфани́? Е́же есть, Бо́же Мой, Бо́же Мой, вску́ю Мя еси́ оста́вил?

⁴⁷ Не́цыи же от ту стоя́щих слы́шавше глаго́лаху, я́ко Илию́ глаша́ет Сей.

⁴⁸ И а́бие тек еди́н от них, и прие́м гу́бу, испо́лнив же о́цта, и вонзе́ на трость, напая́ше Его́.

⁴⁹ Про́чии же глаго́лаху: оста́ви, да ви́дим, а́ще прии́дет Илиа́ спасти́ Его́.

⁵⁰ Иису́с же, па́ки возопи́в гла́сом ве́лиим, испусти́ дух.

⁵¹ И се заве́са церко́вная раздра́ся на дво́е с вы́шняго кра́я до ни́жняго, и земля́ потрясе́ся, и ка́мение распаде́ся,

⁵² И гро́би отверзо́шася, и мно́га телеса́ усо́пших святы́х воста́ша,

⁵³ И изше́дше из гроб, по воскресе́нии Его́, внидо́ша во святы́й град и яви́шася мно́зем.

⁵⁴ Со́тник же и и́же с ним стрегу́щии Иису́са, ви́девше трус и бы́вшая, убоя́шася зело́, глаго́люще: вои́стинну Бо́жий Сын бе Сей.

⁵⁵ Бя́ху же ту и жены́ мно́ги издале́ча зря́ще, я́же идо́ша по Иису́се от Галиле́и, служа́ще Ему́.

⁵⁶ В ни́хже бе Мари́а Магдали́на, и Мари́а Иа́кова и Иоси́и ма́ти, и ма́ти сы́ну Зеведе́ову.

⁵⁷ По́зде же бы́вшу, прии́де челове́к бога́т от Аримафе́а, и́менем Ио́сиф, и́же и той учи́ся у Иису́са.

⁵⁸ Сей присту́пль к Пила́ту, проси́ телесе́ Иису́сова. Тогда́ Пила́т повеле́ да́ти те́ло.

⁵⁹ И прие́мь те́ло Ио́сиф, обви́т е́ плащани́цею ^[43] чи́стою,

⁶⁰ И положи́ е́ в но́вем свое́м гро́бе, и́же изсече́ в ка́мени. И возвали́в ка́мень ве́лий над две́ри гро́ба, оты́де.

⁶¹ Бе же ту Мари́а Магдали́на, и друга́я Мари́а, седя́ще пря́мо гро́ба.

⁶² Во у́трий день, и́же есть по пятце́, собра́шася архиере́е и фарисе́е к Пила́ту,

⁶³ Глаго́люще: го́споди, помяну́хом, я́ко льстец он рече́, еще́ сый жив, по трие́х днех воста́ну.

⁶⁴ Повели́ у́бо утверди́ти гроб до тре́тияго дне, да не ка́ко прише́дше ученицы́ Его́ но́щию укра́дут Его́ и реку́т лю́дем: воста́ от ме́ртвых, и бу́дет после́дняя лесть го́рша пе́рвыя.

⁶⁵ Рече́ же им Пила́т: и́мате кустоди́ю, иди́те, утверди́те, я́коже ве́сте.

⁶⁶ Они́ же ше́дше утверди́ша гроб, зна́менавше ка́мень с кустоди́ею.

Глава 28

¹ В ве́чер суббо́тный, ^[44] свита́ющи во еди́ну от суббо́т, прии́де Мари́а Магдали́на и друга́я Мари́а, ви́дети гроб.

² И се трус бысть ве́лий: А́нгел бо Госпо́день сшед с небесе́, присту́пль отвали́ ка́мень от две́рий гро́ба и седя́ше на нем.

³ Бе же зрак его́ я́ко мо́лния, и одея́ние его́ бело́ я́ко снег.

⁴ От стра́ха же его́ сотрясо́шася стрегу́щии и бы́ша я́ко ме́ртви.

⁵ Отвеща́в же А́нгел рече́ жена́м: не бо́йтеся вы, вем бо, я́ко Иису́са распя́таго и́щете.

⁶ Несть зде, воста́ бо, я́коже рече́, прииди́те, ви́дите ме́сто, иде́же лежа́ Госпо́дь,

⁷ И ско́ро ше́дше рцы́те ученико́м Его́, я́ко воста́ от ме́ртвых и се варя́ет вы в Галиле́и, та́мо Его́ у́зрите, се рех вам.

⁸ И изше́дше ско́ро от гро́ба со стра́хом и ра́достию ве́лиею, теко́сте возвести́ти ученико́м Его́. Я́коже идя́сте возвести́ти ученико́м Его́,

⁹ И се Иису́с сре́те я́, глаго́ля: ра́дуйтеся. Оне́ же присту́пльше я́стеся за но́зе Его́ и поклони́стеся Ему́.

¹⁰ Тогда́ глаго́ла и́ма Иису́с: не бо́йтеся, иди́те, возвести́те бра́тии Мое́й, да и́дут в Галиле́ю, и ту Мя ви́дят.

¹¹ Иду́щема же и́ма, се не́цыи от кусто́диа прише́дше во град, возвести́ша архиере́ом вся бы́вшая.

¹² И собра́вшеся со ста́рцы, сове́т сотвори́ша, сре́бреники дово́льны да́ша во́ином,

¹³ Глаго́люще: рцы́те, я́ко ученицы́ Его́ но́щию прише́дше украдо́ша Его́, нам спя́щим.

¹⁴ И а́ще сие́ услы́шано бу́дет у иге́мона, мы утоли́м его́ и вас безпеча́льны сотвори́м.

¹⁵ Они́ же прие́мше сре́бреники, сотвори́ша, я́коже науче́ни бы́ша. И промче́ся сло́во сие́ во иуде́ех да́же до сего́ дне.

¹⁶ Еди́нии же на́десяте ученицы́ идо́ша в Галиле́ю, в гору́, а́може повеле́ им Иису́с,

¹⁷ И ви́девше Его́, поклони́шася Ему́, о́ви же усумне́шася.

¹⁸ И присту́пль Иису́с, рече́ им, глаго́ля: даде́ся Ми вся́ка власть на небеси́ и на земли́.

¹⁹ Ше́дше у́бо научи́те вся язы́ки, крестя́ще их во и́мя Отца́ и Сы́на и Свята́го Ду́ха,

²⁰ Уча́ще их блюсти́ вся, ели́ка запове́дах вам, и се Аз с ва́ми есмь во вся дни до сконча́ния ве́ка. Ами́нь.

Ева́нгелие от Ма́рка

Глава 1

¹ Зача́ло Ева́нгелия Иису́са Христа́, Сы́на Бо́жия.

² Я́коже есть пи́сано во проро́цех: се Аз посыла́ю А́нгела Моего́ пред лице́м Твои́м, и́же угото́вит путь Твой пред Тобо́ю.

³ Глас вопию́щаго в пусты́ни: угото́вайте путь Госпо́день, пра́вы твори́те стези́ Его́.

⁴ Бысть Иоа́нн, крестя́й в пусты́ни, и пропове́дая креще́ние покая́ния во отпуще́ние грехо́в.

⁵ И исхожда́ше к нему́ вся Иуде́йская страна́ и иерусали́мляне, и креща́хуся вси во Иорда́не реце́ от него́, испове́дающе грехи́ своя́.

⁶ Бе же Иоа́нн оболче́н власы́ вельблу́жди, и по́яс усме́н о чресле́х его́, и яды́й акри́ды, и мед ди́вий.

⁷ И пропове́даше, глаго́ля: гряде́т Кре́плий мене́, во след мене́, Ему́же несмь досто́ин, прекло́нься, разреши́ти реме́нь сапо́г Его́.

⁸ Аз у́бо крести́х вы в воде́, Той же крести́т вы Ду́хом Святы́м.

⁹ И бысть во о́нех днех, прии́де Иису́с от Назаре́та Галиле́йскаго и крести́ся от Иоа́нна во Иорда́не.

¹⁰ И а́бие восходя́ от воды́, ви́де разводя́щася Небеса́ и Дух, я́ко го́лубь, сходя́щ Нань.

¹¹ И глас бысть с Небесе́: Ты еси́ Сын Мой возлю́бленный, о Не́мже благоволи́х.

¹² И а́бие Дух изведе́ Его́ в пусты́ню.

¹³ И бе ту в пусты́ни дней четы́редесять, искуша́емь сатано́ю, и бе со зверьми́, и А́нгели служа́ху Ему́.

¹⁴ По преда́нии же Иоа́ннове, прии́де Иису́с в Галиле́ю, пропове́дая Ева́нгелие Ца́рствия Бо́жия,

¹⁵ И глаго́ля: я́ко испо́лнися вре́мя и прибли́жися Ца́рствие Бо́жие. Пока́йтеся и ве́руйте во Ева́нгелие.

¹⁶ Ходя́ же при мо́ри Галиле́йстем, ви́де Си́мона и Андре́а бра́та того́ Си́мона, вмета́юща мре́жи в мо́ре, [бе́ста бо рыбаря́].

¹⁷ И рече́ и́ма Иису́с: прииди́та вслед Мене́, и сотворю́ вас бы́ти ловца́ челове́ком.

¹⁸ И а́бие оста́вльша мре́жи своя́, по Нем идо́ста.

¹⁹ И преше́д ма́ло отту́ду, узре́ Иа́кова Зеведе́ова и Иоа́нна бра́та его́, и та в корабли́ стро́яща мре́жа.

²⁰ И а́бие воззва́ я́. И оста́вльша отца́ своего́ Зеведе́а в корабли́ с нае́мники, по Нем идо́ста.

²¹ И внидо́ша в Капернау́м, и а́бие в суббо́ты вшед в со́нмище, уча́ше.

²² И дивля́хуся о уче́нии Его́, бе бо учя́ их я́ко власть имы́й, и не я́ко кни́жницы.

²³ И бе в со́нмищи их челове́к в ду́се нечи́сте, и воззва́,

²⁴ Глаго́ля: оста́ви, что нам и Тебе́, Иису́се Назоряни́не? Прише́л еси́ погуби́ти нас, вем Тя, кто еси́, Святы́й Бо́жий.

²⁵ И запрети́ ему́ Иису́с, глаго́ля: умолчи́ и изы́ди из него́.

²⁶ И стрясе́ его́ дух нечи́стый, и возопи́ гла́сом вели́ким, и изы́де из него́.

²⁷ И ужасо́шася вси, я́коже стяза́тися им к себе́, глаго́лющим: что есть сие́? И что уче́ние но́вое сие́, я́ко по о́бласти и духово́м нечи́стым вели́т, и послу́шают Его́?

²⁸ Изы́де же слух Его́ а́бие во всю страну́ Галиле́йску.

²⁹ И а́бие из со́нмища исходя́ще, приидо́ша в дом Си́монов и Андре́ов со Иа́ковом и Иоа́нном.

³⁰ Те́ща же Си́монова лежа́ше огне́м жего́ма, и а́бие глаго́лаша Ему́ о ней.

³¹ И присту́пль воздви́же ю́, ем за ру́ку ея́, и оста́ви ю́ огнь а́бие, и служа́ше им.

³² По́зде же бы́вшу, егда́ захожда́ше со́лнце, приноша́ху к Нему́ вся неду́жныя и бесны́я.

³³ И бе весь град собра́лся к две́рем.

³⁴ И исцели́ мно́ги зле стра́ждущия разли́чными неду́ги, и бе́сы мно́ги изгна́, и не оставля́ше глаго́лати бе́сы, я́ко ве́дяху Его́ Христа́ су́ща.

³⁵ И у́тро, но́щи су́щи зело́, воста́в изы́де, и и́де в пу́сто ме́сто, и ту моли́тву де́яше.

³⁶ И гна́ша Его́ Си́мон и и́же с ним, и обре́тше Его́,

³⁷ Глаго́лаша Ему́, я́ко вси Тебе́ и́щут.

³⁸ И глаго́ла им: и́дем в бли́жния ве́си и гра́ды, да и ту пропове́м, на сие́ бо изыдо́х.

³⁹ И бе пропове́дая на со́нмищах их, во всей Галиле́и, и бе́сы изгоня́.

⁴⁰ И прии́де к Нему́ прокаже́н, моля́ Его́ и на коле́ну припа́дая пред Ним, и глаго́ля Ему́, я́ко, а́ще хо́щеши, мо́жеши мя очи́стити.

⁴¹ Иису́с же милосе́рдовав, просте́р ру́ку, косну́ его́, и глаго́ла ему́: хощу́, очи́стися.

⁴² И ре́кшу ему́, а́бие оты́де от него́ прокаже́ние, и чист бысть.

⁴³ И запре́щь ему́, а́бие изгна́ его́.

⁴⁴ И глаго́ла ему́: блюди́, никому́же ничесо́же рцы, но шед покажи́ся иере́еви и принеси́ за очище́ние твое́, я́же повеле́ Моисе́й, во свиде́тельство им.

⁴⁵ Он же изше́д нача́т пропове́дати мно́го и проноси́ти сло́во, я́коже ктому́ не мощи́ ему́ я́ве во град вни́ти: но вне в пусты́х ме́стех бе. И прихожда́ху к Нему́ отвсю́ду.

Глава 2

¹ И вни́де па́ки в Капернау́м по днех, и слы́шано бысть, я́ко в дому́ есть.

² И а́бие собра́шася мно́зи, я́коже ктому́ не вмеща́тися ни при две́рех, и глаго́лаше им сло́во.

³ И приидо́ша к Нему́ нося́ще разсла́бленна [жи́лами], носи́ма четы́рми;

⁴ И не могу́щим прибли́житися к Нему́ наро́да ра́ди, откры́ша покро́в, иде́же бе, и прокопа́вше све́сиша одр, на не́мже разсла́бленный лежа́ше.

⁵ Ви́дев же Иису́с ве́ру их, глаго́ла разсла́бленному: ча́до, отпуща́ются тебе́ греси́ твои́.

⁶ Бя́ху же не́цыи от кни́жник ту седя́ще и помышля́юще в сердца́х свои́х:

⁷ Что Сей та́ко глаго́лет хулы́? Кто мо́жет оставля́ти грехи́, то́кмо еди́н Бог?

⁸ И а́бие разуме́в Иису́с ду́хом Свои́м, я́ко та́ко ти́и помышля́ют в себе́, рече́ им: что сия́ помышля́ете в сердца́х ва́ших?

⁹ Что есть удо́бее? Рещи́ разсла́бленному: отпуща́ются тебе́ греси́? Или́ рещи́: воста́ни, и возми́ одр твой, и ходи́?

¹⁰ Но да уве́сте, я́ко власть и́мать Сын Челове́ческий на земли́ отпуща́ти грехи́, [глаго́ла разсла́бленному:]

¹¹ Тебе́ глаго́лю, воста́ни, и возми́ одр твой, и иди́ в дом твой.

¹² И воста́ а́бие, и взем одр, изы́де пред все́ми, я́ко диви́тися всем и сла́вити Бо́га, глаго́лющим, я́ко николи́же та́ко ви́дехом.

¹³ И изы́де па́ки к мо́рю: и весь наро́д идя́ше к Нему́, и уча́ше их.

¹⁴ И мимогряды́й ви́де Леви́ю Алфе́ова, седя́ща на мы́тнице, и глаго́ла ему́: по Мне гряди́. И воста́в в след Его́ и́де.

¹⁵ И бысть возлежа́щу Ему́ в дому́ его́, и мно́зи мытари́ и гре́шницы возлежа́ху со Иису́сом и со ученики́ Его́, бя́ху бо мно́зи, и по Нем идо́ша.

¹⁶ И кни́жницы и фарисе́е, ви́девше Его́ яду́ща с мытари́ и гре́шники, глаго́лахуученико́м Его́: что я́ко с мытари́ и гре́шники яст и пие́т?

¹⁷ И слы́шав Иису́с глаго́ла им: не тре́буют здра́вии врача́, но боля́щии, не приидо́х призва́ти пра́ведники, но гре́шники на покая́ние.

¹⁸ И бя́ху ученицы́ Иоа́нновы и фарисе́йстии постя́щеся, и приидо́ша и глаго́лаша Иису́су: почто́ ученицы́ Иоа́нновы и фарисе́йстии постя́тся, а Твои́ ученицы́ не постя́тся?

¹⁹ И рече́ им Иису́с: еда́ мо́гут сы́нове бра́чнии, до́ндеже жени́х с ни́ми есть, пости́тися? Ели́ко вре́мя с собо́ю и́мут жениха́, не мо́гут пости́тися.

²⁰ Прии́дут же дни́е, егда́ оты́мется от них жени́х, и тогда́ постя́тся в ты́я дни.

²¹ И никто́же приложе́ния пла́та небе́лена пришива́ет к ри́зе ве́тсе а́ще ли же ни, во́змет коне́ц его́ но́вое от ве́тхаго, и го́рши дира́ бу́дет. ^[45]

²² И никто́же влива́ет вина́ но́ва в ме́хи ве́тхи, а́ще ли же ни, просади́т вино́ но́вое ме́хи, и вино́ пролие́тся, и ме́си поги́бнут, но вино́ но́вое в ме́хи но́вы влия́ти [подоба́ет].

²³ И бы́сть мимоходи́ти Ему́ в суббо́ты сквозе́ се́яния, и нача́ша ученицы́ Его́ путь твори́ти, востерза́юще кла́сы.

²⁴ И фарисе́е глаго́лаху Ему́: виждь, что творя́т в суббо́ты, его́же не досто́ит?

²⁵ И Той глаго́лаше им: не́сте ли николи́же чли, что сотвори́ Дави́д, егда́ тре́бование име́ и взалка́ сам и и́же с ним?

²⁶ Ка́ко вни́де в дом Бо́жий при Авиафа́ре архиере́и, и хле́бы предложе́ния снеде́, и́хже не досто́яше я́сти то́кмо иере́ем, и даде́ и су́щим с ним?

²⁷ И глаго́лаше им: суббо́та челове́ка ра́ди бысть, а не челове́к суббо́ты ра́ди.

²⁸ Те́мже госпо́дь есть Сын Челове́ческий и суббо́те.

Глава 3

¹ И вни́де па́ки в со́нмище, и бе та́мо челове́к, су́ху имы́й ру́ку.

² И назира́ху Его́, а́ще в суббо́ты исцели́т его́, да Нань возглаго́лют.

³ И глаго́ла челове́ку су́ху иму́щему ру́ку: ста́ни посреде́.

⁴ И глаго́ла им: досто́ит ли в суббо́ты добро́ твори́ти, или́ зло твори́ти? Ду́шу спасти́, или́ погуби́ти? Они́ же молча́ху.

⁵ И воззре́в на них со гне́вом, скорбя́ о окамене́нии серде́ц их, глаго́ла челове́ку: простри́ ру́ку твою́. И простре́, и утверди́ся рука́ его́ цела́ я́ко друга́я.

⁶ И изше́дше фарисе́е, а́бие со иродиа́ны, ка́ко Его́ погубя́т.

⁷ Иису́с же оты́де со ученики́ Свои́ми к мо́рю, и мног наро́д от Галиле́и по Нем и́де, и от Иуде́и,

⁸ И от Иерусали́ма, и от Идуме́и, и со о́наго по́лу Иорда́на. И от Ти́ра и Сидо́на мно́жество мно́гое, слы́шавше, ели́ка творя́ше, [и] приидо́ша к Нему́.

⁹ И рече́ ученико́м Свои́м, да кора́бль бу́дет у Него́ наро́да ра́ди, да не стужа́ют Ему́.

¹⁰ Мно́ги бо исцели́, я́коже напада́ти Ем, ^[46] да Ему́ прико́снутся, ели́цы име́яху ра́ны.

¹¹ И ду́си нечи́стии, егда́ ви́дяху Его́, припа́даху к Нему́ и зва́ху, глаго́люще, я́ко Ты еси́ Сын Бо́жий.

¹² И мно́го преща́ше им, да не явле́нна Его́ сотворя́т.

¹³ И взы́де на гору́ и призва́, и́хже хотя́ше Сам, и приидо́ша к Нему́.

¹⁴ И сотвори́ двана́десяте, да бу́дут с Ним, и да посыла́ет их пропове́дати,

¹⁵ И име́ти власть цели́ти неду́ги и изгони́ти бе́сы.

¹⁶ И нарече́ Си́мону и́мя Петр,

¹⁷ И Иа́кова Зеведе́ова и Иоа́нна бра́та Иа́ковля, и нарече́ и́ма имена́ Воанерге́с, е́же есть сы́на гро́мова.

¹⁸ И Андре́а, и Фили́ппа, и Варфоломе́а, и Матфе́а, и Фому́, и Иа́кова Алфе́ова, и Фадде́а, и Си́мона Канани́та,

¹⁹ И Иу́ду Искарио́тскаго, и́же и предаде́ Его́.

²⁰ И приидо́ша в дом, и собра́ся па́ки наро́д, я́ко не мощи́ им ни хле́ба я́сти.

²¹ И слы́шавше и́же бя́ху у Него́, изыдо́ша, да и́мут Его́, глаго́лаху бо, я́ко неи́стов есть.

²² И кни́жницы, и́же от Иерусали́ма низше́дшии, глаго́лаху, я́ко веельзеву́ла и́мать и я́ко о кня́зе бесо́встем изго́нит бе́сы.

²³ И призва́в их, в при́тчах глаго́лаше им: ка́ко мо́жет сатана́ сатану́ изгони́ти?

²⁴ И а́ще ца́рство на ся раздели́тся, не мо́жет ста́ти ца́рство то.

²⁵ И а́ще дом на ся раздели́тся, не мо́жет ста́ти дом той.

²⁶ И а́ще сатана́ воста́ на ся сам и раздели́ся, не мо́жет ста́ти, но коне́ц и́мать.

²⁷ Никто́же мо́жет сосу́ды кре́пкаго, вшед в дом его́, расхи́тити, а́ще не пе́рвее кре́пкаго свя́жет, и тогда́ дом его́ расхи́тит.

²⁸ Ами́нь глаго́лю вам, я́ко вся отпу́стятся согреше́ния сыно́м челове́ческим, и хуле́ния, ели́ка а́ще восху́лят.

²⁹ А и́же восху́лит на Ду́ха Свята́го, не и́мать отпуще́ния во ве́ки, но пови́нен есть ве́чному суду́.

³⁰ Зане́ глаго́лаху: ду́ха нечи́стаго и́мать.

³¹ Приидо́ша у́бо Ма́ти и бра́тия Его́, и вне стоя́ще посла́ша к Нему́, зову́ще Его́.

³² И седя́ше наро́д о Нем. Ре́ша же Ему́: се Ма́ти Твоя́ и бра́тия Твоя́ и сестры́ Твоя́ вне и́щут Тебе́.

³³ И отвеща́ им, глаго́ля: кто есть ма́ти Моя́, или́ бра́тия Моя́?

³⁴ И согля́дав о́крест Себе́ седя́щия, глаго́ла: се ма́ти Моя́ и бра́тия Моя́,

³⁵ И́же бо а́ще сотвори́т во́лю Бо́жию, сей брат Мой и сестра́ Моя́ и ма́ти Ми есть.

Глава 4

¹ И па́ки нача́т учи́ти при мо́ри, и собра́ся к Нему́ наро́д мног, я́коже Самому́ вле́зшу в кора́бль, седе́ти в мо́ри, и весь наро́д при мо́ри на земли́ бя́ше.

² И уча́ше их при́тчами мно́го и глаго́лаше им во уче́нии Свое́м:

³ Слы́шите, се изы́де се́яй се́яти,

⁴ И бысть егда́ се́яше, о́во паде́ при пути́, и приидо́ша пти́цы, и позоба́ша е́.

⁵ Друго́е же паде́ на ка́мени, иде́же не имя́ше земли́ мно́ги, и а́бие прозябе́, зане́ не имя́ше глубины́ земны́я.

⁶ Со́лнцу же возсия́вшу присвя́де, ^[47] и зане́ не имя́ше ко́рене, и́зсше.

⁷ И друго́е паде́ в те́рнии, и взы́де те́рние, и подави́ е́, и плода́ не даст.

⁸ И друго́е паде́ на земли́ до́брей, и дая́ше плод восходя́щь и расту́щь, и припло́доваше на три́десять, и на шестьдеся́т, и на сто.

⁹ И глаго́лаше: име́яй у́ши слы́шати да слы́шит.

¹⁰ Егда́ же бысть еди́н, вопроси́ша Его́, иже бя́ху с ним, со обемана́десяте о при́тчи.

¹¹ И глаго́лаше им: вам [есть] дано́ ве́дати та́йны Ца́рствия Бо́жия, о́нем же вне́шним в при́тчах вся быва́ют.

¹² Да ви́дяще ви́дят, и не у́зрят, и слы́шаще слы́шат, и не разуме́ют, да не когда́ обратя́тся, и оста́вятся им греси́.

¹³ И глаго́ла им: не ве́сте ли при́тчи сея́? И ка́ко вся при́тчи разуме́ете?

¹⁴ Се́яй, сло́во се́ет.

¹⁵ Си́и же суть, и́же на пути́, иде́же се́ется сло́во, и егда́ услы́шат, а́бие прии́дет сатана́ и оты́мет сло́во се́янное в сердца́х их.

¹⁶ И си́и суть та́кожде и́же на ка́менных се́емии, и́же егда́ услы́шат сло́во, а́бие с ра́достию прие́млют е́.

¹⁷ И не и́мут коре́ния в себе́, но привре́менни суть, та́же бы́вши печа́ли или́ гоне́нию словесе́ ра́ди, а́бие соблажня́ются.

¹⁸ А си́и суть, и́же в те́рнии се́емии, слы́шащии сло́во.

¹⁹ И печа́ли ве́ка сего́, и лесть бога́тства, и о про́чих по́хотию входя́ще подавля́ют сло́во, и безпло́дно быва́ет.

²⁰ И си́и суть, и́же на земли́ до́брей се́яннии, и́же слы́шат сло́во и прие́млют, и пло́дствуют на три́десять, и на шестьдеся́т, и на сто.

²¹ И глаго́лаше им: еда́ свети́льник прихо́дит, ^[48] да под спу́дом положа́т его́ или́ под одро́м? Не да ли на све́щнице положе́н бу́дет?

²² Несть бо та́йно, е́же не яви́тся, ниже́ бысть потае́но, но да прии́дет в явле́ние.

²³ А́ще кто и́мать у́ши слы́шати, да слы́шит.

²⁴ И глаго́лаше им: блюди́те что слы́шите, в ню́же ме́ру ме́рите, возме́рится вам, и приложи́тся вам слы́шащим.

²⁵ И́же бо а́ще и́мать, да́стся ему́, а и́же не и́мать, и е́же и́мать, оты́мется от него́.

²⁶ И глаго́лаше: та́ко есть [и] Ца́рствие Бо́жие, я́коже челове́к вмета́ет се́мя в зе́млю,

²⁷ И спит, и востае́т но́щию и дни́ю, и се́мя прозяба́ет и расте́т, я́коже не весть он.

²⁸ В себе́ бо земля́ плоди́т пре́жде траву́, пото́м клас, та́же исполня́ет пшени́цу в кла́се.

²⁹ Егда́ же созре́ет плод, а́бие по́слет серп, я́ко наста́ жа́тва.

³⁰ И глаго́лаше: чесому́ уподо́бим Ца́рствие Бо́жие? Или́ ко́ей при́тчи приложи́м е́?

³¹ Я́ко зе́рно гору́шично, е́же егда́ все́яно бу́дет в земли́, мне́е всех се́мен есть земны́х.

³² И егда́ все́яно бу́дет, возрасте́т, и бу́дет бо́ле всех зе́лий, и сотвори́т ве́тви ве́лия, я́ко мощи́ под се́нию его́ пти́цам небе́сным вита́ти.

³³ И таковы́ми при́тчами мно́гими глаго́лаше им сло́во, я́коже можа́ху слы́шати.

³⁴ Без при́тчи же не глаго́лаше им словесе́, осо́бь же ученико́м Свои́м сказа́ше вся.

³⁵ И глаго́ла им в той день, ве́черу бы́вшу: пре́йдем на он пол.

³⁶ И отпу́щше наро́ды, поя́ша Его́ я́коже бе в корабли́, и ини́и же корабли́ бя́ху с Ним.

³⁷ И бысть бу́ря ве́трена вели́ка, во́лны же влива́хуся в кора́бль, я́ко уже́ погружа́тися ему́.

³⁸ И бе Сам на корме́ на возгла́внице спя. И возбуди́ша Его́ и глаго́лаша Ему́: Учи́телю, не ради́ши ли, я́ко погиба́ем?

³⁹ И воста́в запрети́ ве́тру, и рече́ мо́рю: молчи́, преста́ни. И уле́же ветр, и бысть тишина́ ве́лия.

⁴⁰ И рече́ им: что та́ко страшли́ви есте́? Ка́ко не и́мате ве́ры?

⁴¹ И убоя́шася стра́хом ве́лиим и глаго́лаху друг ко дру́гу: кто у́бо Сей есть, я́ко и ветр и мо́ре послу́шают Его́?

Глава 5

¹ И приидо́ша на он пол мо́ря, во страну́ Гадари́нскую.

² И изле́зшу Ему́ из корабля́, а́бие сре́те Его́ от гро́б челове́к в ду́се нечи́сте,

³ И́же жили́ще имя́ше во гробе́х, и ни вери́гами никто́же можа́ше его́ связа́ти,

⁴ Зане́ ему́ мно́гажды пу́ты и у́жи [желе́зны] свя́зану су́щу, и растерза́тися от него́ у́жем [желе́зным] и пу́том сокруша́тися, и никто́же можа́ше его́ уму́чити. ^[49]

⁵ И вы́ну нощь и день во гробе́х и в гора́х бе, вопия́ и толки́йся ка́мением.

⁶ Узре́в же Иису́са издале́ча, тече́ и поклони́ся Ему́.

⁷ И возопи́в гла́сом ве́лиим, рече́: что мне и Тебе́, Иису́се Сы́не Бо́га Вы́шняго? Заклина́ю Тя Бо́гом, не му́чи мене́.

⁸ Глаго́лаше бо ему́: изы́ди, ду́ше нечи́стый, от челове́ка.

⁹ И вопроша́ше его́: что ти есть и́мя? И отвеща́ глаго́ля: легео́н и́мя мне, я́ко мно́зи есмы́.

¹⁰ И моли́ша Его́ мно́го, да не по́слет их вне страны́.

¹¹ Бе же ту при горе́ ста́до свино́е ве́лие пасо́мо.

¹² И моли́ша Его́ вси бе́си, глаго́люще: посли́ ны во свиния́, да в ня вни́дем.

¹³ И повеле́ им а́бие Иису́с. И изше́дше ду́си нечи́стии, внидо́ша во свиния́, и устреми́ся ста́до по бре́гу в мо́ре, бя́ху же я́ко две ты́сящи, и утопа́ху в мо́ри.

¹⁴ Пасу́щии же свиния́ бежа́ша и возвести́ша во гра́де и в се́лех. И изыдо́ша ви́дети, что есть бы́вшее.

¹⁵ И приидо́ша ко Иису́сови, и ви́деша беснова́вшагося седя́ща и оболче́на и смы́сляща, име́вшаго легео́н, и убоя́шася.

¹⁶ Пове́даша же им ви́девшии, ка́ко бысть бесно́му, и о свиния́х.

¹⁷ И нача́ша моли́ти Его́ отыти́ от преде́л их.

¹⁸ И вле́зшу Ему́ в кора́бль, моля́ше Его́ беснова́выйся, да бы был с Ним.

¹⁹ Иису́с же не даст ему́, но рече́ ему́: иди́ в дом твой ко твои́м и возвести́ им, ели́ка ти Госпо́дь сотвори́ и поми́лова тя.

²⁰ И и́де и нача́ пропове́дати в десяти́ граде́х, ели́ка сотвори́ ему́ Иису́с. И вси дивля́хуся.

²¹ И преше́дшу Иису́су в корабли́ па́ки на он пол, собра́ся наро́д мног о Нем. ^[50] И бе при мо́ри.

²² И се прии́де еди́н от архисинаго́г, и́менем Иаи́р, и ви́дев Его́, паде́ при ногу́ Его́.

²³ И моля́ше Его́ мно́го, глаго́ля, я́ко дщи моя́ на кончи́не есть, да прише́д возложи́ши на ню ру́це, я́ко да спасе́тся и жива́ бу́дет.

²⁴ И и́де с ним, и по Нем идя́ху наро́ди мно́зи и угнета́ху Его́.

²⁵ И жена́ не́кая су́щи в точе́нии кро́ве лет двана́десяте,

²⁶ И мно́го пострада́вши от мног враче́в, и изда́вши своя́ вся, и ни еди́ныя по́льзы обре́тши, но па́че в го́ршее прише́дши,

²⁷ Слы́шавши о Иису́се прише́дши в наро́де созади́, прикосну́ся ри́зе Его́.

²⁸ Глаго́лаше бо, я́ко, а́ще прикосну́ся ри́зам Его́, спасе́на бу́ду.

²⁹ И а́бие изся́кну исто́чник кро́ве ея́, и разуме́ ^[51] те́лом, я́ко изцеле́ от ра́ны.

³⁰ И а́бие Иису́с разуме́ в Себе́ си́лу изше́дшую от Него́, и обра́щься в наро́де, глаго́лаше: кто прикосну́ся ри́зам Мои́м?

³¹ И глаго́лаху Ему́ ученицы́ Его́: ви́диши наро́д угнета́ющ Тя, и глаго́леши, кто ся прикосну́ Мне?

³² И обгля́даше ви́дети сотво́ршую сие́.

³³ Жена́ же убоя́вшися и трепе́щущи, ве́дящи, е́же бысть ей, прии́де и припаде́ к Нему́ и рече́ Ему́ всю и́стину.

³⁴ Он же рече́ ей: дщи, ве́ра твоя́ спасе́ тя. Иди́ в ми́ре и бу́ди цела́ от ра́ны твоея́.

³⁵ Еще́ Ему́ глаголющу, и приидо́ша от архисинаго́га, глаго́люще, я́ко дщи твоя́ у́мре, что еще́ дви́жеши Учи́теля?

³⁶ Иису́с же а́бие слы́шав сло́во глаго́лемое, глаго́ла архисинаго́гови: не бо́йся, то́кмо ве́руй.

³⁷ И не оста́ви по Себе́ ни еди́наго ити́, то́кмо Петра́ и Иа́кова и Иоа́нна бра́та Иа́ковля.

³⁸ И прии́де в дом архисинаго́гов и ви́де молву́, пла́чущияся и крича́щия мно́го.

³⁹ И вшед глаго́ла им: что мо́лвите и пла́четеся? Отрокови́ца несть умерла́, но спит.

⁴⁰ И руга́хуся Ему́. Он же изгна́в вся, поя́т отца́ отрокови́цы и ма́терь, и и́же бе́ху с Ним, и вни́де, иде́же бе отрокови́ца лежа́щи.

⁴¹ И ем за ру́ку отрокови́цу, глаго́ла ей: талифа́ ку́ми, е́же есть сказа́емо, деви́це, тебе́ глаго́лю, воста́ни.

⁴² И а́бие воста́ деви́ца и хожда́ше, бе бо лет двоюна́десяте. И ужасо́шася у́жасом ве́лиим.

⁴³ И запрети́ им мно́го, да никто́же уве́сть сего́, и рече́: дади́те ей я́сти.

Глава 6

¹ И изы́де отту́ду, и прии́де во оте́чествие Свое́, и по Нем идо́ша ученицы́ Его́.

² И бы́вши суббо́те, нача́т на со́нмищи учи́ти. И мно́зи слы́шащии дивля́хуся, глаго́люще: отку́ду Сему́ сия́? И что прему́дрость да́ная Ему́, и си́лы таковы́ рука́ма Его́ быва́ют?

³ Не Сей ли есть текто́н, сын Мари́ин, брат же Иа́кову и Иоси́и и Иу́де и Си́мону? И не сестры́ ли Его́ зде суть в нас? И блажня́хуся о Нем.

⁴ Глаго́лаше же им Иису́с, я́ко несть проро́к без че́сти, то́кмо во оте́чествии свое́м, и в сро́дстве и в дому́ свое́м.

⁵ И не можа́ше ту ни еди́ныя си́лы сотвори́ти, то́кмо ма́ло неду́жных, возло́жь ру́це, исцели́.

⁶ И дивля́шеся за неве́рствие их, и обхожда́ше ве́си о́крест учя́.

⁷ И призва́ обана́десяте, и нача́т их посыла́ти два два, и дая́ше им власть над ду́хи нечи́стыми.

⁸ И запове́да им, да ничесо́же во́змут на путь, то́кмо жезл еди́н, ни пи́ры, ни хле́ба, ни при по́ясе ме́ди,

⁹ Но обуве́ни в санда́лия, и не облачи́тися в две ри́зе.

¹⁰ И глаго́лаше им: иде́же а́ще вни́дете в дом, ту пребыва́йте, до́ндеже изы́дете отту́ду.

¹¹ И ели́цы а́ще не прии́мут вы, ниже́ послу́шают вас, исходя́ще отту́ду, оттряси́те прах, и́же под нога́ми ва́шими, во свиде́тельство им. Ами́нь глаго́лю вам, отра́днее бу́дет Содо́мом и Гомо́рром в день су́дный, не́же гра́ду тому́.

¹² И изше́дше пропове́даху, да пока́ются.

¹³ И бе́сы мно́ги изгоня́ху, и ма́заху ма́слом мно́ги неду́жныя, и изцелева́ху.

¹⁴ И услы́ша царь И́род, [я́ве бо бысть и́мя Его́,] и глаго́лаше: я́ко Иоа́нн Крестя́й от ме́ртвых воста́, и сего́ ра́ди си́лы де́ются о нем.

¹⁵ Ини́и глаго́лаху, я́ко Илиа́ есть, ини́и же глаго́лаху, я́ко проро́к есть, или́ я́ко еди́н от проро́к.

¹⁶ Слы́шав же И́род рече́, я́ко, его́же аз усе́кнух Иоа́нна, той есть, той воста́ от ме́ртвых.

¹⁷ Той бо И́род посла́в, ят Иоа́нна и связа́ его́ в темни́це, Иродиа́ды ра́ди, жены́ Фили́ппа, бра́та своего́, я́ко ожени́ся ею́.

¹⁸ Глаго́лаше бо Иоа́нн И́родови: не досто́ит тебе́ име́ти жену́ [Фили́ппа,] бра́та твоего́.

¹⁹ Ироди́я же гне́вашеся на него́ и хотя́ше его́ уби́ти, и не можа́ше.

²⁰ И́род бо боя́шеся Иоа́нна, ве́дый его́ му́жа пра́ведна и свя́та, и соблюда́ше его́, и послу́шав его́, мно́га творя́ше, и в сла́дость его́ послу́шаше.

²¹ И приклю́чшуся дни потре́бну, ^[52] егда́ И́род рождеству́ своему́ ве́черю творя́ше, князе́м свои́м, ты́сящником, и старе́йшинам галиле́йским.

²² И вше́дши дщерь тоя́ Иродиа́ды, и пляса́вши, и уго́ждши И́родови и возлежа́щим с ним. Рече́ царь деви́це: проси́ у мене́, е́же а́ще хо́щеши, и дам ти.

²³ И кля́тся ей: я́ко а́ще попро́сиши у мене́, дам ти, и до полца́рствия моего́.

²⁴ Она́ же изше́дши рече́ ма́тери свое́й: чесо́ прошу́? Она́ же рече́: главу́ Иоа́нна Крести́теля.

²⁵ И вше́дши а́бие со тща́нием к царю́, проси́, глаго́лющи: хощу́, да ми да́си от него́ ^[53] на блю́де главу́ Иоа́нна Крести́теля.

²⁶ И приско́рбен быв царь, кля́твы же ра́ди, и за возлежа́щих с ним, не восхоте́ отрещи́ся ея́.

²⁷ И а́бие посла́в царь спекула́тора, повеле́ принести́ главу́ его́. Он же шед усе́кну его́ в темни́це.

²⁸ И принесе́ главу́ его́ на блю́де, и даде́ ю́ деви́це, и деви́ца даде́ ю́ ма́тери свое́й.

²⁹ И слы́шавше ученицы́ его́, приидо́ша и взя́ша труп его́, и положи́ша его́ во гро́бе.

³⁰ И собра́шася апо́столи ко Иису́су, и возвести́ша Ему́ вся, и ели́ка сотвори́ша, и научи́ша.

³¹ И рече́ им: прииди́те вы са́ми в пу́сто ме́сто еди́ни ^[54] и почи́йте ма́ло. Бя́ху бо приходя́щии и отходя́щии мно́зи, и ни я́сти им бе когда́.

³² И идо́ша в пу́сто ме́сто корабле́м еди́ни.

³³ И ви́деша их иду́щя, и позна́ша их мно́зи, и пе́ши от всех градо́в стица́хуся та́мо, и предвари́ша их, и снидо́шася к Нему́.

³⁴ И изше́д ви́де Иису́с наро́д мног и милосе́рдова о них, зане́ бя́ху я́ко о́вцы не иму́щия па́стыря, и нача́т их учи́ти мно́го.

³⁵ И уже́ часу́ мно́гу бы́вшу, присту́пльше к Нему́ ученицы́ Его́, глаго́лаша, я́ко пу́сто есть ме́сто, и уже́ час мног.

³⁶ Отпусти́ их, да ше́дше во окре́стных се́лех и ве́сех ку́пят себе́ хле́бы, не и́мут бо чесо́ я́сти.

³⁷ Он же отвеща́в рече́ им: дади́те им вы я́сти. И глаго́лаша Ему́: да ше́дше ку́пим двема́ сто́ма пе́нязь хле́бы и да́мы им я́сти?

³⁸ Он же рече́ им: коли́ко хле́бы и́мате? Иди́те и ви́дите. И уве́девше глаго́лаша: пять [хлеб], и две ры́бе.

³⁹ И повеле́ им посади́ти вся на спо́ды на спо́ды ^[55] на траве́ зелене́.

⁴⁰ И возлего́ша на ле́хи на ле́хи ^[56] по сту и по пяти́десят.

⁴¹ И прие́м пять хлеб и две ры́бе, воззре́в на не́бо, благослови́ и преломи́ хле́бы, и дая́ше ученико́м Свои́м, да предлага́ют пред ни́ми, и о́бе ры́бе раздели́ всем.

⁴² И ядо́ша вси и насы́тишася.

⁴³ И взя́ша укру́хи, двана́десяте ко́шя испо́лнь, и от ры́бу.

⁴⁴ Бя́ше же я́дших хле́бы я́ко пять ты́сящ муже́й.

⁴⁵ И а́бие пону́ди ученики́ Своя́ вни́ти в кора́бль и вари́ти ^[57] Его́ на о́ном полу́ к Вифсаи́де, до́ндеже Сам отпу́стит наро́ды.

⁴⁶ И отре́кся им, ^[58] и́де в го́ру помоли́тися.

⁴⁷ И ве́черу бы́вшу, бе кора́бль посреде́ мо́ря, и Сам еди́н на земли́.

⁴⁸ И ви́де их стра́ждущих в пла́вании, [бе бо ветр проти́вен им,] и о четве́ртей стра́жи нощне́й прии́де к ним, по мо́рю ходя́й, и хотя́ше мину́ти их.

⁴⁹ Они́ же ви́девше Его́ ходя́ща по мо́рю, мня́ху призра́к бы́ти и возопи́ша.

⁵⁰ Вси бо Его́ ви́деша и смути́шася. И а́бие глаго́ла с ни́ми и рече́ им: дерза́йте, Аз есмь, не бо́йтеся.

⁵¹ И вни́де к ним в кора́бль, и уле́же ветр. И зело́ и́злиха в себе́ ужаса́хуся и дивля́хуся.

⁵² Не разуме́ша бо о хле́бех, бе бо се́рдце их окамене́но.

⁵³ И преше́дше приидо́ша в зе́млю Генисаре́тску и приста́ша.

⁵⁴ И изше́дшим им из корабля́, а́бие позна́ша Его́.

⁵⁵ Обте́кше всю страну́ ту, нача́ша на одре́х приноси́ти боля́щия, иде́же слы́шаху, я́ко ту есть.

⁵⁶ И а́може а́ще вхожда́ше в ве́си, или́ во гра́ды, или́ се́ла, на распу́тиях полага́ху неду́жныя и моля́ху Его́, да поне́ воскри́лию ри́зы Его́ прико́снутся, и ели́цы а́ще прикаса́хуся Ему́, спаса́хуся.

Глава 7

¹ И собра́шася к Нему́ фарисе́е и не́цыи от кни́жник, прише́дшии от Иерусали́ма,

² И ви́девше не́кия от учени́к Его́ нечи́стыми рука́ми, си́речь неумове́нными, яду́щих хле́бы, руга́хуся.

³ Фарисе́е бо и вси иуде́е, а́ще не тры́юще ^[59] умы́ют рук, не ядя́т, держа́ще преда́ния ста́рец.

⁴ И от то́ржища, а́ще не поку́плются, не ядя́т. И и́на мно́га суть, я́же прия́ша держа́ти, погруже́ния сткля́ницам и чва́ном и котло́м и одро́м.

⁵ Пото́м же вопроша́ху Его́ фарисе́е и кни́жницы: почто́ ученицы́ Твои́ не хо́дят по преда́нию ста́рец, но неумове́нными рука́ми ядя́т хлеб?

⁶ Он же отвеща́в рече́ им, я́ко до́бре проро́чествова Иса́иа о вас лицеме́рех, я́коже есть пи́сано: си́и лю́дие устна́ми Мя чтут, се́рдце же их дале́че отстои́т от Мене́.

⁷ Всу́е же чтут Мя, уча́ще уче́нием, за́поведем челове́ческим.

⁸ Оста́вльше бо за́поведь Бо́жию, держите́ преда́ния челове́ческая, креще́ния ^[60] чва́ном и сткля́ницам, и и́на подо́бна такова́ мно́га творите́.

⁹ И глаго́лаше им: до́бре отмета́ете за́поведь Бо́жию, да преда́ние ва́ше соблюдете́.

¹⁰ Моисе́й бо рече́: чти отца́ твоего́ и ма́терь твою́, и и́же злосло́вит отца́ или́ ма́терь, сме́ртию да у́мрет.

¹¹ Вы́ же глаго́лете: а́ще рече́т челове́к отцу́ или́ ма́тери, корва́н, [е́же есть дар,] и́же а́ще ^[61] по́льзовался еси́ от мене́.

¹² И не ктому́ оставля́ете его́ ничесо́же сотвори́ти отцу́ своему́ или́ ма́тери свое́й,

¹³ Преступа́юще сло́во Бо́жие преда́нием ва́шим, е́же преда́сте, и подо́бна такова́ мно́га твори́те.

¹⁴ И призва́в весь наро́д, глаго́лаше им: послу́шайте Мене́ вси и разуме́йте.

¹⁵ Ничесо́же есть внеу́ду челове́ка входи́мо вонь, е́же мо́жет оскверни́ти его́, но исходя́щая от него́, та суть скверня́щая челове́ка.

¹⁶ А́ще кто и́мать у́ши слы́шати, да слы́шит.

¹⁷ И егда́ вни́де в дом от наро́да, вопроша́ху Его́ ученицы́ Его́ о при́тчи.

¹⁸ И глаго́ла им: та́ко ли и вы неразу́мливи есте́? Не разуме́ете ли, я́ко все [е́же] извну́ входи́мое в челове́ка, не мо́жет оскверни́ти его́?

¹⁹ Я́ко не вхо́дит ему́ в се́рдце, но во чре́во, и афедро́ном исхо́дит, истребля́я вся бра́шна.

²⁰ Глаго́лаше же, я́ко исходя́щее от челове́ка, то скверни́т челове́ка.

²¹ Из'утрьу́ду бо от се́рдца челове́ческа помышле́ния зла́я исхо́дят, прелюбодея́ния, любодея́ния, уби́йства,

²² Татьбы́, лихои́мства, [оби́ды,] лука́вствия, лесть, студодея́ния, о́ко лука́во, хула́, горды́ня, безу́мство.

²³ Вся сия́ злая изу́трь исхо́дят и скверня́т челове́ка.

²⁴ И отту́ду воста́в, и́де в преде́лы Ти́рски и Сидо́нски; и вшед в дом, ни кого́же хотя́ше, дабы́ его́ чу́л, и не мо́же утаи́тися.

²⁵ Слы́шавши бо жена́ о Нем, ея́же дщи имя́ше ду́х нечи́ст, прише́дши припаде́ к нога́ма Его́,

²⁶ [Жена́ же бе е́ллинска, сирофиники́сса ро́дом,] и моля́ше Его́, да бе́са изжене́т из дще́ре ея́.

²⁷ Иису́с же рече́ ей: оста́ви, да пе́рвее насы́тятся ча́да, несть бо добро́ отя́ти хле́ба ча́дом и поврещи́ псом.

²⁸ Она́ же отвеща́вши глаго́ла Ему́: ей, Го́споди, и́бо [и] пси под трапе́зою ядя́т от крупи́ц дете́й.

²⁹ И рече́ ей: за сие́ сло́во, иди́, изы́де бес из дще́ре твоея́.

³⁰ И ше́дши в дом свой, обре́те бе́са изше́дша и дщерь лежа́щу на одре́.

³¹ И па́ки изше́д Иису́с от преде́л Ти́рских и Сидо́нских, прии́де на мо́ре Галиле́йско, между́ преде́лы Декапо́льски.

³² И приведо́ша к Нему́ глу́ха и гугни́ва, и моля́ху Его́, да возложи́т нань ру́ку.

³³ И пое́м его́ от наро́да еди́наго, ^[62] вложи́ пе́рсты Своя́ во у́ши его́, и плю́нув косну́ его́ в язы́к.

³⁴ И воззре́в на не́бо, воздохну́ и глаго́ла ему́: еффафа́, е́же есть разве́рзися.

³⁵ И а́бие разверзо́стася слу́ха его́, и разреши́ся у́за язы́ка его́, и глаго́лаше пра́во.

³⁶ И запрети́ им, да никому́же пове́дят, ели́ко же им Той запреща́ше, па́че и́злиха пропове́даху.

³⁷ И преи́злиха дивля́хуся, глаго́люще: до́бре все твори́т, и глухи́я твори́т слы́шати, и немы́я глаго́лати.

Глава 8

¹ В ты́я дни зело́ мно́гу наро́ду су́щу, и не иму́щем чесо́ я́сти, призва́в Иису́с ученики́ Своя́, глаго́ла им:

² Милосе́рдую о наро́де, я́ко уже́ три дни приседя́т Мне и не и́мут чесо́ я́сти,

³ и а́ще отпущу́ их не я́дша в до́мы своя́, ослабе́ют на пути́, мно́зи бо от них издале́ча пришли́ [суть].

⁴ И отвеща́ша Ему́ ученицы́ Его́: отку́ду сих возмо́жет кто зде насы́тити хле́бы в пусты́ни?

⁵ И вопроси́ их: коли́ко и́мате хле́бы? Они́ же ре́ша: седмь.

⁶ И повеле́ наро́ду возлещи́ на земли́, и прие́м седмь хле́бы, хвалу́ возда́в, преломи́ и дая́ше ученико́м Свои́м, да предлага́ют, и предложи́ша пред наро́дом.

⁷ И имя́ху ры́биц ма́ло, и [сия́] благослови́в, рече́ предложи́ти и ты́я.

⁸ Ядо́ша же и насы́тишася, и взя́ша избы́тки укру́х, седмь ко́шниц.

⁹ [Бя́ху же я́дших я́ко четы́ре ты́сящи.] И отпусти́ их.

¹⁰ И а́бие влез в кора́бль со ученики́ Свои́ми, прии́де во страны́ Далмануфа́нски.

¹¹ И изы́доша фарисе́е и нача́ша стяза́тися с Ним, и́щуще от Него́ зна́мения с небесе́, искуша́юще Его́.

¹² И воздохну́в ду́хом Свои́м, глаго́ла: что род сей зна́мения и́щет? Ами́нь глаго́лю вам, а́ще да́стся ро́ду сему́ зна́мение.

¹³ И оста́вль их, влез па́ки в кора́бль, [и] и́де на он пол.

¹⁴ И забы́ша ученицы́ Его́ взя́ти хле́бы и ра́зве еди́наго хле́ба не имя́ху с собо́ю в корабли́.

¹⁵ И преща́ше им, глаго́ля: зри́те, блюди́теся от ква́са фарисе́йска и от ква́са и́родова.

¹⁶ И помышля́ху, друг ко дру́гу глаго́люще, я́ко хле́бы не и́мамы.

¹⁷ И разуме́в Иису́с, глаго́ла им: что помышля́ете, я́ко хле́бы не и́мате? Не у́ ли чу́вствуете, ниже́ разуме́ете? Еще́ ли окамене́но се́рдце ва́ше и́мате?

¹⁸ О́чи иму́ще не ви́дите? И у́ши иму́ще не слы́шите? И не по́мните ли,

¹⁹ Егда́ пять хле́бы преломи́х в пять ты́сящ, коли́ко кош испо́лнь укру́х прия́сте? Глаго́лаша Ему́: двана́десять.

²⁰ Егда́ же седмь в четы́ре ты́сящи, коли́ко ко́шниц исполне́ния укру́х взя́сте? Они́ же ре́ша: седмь.

²¹ И глаго́ла им: ка́ко не разуме́ете?

²² И прии́де Иису́с в Вифсаи́ду, и приведо́ша к Нему́ сле́па, и моля́ху Его́, да его́ ко́снется.

²³ И ем за ру́ку слепа́го, изведе́ его́ вон из ве́си, и плю́нув на о́чи его́, и возло́жь ру́це нань, вопроша́ше его́, а́ще что ви́дит?

²⁴ И воззре́в глаго́лаше: ви́жу челове́ки я́ко дре́вие ходя́щя.

²⁵ Пото́м же па́ки возложи́ ру́це на о́чи его́ и сотвори́ его́ прозре́ти, и утвори́ся, ^[63] и узре́ све́тло все.

²⁶ И посла́ его́ в дом его́, глаго́ля: ни в весь вни́ди, ни пове́ждь кому́ в ве́си.

²⁷ И изы́де Иису́с и ученицы́ Его́ в ве́си Кесари́и Фили́пповы, и на пути́ вопроша́ше ученики́ Своя́, глаго́ля им: кого́ Мя глаго́лют челове́цы бы́ти?

²⁸ Они́ же отвеща́ша: Иоа́нна Крести́теля, и ини́и Илию́, друзи́и же еди́наго от проро́к.

²⁹ И Той глаго́ла им: вы же кого́ Мя глаго́лете бы́ти? Отвеща́в же Петр глаго́ла Ему́: Ты еси́ Христо́с.

³⁰ И запрети́ им, да ни кому́же глаго́лют о Нем.

³¹ И нача́т учи́ти их, я́ко подоба́ет Сы́ну Челове́ческому мно́го пострада́ти, и искуше́ну бы́ти от ста́рец и архиере́й и кни́жник, и убие́ну бы́ти, и в тре́тий день воскре́снути.

³² И не обину́яся сло́во глаго́лаше. И прие́мь Его́ Петр, нача́т прети́ти Ему́.

³³ Он же обра́щься и воззре́в на ученики́ Своя́, запрети́ Петро́ви, глаго́ля: иди́ за Мно́ю, ^[64] сатано́, я́ко не мы́слиши, я́же суть Бо́жия, но я́же челове́ческа.

³⁴ И призва́в наро́ды со ученики́ Свои́ми, рече́ им: и́же хо́щет по Мне ити́, да отве́ржется себе́, и во́змет крест свой, и по Мне гряде́т.

³⁵ И́же бо а́ще хо́щет ду́шу свою́ спасти́, погуби́т ю́, а и́же погуби́т ду́шу свою́ Мене́ ра́ди и Ева́нгелиа, той спасе́т ю́.

³⁶ Ка́я бо по́льза челове́ку, а́ще приобря́щет міръ весь, и отщети́т ду́шу свою́?

³⁷ Или́ что́ даст челове́к изме́ну на души́ свое́й?

³⁸ И́же бо а́ще постыди́тся Мене́ и Мои́х слове́с в ро́де сем прелюбоде́йнем и гре́шнем, и Сын Челове́ческий постыди́тся его́, егда́ прии́дет во сла́ве Отца́ Своего́ со А́нгелы святы́ми.

Глава 9

¹ И глаго́лаше им: ами́нь глаго́лю вам, я́ко суть не́цыи от зде стоя́щих, и́же не и́мут вкуси́ти сме́рти, до́ндеже ви́дят Ца́рствие Бо́жие прише́дшее в си́ле.

² И по шести днех поя́т Иису́с Петра́ и Иа́кова и Иоа́нна, и возведе́ их на гору́ высоку́ осо́бь еди́ны, и преобрази́ся пред ни́ми.

³ И ри́зы Его́ бы́ша блеща́щяся, белы́ зело́ я́ко снег, яце́хже не мо́жет бели́льник убели́ти на земли́.

⁴ И яви́ся им Илиа́ с Моисе́ем, и бе́ста со Иису́сом глаго́люща.

⁵ И отвеща́в Петр глаго́ла Иису́сови: Равви́, добро́ есть нам зде бы́ти, и сотвори́м кро́вы три, Тебе́ еди́н, и Моисе́еви еди́н, и Илии́ еди́н.

⁶ Не ве́дяше бо, что рещи́, бя́ху бо пристра́шни.

⁷ И бысть о́блак осеня́я их, и прии́де глас из о́блака, глаго́ля: Сей есть Сын Мой возлю́бленный, Того́ послу́шайте.

⁸ И внеза́пу воззре́вше, ктому́ никого́же ви́деша, то́кмо Иису́са еди́наго с собо́ю.

⁹ Сходя́щим же им с горы́, запрети́ им, да никому́же пове́дят, я́же ви́деша, то́кмо егда́ Сын Челове́ческий из ме́ртвых воскре́снет.

¹⁰ И сло́во удержа́ша в себе́, стяза́ющеся, что́ есть, е́же из ме́ртвых воскре́снути.

¹¹ И вопроша́ху Его́ глаго́люще: ка́ко глаго́лют кни́жницы, я́ко Илии́ подоба́ет приити́ пре́жде?

¹² Он же отвеща́в рече́ им: Илиа́ у́бо прише́д пре́жде, устро́ит вся, и ка́ко есть пи́сано о Сы́не Челове́честем, да мно́го постра́ждет и уничиже́н бу́дет.

¹³ Но глаго́лю вам, я́ко и Илиа́ прии́де, [и сотвори́ша ему́, ели́ка хоте́ша,] я́коже есть пи́сано о нем.

¹⁴ И прише́д ко ученико́м, ви́де наро́д мног о них, ^[65] и кни́жники стяза́ющяся с ни́ми.

¹⁵ И а́бие весь наро́д ви́дев Его́ ужасе́ся, и прири́щуще ^[66] целова́ху Его́.

¹⁶ И вопроси́ кни́жники: что стяза́етеся к себе́? ^[67]

¹⁷ И отвеща́в еди́н от наро́да рече́: Учи́телю, приведо́х сы́на моего́ к Тебе́, иму́ща ду́ха не́ма.

¹⁸ И иде́же коли́ждо и́мет его́, разбива́ет его́, и пе́ны тещи́т, и скреже́щет зубы́ свои́ми, и оцепенева́ет, и рех ученико́м Твои́м, да изжену́т его́, и не возмого́ша.

¹⁹ Он же отвеща́в ему́ глаго́ла: о, ро́де неве́рен, доко́ле в вас бу́ду? Доко́ле терплю́ вы? Приведи́те его́ ко Мне.

²⁰ И приведо́ша его́ к Нему́. И ви́дев Его́, а́бие дух стрясе́ его́, и пад на земли́, валя́шеся, пе́ны тещя́.

²¹ И вопроси́ отца́ его́: коли́ко лет есть, отне́леже сие́ бысть ему́? Он же рече́: изде́тска.

²² И мно́гажды во огнь вве́рже его́ и в во́ды, да погуби́т его́, но а́ще что мо́жеши, помози́ нам, милосе́рдовав о нас.

²³ Иису́с же рече́ ему́: е́же а́ще что мо́жеши ве́ровати, вся возмо́жна ве́рующему.

²⁴ И а́бие возопи́в оте́ц отроча́те, со слеза́ми глаго́лаше: ве́рую, Го́споди, помози́ моему́ неве́рию.

²⁵ Ви́дев же Иису́с, я́ко сри́щется наро́д, запрети́ ду́ху нечи́стому, глаго́ля ему́: ду́ше немы́й и глухи́й, Аз ти повелева́ю, изы́ди из него́ и ктому́ не вни́ди в него́.

²⁶ И возопи́в и мно́го пружа́вся, изы́де, и бысть я́ко мертв, я́коже мно́зем глаго́лати, я́ко у́мре.

²⁷ Иису́с же е́мь его́ за ру́ку, воздви́же его́, и воста́.

²⁸ И вше́дшу Ему́ в дом, ученицы́ Его́ вопроша́ху Его́ еди́наго, я́ко мы не возмого́хом изгна́ти его́?

²⁹ И рече́ им: сей род ничи́мже мо́жет изы́ти, то́кмо моли́твою и посто́м.

³⁰ И отту́ду изше́дше, идя́ху сквозе́ Галиле́ю, и не хотя́ше, да кто уве́сть.

³¹ Уча́ше бо ученики́ Своя́ и глаго́лаше им, я́ко Сын Челове́ческий пре́дан бу́дет в ру́це челове́честе, и убию́т Его́, и убие́н быв, в тре́тий день воскре́снет.

³² Они́ же не разумева́ху глаголго́ла и боя́хуся Его́ вопроси́ти.

³³ И прии́де в Капернау́м, и в дому́ быв, вопроша́ше их: что на пути́ в себе́ помышля́сте?

³⁴ Они́ же молча́ху, друг ко дру́гу бо стяза́шася на пути́, кто есть бо́лий.

³⁵ И сед пригласи́ обана́десяте и глаго́ла им: а́ще кто хо́щет ста́рей бы́ти, да бу́дет всех ме́ньший и всем слуга́.

³⁶ И прии́мь отроча́, поста́ви е́ посреде́ их, и обе́м е́, рече́ им:

³⁷ И́же а́ще еди́но таковы́х отроча́т прии́мет во и́мя Мое́, Мене́ прие́млет, и и́же Мене́ прие́млет, не Мене́ прие́млет, но Посла́вшаго Мя.

³⁸ Отвеща́ Ему́ Иоа́нн, глаго́ля: Учи́телю, ви́дехом не́коего и́менем Твои́м изгоня́ща бе́сы, и́же не хо́дит по нас, и возбрани́хом ему́, я́ко не после́дует нам.

³⁹ Иису́с же рече́: не брани́те ему́, никто́же бо есть, и́же сотвори́т си́лу о и́мени Мое́м, и возмо́жет вско́ре злосло́вити Мя.

⁴⁰ И́же бо несть на вы, по вас есть.

⁴¹ И́же бо а́ще напои́т вы ча́шею воды́ во и́мя Мое́, я́ко Христо́вы есте́, ами́нь глаго́лю вам, не погуби́т мзды своея́.

⁴² И и́же а́ще соблазни́т еди́наго от ма́лых сих ве́рующих в Мя, до́брее есть ему́ па́че, а́ще облежи́т ка́мень же́рновный о вы́и его́, и вве́ржен бу́дет в мо́ре.

⁴³ И а́ще соблажня́ет тя рука́ твоя́, отсецы́ ю́, до́бре ти есть бе́днику ^[68] в живо́т вни́ти, не́же о́бе ру́це иму́щу вни́ти в гее́нну, во огнь неугаса́ющий,

⁴⁴ Иде́же червь их не умира́ет, и огнь не угаса́ет.

⁴⁵ И а́ще нога́ твоя́ соблажня́ет тя, отсецы́ ю́, до́бре ти есть вни́ти в живо́т хро́му, не́же две но́зе иму́щу вве́ржену бы́ти в гее́нну, во огнь неугаса́ющий,

⁴⁶ Иде́же червь их не умира́ет, и огнь не угаса́ет.

⁴⁷ И а́ще о́ко твое́ соблажня́ет тя, исткни́ е́, до́бре ти есть со еди́нем о́ком вни́ти в Ца́рствие Бо́жие, не́же две о́це иму́щу вве́ржену бы́ти в гее́нну о́гненную,

⁴⁸ Иде́же червь их не умира́ет, и огнь не угаса́ет.

⁴⁹ Всяк бо огне́м осоли́тся, и вся́ка же́ртва со́лию осоли́тся.

⁵⁰ Добро́ соль, а́ще же соль не слана́ бу́дет, чим осоли́тся? Име́йте соль в себе́, и мир име́йте между́ собо́ю.

Глава 10

¹ И отту́ду воста́ пре́йде в преде́лы Иуде́йския, ^[69] об он пол Иорда́на. И снидо́шася па́ки наро́ди к Нему́, и я́ко обы́чай име́, па́ки уча́ше их.

² И присту́пльше фарисе́е вопроси́ша Его́: а́ще досто́ит му́жу жену́ пусти́ти? Искуша́юще Его́.

³ Он же отвеща́в рече́ им: что вам запове́да Моисе́й?

⁴ Они́ же ре́ша: Моисе́й повеле́ кни́гу распу́стную написа́ти, и пусти́ти.

⁵ И отвеща́в Иису́с рече́ им: по жестосе́рдию ва́шему написа́ вам за́поведь сию́.

⁶ От зача́ла же созда́ния, му́жа и жену́ сотвори́л я́ есть Бог.

⁷ Сего́ ра́ди оста́вит челове́к отца́ своего́ и ма́терь,

⁸ И прилепи́тся к жене́ свое́й, и бу́дета о́ба в плоть еди́ну. Те́мже уже́ не́ста два, но плоть еди́на.

⁹ Е́же у́бо Бог сочета́, челове́к да не разлуча́ет.

¹⁰ И в дому́ па́ки ученицы́ Его́ о сем вопроси́ша Его́.

¹¹ И глаго́ла им: и́же а́ще пу́стит жену́ свою́ и оже́нится ино́ю, прелюбы́ твори́т на ню.

¹² И а́ще жена́ пу́стит му́жа ^[70] и пося́гнет за ино́го, прелюбы́ твори́т.

¹³ И приноша́ху к Нему́ де́ти, да ко́снется их, ученицы́ же преща́ху принося́щим.

¹⁴ Ви́дев же Иису́с негодова́ и рече́ им: оста́вите дете́й приходи́ти ко Мне и не брани́те им, таце́х бо есть Ца́рствие Бо́жие.

¹⁵ Ами́нь глаго́лю вам, и́же а́ще не прии́мет Ца́рствия Бо́жия я́ко отроча́, не и́мать вни́ти в не.

¹⁶ И обе́м их, возло́жь ру́це на них, благословля́ше их.

¹⁷ И исходя́щу Ему́ на путь, прите́к не́кий и покло́нься на коле́ну Ему́, вопроша́ше Его́: Учи́телю благи́й, что сотворю́, да живо́т ве́чный насле́дствую?

¹⁸ Иису́с же рече́ ему́: что Мя глаго́леши бла́га? Никто́же благ, то́кмо еди́н Бог.

¹⁹ За́поведи ве́си: не прелюбы́ сотвори́ши, не уби́й, не укра́ди, не лжесвиде́тельствуй, не оби́ди, чти отца́ твоего́ и ма́терь.

²⁰ Он же отвеща́в рече́ Ему́: Учи́телю, сия́ вся сохрани́х от ю́ности моея́.

²¹ Иису́с же воззре́в нань, возлюби́ его́ и рече́ ему́: еди́наго еси́ не доконча́л, иди́, ели́ка и́маши, прода́ждь и даждь ни́щим, и име́ти и́маши сокро́вище на небеси́, и прииди́ и ходи́ в след Мене́, взем крест.

²² Он же дряхл быв о словеси́, ^[71] оты́де скорбя́, бе́ бо име́я стяжа́ния мно́га.

²³ И воззре́в Иису́с глаго́ла ученико́м Свои́м: Ка́ко неудо́бь иму́щии бога́тство в Ца́рствие Бо́жие вни́дут.

²⁴ Ученицы́ же ужаса́хуся о словесе́х Его́. Иису́с же па́ки отвеща́в глаго́ла им: ча́да, ка́ко неудо́бь упова́ющим на бога́тство в Ца́рствие Бо́жие вни́ти!

²⁵ Удо́бее бо есть вельбу́ду сквозе́ иглине́ у́ши проити́, не́же бога́ту в Ца́рствие Бо́жие вни́ти.

²⁶ Они́ же и́злиха дивля́хуся, глаго́люще к себе́: то кто мо́жет спасе́н бы́ти?

²⁷ Воззре́в же на них Иису́с глаго́ла: от челове́к невозмо́жно, но не от Бо́га, вся бо возмо́жна суть у Бо́га.

²⁸ Нача́т же Петр глаго́лати Ему́: се мы оста́вихом вся и вслед Тебе́ идо́хом.

²⁹ Отвеща́в же Иису́с рече́: ами́нь глаго́лю вам, никто́же есть, и́же оста́вил есть дом, или́ бра́тию, или́ сестры́, или́ отца́, или́ ма́терь, или́ жену́, или́ ча́да, или́ се́ла, Мене́ ра́ди и Ева́нгелиа ра́ди,

³⁰ А́ще не прии́мет стори́цею ны́не во вре́мя сие́, домо́в, и бра́тий, и сестр, и отца́, и ма́тере, и чад, и сел, по изгна́нии, и в век гряду́щий живо́т ве́чный.

³¹ Мно́зи же бу́дут пе́рвии после́дни, и после́днии пе́рви.

³² Бя́ху же на пути́, восходя́ще во Иерусали́м, и бе варя́я их Иису́с, и ужаса́хуся, и во след иду́ще боя́хуся. И пое́м па́ки обана́десять, нача́т им глаго́лати, я́же хотя́ху Ему́ бы́ти:

³³ Я́ко се восхо́дим во Иерусали́м, и Сын Челове́ческий пре́дан бу́дет архиере́ом и кни́жником, и осу́дят Его́ на смерть, и предадя́т Его́ язы́ком.

³⁴ И поруга́ются Ему́, и уя́звят Его́, и оплю́ют Его́, и убию́т Его́, и в тре́тий день воскре́снет.

³⁵ И пред Ним приидо́ста Иа́ков и Иоа́нн, сы́на Зеведе́ева, глаго́люща: Учи́телю, хо́щева, да, е́же а́ще про́сива, сотвори́ши на́ма.

³⁶ Он же рече́ и́ма: что хо́щета, да сотворю́ ва́ма?

³⁷ О́на же ре́ста Ему́: даждь нам, да еди́н одесну́ю Тебе́ и еди́н ошу́юю Тебе́ ся́дева во сла́ве Твое́й.

³⁸ Иису́с же рече́ и́ма: не ве́стася, чесо́ про́сита. Мо́жета ли пи́ти ча́шу, ю́же Аз пию́, и креще́нием, и́мже Аз креща́юся, крести́тися?

³⁹ О́на же ре́ста Ему́: мо́жева. Иису́с же рече́ и́ма: ча́шу у́бо, ю́же Аз пию́, испие́та, и креще́нием, и́мже Аз креща́юся, крести́тася,

⁴⁰ А е́же се́сти одесну́ю Мене́ и ошу́юю, несть Мне да́ти, но и́мже угото́вано есть.

⁴¹ И слы́шавше де́сять, нача́ша негодова́ти о Иа́кове и Иоа́нне.

⁴² Иису́с же призва́в их, глаго́ла им: ве́сте, я́ко мня́щиися владе́ти язы́ки, соодолева́ют им, и вели́цыи их облада́ют и́ми.

⁴³ Не та́ко же бу́дет в вас, но и́же а́ще хо́щет в вас вя́щший бы́ти, да бу́дет вам слуга́.

⁴⁴ И и́же а́ще хо́щет в вас бы́ти ста́рей, да бу́дет всем раб.

⁴⁵ И́бо Сын Челове́чь не прии́де, да послу́жат Ему́, но да послу́жит и да́ти ду́шу Свою́ избавле́ние за мно́ги.

⁴⁶ И приидо́ша во Иерихо́н. И исходя́щу Ему́ от Иерихо́на, учеником его и наро́ду мно́гу, сын Тиме́ов Варти́мей слепы́й седя́ше при пути́, прося́.

⁴⁷ И слы́шав, я́ко Иису́с Назоряни́н есть, нача́т зва́ти и глаго́лати: Сы́не Дави́дов Иису́се поми́луй мя.

⁴⁸ И преща́ху ему́ мно́зи, да умолчи́т. Он же мно́жае па́че зва́ше: Сы́не Дави́дов, поми́луй мя.

⁴⁹ И став Иису́с, рече́ его́ возгласи́ти. И возгласи́ша слепца́, глаго́люще ему́: дерза́й, воста́ни, зове́т тя.

⁵⁰ Он же отве́рг ри́зы своя́, воста́в прии́де ко Иису́сови.

⁵¹ И отвеща́в глаго́ла ему́ Иису́с: что хо́щеши, да сотворю́ Тебе́? Слепы́й же глаго́ла Ему́: Учи́телю, да прозрю́.

⁵² Иису́с же рече́ ему́: иди́, ве́ра твоя́ спасе́ тя. И а́бие прозре́ и по Иису́се и́де в путь.

Глава 11

¹ И егда́ прибли́жися во Иерусали́м, в Вифсфаги́ю и Вифа́нию, к горе́ Елео́нстей, посла́ два от учени́к Свои́х.

² И глаго́ла и́ма: иди́та в весь, я́же есть пря́мо ва́ма, и а́бие входя́ща в ню, обря́щета жребя́ привя́зано, на не́же никто́же от челове́к все́де, отре́шша е́, приведи́та.

³ И а́ще кто ва́ма рече́т: что твори́та сие́? Рцы́та, я́ко Госпо́дь тре́бует е́, и а́бие по́слет е́ се́мо.

⁴ Идо́ста же, и обрето́ста жребя́ привя́зано при две́рех вне на распу́тии, и отреши́ста е́.

⁵ И не́цыи от стоя́щих ту глаго́лаху и́ма: что де́ета отреша́юща жребя́?

⁶ О́на же ре́ста им, я́коже запове́да и́ма Иису́с, и оста́виша я́.

⁷ И приведо́ста жребя́ ко Иису́сови, и возложи́ша на не ри́зы своя́, и все́де на не.

⁸ Мно́зи же ри́зы своя́ постла́ша по пути́, друзи́и же ва́иа ре́заху от дре́вия и постила́ху по пути́.

⁹ И предходя́щии и вслед гряду́щии вопия́ху, глаго́люще: оса́нна, благослове́н Гряды́й во и́мя Госпо́дне.

¹⁰ Благослове́но гряду́щее ца́рство во и́мя Го́спода отца́ на́шего Дави́да, оса́нна в вы́шних.

¹¹ И вни́де во Иерусали́м Иису́с и в це́рковь, и согля́дав вся, по́зде уже́ су́щу часу́, изы́де в Вифа́нию со обемана́десяте.

¹² И нау́трия изше́дшим им от Вифа́нии, взалка́.

¹³ И ви́дев смоко́вницу издале́ча, иму́щу ли́ствие, прии́де, а́ще у́бо что обря́щет на ней, и прише́д к ней, ничесо́же обре́те, то́кмо ли́ствие, не у́ бо бе́ вре́мя смо́квам.

¹⁴ И отвеща́в Иису́с рече́ ей: да не ктому́ от тебе́ во ве́ки никто́же плода́ снесть. И слы́шаху ученицы́ Его́.

¹⁵ И приидо́ша па́ки во Иерусали́м. И вшедИису́с в це́рковь, нача́т изгони́ти продаю́щия и купу́ющия в це́ркви, и трапе́зы торжнико́м и седа́лища продаю́щих го́луби испрове́рже.

¹⁶ И не дая́ше, да кто мимонесе́т сосу́д сквозе́ це́рковь.

¹⁷ И уча́ше, глаго́ля им: несть ли пи́сано, я́ко храм Мой храм моли́твы нарече́тся всем язы́ком? Вы же сотвори́сте его́ верте́п разбо́йником.

¹⁸ И слы́шаша кни́жницы и архиере́е, и иска́ху, ка́ко Его́ погубя́т, боя́ху бо ся Его́, я́ко весь наро́д дивля́шеся о уче́нии Его́.

¹⁹ И я́ко по́зде бысть, исхожда́ше вон из гра́да.

²⁰ И у́тро мимоходя́ще, ви́деша смоко́вницу изсо́хшу из коре́ния.

²¹ И воспомяну́в Петр глаго́ла Ему́: Равви́, виждь, смоко́вницу, ю́же прокля́т, у́сше.

²² И отвеща́в Иису́с глаго́ла им:

²³ Име́йте ве́ру Бо́жию. Ами́нь бо глаго́лю вам, я́ко, и́же а́ще рече́т горе́ сей: дви́гнися и ве́рзися в мо́ре, и не размы́слит в се́рдце свое́м, но ве́ру и́мет, я́ко е́же глаго́лет, быва́ет, бу́дет ему́, е́же а́ще рече́т.

²⁴ Сего́ ра́ди глаго́лю вам: вся ели́ка а́ще моля́щеся про́сите, ве́руйте, я́ко прие́млете, и бу́дет вам.

²⁵ И егда́ стоите́ моля́щеся, отпуща́йте, а́ще что и́мате на кого́, да и Оте́ц ваш, И́же есть на небесе́х, отпу́стит вам согреше́ния ва́ша.

²⁶ А́ще ли же вы не отпуща́ете, ни Оте́ц ваш, И́же есть на небесе́х, отпу́стит вам согреше́ний ва́ших.

²⁷ И приидо́ша па́ки во Иерусали́м. И в це́ркви ходя́щу Ему́, приидо́ша к Нему́ архиере́е, и кни́жницы, и ста́рцы.

²⁸ И глаго́лаша Ему́: ко́ею о́бластию сия́ твори́ши? И кто Ти о́бласть сию́ даде́, да сия́ твори́ши?

²⁹ Иису́с же отвеща́в рече́ им: вопрошу́ вы и Аз сло́во еди́но, и отвеща́йте Ми, и реку́ вам, ко́ею о́бластию сия́ творю́.

³⁰ Креще́ние Иоа́нново с небесе́ ли бе, или́ от челове́к? Отвеща́йте Ми.

³¹ И мы́сляху в себе́, глаго́люще: а́ще рече́м, с небесе́, рече́т: почто́ у́бо не ве́ровасте ему́?

³² Но а́ще рече́м, от челове́к: боя́хуся люде́й, вси бо име́яху Иоа́нна, я́ко вои́стинну проро́к бе. И отвеща́вше глаго́лаша Иису́сови: не ве́мы.

³³ И отвеща́в Иису́с глаго́ла им: ни Аз глаго́лю вам, ко́ею о́бластию сия́ творю́.

Глава 12

¹ И нача́т им в при́тчах глаго́лати: виногра́д насади́ челове́к, и огради́ опло́том, и ископа́ точи́ло, и созда́ столп, и предаде́ его́ тяжа́телем, ^[72] и оты́де.

² И посла́ к тяжа́телем во вре́мя раба́, да от тяжа́тель прии́мет от плода́ виногра́да.

³ Они́ же е́мше его́ би́ша и посла́ша тощ.

⁴ И па́ки посла́ к ним друга́го раба́, и того́ ка́мением би́вше, проби́ша главу́ ему́ и посла́ша безче́стна.

⁵ И па́ки ино́го посла́, и того́ уби́ша, и мно́ги и́ны, о́вы у́бо бию́ще, о́вы же убива́юще.

⁶ Еще́ у́бо еди́наго сы́на име́ возлю́бленнаго своего́, посла́ и того́ к ним последи́, глаго́ля, я́ко усрамя́тся сы́на моего́.

⁷ Они́ же тяжа́теле ре́ша к себе́, я́ко сей есть насле́дник, прииди́те, убие́м его́, и на́ше бу́дет насле́дствие.

⁸ И е́мше его́ уби́ша и изверго́ша его́ вон из виногра́да.

⁹ Что у́бо сотвори́т госпо́дь виногра́да? Прии́дет и погуби́т тяжа́тели и даст виногра́д ине́м.

¹⁰ Ни Писа́ния ли сего́ чли есте́: ка́мень, его́же не в ряду́ сотвори́ша зи́ждущии, сей бысть во главу́ у́гла?

¹¹ От Го́спода бысть сей, и есть ди́вно во о́чию на́шею.

¹² И иска́ху Его́ я́ти, и убоя́шася наро́да, разуме́ша бо, я́ко к ним при́тчу рече́, и оста́вльше Его́ отыдо́ша.

¹³ И посла́ша к Нему́ не́кия от фарисе́й и ироди́ан, да Его́ обольстя́т сло́вом.

¹⁴ Они́ же прише́дше глаго́лаша Ему́: Учи́телю, ве́мы, я́ко и́стинен еси́, и не ради́ши ни о ко́мже, не зри́ши бо на лице́ челове́ков, но вои́стинну пути́ Бо́жию учи́ши. Досто́ит ли кинсо́н ке́сареви да́ти, или́ ни? Да́мы ли, или́ не да́мы?

¹⁵ Он же ве́дый их лицеме́рие, рече́ им: что Мя искуша́ете? Принеси́те Ми пе́нязь, да ви́жу.

¹⁶ Они́ же принесо́ша. И глаго́ла им: чий о́браз сий и написа́ние? Они́ же ре́ша Ему́: ке́сарев.

¹⁷ И отвеща́в Иису́с рече́ им: воздади́те ке́сарева ке́сареви и Бо́жия Бо́гови. И чуди́шася о Нем.

¹⁸ И приидо́ша саддуке́е к Нему́, и́же глаго́лют воскресе́нию не бы́ти, и вопроси́ша Его́, глаго́люще:

¹⁹ Учи́телю, Моисе́й написа́ нам, я́ко а́ще кому́ брат у́мрет и оста́вит жену́, а чад не оста́вит, да по́ймет брат его́ жену́ его́ и воскреси́т се́мя бра́ту своему́.

²⁰ Седмь бра́тий бе, и пе́рвый поя́т жену́ и умира́я не оста́ви се́мене.

²¹ И вторы́й поя́т ю́ и у́мре, и ни той оста́ви се́мене, и тре́тий та́кожде.

²² И поя́ша ю́ седмь и не оста́виша се́мене, последи́ же всех у́мре и жена́.

²³ В воскреше́ние, егда́ воскре́снут, кото́рому их бу́дет жена́, седмь бо име́ша ю́ жену́.

²⁴ И отвеща́в Иису́с рече́ им: не сего́ ли ра́ди прельща́етеся, не ве́дуще Писа́ния, ни си́лы Бо́жия?

²⁵ Егда́ бо из ме́ртвых воскре́снут, ни же́нятся, ни посяга́ют, но суть я́ко А́нгели на небесе́х.

²⁶ О ме́ртвых же, я́ко востаю́т, не́сте ли чли в кни́гах Моисе́овых, при купине́ я́ко рече́ ему́ Бог, глаго́ля: Аз Бог Авраа́мов и Бог Исаа́ков и Бог Иа́ковль?

²⁷ Несть Бог ме́ртвых, но Бог живы́х, вы у́бо мно́го прельща́етеся.

²⁸ И присту́пль еди́н от кни́жник, и слы́шав саддуке́и стяза́ющася с Ним, и ви́дев, я́ко до́бре отвеща́ им, вопроси́ Его́: ка́я есть пе́рвая всех за́поведий?

²⁹ Иису́с же отвеща́ ему́: я́ко пе́рвейши всех за́поведий, слы́ши, Изра́илю, Госпо́дь Бог ваш Госпо́дь еди́н есть.

³⁰ И возлю́биши Го́спода Бо́га твоего́ всем се́рдцем твои́м, и все́ю душе́ю твое́ю, и всем умо́м твои́м, и все́ю кре́постию твое́ю, сия́ есть пе́рвая за́поведь. И втора́я подо́бна ей:

³¹ Возлю́биши бли́жняго своего́ я́ко сам себе́. Бо́льши сею́ и́на за́поведь несть.

³² И рече́ Ему́ кни́жник: до́бре, Учи́телю, вои́стинну рече́, я́ко еди́н есть Бог, и несть ин ра́зве Его́.

³³ И е́же люби́ти Его́ всем се́рдцем, и всем ра́зумом, и все́ю душе́ю, и все́ю кре́постию, и е́же люби́ти бли́жняго я́ко себе́, бо́ле есть всех всесожже́ний и жертв.

³⁴ Иису́с же ви́дев, я́ко смы́сленно отвеща́, рече́ ему́: не дале́че еси́ от Ца́рствия Бо́жия. И никто́же сме́яше ктому́ Его́ вопроси́ти.

³⁵ И отвеща́в Иису́с глаго́лаше, [учя́ в це́ркви:] ка́ко глаго́лют кни́жницы, я́ко Христо́с Сын есть Дави́дов?

³⁶ Той бо Дави́д рече́ Ду́хом Святы́м: глаго́ла Госпо́дь Го́сподеви моему́, седи́ одесну́ю Мене́, до́ндеже положу́ враги́ Твоя́ подно́жие нога́ма Твои́ма.

³⁷ Сам у́бо Дави́д глаго́лет Его́ Го́спода, и отку́ду Сын ему́ есть? И мног наро́д послу́шаше Его́ в сла́дость.

³⁸ И глаго́лаше им во уче́нии свое́м: блюди́теся от кни́жник, хотя́щих во одея́ниих ходи́ти, и целова́ния на то́ржищих,

³⁹ И преждеседа́ния на со́нмищах, и первовозлежа́ния на ве́черях,

⁴⁰ Пояда́юще до́мы вдови́ц и непщева́нием дале́че моля́щеся, си́и прии́мут ли́шшее осужде́ние.

⁴¹ И сед Иису́с пря́мо сокро́вищному храни́лищу, зря́ше, ка́ко наро́д ме́щет медь в сокро́вищное храни́лище. И мно́зи бога́тии вмета́ху мно́га.

⁴² И прише́дши еди́на вдови́ца убо́га, вве́рже ле́пте две, е́же есть кодра́нт.

⁴³ И призва́в ученики́ Своя́, рече́ им: ами́нь глаго́лю вам, я́ко вдови́ца сия́ убо́гая мно́жае всех вве́рже вмета́ющих в сокро́вищное храни́лище.

⁴⁴ Вси бо от избы́тка своего́ вверго́ша, сия́ же от лише́ния своего́ вся, ели́ка име́яше, вве́рже, все житие́ свое́.

Глава 13

¹ И исходя́щу Ему́ от це́ркве, глаго́ла Ему́ еди́н от учени́к Его́: Учи́телю, виждь, каково́ ка́мение и какова́ зда́ния.

² И отвеща́в Иису́с рече́ ему́: ви́диши ли сия́ вели́ка зда́ния? Не и́мать оста́ти зде ка́мень на ка́мени, и́же не разори́тся.

³ И седя́щу Ему́ на горе́ Елео́нстей пря́мо це́ркве, вопроша́ху Его́ еди́наго Петр и Иа́ков, и Иоа́нн и Андре́й:

⁴ Рцы нам, когда́ сия́ бу́дут? И ко́е [бу́дет] зна́мение, егда́ и́мут вся сия́ сконча́тися?

⁵ Иису́с же отвеща́в им, нача́т глаго́лати: блюди́теся, да не кто вас прельсти́т.

⁶ Мно́зи бо прии́дут во и́мя Мое́, глаго́люще, я́ко Аз есмь, и мно́ги прельстя́т.

⁷ Егда́ же услы́шите бра́ни и слы́шания бра́нем, не ужаса́йтеся, подоба́ет бо бы́ти, но не у́ кончи́на.

⁸ Воста́нет бо язы́к на язы́к, и ца́рство на ца́рство, и бу́дут тру́си по места́м, и бу́дут гла́ди и мяте́жи. Нача́ло боле́знем сия́.

⁹ Блюди́теся же вы са́ми, предадя́т бо вы в со́нмища, и на собо́рищах бие́ни бу́дете, и пред воево́дами и цари́ веде́ни бу́дете Мене́ ра́ди, во свиде́тельство им.

¹⁰ И во всех язы́цех подоба́ет пре́жде пропове́датися Ева́нгелию.

¹¹ Егда́ же поведу́т вы предаю́ще, не пре́жде пецы́теся, что возглаго́лете, ни поуча́йтеся, но е́же а́ще да́стся вам в той час, се глаго́лите, не вы бо бу́дете глаго́лющии, но Дух Святы́й.

¹² Преда́ст же брат бра́та на смерть, и оте́ц ча́до, и воста́нут ча́да на роди́тели и убию́т их.

¹³ И бу́дете ненави́дими все́ми и́мене Моего́ ра́ди, претерпе́вый же до конца́, сей спасе́н бу́дет.

¹⁴ Егда́ же у́зрите ме́рзость запусте́ния, рече́нную Дании́лом проро́ком, стоя́щу, иде́же не подоба́ет, чтый да разуме́ет, тогда́ су́щии во Иуде́и да бежа́т на го́ры.

¹⁵ И и́же на кро́ве, да не сла́зит в дом, ни да вни́дет взя́ти чесо́ от до́му своего́.

¹⁶ И и́же на селе́ сый, да не возврати́тся вспять взя́ти ри́зу свою́.

¹⁷ Го́ре же непра́здным и доя́щим в ты́я дни.

¹⁸ Моли́теся же, да не бу́дет бе́жество ва́ше в зиме́.

¹⁹ Бу́дут бо дни ти́и скорбь, якова́ не бысть такова́ от нача́ла созда́ния, е́же созда́ Бог, доны́не, и не бу́дет.

²⁰ И а́ще не бы Госпо́дь прекрати́л дний, не бы у́бо спасла́ся вся́ка плоть, но избра́нных ра́ди, и́хже избра́, прекрати́т дни.

²¹ Тогда́ а́ще кто рече́т вам: се зде Христо́с, или́ се о́нде, не ими́те ве́ры.

²² Воста́нут бо лжехри́сти и лжепроро́цы и дадя́т зна́мения и чудеса́, е́же прельсти́ти, а́ще возмо́жно, и избра́нныя.

²³ Вы же блюди́теся, се пре́жде рех вам вся.

²⁴ Но в ты́я дни, по ско́рби той, со́лнце поме́ркнет, и луна́ не даст све́та своего́.

²⁵ И зве́зды бу́дут с небесе́ спа́дающя, и си́лы, я́же на небесе́х, подви́жутся.

²⁶ И тогда́ у́зрят Сы́на Челове́ческаго гряду́ща на о́блацех с си́лою и сла́вою мно́гою.

²⁷ И тогда́ по́слет А́нгелы Своя́ и собере́т избра́нныя Своя́ от четы́рех ветр, от конца́ земли́ до конца́ не́ба.

²⁸ От смоко́вницы же научи́теся при́тчи: егда́ уже́ ве́твие ея́ бу́дет мла́до и израща́ет ли́ствие, ве́дите, я́ко близ есть жа́тва.

²⁹ Та́ко и вы, егда́ сия́ ви́дите быва́юща, ве́дите, я́ко близ есть, при две́рех.

³⁰ Ами́нь глаго́лю вам, я́ко не и́мать прейти́ род сей, до́ндеже вся сия́ бу́дут.

³¹ Не́бо и земля́ пре́йдут, словеса́ же Моя́ не пре́йдут.

³² О дни же том или́ о часе́ никто́же весть, ни А́нгели, и́же суть на небесе́х, ни Сын, то́кмо Оте́ц.

³³ Блюди́те, бди́те и моли́теся, не ве́сте бо, когда́ вре́мя бу́дет.

³⁴ Я́коже челове́к отходя́ оста́вль дом свой, и дав рабо́м свои́м власть, и кому́ждо де́ло свое́, и вратарю́ повеле́, да бдит.

³⁵ Бди́те у́бо, [не ве́сте бо, когда́ госпо́дь до́му прии́дет, ве́чер, или́ полу́нощи, или́ в петлоглаше́ние, или́ у́тро.]

³⁶ Да не прише́д внеза́пу, обря́щет вы спя́щя.

³⁷ А я́же вам глаго́лю, всем глаго́лю: бди́те.

Глава 14

¹ Бе же Па́сха и опресно́цы по двою́ дни́ю, и иска́ху архиере́е и кни́жницы, ка́ко Его́ ле́стию е́мше убию́т.

² Глаго́лаху же: [но] не в пра́здник, еда́ ^[73] ка́ко молва́ бу́дет лю́дска.

³ И су́щу Ему́ в Вифа́нии, в дому́ Си́мона прокаже́ннаго, возлежа́щу Ему́, прии́де жена́, иму́щи алава́стр мν́ра на́рднаго пистики́я многоце́нны, и сокру́шши алава́стр, возлива́ше Ему́ на главу́.

⁴ Бя́ху же не́цыи негоду́юще в себе́ и глаго́люще: во что ги́бель сия́ мν́рная бысть?

⁵ Можа́ше бо сие́ продано́ бы́ти вя́щше трех сот пе́нязь и да́тися ни́щим. И преща́ху ей.

⁶ Иису́с же рече́: оста́вите ю́, что ей труды́ даете́? Добро́ де́ло соде́ла о Мне.

⁷ Всегда́ бо ни́щия и́мате с собо́ю, и егда́ хо́щете, мо́жете им добро́ твори́ти, Мене́ же не всегда́ и́мате.

⁸ Е́же име́ ^[74] сия́, сотвори́: предвари́ пома́зати Мое́ те́ло на погребе́ние.

⁹ Ами́нь глаго́лю вам: иде́же а́ще пропове́стся Ева́нгелие сие́ во всем міре, и е́же сотвори́ сия́, глаго́лано бу́дет в па́мять ея́.

¹⁰ И Иу́да Искарио́тский, еди́н от обоюна́десяте, и́де ко архиере́ем, да преда́ст Его́ им.

¹¹ Они́ же слы́шавше возра́довашася и обеща́ша ему́ сре́бреники да́ти. И иска́ше, ка́ко Его́ в подо́бно вре́мя преда́ст.

¹² И в пе́рвый день опресно́к, егда́ па́сху жря́ху, глаго́лаша Ему́ ученицы́ Его́: где хо́щеши, ше́дше угото́ваем, да я́си па́сху?

¹³ И посла́ два от учени́к Свои́х и глаго́ла и́ма: иди́та во град, и сря́щет вас челове́к в скуде́льнице во́ду нося́, по нем иди́та.

¹⁴ И иде́же а́ще вни́дет, рцы́та господи́ну до́му, я́ко Учи́тель глаго́лет: где есть вита́льница, иде́же па́сху со ученики́ Мои́ми снем?

¹⁵ И той ва́ма пока́жет го́рницу ве́лию, по́стлану, гото́ву, ту угото́вайта нам.

¹⁶ И изыдо́ста ученика́ Его́, и приидо́ста во град, и обрето́ста, я́коже рече́ и́ма, и угото́васта па́сху.

¹⁷ И ве́черу бы́вшу прии́де со обемана́десяте.

¹⁸ И возлежа́щим им и яду́щим, рече́ Иису́с: ами́нь глаго́лю вам, я́ко еди́н от вас преда́ст Мя, яды́й со Мно́ю.

¹⁹ Они́ же нача́ша скорбе́ти и глаго́лати Ему́ еди́н по еди́ному: еда́ аз? И други́й: еда́ аз?

²⁰ Он же отвеща́в рече́ им: еди́н от обоюна́десяте, омочи́вый со Мно́ю в соли́ло.

²¹ Сын у́бо Челове́ческий и́дет, я́коже есть пи́сано о Нем, го́ре же челове́ку тому́, и́мже Сын Челове́ческий преда́стся, добре́е бы́ло бы ему́, а́ще не бы роди́лся челове́к той.

²² И яду́щим им, прие́м Иису́с хлеб, и благослови́в, преломи́ и даде́ им, и рече́: приими́те, яди́те, сие́ есть Те́ло Мое́.

²³ И прии́м ча́шу, хвалу́ возда́в, даде́ им, и пи́ша от нея́ вси.

²⁴ И рече́ им: сия́ есть Кровь Моя́ Но́ваго Заве́та, за мно́ги излива́ема.

²⁵ Ами́нь глаго́лю вам, я́ко ктому́ не и́мам пи́ти от плода́ ло́знаго до дне того́, егда́ е́ пию́ но́во во Ца́рствии Бо́жии.

²⁶ И воспе́вше изыдо́ша в го́ру Елео́нскую.

²⁷ И глаго́ла им Иису́с, я́ко вси соблазните́ся о Мне в нощь сию́. Пи́сано бо есть: поражу́ па́стыря, и разы́дутся о́вцы.

²⁸ Но пото́м, егда́ воскре́сну, варя́ю вы в Галиле́и.

²⁹ Петр же рече́ Ему́: а́ще и вси соблазня́тся, но не аз.

³⁰ И глаго́ла ему́ Иису́с: ами́нь глаго́лю тебе́, я́ко ты днесь в нощь сию́, пре́жде да́же втори́цею пе́тель не возгласи́т, трикра́ты отве́ржешися Мене́.

³¹ Он же мно́жае глаго́лаше па́че: а́ще же ми есть с Тобо́ю и умре́ти, не отве́ргуся Тебе́. Та́кожде и вси глаго́лаху.

³² И приидо́ша в весь, е́йже и́мя Гефсима́ниа, и глаго́ла ученико́м Свои́м: седи́те зде, до́ндеже шед помолю́ся.

³³ И поя́т Петра́ и Иа́кова и Иоа́нна с Собо́ю, и нача́т ужаса́тися и тужи́ти.

³⁴ И глаго́ла им: приско́рбна есть душа́ Моя́ до сме́рти, бу́дите зде и бди́те.

³⁵ И преше́д ма́ло, паде́ на земли́ и моля́шеся, да а́ще возмо́жно есть, мимои́дет от Него́ час.

³⁶ И глаго́лаше: А́вва О́тче, вся возмо́жна Тебе́, мимонеси́ от Мене́ ча́шу сию́, но не е́же Аз хощу́, но е́же Ты.

³⁷ И прии́де, и обре́те их спя́щя, и глаго́ла Петро́ви: Си́моне, спи́ши ли? Не возмо́же еди́наго часа́ побде́ти?

³⁸ Бди́те и моли́теся, да не вни́дете в напа́сть, дух у́бо бодр, плоть же немощна́.

³⁹ И па́ки шед помоли́ся, то́жде сло́во рек.

⁴⁰ И возвра́щься обре́те я́ па́ки спя́щя, [бя́ху бо очеса́ им тя́готна,] и не ве́дяху, что бы́ша Ему́ отвеща́ли.

⁴¹ И прии́де трети́цею и глаго́ла им: спи́те про́чее и почива́йте, приспе́ коне́ц, прии́де час, се предае́тся Сын Челове́ческий в ру́ки гре́шником.

⁴² Воста́ните, и́дем, се предая́й Мя прибли́жися.

⁴³ И а́бие еще́ Ему́ глаго́лющу, прии́де Иу́да, еди́н сый от обоюна́десяте, и с ним наро́д мног со ору́жием и дреко́льми, от архиере́й и кни́жник и ста́рец.

⁴⁴ Даде́ же предая́й Его́ зна́мение им, глаго́ля: Его́же а́ще лобжу́, Той есть, ими́те Его́ и веди́те Его́ сохра́нно.

⁴⁵ И прише́д, а́бие присту́пль к Нему́, глаго́ла Ему́: Равви́, Равви́. И облобыза́ Его́.

⁴⁶ Они́ же возложи́ша ру́це свои́ на него́ и я́ша Его́.

⁴⁷ Еди́н же не́кто от стоя́щих извле́к нож, уда́ри раба́ архиере́ова и уре́за ему́ у́хо.

⁴⁸ И отвеща́в Иису́с рече́ им: я́ко на разбо́йника ли изыдо́сте со ору́жием и дреко́льми я́ти Мя?

⁴⁹ По вся дни бех при вас в це́ркви учя́, и не я́сте Мене́, но да сбу́дется Писа́ние.

⁵⁰ И оста́вльше Его́, вси бежа́ша.

⁵¹ И еди́н не́кто ю́ноша и́де по Нем, оде́ян в плащани́цу по на́гу, и я́ша того́ ю́ношу. ^[75]

⁵² Он же оста́вль плащани́цу, наг бежа́ от них.

⁵³ И ведо́ша Иису́са ко архиере́ю, и снидо́шася к нему́ вси архиере́е и кни́жницы и ста́рцы.

⁵⁴ И Петр издале́ча вслед Его́ и́де до внутрь во двор архиере́ов, и бе седя́ со слуга́ми и гре́яся при свещи́.

⁵⁵ Архиере́е же и весь сонм иска́ху на Иису́са свиде́тельства, да умертвя́т Его́, и не обрета́ху.

⁵⁶ Мно́зи бо лжесвиде́тельствоваху на Него́, и ра́вна свиде́тельства не бя́ху.

⁵⁷ И не́цыи воста́вше лжесвиде́тельствоваху на Него́, глаго́люще:

⁵⁸ Я́ко мы слы́шахом Его́ глаго́люща, я́ко Аз разорю́ це́рковь сию́ рукотворе́ную и треми́ де́ньми и́ну нерукотворе́ну сози́жду.

⁵⁹ И ни та́ко ра́вно бе свиде́тельство их.

⁶⁰ И воста́в архиере́й посреде́, вопроси́ Иису́са, глаго́ля: не отвещава́еши ли ничесо́же? Что си́и на Тя свиде́тельствуют?

⁶¹ Он же молча́ше и ничто́же отвещава́ше. Па́ки архиере́й вопроси́ Его́ и глаго́ла Ему́: Ты ли еси́ Христо́с, Сын Благослове́ннаго?

⁶² Иису́с же рече́: Аз есмь, и у́зрите Сы́на Челове́ческаго одесну́ю седя́ща си́лы и гряду́ща со о́блаки небе́сными.

⁶³ Архиере́й же растерза́в ри́зы своя́, глаго́ла: что еще́ тре́буем свиде́телей?

⁶⁴ Слы́шасте хулу́, что вам мни́тся? Они́ же вси осуди́ша Его́ бы́ти пови́нна сме́рти.

⁶⁵ И нача́ша не́цыи плюва́ти Нань, и прикрыва́ти лице́ Его́, и му́чити Его́, и глаго́лати Ему́: прорцы́. И слуги́ по лани́тома Его́ бия́ху.

⁶⁶ И су́щу Петро́ви во дворе́ ни́зу, прии́де еди́на от рабы́нь архиере́овых,

⁶⁷ И ви́девши Петра́ гре́ющася, воззре́вши на него́, глаго́ла: и ты с Назаряни́ном Иису́сом был еси́.

⁶⁸ Он же отве́ржеся, глаго́ля: не вем, ниже́ зна́ю, что ты глаго́леши. И изы́де вон на преддво́рие, и але́ктор возгласи́.

⁶⁹ И рабы́ня ви́девши его́ па́ки, нача́т глаго́лати предстоя́щим, я́ко сей от них есть.

⁷⁰ Он же па́ки отмета́шеся. И пома́ле па́ки предстоя́щии глаго́лаху Петро́ви: вои́стинну от них еси́, и́бо Галиле́анин еси́, и бесе́да твоя́ подо́бится.

⁷¹ Он же нача́ роти́тися и кля́тися, я́ко не вем Челове́ка Сего́, Его́же вы глаго́лете.

⁷² И второ́е але́ктор возгласи́. И помяну́ Петр глаго́л, его́же рече́ ему́ Иису́с, я́ко пре́жде да́же пе́тель не возгласи́т двакра́ты, отве́ржешися Мене́ трикра́ты. И наче́н пла́кашеся.

Глава 15

¹ И а́бие нау́трия сове́т сотвори́ша архиере́е со ста́рцы и кни́жники, и весь сонм, связа́вше Иису́са ведо́ша и преда́ша Его́ Пила́ту.

² И вопроси́ Его́ Пила́т: Ты ли еси́ Царь Иуде́йский? Он же отвеща́в рече́ ему́: ты глаго́леши.

³ И глаго́лаху на Него́ архиере́е мно́го.

⁴ Пила́т же па́ки вопроси́ Его́, глаго́ля: не отвещава́еши ли ничто́же? Виждь, коли́ко на Тя свиде́тельствуют.

⁵ Иису́с же ктому́ ничто́же отвеща́, я́ко диви́тися Пила́ту.

⁶ На всяк же пра́здник отпуща́ше им еди́наго свя́зня, его́же проша́ху.

⁷ Бе́ же нарица́емый Вара́вва с ко́вники свои́ми свя́зан, и́же в ко́ве уби́йство сотвори́ша.

⁸ И возопи́в наро́д нача́ проси́ти, я́коже всегда́ творя́ше им.

⁹ Пила́т же отвеща́ им, глаго́ля: хо́щете ли, пущу́ вам Царя́ Иуде́йска?

¹⁰ Ве́дяше бо, я́ко за́висти ра́ди преда́ша Его́ архиере́е.

¹¹ Архиере́е же поману́ша наро́ду, да па́че Вара́вву пу́стит им.

¹² Пила́т же отвеща́в па́ки рече́ им: что у́бо хо́щете сотворю́, Его́же глаго́лете Царя́ Иуде́йска?

¹³ Они́ же па́ки возопи́ша глаго́люще: пропни́ Его́.

¹⁴ Пила́т же глаго́лаше им: что бо зло сотвори́? Они́ же и́злиха вопия́ху: пропни́ Его́.

¹⁵ Пила́т же хотя́ наро́ду хоте́ние сотвори́ти, пусти́ им Вара́вву, и предаде́ Иису́са, бив, да про́пнут Его́.

¹⁶ Во́ини же ведо́ша Его́ внутрь двора́, е́же есть прето́р, и созва́ша всю спи́ру,

¹⁷ И облеко́ша Его́ в препря́ду, и возложи́ша на Него́ спле́тше терно́в вене́ц,

¹⁸ И нача́ша целова́ти Его́ и глаго́лати: ра́дуйся, Царю́ Иуде́йский.

¹⁹ И бия́ху Его́ по главе́ тро́стию, и плюва́ху на Него́, и прегиба́юще коле́на покланя́хуся Ему́.

²⁰ И егда́ поруга́шася Ему́, совлеко́ша с Него́ препря́ду и облеко́ша Его́ в ри́зы Своя́, и изведо́ша Его́, да про́пнут Его́.

²¹ И заде́ша мимоходя́щу не́коему Си́мону Кирине́ю, [гряду́щу с села́, отцу́ Алекса́ндрову и Ру́фову,] да во́змет крест Его́.

²² И приведо́ша Его́ на Голго́фу ме́сто, е́же есть сказа́емо Ло́бное ме́сто.

²³ И дая́ху Ему́ пи́ти есмνрнисме́но вино́, Он же не прия́т.

²⁴ И распе́ншии Его́ раздели́ша ри́зы Его́, мета́юще жре́бий о них, кто что во́змет.

²⁵ Бе же час тре́тий, и распя́ша Его́.

²⁶ И бе написа́ние вины́ Его́ напи́сано: Царь Иуде́йск.

²⁷ И с Ним распя́ша два разбо́йника, еди́наго одесну́ю и еди́наго ошу́юю Его́.

²⁸ И сбы́стся Писа́ние, е́же глаго́лет: и со беззако́нными вмени́ся.

²⁹ И мимоходя́щии ху́ляху Его́, покива́юще глава́ми свои́ми и глаго́люще: уа́, ^[76] разоря́яй це́рковь и треми́ де́ньми созида́яй,

³⁰ Cпаси́ся Сам и сни́ди со креста́.

³¹ Та́кожде и архиере́е руга́ющеся, друг ко дру́гу с кни́жники глаго́лаху: и́ны спасе́, Себе́ ли не мо́жет спасти́?

³² Христо́с, Царь Изра́илев, да сни́дет ны́не со креста́, да ви́дим и ве́ру име́м Ему́. И распя́тая с Ним поноша́ста Ему́.

³³ Бы́вшу же часу́ шесто́му, тма бысть по всей земли́ до часа́ девя́таго.

³⁴ И в час девя́тый возопи́ Иису́с гла́сом ве́лиим, глаго́ля: Елои́, Елои́, лима́ савахфани́? Е́же есть сказа́емо: Бо́же Мой, Бо́же Мой, почто́ Мя оста́вил еси́?

³⁵ И не́цыи от предстоя́щих слы́шавше, глаго́лаху: се Илию́ гласи́т.

³⁶ Тек же еди́н, и напо́лнив гу́бу о́цта, и возло́жь на трость, напоя́ше Его́, глаго́ля: оста́вите, да ви́дим, а́ще прии́дет Илиа́ сня́ти Его́.

³⁷ Иису́с же пущь глас ве́лий, и́здше.

³⁸ И заве́са церко́вная раздра́ся на дво́е, свы́ше до ни́зу.

³⁹ Ви́дев же со́тник стоя́й пря́мо Ему́, я́ко та́ко возопи́в и́здше, рече́: вои́стинну Челове́к Сей Сын бе Бо́жий.

⁴⁰ Бя́ху же и жены́ издале́ча зря́ще, в ни́хже бе Мари́а Магдали́на, и Мари́а Иа́кова ма́лаго и Иоси́и ма́ти, и Саломи́а,

⁴¹ Я́же, и егда́ бе в Галиле́и, хожда́ху по Нем и служа́ху Ему́, и и́ны мно́гия, я́же взыдо́ша с Ним во Иерусали́м.

⁴² И уже́ по́зде бы́вшу, [поне́же бе пято́к, е́же е́сть к суббо́те,]

⁴³ Прии́де Ио́сиф, и́же от Аримафе́а, благообра́зен сове́тник, и́же и той бе ча́я Ца́рствия Бо́жия, дерзну́в вни́де к Пила́ту, и проси́ те́ло Иису́сово.

⁴⁴ Пила́т же диви́ся, а́ще уже́ у́мре, и призва́в со́тника, вопроси́ его́: а́ще уже́ у́мре?

⁴⁵ И уве́дев от со́тника, даде́ те́ло Ио́сифови.

⁴⁶ И купи́в плащани́цу и снем Его́, обви́т плащани́цею, и положи́ Его́ во гроб, и́же бе изсе́чен от ка́мене, и привали́ ка́мень над две́ри гро́ба.

⁴⁷ Мари́а же Магдали́на и Мари́а Иоси́ева зря́сте, где Его́ полага́ху.

Глава 16

¹ И мину́вши суббо́те, Мари́а Магдали́на и Мари́а Иа́ковля и Саломи́а купи́ша арома́ты, да прише́дше пома́жут Иису́са.

² И зело́ зау́тра во еди́ну от суббо́т приидо́ша на гроб, возсия́вшу со́лнцу.

³ И глаго́лаху к себе́: кто отвали́т нам ка́мень от две́рий гро́ба?

⁴ [И воззре́вше ви́деша, я́ко отвале́н бе ка́мень,] бе бо ве́лий зело́.

⁵ И вле́зше во гроб, ви́деша ю́ношу седя́ща в десны́х, оде́яна во оде́жду белу́, и ужасо́шася.

⁶ Он же глаго́ла им: не ужаса́йтеся, Иису́са и́щете Назаряни́на распя́таго, воста́, несть зде, се ме́сто, иде́же положи́ша Его́.

⁷ Но иди́те, рцы́те ученико́м Его́ и Петро́ви, я́ко варя́ет вы в Галиле́и, та́мо Его́ ви́дите, я́коже рече́ вам.

⁸ И изше́дше бежа́ша от гро́ба, имя́ше ^[77] же их тре́пет и у́жас, и никому́же ничто́же ре́ша, боя́ху бо ся.

⁹ Воскре́с же Иису́с зау́тра в пе́рвую суббо́ту, яви́ся пре́жде Мари́и Магдали́ни, из нея́же изгна́ седмь бесо́в.

¹⁰ Она́ же ше́дши возвести́ с Ним бы́вшим, пла́чущимся и рыда́ющим.

¹¹ И они́ слы́шавше, я́ко жив есть и ви́ден бысть от нея́, не я́ша ве́ры.

¹² По сих же двема́ от них гряду́щема яви́ся ине́м о́бразом, иду́щема на село́.

¹³ И та ше́дша возвести́ста про́чим, и ни те́ма ве́ры я́ша.

¹⁴ Последи́ же возлежа́щим им единомуна́десяте яви́ся, и поноси́ неве́рствию их и жестосе́рдию, я́ко ви́девшим Его́ воста́вша не я́ша ве́ры.

¹⁵ И рече́ им: ше́дше в міръ весь, пропове́дите Ева́нгелие всей тва́ри.

¹⁶ И́же ве́ру име́т и крести́тся, спасе́н бу́дет, а и́же не име́т ве́ры, осужде́н бу́дет.

¹⁷ Зна́мения же ве́ровавшим сия́ после́дуют: и́менем Мои́м бе́сы иждену́т, язы́ки возглаго́лют но́вы,

¹⁸ Зми́я во́змут, а́ще и что сме́ртно испию́т, не вреди́т их, на неду́жныя ру́ки возложа́т, и здра́ви бу́дут.

¹⁹ Госпо́дь же у́бо, по глаго́лании Его́ к ним, вознесе́ся на не́бо и се́де одесну́ю Бо́га.

²⁰ Они́ же изше́дше пропове́даша всю́ду, Го́споду поспе́шствующу и сло́во утвержда́ющу после́дствующими зна́меньми. Ами́нь.

Ева́нгелие от Луки́

Глава 1

¹ Поне́же у́бо мно́зи нача́ша чини́ти по́весть о изве́ствованных в нас ве́щех,

² Я́коже преда́ша нам, и́же испе́рва самови́дцы и слуги́ бы́вшии словеси́,

³ Изво́лися и мне после́довавшу вы́ше всех испы́тно, поря́ду писа́ти тебе́, держа́вный Фео́филе,

⁴ Да разуме́еши, о ни́хже научи́лся еси́ словесе́х утвержде́ние.

⁵ Бысть во дни И́рода, царя́ Иуде́йска, иере́й не́кий, и́менем Заха́риа, от дневны́я чреды́ Авиа́ни, и жена́ его́ от дще́рей Ааро́новех, и и́мя ей Елисаве́т.

⁶ Бе́ста же пра́ведна о́ба пред Бо́гом, ходя́ще во всех за́поведех и оправда́ниих Госпо́дних безпоро́чна.

⁷ И не бе и́ма ча́да, поне́же Елисаве́т бе непло́ды, и о́ба заматоре́вша во днех свои́х бе́ста.

⁸ Бысть же служа́щу ему́ в чину́ чреды́ своея́ пред Бо́гом,

⁹ По обы́чаю свяще́нничества, ключи́ся ему́ покади́ти вшед в це́рковь Госпо́дню,

¹⁰ И все мно́жество люде́й бе моли́тву де́я вне в год ^[78] фимиа́ма.

¹¹ Яви́ся же ему́ А́нгел Госпо́день, стоя́ одесну́ю олтаря́ кади́льнаго,

¹² И смути́ся Заха́риа ви́дев, и страх нападе́ нань.

¹³ Рече́ же к нему́ А́нгел: не бо́йся, Заха́рие, зане́ услы́шана бысть моли́тва твоя́, и жена́ твоя́ Елисаве́т роди́т сы́на тебе́, и нарече́ши и́мя ему́ Иоа́нн.

¹⁴ И бу́дет тебе́ ра́дость и весе́лие, и мно́зи о рождестве́ его́ возра́дуются.

¹⁵ Бу́дет бо ве́лий пред Го́сподем, и вина́ и сике́ра не и́мать пи́ти, и Ду́ха Свята́го испо́лнится еще́ из чре́ва ма́тере своея́.

¹⁶ И мно́ги от сыно́в изра́илевых обрати́т ко Го́споду Бо́гу их.

¹⁷ И той преды́дет пред Ним ду́хом и си́лою Илиино́ю, обрати́ти се́рдца отце́м на ча́да, и проти́вныя в му́дрости пра́ведных, угото́вати Го́сподеви лю́ди соверше́ны.

¹⁸ И рече́ Заха́риа ко А́нгелу: по чесому́ разуме́ю сие́? Аз бо есмь стар, и жена́ моя́ заматоре́вши во днех свои́х.

¹⁹ И отвеща́в А́нгел, рече́ ему́: аз есмь Гаврии́л предстоя́й пред Бо́гом, и по́слан есмь глаго́лати к тебе́ и благовести́ти тебе́ сия́.

²⁰ И се бу́деши молчя́, и не моги́й проглаго́лати, до него́же дне бу́дут сия́, зане́ не ве́ровал еси́ словесе́м мои́м, я́же сбу́дутся во вре́мя свое́.

²¹ И бе́ша лю́дие жду́ще Заха́рию, и чудя́хуся косня́щу ему́ в це́ркви.

²² Изше́д же не можа́ше глаго́лати к ним, и разуме́ша, я́ко виде́ние ви́де в це́ркви, и той бе помава́я им, и пребыва́ше нем.

²³ И бысть я́ко испо́лнишася дни́е слу́жбы его́, и́де в дом свой.

²⁴ По сих же днех зача́т Eлисаве́т, жена́ его́, и тая́шеся ме́сяц пять, глаго́лющи:

²⁵ Я́ко та́ко мне сотвори́ Госпо́дь во дни, в ня́же призре́ отъя́ти поноше́ние мое́ в челове́цех.

²⁶ В ме́сяц же шесты́й по́слан бысть А́нгел Гаврии́л от Бо́га во град Галиле́йский, eму́же и́мя Назаре́т,

²⁷ К Де́ве обруче́нней му́жеви, eму́же и́мя Ио́сиф, от до́му Дави́дова, и и́мя Де́ве, Мариа́м.

²⁸ И вшед к Ней А́нгел, рече́: ра́дуйся Благода́тная, Госпо́дь с Тобо́ю, благослове́на Ты в жена́х.

²⁹ Oна́ же ви́девши смути́ся о словеси́ eго́, и помышля́ше, каково́ бу́дет целова́ние сие́.

³⁰ И рече́ А́нгел Eй: не бо́йся Мариа́м, обре́те бо благода́ть от Бо́га.

³¹ И се зачне́ши во чре́ве, и роди́ши Сы́на, и нарече́ши и́мя Eму́ Иису́с.

³² Сей бу́дет ве́лий, и Сын Вы́шняго нарече́тся, и даст Eму́ Госпо́дь Бог престо́л Дави́да oтца́ Eго́,

³³ И воцари́тся в дому́ Иа́ковли во ве́ки, и Ца́рствию Eго́ не бу́дет конца́.

³⁴ Рече́ же Мариа́м ко А́нгелу: ка́ко бу́дет сие́, иде́же му́жа не зна́ю?

³⁵ И отвеща́в А́нгел, рече́ Eй: Дух Святы́й на́йдет на Тя, и си́ла Вы́шняго осени́т Тя, те́мже и ражда́емое Свя́то, нарече́тся Сын Бо́жий.

³⁶ И се Eлисаве́т, ю́жика Твоя́, и та зача́т сы́на в ста́рости свое́й, и сей ме́сяц шесты́й eсть eй, нарица́емей непло́ды.

³⁷ Я́ко не изнемо́жет от Бо́га всяк глаго́л.

³⁸ Рече́ же Мариа́м: се раба́ Госпо́дня, бу́ди Мне по глаго́лу твоему́. И оты́де от Нея́ А́нгел.

³⁹ Воста́вши же Мариа́м во дни ты́я, и́де в го́рняя со тща́нием, во град Иу́дов.

⁴⁰ И вни́де в дом Заха́риин, и целова́ Елисаве́т.

⁴¹ И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́, и испо́лнися Ду́ха Свя́та Елисаве́т.

⁴² И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́.

⁴³ И отку́ду мне сие́, да прии́де Ма́ти Го́спода моего́ ко мне?

⁴⁴ Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м.

⁴⁵ И блаже́нна Ве́ровавшая, я́ко бу́дет соверше́ние глаго́ланным Ей от Го́спода.

⁴⁶ И рече́ Мариа́м: вели́чит душа́ Моя́ Го́спода,

⁴⁷ И возра́довася дух Мой о Бо́зе Спа́се Мое́м.

⁴⁸ Я́ко призре́ на смире́ние рабы́ Своея́, се бо, от ны́не ублажа́т Мя вси роди́.

⁴⁹ Я́ко сотвори́ Мне вели́чие Си́льный, и свя́то и́мя Его́.

⁵⁰ И ми́лость Его́ в ро́ды родо́в боя́щимся Его́.

⁵¹ Сотвори́ держа́ву мы́шцею Свое́ю: расточи́ го́рдыя мы́слию се́рдца их.

⁵² Низложи́ си́льныя со престо́л, и вознесе́ смире́нныя.

⁵³ А́лчущия испо́лни благ и богатя́щияся отпусти́ тщи.

⁵⁴ Восприя́т Изра́иля о́трока Своего́, помяну́ти ми́лости,

⁵⁵ Я́коже глаго́ла ко отце́м на́шим, Авраа́му и се́мени его́ до ве́ка.

⁵⁶ Пребы́сть же Мариа́м с не́ю я́ко три ме́сяцы, и возврати́ся в дом Свой.

⁵⁷ Елисаве́ти же испо́лнися вре́мя роди́ти ей, и роди́ сы́на.

⁵⁸ И слы́шаша о́крест живу́щии и у́жики ея́, я́ко возвели́чил есть Госпо́дь ми́лость свою́ с не́ю, и ра́довахуся с не́ю.

⁵⁹ И бысть во осмы́й день, приидо́ша обре́зати отроча́, и нарица́ху е́ и́менем отца́ его́, Заха́рию.

⁶⁰ И отвеща́вши ма́ти его́, рече́: ни, но да нарече́тся Иоа́нн.

⁶¹ И ре́ша к ней: я́ко никто́же есть в родстве́ твое́м, и́же нарица́ется и́менем тем.

⁶² И помава́ху отцу́ его́, е́же ка́ко бы хоте́л нарещи́ е́.

⁶³ И испро́ш дщи́цу, написа́, глаго́ля: Иоа́нн бу́дет и́мя ему́. И чудя́хуся вси.

⁶⁴ Отверзо́шася же уста́ его́ а́бие и язы́к его́, и глаго́лаше благословя́ Бо́га.

⁶⁵ И бысть на всех страх живу́щих о́крест их, и во всей стране́ иуде́йстей пове́даеми бя́ху вси глаго́ли си́и.

⁶⁶ И положи́ша вси слы́шавшии в се́рдце свое́м, глаго́люще: что у́бо отроча́ сие́ бу́дет? И рука́ Госпо́дня бе с ним.

⁶⁷ И Заха́риа оте́ц его́ испо́лнися Ду́ха Свя́та, и проро́чествова, глаго́ля:

⁶⁸ Благослове́н Госпо́дь Бог Изра́илев, я́ко посети́ и сотвори́ избавле́ние лю́дем свои́м.

⁶⁹ И воздви́же рог спасе́ния нам, в дому́ Дави́да о́трока Своего́,

⁷⁰ Я́коже глаго́ла усты́ святы́х су́щих от ве́ка проро́к Его́.

⁷¹ Спасе́ние от враг на́ших и из руки́ всех ненави́дящих нас,

⁷² Сотвори́ти ми́лость со отцы́ на́шими и помяну́ти заве́т святы́й Сво́й,

⁷³ Кля́тву, е́ю же кля́тся ко Авраа́му отцу́ на́шему, да́ти нам,

⁷⁴ Без стра́ха, из руки́ враг на́ших изба́вльшимся,

⁷⁵ Служи́ти Ему́ преподо́бием и пра́вдою пред Ним вся дни живота́ на́шего.

⁷⁶ И ты, отроча́, проро́к Вы́шняго нарече́шися, преды́деши бо пред лице́м Госпо́дним, угото́вати пути́ Его́.

⁷⁷ Да́ти ра́зум спасе́ния лю́дем Его́, во оставле́ние грех их,

⁷⁸ Милосе́рдия ра́ди ми́лости Бо́га на́шего, в ни́хже посети́л есть нас Восто́к свы́ше,

⁷⁹ Просвети́ти во тме и се́ни сме́ртней седя́щия, напра́вити но́ги на́шя на путь ми́рен.

⁸⁰ Отроча́ же растя́ше и крепля́шеся ду́хом, и бе в пусты́нях до дне явле́ния своего́ ко Изра́илю.

Глава 2

¹ Бысть же во дни тыя, изы́де повеле́ние от ке́саря А́вгуста написа́ти всю вселе́нную.

² Сие́ написа́ние пе́рвое бысть, владя́щу Сири́ею Кирини́ю.

³ И идя́ху вси написа́тися, ко́ждо во свой град.

⁴ Взы́де же и Ио́сиф от Галиле́и из гра́да Назаре́та во Иуде́ю, во град Дави́дов, и́же нарица́ется Вифлее́м, зане́ бы́ти ему́ от до́му и оте́чества Дави́дова,

⁵ Написа́тися с Мари́ею, обруче́ною ему́ жено́ю, су́щею непра́здною.

⁶ Бысть же, егда́ бы́ша та́мо, испо́лнишася дни́е роди́ти Ей.

⁷ И роди́ Сы́на Своего́ пе́рвенца, и пови́т Его́, и положи́ Его́ в я́слех, зане́ не бе им ме́ста во оби́тели.

⁸ И па́стырие бе́ху в то́йже стране́, бдя́ще, и стрегу́ще стра́жу нощну́ю о ста́де свое́м.

⁹ И се А́нгел Госпо́день ста в них, и сла́ва Госпо́дня осия́ их, и убоя́шася стра́хом ве́лиим.

¹⁰ И рече́ им А́нгел: не бо́йтеся, се бо благовеству́ю вам ра́дость ве́лию, я́же бу́дет всем лю́дем.

¹¹ Я́ко роди́ся вам днесь Спас, и́же есть Христо́с Госпо́дь, во гра́де Дави́дове.

¹² И се вам зна́мение: обря́щете Младе́нец пови́т, лежа́щ в я́слех.

¹³ И внеза́пу бысть со А́нгелом мно́жество вой Небе́сных, хва́лящих Бо́га и глаго́лющих:

¹⁴ Сла́ва в Вы́шних Бо́гу, и на земли́ мир, во челове́цех благоволе́ние.

¹⁵ И бысть, я́ко отыдо́ша от них на Не́бо А́нгели, и челове́цы па́стырие ре́ша друг ко дру́гу: пре́йдем до Вифлее́ма и ви́дим глаго́л сей бы́вший, и́же Госпо́дь сказа́ нам.

¹⁶ И приидо́ша, поспе́шшеся, и обрето́ша Мариа́м же и Ио́сифа и Младе́нец, лежа́щ во я́слех.

¹⁷ Ви́девше же, сказа́ша о глаго́ле, глаго́ланном им о Отроча́ти Сем.

¹⁸ И вси слы́шавшии диви́шася о глаго́ланных от па́стырей к ним.

¹⁹ Мариа́м же соблюда́ше вся глаго́лы сия́, слага́ющи в се́рдцы Свое́м.

²⁰ И возврати́шася па́стырие, сла́вяще и хва́ляще Бо́га о всех я́же слы́шаша и ви́деша, я́коже глаго́лано бысть к ним.

²¹ И егда́ испо́лнишася осмь дний, да обре́жут Его́, и нареко́ша и́мя Ему́ Иису́с, нарече́нное А́нгелом пре́жде да́же не зача́тся во чре́ве.

²² И егда́ испо́лнишася дни́е очище́ния е́ю, по зако́ну Моисе́ову, вознесо́ста Его́ во Иерусали́м, поста́вити Его́ пред Го́сподем,

²³ [Я́коже eсть пи́сано в зако́не Госпо́дни: я́ко всяк младе́нец му́жеска по́лу, разверза́я ложесна́, свя́то Го́сподеви нарече́тся.]

²⁴ И éже да́ти же́ртву, по рече́нному в зако́не Госпо́дни: два го́рличища или́ два птeнца́ голуби́на.

²⁵ И се бе челове́к во Иерусали́ме, eму́же и́мя Симео́н. И челове́к сей пра́веден и благочести́в, ча́я уте́хи Изра́илевы, и Дух бе Свят в нем.

²⁶ И бе eму́ обеща́но Ду́хом Святы́м, не ви́дети сме́рти, пре́жде да́же не ви́дит Христа́ Госпо́дня.

²⁷ И прии́де ду́хом в це́рковь. И eгда́ введо́ста роди́тeля Oтроча́ Иису́са, сотвори́ти и́ма по обы́чаю зако́нному о Нем.

²⁸ И той прие́м Eго́ на руку́ своéю, и благослови́ Бо́га, и рече́:

²⁹ Ны́не отпуща́еши раба́ Твоего́, Влады́ко, по глаго́лу Твоему́ с ми́ром,

³⁰ Я́ко ви́десте óчи мои́ спасе́ние Твое́,

³¹ Éже eси́ угото́вал пред лице́м всех люде́й,

³² Свет во открове́ние язы́ком и сла́ву люде́й Твои́х Изра́иля.

³³ И бе Ио́сиф и Ма́ти Eго́ чудя́щася о глаго́лемых о Нем.

³⁴ И благослови́ я́ Симео́н, и рече́ к Мари́и, Ма́тери Eго́: се лежи́т Сей на паде́ние и на воста́ние мно́гим во Изра́или, и в зна́мение пререка́емо.

³⁵ [И Тебе́ же Само́й ду́шу про́йдет ору́жие,] я́ко у́бо да откры́ются от мног серде́ц помышлéния.

³⁶ И бе А́нна проро́чица, дщи Фану́илева, от коле́на Аси́рова. Сия́ заматоре́вши во днех мно́зех, жи́вши с му́жем седмь лет от де́вства своего́.

³⁷ И та вдова́ я́ко лет óсмьдесят и четы́ре, я́же не отхожда́ше от це́ркве, посто́м и моли́твами служа́щи день и нощь.

³⁸ И та в той час приста́вши, испове́дашеся Го́сподеви, и глаго́лаше о Нем всем ча́ющим избавле́ния во Иерусали́ме.

³⁹ И я́ко сконча́шася вся по зако́ну Госпо́дню, возврати́шася в Галиле́ю, во град свой Назаре́т.

⁴⁰ Oтроча́ же растя́ше и крепля́шеся ду́хом, исполня́яся прему́дрости, и благода́ть Бо́жия бе на Нем.

⁴¹ И хожда́ста роди́теля Его́ на вся́ко ле́то во Иерусали́м в пра́здник па́схи.

⁴² И егда́ бысть двоюна́десяте ле́ту, восходя́щим им во Иерусали́м по обы́чаю пра́здника.

⁴³ И сконча́вшем дни, и возвраща́ющимся им, оста́ о́трок Иису́с во Иерусали́ме. И не разуме́ Ио́сиф и Ма́ти Его́.

⁴⁴ Мне́вша же Его́ во дружи́не су́ща, преидо́ста дне путь, и иска́ста Его́ во сро́дницех, и в зна́емых.

⁴⁵ И не обре́тша Его́, возврати́стася во Иерусали́м, взыска́юща Его́.

⁴⁶ И бысть, по трие́х днех, обрето́ста Его́ в це́ркви, седя́ща посреде́ учи́телей, и послу́шающа их, и вопроша́юща их.

⁴⁷ Ужаса́хуся же вси послу́шающии Его́ о ра́зуме и о отве́тех Его́.

⁴⁸ И ви́девша Его́, диви́стася, и к Нему́ Ма́ти Его́ рече́: Ча́до, что сотвори́ на́ма та́ко? Се, оте́ц Твой и Аз боля́ща иска́хома Тебе́.

⁴⁹ И рече́ к ни́ма: что я́ко иска́ста Мене́? Не ве́ста ли, я́ко в тех, я́же Отца́ Моего́, досто́ит бы́ти Ми?

⁵⁰ И та не разуме́ста глаго́ла, и́же глаго́ла и́ма.

⁵¹ И сни́де с ни́ма, и прии́де в Назаре́т, и бе повину́яся и́ма. И Ма́ти Его́ соблюда́ше вся глаго́лы сия́ в се́рдцы Свое́м.

⁵² И Иису́с преспева́ше прему́дростию и во́зрастом, и благода́тию у Бо́га и челове́к.

Глава 3

¹ В пя́тое же на́десяте ле́то влады́чества Тиве́рия ке́саря, облада́ющу Понти́йскому Пила́ту Иуде́ею, и четвертовла́ствующу Галиле́ею И́роду, Фили́ппу же, бра́ту его́ четвертовла́ствующу Тири́ею и Трахони́тскою страно́ю, и Лиса́нию Авилини́ею четвертовла́ствующу,

² При архиере́и А́нне и Каиа́фе, бысть глаго́л Бо́жий ко Иоа́нну, Заха́риину сы́ну, в пусты́ни.

³ И прии́де во всю страну́ Иорда́нскую, пропове́дая креще́ние покая́ния во оставле́ние грехо́в.

⁴ Я́коже есть пи́сано в кни́зе слове́с Иса́ии проро́ка, глаго́люща: глас вопию́щаго в пусты́ни, угото́вайте путь Госпо́день, пра́вы твори́те стези́ Его́.

⁵ Вся́ка дебрь испо́лнится, и вся́ка гора́ и холм смири́тся, и бу́дут стропо́тная в пра́вая и о́стрии в пути́ гла́дки.

⁶ И у́зрит вся́ка плоть спасе́ние Бо́жие.

⁷ Глаго́лаше же исходя́щим наро́дом крести́тися от него́: порожде́ния ехи́днова, кто сказа́ вам бежа́ти от гряду́щаго гне́ва?

⁸ Сотвори́те у́бо плоды́ досто́йны покая́ния, и не начина́йте глаго́лати в себе́: отца́ и́мамы Авраа́ма. Глаго́лю бо вам, я́ко мо́жет Бог от ка́мения сего́ воздви́гнути ча́да Авраа́му.

⁹ Уже́ бо и секи́ра при ко́рени дре́ва лежи́т: вся́ко у́бо дре́во, не творя́щее плода́ добра́, посека́ется и во огнь вмета́ется.

¹⁰ И вопроша́ху его́ наро́ди, глаго́люще: что у́бо сотвори́м?

¹¹ Отвеща́в же глаго́ла им: име́яй две ри́зе, да пода́ст неиму́щему, и име́яй бра́шна, та́кожде да твори́т.

¹² Приидо́ша же и мытари́ крести́тися от него́, и ре́ша к нему́: учи́телю, что сотвори́м?

¹³ Он же рече́ к ним: ничто́же бо́ле от повеле́ннаго вам твори́те.

¹⁴ Вопроша́ху же его́ и во́ини, глаго́люще: и мы что сотвори́м? И рече́ к ним: никого́же оби́дите, ни оклеветава́йте, и дово́льни бу́дите обро́ки ва́шими.

¹⁵ Ча́ющим же лю́дем, и помышля́ющим всем в сердца́х свои́х о Иоа́нне, еда́ той есть Христо́с,

¹⁶ Отвещава́ше Иоа́нн всем глаго́ля: аз у́бо водо́ю креща́ю вы: гряде́т же Кре́плий мене́, Ему́же несмь досто́ин отреши́ти реме́нь сапогу́ Его́. Той вы крести́т Ду́хом Святы́м и огне́м.

¹⁷ Ему́же лопа́та в руку́ Его́, и потреби́т гумно́ Свое́, и собере́т пщени́цу в жи́тницу Свою́, пле́вы же сожже́т огне́м негаса́ющим.

¹⁸ Мно́га же у́бо и и́на, утеша́я благовествова́ше лю́дем.

¹⁹ И́род же четвертовла́стник, облича́емь от Иоа́нна о Иродиа́де жене́ бра́та своего́, и о всех, я́же сотвори́ зла́я И́род,

²⁰ Приложи́ и сие́ над все́ми, и затвори́ Иоа́нна в темни́це.

²¹ Бысть же егда́ крести́шася вси лю́дие, и Иису́су кре́щшуся и моля́щуся, отве́рзеся не́бо,

²² И сни́де Дух Святы́й теле́сным о́бразом, я́ко го́лубь, Нань, и глас с небесе́ бысть, глаго́ля: Ты еси́ Сын Мой Возлю́бленный, о Тебе́ благоволи́х.

²³ И той бе Иису́с я́коле́том три́десять начина́я, сый, я́ко мнимь, сын Ио́сифов, Или́ев,

²⁴ Матфа́тов, Леви́ин, Мелхи́ин, Ианна́ев, Ио́сифов,

²⁵ Маттафи́ев, Амо́сов, Нау́мов, Если́мов, Нагге́ов,

²⁶ Маа́фов, Маттафи́ев, Семеи́ев, Ио́сифов, Иу́дин,

²⁷ Иоанна́нов, Риса́ев, Зорова́велев, Салафии́лев, Нири́ев,

²⁸ Мелхи́ев, Адди́ев, Коса́мов, Елмода́мов, И́ров,

²⁹ Иоси́ев, Елиезе́ров, Иори́мов, Матфа́тов, Леви́ин,

³⁰ Симео́нов, Иу́дин, Ио́сифов, Иона́нов, Елиаки́мов,

³¹ Мелеа́ев, Маина́нов, Маттафа́ев, Нафа́нов, Дави́дов,

³² Иессе́ов, Ови́дов, Воо́зов, Салмо́нов, Наассо́нов,

³³ Аминада́вов, Ара́мов, [Иора́мов,] Есро́мов, Фаре́сов, Иу́дин,

³⁴ Иа́ковль, Исаа́ков, Авраа́мов, Фара́нов, Нахо́ров,

³⁵ Серу́хов, Рага́вов, Фале́ков, Еве́ров, Сала́нов,

³⁶ Каина́нов, Арфакса́дов, Си́мов, Но́ев, Ламе́хов,

³⁷ Мафуса́лев, Ено́хов, Иа́редов, Малелеи́лов, Каина́нов,

³⁸ Ено́сов, Си́фов, Ада́мов, Бо́жий.

Глава 4

¹ Иису́с же испо́лнь Ду́ха Свя́та, возврати́ся от Иорда́на, и ведя́шеся Ду́хом в пусты́ню.

² Дний четы́ридесять искуша́емь от диа́вола, и не яст ничесо́же во дни ты́я, и сконча́вшимся им, последи́ взалка́.

³ И рече́ Ему́ диа́вол: а́ще Сын еси́ Бо́жий, рцы ка́меневи сему́, да бу́дет хлеб.

⁴ И отвеща́в Иису́с к нему́, глаго́ля: пи́сано есть, я́ко не о хле́бе еди́ном жив бу́дет челове́к, но о вся́ком глаго́ле Бо́жии.

⁵ И возве́д Его́ диа́вол на гору́ высоку́, показа́ Ему́ вся ца́рствия вселе́нныя в часе́ ^[79] вре́менне.

⁶ И рече́ Ему́ диа́вол: Тебе́ дам власть сию́ всю и сла́ву их, я́ко мне предана́ есть, и ему́же а́ще хощу́, дам ю́.

⁷ Ты у́бо а́ще поклони́шися пре́до мно́ю, бу́дут Тебе́ вся.

⁸ И отвеща́в рече́ ему́ Иису́с: иди́ за Мно́ю, ^[80] сатана́. Пи́сано есть: поклони́шися Го́споду Бо́гу твоему́, и Тому́ еди́ному послу́жиши.

⁹ И веде́ Его́ во Иерусали́м, и поста́ви Его́ на криле́ церко́внем, и рече́ Ему́: а́ще Сын еси́ Бо́жий, ве́рзися отсю́ду до́лу.

¹⁰ Пи́сано бо есть, я́ко А́нгелом Свои́м запове́сть о Тебе́ сохрани́ти Тя,

¹¹ И на рука́х во́змут Тя, да не когда́ преткне́ши о ка́мень но́гу Твою́.

¹² И отвеща́в рече́ ему́ Иису́с, я́ко рече́но есть: не иску́сиши Го́спода Бо́га твоего́.

¹³ И сконча́в все искуше́ние диа́вол, оты́де от Него́ до вре́мене.

¹⁴ И возврати́ся Иису́с в си́ле духо́вней в Галиле́ю, и весть изы́де по всей стране́ о Нем.

¹⁵ И той уча́ше на со́нмищах их, сла́вимь все́ми.

¹⁶ И прии́де в Назаре́т, иде́же бе воспита́н. И вни́де, по обы́чаю Своему́, в день суббо́тный в со́нмище, и воста́ чести́.

¹⁷ И да́ша Ему́ кни́гу Иса́ии проро́ка, и разгну́в кни́гу, обре́те ме́сто, иде́же бе напи́сано:

¹⁸ Дух Госпо́день на Мне, Его́же ра́ди пома́за Мя благовести́ти ни́щим, посла́ Мя исцели́ти сокруше́нныя се́рдцем, пропове́дати плене́нным отпуще́ние и слепы́м прозре́ние, отпусти́ти сокруше́нныя во отра́ду.

¹⁹ Пропове́дати ле́то Госпо́дне прия́тно.

²⁰ И согну́в кни́гу, отда́в слузе́, се́де, и всем в со́нмищи о́чи бе́ху зря́ще Нань.

²¹ И нача́т глаго́лати к ним, я́ко днесь сбы́стся писа́ние сие́ во у́шию ва́шею.

²² И вси свиде́тельствоваху Ему́, и дивля́хуся о словесе́х благода́ти, исходя́щих из уст Его́, и глаго́лаху: не Сей ли есть сын Ио́сифов?

²³ И рече́ к ним: вся́ко рече́те Ми при́тчу сию́: врачу́, исцели́ся Сам, ели́ка слы́шахом бы́вшая в Капернау́ме, сотвори́ и зде во оте́чествии Свое́м.

²⁴ Рече́ же: ами́нь глаго́лю вам, я́ко ни кото́рый проро́к прия́тен есть во оте́чествии свое́м.

²⁵ Пои́стинне же глаго́лю вам: мно́ги вдови́цы бе́ша во дни Илиины́ во Изра́или, егда́ заключи́ся не́бо три ле́та и ме́сяц шесть, я́ко бысть глад вели́к по всей земли́.

²⁶ И ни ко еди́ной их по́слан бысть Илиа́, то́кмо в Саре́пту Сидо́нскую к жене́ вдови́це.

²⁷ И мно́зи прокаже́ни бе́ху при Елиссе́и проро́це во Изра́или, и ни еди́н же от них очи́стися, то́кмо Неема́н Сириани́н.

²⁸ И испо́лнишася вси я́рости в со́нмищи, слы́шавшии сия́.

²⁹ И воста́вше изгна́ша Его́ вон из гра́да, и ведо́ша Его́ до верху́ горы́, на не́йже град их со́здан бя́ше, да бы́ша Его́ низри́нули.

³⁰ Он же проше́д посреде́ их, идя́ше.

³¹ И сни́де в Капернау́м град Галиле́йский, и бе учя́ наро́ды в суббо́ты.

³² И ужаса́хуся о уче́нии Его́, я́ко со вла́стию бе сло́во Его́.

³³ И в со́нмищи бе челове́к имы́й ду́ха бе́са нечи́ста, и возопи́ гла́сом ве́лиим,

³⁴ Глаго́ля: оста́ви, что нам и Тебе́, Иису́се Назаряни́не? Прише́л еси́ погуби́ти нас, вем Тя, кто еси́, Святы́й Бо́жий.

³⁵ И запрети́ ему́ Иису́с, глаго́ля: премолчи́ и изы́ди из него́. И пове́рг его́ бес посреде́, изы́де из него́, ника́коже вреди́в его́.

³⁶ И бысть у́жас на всех, и стяза́хуся друг ко дру́гу, глаго́люще: что сло́во сие́, я́ко вла́стию и си́лою вели́т нечи́стым духово́м, и исхо́дят?

³⁷ И исхожда́ше глас о Нем во вся́ко ме́сто страны́.

³⁸ Воста́в же из со́нмища, вни́де в дом Си́монов: те́ща же Си́монова бе одержи́ма огне́м ве́лиим, и моли́ша Его́ о ней.

³⁹ И став над не́ю, запрети́ огню́, и оста́ви ю́. А́бие же воста́вши служа́ше им.

⁴⁰ Заходя́щу же со́лнцу, вси, ели́цы име́яху боля́щия неду́ги разли́чными, привожда́ху их к Нему́, Он же на еди́ном коего́ждо их ру́це возло́жь, исцеля́ше их.

⁴¹ Исхожда́ху же и бе́си от мно́гих, вопию́ще и глаго́люще, я́ко Ты еси́ Христо́с Сын Бо́жий. И запреща́я не дая́ше им глаго́лати, я́ко ве́дяху Христа́ Самаго́ су́ща.

⁴² Бы́вшу же дню, изше́д и́де в пу́сто ме́сто, и наро́ди иска́ху Его́, и приидо́ша до Него́, и держа́хуся Его́, да не бы отше́л от них.

⁴³ Он же рече́ к ним, я́ко и други́м градово́м благовести́ти Ми подоба́ет Ца́рствие Бо́жие, я́ко на се по́слан есмь.

⁴⁴ И бе пропове́дая на со́нмищах галиле́йских.

Глава 5

¹ Бысть же належа́щу Ему́ наро́ду, да бы́ша слы́шали слово Божие, и той бе стоя при езере Геннисаретсте:

² И ви́де два корабля́ стоя́ща при е́зере, ры́барие же отше́дше от нею́, измыва́ху мре́жи.

³ Влез же в еди́н от кораблю́, и́же бе Си́монов, моли́ его́ от земли́ отступи́ти ма́ло, и сед уча́ше из корабля́ наро́ды.

⁴ Я́коже преста́ глаго́ля, рече́ к Си́мону: поступи́ во глубину́, и вве́рзите мре́жи ва́ша в лови́тву.

⁵ И отвеща́в Си́мон рече́ Ему́: Наста́вниче, обно́щь всю тру́ждшеся, ничесо́же я́хом, по глаго́лу же Твоему́ вве́ргу мре́жу.

⁶ И се сотво́рше, я́ша мно́жество рыб мно́го, протерза́шеся же мре́жа их.

⁷ И поману́ша прича́стником, и́же бе́ху во друзе́м корабли́, да прише́дше помо́гут им, и приидо́ша, и испо́лниша о́ба корабля́, я́ко погружа́тися и́ма.

⁸ Ви́дев же Си́мон Петр, припаде́ к коле́нома Иису́совома, глаго́ля: изы́ди от мене́, я́ко муж гре́шен есмь, Го́споди.

⁹ У́жас бо одержа́ше его́ и вся су́щия с ним, о лови́тве рыб, я́же я́ша,

¹⁰ Та́кожде же Иа́кова и Иоа́нна сы́на Зеведе́ова, я́же бе́ста обе́щника Си́монови. И рече́ к Си́мону Иису́с: не бо́йся, отсе́ле бу́деши челове́ки ловя́.

¹¹ И извле́кше о́ба корабля́ на зе́млю, оста́вльше вся, вслед Его́ идо́ша.

¹² И бы́сть егда́ бе Иису́с во еди́ном от градо́в, и се муж испо́лнь прокаже́ния, и ви́дев Иису́са, пад ниц, моля́ся Ему́, глаго́ля: Го́споди, а́ще хо́щеши, мо́жеши мя очи́стити.

¹³ И просте́р ру́ку, косну́ его́, рек: хощу́, очи́стися. И а́бие прока́за оты́де от него́.

¹⁴ И Той запове́да ему́ никому́же пове́дати, но шед покажи́ся иере́ови, и принеси́ о очище́нии твое́м, я́коже повеле́ Моисе́й, во свиде́тельство им.

¹⁵ Прохожда́ше же па́че сло́во о Нем, и схожда́хуся наро́ди мно́зи слы́шати и цели́тися от Него́ от неду́г свои́х.

¹⁶ Той же бе отходя́ в пусты́ню и моля́ся.

¹⁷ И бысть во еди́н от дни́й, и Той бе учя: и бе́ху седя́ще фарисе́е и законоучи́телие, и́же бе́ху пришли́ от вся́кия ве́си Галиле́йския и Иуде́йския и Иерусали́мския, и си́ла Госпо́дня бе изцеля́ющи их.

¹⁸ И се му́жие нося́ще на одре́ челове́ка, и́же бе разсла́блен, и иска́ху внести́ его́ и положи́ти пред Ним.

¹⁹ И не обре́тше куде́ внести́ его́ наро́да ра́ди, взле́зше на храм, сквозе́ скуде́лы ^[81] низве́сиша его́ со одро́м на среду́ пред Иису́са.

²⁰ И ви́дев ве́ру их, рече́ ему́: челове́че, оставля́ют ти ся греси́ твои́.

²¹ И нача́ша помышля́ти кни́жницы и фарисе́е, глаго́люще: кто есть сей, и́же глаго́лет хулы́? Кто мо́жет оставля́ти грехи́, то́кмо еди́н Бог?

²² Разуме́в же Иису́с помышле́ния их, отвеща́в рече́ к ним: что помышля́ете в сердца́х ва́ших?

²³ Что́ есть удо́бее рещи́: оставля́ют ти ся греси́ твои́? Или́ рещи́: воста́ни и ходи́?

²⁴ Но да уве́сте, я́ко власть и́мать Сын Челове́ческий на земли́ отпуща́ти грехи́, рече́ разсла́бленному: тебе́ глаго́лю, воста́ни, и возми́ одр твой, и иди́ в дом твой.

²⁵ И а́бие воста́в пред ни́ми, взем, на не́мже лежа́ше, и́де в дом свой, сла́вя Бо́га.

²⁶ И у́жас прия́т вся, и сла́вляху Бо́га, и испо́лнишася стра́ха, глаго́люще, я́ко ви́дехом пресла́вная днесь.

²⁷ И посе́м изы́де, и узре́ мытаря́ и́менем Леви́ю, седя́ща на мы́тнице, и рече́ ему́: иди́ по Мне.

²⁸ И оста́вль вся, воста́в вслед Его́ и́де.

²⁹ И сотвори́ чрежде́ние ве́лие Леви́й Ему́ в дому́ свое́м, и бе наро́д мытаре́й мног, и ине́х, и́же бя́ху с ним возлежа́ще.

³⁰ И ропта́ху кни́жницы на Него́ и фарисе́е, ко ученико́м Его́ глаго́люще: почто́ с мытари́ и гре́шники я́сте и пие́те?

³¹ И отвеща́в Иису́с рече́ к ним: не тре́буют здра́вии врача́, но боля́щии.

³² Не приидо́х призва́ти пра́ведных, но гре́шныя в покая́ние.

³³ Они́ же ре́ша к Нему́: почто́ ученицы́ Иоа́нновы постя́тся ча́сто и моли́твы творя́т, та́кожде и фарисе́йстии, а Твои́ ядя́т и пию́т?

³⁴ Он же рече́ к ним: еда́ мо́жете сы́ны бра́чныя, до́ндеже жени́х с ни́ми есть, сотвори́ти пости́тися?

³⁵ Прии́дут же дни́е, егда́ отъя́т бу́дет от них жени́х, и тогда́ постя́тся в ты́я дни.

³⁶ Глаго́лаше же и при́тчу к ним, я́ко никто́же приставле́ния ри́зы но́вы приставля́ет на ри́зу ве́тху, а́ще ли же ни, и но́вую раздере́т, и ве́тсей не согласу́ет е́же от но́ваго.

³⁷ И никто́же влива́ет вина́ но́ва в ме́хи ве́тхи, а́ще ли же ни, расто́ргнет но́вое вино́ ме́хи, и са́мо излие́тся, и ме́си поги́бнут,

³⁸ Но вино́ но́вое в ме́хи но́вы влива́ти, ^[82] и обое́ соблюде́тся.

³⁹ И никто́же пив ве́тхое, а́бие хо́щет но́вому, глаго́лет бо: ве́тхое лу́чше есть.

Глава 6

¹ Бысть же в суббо́ту сквозе́ се́яния, и восторга́ху ученицы́ Его́ кла́сы, и ядя́ху, стира́юще рука́ми.

² Не́цыи же от фарисе́й ре́ша им: что твори́те, его́же не досто́ит твори́ти в суббо́ты?

³ И отвеща́в Иису́с рече́ к ним: ни ли сего́ чли есте́, е́же сотвори́ Дави́д, егда́ взалка́ся сам и и́же с ним су́щии?

⁴ Ка́ко вни́де в дом Бо́жий, и хле́бы предложе́ния взем, и яде́, и даде́ и су́щим с ним, и́хже не досто́яше я́сти, то́кмо еди́нем иере́ем?

⁵ И глаго́лаше им, я́ко госпо́дь есть Сын Челове́ческий и суббо́те.

⁶ Бысть же и в другу́ю суббо́ту вни́ти Ему́ в со́нмище и учи́ти, и бе та́мо челове́к, и рука́ ему́ десна́я бе суха́.

⁷ Назира́ху же кни́жницы и фарисе́и, а́ще в суббо́ту исцели́т, да обря́щут речь Нань.

⁸ Он же ве́дяше помышле́ния их и рече́ челове́ку иму́щему су́ху ру́ку: воста́ни и ста́ни посреде́. Он же воста́в ста.

⁹ Рече́ же Иису́с к ним: вопрошу́ вы, что досто́ит в суббо́ты, добро́ твори́ти, или́ зло твори́ти? Ду́шу спасти́, или́ погуби́ти? Они́ же умолча́ша.

¹⁰ И воззре́в на вся их, рече́ ему́: простри́ ру́ку твою́. Он же сотвори́ та́ко, и утверди́ся рука́ его́ здра́ва я́ко друга́я.

¹¹ Они́ же испо́лнишася безу́мия и глаго́лаху друг ко дру́гу, что́ бы́ша сотвори́ли Иису́сови.

¹² Бысть же во дни ты́я, изы́де Иису́с в го́ру помоли́тися, и бе обно́щь в моли́тве Бо́жии.

¹³ И егда́ бысть день, призва́ ученики́ Своя́, и избра́ от них двана́десяте, и́хже и Апо́столы нарече́:

¹⁴ Си́мона, его́же именова́ Петра́, и Андре́а бра́та его́, Иа́кова и Иоа́нна, Фили́ппа и Варфоломе́а,

¹⁵ Матфе́а и Фому́, Иа́кова Алфе́ева и Си́мона нарица́емаго Зило́та,

¹⁶ Иу́ду Иа́ковля, и Иу́ду Искарио́тскаго, и́же и бысть преда́тель.

¹⁷ Изше́д с ни́ми, ста на ме́сте ра́вне, и наро́д учени́к Его́, и мно́жество мно́го люде́й от всея́ Иуде́и и Иерусали́ма, и помо́рия Ти́рска и Сидо́нска,

¹⁸ И́же приидо́ша послу́шати Его́ и исцели́тися от неду́г свои́х, и стра́ждущии от дух нечи́стых, и исцеля́хуся.

¹⁹ И весь наро́д иска́ше прикаса́тися Ему́, я́ко си́ла от Него́ исхожда́ше и исцеля́ше вся.

²⁰ И той возве́д о́чи свои́ на ученики́ своя́, глаго́лаше: блаже́ни ни́щии ду́хом, я́ко ва́ше есть Ца́рствие Бо́жие.

²¹ Блаже́ни, а́лчущии ны́не, я́ко насы́титеся. Блаже́ни, пла́чущии ны́не, я́ко возсмее́теся.

²² Блаже́ни бу́дете, егда́ возненави́дят вас челове́цы, и егда́ разлуча́т вы и поно́сят, и пронесу́т и́мя ва́ше я́ко зло, Сы́на Челове́ческаго ра́ди.

²³ Возра́дуйтеся в той день и взыгра́йте, се бо мзда ва́ша мно́га на небеси́. По сим бо творя́ху проро́ком отцы́ их.

²⁴ Оба́че го́ре вам бога́тым, я́ко отстоите́ утеше́ния ва́шего. ^[83]

²⁵ Го́ре вам, насыще́ннии ны́не, я́ко вза́лчете. Го́ре вам смею́щимся ны́не, я́ко возрыда́ете и воспла́чете.

²⁶ Го́ре, егда́ до́бре реку́т вам вси челове́цы. По сим бо творя́ху лжепроро́ком отцы́ их.

²⁷ Но вам глаго́лю слы́шащим: люби́те враги́ ва́ша, добро́ твори́те ненави́дящим вас,

²⁸ Благослови́те клену́щия вы, и моли́теся за творя́щих вам оби́ду.

²⁹ Бию́щему тя в лани́ту, пода́ждь и другу́ю, и от взима́ющаго ти ри́зу, и срачи́цу не возбрани́.

³⁰ Вся́кому же прося́щему у тебе́ дай, и от взима́ющаго твоя́ не истязу́й.

³¹ И я́коже хо́щете да творя́т вам челове́цы, и вы твори́те им та́кожде.

³² И а́ще лю́бите лю́бящия вы, ка́я вам благода́ть есть? И́бо и гре́шницы лю́бящия их лю́бят.

³³ И а́ще благотворите́ благотворя́щим вам, ка́я вам благода́ть есть? И́бо и гре́шницы то́жде творя́т.

³⁴ И а́ще взаи́м даете́, от ни́хже ча́ете восприя́ти, ка́я вам благода́ть есть, и́бо и гре́шницы гре́шником взаи́м дава́ют, да восприи́мут ра́вная.

³⁵ Оба́че люби́те враги́ ва́ша, и благотвори́те, и взаи́м да́йте, ничесо́же ча́юще, и бу́дет мзда ва́ша мно́га, и бу́дете сы́нове Вы́шняго, я́ко Той благ есть на безблагода́тныя ^[84] и злы́я.

³⁶ Бу́дите у́бо милосе́рди, я́коже и Оте́ц ваш милосе́рд есть.

³⁷ И не суди́те, и не су́дят вам, и не осужда́йте, да не осужде́ни бу́дете, отпуща́йте, и отпу́стят вам.

³⁸ Да́йте, и да́стся вам, ме́ру добру́, натка́ну и потря́сну и прелива́ющуся дадя́т на ло́но ва́ше, то́ю бо ме́рою, е́юже ме́рите, возме́рится вам.

³⁹ Рече́ же при́тчу им: еда́ мо́жет слепе́ц слепца́ води́ти? Не о́ба ли в я́му впаде́тася?

⁴⁰ Несть учени́к над учи́телем свои́м, соверше́н же всяк бу́дет, я́коже и учи́тель его́.

⁴¹ Что же ви́диши суче́ц, и́же есть во очеси́ бра́та твоего́, бервна́ же, е́же есть во очеси́ твое́м, не чу́еши?

⁴² Или́ ка́ко мо́жеши рещи́ бра́ту твоему́: бра́те, оста́ви, да изму́ суче́ц, и́же есть во очеси́ твое́м, сам су́щаго во очеси́ твое́м бервна́ не ви́дя? Лицеме́ре, изми́ пе́рвее бервно́ из очесе́ твоего́, и тогда́ про́зриши изъя́ти суче́ц из очесе́ бра́та твоего́.

⁴³ Несть бо дре́во добро́, творя́ плода́ зла, ниже́ дре́во зло, творя́ плода́ добра́.

⁴⁴ Вся́ко бо дре́во от плода́ своего́ позна́ется, не от те́рния бо че́шут смо́квы, ни от купины́ е́млют гро́здия.

⁴⁵ Благи́й челове́к от блага́го сокро́вища се́рдца своего́ изно́сит благо́е, и злый челове́к от зла́го сокро́вища се́рдца своего́ изно́сит зло́е, от избы́тка бо се́рдца глаго́лют уста́ его́.

⁴⁶ Что́ же Мя зовете́, Го́споди, Го́споди, и не твори́те, я́же глаго́лю?

⁴⁷ Всяк гряды́й ко Мне и слы́шай словеса́ Моя́ и творя́ я́, скажу́ вам, кому́ есть подо́бен.

⁴⁸ Подо́бен есть челове́ку зи́ждущу хра́мину, и́же ископа́ и углуби́, и положи́ основа́ние на ка́мени, наводне́нию же бы́вшу, припаде́ река́ ко хра́мине той, и не мо́же поколеба́ти ея́, основана́ бо бе́ на ка́мени.

⁴⁹ Слы́шавый же и не сотвори́вый подо́бен есть челове́ку созда́вшему хра́мину на земли́ без основа́ния, е́йже припаде́ река́, и а́бие паде́ся, и бысть разруше́ние хра́мины тоя́ ве́лие.

Глава 7

¹ Егда́ же сконча́ вся глаго́лы Своя́ в слу́хи лю́дем, вни́де в Капернау́м.

² Со́тнику же не́коему раб боля́ зле, хотя́ше ^[85] умре́ти, и́же бе ему́ че́стен.

³ Слы́шав же о Иису́се посла́ к Нему́ ста́рцы иуде́йския, моля́ Его́, я́ко да прише́д спасе́т раба́ его́.

⁴ Они́ же прише́дше ко Иису́сови, моля́ху Его́ то́щно, глаго́люще, я́ко досто́ин есть, е́же а́ще да́си ему́,

⁵ Лю́бит бо язы́к наш, и со́нмище той созда́ нам.

⁶ Иису́с же идя́ше с ни́ми. Еще́ же Ему́ не дале́че су́щу от хра́мины, посла́ к Нему́ со́тник дру́ги, глаго́ля Ему́: Го́споди, не дви́жися, несмь бо досто́ин, да под кров мой вни́деши.

⁷ Те́мже ни себе́ досто́йна сотвори́х приити́ к Тебе́, но рцы сло́во, и исцеле́ет о́трок мой.

⁸ И́бо и аз челове́к есмь под влады́кою учине́н, име́я под собо́ю во́ины, и глаго́лю сему́: иди́, и и́дет, и друго́му: прииди́, и прии́дет, и рабу́ моему́: сотвори́ сие́, и сотвори́т.

⁹ Слы́шав же сия́ Иису́с, чуди́ся ему́, и обра́щься иду́щему по Нем наро́ду рече́: глаго́лю вам, ни во Изра́или толи́ки ве́ры обрето́х.

¹⁰ И возвра́щшеся по́сланнии обрето́ша боля́щаго раба́ исцеле́вша.

¹¹ И бысть посе́м, идя́ше Иису́с во град, нарица́емый Наи́н, и с Ним идя́ху ученицы́ Его́ мно́зи и наро́д мног.

¹² Я́коже прибли́жися ко врато́м гра́да, и се изноша́ху уме́рша, сы́на единоро́дна ма́тери свое́й, и та бе вдова́, и наро́д от гра́да мног с не́ю.

¹³ И ви́дев ю́ Госпо́дь, милосе́рдова о ней, и рече́ ей: не пла́чи.

¹⁴ И присту́пль косну́ся во одр, нося́щии же ста́ша. И рече́: ю́ноше, тебе́ глаго́лю, воста́ни.

¹⁵ И се́де ме́ртвый, и нача́т глаго́лати, и даде́ его́ ма́тери его́.

¹⁶ Прия́т же страх вся, и сла́вляху Бо́га, глаго́люще: я́ко проро́к ве́лий воста́ в нас, и я́ко посети́ Бог люде́й Свои́х.

¹⁷ И изы́де сло́во о Иису́се по всей Иуде́и, и по всей стране́.

¹⁸ И возвести́ша Иоа́нну ученицы́ его́ о всех сих. И призва́в два не́кая от учени́к свои́х Иоа́нн,

¹⁹ Посла́ ко Иису́су, глаго́ля: Ты ли еси́ Гряды́й, или́ ино́го ча́ем?

²⁰ Прише́дша же к Нему́ му́жа, ре́ста: Иоа́нн Крести́тель посла́ нас к Тебе́, глаго́ля: Ты ли еси́ Гряды́й, или́ ино́го ча́ем,

²¹ В Той же час исцели́ мно́ги от неду́г и ран и дух злых и мно́гим слепы́м дарова́ прозре́ние.

²² И отвеща́в Иису́с рече́ и́ма: ше́дша возвести́та Иоа́нну, я́же ви́деста и слы́шаста, я́ко слепи́и прозира́ют, хро́мии хо́дят, прокаже́ннии очища́ются, глуси́и слы́шат, ме́ртвии востаю́т, ни́щии благовеству́ют.

²³ И блаже́н есть, и́же а́ще не соблазни́тся о Мне.

²⁴ Отше́дшема же ученико́ма Иоа́нновома, нача́т глаго́лати к наро́дом о Иоа́нне: чесо́ изыдо́сте в пусты́ню ви́дети, трость ли ве́тром коле́блемь?

²⁵ Но чесо́ изыдо́сте ви́дети? Челове́ка ли в мя́гки ри́зы оде́яна? Се, и́же во оде́жди сла́вней и пи́щи су́щии, во ца́рствии ^[86] суть.

²⁶ Но чесо́ изыдо́сте ви́дети? Проро́ка ли? Ей, глаго́лю вам, и ли́шше проро́ка.

²⁷ Сей бо есть, о не́мже пи́сано есть: се Аз послю́ А́нгела Моего́ пред лице́м Твои́м, и́же устро́ит путь Твой пред Тобо́ю.

²⁸ Глаго́лю бо вам: бо́лий в рожде́нных жена́ми проро́к Иоа́нна Крести́теля никто́же есть, мний же во Ца́рствии Бо́жии бо́лий его́ есть.

²⁹ И вси лю́дие слы́шавше и мытари́е оправди́ша Бо́га, кре́щшеся креще́нием Иоа́нновым.

³⁰ Фарисе́е же и зако́нницы сове́т Бо́жий отверго́ша в себе́, не кре́щшеся от него́.

³¹ Рече́ же Госпо́дь: кому́ уподо́блю челове́ки ро́да сего́, и кому́ суть подо́бни?

³² Подо́бни суть о́трочищем седя́щим на то́ржищих, и приглаша́ющим друг дру́га, и глаго́лющим: писка́хом вам, и не пляса́сте, рыда́хом вам, и не пла́касте.

³³ Прии́де бо Иоа́нн Крести́тель ни хле́ба яды́й, ни вина́ пия́, и глаго́лете: бе́са и́мать.

³⁴ Прии́де Сын Челове́ческий яды́й и пия́, и глаго́лете: сей челове́к я́дца и винопи́йца, друг мытаре́м и гре́шником.

³⁵ И оправди́ся прему́дрость от чад свои́х всех.

³⁶ Моля́ше же Его́ не́кий от фарисе́й, да бы ял с ним, и вшед в дом фарисе́ов, возлеже́.

³⁷ И се жена́ во гра́де, я́же бе гре́шница, и уве́девши, я́ко возлежи́т во хра́мине фарисе́ове, прине́сши алава́стр мν́ра,

³⁸ И ста́вши при ногу́ Его́ созади́, пла́чущися, нача́т умыва́ти но́зе Его́ слеза́ми, и власы́ главы́ своея́ отира́ше, и облобыза́ше но́зе Его́, и ма́заше мν́ром.

³⁹ Ви́дев же фарисе́й возва́вый Его́, рече́ в себе́, глаго́ля: Сей а́ще бы был проро́к, ве́дел бы, кто и какова́ жена́ прикаса́ется Ему́, я́ко гре́шница есть.

⁴⁰ И отвеща́в Иису́с рече́ к нему́: Си́моне, и́мам ти не́что рещи́. Он же рече́: Учи́телю, рцы. Иису́с же рече́:

⁴¹ Два должника́ бе́ста заимода́вцу не́коему, еди́н бе до́лжен пятию́сот дина́рий, други́й же пятию́десят.

⁴² Не иму́щема же и́ма возда́ти, обе́ма отда́. ^[87] Кото́рый у́бо ею́, рцы, па́че возлю́бит его́?

⁴³ Отвеща́в же Си́мон рече́: мню, я́ко ему́же вя́щше отда́. ^[88] Он же рече́ ему́: пра́во суди́л еси́.

⁴⁴ И обра́щься к жене́, Си́монови рече́: ви́диши ли сию́ жену́? Внидо́х в дом твой, воды́ на но́зе Мои́ не даде́, сия́ же слеза́ми облия́ Ми но́зе и власы́ главы́ своея́ отре́.

⁴⁵ Лобза́ния Ми не даде́, сия́ же, отне́лиже внидо́х, не преста́ облобыза́ющи Ми но́зе.

⁴⁶ Ма́слом главы́ Моея́ не пома́за, сия́ же мν́ром пома́за Ми но́зе.

⁴⁷ Его́же ра́ди, глаго́лю ти, отпуща́ются греси́ ея́ мно́зи, я́ко возлюби́ мно́го, а ему́же ма́ло оставля́ется, ме́ньше лю́бит.

⁴⁸ Рече́ же ей: отпуща́ются тебе́ греси́.

⁴⁹ И нача́ша возлежа́щии с Ним глаго́лати в себе́: кто Сей есть, и́же и грехи́ отпуща́ет?

⁵⁰ Рече́ же к жене́: ве́ра твоя́ спасе́ тя, иди́ в ми́ре.

Глава 8

¹ И бысть посе́м, и той прохожда́ше сквозе́ гра́ды и ве́си, пропове́дуя и благовеству́я Ца́рствие Бо́жие, и обана́десяте с Ним.

² И жены́ не́кия, я́же бя́ху исцеле́ны от духо́в злых и неду́г, Мари́а нарица́емая Магдали́на, из нея́же бесо́в седмь изы́де,

³ И Иоа́нна жена́ Хуза́ня, приста́вника И́родова, и Суса́нна, и и́ны мно́ги, я́же служа́ху Ему́ от име́ний свои́х.

⁴ Разумева́ющу же наро́ду мно́гу, и от всех градо́в гряду́щим к Нему́, рече́ при́тчу:

⁵ Изы́де се́яй се́яти се́мене своего́, и егда́ се́яше, о́во паде́ при пути́, и попра́но бысть, и пти́цы небе́сныя позоба́ша е́.

⁶ А друго́е паде́ на ка́мени, и прозя́б у́сше, зане́ не име́яше вла́ги.

⁷ И друго́е паде́ посреде́ те́рния, и возрасте́ те́рние, и подави́ е́.

⁸ Друго́е же паде́ на земли́ бла́зе, и прозя́б сотвори́ плод стори́цею. Сия́ глаго́ля, возгласи́: име́яй у́ши слы́шати, да слы́шит.

⁹ Вопроша́ху же Его́ ученицы́ Его́, глаго́люще: что есть при́тча сия́?

¹⁰ Он же рече́: вам есть дано́ ве́дати та́йны Ца́рствия Бо́жия, про́чим же в при́тчах, да ви́дяще не ви́дят и слы́шаще не разуме́ют.

¹¹ Есть же сия́ при́тча: се́мя есть сло́во Бо́жие.

¹² А и́же при пути́, суть слы́шащии, пото́м же прихо́дит диа́вол и взе́млет сло́во от се́рдца их, да не ве́ровавше спасу́тся,

¹³ А и́же на ка́мени, и́же егда́ услы́шат, с ра́достию прие́млют сло́во, и си́и ко́рене не и́мут, и́же во вре́мя ве́руют, и во вре́мя напа́сти отпа́дают.

¹⁴ А е́же в те́рнии па́дшее, си́и суть слы́шавшии, и от печа́ли и бога́тства и сластьми́ жите́йскими ходя́ще подавля́ются, и не сверша́ют плода́.

¹⁵ А и́же на до́брей земли́, си́и суть, и́же до́брым се́рдцем и благи́м слы́шавше сло́во, держа́т и плод творя́т в терпе́нии. Сия́ глаго́ля, возгласи́: име́яй у́ши слы́шати, да слы́шит.

¹⁶ Никто́же у́бо свети́льника вжег, покрыва́ет его́ сосу́дом, или́ под одр подлага́ет, но на све́щник возлага́ет, да входя́щии ви́дят свет.

¹⁷ Несть бо та́йно, е́же не явле́но бу́дет, ниже́ утае́но, е́же не позна́ется и в явле́ние прии́дет.

¹⁸ Блюди́теся у́бо, ка́ко слы́шите, и́же бо и́мать, да́стся ему́, и и́же а́ще не и́мать, и е́же мни́тся име́я, во́змется от него́.

¹⁹ Приидо́ша же к Нему́ Ма́ти и бра́тия Его́, и не можа́ху бесе́довати к Нему́ наро́да ра́ди.

²⁰ И возвести́ша Ему́, глаго́люще: Ма́ти Твоя́ и бра́тия Твоя́ вне стоя́т, ви́дети Тя хотя́ще.

²¹ Он же отвеща́в рече́ к ним: ма́ти Моя́ и бра́тия Моя́ си́и суть, слы́шащии сло́во Бо́жие, и творя́ще е́.

²² И бысть во еди́н от дни́й, Той вле́зе в кора́бль и ученицы́ Его́, и рече́ к ним: пре́йдем на он пол е́зера. И поидо́ша.

²³ Иду́щим же им, у́спе. И сни́де бу́ря ве́треная в е́зеро, и скончава́хуся и в беде́ бе́ху.

²⁴ И присту́пльше воздвиго́ша Его́, глаго́люще: Наста́вниче, Наста́вниче, погиба́ем. Он же воста́в запрети́ ве́тру и волне́нию водно́му, и улего́ста, и бысть тишина́.

²⁵ Рече́ же им: где есть ве́ра ва́ша? Убоя́вшеся же чуди́шася, глаго́люще друг ко дру́гу: кто у́бо Сей есть, я́ко и ве́тром повелева́ет и воде́, и послу́шают Его́?

²⁶ И преидо́ша во страну́ Гадари́нску, я́же есть об он пол Галиле́и.

²⁷ Изше́дшу же Ему́ на зе́млю, сре́те Его́ муж не́кий от гра́да, и́же имя́ше бе́сы от лет мно́гих, и в ри́зу не облача́шеся, и во хра́ме не живя́ше, но во гробе́х.

²⁸ Узре́в же Иису́са и возопи́в, припаде́ к Нему́, и гла́сом ве́лиим рече́: что мне и Тебе́, Иису́се Сы́не Бо́га Вы́шняго? Молю́ся Ти, не му́чи мене́.

²⁹ Повеле́ у́бо ду́хови нечи́стому изы́ти от челове́ка, от мног бо лет восхища́ше его́, и вяза́ху его́ у́зы желе́зны и пу́ты, стрегу́ще его́, и растерза́я у́зы, гони́мь быва́ше бе́сом сквозе́ пусты́ни.

³⁰ Вопроси́ же его́ Иису́с, глаго́ля: что ти есть и́мя? Он же рече́: легео́н, я́ко бе́си мно́зи внидо́ша вонь.

³¹ И моля́ху Его́, да не повели́т им в бе́здну ити́.

³² Бе же ту ста́до свине́й мно́го пасо́мо в горе́, и моля́ху Его́, да повели́т им в ты вни́ти. И повеле́ им.

³³ Изше́дше же бе́си от челове́ка, внидо́ша во свиния́, и устреми́ся ста́до по бре́гу в е́зеро, и истопе́.

³⁴ Ви́девше же пасу́щии бы́вшее, бежа́ша, и возвести́ша во гра́де и в се́лех.

³⁵ Изыдо́ша же ви́дети бы́вшее, и приидо́ша ко Иису́сови и обрето́ша челове́ка седя́ща, из него́же бе́си изыдо́ша, оболче́на и смы́сляща, при ногу́ Иису́сову, и убоя́шася.

³⁶ Возвести́ша же им ви́девшии, ка́ко спасе́ся беснова́вый.

³⁷ И моли́ Его́ весь наро́д страны́ Гадари́нския отити́ от них, я́ко стра́хом ве́лиим одержи́ми бе́ху. Он же влез в кора́бль, возврати́ся.

³⁸ Моля́шеся же Ему́ муж, из него́же изыдо́ша бе́си, дабы́ с Ним был. Отпусти́ же его́ Иису́с, глаго́ля:

³⁹ Возврати́ся в дом твой и пове́дай, ели́ка ти сотвори́ Бог. И и́де, по всему́ гра́ду пропове́дая, ели́ка сотвори́ ему́ Иису́с.

⁴⁰ Бысть же егда́ возврати́ся Иису́с, прия́т Его́ наро́д: бе́ху бо вси ча́юще Его́.

⁴¹ И се, прии́де муж, ему́же и́мя Иаи́р, и той князь со́нмищу бе, и пад при ногу́ Иису́сову, моля́ше Его́ вни́ти в дом свой,

⁴² Я́ко дщи единоро́дна бе ему́, я́ко лет двоюна́десяте, и та умира́ше. Егда́ же идя́ше, наро́ди угнета́ху Его́.

⁴³ И жена́ су́щи в точе́нии кро́ве от двоюна́десяте ле́ту, я́же враче́м изда́вши все име́ние, и не возмо́же ни от еди́наго исцеле́ти,

⁴⁴ И присту́пльши созади́, косну́ся кра́я риз Его́, и а́бие ста ток кро́ве ея́.

⁴⁵ И рече́ Иису́с: кто есть косну́выйся Мне? Отмета́ющимся же всем, рече́ Петр и и́же с Ним: Наста́вниче, наро́ди одержа́т Тя и гнету́т, и глаго́леши: кто есть косну́выйся Мне?

⁴⁶ Иису́с же рече́: прикосну́ся Мне не́кто, Аз бо чух си́лу изше́дшую из Мене́.

⁴⁷ Ви́девши же жена́, я́ко не утаи́ся, трепе́щущи прии́де, и па́дши пред Ним, за ню́же вину́ прикосну́ся Ему́, пове́да Ему́ пред все́ми людьми́, и я́ко исцеле́ а́бие.

⁴⁸ Он же рече́ ей: дерза́й дщи, ве́ра твоя́ спасе́ тя, иди́ в ми́ре.

⁴⁹ Еще́ Ему́ глаго́лющу, прии́де не́кий от архисинаго́га, глаго́ля ему́, я́ко у́мре дщи твоя́, не дви́жи Учи́теля.

⁵⁰ Иису́с же слы́шав отвеща́ ему́, глаго́ля: не бо́йся, то́кмо ве́руй, и спасе́на бу́дет.

⁵¹ Прише́д же в дом, не оста́ви ни еди́наго вни́ти, то́кмо Петра́ и Иоа́нна и Иа́кова, и отца́ отрокови́цы, и ма́тере.

⁵² Пла́кахуся же вси и рыда́ху ея́. Он же рече́: не пла́читеся, не у́мре бо, но спит.

⁵³ И руга́хуся Ему́, ве́дяще, я́ко у́мре.

⁵⁴ Он же изгна́в вон всех, и ем за ру́ку ея́, возгласи́, глаго́ля: отрокови́це, воста́ни.

⁵⁵ И возврати́ся дух ея́, и воскре́се а́бие, и повеле́ да́ти ей я́сти.

⁵⁶ И диви́стася роди́теля ея́. Он же повеле́ и́ма никому́же пове́дати бы́вшее.

Глава 9

¹ Созва́в же обана́десяте, даде́ им си́лу и власть на вся бе́сы, и неду́ги цели́ти.

² И посла́ их пропове́дати Ца́рствие Бо́жие и исцели́ти боля́щия.

³ И рече́ к ним: ничесо́же возьми́те на путь, ни жезла́, ни пи́ры, ни хле́ба, ни сребра́, ни по двема́ ри́зама име́ти.

⁴ И во́ньже дом вни́дете, ту пребыва́йте, и отту́ду исходи́те.

⁵ И ели́цы а́ще не прие́млют вас, исходя́ще от гра́да того́, и прах от ног ва́ших оттряси́те, во свиде́тельство на ня.

⁶ Исходя́ще же прохожда́ху сквозе́ ве́си, благовеству́юще и исцеля́юще всю́ду.

⁷ Слы́шав И́род четвертовла́стник о Иису́се быва́ющая от Него́ вся и недоумева́шеся, зане́ глаго́лемо бе от не́ких, я́ко Иоа́нн воста́ от ме́ртвых,

⁸ От ине́х же, я́ко Илиа́ яви́ся, от други́х же, я́ко проро́к еди́н от дре́вних воскре́се.

⁹ И рече́ И́род: Иоа́нна аз усе́кнух, кто же есть Сей, о Не́мже аз слы́шу такова́я? И иска́ше ви́дети Его́.

¹⁰ И возвра́щшеся Апо́столи пове́даша Ему́, ели́ка сотвори́ша, и пои́м их, оты́де еди́н ^[89] на ме́сто пу́сто гра́да, нарица́емаго Вифсаи́да.

¹¹ Народи́ же разуме́вше, по Нем идо́ша, и прие́м их, глаго́лаше им о Ца́рствии Бо́жии и тре́бующия исцеле́ния целя́ше.

¹² День же нача́т прекланя́тися. Присту́пльше же обана́десяте реко́ша Ему́: отпусти́ наро́д, да ше́дше во окре́стныя ве́си и се́ла вита́ют и обря́щут бра́шно, я́ко зде в пу́сте ме́сте есмы́.

¹³ Рече́ же к ним: дади́те им вы я́сти. Они́ же ре́ша: несть у нас вя́щше, то́кмо пять хлеб и ры́бе две, а́ще у́бо не ше́дше мы ку́пим во вся лю́ди сия́ бра́шна.

¹⁴ Бе́ху бо муже́й я́ко пять ты́сящ. Рече́ же ко ученико́м Свои́м: посади́те их на ку́пы по пяти́десят.

¹⁵ И сотвори́ша та́ко, и посади́ша их вся.

¹⁶ Прии́м же пять хлеб и о́бе ры́бе, воззре́в на не́бо, благослови́ их, и сломи́, и дая́ше ученико́м предложи́ти наро́ду.

¹⁷ И ядо́ша, и насы́тишася вси, и взя́ша избы́вшия им укру́хи ко́шя двана́десяте.

¹⁸ И бысть егда́ моля́шеся еди́н, с Ним бе́ху ученицы́, и вопроси́ их, глаго́ля: кого́ Мя глаго́лют наро́ди бы́ти?

¹⁹ Они́ же отвеща́вше ре́ша: Иоа́нна Крести́теля, ини́и же Илию́, друзи́и же, я́ко проро́к не́кий от дре́вних воскре́се.

²⁰ Рече́ же им: вы же кого́ Мя глаго́лете бы́ти? Отвеща́в же Петр рече́: Христа́ Бо́жия.

²¹ Он же запре́щь им, повеле́ никому́же глаго́лати сего́,

²² Рек, я́ко подоба́ет Сы́ну Челове́ческому мно́го пострада́ти, и искуше́ну ^[90] бы́ти от ста́рец и архиере́й и кни́жник, и убие́ну бы́ти, и в тре́тий день воста́ти.

²³ Глаго́лаше же ко всем: а́ще кто хо́щет по Мне ити́, да отве́ржется себе́, и во́змет крест свой, и после́дует Ми.

²⁴ И́же бо а́ще хо́щет ду́шу свою́ спасти́, погуби́т ю́, а и́же погуби́т ду́шу свою́ Мене́ ра́ди, сей спасе́т ю́.

²⁵ Что бо по́льзует челове́к приобре́т міръ весь, себе́ же погуби́в или́ отщети́в?

²⁶ И́же бо а́ще постыди́тся Мене́ и Мои́х слове́с, сего́ Сын Челове́ческий постыди́тся, егда́ прии́дет во сла́ве Свое́й и О́тчей и святы́х А́нгел.

²⁷ Глаго́лю же вам вои́стинну: суть не́цыи от зде стоя́щих, и́же не и́мут вкуси́ти сме́рти, до́ндеже ви́дят Ца́рствие Бо́жие.

²⁸ Бысть же по словесе́х сих я́ко дний осмь, и пое́м Иису́с Петра́, и Иоа́нна, и Иа́кова, взы́де на гору́ помоли́тися.

²⁹ И бысть, егда́ моля́шеся, виде́ние лица́ Его́ и́но, и одея́ние Его́ бело́ блиста́яся.

³⁰ И се му́жа два с Ним глаго́люща, я́же бе́ста Моисе́й и Илиа́,

³¹ Я́вльшася во сла́ве, глаго́ласта же исхо́д Его́, и́же хотя́ше сконча́ти во Иерусали́ме.

³² Петр же, и су́щии с ним, бя́ху отягче́ни сном, убу́ждшеся же ви́деша сла́ву Его́, и о́ба му́жа стоя́ща с Ним.

³³ И бысть, егда́ разлучи́стася от Него́, рече́ Петр ко Иису́су: Наста́вниче, добро́ есть нам зде бы́ти, и сотвори́м се́ни три, еди́ну Тебе́, и еди́ну Моисе́ови, и еди́ну Илии́, не ве́дый, е́же глаго́лаше.

³⁴ Се же ему́ глаго́лющу, бысть о́блак, и осени́ их, убоя́шася же, вше́дшим им во о́блак.

³⁵ И глас бысть из о́блака, глаго́ля: Сей есть Сын Мой Возлю́бленный, Того́ послу́шайте.

³⁶ И егда́ бысть глас, обре́теся Иису́с еди́н, и ти́и умолча́ша, и никому́же возвести́ша в ты́я дни ничесо́же от тех, я́же ви́деша.

³⁷ Бысть же в про́чий день, сше́дшим им с горы́, сре́те Его́ наро́д мног.

³⁸ И се муж из наро́да возопи́, глаго́ля: Учи́телю, молю́ Ти ся, при́зри на сы́на моего́, я́ко единоро́ден ми есть,

³⁹ И се дух е́млет его́, и внеза́пу вопие́т, и пружа́ется ^[91] с пе́нами, и едва́ отхо́дит от него́, сокруша́я его́,

⁴⁰ И моли́хся ученико́м Твои́м, да иждену́т его́, и не возмого́ша.

⁴¹ Отвеща́в же Иису́с рече́: о, ро́де неве́рный и развраще́нный, доко́ле бу́ду в вас и терплю́ вы? Приведи́ Ми сы́на твоего́ се́мо.

⁴² Еще́ же гряду́щу ему́, пове́рже его́ бес и стрясе́. Запрети́ же Иису́с ду́хови нечи́стому, и исцели́ о́трока, и вдаде́ его́ отцу́ его́.

⁴³ Дивля́хуся же вси о вели́чии Бо́жии. Всем же чудя́щимся о всех, я́же творя́ше Иису́с, рече́ ко ученико́м свои́м:

⁴⁴ Вложи́те вы во у́ши ва́ши словеса́ сия́: Сын бо Челове́ческий и́мать преда́тися в ру́це челове́честе.

⁴⁵ Они́ же не разуме́ша глаго́ла сего́, бе бо прикрове́н от них, да не ощутя́т его́, и боя́хуся вопроси́ти Его́ о глаго́ле сем.

⁴⁶ Вни́де же помышле́ние в них, кто их вя́щший бы был.

⁴⁷ Иису́с же ве́дый помышле́ние серде́ц их, прие́м отроча́, поста́ви е́ у Себе́

⁴⁸ И рече́ им: и́же а́ще прии́мет сие́ отроча́ во и́мя Мое́, Мене́ прие́млет, и и́же а́ще Мене́ прие́млет, прие́млет Посла́вшаго Мя, и́же бо ме́ньший есть в вас, сей есть вели́к.

⁴⁹ Отвеща́в же Иоа́нн рече́: Наста́вниче, ви́дехом не́коего о и́мени Твое́м изгоня́ща бе́сы, и возбрани́хом ему́, я́ко вслед не хо́дит с на́ми.

⁵⁰ И рече́ к нему́ Иису́с: не брани́те, и́же бо несть на вы, по вас есть.

⁵¹ Бысть же егда́ скончава́хуся дни́е восхожде́нию Его́, и Той утверди́ лице́ Свое́ ити́ во Иерусали́м.

⁵² И посла́ ве́стники пред лице́м Свои́м, и изше́дше внидо́ша в весь Самаря́нску, я́ко да угото́вят Ему́.

⁵³ И не прия́ша Его́, я́ко лице́ Его́ бе гряды́й во Иерусали́м.

⁵⁴ Ви́девша же ученика́ Его́ Иа́ков и Иоа́нн, ре́ста: Го́споди, хо́щеши ли, рече́ма, да огнь сни́дет с небесе́ и потреби́т их, я́коже и Илиа́ сотвори́?

⁵⁵ Обра́щься же запрети́ и́ма, и рече́: не ве́ста, ко́его ду́ха еста́ вы.

⁵⁶ Сын бо Челове́ческий не прии́де душ челове́ческих погуби́ти, но спасти́. И идо́ша во и́ну весь.

⁵⁷ Бысть же иду́щим им по пути́, рече́ не́кий к Нему́: иду́ по Тебе́, а́може а́ще и́деши, Го́споди.

⁵⁸ И рече́ ему́ Иису́с: ли́си я́звины и́мут, и пти́цы небе́сныя гне́зда, Сын же Челове́ческий не и́мать где главу́ подклони́ти.

⁵⁹ Рече́ же ко друго́му: ходи́ вслед Мене́. Он же рече́: Го́споди, повели́ ми, да шед пре́жде погребсти́ отца́ моего́.

⁶⁰ Рече́ же ему́ Иису́с: оста́ви ме́ртвыя погребсти́ своя́ мертвецы́, ты же шед возвеща́й Ца́рствие Бо́жие.

⁶¹ Рече́ же и други́й: иду́ по Тебе́, Го́споди, пре́жде же повели́ ми отвеща́ти ми ся, и́же суть ^[92] в дому́ мое́м.

⁶² Рече́ же к нему́ Иису́с: никто́же возло́ж ру́ку свою́ на ра́ло и зря вспять, упра́влен есть в Ца́рствии Бо́жии.

Глава 10

¹ По сих, яви́ Госпо́дь и ине́х се́дмьдесят учени́к Свои́х, и посла́ их по двема́ пред лице́м Свои́м во всяк град и ме́сто, а́може хотя́ше Сам ити́.

² Глаго́лаше же к ним: жа́тва у́бо мно́га, де́лателей же ма́ло, моли́теся у́бо Господи́ну жа́тве, да изведе́т де́латели на жа́тву Свою́.

³ Иди́те, се Аз посыла́ю вы я́ко а́гнцы посреде́ волко́в.

⁴ Не носи́те влага́лища, ни пи́ры, ни сапоги́, и ни кого́же на пути́ целу́йте.

⁵ Во́ньже а́ще дом вни́дете, пе́рвее глаго́лите: мир до́му сему́.

⁶ И а́ще у́бо бу́дет ту сын ми́ра, почи́ет на нем мир ваш, а́ще ли же ни, к вам возврати́тся.

⁷ В том же дому́ пребыва́йте, я́дуще и пию́ще, я́же суть у них, досто́ин бо есть де́латель мзды своея́. Не преходи́те из до́му в дом.

⁸ И во́ньже а́ще град вхо́дите, и прие́млют вы, яди́те предлага́емая вам.

⁹ И исцели́те неду́жныя, и́же суть в нем, и глаго́лите им: прибли́жися на вы Ца́рствие Бо́жие.

¹⁰ И во́ньже а́ще град вхо́дите, и не прие́млют вас, изше́дше на распу́тия его́, рцы́те:

¹¹ И прах, приле́пший нам от гра́да ва́шего, оттряса́ем вам. Оба́че сие́ ве́дите, я́ко прибли́жися на вы Ца́рствие Бо́жие.

¹² Глаго́лю вам, я́ко Содо́мляном в день той отра́днее бу́дет, не́же гра́ду тому́.

¹³ Го́ре тебе́, Хорази́не, го́ре тебе́, Вифсаи́до, я́ко а́ще в Ти́ре и Сидо́не бы́ша си́лы бы́ли бы́вшия в ва́ю, ^[93] дре́вле у́бо во вре́тищи и пе́пеле седя́ще пока́ялися бы́ша.

¹⁴ Оба́че Ти́ру и Сидо́ну отра́днее бу́дет на суде́, не́же ва́ма.

¹⁵ И ты, Капернау́ме, и́же до небе́с вознесы́йся, до а́да низведе́шися.

¹⁶ Слу́шаяй вас, Мене́ слу́шает, и отмета́яйся вас, Мене́ отмета́ется, отмета́яйся же Мене́, отмета́ется Посла́вшаго Мя.

¹⁷ Возврати́шася же се́дмьдесят с ра́достию, глаго́люще: Го́споди, и бе́си повину́ются нам о и́мени Твое́м.

¹⁸ Рече́ же им: ви́дех сатану́ я́ко мо́лнию с небесе́ спа́дша.

¹⁹ Се, даю́ вам власть наступа́ти на змию́ и на скорпи́ю и на всю си́лу вра́жию, и ничесо́же вас вреди́т.

²⁰ Оба́че о сем не ра́дуйтеся, я́ко ду́си вам повину́ются, ра́дуйтеся же, я́ко имена́ ва́ша напи́сана суть на небесе́х.

²¹ В той час возра́довася ду́хом Иису́с и рече́: испове́даю Ти ся, О́тче, Го́споди небесе́ и земли́, я́ко утаи́л еси́ сия́ от прему́дрых и разу́мных, и откры́л еси́ та младе́нцем, ей, О́тче, я́ко та́ко бысть благоволе́ние пред Тобо́ю.

²² И обра́щься ко ученико́м, рече́: вся Мне предана́ бы́ша от Отца́ Моего́, и никто́же весть, кто есть Сын, то́кмо Оте́ц, и кто есть Оте́ц, то́кмо Сын, и ему́же а́ще хо́щет Сын откры́ти.

²³ И обра́щься ко ученико́м, еди́н ^[94] рече́: блаже́ни о́чи ви́дящии, я́же ви́дите.

²⁴ Глаго́лю бо вам, я́ко мно́зи проро́цы и ца́рие восхоте́ша ви́дети, я́же вы ви́дите, и не ви́деша, и слы́шати, я́же слы́шите, и не слы́шаша.

²⁵ И се зако́нник не́кий приступи́ ко Иису́су, искуша́я Его́ и глаго́ля: Учи́телю, что сотвори́в, живо́т ве́чный насле́дую?

²⁶ Он же рече́ к нему́: в зако́не что пи́сано есть? Ка́ко чте́ши?

²⁷ Он же отвеща́в рече́: возлю́биши Го́спода Бо́га твоего́ от всего́ се́рдца твоего́, и от всея́ души́ твоея́, и все́ю кре́постию твое́ю, и всем помышле́нием твои́м, и бли́жняго своего́ я́ко сам себе́.

²⁸ Рече́ же ему́: пра́во отвеща́ еси́, сие́ сотвори́, и жив бу́деши.

²⁹ Он же хотя́ оправди́тися сам, рече́ ко Иису́су: и кто есть бли́жний мой?

³⁰ Отвеща́в же Иису́с рече́: челове́к не́кий схожда́ше от Иерусали́ма во Иерихо́н, и в разбо́йники впаде́, и́же совле́кше его́, и я́звы возло́жше отыдо́ша, оста́вльше е́ле жи́ва су́ща.

³¹ По слу́чаю же свяще́нник не́кий схожда́ше путе́м тем, и ви́дев его́, мимои́де.

³² Та́кожде же и леви́т, быв на том ме́сте, прише́д и ви́дев, мимои́де.

³³ Самаряни́н же не́кто гряды́й, прии́де над него́, и ви́дев его́, милосе́рдова,

³⁴ И присту́пль обвяза́ стру́пы его́, возлива́я ма́сло и вино́. Всади́в же его́ на свой скот, приведе́ его́ в гости́нницу и прилежа́ ему́.

³⁵ И нау́трия изше́д, изе́м два сре́бреника, даде́ гости́ннику и рече́ ему́: прилежи́ ему́, и е́же а́ще прииждиве́ши, аз егда́ возвращу́ся, возда́м ти.

³⁶ Кто у́бо от тех трие́х бли́жний мни́ттися бы́ти впа́дшему в разбо́йники?

³⁷ Он же рече́: сотвори́вый ми́лость с ним. Рече́ же ему́ Иису́с: иди́, и ты твори́ та́кожде.

³⁸ Бысть же ходя́щим им, и Сам вни́де в весь не́кую: жена́ же не́кая и́менем Ма́рфа прия́т Его́ в дом свой.

³⁹ И сестра́ ей бе нарица́емая Мари́а, я́же и се́дши при ногу́ Иису́сову, слы́шаше сло́во Его́.

⁴⁰ Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя оста́ви служи́ти; рцы у́бо ей, да ми помо́жет.

⁴¹ Отвеща́в же Иису́с, рече́ ей: Ма́рфо, Ма́рфо, пече́шися и мо́лвиши о мно́зе.

⁴² Еди́но же есть на потре́бу. Мари́а же благу́ю часть избра́, я́же не оты́мется от нея́.

Глава 11

¹ И бысть внегда́ бы́ти Иису́су на ме́сте не́коем моля́щуся, и я́ко преста́, рече́ не́кий от учени́к Его́ к Нему́: Го́споди, научи́ ны моли́тися, я́коже и Иоа́нн научи́ ученики́ своя́.

² Рече́ же им: егда́ моли́теся, глаго́лите: О́тче наш, и́же на небесе́х, да святи́тся и́мя Твое́, да прии́дет Ца́рствие Твое́, да бу́дет во́ляТвоя́, я́ко на небеси́, и на земли́,

³ Хлеб наш насу́щный подава́й нам на всяк день.

⁴ И оста́ви нам грехи́ на́ша, и́бо и са́ми оставля́ем вся́кому должнику́ на́шему, и не введи́ нас во искуше́ние, но изба́ви нас от лука́ваго.

⁵ И рече́ к ним: кто от вас и́мать дру́га, и и́дет к нему́ в полу́нощи, и рече́т ему́: дру́же, даждь ми взаи́м три хле́бы.

⁶ Поне́же друг прии́де с пути́ ко мне, и не и́мам чесо́ предложи́ти ему́.

⁷ И той извну́трь отвеща́в рече́т: не твори́ ми труды́, уже́ две́ри затворе́ны суть, и де́ти моя́ со мно́ю на ло́жи суть, и не могу́ воста́в да́ти тебе́.

⁸ Глаго́лю же вам: а́ще и не даст ему́ воста́в, зане́ есть друг ему́, но за безо́чьство ^[95] его́, воста́в даст ему́, ели́ка тре́бует.

⁹ И Аз вам глаго́лю: проси́те, и да́стся вам, ищи́те, и обря́щете, толцы́те, и отве́рзется вам.

¹⁰ Всяк бо прося́й прие́млет, и ищя́й обрета́ет, и толку́щему отве́рзется.

¹¹ Кото́раго же вас отца́ воспро́сит сын хле́ба, еда́ ка́мень пода́ст ему́? Или́ ры́бы, еда́ в ры́бы ме́сто змию́ пода́ст ему́?

¹² Или́ а́ще про́сит яица́, еда́ пода́ст ему́ скорпи́ю?

¹³ А́ще у́бо вы зли су́ще, уме́ете дая́ния бла́га дая́ти ча́дом ва́шим, ко́льми па́че Оте́ц, и́же с небесе́, даст Ду́х Свят прося́щим у Него́.

¹⁴ И бе изгоня́ бе́са, и той бе нем, бысть же бе́су изше́дшу, проглаго́ла немы́й, и диви́шася наро́ди.

¹⁵ Не́цыи же от них ре́ша: о веельзеву́ле кня́зе бесо́встем изго́нит бе́сы.

¹⁶ Друзи́и же искуша́юще, зна́мения от Него́ иска́ху с небесе́.

¹⁷ Он же ве́дый помышле́ния их, рече́ им: вся́ко ца́рство са́мо в себе́ разделя́яся, запусте́ет, и дом на дом, па́дает.

¹⁸ А́ще же и сатана́ сам в себе́ раздели́ся, ка́ко ста́нет ца́рство его́, я́коже глаго́лете, о веельзеву́ле изгоня́ща Мя бе́сы.

¹⁹ А́ще же Аз о веельзеву́ле изгоню́ бе́сы, сы́нове ва́ши о ком изго́нят? Сего́ ра́ди ти́и бу́дут вам судии́.

²⁰ А́ще ли же о пе́рсте Бо́жии изгоню́ бе́сы, у́бо пости́же на вас Ца́рствие Бо́жие.

²¹ Егда́ кре́пкий вооружи́вся храни́т свой двор, во смире́нии ^[96] суть име́ния его́.

²² Егда́ же кре́плей его́ наше́д победи́т его́, все ору́жие его́ во́змет, на не́же упова́ше, и коры́сть его́ раздае́т.

²³ И́же несть со Мно́ю, на Мя есть, и и́же не собира́ет со Мно́ю, расточа́ет.

²⁴ Егда́ же нечи́стый дух изы́дет от челове́ка, прехо́дит сквозе́ безво́дная ме́ста, ищя́ поко́я, и не обрета́я, глаго́лет: возвращу́ся в дом мой, отню́дуже изыдо́х.

²⁵ И прише́д обря́щет и помете́н и украше́н,

²⁶ Тогда́ и́дет и по́ймет седмь други́х духо́в го́рших себе́, и вше́дше живу́т ту, и быва́ют после́дняя челове́ку тому́ го́рша пе́рвых.

²⁷ Бысть же егда́ глаго́лаше сия́, воздви́гши не́кая жена́ глас от наро́да, рече́ Ему́: блаже́но чре́во носи́вшее Тя, и сосца́, я́же еси́ ссал.

²⁸ Он же рече́: те́мже у́бо блаже́ни слы́шащии сло́во Бо́жие, и храня́ще е́.

²⁹ Наро́дом же собира́ющимся, нача́т глаго́лати: род сей лука́в есть, зна́мения и́щет, и зна́мение не да́стся ему́, то́кмо зна́мение Ио́ны проро́ка.

³⁰ Я́коже бо бысть Ио́на зна́мение Ниневи́том, та́ко бу́дет и Сын Челове́ческий ро́ду сему́.

³¹ Цари́ца ю́жская воста́нет на суд с му́жи ро́да сего́, и осу́дит их, я́ко прии́де от коне́ц земли́ слы́шати прему́дрость Соломо́нову, и се мно́жае Соломо́на зде.

³² Му́жие Ниневи́тстии воста́нут на суд с ро́дом сим и осу́дят и я́ко пока́яшася про́поведию Ио́ниною, и се мно́жае Ио́ны зде.

³³ Никто́же у́бо свети́льника вжег, в скро́ве полага́ет, ни под спу́дом, но на све́щнице, да входя́щии свет ви́дят.

³⁴ Свети́льник телу есть о́ко, егда́ у́бо о́ко твое́ про́сто бу́дет, все те́ло твое́ све́тло бу́дет, егда́ же лука́во бу́дет, и те́ло твое́ те́мно.

³⁵ Блюди́ у́бо, еда́ свет, и́же в тебе́, тма есть.

³⁶ А́ще бо те́ло твое́ все све́тло, не имы́й не́кия ча́сти те́мны, бу́дет све́тло все я́коже егда́ свети́льник блиста́нием просвеща́ет тя.

³⁷ Егда́ же глаго́лаше, моля́ше Его́ фарисе́й не́кий, да обе́дует у него́, вшед же возлеже́.

³⁸ Фарисе́й же ви́дев диви́ся, я́ко не пре́жде крести́ся ^[97] пе́рвее обе́да.

³⁹ Рече́ же Госпо́дь к нему́: ны́не вы, фарисе́е, вне́шняя сткля́ницы и блю́да очища́ете, вну́треннее же ва́ше по́лно грабле́ния есть и лука́вства.

⁴⁰ Безу́мнии, не И́же ли сотвори́ вне́шнее, и вну́треннее сотвори́л есть?

⁴¹ Оба́че от су́щих дади́те ми́лостыню, и се вся чи́ста вам бу́дут.

⁴² Но го́ре вам фарисе́ом, я́ко одеся́тствуете от мя́твы и пига́на и вся́каго зе́лия, и мимохо́дите суд и любве́ Бо́жию, сия́ подоба́ше сотвори́ти, и о́нех не оставля́ти.

⁴³ Го́ре вам фарисе́ом, я́ко лю́бите председа́ния на со́нмищах и целова́ния на то́ржищех.

⁴⁴ Го́ре вам, кни́жницы и фарисе́е, лицеме́ри, я́ко есте́ я́ко гро́би неве́доми, и челове́цы ходя́щии верху́ не ве́дят.

⁴⁵ Отвеща́в же не́кий от зако́нник рече́ Ему́: Учи́телю, сия́ глаго́ля и нам досажда́еши.

⁴⁶ Он же рече́: и вам зако́нником го́ре, я́ко накла́даете на челове́ки бремена́ не удо́бь носи́ма, и са́ми еди́нем пе́рстом ва́шим не прикаса́етеся бремене́м.

⁴⁷ Го́ре вам, я́ко зи́ждете гро́бы проро́к, отцы́ же ва́ши изби́ша их.

⁴⁸ У́бо свиде́тельствуете и сблаговолите́ дело́м оте́ц ва́ших, я́ко ти́и у́бо изби́ша их, вы же зи́ждете их гро́бы.

⁴⁹ Сего́ ра́ди и прему́дрость Бо́жия рече́: послю́ в них ^[98] проро́ки и Апо́столы, и от них убию́т и изжену́т.

⁵⁰ Да взы́щется кровь всех проро́к, пролива́емая от сложе́ния міра, от ро́да сего́.

⁵¹ От кро́ве А́веля да́же до кро́ве Заха́рии, поги́бшаго между́ олтаре́м и хра́мом. Ей, глаго́лю вам, взы́щется от ро́да сего́.

⁵² Го́ре вам зако́нником, я́ко взя́сте ключь разуме́ния, са́ми не внидо́сте, и входя́щим возбрани́сте.

⁵³ Глаго́лющу же Ему́ сия́ к ним, нача́ша кни́жницы и фарисе́е бе́дне ^[99] гне́ватися Нань и преста́ти ^[100] Его́ о мно́зе,

⁵⁴ Ла́юще Его́, ^[101] и́щуще улови́ти не́что от уст Его́, да Нань возглаго́лют.

Глава 12

¹ О ни́хже ^[102] собра́вшимся тмам наро́да, я́ко попира́ти друг дру́га, нача́т глаго́лати ученико́м Свои́м пе́рвее, внемли́те себе́ от ква́са фарисе́йска, е́же есть лицеме́рие.

² Ничто́же покрове́но есть, е́же не откры́ется, и та́йно, е́же не разуме́ется.

³ Зане́, ели́ка во тме ре́сте, во све́те услы́шится, и е́же ко у́ху глаго́ласте во хра́мех, пропове́стся на кро́вех.

⁴ Глаго́лю же вам друго́м Свои́м: не убо́йтеся от убива́ющих те́ло и пото́м не могу́щих ли́шше что сотвори́ти.

⁵ Сказу́ю же вам, кого́ убо́йтеся, убо́йтеся иму́щаго власть по убие́нии воврещи́ в дебрь о́гненную, ей, глаго́лю вам, того́ убо́йтеся.

⁶ Не пять ли птиц цени́тся пе́нязема двема́? И ни еди́на от них несть забве́на пред Бо́гом.

⁷ Но и вла́си главы́ ва́шея вси изочте́ни суть. Не убо́йтеся у́бо, мно́зех птиц у́нши есте́ вы.

⁸ Глаго́лю же вам: всяк, и́же а́ще испове́сть Мя пред челове́ки, и Сын Челове́ческий испове́сть его́ пред А́нгелы Бо́жиими.

⁹ А отверги́йся Мене́ пред челове́ки отве́ржен бу́дет пред А́нгелы Бо́жиими.

¹⁰ И всяк и́же рече́т сло́во на Сы́на Челове́ческаго, оста́вится ему́, а на Свята́го Ду́ха ху́лившему не оста́вится.

¹¹ Егда́ же приведу́т вы на собо́рища и вла́сти и влады́чества, не пецы́теся, ка́ко или́ что отвеща́ете, или́ что рече́те,

¹² Святы́й бо Дух научи́т вы в той час, я́же подоба́ет рещи́.

¹³ Рече́ же Ему́ не́кий от наро́да: Учи́телю, рцы бра́ту моему́ раздели́ти со мно́ю достоя́ние.

¹⁴ Он же рече́ ему́: челове́че, кто Мя поста́ви судию́ или́ дели́теля над ва́ми?

¹⁵ Рече́ же к ним: блюди́те и храни́теся от лихои́мства, я́ко не от избы́тка ^[103] кому́ живо́т его́ есть от име́ния его́.

¹⁶ Рече́ же при́тчу к ним, глаго́ля: челове́ку не́коему бога́ту угобзи́ся ни́ва.

¹⁷ И мы́сляше в себе́, глаго́ля: что сотворю́, я́ко не и́мам где собра́ти плодо́в мои́х?

¹⁸ И рече́: се сотворю́, разорю́ жи́тницы моя́, и бо́льшия сози́жду, и соберу́ ту вся жи́та моя́ и блага́я моя́.

¹⁹ И реку́ души́ мое́й: душе́, и́маши мно́га бла́га, лежа́ща на ле́та мно́га, почива́й, яждь, пий, весели́ся.

²⁰ Рече́ же ему́ Бог: безу́мне, в сию́ нощь ду́шу твою́ истя́жут от тебе́, а я́же угото́вал еси́, кому́ бу́дут?

²¹ Та́ко собира́яй себе́, а не в Бо́га богате́я.

²² Рече́ же ко ученико́м Свои́м: сего́ ра́ди глаго́лю вам, не пецы́теся душе́ю ва́шею, что я́сте, ни те́лом, во что облече́теся.

²³ Душа́ бо́льши есть пи́щи, и те́ло оде́жды.

²⁴ Смотри́те вран, я́ко не се́ют, ни жнут, и́мже несть сокро́вища, ни жи́тницы, и Бог пита́ет их, кольми́ па́че вы есте́ лу́чши птиц?

²⁵ Кто́ же от вас пеки́йся мо́жет приложи́ти во́зрасту своему́ ла́коть еди́н?

²⁶ А́ще у́бо ни ма́ла чесо́ мо́жете, что о про́чих пече́теся?

²⁷ Смотри́те кри́ны, ка́ко расту́т, не тружда́ются, ни пряду́т. Глаго́лю же вам, я́ко ни Соломо́н во всей сла́ве свое́й облече́ся, я́ко еди́н от сих.

²⁸ А́ще же траву́, на селе́ днесь су́щу и у́тре в пещь вме́щему, Бог та́ко оде́ет, кольми́ па́че вас, малове́ри?

²⁹ И вы не ищи́те, что я́сте, или́ что пие́те, и не возноси́теся.

³⁰ Всех бо сих язы́цы міра сего́ и́щут, ваш же Оте́ц весть, я́ко тре́буете сих.

³¹ Оба́че ищи́те Ца́рствия Бо́жия, и сия́ вся приложа́тся вам.

³² Не бо́йся, ма́лое ста́до, я́ко благоизво́ли Оте́ц ваш да́ти вам Ца́рство.

³³ Продади́те име́ния ва́ша и дади́те ми́лостыня. Сотвори́те себе́ влага́лища неветша́юща, сокро́вище неоскуде́емо на небесе́х, иде́же тать не приближа́ется, ни моль растлева́ет.

³⁴ Иде́же бо есть сокро́вище ва́ше, ту и се́рдце ва́ше бу́дет.

³⁵ Да бу́дут чресла́ ва́ша препоя́сана, и свети́льницы горя́щии,

³⁶ И вы подо́бни челове́ком ча́ющим го́спода своего́, когда́ возврати́тся от брак, да прише́дшу и толкну́вшу, а́бие отве́рзут ему́.

³⁷ Блаже́ни раби́ ти́и, и́хже прише́д госпо́дь обря́щет бдя́щя. Ами́нь глаго́лю вам, я́ко препоя́шется и посади́т их, и мину́в ^[104] послу́жит им.

³⁸ И а́ще прии́дет во втору́ю стра́жу, лю́бо в тре́тию стра́жу прии́дет, и обря́щет их та́ко, блаже́ни суть раби́ ти́и.

³⁹ Се же ве́дите, я́ко а́ще бы ве́дал господи́н хра́мины, в кий час тать прии́дет, бдел у́бо бы, и не бы дал подкопа́ти до́му своего́.

⁴⁰ И вы у́бо бу́дите гото́ви, я́ко во́ньже час не мните́, Сын Челове́ческий прии́дет.

⁴¹ Рече́ же ему́ Пе́тр: Го́споди, к нам ли при́тчу сию́ глаго́леши, или́ ко всем?

⁴² Рече́ Госпо́дь: кто у́бо есть ве́рный строи́тель и му́дрый, его́же поста́вит госпо́дь над че́лядию свое́ю, дая́ти во вре́мя житоме́рие?

⁴³ Блаже́н раб той, его́же прише́д госпо́дь его́ обря́щет творя́ща та́ко.

⁴⁴ Вои́стинну глаго́лю вам, я́ко над всем име́нием свои́м поста́вит его́.

⁴⁵ А́ще же рече́т раб той в се́рдцы свое́м: косни́т господи́н мой приити́, и на́чнет би́ти рабы́ и рабы́ни, я́сти же и пи́ти, и упива́тися.

⁴⁶ Прии́дет господи́н раба́ того́ в день, во́ньже не ча́ет, и в час, во́ньже не весть, и проте́шет его́, и часть его́ с неве́рными положи́т.

⁴⁷ Той же раб ве́девый во́лю господи́на своего́, и не угото́вав, ни сотвори́в по во́ли его́, бие́н бу́дет мно́го.

⁴⁸ Неве́девый же, сотвори́в же досто́йная ра́нам, бие́н бу́дет ма́ло. Вся́кому же, ему́же дано́ бу́дет мно́го, мно́го взы́щется от него́, и ему́же преда́ша мно́жайше, мно́жайше про́сят ^[105] от него́.

⁴⁹ Огня́ приидо́х воврещи́ на зе́млю, и что хощу́, а́ще уже́ возгоре́ся?

⁵⁰ Креще́нием же и́мам крести́тися, и ка́ко удержу́ся, до́ндеже сконча́ются?

⁵¹ Мните́ ли, я́ко ми́ра приидо́х да́ти на зе́млю? Ни, глаго́лю вам, но разделе́ния.

⁵² Бу́дут бо отсе́ле пять во еди́ном дому́ разделе́ни, трие́ на два, и два на три.

⁵³ Раздели́тся оте́ц на сы́на, и сын на отца́, ма́ти на дщерь, и дщи на ма́терь, свекры́ на неве́сту свою́, и неве́ста на свекро́вь свою́.

⁵⁴ Глаго́лаше же и наро́дом: егда́ у́зрите о́блак восходя́щь от за́пада, а́бие глаго́лете: ту́ча гряде́т, и быва́ет та́ко.

⁵⁵ И егда́ юг ве́ющь, глаго́лете: зной бу́дет, и быва́ет.

⁵⁶ Лицеме́ри, лице́ не́бу и земли́ ве́сте искуша́ти, вре́мене же сего́ ка́ко не искуша́ете?

⁵⁷ Что́ же и о себе́ не су́дите пра́ведное?

⁵⁸ Егда́ бо гряде́ши с сопе́рником твои́м ко кня́зю, на пути́ даждь де́лание ^[106] избы́ти от него́, да не ка́ко привлече́т тебе́ к судии́, и судия́ тя преда́ст слузе́, и слуга́ всади́т тя в темни́цу.

⁵⁹ Глаго́лю тебе́: не изы́деши отту́ду, до́ндеже и после́днюю ме́дницу возда́си.

Глава 13

¹ Приидо́ша же не́цыи в то вре́мя, пове́дающе Ему́ о Галиле́ех, и́хже кровь Пила́т смеси́ с же́ртвами их.

² И отвеща́в Иису́с рече́ им: мните́ ли, я́ко Галиле́ане си́и гре́шнейши па́че всех Галиле́ан бя́ху, я́ко та́ко пострада́ша?

³ Ни, глаго́лю вам, но а́ще не пока́етеся, вси та́кожде поги́бнете.

⁴ Или́ они́ осмьна́десяте, на ни́хже паде́ столп Силоа́мский и поби́ их, мните́ ли, я́ко ти́и до́лжнейши бя́ху па́че всех живу́щих во Иерусали́ме?

⁵ Ни, глаго́лю вам, но а́ще не пока́етеся, вси та́кожде поги́бнете.

⁶ Глаго́лаше же сию́ при́тчу: смоко́вницу имя́ше не́кий в виногра́де свое́м всаждену́, и прии́де ищя́ плода́ на ней, и не обре́те.

⁷ Рече́ же к винаре́ви: се тре́тие ле́то, отне́лиже прихожду́ ищя́ плода́ на смоко́внице сей, и не обрета́ю, посецы́ ю́ у́бо, вску́ю и зе́млю упражня́ет?

⁸ Он же отвеща́в рече́ ему́: го́споди, оста́ви ю́ и се ле́то, до́ндеже окопа́ю о́крест ея́ и осы́плю гно́ем.

⁹ И а́ще у́бо сотвори́т плод, а́ще ли же ни, во гряду́щее посече́ши ю́.

¹⁰ Бяше же учя́ на еди́ном от со́нмищ в суббо́ту.

¹¹ И се жена́ бе иму́щи дух неду́жен лет осмьна́десять, и бе слука́ и не могу́щи восклони́тися отню́д.

¹² Ви́дев же ю́ Иису́с, пригласи́ и рече́ ей: же́но, отпущена́ еси́ от неду́га твоего́.

¹³ И возложи́ на ню ру́це, и а́бие простре́ся и сла́вляше Бо́га.

¹⁴ Отвеща́в же старе́йшина собо́ру, негоду́я, зане́ в суббо́ту исцели́ ю́ Иису́с, глаго́лаше наро́ду: шесть дний есть, в ня́же досто́ит де́лати, в ты́я у́бо приходя́ще цели́теся, а не в день суббо́тный.

¹⁵ Отвеща́в же у́бо ему́ Госпо́дь и рече́: лицеме́ре, ко́ждо вас в суббо́ту не отреша́ет ли своего́ вола́ или́ осла́ от я́слий, и вед напая́ет?

¹⁶ Сию́ же дщерь Авраа́млю су́щу, ю́же связа́ сатана́, се осмоена́десяте ле́то, не досто́яше ли разреши́тися ей от ю́зы сея́ в день суббо́тный?

¹⁷ И сия́ Ему́ глаго́лющу, стыдя́хуся вси противля́ющиися Ему́, и вси лю́дие ра́довахуся о всех сла́вных быва́ющих от Него́.

¹⁸ Глаго́лаше же: кому́ подо́бно есть Ца́рствие Бо́жие? И кому́ уподо́блю е́?

¹⁹ Подо́бно есть зе́рну гору́шну, е́же прие́м челове́к вве́рже в вертогра́д свой, и возрасте́, и бысть дре́во ве́лие, и пти́цы небе́сныя всели́шася в ве́твия его́.

²⁰ Па́ки рече́: кому́ уподо́блю Ца́рствие Бо́жие?

²¹ Подо́бно есть ква́су, е́же прие́мши жена́, скры в муце́ са́та три, до́ндеже вски́се все.

²² И прохожда́ше сквозе́ гра́ды и ве́си, учя́ и ше́ствие творя́ во Иерусали́м.

²³ Рече́ же не́кий Ему́: Го́споди, а́ще ма́ло есть спаса́ющихся? Он же рече́ к ним:

²⁴ Подвиза́йтеся вни́ти сквозе́ те́сная врата́, я́ко мно́зи, глаго́лю вам, взы́щут вни́ти, и не возмо́гут.

²⁵ Отне́лиже воста́нет до́му влады́ка и затвори́т две́ри, и на́чнете вне стоя́ти и ударя́ти в две́ри, глаго́люще: Го́споди, Го́споди, отве́рзи нам. И отвеща́в рече́т вам: не вем вас, отку́ду есте́.

²⁶ Тогда́ на́чнете глаго́лати: ядо́хом пред Тобо́ю и пи́хом, и на распу́тиях на́ших учи́л еси́.

²⁷ И рече́т: глаго́лю вам, не вем вас, отку́ду есте́, отступи́те от Мене́ вси де́лателие непра́вды.

²⁸ Ту бу́дет плачь и скре́жет зубо́м, егда́ у́зрите Авраа́ма и Исаа́ка и Иа́кова и вся проро́ки во Ца́рствии Бо́жии, вас же изгони́мых вон.

²⁹ И прии́дут от восто́к и за́пад и се́вера и ю́га, и во́злягут в Ца́рствии Бо́жии.

³⁰ И се, суть после́днии, и́же бу́дут пе́рви, и суть пе́рвии, и́же бу́дут после́дни.

³¹ В той день приступи́ша не́цыи от фарисе́й, глаго́люще Ему́: изы́ди и иди́ отсю́ду, я́ко И́род хо́щет Тя уби́ти.

³² И рече́ им: ше́дше рцы́те ли́су тому́, се изгоню́ бе́сы и исцеле́ния творю́ днесь и у́тре, и в тре́тий сконча́ю.

³³ Оба́че подоба́ет Ми днесь и у́тре и в бли́жний ити́, я́ко невозмо́жно есть проро́ку поги́бнути кроме́ Иерусали́ма.

³⁴ Иерусали́ме, Иерусали́ме, изби́вый проро́ки и ка́мением побива́я по́сланныя к тебе́, колькра́ты восхоте́х собра́ти ча́да твоя́, я́коже ко́кош гнездо́ свое́ под криле́, и не восхоте́сте?

³⁵ Се оставля́ется вам дом ваш пуст. Глаго́лю же вам, я́ко не и́мате Мене́ ви́дети, до́ндеже прии́дет, егда́ рече́те: благослове́н Гряды́й во и́мя Госпо́дне.

Глава 14

¹ И бысть егда́ вни́ти Ему́ в дом не́коего кня́зя фарисе́йска в суббо́ту хлеб я́сти, и ти́и бя́ху назира́юще Его́.

² И се челове́к не́кий, имы́й водны́й труд, бе пред Ним.

³ И отвеща́в Иису́с рече́ к зако́нником и фарисе́ом, глаго́ля: а́ще досто́ит в суббо́ту цели́ти?

⁴ Они́ же умолча́ша. И прие́м исцели́ его́, и отпусти́.

⁵ И отвеща́в к ним рече́: кото́раго от вас осе́л или́ вол в студене́ц впаде́т, и не а́бие ли исто́ргнет его́ в день суббо́тный?

⁶ И не возмого́ша отвеща́ти Ему́ к сим.

⁷ Глаго́лаше же к зва́нным при́тчу, обдержя́, ^[107] ка́ко председа́ния избира́ху, глаго́ля к ним:

⁸ Егда́ зван бу́деши ким на брак, не ся́ди на пре́днем ме́сте, еда́ кто честне́е тебе́ бу́дет зва́нных,

⁹ И прише́д и́же тебе́ зва́вый и о́наго, рече́т ти: даждь сему́ ме́сто, и тогда́ на́чнеши со студо́м после́днее ме́сто держа́ти.

¹⁰ Но егда́ зван бу́деши, шед ся́ди на после́днем ме́сте, да егда́ прии́дет зва́вый тя, рече́т ти: дру́же, пося́ди вы́ше, тогда́ бу́дет ти сла́ва пред зва́нными с тобо́ю.

¹¹ Я́ко всяк вознося́йся смири́тся, и смиря́яйся вознесе́тся.

¹² Глаго́лаше же и ко зва́вшему Его́: егда́ сотвори́ши обед или́ ве́черю, не зови́ друго́в твои́х, ни бра́тии твоея́, ни сро́дник твои́х, ни сосе́д бога́тых, еда́ когда́ и ти́и тя та́кожде воззову́т, и бу́дет ти воздая́ние.

¹³ Но егда́ твори́ши пир, зови́ ни́щия, маломо́щи, хро́мыя, слепы́я,

¹⁴ И блаже́н бу́деши, я́ко не и́мут ти что возда́ти, возда́ст же ти ся в воскреше́ние пра́ведных.

¹⁵ Слы́шав же не́кий от возлежа́щих с Ним сия́, рече́ Ему́: блаже́н, и́же снесть обед в Ца́рствии Бо́жии.

¹⁶ Он же рече́ ему́: челове́к не́кий сотвори́ ве́черю ве́лию, и зва мно́ги.

¹⁷ И посла́ раба́ своего́ в год ве́чери рещи́ зва́нным: гряди́те, я́ко уже́ гото́ва суть вся.

¹⁸ И нача́ша вку́пе отрица́тися вси. Пе́рвый рече́ ему́: село́ купи́х, и и́мам ну́жду изы́ти и ви́дети е́. Молю́ ти ся, име́й мя отрече́на.

¹⁹ И други́й рече́: супру́г воло́вных купи́х пять, и гряду́ искуси́ти их. Молю́ тя, име́й мя отрече́на.

²⁰ И други́й рече́: жену́ поях, и сего́ ра́ди не могу́ приити́.

²¹ И прише́д раб той, пове́да господи́ну своему́ сия́. Тогда́ разгне́вався до́му влады́ка, рече́ рабу́ своему́: изы́ди ско́ро на распу́тия и сто́гны гра́да, и ни́щия, и бе́дныя, и слепы́я, и хро́мыя введи́ се́мо.

²² И рече́ раб: го́споди, бысть я́коже повеле́, и еще́ ме́сто есть.

²³ И рече́ господи́н к рабу́: изы́ди на пути́ и халу́ги, и убеди́ вни́ти, да напо́лнится дом мой.

²⁴ Глаго́лю бо вам: я́ко ни еди́н муже́й тех зва́нных вку́сит моея́ ве́чери, мно́зи бо суть зва́ни, ма́ло же избра́нных.

²⁵ Идя́ху же с Ним наро́ди мно́зи, и обра́щься рече́ к ним:

²⁶ А́ще кто гряде́т ко Мне, и не возненави́дит отца́ своего́ и ма́терь, и жену́ и чад, и бра́тию и сестр, еще́ же и ду́шу свою́, не мо́жет Мой бы́ти учени́к.

²⁷ И и́же не но́сит креста́ своего́ и вслед Мене́ гряде́т, не мо́жет Мой бы́ти учени́к.

²⁸ Кто бо от вас, хотя́й столп созда́ти, не пре́жде ли сед разчте́т име́ние, а́ще и́мать, е́же есть на соверше́ние?

²⁹ Да не, когда́ положи́т основа́ние и не возмо́жет соверши́ти, вси ви́дящии начну́т руга́тися ему́,

³⁰ Глаго́люще, я́ко сей челове́к нача́т зда́ти и не мо́же соверши́ти?

³¹ Или́ кий царь иды́й ко ино́му царю́ сни́тися с ним на брань, не сед ли пре́жде совещава́ет, а́ще си́лен есть сре́стися с десятию́ ты́сящ гряду́щаго со двема́десятма ты́сящама нань?

³² А́ще ли же ни, еще́ дале́че ему́ су́щу, моле́ние посла́в мо́лится о смире́нии.

³³ Та́ко у́бо всяк от вас, и́же не отрече́тся всего́ своего́ име́ния, не мо́жет бы́ти Мой учени́к.

³⁴ Добро́ есть соль, а́ще же соль обуя́ет, в чем осоли́тся?

³⁵ Ни в земли́, ни в гно́и тре́бует, вон изсы́плют ю́. Име́яй у́ши слы́шати, да слы́шит.

Глава 15

¹ Бя́ху же приближа́ющеся Иису́су вси мытари́е и гре́шницы, послу́шати Его́.

² И ропта́ху фарисе́е и кни́жницы, глаго́люще, я́ко Сей гре́шники прие́млет и с ни́ми яст.

³ Рече́ же к ним при́тчу сию́, глаго́ля:

⁴ Кий челове́к от вас имы́й сто ове́ц, и погу́бль еди́ну от них, не оста́вит ли девяти́десят и девяти́ в пусты́ни и и́дет вслед поги́бшия, до́ндеже обря́щет ю́?

⁵ И обре́т возлага́ет на ра́ме свои́ ра́дуяся.

⁶ И прише́д в дом, созыва́ет дру́ги и сосе́ды, глаго́ля им: ра́дуйтеся со мно́ю, я́ко обрето́х овцу́ мою́ поги́бшую.

⁷ Глаго́лю вам, я́ко та́ко ра́дость бу́дет на небеси́ о еди́нем гре́шнице ка́ющемся, не́жели о девяти́десятих и девяти́ пра́ведник, и́же не тре́буют покая́ния.

⁸ Или́ ка́я жена́ иму́щи де́сять драхм, а́ще погуби́т дра́хму еди́ну, не вжига́ет ли свети́льника, и помете́т хра́мину, и и́щет приле́жно, до́ндеже обря́щет?

⁹ И обре́тши созыва́ет други́ни и сосе́ды, глаго́лющи: ра́дуйтеся со мно́ю, я́ко обрето́х дра́хму поги́бшую.

¹⁰ Та́ко, глаго́лю вам, ра́дость быва́ет пред А́нгелы Бо́жиими о еди́ном гре́шнице ка́ющемся.

¹¹ Рече́ же: челове́к не́кий име́ два сы́на.

¹² И рече́ юне́йший ею́ ^[108] отцу́: о́тче, даждь ми досто́йную часть име́ния. И раздели́ и́ма име́ние.

¹³ И не по мно́зех днех собра́в все мний сын, оты́де на страну́ дале́че, и ту расточи́ име́ние свое́, живы́й блу́дно.

¹⁴ Изжи́вшу же ему́ все бысть глад кре́пок на стране́ той, и той нача́т лиша́тися.

¹⁵ И шед прилепи́ся еди́ному от жи́тель тоя́ страны́, и посла́ его́ на се́ла своя́ пасти́ свиния́.

¹⁶ И жела́ше насы́тити чре́во свое́ от роже́ц, я́же ядя́ху свиния́, и никто́же дая́ше ему́.

¹⁷ В себе́ же прише́д, рече́: коли́ко нае́мником отца́ моего́ избыва́ют хле́бы, аз же гла́дом ги́блю?

¹⁸ Воста́в иду́ ко отцу́ моему́, и реку́ ему́: о́тче, согреши́х на не́бо и пред тобо́ю,

¹⁹ И уже́ несмь досто́ин нарещи́ся сын твой, сотвори́ мя я́ко еди́наго от нае́мник твои́х.

²⁰ И воста́в и́де ко отцу́ своему́. Еще́ же ему́ дале́че су́щу, узре́ его́ оте́ц его́, и мил ему́ бысть, и тек нападе́ на вы́ю его́, и облобыза́ его́.

²¹ Рече́ же ему́ сын: о́тче, согреши́х на не́бо и пред тобо́ю, и уже́ несмь досто́ин нарещи́ся сын твой.

²² Рече́ же оте́ц к рабо́м свои́м: изнеси́те оде́жду пе́рвую и облецы́те его́, и дади́те пе́рстень на ру́ку его́ и сапоги́ на но́зе,

²³ И приве́дше теле́ц упите́нный заколи́те, и я́дше весели́мся.

²⁴ Я́ко сын мой сей мертв бе, и оживе́, и изги́бл бе, и обре́теся. И нача́ша весели́тися.

²⁵ Бе же сын его́ ста́рей на селе́, и я́ко гряды́й прибли́жися к до́му, слы́ша пе́ние и ли́ки.

²⁶ И призва́в еди́наго от о́трок, вопроша́ше: что у́бо сия́ суть?

²⁷ Он же рече́ ему́, я́ко брат твой прии́де, и закла́ оте́ц твой теле́ц упите́нный, я́ко здра́ва его́ прия́т.

²⁸ Разгне́вався же, и не хотя́ше вни́ти. Оте́ц же его́ изше́д моля́ше его́.

²⁹ Он же отвеща́в рече́ отцу́: се толи́ко лет рабо́таю тебе́ и николи́же за́поведи твоя́ преступи́х, и мне николи́же дал еси́ козля́те, да со дру́ги свои́ми возвесели́лся бых.

³⁰ Егда́ же сын твой сей, изъеды́й твое́ име́ние с любоде́йцами, прии́де, закла́ ему́ теле́ц пито́мый.

³¹ Он же рече́ ему́: ча́до, ты всегда́ со мно́ю еси́, и вся моя́ твоя́ суть.

³² Возвесели́ти же ся и возра́довати подоба́ше, я́ко брат твой сей мертв бе, и оживе́, и изги́бл бе, и обре́теся.

Глава 16

¹ Глаго́лаше же ко ученико́м Свои́м: челове́к не́кий бе бога́т, и́же имя́ше приста́вника, и той оклевета́н бысть к нему́, я́ко расточа́ет име́ния его́.

² И пригласи́в его́ рече́ ему́: что се слы́шу о тебе́? Возда́ждь отве́т о приставле́нии домо́внем, не возмо́жеши бо ктому́ до́му стро́ити.

³ Рече́ же в себе́ приста́вник до́му: что сотворю́, я́ко госпо́дь мой отъе́млет строе́ние до́му от мене́? Копа́ти не могу́, проси́ти стыжу́ся.

⁴ Разуме́х, что сотворю́, да егда́ отста́влен бу́ду от строе́ния до́му, прии́мут мя в до́мы своя́.

⁵ И призва́в еди́наго кого́ждо до́лжник господи́на своего́, глаго́лаше пе́рвому: коли́цем до́лжен еси́ господи́ну моему́?

⁶ Он же рече́: сто мер ^[109] ма́сла. И рече́ ему́: приими́ писа́ние твое́, и сед ско́ро напиши́ пятьдеся́т.

⁷ Пото́м же рече́ друго́му: ты же коли́цем до́лжен еси́? Он же рече́: сто мер пшени́цы. И глаго́ла ему́: приими́ писа́ние твое́, и напиши́ о́смьдесят.

⁸ И похвали́ госпо́дь до́му строи́теля непра́веднаго, я́ко му́дре сотвори́, я́ко сы́нове ве́ка сего́ мудре́йши па́че сыно́в све́та в ро́де свое́м суть.

⁹ И Аз вам глаго́лю: сотвори́те себе́ дру́ги от мамо́ны непра́вды, да егда́ оскуде́ете, прии́мут вы в ве́чныя кро́вы.

¹⁰ Ве́рный в ма́ле, и во мно́зе ве́рен есть, и непра́ведный в ма́ле, и во мно́зе непра́веден есть.

¹¹ А́ще у́бо в непра́веднем име́нии ве́рни не бы́сте, во и́стиннем кто вам ве́ру и́мет?

¹² И а́ще в чуже́м ве́рни не бы́сте, ва́ше кто вам даст?

¹³ Ники́йже раб мо́жет двема́ господи́нома рабо́тати, лю́бо еди́наго возненави́дит, а друга́го возлю́бит, или́ еди́наго держи́тся, о друзе́м же нераде́ти на́чнет. Не мо́жете Бо́гу рабо́тати и мамо́не.

¹⁴ Слы́шаху же сия́ вся и фарисе́е, сребролю́бцы су́ще, руга́хуся Ему́.

¹⁵ И рече́ им: вы есте́ оправда́юще себе́ пред челове́ки, Бог же весть сердца́ ва́ша, я́ко е́же есть в челове́цех высоко́, ме́рзость есть пред Бо́гом.

¹⁶ Зако́н и проро́цы до Иоа́нна, отто́ле Ца́рствие Бо́жие благовеству́ется, и всяк в не́ ну́дится. ^[110]

¹⁷ Удо́бее же есть не́бу и земли́ прейти́, не́же от зако́на еди́ной черте́ поги́бнути.

¹⁸ Всяк пуща́яй жену́ свою́ и приводя́ и́ну прелюбы́ де́ет, и женя́йся пуще́ною от му́жа прелюбы́ твори́т.

¹⁹ Челове́к не́кий бе бога́т, и облача́шеся в порфи́ру и ви́ссон, веселя́ся на вся дни све́тло.

²⁰ Нищь же бе не́кто, и́менем Ла́зарь, и́же лежа́ше пред враты́ его́ гно́ен.

²¹ И жела́ше насы́титися от крупи́ц па́дающих от трапе́зы бога́таго, но и пси приходя́ще облиза́ху гной его́.

²² Бысть же умре́ти ни́щему и несе́ну бы́ти А́нгелы на ло́но Авраа́мле, у́мре же и бога́тый, и погребо́ша его́.

²³ И во а́де возве́д о́чи свои́, сый в му́ках, узре́ Авраа́ма издале́ча, и Ла́заря на ло́не его́.

²⁴ И той возгла́шь рече́: о́тче Авраа́ме, поми́луй мя и посли́ Ла́заря, да омо́чит коне́ц пе́рста своего́ в воде́ и устуди́т язы́к мой, я́ко стражду́ во пла́мени сем.

²⁵ Рече́ же Авраа́м: ча́до, помяни́, я́ко восприя́л еси́ блага́я твоя́ в животе́ твое́м, и Ла́зарь та́кожде зла́я, ны́не же зде утеша́ется, ты же стра́ждеши.

²⁶ И над все́ми си́ми между́ на́ми и ва́ми про́пасть вели́ка утверди́ся, я́ко да хотя́щии прейти́ отсю́ду к вам не возмо́гут, ни и́же отту́ду, к нам прехо́дят.

²⁷ Рече́ же: молю́ тя у́бо, о́тче, да по́слеши его́ в дом отца́ моего́.

²⁸ И́мам бо пять бра́тия, я́ко да засвиде́тельствует им, да не и ти́и прии́дут на ме́сто сие́ муче́ния.

²⁹ Глаго́ла ему́ Авраа́м: и́мут Моисе́а и проро́ки, да послу́шают их.

³⁰ Он же рече́: ни, о́тче Авраа́ме, но а́ще кто от ме́ртвых и́дет к ним, пока́ются.

³¹ Рече́ же ему́: а́ще Моисе́а и проро́ки не послу́шают, ни а́ще кто от ме́ртвых воскре́снет, не и́мут ве́ры.

Глава 17

¹ Рече́ же ко ученико́м Свои́м: не возмо́жно есть не приити́ собла́зном, го́ре же, его́же ра́ди прихо́дит.

² У́нее ^[111] ему́ бы́ло бы, а́ще же́рнов осе́льский облежа́л бы о вы́и его́, и вве́ржен в мо́ре, не́же да соблазни́т ма́лых сих еди́наго.

³ Внемли́те себе́. А́ще согреши́т к тебе́ брат твой, запрети́ ему́, и а́ще пока́ется, оста́ви ему́,

⁴ И а́ще седми́щи на день согреши́т к тебе́ и седми́щи на день обрати́тся, глаго́ля: ка́юся, оста́ви ему́.

⁵ И реко́ша Апо́столи Го́сподеви: приложи́ нам ве́ру.

⁶ Рече́ же Госпо́дь: а́ще бы́сте име́ли ве́ру я́ко зе́рно гору́шно, глаго́лали бы́сте у́бо я́годичине сей: восто́ргнися и всади́ся в мо́ре, и послу́шала бы вас.

⁷ Кото́рый же от вас раба́ име́я орю́щ или́ пасу́щ, и́же прише́дшу ему́ с села́ рече́т: а́бие мину́в ^[112] возля́зи?

⁸ Но не рече́т ли ему́: угото́вай, что вечеря́ю, и препоя́сався служи́ ми, до́ндеже ям и пию́, и пото́м я́си и пие́ши ты?

⁹ Еда́ и́мать хвалу́ ^[113] рабу́ тому́, я́ко сотвори́ повеле́нная? Не мню.

¹⁰ Та́ко и вы, егда́ сотворите́ вся повеле́нная вам, глаго́лите, я́ко раби́ неключи́ми есмы́, я́ко е́же до́лжни бе́хом сотвори́ти, сотвори́хом.

¹¹ И бысть иду́щу Ему́ во Иерусали́м, и той прохожда́ше ме́жду Самари́ею и Галиле́ею.

¹² Входя́щу же Ему́ в не́кую весь, срето́ша Его́ де́сять прокаже́нных муже́й, и́же ста́ша издале́ча.

¹³ И ти́и вознесо́ша глас, глаго́люще: Иису́се Наста́вниче, поми́луй ны.

¹⁴ И ви́дев рече́ им: ше́дше покажи́теся свяще́нником. И бысть иду́щим им, очи́стишася.

¹⁵ Еди́н же от них, ви́дев, я́ко изцеле́, возврати́ся, со гла́сом ве́лиим сла́вя Бо́га.

¹⁶ И паде́ ниц при ногу́ Его́, хвалу́ Ему́ воздая́, и той бе Самаряни́н.

¹⁷ Отвеща́в же Иису́с рече́: не де́сять ли очи́стишася? Да де́вять где?

¹⁸ Ка́ко не обрето́шася возвра́щшеся да́ти сла́ву Бо́гу, то́кмо иноплеме́нник сей?

¹⁹ И рече́ ему́: воста́в иди́, ве́ра твоя́ спасе́ тя.

²⁰ Вопроше́н же быв от фарисе́й, когда́ прии́дет Ца́рствие Бо́жие, отвеща́в им рече́: не прии́дет Ца́рствие Бо́жие с соблюде́нием. ^[114]

²¹ Ниже́ реку́т: се зде, или́: о́нде. Се бо, Ца́рствие Бо́жие внутрь вас есть.

²² Рече́ же ко ученико́м Свои́м: прии́дут дни́е, егда́ вожделе́ете еди́наго дне Сы́на Челове́ческаго ви́дети, и не у́зрите.

²³ И реку́т вам: се зде, се о́нде, не изы́дите, ни пожени́те.

²⁴ Я́ко бо мо́лния блиста́ющися от поднебе́сныя на поднебе́сней све́тится, та́ко бу́дет Сын Челове́ческий в день Свой.

²⁵ Пре́жде же подоба́ет Ему́ мно́го пострада́ти и искуше́ну ^[115] бы́ти от ро́да сего́.

²⁶ И я́коже бысть во дни Но́евы, та́ко бу́дет и во дни Сы́на Челове́ческа.

²⁷ Ядя́ху, пия́ху, женя́хуся, посяга́ху, до него́же дне вни́де Но́е в ковче́г, и прии́де пото́п и погуби́ вся.

²⁸ Та́кожде и я́коже бысть во дни Ло́товы, ядя́ху, пия́ху, купова́ху, продая́ху, сажда́ху, зда́ху,

²⁹ Во́ньже день изы́де Лот от Содо́млян, одожди́ ка́мы горя́щя и огнь с небесе́ и погуби́ вся.

³⁰ По тому́ же бу́дет и в день, во́ньже Сын Челове́ческий яви́тся.

³¹ В той день, и́же бу́дет на кро́ве, и сосу́ди его́ в дому́, да не сла́зит взя́ти их, и и́же на селе́, та́кожде да не возврати́тся вспять.

³² Помина́йте жену́ Ло́тову.

³³ И́же а́ще взы́щет ду́шу свою́ спасти́, погуби́т ю́, и и́же а́ще погуби́т ю́, живи́т ю́.

³⁴ Глаго́лю вам: в ту нощь бу́дета два на одре́ еди́ном, еди́н пое́млется, а други́й оставля́ется.

³⁵ Бу́дете две вку́пе ме́люще, еди́на пое́млется, а друга́я оставля́ется.

³⁶ Два бу́дета на селе́, еди́н пое́млется, а други́й оставля́ется.

³⁷ И отвеща́вше глаго́лаша Ему́: где, Го́споди? Он же рече́ им: иде́же те́ло, та́мо соберу́тся и орли́.

Глава 18

¹ Глаго́лаше же и при́тчу к ним, ка́ко подоба́ет всегда́ моли́тися и не стужа́ти си́,

² Глаго́ля: судия́ бе не́кий в не́коем гра́де, Бо́га не боя́ся и челове́к не срамля́яся.

³ Вдова́ же не́кая бе во гра́де том, и прихожда́ше к нему́, глаго́лющи: отмсти́ мене́ от сопе́рника моего́.

⁴ И не хотя́ше на до́лзе вре́мени. Последи́ же рече́ в себе́: а́ще и Бо́га не бою́ся, и челове́к не срамля́юся,

⁵ Но зане́ твори́т ми труды́ вдови́ца сия́, да отмщу́ ея́, да не до конца́ приходя́щи застои́т ^[116] мене́.

⁶ Рече́ же Госпо́дь: слы́шите, что судия́ непра́вды глаго́лет?

⁷ Бог же не и́мать ли сотвори́ти отмще́ние избра́нных Свои́х, вопию́щих к Нему́ день и нощь, и долготерпя́ о них?

⁸ Глаго́лю вам, я́ко сотвори́т отмще́ние их вско́ре. Оба́че Сын Челове́ческий прише́д, у́бо обря́щет ли си́ ве́ру на земли́?

⁹ Рече́ же и ко други́м упова́ющим собо́ю, я́ко суть пра́ведницы, и уничижа́ющим про́чих, при́тчу сию́:

¹⁰ Челове́ка два внидо́ста в це́рковь помоли́тися, еди́н фарисе́й, а други́й мыта́рь.

¹¹ Фарисе́й же став, си́це в себе́ моля́шеся: Бо́же, хвалу́ Тебе́ воздаю́, я́ко несмь я́коже про́чии челове́цы, хи́щницы, непра́ведницы, прелюбоде́е, или́ я́коже сей мыта́рь.

¹² Пощу́ся двакра́ты в суббо́ту, десяти́ну даю́ всего́ ели́ко притяжу́.

¹³ Мыта́рь же издале́ча стоя́, не хотя́ше ни о́чию возвести́ на не́бо, но бия́ше пе́рси своя́, глаго́ля: Бо́же, ми́лостив бу́ди мне гре́шнику.

¹⁴ Глаго́лю вам, я́ко сни́де сей оправда́н в дом свой па́че о́наго, я́ко всяк вознося́йся смири́тся, смиря́яй же себе́ вознесе́тся.

¹⁵ Приноша́ху же к Нему́ и младе́нцы, да их ко́снется, ви́девше же ученицы́ запрети́ша им.

¹⁶ Иису́с же призва́в их, глаго́ла: оста́вите дете́й приходи́ти ко Мне и не брани́те им, таковы́х бо есть Ца́рствие Бо́жие.

¹⁷ Ами́нь бо глаго́лю вам: и́же а́ще не прии́мет Ца́рствия Бо́жия я́ко отроча́, не и́мать вни́ти в не́.

¹⁸ И вопроси́ Его́ не́кий князь, глаго́ля: Учи́телю благи́й, что сотвори́в, живо́т ве́чный насле́дствую?

¹⁹ Рече́ же ему́ Иису́с: что Мя глаго́леши бла́га? Никто́же благ, то́кмо еди́н Бог.

²⁰ За́поведи ве́си, не прелюбы́ твори́, не уби́й, не укра́ди, не лжесвиде́тельствуй, чти отца́ твоего́ и ма́терь твою́.

²¹ Он же рече́: вся сия́ сохрани́х от ю́ности моея́.

²² Слы́шав же сия́ Иису́с рече́ ему́: еще́ еди́наго не доконча́л еси́, вся, ели́ка и́маши, прода́ждь и разда́й ни́щим, и име́ти и́маши сокро́вище на небеси́, и гряди́ во след Мене́.

²³ Он же слы́шав сие́, приско́рбен бысть, бе бо бога́т зело́.

²⁴ Ви́дев же его́ Иису́с приско́рбна бы́вша, рече́: ка́ко не удо́бь иму́щии бога́тство в Ца́рствие Бо́жие вни́дут.

²⁵ Удо́бее бо есть вельбу́ду сквозе́ иглине́ у́ши проити́, не́же бога́ту в Ца́рствие Бо́жие вни́ти.

²⁶ Ре́ша же слы́шавшии: то кто мо́жет спасе́н бы́ти?

²⁷ Он же рече́: невозмо́жная от челове́к возмо́жна суть от Бо́га.

²⁸ Рече́ же Петр: се мы оста́вихом вся и по Тебе́ идо́хом.

²⁹ Он же рече́ им: ами́нь глаго́лю вам, я́ко никто́же есть, и́же оста́вит дом, или́ роди́тели, или́ бра́тию, или́ сестры́, или́ жену́, или́ ча́да, Ца́рствия ра́ди Бо́жия,

³⁰ И́же не прии́мет мно́жицею во вре́мя сие́, и в век гряду́щий живо́т ве́чный.

³¹ Пое́м же обана́десяте ученика́ Своя́, рече́ к ним: се восхо́дим во Иерусали́м, и сконча́ются вся пи́санная проро́ки о Сы́не Челове́честе.

³² Предадя́т бо Его́ язы́ком и поруга́ются Ему́, и укоря́т Его́ и оплю́ют Его́,

³³ И би́вше убию́т Его́, и в тре́тий день воскре́снет.

³⁴ И ти́и ничесо́же от сих разуме́ша, и бе глаго́л сей сокрове́н от них, и не разумева́ху глаго́лемых.

³⁵ Бысть же егда́ прибли́жися Иису́с во Иерихо́н, слепе́ц не́кий седя́ше при пути́ прося́.

³⁶ Слы́шав же наро́д мимоходя́щь, вопроша́ше: что у́бо есть сие́?

³⁷ Пове́даша же ему́, я́ко Иису́с Назаряни́н мимохо́дит.

³⁸ И возопи́, глаго́ля: Иису́се Сы́не Дави́дов, поми́луй мя.

³⁹ И предиду́щии преща́ху ему́, да умолчи́т, он же па́че мно́жае вопия́ше: Сы́не Дави́дов, поми́луй мя.

⁴⁰ Став же Иису́с повеле́ привести́ его́ к Себе́. Прибли́жшу же ся ему́ к Нему́, вопроси́ его́,

⁴¹ Глаго́ля: что хо́щеши, да ти сотворю́? Он же рече́: Го́споди, да прозрю́.

⁴² Иису́с же рече́ ему́: прозри́, ве́ра твоя́ спасе́ тя.

⁴³ И а́бие прозре́, и во след Его́ идя́ше, сла́вя Бо́га. И вси лю́дие ви́девше возда́ша хвалу́ Бо́гови.

Глава 19

¹ И вшед прохожда́ше [во] Иерихон.

² И се муж нарица́емый Закхе́й, и сей бе ста́рей мытаре́м, и той бе бога́т.

³ И иска́ше ви́дети Иису́са, кто есть, и не можа́ше от наро́да, я́ко во́зрастом мал бе.

⁴ И предите́к, возле́зе на я́годичину, да ви́дит, я́ко туде́ хотя́ше мину́ти.

⁵ И я́ко прии́де на ме́сто, воззре́в Иису́с ви́дев его́ и рече́ к нему́: Закхе́е, потща́вся сле́зи, днесь бо в дому́ твое́м подоба́ет Ми бы́ти.

⁶ И потща́вся сле́зе и прия́т Его́ ра́дуяся.

⁷ И ви́девше вси ропта́ху, глаго́люще, я́ко ко гре́шну му́жу вни́де вита́ти.

⁸ Став же Закхе́й рече́ ко Го́споду: се пол име́ния моего́, Го́споди, дам ни́щим, и а́ще кого́ чим оби́дех, возвращу́ четвери́цею.

⁹ Рече́ же к нему́ Иису́с, я́ко днесь спасе́ние до́му сему́ бысть, зане́ и сей сын Авраа́мль есть.

¹⁰ Прии́де бо Сын Челове́чь взыска́ти и спасти́ поги́бшаго.

¹¹ Слы́шащим же им сия́, прило́жь рече́ при́тчу, зане́ близ ему бы́ти Иерусали́ма, и мня́ху, я́ко а́бие Ца́рство Бо́жие хо́щет яви́тися.

¹² И рече́ у́бо: челове́к не́кий добра́ ро́да и́де на страну́ дале́че прия́ти себе́ ца́рство и возврати́тися.

¹³ Призва́в же де́сять раб свои́х, даде́ им де́сять мнас и рече́ к ним: ку́плю де́йте, до́ндеже прииду́.

¹⁴ И гра́ждане его́ ненави́дяху его́ и посла́ша моли́тву в след его́, глаго́люще: не хо́щем сему́, да ца́рствует над на́ми.

¹⁵ И бысть егда́ возврати́ся прии́м ца́рство, рече́ пригласи́ти рабы́ ти́и, и́мже даде́ сребро́, да уве́сть, какову́ ку́плю суть сотвори́ли.

¹⁶ Прии́де же пе́рвый, глаго́ля: го́споди, мнас твоя́ приде́ла де́сять мнас.

¹⁷ И рече́ ему́: благи́й ра́бе до́брый, я́ко о ма́ле ве́рен был еси́, бу́ди о́бласть име́я над десятию́ градо́в.

¹⁸ И прии́де вторы́й, глаго́ля: го́споди, мнас твоя́ сотвори́ пять мнас.

¹⁹ Рече́ же и тому́: и ты бу́ди над пятию́ градо́в.

²⁰ И други́й прии́де, глаго́ля: го́споди, се мнас твоя́, ю́же име́х положе́ну во убру́се.

²¹ Боя́хся бо тебе́, я́ко челове́к яр еси́, взе́млеши, его́же не положи́, и жне́ши, его́же не се́яв.

²² Глаго́ла же ему́: от уст твои́х сужду́ ти, лука́вый ра́бе, ве́дяше, я́ко аз челове́к яр есмь, вземлю́, его́же не положи́в, и жну, его́же не се́яв.

²³ И почто́ не вдал еси́ моего́ сребра́ купце́м, и аз прише́д с ли́хвою истяза́л бых е́?

²⁴ И предстоя́щим рече́: возьми́те от него́ мнас и дади́те иму́щему де́сять мнас.

²⁵ И ре́ша ему́: го́споди, и́мать де́сять мнас.

²⁶ Глаго́лю бо вам, я́ко вся́кому иму́щему да́стся, а от неиму́щаго, и е́же и́мать, оты́мется от него́.

²⁷ Оба́че враги́ моя́ о́ны, и́же не восхо́теша мне, да царь бых был над ни́ми, приведи́те се́мо и изсецы́те пре́до мно́ю.

²⁸ И сия́ рек, идя́ше преди́, восходя́ во Иерусали́м.

²⁹ И бысть я́ко прибли́жися в Вифсфаги́ю и Вифа́нию, к горе́ нарица́емей Елео́н, посла́ два учени́к Свои́х,

³⁰ Глаго́ля: иди́те в пря́мную весь, и в ню́же входя́ща обря́щета жребя́ привя́зано, на не́же никто́же николи́же от челове́к все́де, отре́шша е́ приведи́та.

³¹ И а́ще кто вы вопроша́ет: почто́ отреша́ета? Си́це рцы́та ему́, я́ко Госпо́дь его́ тре́бует.

³² Ше́дша же по́сланная обрето́ста, я́коже рече́ и́ма.

³³ Отреша́ющема же и́ма жребя́, реко́ша госпо́дие его́ к ни́ма: что отреша́ета жребя́?

³⁴ О́на же реко́ста, я́ко Госпо́дь его́ тре́бует.

³⁵ И приведо́ста е́ ко Иису́сови, и возве́ргше ри́зы своя́ на жребя́, всади́ша Иису́са.

³⁶ Иду́щу же Ему́, постила́ху ри́зы своя́ по пути́.

³⁷ Приближа́ющу же ся Ему́ уже́ а́бие к низхожде́нию го́ре Елео́нстей, нача́ша все мно́жество учени́к ра́дующеся хвали́ти Бо́га гла́сом ве́лиим о всех си́лах, я́же ви́деша,

³⁸ Глаго́люще: благослове́н гряды́й Царь во и́мя Госпо́дне, мир на небеси́ и сла́ва в вы́шних.

³⁹ И не́цыи фарисе́е от наро́да ре́ша к Нему́: Учи́телю, запрети́ ученико́м Твои́м.

⁴⁰ И отвеща́в рече́ им: глаго́лю вам, я́ко а́ще си́и умолча́т, ка́мение возопие́т.

⁴¹ И я́ко прибли́жися, ви́дев град, пла́кася о нем,

⁴² Глаго́ля: я́ко а́ще бы разуме́л и ты, в день сей твой, е́же к смире́нию твоему́, ны́не же скры́ся от о́чию твое́ю.

⁴³ Я́ко прии́дут дни́е на тя, и обложа́т врази́ твои́ остро́г о тебе́, и обы́дут тя, и обы́мут тя всю́ду.

⁴⁴ И разбию́т тя и ча́да твоя́ в тебе́, и не оста́вят ка́мень на ка́мени в тебе́, поне́же не разуме́ вре́мене посеще́ния твоего́.

⁴⁵ И вшед в це́рковь, нача́т изгони́ти продаю́щия в ней и купу́ющия,

⁴⁶ Глаго́ля им: пи́сано есть: дом Мой дом моли́твы есть, вы же сотвори́сте его́ пеще́ру разбо́йником.

⁴⁷ И бе учя́ по вся дни в це́ркви. Архиере́е же и кни́жницы иска́ху Его́ погуби́ти, и старе́йшины лю́дем.

⁴⁸ И необрета́ху, что сотворя́т Ему́, лю́дие бо вси держа́хуся Его́, послу́шающе Его́.

Глава 20

¹ И бысть во еди́н от дни́й о́нех, уча́щу Ему́ лю́ди в це́ркви и благовеству́ющу, приидо́ша свяще́нницы и кни́жницы со ста́рцы,

² И ре́ша к Нему́, глаго́люще: рцы нам, ко́ею о́бластию сия́ твори́ши, или́ кто есть да́вый Тебе́ власть сию́?

³ Отвеща́в же рече́ к ним: вопрошу́ вы и Аз еди́наго словесе́, и рцы́те Ми:

⁴ Креще́ние Иоа́нново с небесе́ ли бе, или́ от челове́к?

⁵ Они́ же помышля́ху в себе́, глаго́люще, я́ко а́ще рече́м: с небесе́, рече́т: почто́ у́бо не ве́ровасте ему́?

⁶ А́ще ли же рече́м: от челове́к, вси лю́дие ка́мением побию́т ны. Изве́стно бо бе о Иоа́нне, я́ко проро́к бе.

⁷ И отвеща́ша: не ве́мы отку́ду.

⁸ Иису́с же рече́ им: ни Аз глаго́лю вам, ко́ею о́бластию сия́ творю́.

⁹ Нача́т же к лю́дем глаго́лати при́тчу сию́: челове́к не́кий насади́ виногра́д, и вдаде́ его́ де́лателем, и оты́де на ле́та мно́га.

¹⁰ И во вре́мя посла́ к де́лателем раба́, да от плода́ виногра́да даду́т ему́, де́латели же би́вше его́, посла́ша тща.

¹¹ И приложи́ посла́ти друга́го раба́, они́ же и того́ би́вше и доса́ждьше ему́, посла́ша тща.

¹² И приложи́ посла́ти тре́тияго, они́ же и того́ уя́звльше изгна́ша.

¹³ Рече́ же господи́н виногра́да: что сотворю́? Послю́ сы́на моего́ возлю́бленнаго, еда́ ка́ко, его́ ви́девше, усрамя́тся.

¹⁴ Ви́девше же его́ де́лателе, мы́шляху в себе́, глаго́люще: сей есть насле́дник, прииди́те, убие́м его́, да на́ше бу́дет достоя́ние.

¹⁵ И изве́дше его́ вон из виногра́да, уби́ша. Что у́бо сотвори́т им господи́н виногра́да?

¹⁶ Прии́дет и погуби́т де́латели сия́ и вдаст виногра́д ине́м. Слы́шавше же реко́ша: да не бу́дет.

¹⁷ Он же воззре́в на них, рече́: что у́бо пи́саное сие́, ка́мень, его́же небрего́ша зи́ждущии, сей бысть во главу́ у́гла?

¹⁸ Всяк пады́й на ка́мени том, сокруши́тся, а на не́мже паде́т, стры́ет его́.

¹⁹ И взыска́ша архиере́е и ста́рцы, возложи́ти ру́це на Иису́са, и убоя́шася наро́да, разуме́ша бо, я́ко к ним при́тчу сию́ рече́.

²⁰ И наблю́дше посла́ша ла́ятели, ^[117] творя́ще себе́ пра́ведники бы́ти, да и́мут Его́ в словеси́, во е́же преда́ти Его́ нача́льству и о́бласти иге́монове.

²¹ И вопроси́ша Его́, глаго́люще: Учи́телю, ве́мы, я́ко пра́во глаго́леши и учи́ши, и не на лица́ зри́ши, но вои́стинну пути́ Бо́жию учи́ши.

²² Досто́ит ли нам ке́сареви дань дая́ти, или́ ни?

²³ Разуме́в же их лука́вство, рече́ к ним: что Мя искуша́ете?

²⁴ Покажи́те Ми ца́ту: ^[118] чий и́мать о́браз и надписа́ние? Отвеща́вше же реко́ша: ке́сарев.

²⁵ Он же рече́ им: воздади́те у́бо, я́же ке́сарева, ке́сареви, и я́же Бо́жия, Бо́гови.

²⁶ И не мого́ша зазре́ти глаго́ла Его́ пред людьми́, и диви́шася о отве́те Его́ и умолча́ша.

²⁷ Приступи́ша же не́цыи от саддуке́й, глаго́лющии воскресе́нию не бы́ти, вопроша́ху Его́,

²⁸ Глаго́люще: Учи́телю, Моисе́й написа́ нам: а́ще кому́ брат у́мрет имы́й жену́, и той безча́ден у́мрет, да брат его́ по́ймет жену́ и возста́вит се́мя бра́ту своему́.

²⁹ Седмь у́бо бра́тия бе, и пе́рвый поя́т жену́, у́мре безча́ден,

³⁰ И поя́т вторы́й жену́, и той у́мре безча́ден,

³¹ И тре́тий поя́т ю́, та́кожде же и вси седмь, и не оста́виша чад и умро́ша.

³² По́слежде же всех у́мре и жена́.

³³ В воскресе́ние у́бо, кото́раго их бу́дет жена́? Седмь бо име́ша ю́ жену́.

³⁴ И отвеща́в рече́ им Иису́с: сы́нове ве́ка сего́ же́нятся и посяга́ют,

³⁵ А сподо́бльшиися век о́н улучи́ти и воскресе́ние, е́же от ме́ртвых, ни же́нятся, ни посяга́ют.

³⁶ Ни умре́ти бо ктому́ мо́гут, ра́вни бо суть А́нгелом и сы́нове суть Бо́жии, воскресе́ния сы́нове су́ще.

³⁷ А я́коже востаю́т ме́ртвии, и Моисе́й сказа́ при купине́, я́коже глаго́лет Го́спода Бо́га Авраа́мля и Бо́га Исаа́кова и Бо́га Иа́ковля,

³⁸ Бог же несть ме́ртвых, но живы́х, вси бо Тому́ жи́ви суть.

³⁹ Отвеща́вше же не́цыи от кни́жник реко́ша: Учи́телю, до́бре рекл еси́.

⁴⁰ Ктому́ же не сме́яху Его́ вопроси́ти ничесо́же. Рече́ же к ним:

⁴¹ Ка́ко глаго́лют Христа́ Сы́на Дави́дова бы́ти?

⁴² Сам бо Дави́д глаго́лет в кни́зе псало́мстей: рече́ Госпо́дь Го́сподеви моему́: седи́ одесну́ю Мене́,

⁴³ До́ндеже положу́ враги́ Твоя́ подно́жие нога́ма Твои́ма.

⁴⁴ Дави́д у́бо Го́спода Его́ нарица́ет, и ка́ко Сын ему́ есть?

⁴⁵ Слы́шащим же всем лю́дем, рече́ ученико́м свои́м:

⁴⁶ Внемли́те себе́ от кни́жник хотя́щих ходи́ти во оде́ждах и лю́бящих целова́ния на то́ржищих и председа́ния на со́нмищах и преждезва́ния на ве́черях,

⁴⁷ И́же снеда́ют до́мы вдови́ц и вино́ю дале́че мо́лятся, ^[119] си́и прии́мут ли́шше осужде́ние.

Глава 21

¹ Воззре́в же ви́де вмета́ющия в храм набдя́щий име́ния, ^[120] да́ры своя́ бога́тыя.

² Ви́дев же и не́кую вдови́цу убо́гу вмета́ющу ту две ле́пте,

³ И рече́: вои́стинну глаго́лю вам, я́ко вдови́ца сия́ убо́гая мно́жае всех вве́рже.

⁴ Вси бо си́и от избы́тка своего́ вверго́ша в да́ры Бо́гови, сия́ же от лише́ния своего́ все житие́, е́же име́, вве́рже.

⁵ И не́ким глаго́лющим о це́ркви, я́ко ка́мением до́брым и сосу́ды укра́шена, рече́:

⁶ Сия́ я́же ви́дите, прии́дут дни́е, в ня́же не оста́нет ка́мень на ка́мени, и́же не разори́тся.

⁷ Вопроси́ша же Его́, глаго́люще: Учи́телю, когда́ у́бо сия́ бу́дут? И что есть зна́мение, егда́ хотя́т сия́ бы́ти?

⁸ Он же рече́: блюди́те, да не прельще́ни бу́дете, мно́зи бо прии́дут во и́мя Мое́, глаго́люще, я́ко Аз есмь, и вре́мя прибли́жися. Не изы́дите у́бо во след их.

⁹ Егда́ же услы́шите бра́ни и нестрое́ния, не убо́йтеся: подоба́ет бо сим бы́ти пре́жде: но не у́ [абие] кончи́на.

¹⁰ Тогда́ глаго́лаше им: воста́нет бо язы́к на язы́к, и ца́рство на ца́рство.

¹¹ Тру́си же вели́цы по ме́стам и гла́ди и па́губы бу́дут, страхова́ния же и зна́мения ве́лия с небесе́ бу́дут.

¹² Пре́жде же сих всех, возложа́т на вы ру́ки своя́ и иждену́т, предаю́ще на со́нмища и темни́цы, ведо́мы к царе́м и влады́кам, и́мене Моего́ ра́ди,

¹³ Прилучи́тся же вам во свиде́тельство.

¹⁴ Положи́те у́бо на сердца́х ва́ших, не пре́жде поуча́тися отвещава́ти.

¹⁵ Аз бо дам вам уста́ и прему́дрость, е́йже не возмо́гут проти́витися или́ отвеща́ти вси противля́ющиися вам.

¹⁶ Пре́дани же бу́дете и роди́тели и бра́тиею и ро́дом и дру́ги, и умертвя́т от вас.

¹⁷ И бу́дете ненави́дими от всех и́мене Моего́ ра́ди.

¹⁸ И влас главы́ ва́шея не поги́бнет.

¹⁹ В терпе́нии ва́шем стяжи́те ду́ши ва́ша.

²⁰ Егда́ же у́зрите обстои́мь Иерусали́м во́и, тогда́ разуме́йте, я́ко прибли́жися запусте́ние ему́.

²¹ Тогда́ су́щии во Иуде́и да бе́гают в го́ры, и и́же посреде́ его́, да исхо́дят, и и́же во страна́х, да не вхо́дят вонь.

²² Я́ко дни́е отмще́нию си́и суть, я́ко испо́лнитися всему́ пи́санному.

²³ Го́ре же иму́щим во утро́бе и доя́щим в ты́я дни, бу́дет бо беда́ ве́лия на земли́ и гнев на лю́дех сих.

²⁴ И паду́т во о́стрии меча́, и плене́ни бу́дут во вся язы́ки, и Иерусали́м бу́дет попира́емь язы́ки, до́ндеже сконча́ются времена́ язы́к.

²⁵ И бу́дут зна́мения в со́лнце и луне́ и звезда́х, и на земли́ туга́ язы́ком от неча́яния шу́ма морска́го и возмуще́ния,

²⁶ Издыха́ющим челове́ком от стра́ха и ча́яния гряду́щих на вселе́нную, си́лы бо небе́сныя подви́гнутся.

²⁷ И тогда́ у́зрят Сы́на Челове́ческа гряду́ща на о́блацех с си́лою и сла́вою мно́гою.

²⁸ Начина́ющим же сим быва́ти, восклони́теся и воздви́гните главы́ ва́ша, зане́ приближа́ется избавле́ние ва́ше.

²⁹ И рече́ при́тчу им: ви́дите смоко́вницу и вся древа́,

³⁰ Егда́ прошиба́ются уже́, ви́дяще са́ми ве́сте, я́ко близ жа́тва есть.

³¹ Та́ко и вы, егда́ у́зрите сия́ быва́юща, ве́дите, я́ко близ есть Ца́рствие Бо́жие.

³² Ами́нь глаго́лю вам, я́ко не и́мать прейти́ род сей, до́ндеже вся сия́ бу́дут.

³³ Не́бо и земля́ ми́мо и́дет, а словеса́ Моя́ не и́мут прейти́.

³⁴ Внемли́те же себе́, да не когда́ отягча́ют се́рдца ва́ша объяде́нием и пия́нством и печа́льми жите́йскими, и на́йдет на вы внеза́пу день той.

³⁵ Я́ко сеть бо прии́дет на вся живу́щия на лицы́ всея́ земли́.

³⁶ Бди́те у́бо на вся́ко вре́мя моля́щеся, да сподо́битеся убежа́ти всех сих хотя́щих бы́ти, и ста́ти пред Сы́ном Челове́ческим.

³⁷ Бе́ же во дни во це́ркви учя́, но́щию же исходя́ водворя́шеся в горе́ нарица́емей Елео́н.

³⁸ И вси лю́дие из у́тра прихожда́ху к Нему́ во це́рковь послу́шати Его́.

Глава 22

¹ Приближа́шеся же пра́здник опресно́к, глаго́лемый Па́сха.

² И иска́ху архиере́е и кни́жницы, ка́ко бы́ша уби́ли Его́, боя́хуся бо люде́й.

³ Вни́де же сатана́ во Иу́ду нарица́емаго Искарио́т, су́ща от числа́ обоюна́десяте.

⁴ И шед глаго́ла архиере́ом и воево́дам, ка́ко Его́ преда́ст им.

⁵ И возра́довашася и совеща́ша ему́ сре́бреники да́ти.

⁶ И испове́да, ^[121] и иска́ше подо́бна вре́мене, да преда́ст Его́ им без наро́да.

⁷ Прии́де же день опресно́к, во́ньже подо́бно бе [вре́мя] жре́ти па́сху.

⁸ И посла́ Петра́ и Иоа́нна, рек: ше́дша угото́вайта нам па́сху, да я́мы.

⁹ О́на же реко́ста Ему́: где хо́щеши угото́ваем?

¹⁰ Он же рече́ им: се восходя́щема ва́ма во град, сря́щет вы челове́к в скуде́льнице во́ду нося́, по нем иде́та в дом, во́ньже вхо́дит.

¹¹ И рце́та до́му влады́це: глаго́лет тебе́ Учи́тель, где есть оби́тель, иде́же па́сху со ученики́ Мои́ми снем?

¹² И той ва́ма пока́жет го́рницу ве́лию по́стлану, ту угото́вайта.

¹³ Ше́дша же обрето́ста, я́коже рече́ и́ма, и угото́васта па́сху.

¹⁴ И егда́ бысть час, возлеже́, и обана́десяте Апо́стола с Ним,

¹⁵ И рече́ к ним: жела́нием возжеле́х сию́ па́сху я́сти с ва́ми, пре́жде да́же не прииму́ мук.

¹⁶ Глаго́лю бо вам, я́ко отсе́ле не и́мам я́сти от него́, до́ндеже сконча́ются во Ца́рствии Бо́жии.

¹⁷ И прии́м ча́шу, хвалу́ возда́в, рече́: приими́те сию́, и раздели́те себе́.

¹⁸ Глаго́лю бо вам, я́ко не и́мам пи́ти от плода́ ло́знаго, до́ндеже Ца́рствие Бо́жие прии́дет.

¹⁹ И прии́м хлеб, хвалу́ возда́в, преломи́ и даде́ им, глаго́ля: сие́ есть те́ло Мое́, е́же за вы дае́мо, сие́ твори́те в Мое́ воспомина́ние.

²⁰ Та́кожде же и ча́шу по ве́чери, глаго́ля: сия́ ча́ша Но́вый Заве́т Мое́ю кро́вию, я́же за вы пролива́ется,

²¹ Оба́че се рука́ предаю́щаго Мя со Мно́ю есть на трапе́зе.

²² И Сын у́бо Челове́ческий и́дет по рече́нному, ^[122] оба́че го́ре челове́ку тому́, и́мже предае́тся.

²³ И ти́и нача́ша иска́ти в себе́, кото́рый у́бо от них хотя́й сие́ сотвори́ти.

²⁴ Бы́сть же и пря́ в них, ки́й мни́тся их бы́ти бо́лий.

²⁵ Он же рече́ им: ца́рие язы́к госпо́дствуют и́ми, и облада́ющии и́ми благода́теле нарица́ются.

²⁶ Вы же не та́ко, но бо́лий в вас, да бу́дет я́ко мний, и ста́рей, я́ко служа́й.

²⁷ Кто бо бо́лий, возлежа́й ли или́ служа́й? Не возлежа́й ли? Аз же посреде́ вас есмь я́ко служа́й.

²⁸ Вы же есте́ пребы́вше со Мно́ю в напа́стех Мои́х.

²⁹ И Аз завещава́ю вам, я́коже завеща́ Мне Оте́ц Мой, Ца́рство,

³⁰ Да я́сте и пие́те на трапе́зе Мое́й во Ца́рствии Мое́м, и ся́дете на престо́лех, судя́ще обемана́десяте коле́нома Изра́илевома.

³¹ Рече́ же Госпо́дь: Си́моне, Си́моне, се сатана́ про́сит вас, дабы́ се́ял, я́ко пшени́цу.

³² Аз же моли́хся о тебе́, да не оскуде́ет ве́ра твоя́, и ты не́когда обра́щься утверди́ бра́тию твою́.

³³ Он же рече́ Ему́: Го́споди, с Тобо́ю гото́в есмь и в темни́цу и на смерть ити́.

³⁴ Он же рече́: глаго́лю ти, Пе́тре, не возгласи́т пе́тель днесь, до́ндеже трикра́ты отве́ржешися Мене́ не ве́дети.

³⁵ И рече́ им: егда́ посла́х вы без влага́лища и без ме́ха и без сапо́г, еда́ что́ лише́ни бы́сте? Они́ же ре́ша: ничесо́же.

³⁶ Рече́ же им: но ны́не и́же и́мать влага́лище, да во́змет, та́кожде и мех, а и́же не и́мать, да прода́ст ри́зу свою́, и ку́пит нож.

³⁷ Глаго́лю бо вам, я́ко еще́ пи́саное се подоба́ет, да сконча́ется о Мне, е́же: и со беззако́нными вмени́ся. И́бо е́же о Мне, кончи́ну и́мать.

³⁸ Они́ же ре́ша: Го́споди, се ножа́ зде два. Он же рече́ им: дово́льно есть.

³⁹ И изше́д и́де по обы́чаю в го́ру Елео́нскую, по Нем же идо́ша ученицы́ Его́.

⁴⁰ Быв же на ме́сте, рече́ им: моли́теся, да не вни́дете в напа́сть.

⁴¹ И Сам отступи́ от них я́ко верже́нием ка́мене, и покло́нь коле́на моля́шеся,

⁴² Глаго́ля: О́тче, а́ще во́лиши мимонести́ ча́шу сию́ от Мене́, оба́че не Моя́ во́ля, но Твоя́ да бу́дет.

⁴³ Яви́ся же Ему́ А́нгел с небесе́, укрепля́я Его́.

⁴⁴ И быв в по́двизе, приле́жнее моля́шеся: бысть же пот Его́ я́ко ка́пли кро́ве ка́плющия на зе́млю.

⁴⁵ И воста́в от моли́твы и прише́д ко ученико́м, обре́те их спя́щих от печа́ли.

⁴⁶ И рече́ им: что спите́? Воста́вше моли́теся, да не вни́дете в напа́сть.

⁴⁷ Еще́ же Ему́ глаго́лющу, се наро́д, и нарица́емый Иу́да, еди́н от обоюна́десяте, идя́ше пред ни́ми, и приступи́ ко Иису́сови целова́ти Его́. Сие́ бо бе зна́мение дал им: Его́же а́ще лобжу́, Той есть.

⁴⁸ Иису́с же рече́ ему́: Иу́до, лобза́нием ли Сы́на Челове́ческаго предае́ши?

⁴⁹ Ви́девше же, и́же бе́ху о Нем быва́емое, ре́ша Ему́: Го́споди, а́ще уда́рим ноже́м?

⁵⁰ И уда́ри еди́н не́кий от них архиере́ова раба́ и уре́за ему́ у́хо десно́е.

⁵¹ Отвеща́в же Иису́с рече́: оста́вите до сего́. И косну́в во у́хо его́, исцели́ его́.

⁵² Рече́ же Иису́с ко прише́дшим Нань архиере́ом и воево́дам церко́вным и ста́рцем: я́ко на разбо́йника ли изыдо́сте со ору́жием и дреко́льми я́ти Мя?

⁵³ По вся дни су́щу Ми с ва́ми в це́ркви, не простро́сте руки́ на Мя, но се есть ва́ша годи́на и о́бласть те́мная.

⁵⁴ Е́мше же Его́ ведо́ша и введо́ша Его́ во двор архиере́ов. Петр же вслед идя́ше издале́ча.

⁵⁵ Возгне́щшим же огнь посреде́ двора́ и вку́пе седя́щим им, седя́ше Петр посреде́ их.

⁵⁶ Узре́вши же его́ рабы́ня не́кая седя́ща при све́те и воззре́вши нань, рече́: и сей с Ним бе.

⁵⁷ Он же отве́ржеся Его́, глаго́ля: же́но, не зна́ю Его́.

⁵⁸ И пома́ле други́й ви́дев его́, рече́: и ты от них еси́. Петр же рече́: челове́че, несмь.

⁵⁹ И мимоше́дшу я́ко часу́ еди́ному, ин не́кий крепля́шеся глаго́ля: вои́стинну и сей с Ним бе, и́бо Галиле́анин есть.

⁶⁰ Рече́ же Петр: челове́че, не вем, е́же глаго́леши. И а́бие, еще́ глаго́лющу ему́, возгласи́ пе́тель.

⁶¹ И обра́щься Госпо́дь воззре́ на Петра́, и помяну́ Петр сло́во Госпо́дне, я́коже рече́ ему́: я́ко пре́жде да́же пе́тель не возгласи́т, отве́ржешися Мене́ трикра́ты.

⁶² И изше́д вон пла́кася го́рько.

⁶³ И му́жие держа́щии Иису́са руга́хуся Ему́, бию́ще.

⁶⁴ И закры́вше Его́, бия́ху Его́ по лицу́ и вопроша́ху Его́, глаго́люще: прорцы́, кто есть ударе́й Тя?

⁶⁵ И и́на мно́га ху́ляще глаго́лаху Нань.

⁶⁶ И я́ко бысть день, собра́шася ста́рцы людсти́и и архиере́е и кни́жницы, и ведо́ша Его́ на сонм свой,

⁶⁷ Глаго́люще: а́ще Ты еси́ Христо́с? Рцы нам. Рече́ же им: а́ще вам реку́, не и́мете ве́ры,

⁶⁸ А́ще же и вопрошу́ вы, не отвеща́ете Ми, ни отпустите́.

⁶⁹ Отсе́ле бу́дет Сын Челове́ческий седя́й одесну́ю си́лы Бо́жия.

⁷⁰ Ре́ша же вси: Ты ли у́бо еси́ Сын Бо́жий? Он же к ним рече́: вы глаго́лете, я́ко Аз есмь.

⁷¹ Они́ же ре́ша: что еще́ тре́буем свиде́тельства? Са́ми бо слы́шахом от уст Его́.

Глава 23

¹ И воста́вше все мно́жество их, ведо́ша Его́ к Пила́ту.

² Нача́ша же Нань ва́дити, глаго́люще: Сего́ обрето́хом развраща́юща язы́к наш и возбраня́юща ке́сареви дань дая́ти, глаго́люща Себе́ Христа́ Царя́ бы́ти.

³ Пила́т же вопроси́ Его́, глаго́ля: Ты ли еси́ Царь Иуде́ом? Он же отвеща́в рече́ ему́: ты глаго́леши.

⁴ Пила́т же рече́ ко архиере́ом и наро́ду: ни коея́же обрета́ю вины́ в челове́це сем.

⁵ Они́ же крепля́хуся глаго́люще, я́ко развраща́ет лю́ди, учя́ по всей Иуде́и, наче́н от Галиле́и до зде.

⁶ Пила́т же слы́шав Галиле́ю, вопроси́, а́ще челове́к Галиле́анин есть?

⁷ И разуме́в, я́ко от о́бласти И́родовы есть, посла́ Его́ ко И́роду, су́щу и тому́ во Иерусали́ме в ты́я дни.

⁸ И́род же ви́дев Иису́са рад бысть зело́, бе бо жела́я от мно́га вре́мене ви́дети Его́, зане́ слы́шаше мно́га о Нем, и наде́яшеся зна́мение не́кое ви́дети от Него́ быва́емо.

⁹ Вопроша́ше же Его́ словесы́ мно́ги, Он же ничесо́же отвещава́ше ему́.

¹⁰ Стоя́ху же архиере́е и кни́жницы, приле́жно ва́дяще Нань.

¹¹ Укори́в же Его́ И́род с во́и свои́ми и поруга́вся, обо́лк его́ в ри́зу све́тлу, возврати́ Его́ к Пила́ту.

¹² Бы́ста же си дру́га И́род же и Пила́т в той день с собо́ю, пре́жде бо бе́ста вражду́ иму́ща между́ собо́ю.

¹³ Пила́т же созва́ архиере́и и кня́зи и лю́ди.

¹⁴ Рече́ к ним: приведо́сте ми челове́ка сего́, я́ко развраща́юща лю́ди, и се аз пред ва́ми истяза́в, ни еди́ныя же обрета́ю в челове́це сем вины́, я́же Нань ва́дите.

¹⁵ Но ни И́род, посла́х бо Его́ к нему́, и се ничто́же досто́йно сме́рти сотворе́но есть о Нем.

¹⁶ Показа́в ^[123] у́бо Его́ отпущу́.

¹⁷ Ну́жду же имя́ше на вся пра́здники отпуща́ти им еди́наго.

¹⁸ Возопи́ша же вси наро́ди, глаго́люще: возми́ Сего́, отпусти́ же нам Вара́вву.

¹⁹ И́же бе за не́кую крамолу́ бы́вшую во гра́де и уби́йство вве́ржен в темни́цу.

²⁰ Па́ки же Пила́т возгласи́, хотя́ отпусти́ти Иису́са.

²¹ Они́ же возглаша́ху, глаго́люще: распни́, распни́ Его́.

²² Он же трети́цею рече́ к ним: что бо зло сотвори́ Сей? Ничесо́же досто́йна сме́рти обрето́х о Нем, показа́в ^[124] у́бо Его́ отпущу́.

²³ Они́ же прилежа́ху гла́сы вели́кими, прося́ще Его́ на распя́тие, и устоя́ху ^[125] гла́си их и архиере́йстии.

²⁴ Пила́т же посуди́ бы́ти проше́нию их.

²⁵ Отпусти́ же и́же за крамолу́ и уби́йство всажде́ннаго в темни́цу, его́же проша́ху, Иису́са же преда́в во́ли их.

²⁶ И я́ко поведо́ша Его́, е́мше Си́мона не́коего Кирине́а, гряду́ща с села́, возложи́ша нань крест носи́ти по Иису́се.

²⁷ Идя́ше же во след Его́ наро́д мног люде́й, и жены́, я́же и пла́кахуся и рыда́ху Его́.

²⁸ Обра́щься же к ним Иису́с рече́: дще́ри Иерусали́мски, не пла́читеся о Мне, оба́че себе́ пла́чите и чад ва́ших.

²⁹ Я́ко се дни́е гряду́т, в ня́же реку́т: блаже́ны непло́ды, и утро́бы, я́же не роди́ша, и сосцы́, и́же не дои́ша.

³⁰ Тогда́ начну́т глаго́лати гора́м: пади́те на ны, и холмо́м: покры́йте ны.

³¹ Зане́ а́ще в су́рове дре́ве сия́ творя́т, в су́се что бу́дет?

³² Ведя́ху же и и́на два злоде́я с Ним уби́ти.

³³ И егда́ приидо́ша на ме́сто, нарица́емое Ло́бное, ту распя́ша Его́ и злоде́я, о́ваго у́бо одесну́ю, а друга́го ошу́юю.

³⁴ Иису́с же глаго́лаше: О́тче, отпусти́ им, не ве́дят бо что творя́т. Разделя́юще же ри́зы Его́, мета́ху жре́бия.

³⁵ И стоя́ху лю́дие зря́ще. Руга́хуся же и кня́зи с ни́ми, глаго́люще: ины́я спасе́, да спасе́т и Себе́, а́ще Той есть Христо́с Бо́жий избра́нный.

³⁶ Руга́хуся же Ему́ и во́ини, приступа́юще и о́цет приде́юще Ему́.

³⁷ И глаго́лаху: а́ще Ты еси́ Царь Иуде́йск, спаси́ся Сам.

³⁸ Бе же и написа́ние напи́сано над Ним писмены́ е́ллинскими и ри́мскими и евре́йскими: Сей есть Царь Иуде́йск.

³⁹ Еди́н же от обе́шеною злоде́ю ху́ляше Его́, глаго́ля: а́ще Ты еси́ Христо́с, спаси́ Себе́ и на́ю.

⁴⁰ Отвеща́в же други́й преща́ше ему́, глаго́ля: ни ли ты бои́шися Бо́га, я́ко в то́мже осужде́н еси́?

⁴¹ И мы у́бо в пра́вду, досто́йная бо по дело́м на́ю восприе́млева, Сей же ни еди́наго зла сотвори́.

⁴² И глаго́лаше Иису́сови: помяни́ мя, Го́споди, егда́ прии́деши во Ца́рствии си.

⁴³ И рече́ ему́ Иису́с: ами́нь глаго́лю тебе́, днесь со Мно́ю бу́деши в раи́.

⁴⁴ Бе же час я́ко шесты́й, и тма бысть по всей земли́ до часа́ девя́таго.

⁴⁵ И поме́рче со́лнце, и заве́са церко́вная раздра́ся посреде́.

⁴⁶ И возгла́шь гла́сом ве́лиим Иису́с, рече́: О́тче, в ру́це Твои́ предаю́ дух Мой. И сия́ рек и́здше.

⁴⁷ Ви́дев же со́тник бы́вшее, просла́ви Бо́га, глаго́ля: вои́стинну челове́к сей пра́веден бе.

⁴⁸ И вси прише́дшии наро́ди на позо́р сей, ви́дяще быва́ющая, бию́ще пе́рси своя́ возвраща́хуся.

⁴⁹ Стоя́ху же вси зна́емии Его́ издале́ча, и жены́ спосле́дствовавшия Ему́ от Галиле́и, зря́ще сих.

⁵⁰ И се муж и́менем Ио́сиф, сове́тник сый, муж благ и пра́веден

⁵¹ Сей не бе приста́л сове́ту и де́лу их, от Аримафе́а гра́да Иуде́йска, и́же ча́яше и той Ца́рствия Бо́жия.

⁵² Сей присту́пль к Пила́ту, проси́ те́ло Иису́сова,

⁵³ И снем е́ обви́т плащани́цею, и положи́ е́ во гро́бе изсе́чене, в не́мже не бе никто́же никогда́же положе́н.

⁵⁴ И день бе пято́к, и суббо́та света́ше.

⁵⁵ Всле́д же ше́дшия жены́, я́же бя́ху пришли́ с Ним от Галиле́и, ви́деша гроб, и я́ко положе́но бысть те́ло Его́.

⁵⁶ Возвра́щшеся же угото́ваша арома́ты и мν́ро, и в суббо́ту у́бо умолча́ша по за́поведи.

Глава 24

¹ Во еди́ну от суббо́т, зело́ ра́но приидо́ша жены́ на гроб, нося́ще я́же угото́ваша арома́ты, и други́я с ни́ми.

² Обрето́ша же ка́мень отвале́н от гро́ба,

³ И вше́дше не обрето́ша телесе́ Го́спода Иису́са.

⁴ И бысть не домышля́ющимся им о сем, и се му́жа два ста́ста в них в ри́зах блеща́щихся.

⁵ Пристра́шным же бы́вшим им и покло́ншим ли́ца на зе́млю, реко́ста к ним, что и́щете жива́го с ме́ртвыми?

⁶ Несть зде, но воста́. Помяни́те, я́коже глаго́ла вам, еще́ сый в Галиле́и,

⁷ Глаго́ля, я́ко подоба́ет Сы́ну Челове́ческому пре́дану бы́ти в ру́це челове́к гре́шник, и про́пяту бы́ти, и в тре́тий день воскре́снути.

⁸ И помяну́ша глаго́лы Его́.

⁹ И возвра́щшеся от гро́ба, возвести́ша вся сия́ единомуна́десяте и всем про́чим.

¹⁰ Бя́ше же Магдали́на Мари́а и Иоа́нна и Мари́а Иа́ковля, и про́чыя с ни́ми, я́же глаго́лаху ко Апо́столом сия́.

¹¹ И яви́шася пред ни́ми я́ко лжа глаго́лы их, и не ве́роваху им.

¹² Петр же воста́в тече́ ко гро́бу и прини́к ви́де ри́зы еди́ны лежа́щя, и оты́де, в себе́ дивя́ся бы́вшему.

¹³ И се два от них бе́ста иду́ща в то́йже день в весь отстоя́щу ста́дий шестьдеся́т от Иерусали́ма, е́йже и́мя Еммау́с.

¹⁴ И та бесе́доваста к себе́ о всех сих приклю́чшихся.

¹⁵ И бысть бесе́дующема и́ма и совопроща́ющемася, и Сам Иису́с прибли́жися идя́ше с ни́ма.

¹⁶ О́чи же ею́ держа́стеся, да Его́ не позна́ета.

¹⁷ Рече́ же к ни́ма: что суть словеса́ сия́, о ни́хже стяза́етася к себе́ иду́ща, и еста́ дря́хла?

¹⁸ Отвеща́в же еди́н, ему́же и́мя Клео́па, рече́ к Нему́: Ты ли еди́н пришле́ц еси́ во Иерусали́м, и не уве́де бы́вших в нем во дни сия́?

¹⁹ И рече́ и́ма: ки́их? О́на же ре́ста Ему́: я́же о Иису́се Назаряни́не, И́же бысть муж проро́к, си́лен де́лом и сло́вом пред Бо́гом и все́ми людьми́.

²⁰ Ка́ко преда́ша Его́ архиере́и и кня́зи на́ши на осужде́ние сме́рти и распя́ша Его́.

²¹ Мы же наде́яхомся, я́ко Сей есть хотя́ изба́вити Изра́иля, но и над все́ми си́ми, тре́тий сей день и́мать днесь, отне́лиже сия́ бы́ша.

²² Но и жены́ не́кия от нас ужаси́ша ны, бы́вшия ра́но у гро́ба,

²³ И не обре́тше телесе́ Его́, приидо́ша, глаго́люще, и явле́ние А́нгел ви́девше, и́же глаго́лют Его́ жи́ва.

²⁴ И идо́ша не́цыи от нас ко гро́бу и обрето́ша та́ко, я́коже и жены́ ре́ша, Самого́ же не ви́деша.

²⁵ И Той рече́ к нима: о несмы́сленная и ко́сная се́рдцем, е́же ве́ровати о всех, я́же глаго́лаша проро́цы.

²⁶ Не сия́ ли подоба́ше пострада́ти Христу́ и вни́ти в сла́ву Свою́?

²⁷ И наче́н от Моисе́а и от всех проро́к, сказа́ше и́ма от всех Писа́ний я́же о Нем.

²⁸ И прибли́жишася в весь, в ню́же идя́ста, и Той творя́шеся далеча́йше ити́.

²⁹ И ну́ждаста Его́, глаго́люще: обля́зи с на́ма, я́ко к ве́черу есть, и преклони́лся есть день. И вни́де с ни́ма облещи́.

³⁰ И бысть я́ко возлеже́ с ни́ма, и прии́м хлеб благослови́, и преломи́в дая́ше и́ма.

³¹ О́нема же отверзо́стеся о́чи, и позна́ста Его́, и Той неви́димь бысть и́ма.

³² И реко́ста к себе́: не се́рдце ли на́ю горя́ бе в на́ю, егда́ глаго́лаше на́ма на пути́ и я́ко ска́зоваше на́ма Писа́ния?

³³ И воста́вша в той час, возврати́стася во Иерусали́м и обрето́ста совоку́плены единагона́десяте и и́же бя́ху с ни́ми,

³⁴ Глаго́лющих, я́ко вои́стинну воста́ Госпо́дь и яви́ся Си́мону.

³⁵ И та пове́даста, я́же бы́ша на пути́, и я́ко позна́ся и́ма в преломле́нии хле́ба.

³⁶ Сия́ же им глаго́лющим, и Сам Иису́с ста посреде́ их и глаго́ла им: ми́р вам.

³⁷ Убоя́вшеся же и пристра́шни бы́вше, мня́ху дух ви́дяще.

³⁸ И рече́ им: что смуще́ни есте́? И почто́ помышле́ния вхо́дят в сердца́ ва́ша?

³⁹ Ви́дите ру́це Мои́ и но́зе Мои́, я́ко сам Аз есмь. Осяжи́те Мя и ви́дите, я́ко дух пло́ти и ко́сти не и́мать, я́коже Мене́ ви́дите иму́ща.

⁴⁰ И сие́ рек, показа́ им ру́це и но́зе.

⁴¹ Еще́ же неве́рующим им от ра́дости и чудя́щимся, рече́ им: и́мате ли что сне́дно зде?

⁴² Они́ же да́ша Ему́ ры́бы печены́ часть и от пчел сот.

⁴³ И взем пред ни́ми яде́.

⁴⁴ Рече́ же им: сия́ суть словеса́, я́же глаго́лах к вам еще́ сый с ва́ми, я́ко подоба́ет сконча́тися всем напи́санным в зако́не Моисе́ове и проро́цех и псалме́х о Мне.

⁴⁵ Тогда́ отве́рзе им ум разуме́ти Писа́ния.

⁴⁶ И рече́ им, я́ко та́ко пи́сано есть, и та́ко подоба́ше пострада́ти Христу́ и воскре́снути от ме́ртвых в тре́тий день,

⁴⁷ И пропове́датися во и́мя Его́ покая́нию и отпуще́нию грехо́в во всех язы́цех, наче́нше от Иерусали́ма.

⁴⁸ Вы же есте́ свиде́телие сим.

⁴⁹ И се Аз послю́ обетова́ние Отца́ Моего́ на вы, вы же седи́те во гра́де Иерусали́мсте, до́ндеже облече́теся си́лою свы́ше.

⁵⁰ Изве́д же их вон до Вифа́нии и воздви́г ру́це Свои́, и благослови́ их.

⁵¹ И бысть егда́ благословля́ше их, отступи́ от них и возноша́шеся на не́бо.

⁵² И ти́и поклони́шася Ему́, и возврати́шася во Иерусали́м с ра́достию вели́кою.

⁵³ И бя́ху вы́ну в це́ркви, хва́ляще и благословя́ще Бо́га. Ами́нь.

Ева́нгелие от Иоа́нна

Глава 1

¹ В нача́ле бе Сло́во, и Сло́во бе к Бо́гу, ^[126] и Бог бе Сло́во.

² Сей бе искони́ к Бо́гу. ^[127]

³ Вся Тем бы́ша, и без Него́ ничто́же бысть, е́же бысть.

⁴ В Том живо́т бе, и живо́т бе свет челове́ком.

⁵ И свет во тме све́тится, и тма его́ не объя́т.

⁶ Бысть челове́к по́слан от Бо́га, и́мя ему́ Иоа́нн.

⁷ Сей прии́де во свиде́тельство, да свиде́тельствует о Све́те, да вси ве́ру и́мут ему́. ^[128]

⁸ Не бе той свет, но да свиде́тельствует о Све́те.

⁹ Бе Свет и́стинный, И́же просвеща́ет вся́каго челове́ка гряду́щаго в міръ.

¹⁰ В міре бе, и міръ Тем бысть, и міръ Его́ не позна́.

¹¹ Во своя́ прии́де, и свои́ Его́ не прия́ша.

¹² Ели́цы же прия́ша Его́, даде́ им о́бласть ча́дом Бо́жиим бы́ти, ве́рующим во и́мя Его́,

¹³ И́же не от кро́ве, ни от по́хоти плотски́я, ни от по́хоти му́жеския, но от Бо́га роди́шася.

¹⁴ И Сло́во плоть бысть и всели́ся в ны, и ви́дехом сла́ву Его́, сла́ву я́ко Единоро́днаго от Отца́, испо́лнь благода́ти и и́стины.

¹⁵ Иоа́нн свиде́тельствует о Нем и воззва́ глаго́ля: Сей бе, Его́же рех, И́же по мне Гряды́й, пре́до мно́ю бысть, я́ко пе́рвее мене́ бе.

¹⁶ И от исполне́ния Его́ мы вси прия́хом и благода́ть воз благода́ть.

¹⁷ Я́ко зако́н Моисе́ом дан бысть, благода́ть же и и́стина Иису́с Христо́м бысть.

¹⁸ Бо́га никто́же ви́де нигде́же, Единоро́дный Сын, сый в ло́не О́тчи, Той испове́да.

¹⁹ И сие́ есть свиде́тельство Иоа́нново, егда́ посла́ша жи́дове от Иерусали́ма иере́и и леви́ты, да вопро́сят его́: ты кто еси́?

²⁰ И испове́да и не отве́ржеся, и испове́да, я́ко несмь аз Христо́с.

²¹ И вопроси́ша его́: что у́бо? Илиа́ ли еси́ ты? И глаго́ла: несмь. Проро́к ли еси́? И отвеща́: ни.

²² Ре́ша же ему́: кто еси́? Да отве́т да́мы посла́вшим ны, что глаго́леши о тебе́ само́м?

²³ Рече́: аз глас вопию́щаго в пусты́ни, испра́вите путь Госпо́день, я́коже рече́ Иса́иа проро́к.

²⁴ И по́сланнии бе́ху от фарисе́й.

²⁵ И вопроси́ша его́ и ре́ша ему́: что у́бо креща́еши, а́ще ты не́си Христо́с, ни Илиа́, ни проро́к?

²⁶ Отвеща́ им Иоа́нн, глаго́ла: аз креща́ю водо́ю, посреде́ же вас стои́т, Его́же вы не ве́сте.

²⁷ Той есть Гряды́й по мне, И́же пре́до мно́ю бысть, Ему́же несмь аз досто́ин, да отрешу́ реме́нь сапогу́ Его́.

²⁸ Сия́ в Вифава́ре бы́ша об он пол Иорда́на, иде́же бе Иоа́нн крестя́.

²⁹ Во утрий же ви́де Иоа́нн Иису́са гряду́ща к себе́ и глаго́ла: се А́гнец Бо́жий, взе́мляй грехи́ міра.

³⁰ Сей есть, о Не́мже аз рех: по мне гряде́т Муж, И́же пре́до мно́ю бысть, я́ко пе́рвее мене́ бе.

³¹ И аз не ве́дех Его́, но да яви́тся Изра́илеви, сего́ ра́ди приидо́х аз в воде́ крестя́.

³² И свиде́тельствова Иоа́нн, глаго́ля, я́ко ви́дех Ду́ха сходя́щ я́ко го́лубь с небесе́, и пребы́сть на Нем.

³³ И аз не ве́дех Его́, но Посла́вый мя крести́ти водо́ю, Той мне рече́: над Него́же у́зриши Ду́ха сходя́щ и пребыва́ющ на Нем, Той есть крестя́й Ду́хом Святы́м.

³⁴ И аз ви́дех и свиде́тельствовах, я́ко Сей есть Сын Бо́жий.

³⁵ Во у́трий же па́ки стоя́ше Иоа́нн, и от учени́к его́ два.

³⁶ И узре́в Иису́са гряду́ща, глаго́ла: се А́гнец Бо́жий.

³⁷ И слы́шаста его́ о́ба ученика́ глаго́люща, и по Иису́се идо́ста.

³⁸ Обра́щься же Иису́с и ви́дев я́ по Себе́ иду́ща, глаго́ла и́ма: чесо́ и́щета? О́на же ре́ста Ему́: Равви́, е́же глаго́лется сказа́емо учи́телю, где живе́ши?

³⁹ И глаго́ла и́ма: прииди́та и ви́дита. Приидо́ста же и ви́деста, где живя́ше, и у Него́ пребы́ста день той. Бе же час я́ко деся́тый.

⁴⁰ Бе же Андре́й, брат Си́мона Петра́, еди́н от обою́ слы́шавшею от Иоа́нна и по Нем ше́дшею.

⁴¹ Обре́те сей пре́жде бра́та своего́ Си́мона и глаго́ла ему́: обрето́хом Месси́ю, е́же есть сказа́емо Христо́с.

⁴² И приведе́ его́ ко Иису́сови. Воззре́в же нань Иису́с рече́: ты еси́ Си́мон сын Ио́нин, ты нарече́шися Ки́фа, е́же сказа́ется Петр.

⁴³ Во у́трий же восхоте́ изы́ти в Галиле́ю, и обре́те Фили́ппа и глаго́ла ему́: гряди́ по Мне.

⁴⁴ Бе же Фили́пп от Вифсаи́ды, от гра́да Андре́ова и Петро́ва.

⁴⁵ Обре́те Фили́пп Нафана́ила и глаго́ла ему́: Его́же писа́ Моисе́й в зако́не и проро́цы, обрето́хом Иису́са сы́на Ио́сифова, и́же от Назаре́та.

⁴⁶ И глаго́ла ему́ Нафана́ил: от Назаре́та мо́жет ли что добро́ бы́ти? Глаго́ла ему́ Фили́пп: прииди́ и виждь.

⁴⁷ Ви́де же Иису́с Нафана́ила гряду́ща к Себе́ и глаго́ла о нем: се вои́стинну Изра́ильтянин, в не́мже льсти несть.

⁴⁸ Глаго́ла Ему́ Нафана́ил: ка́ко мя зна́еши? Отвеща́ Иису́с и рече́ ему́: пре́жде да́же не возгласи́ тебе́ Фили́пп, су́ща под смоко́вницею ви́дех тя.

⁴⁹ Отвеща́ Нафана́ил и глаго́ла Ему́: Равви́, Ты еси́ Сын Бо́жий, Ты еси́ Царь Изра́илев.

⁵⁰ Отвеща́ Иису́с и рече́ ему́: зане́ рех ти, я́ко ви́дех тя под смоко́вницею, ве́руеши, бо́льша сих у́зриши.

⁵¹ И глаго́ла ему́: ами́нь, ами́нь глаго́лю вам, отсе́ле у́зрите не́бо отве́рсто и А́нгелы Бо́жия восходя́щя и нисходя́щя над Сы́на Челове́ческаго.

Глава 2

¹ И в тре́тий день брак бысть в Ка́не Галиле́йстей, и бе Ма́ти Иису́сова ту.

² Зван же бысть Иису́с и ученицы́ Его́ на брак.

³ И не доста́вшу вину́, глаго́ла Ма́ти Иису́сова к Нему́: вина́ не и́мут.

⁴ Глаго́ла Ей Иису́с: что́ есть Мне́ и Тебе́, Же́но? Не у́ прии́де час Мой.

⁵ Глаго́ла Ма́ти Его́ слуга́м: е́же а́ще глаго́лет вам, сотвори́те.

⁶ Бе́ху же ту водоно́сы ка́менни шесть, лежа́ще по очище́нию иуде́йску, вместя́щия по двема́ или́ трие́м ме́рам.

⁷ Глаго́ла им Иису́с: напо́лните водоно́сы воды́. И напо́лниша их до верха́.

⁸ И глаго́ла им: почерпи́те ны́не и принеси́те архитрикли́нови. И принесо́ша.

⁹ Я́коже вкуси́ архитрикли́н вина́ бы́вшаго от воды́, [и не ве́дяше, отку́ду есть, слуги́ же ве́дяху поче́рпшии во́ду,] пригласи́ жениха́ архитрикли́н.

¹⁰ И глаго́ла ему́: всяк челове́к пре́жде до́брое вино́ полага́ет, и егда́ упию́тся, тогда́ ху́ждшее, ты же соблю́л еси́ до́брое вино́ досе́ле.

¹¹ Се сотвори́ нача́ток зна́мением Иису́с в Ка́не Галиле́йстей и яви́ сла́ву Свою́, и ве́роваша в Него́ ученицы́ Его́.

¹² Посе́м сни́де в Капернау́м Сам и Ма́ти Его́, и бра́тия Его́ и ученицы́ Его́, и ту не мно́ги дни пребы́ша.

¹³ И близ бе Па́сха иуде́йска, и взы́де во Иерусали́м Иису́с

¹⁴ И обре́те в це́ркви продаю́щия о́вцы и волы́ и го́луби, и пе́няжники седя́щия.

¹⁵ И сотвори́ бичь от ве́рвий, вся изгна́ из це́ркве, о́вцы и волы́, и торжнико́м разсы́па пе́нязи и дски́ опрове́рже.

¹⁶ И продаю́щим го́луби рече́: возьми́те сия́ отсю́ду и не твори́те до́му Отца́ Моего́ до́му ку́пленаго. ^[129]

¹⁷ Помяну́ша же ученицы́ Его́, я́ко пи́сано есть: жа́лость до́му Твоего́ снесть Мя. ^[130]

¹⁸ Отвеща́ша же иуде́е и ре́ша Ему́: ко́е зна́мение явля́еши нам, я́ко сия́ твори́ши?

¹⁹ Отвеща́ Иису́с и рече́ им: разорите́ це́рковь сию́, и тре́ми де́ньми воздви́гну ю́.

²⁰ Ре́ша же иуде́е: четы́редесять и шестию́ лет создана́ бысть це́рковь сия́, и Ты ли тре́ми де́ньми воздви́гнеши ю́?

²¹ Он же глаго́лаше о це́ркви те́ла Своего́.

²² Егда́ у́бо воста́ от ме́ртвых, помяну́ша ученицы́ Его́, я́ко се глаго́лаше, и ве́роваша Писа́нию и словеси́, е́же рече́ Иису́с.

²³ Егда́ же бе в Иерусали́мех в пра́здник Па́схи, мно́зи ве́роваша во и́мя Его́, ви́дяще зна́мения Его́, я́же творя́ше.

²⁴ Сам же Иису́с не вдая́ше Себе́ в ве́ру их, и́мже Сам ве́дяше вся,

²⁵ И я́ко не тре́боваше, да кто́ свиде́тельствует о челове́цех: сам бо ве́дяше, что́ бе в челове́це.

Глава 3

¹ Бе́ же челове́к от фарисе́й, Никоди́м и́мя ему́, князь Жидо́вский.

² Сей прии́де ко Иису́су но́щию и рече́ Ему́: Равви́, вем, я́ко от Бо́га прише́л еси́ учи́тель, никто́же бо мо́жет зна́мений сих твори́ти, и́хже Ты твори́ши, а́ще не бу́дет Бог с ним.

³ Отвеща́ Иису́с и рече́ ему́: ами́нь, ами́нь глаго́лю тебе́: а́ще кто не роди́тся свы́ше, не мо́жет ви́дети Ца́рствия Бо́жия.

⁴ Глаго́ла к Нему́ Никоди́м: ка́ко мо́жет челове́к роди́тися стар сый? Еда́ мо́жет второ́е вни́ти во утро́бу ма́тере своея́ и роди́тися?

⁵ Отвеща́ Иису́с: ами́нь, ами́нь глаго́лю тебе́, а́ще кто не роди́тся водо́ю и Ду́хом, не мо́жет вни́ти во Ца́рствие Бо́жие.

⁶ Рожде́нное от пло́ти плоть есть, и рожде́нное от Ду́ха дух есть.

⁷ Не диви́ся, я́ко рех ти, подоба́ет вам роди́тися свы́ше.

⁸ Дух, иде́же хо́щет, ды́шет, и глас его́ слы́шиши, но не ве́си, отку́ду прихо́дит и ка́мо и́дет, та́ко есть всяк челове́к рожде́нный от Ду́ха.

⁹ Отвеща́ Никоди́м и рече́ Ему́: ка́ко мо́гут сия́ бы́ти?

¹⁰ Отвеща́ Иису́с и рече́ ему́: ты еси́ учи́тель Изра́илев, и сих ли не ве́си?

¹¹ Ами́нь, ами́нь глаго́лю тебе́, я́ко, е́же ве́мы, глаго́лем, и е́же ви́дехом, свиде́тельствуем, и свиде́тельства На́шего не прие́млете.

¹² А́ще земна́я реко́х вам, и не ве́руете, ка́ко, а́ще реку́ вам небе́сная, ве́руете?

¹³ И никто́же взы́де на не́бо, то́кмо сше́дый с небесе́ Сын Челове́ческий, сый на небеси́.

¹⁴ И я́коже Моисе́й вознесе́ змию́ в пусты́ни, та́ко подоба́ет вознести́ся Сы́ну Челове́ческому,

¹⁵ Да всяк ве́руяй в Онь не поги́бнет, но и́мать живо́т ве́чный.

¹⁶ Та́ко бо возлюби́ Бог міръ, я́ко и Сы́на Своего́ Единоро́днаго дал есть, да всяк ве́руяй в Онь не поги́бнет, но и́мать живо́т ве́чный.

¹⁷ Не посла́ бо Бог Сы́на Своего́ в міръ, да су́дит мірови, но да спасе́тся Им міръ.

¹⁸ Ве́руяй в Онь не бу́дет ^[131] осужде́н, а не ве́руяй уже́ осужде́н есть, я́ко не ве́рова во и́мя Единоро́днаго Сы́на Бо́жия.

¹⁹ Сей же есть суд, я́ко свет прии́де в міръ, и возлюби́ша челове́цы па́че тму, не́же свет, бе́ша бо их дела́ зла.

²⁰ Всяк бо де́лаяй зла́я ненави́дит све́та и не прихо́дит к све́ту, да не облича́тся дела́ его́, я́ко лука́ва суть.

²¹ Творя́й же и́стину гряде́т к све́ту, да явя́тся дела́ его́, я́ко о Бо́зе суть соде́лана.

²² По сих же прии́де Иису́с и ученицы́ Его́ в Жидо́вскую зе́млю, и ту живя́ше с ни́ми и креща́ше.

²³ Бе же Иоа́нн крестя́ во Ено́не близ Сали́ма, я́ко во́ды мно́ги бя́ху ту, и прихожда́ху и креща́хуся.

²⁴ Не у́ бо бе всажде́н в темни́цу Иоа́нн.

²⁵ Бысть же стяза́ние от учени́к Иоа́нновых со иуде́и о очище́нии.

²⁶ И приидо́ша ко Иоа́нну и реко́ша ему́: равви́, И́же бе с тобо́ю об он пол Иорда́на, Ему́же ты свиде́тельствовал еси́, се Сей креща́ет, и вси гряду́т к Нему́.

²⁷ Отвеща́ Иоа́нн и рече́: не мо́жет челове́к приима́ти ничесо́же, а́ще не бу́дет дано́ ему́ с небесе́.

²⁸ Вы са́ми мне свиде́тельствуете, я́ко рех: несмь аз Христо́с, но я́ко по́слан есмь пред Ним.

²⁹ Име́яй неве́сту жени́х есть, а друг женихо́в, стоя́ и послу́шая его́, ра́достию ра́дуется за глас женихо́в, сия́ у́бо ра́дость моя́ испо́лнися.

³⁰ О́ному подоба́ет расти́, мне же ма́литися.

³¹ Гряды́й свы́ше над все́ми есть, сый от земли́ от земли́ есть и от земли́ глаго́лет, Гряды́й с небесе́ над все́ми есть.

³² И е́же ви́де и слы́ша, сие́ свиде́тельствует, и свиде́тельства Его́ никто́же прие́млет.

³³ Прие́мый Его́ свиде́тельство ве́рова,^[132] я́ко Бог и́стинен есть.

³⁴ Его́же бо посла́ Бог, глаго́лы Бо́жия глаго́лет: не в ме́ру бо Бог дае́т Ду́ха.

³⁵ Оте́ц бо лю́бит Сы́на и вся даде́ в ру́це Его́.

³⁶ Ве́руяй в Сы́на и́мать живо́т ве́чный: а и́же не ве́рует в Сы́на, не у́зрит живота́, но гнев Бо́жий пребыва́ет на не́м.

Глава 4

¹ Егда́ у́бо разуме́ Иису́с, я́ко услы́шаша фарисе́е, я́ко Иису́с множа́йшия ученики́ твори́т и креща́ет, не́же Иоа́нн:

² Иису́с же Сам не креща́ше, но ученицы́ Его́:

³ Оста́ви Иуде́ю и и́де па́ки в Галиле́ю.

⁴ Подоба́ше же Ему́ проити́ сквозе́ Самари́ю.

⁵ Прии́де у́бо во град Самари́йский, глаго́лемый Сиха́рь, близ ве́си, ю́же даде́ Иа́ков Ио́сифу сы́ну своему́.

⁶ Бе же ту исто́чник Иа́ковль. Иису́с же тру́ждся от пути́, седя́ше та́ко на исто́чнице, бе же я́ко час шесты́й.

⁷ Прии́де жена́ от Самари́и почерпа́ти во́ду. Глаго́ла ей Иису́с: даждь Ми пи́ти.

⁸ Ученицы́ бо Его́ отшли́ бя́ху во град, да бра́шно ку́пят.

⁹ Глаго́ла Ему́ жена́ Самаряны́ня: ка́ко ты Жидови́н сый от мене́ пи́ти про́сиши, жены́ Самаряны́ни су́щей? Не прикаса́ют бо ся жи́дове самаря́нех.

¹⁰ Отвеща́ Иису́с и рече́ ей: а́ще бы ве́дала еси́ дар Бо́жий, и Кто есть глаго́ляй ти, даждь Ми пи́ти, ты бы проси́ла у Него́, и дал бы ти во́ду жи́ву.

¹¹ Глаго́ла Ему́ жена́: го́споди, ни почерпа́ла и́маши, и студене́ц есть глубо́к, отку́ду у́бо и́маши во́ду жи́ву?

¹² Еда́ ты бо́лий еси́ отца́ на́шего Иа́кова, и́же даде́ нам студене́ц сей, и той из него́ пит и сы́нове его́ и ско́ти его́?

¹³ Отвеща́ Иису́с и рече́ ей: всяк пия́й от воды́ сея́, вжа́ждется па́ки.

¹⁴ А и́же пие́т от воды́, ю́же Аз дам ему́, не вжа́ждется во ве́ки, но вода́, ю́же Аз дам ему́, бу́дет в нем исто́чник воды́ теку́щ в живо́т ве́чный.

¹⁵ Глаго́ла к Нему́ жена́: Го́споди, даждь ми сию́ во́ду, да ни жа́жду, ни прихожду́ се́мо почерпа́ти.

¹⁶ Глаго́ла ей Иису́с: иди́, пригласи́ му́жа твоего́ и прииди́ се́мо.

¹⁷ Отвеща́ жена́ и рече́ Ему́: не и́мам му́жа. Глаго́ла ей Иису́с: до́бре рече́, я́ко му́жа не и́мам.

¹⁸ Пять бо муже́й име́ла еси́, и ны́не, его́же и́маши, несть ти муж, се вои́стинну рекла́ еси́.

¹⁹ Глаго́ла Ему́ жена́: Го́споди, ви́жу, я́ко проро́к еси́ Ты.

²⁰ Отцы́ на́ши в горе́ сей поклони́шася, и вы глаго́лете, я́ко во Иерусали́мех есть ме́сто, иде́же кла́нятися подоба́ет.

²¹ Глаго́ла ей Иису́с: же́но, ве́ру Ми ими́, я́ко гряде́т час, егда́ ни в горе́ сей, ни во Иерусали́мех покло́нитеся Отцу́.

²² Вы кла́няетеся, его́же не ве́сте, мы кла́няемся, его́же ве́мы, я́ко спасе́ние от иуде́й есть.

²³ Но гряде́т час, и ны́не есть, егда́ и́стиннии покло́нницы покло́нятся Отцу́ ду́хом и и́стиною, и́бо Оте́ц таковы́х и́щет покланя́ющихся Ему́.

²⁴ Дух есть Бог, и и́же кла́няется Ему́, ду́хом и и́стиною досто́ит кла́нятися.

²⁵ Глаго́ла Ему́ жена́: вем, я́ко Месси́а прии́дет, глаго́лемый Христо́с, егда́ Той прии́дет, возвести́т нам вся.

²⁶ Глаго́ла ей Иису́с: Аз есмь, глаго́ляй с тобо́ю.

²⁷ И тогда́ приидо́ша ученицы́ Его́ и чужда́хуся, я́ко с жено́ю глаго́лаше. Никто́же бо рече́: чесо́ и́щеши? Или́: что глаго́леши с не́ю?

²⁸ Оста́ви же водоно́с свой жена́, и и́де во град, и глаго́ла челове́ком:

²⁹ Прииди́те и ви́дите Челове́ка, И́же рече́ ми вся, ели́ка сотвори́х, еда́ Той есть Христо́с?

³⁰ Изыдо́ша же из гра́да и грядя́ху к Нему́.

³¹ Между́ же сим моля́ху Его́ ученицы́ Его́, глаго́люще: Равви́, яждь.

³² Он же рече́ им: Аз бра́шно и́мам я́сти, его́же вы не ве́сте.

³³ Глаго́лаху же ученицы́ к себе́: еда́ кто принесе́ Ему́ я́сти?

³⁴ Глаго́ла им Иису́с: Мое́бра́шно есть, да сотворю́ во́лю Посла́вшаго Мя и совершу́ де́ло Его́.

³⁵ Не вы ли глаго́лете, я́ко еще́ четы́ри ме́сяцы суть, и жа́тва прии́дет? Се, глаго́лю вам: возведи́те о́чи ва́ши и ви́дите ни́вы, я́ко пла́вы суть к жа́тве уже́.

³⁶ И жняй мзду прие́млет и собира́ет плод в живо́т ве́чный, да и се́яй вку́пе ра́дуется и жняй.

³⁷ О сем бо сло́во есть и́стинное, я́ко ин есть се́яй, и ин есть жняй.

³⁸ Аз посла́х вы жа́ти, иде́же вы не труди́стеся, ини́и труди́шася, и вы в труд их внидо́сте.

³⁹ От гра́да же того́ мно́зи ве́роваша в Онь от самаря́н, за сло́во жены́ свиде́тельствующия, я́ко рече́ ми вся, ели́ка сотвори́х.

⁴⁰ Егда́ у́бо приидо́ша к Нему́ самаря́не, моля́ху Его́, дабы́ пребы́л у них, и пребы́сть ту два дни.

⁴¹ И мно́го па́че ве́роваша за сло́во Его́.

⁴² Жене́ же глаго́лаху, я́ко не ктому́ за твою́ бесе́ду ве́руем, са́ми бо слы́шахом и ве́мы, я́ко Сей есть вои́стинну Спас міру, Христо́с.

⁴³ По двою́ же дню́, изы́де отту́ду, и и́де в Галиле́ю:

⁴⁴ Сам бо Иису́с свиде́тельствова, я́ко проро́к во свое́м оте́чествии че́сти не и́мать.

⁴⁵ Егда́ же прии́де в Галиле́ю, прия́ша Его галиле́ане, вся ви́девше, я́же сотвори́ во Иерусали́мех в пра́здник: и ти́и бо приидо́ша в пра́здник.

⁴⁶ Прии́де же па́ки Иису́с в Ка́ну Галиле́йскую, иде́же сотвори́ во́ду в вино́. И бе не́кий царе́в муж, его́же сын боля́ше в Капернау́ме.

⁴⁷ Сей слы́шав, я́ко Иису́с прии́де от Иуде́и в Галиле́ю, и́де к Нему́ и моля́ше Его́, да сни́дет и исцели́т сы́на Его́, хотя́ше бо умре́ти.

⁴⁸ Рече́ у́бо Иису́с к нему́: а́ще зна́мений и чуде́с не ви́дите, не и́мате ве́ровати.

⁴⁹ Глаго́ла к Нему́ царе́в муж: Го́споди, сни́ди, пре́жде да́же не у́мрет отроча́ мое́.

⁵⁰ Глаго́ла ему́ Иису́с: иди́, сын твой жив есть. И ве́рова челове́к словеси́, е́же рече́ ему́ Иису́с, и идя́ше.

⁵¹ А́бие же входя́щу ему́, се раби́ его́ срето́ша его́ и возвести́ша ему́, глаго́люще, я́ко сын твой жив есть.

⁵² Вопроша́ше у́бо от них час, в кото́рый легча́е ему́ бысть, и ре́ша ему́, я́ко вчера́ в час седмы́й оста́ви его́ огнь.

⁵³ Разуме́ же оте́ц, я́ко той бе час, во́ньже рече́ ему́ Иису́с, я́ко сын твой жив есть, и ве́рова сам и весь дом его́.

⁵⁴ Сие́ па́ки второ́е зна́мение сотвори́ Иису́с, прише́д от Иуде́и в Галиле́ю.

Глава 5

¹ По сих же бе пра́здник иуде́йский, и взы́де Иису́с во Иерусали́м.

² Есть же во Иерусали́мех на О́вчей купе́ли, ^[133] я́же глаго́лется евре́йски Вифесда́, ^[134] пять притво́р иму́щи.

³ В тех слежа́ше мно́жество боля́щих, слепы́х, хромы́х, сухи́х, ча́ющих движе́ния воды́.

⁴ А́нгел бо Госпо́день на вся́ко ле́то схожда́ше в купе́ль и возмуща́ше во́ду, и и́же пе́рвее вла́зяше по возмуще́нии воды́ здрав быва́ше, яце́м же неду́гом одержи́мь быва́ше.

⁵ Бе же ту не́кий челове́к, три́десять и осмь лет имы́й в неду́зе свое́м.

⁶ Сего́ ви́дев Иису́с лежа́ща и разуме́в, я́ко мно́га ле́та уже́ имя́ше в неду́зе, глаго́ла ему́: хо́щеши ли цел бы́ти?

⁷ Отвеща́ Ему́ неду́жный: ей, Го́споди, челове́ка не и́мам, да егда́ возмути́тся вода́, вве́ржет мя в купе́ль, егда́ же прихожду́ аз, ин пре́жде мене́ сла́зит.

⁸ Глаго́ла ему́ Иису́с: воста́ни, возми́ одр твой и ходи́.

⁹ И а́бие здрав бысть челове́к, и взем одр свой и хожда́ше. Бе же суббо́та в той день.

¹⁰ Глаго́лаху же жи́дове исцеле́вшему: суббо́та есть, и не досто́ит ти взя́ти одра́ твоего́.

¹¹ Он же отвеща́ им: И́же мя сотвори́ це́ла, Той мне рече́: возми́ одр твой и ходи́.

¹² Вопроси́ша же его́: кто есть Челове́к реки́й ти, возми́ одр твой и ходи́?

¹³ Исцеле́вый же не ве́дяше, Кто есть, Иису́с бо укло́нься, наро́ду су́щу на ме́сте.

¹⁴ Пото́м же обре́те его́ Иису́с в це́ркви и рече́ ему́: се здрав бысть, ктому́ не согреша́й, да не го́рше ти что бу́дет.

¹⁵ И́де же челове́к и пове́да иуде́ом, я́ко Иису́с есть, и́же мя сотвори́ це́ла.

¹⁶ И сего́ ра́ди гоня́ху Иису́са иуде́е и иска́ху Его́ уби́ти, зане́ сия́ творя́ше в суббо́ту.

¹⁷ Иису́с же отвещава́ше им: Оте́ц Мой досе́ле де́лает, и Аз де́лаю.

¹⁸ И сего́ ра́ди па́че иска́ху Его́ иуде́е уби́ти, я́ко не то́кмо разоря́ше суббо́ту, но и Отца́ Своего́ глаго́лаше Бо́га, ра́вен Ся творя́ Бо́гу.

¹⁹ Отвеща́в же Иису́с и рече́ им: ами́нь, ами́нь глаго́лю вам, не мо́жет Сын твори́ти о Себе́ ничесо́же, а́ще не е́же ви́дит Отца́ творя́ща, я́же бо Он твори́т, сия́ и Сын та́кожде твори́т.

²⁰ Оте́ц бо лю́бит Сы́на и вся показу́ет Ему́, я́же Сам твори́т, и бо́льша сих пока́жет Ему́ дела́, да вы чудите́ся.

²¹ Я́коже бо Оте́ц воскреша́ет ме́ртвыя и живи́т, та́ко и Сын, и́хже хо́щет, живи́т.

²² Оте́ц бо не су́дит никому́же, но суд весь даст Сы́нови,

²³ Да вси́ чтут Сы́на, я́коже чтут Отца́, а и́же не чтит Сы́на, не чтит Отца́ посла́вшаго Его́.

²⁴ Ами́нь, ами́нь глаго́лю вам, я́ко слу́шаяй словесе́ Моего́ и ве́руяй Посла́вшему Мя и́мать живо́т ве́чный, и на суд не прии́дет, но пре́йдет от сме́рти в живо́т.

²⁵ Ами́нь, ами́нь глаго́лю вам, я́ко гряде́т час, и ны́не есть, егда́ ме́ртвии услы́шат глас Сы́на Бо́жия и услы́шавше оживу́т.

²⁶ Я́коже бо Оте́ц и́мать живо́т в Себе́, та́ко даст и Сы́нови живо́т име́ти в Себе́.

²⁷ И о́бласть даде́ Ему́ и суд твори́ти, я́ко Сын Челове́чь есть.

²⁸ Не диви́теся сему́. Я́ко гряде́т час, во́ньже вси су́щии во гробе́х услы́шат глас Сы́на Бо́жия,

²⁹ И изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда́.

³⁰ Не могу́ Аз о Себе́ твори́ти ничесо́же. Я́коже слы́шу, сужду́, и суд Мой пра́веден есть, я́ко не ищу́ во́ли Моея́, но во́ли посла́вшаго Мя Отца́.

³¹ А́ще Аз свиде́тельствую о Мне, свиде́тельство Мое́ несть и́стинно.

³² Ин есть свиде́тельствуяй о Мне, и вем, я́ко и́стинно есть свиде́тельство, е́же свиде́тельствует о Мне.

³³ Вы посла́сте ко Иоа́нну, и свиде́тельствова о и́стине.

³⁴ Аз же не от челове́ка свиде́тельства прие́млю, но сия́ глаго́лю, да вы спасе́ни бу́дете.

³⁵ Он бе свети́льник горя́ и светя́, вы же хоте́сте возра́доватися в час свете́ния его́. ^[135]

³⁶ Аз же и́мам свиде́тельство бо́ле Иоа́ннова, дела́ бо, я́же даде́ Мне Оте́ц, да совершу́ я́, та дела́, я́же Аз творю́, свиде́тельствуют о Мне, я́ко Оте́ц Мя посла́.

³⁷ И посла́вый Мя Оте́ц Той свиде́тельствова о Мне. Ни гла́са Его́ нигде́же слы́шасте, ни виде́ния Его́ ви́десте,

³⁸ И словесе́ Его́ не и́мате пребыва́юща в вас, зане́, Его́же Той посла́, Сему́ вы ве́ру не е́млете.

³⁹ Испыта́йте Писа́ния, я́ко вы мните́ в них име́ти живо́т ве́чный, и та суть свиде́тельствующая о Мне.

⁴⁰ И не хо́щете приити́ ко Мне, да живо́т и́мате.

⁴¹ Сла́вы от челове́к не прие́млю,

⁴² Но разуме́х вы, я́ко любве́ Бо́жия не и́мате в себе́.

⁴³ Аз приидо́х во и́мя Отца́ Моего́, и не прие́млете Мене́, а́ще ин прии́дет во и́мя свое́, того́ прие́млете.

⁴⁴ Ка́ко вы мо́жете ве́ровати, сла́вы друг от дру́га прие́млюще, и сла́вы, я́же от Еди́наго Бо́га, не и́щете?

⁴⁵ Не мните́, я́ко Аз на вы реку́ ко Отцу́, есть, и́же на вы глаго́лет, Моисе́й, на́ньже вы упова́ете.

⁴⁶ А́ще бо бы́сте ве́ровали Моисе́ови, ве́ровали бы́сте у́бо и Мне, о Мне бо той писа́.

⁴⁷ А́ще ли того́ писа́нием не ве́руете, ка́ко Мои́м глаго́лом ве́ру и́мете?

Глава 6

¹ По сих и́де Иису́с на он пол мо́ря Галиле́и Тивериа́дска,

² И по Нем идя́ше наро́д мног, я́ко ви́дяху зна́мения Его́, я́же творя́ше на неду́жных.

³ Взы́де же на гору́ Иису́с и ту́ седя́ше со ученики́ свои́ми.

⁴ Бе́ же близ Па́сха, пра́здник жидо́вский.

⁵ Возве́д у́бо Иису́с о́чи и ви́дев, я́ко мног наро́д гряде́т к Нему́, глаго́ла к Фили́ппу: чим ку́пим хле́бы, да ядя́т си́и?

⁶ Сие́ же глаго́лаше искуша́я его́, Сам бо ве́дяше, что хо́щет сотвори́ти.

⁷ Отвеща́ Ему́ Фили́пп: двема́ сто́ма пе́нязь хле́бы не довле́ют им, да ко́ждо их ма́ло что прии́мет.

⁸ Глаго́ла Ему́ еди́н от учени́к Его́, Андре́й, брат Си́мона Петра́:

⁹ Есть о́трочищь зде еди́н, и́же и́мать пять хлеб ячме́нных и две ры́бе, но си́и что суть в сели́ко?

¹⁰ Рече́ же Иису́с: сотвори́те челове́ки возлещи́. Бе же трава́ мно́га на ме́сте. Возлеже́ у́бо муже́й число́м я́ко пять ты́сящ.

¹¹ Прия́т же хле́бы Иису́с и хвалу́ возда́в, подаде́ ученико́м, ученицы́ же возлежа́щим, та́кожде и от ры́бу, ели́ко хотя́ху.

¹² И я́ко насы́тишася, глаго́ла ученико́м Свои́м: собери́те избы́тки укру́х, да не поги́бнет ничто́же.

¹³ Собра́ша же и испо́лниша двана́десяте ко́шя укру́х от пяти́х хлеб ячме́нных, и́же избы́ша я́дшим.

¹⁴ Челове́цы же ви́девше зна́мение, е́же сотвори́ Иису́с, глаго́лаху, я́ко Сей есть вои́стинну Проро́к Гряды́й в міръ.

¹⁵ Иису́с же разуме́в, я́ко хотя́т приити́, да восхи́тят Его́ и сотворя́т Его́ царя́, оты́де па́ки в го́ру еди́н.

¹⁶ Я́ко по́зде бысть, снидо́ша ученицы́ Его́ на мо́ре,

¹⁷ И влезо́ша в кора́бль, и идя́ху на он пол мо́ря в Капернау́м. И тма а́бие бысть, и не у́ бе прише́л к ним Иису́с.

¹⁸ Мо́ре же, ве́тру ве́лию дыха́ющу, воздвиза́шеся.

¹⁹ Гре́бше же я́ко ста́дий два́десять и пять, или́ три́десять, узре́ша Иису́са ходя́ща по мо́рю и близ корабля́ бы́вша, и убоя́шася.

²⁰ Он же глаго́ла им: Аз есмь, не бо́йтеся.

²¹ Хотя́ху у́бо прия́ти Его́ в кора́бль, и а́бие кора́бль бысть на земли́, в ню́же идя́ху.

²² Во у́трий же наро́д, и́же стоя́ше об он пол мо́ря, ви́дев, я́ко корабля́ ино́го не бе ту, то́кмо еди́н той, во́ньже внидо́ша ученицы́ Его́, и я́ко не вни́де со ученики́ Свои́ми Иису́с в кора́бль, но еди́ни ученицы́ Его́ идо́ша,

²³ И и́ни приидо́ша корабли́ от Тивериа́ды близ ме́ста, иде́же ядо́ша хле́бы, хвалу́ возда́вше Го́сподеви.

²⁴ Егда́ же ви́деша наро́ди, я́ко Иису́са не бысть ту, ни учени́к Его́, влезо́ша са́ми в корабли́ и приидо́ша в Капернау́м, и́щуще Иису́са.

²⁵ И обрето́ша Его́ об он пол мо́ря, ре́ша Ему́: Равви́, когда́ зде бысть? ^[136]

²⁶ Отвеща́ им Иису́с и рече́: ами́нь, ами́нь глаго́лю вам, и́щете Мене́, не я́ко ви́десте зна́мение, но я́ко я́ли есте́ хле́бы и насы́тистеся.

²⁷ Де́лайте не бра́шно ги́блющее, но бра́шно пребыва́ющее в животе́ ве́чнем, е́же Сын Челове́ческий вам даст, Сего́ бо Оте́ц зна́мена Бог.

²⁸ Ре́ша же к Нему́: что сотвори́м, да де́лаем дела́ Бо́жия?

²⁹ Отвеща́ Иису́с и рече́ им: се есть де́ло Бо́жие, да ве́руете в Того́, Его́же посла́ Он.

³⁰ Ре́ша же Ему́: ко́е у́бо Ты твори́ши зна́мение, да ви́дим и ве́ру и́мем Тебе́? Что де́лаеши?

³¹ Отцы́ на́ши ядо́ша ма́нну в пусты́ни, я́коже есть пи́сано: хлеб с небесе́ даст им я́сти.

³² Рече́ у́бо им Иису́с: ами́нь, ами́нь глаго́лю вам, не Моисе́й даде́ вам хлеб с небесе́, но Оте́ц Мой даст вам хле́ба и́стиннаго с небесе́.

³³ Хлеб бо Бо́жий есть сходя́й с небесе́ и дая́й живо́т міру.

³⁴ Ре́ша у́бо к нему́: Го́споди, всегда́ даждь нам хлеб сей.

³⁵ Рече́ же им Иису́с: Аз есмь хлеб живо́тный, гряды́й ко Мне не и́мать взалка́тися, и ве́руяй в Мя не и́мать вжажда́тися никогда́же.

³⁶ Но рех вам, я́ко и ви́десте Мя, и не ве́руете.

³⁷ Все е́же даст Мне Оте́ц, ко Мне прии́дет, и гряду́щаго ко Мне не изжену́ вон.

³⁸ Я́ко снидо́х с небесе́, не да творю́ во́лю Мою́, но во́лю посла́вшаго Мя Отца́.

³⁹ Се же есть во́ля посла́вшаго Мя Отца́, да все е́же даде́ Ми, не погублю́ от Него́, но воскрешу́ е́ в после́дний день.

⁴⁰ Се же есть во́ля Посла́вшаго Мя, да всяк ви́дяй Сы́на и ве́руяй в Него́ и́мать живо́т ве́чный, и воскрешу́ его́ Аз в после́дний день.

⁴¹ Ропта́ху у́бо иуде́е о Нем, я́ко рече́: Аз есмь хлеб сше́дый с небесе́.

⁴² И глаго́лаху: не Сей ли есть Иису́с сын Ио́сифов, Ему́же мы зна́ем отца́ и Ма́терь? Ка́ко у́бо глаго́лет Сей, я́ко с небесе́ снидо́х?

⁴³ Отвеща́ у́бо Иису́с и рече́ им: не ропщи́те между́ собо́ю,

⁴⁴ Никто́же мо́жет приити́ ко Мне, а́ще не Оте́ц посла́вый Мя привлече́т его́, и Аз воскрешу́ его́ в после́дний день.

⁴⁵ Есть пи́сано во проро́цех: и бу́дут вси науче́ни Бо́гом. Всяк слы́шавый от Отца́ и навы́к, прии́дет ко Мне.

⁴⁶ Не я́ко Отца́ ви́дел есть кто, то́кмо Сый от Бо́га, Сей ви́де Отца́.

⁴⁷ Ами́нь, ами́нь глаго́лю вам: ве́руяй в мя и́мать живо́т ве́чный.

⁴⁸ Аз есмь хлеб живо́тный.

⁴⁹ Отцы́ ва́ши ядо́ша ма́нну в пусты́ни и умро́ша.

⁵⁰ Сей есть хлеб сходя́й с небесе́, да а́ще кто от него́ яст, не у́мрет.

⁵¹ Аз есмь хлеб живо́тный, и́же сше́дый с небесе́, а́ще кто снесть от хле́ба сего́, жив бу́дет во ве́ки, и хлеб, его́же Аз дам, Плоть Моя́ есть, ю́же Аз дам за живо́т міра.

⁵² Пря́хуся же между́ собо́ю жи́дове, глаго́люще: ка́ко мо́жет Сей нам да́ти Плоть Свою́ я́сти?

⁵³ Рече́ же им Иису́с: ами́нь, ами́нь глаго́лю вам, а́ще не сне́сте Пло́ти Сы́на Челове́ческаго, ни пие́те Кро́ве Его́, живота́ не и́мате в себе́.

⁵⁴ Яды́й Мою́ Плоть и пия́й Мою́ Кровь и́мать живо́т ве́чный, и Аз воскрешу́ его́ в после́дний день.

⁵⁵ Плоть бо моя́ и́стинно есть бра́шно, и кровь моя́ и́стинно есть пи́во.

⁵⁶ Яды́й Мою́ Плоть и пия́й Мою́ Кровь во Мне пребыва́ет, и Аз в нем.

⁵⁷ Я́коже посла́ Мя живы́й Оте́ц, и Аз живу́ Отца́ ра́ди, и яды́й Мя, и той жив бу́дет Мене́ ра́ди.

⁵⁸ Сей есть хлеб сше́дый с небесе́, не я́коже ядо́ша отцы́ ва́ши ма́нну и умро́ша, яды́й хлеб сей жив бу́дет во ве́ки.

⁵⁹ Сия́ рече́ на со́нмищи, учя́ в Капернау́ме.

⁶⁰ Мно́зи у́бо слы́шавше от учени́к Его́, ре́ша: же́стоко есть сло́во сие́, и кто мо́жет Его́ послу́шати?

⁶¹ Ве́дый же Иису́с в Себе́, я́ко ро́пщут о сем ученицы́ Его́, рече́ им: сие́ ли вы блазни́т?

⁶² А́ще у́бо у́зрите Сы́на Челове́ческаго восходя́ща, иде́же бе пре́жде?

⁶³ Дух есть, и́же оживля́ет, плоть не по́льзует ничто́же. Глаго́лы, я́же Аз глаго́лах вам, дух суть и живо́т суть.

⁶⁴ Но суть от вас не́цыи, и́же не ве́руют. Ве́дяше бо искони́ Иису́с, кто суть неве́рующии, и кто есть предая́й Его́.

⁶⁵ И глаго́лаше: сего́ ра́ди рех вам, я́ко никто́же мо́жет приити́ ко Мне, а́ще не бу́дет ему́ дано́ от Отца́ Моего́.

⁶⁶ От сего́ мно́зи от учени́к Его́ идо́ша вспять и ктому́ не хожда́ху с Ним.

⁶⁷ Рече́ же Иису́с обемана́десяте: еда́ и вы хо́щете ити́?

⁶⁸ Отвеща́ у́бо Ему́ Си́мон Петр: Го́споди, к кому́ и́дем? Глаго́лы живота́ ве́чнаго и́маши.

⁶⁹ И мы ве́ровахом и позна́хом, я́ко Ты еси́ Христо́с, Сын Бо́га жива́го.

⁷⁰ Отвеща́ им: не Аз ли вас двана́десяте избра́х? И еди́н от вас диа́вол есть.

⁷¹ Глаго́лаше же Иу́ду Си́монова Искарио́та: сей бо хотя́ше преда́ти Его́, еди́н сый от обоюна́десяте.

Глава 7

¹ И хожда́ше Иису́с по сих в Галиле́и, не хотя́ше бо во Иуде́и ходи́ти, я́ко иска́ху Его́ иуде́е уби́ти.

² Бе же близ пра́здник Иуде́йский, потче́ние се́ни. ^[137]

³ Ре́ша у́бо к Нему́ бра́тия Его́: прейди́ отсю́ду, и иди́ во Иуде́ю, да и ученицы́ Твои́ ви́дят дела́ Твоя́, я́же твори́ши.

⁴ Никто́же бо вта́йне ничесо́же твори́т, и и́щет сам я́ве бы́ти, а́ще сия́ твори́ши, яви́ Себе́ мірови.

⁵ Ни бра́тия бо Его́ ве́роваху в Него́.

⁶ Глаго́ла у́бо им Иису́с: вре́мя Мое́ не у́ прии́де, вре́мя же ва́ше всегда́ гото́во есть.

⁷ Не мо́жет міръ ненави́дети вас, Мене́ же ненави́дит, я́ко Аз свиде́тельствую о нем, я́ко дела́ Его́ зла суть.

⁸ Вы взы́дите в пра́здник сей, Аз не взы́ду ^[138] в пра́здник сей, я́ко вре́мя Мое́ не у́ испо́лнися.

⁹ Сия́ рек им, оста́ в Галиле́и.

¹⁰ Егда́ же взыдо́ша бра́тия Его́ в пра́здник, тогда́ и Сам взы́де, не я́ве, но я́ко тай.

¹¹ Жи́дове же иска́ху Его́ в пра́здник и глаго́лаху: где есть Он?

¹² И ро́пот мног бе о Нем в наро́дех, о́вии глаго́лаху, я́ко благ есть. Ини́и же глаго́лаху: ни, но льстит наро́ды.

¹³ Ни кото́рый же у́бо я́ве глаго́лаше о Нем, стра́ха ра́ди иуде́йскаго.

¹⁴ А́бие же в преполове́ние Пятьдеся́тницы взы́де Иису́с во це́рковь и уча́ше.

¹⁵ И дивля́хуся иуде́е, глаго́люще: ка́ко Сей кни́ги весть не учи́вся?

¹⁶ Отвеща́ у́бо им Иису́с и рече́: Мое́ уче́ние несть Мое́, но Посла́вшаго Мя.

¹⁷ А́ще кто хо́щет во́лю Его́ твори́ти, разуме́ет о уче́нии, ко́е от Бо́га есть, или́ Аз о Себе́ глаго́лю.

¹⁸ Глаго́ляй о себе́ сла́вы своея́ и́щет, а Ищя́й сла́вы Посла́вшаго Его́, Сей и́стинен есть, и несть непра́вды в Нем.

¹⁹ Не Моисе́й ли даде́ вам зако́н? И никто́же от вас твори́т зако́на. Что Мене́ и́щете уби́ти?

²⁰ Отвеща́ наро́д и рече́: бе́са ли и́маши? Кто Тебе́ и́щет уби́ти?

²¹ Отвеща́ Иису́с и рече́ им: еди́но де́ло сотвори́х, и вси дивите́ся.

²² Сего́ ра́ди Моисе́й даде́ вам обре́зание, [не я́ко от Моисе́а есть, но от оте́ц,] и в суббо́ту обре́заете челове́ка.

²³ А́ще обре́зание прие́млет челове́к в суббо́ту, да не разори́тся зако́н Моисе́ов, на Мя ли гне́ваетеся, я́ко всего́ челове́ка здра́ва сотвори́х в суббо́ту?

²⁴ Не суди́те на лица́, но пра́ведный суд суди́те.

²⁵ Глаго́лаху у́бо не́цыи от Иерусали́млян: не Сей ли есть, Его́же и́щут уби́ти?

²⁶ И се не обину́яся глаго́лет, и ничесо́же Ему́ не глаго́лют, еда́ ка́ко ^[139] разуме́ша кня́зи, я́ко Сей есть Христо́с?

²⁷ Но Сего́ ве́мы, отку́ду есть, Христо́с же егда́ прии́дет, никто́же весть, отку́ду бу́дет.

²⁸ Воззва́ у́бо в це́ркви учя́ Иису́с и глаго́ля: и Мене́ ве́сте, и ве́сте, отку́ду есмь, и о Себе́ не приидо́х, но есть и́стинен Посла́вый Мя, Его́же вы не ве́сте.

²⁹ Аз вем Его́, я́ко от Него́ есмь, и Той Мя посла́.

³⁰ Иска́ху же да и́мут Его́, и никто́же возложи́ Нань руки́, я́ко не у́ бе прише́л час Его́.

³¹ Мно́зи же от наро́да ве́роваша в Него́ и глаго́лаху: я́ко Христо́с, егда́ прии́дет, еда́ бо́льша зна́мения сотвори́т, я́же Сей твори́т?

³² Слы́шаша фарисе́е наро́д ро́пщущь о Нем сия́, и посла́ша фарисе́е и архиере́е слуги́, да и́мут Его́.

³³ Рече́ же Иису́с: еще́ ма́ло вре́мя с ва́ми Есмь, и иду́ к Посла́вшему Мя:

³⁴ Пои́щете Мене́ и не обря́щете: и иде́же есмь аз, вы не мо́жете приити́.

³⁵ Ре́ша же иуде́е к себе́: ка́мо Сей хо́щет ити́, я́ко мы не обря́щем Его́? Еда́ в разсе́яние е́ллинское хо́щет ити́ и учи́ти е́ллины?

³⁶ Что есть сие́ сло́во, е́же рече́: взы́щете мене́ и не обря́щете: и иде́же есмь аз, вы не можете приити?

³⁷ В после́дний же день вели́кий пра́здника стоя́ше Иису́с и зва́ше, глаго́ля: а́ще кто жа́ждет, да прии́дет ко Мне и пие́т.

³⁸ Ве́руяй в Мя, я́коже рече́ Писа́ние, ре́ки от чре́ва его́ истеку́т воды́ жи́вы.

³⁹ Сие́ же рече́ о Ду́се Его́же хотя́ху приима́ти ве́рующии во и́мя Его́, не у́ бо бе Дух Святы́й, я́ко Иису́с не у́ бе просла́влен.

⁴⁰ Мно́зи же от наро́да слы́шавше сло́во, глаго́лаху: Сей есть вои́стинну проро́к.

⁴¹ Друзи́и глаго́лаху: Сей есть Христо́с. О́вии же глаго́лаху: еда́ от Галиле́и Христо́с прихо́дит?

⁴² Не Писа́ние ли рече́, я́ко от се́мене Дави́дова и от Вифлее́мския ве́си, иде́же бе Дави́д, Христо́с прии́дет?

⁴³ Ра́спря у́бо бысть в наро́де Его́ ра́ди.

⁴⁴ Не́цыи же от них хотя́ху я́ти Его́, но никто́же возложи́ Нань ру́це.

⁴⁵ Приидо́ша же слуги́ ко архиере́ом и фарисе́ом, и ре́ша им ти́и: почто́ не приведо́сте Его́?

⁴⁶ Отвеща́ша слуги́: николи́же та́ко есть глаго́лал челове́к, я́ко Сей Челове́к.

⁴⁷ Отвеща́ша у́бо им фарисе́е: еда́ и вы прельще́ни бы́сте?

⁴⁸ Еда́ кто от князь ве́рова в Онь, или́ от фарисе́й?

⁴⁹ Но наро́д сей, и́же не весть зако́на, про́кляти суть.

⁵⁰ Глаго́ла Никоди́м к ним, и́же прише́дый к Нему́ но́щию, еди́н сый от них:

⁵¹ Еда́ зако́н наш су́дит челове́ку, а́ще не слы́шит от него́ пре́жде и разуме́ет, что твори́т?

⁵² Отвеща́ша и реко́ша ему́: еда́ и ты от Галиле́и еси́? Испыта́й и виждь, я́ко проро́к от Галиле́и не прихо́дит.

⁵³ И и́де ко́ждо в дом свой.

Глава 8

¹ Иису́с же и́де в го́ру Елео́нску:

² Зау́тра же па́ки прии́де в це́рковь, и вси лю́дие идя́ху к нему́: и сед уча́ше их.

³ Приведо́ша же кни́жницы и фарисе́е к Нему жену́, в прелюбодея́нии я́ту, и поста́виша ю́ посреде́.

⁴ Глаго́лаша Ему́: Учи́телю, сия́ жена́ я́та есть ны́не в прелюбодея́нии.

⁵ В зако́не же нам Моисе́й повеле́ таковы́я ка́мением побива́ти, Ты же что глаго́леши?

⁶ Сие́ же ре́ша искуша́юще Его́, да бы́ша име́ли что глаго́лати Нань. Иису́с же до́лу прекло́нься, пе́рстом писа́ше на земли́, не слага́я им.

⁷ Я́коже прилежа́ху вопроша́юще Его́, воскло́нься рече́ к ним: и́же есть без греха́ в вас, пре́жде ^[140] ве́рзи ка́мень на ню.

⁸ И па́ки до́лу прекло́нься, писа́ше на земли́.

⁹ Они́ же слы́шавше и со́вестию облича́еми, исхожда́ху еди́н по еди́ному, наче́нше от ста́рец до после́дних, и оста́ еди́н Иису́с, и жена́ посреде́ су́щи.

¹⁰ Воскло́нься же Иису́с и ни еди́наго ви́дев, то́чию жену́, рече́ ей: же́но, где суть, и́же важда́ху на тя? Ни ки́йже ли тебе́ осуди́?

¹¹ Она́ же рече́: никто́же, Го́споди. Рече́ же ей Иису́с: ни Аз тебе́ осужда́ю, иди́ и отсе́ле ктому́ не согреша́й.

¹² Па́ки же им Иису́с рече́ глаго́ля: Аз есмь свет міру, ходя́й по Мне не и́мать ходи́ти во тме, но и́мать свет живо́тный.

¹³ Ре́ша у́бо Ему́ фарисе́е: Ты о Себе́ Сам свиде́тельствуеши, свиде́тельство Твое́ несть и́стинно.

¹⁴ Отвеща́ Иису́с и рече́ им: а́ще Аз свиде́тельствую о Себе́, и́стинно есть свиде́тельство Мое́, я́ко вем, отку́ду приидо́х и ка́мо иду́, вы же не ве́сте, отку́ду прихожду́ и ка́мо гряду́.

¹⁵ Вы по пло́ти су́дите, Аз не сужду́ никому́же.

¹⁶ И а́ще сужду́ Аз, суд Мой и́стинен есть, я́ко еди́н несмь, но Аз и посла́вый Мя Оте́ц.

¹⁷ И в зако́не же ва́шем пи́сано есть, я́ко двою́ челове́ку свиде́тельство и́стинно есть.

¹⁸ Аз есмь свиде́тельствуяй о Мне Само́м, и свиде́тельствует о Мне посла́вый Мя Оте́ц.

¹⁹ Глаго́лаху же Ему́: где есть Оте́ц Твой? Отвеща́ Иису́с: ни Мене́ ве́сте, ни Отца́ Моего́, а́ще Мя бы́сте ве́дали, и Отца́ Моего́ ве́дали бы́сте.

²⁰ Сия́ глаго́лы глаго́ла Иису́с в газофилаки́и, ^[141] учя́ в це́ркви, и никто́же ят Его́, я́ко не у́ бе прише́л час Его́.

²¹ Рече́ же им па́ки Иису́с: Аз иду́, и взы́щете Мене́, и во гресе́ ва́шем у́мрете, а́може Аз иду́, вы не мо́жете приити́.

²² Глаго́лаху у́бо иуде́е: еда́ Ся Сам убие́т, я́ко глаго́лет, а́може Аз иду́, вы не мо́жете приити́?

²³ И рече́ им: вы от ни́жних есте́, Аз от вы́шних есмь, вы от міра сего́ есте́, Аз несмь от міра сего́.

²⁴ Рех у́бо вам, я́ко у́мрете во гресе́х ва́ших, а́ще бо не и́мете ве́ры, я́ко Аз есмь, у́мрете во гресе́х ва́ших.

²⁵ Глаго́лаху у́бо Ему́: Ты кто еси́? И рече́ им Иису́с: Нача́ток, я́ко и глаго́лю вам.

²⁶ Мно́га и́мам о вас глаго́лати и суди́ти, но Посла́вый Мя и́стинен есть, и Аз, я́же слы́шах от Него́, сия́ глаго́лю в міре.

²⁷ Не разуме́ша у́бо, я́ко Отца́ им глаго́лаше.

²⁸ Рече́ же им Иису́с: егда́ вознесе́те Сы́на Челове́ческаго, тогда́ разуме́ете, я́ко Аз есмь, и о Себе́ ничесо́же творю́, но я́коже научи́ Мя Оте́ц Мой, сия́ глаго́лю.

²⁹ И посла́вый Мя со Мно́ю есть, не оста́ви Мене́ еди́наго Оте́ц, я́ко Аз уго́дная Ему́ всегда́ творю́.

³⁰ Сия́ Ему́ глаго́лющу, мно́зи ве́роваша в Него́.

³¹ Глаго́лаше же Иису́с к ве́ровавшим к Нему́ иуде́ем: а́ще вы пребу́дете во словеси́ Мое́м, вои́стинну ученицы́ Мои́ бу́дете,

³² И уразуме́ете и́стину, и и́стина свободи́т вы.

³³ Отвеща́ша и ре́ша Ему́: се́мя Авраа́мле есмы́ и никому́же рабо́тахом николи́же, ка́ко Ты глаго́леши, я́ко свобо́дни бу́дете?

³⁴ Отвеща́ им Иису́с: ами́нь, ами́нь глаго́лю вам, я́ко всяк творя́й грех раб есть греха́.

³⁵ Раб же не пребыва́ет в дому́ во век, сын пребыва́ет во век.

³⁶ А́ще у́бо Сын вы свободи́т, вои́стинну свобо́дни бу́дете.

³⁷ Вем, я́ко се́мя Авраа́мле есте́, но и́щете Мене́ уби́ти, я́ко сло́во Мое́ не вмеща́ется в вы.

³⁸ Аз, е́же ви́дех у Отца́ Моего́, глаго́лю, и вы у́бо, е́же ви́десте у отца́ ва́шего, творите́.

³⁹ Отвеща́ша и ре́ша Ему́: оте́ц наш Авраа́м есть. Глаго́ла им Иису́с: а́ще ча́да Авраа́мля бы́сте бы́ли, дела́ Авраа́мля бы́сте твори́ли.

⁴⁰ Ны́не же и́щете Мене́ уби́ти, Челове́ка, и́же и́стину вам глаго́лах, ю́же слы́шах от Бо́га, сего́ Авраа́м несть сотвори́л.

⁴¹ Вы творите́ дела́ отца́ ва́шего. Ре́ша же Ему́: мы от любодея́ния не́смы рожде́ни, еди́наго Отца́ и́мамы, Бо́га.

⁴² Рече́ же им Иису́с: а́ще Бог Оте́ц ваш бы был, люби́ли бы́сте у́бо Мене́, Аз бо от Бо́га изыдо́х и приидо́х. Не о Себе́ бо приидо́х, но Той Мя посла́.

⁴³ Почто́ бесе́ды Моея́ не разуме́ете? Я́ко не мо́жете слы́шати словесе́ Моего́?

⁴⁴ Вы отца́ ва́шего диа́вола есте́, и по́хоти отца́ ва́шего хо́щете твори́ти. Он человекоуби́йца бе искони́ и во и́стине не стои́т, я́ко несть и́стины в нем, егда́ глаго́лет лжу, от свои́х глаго́лет, я́ко ложь есть и оте́ц лжи.

⁴⁵ Аз же зане́ и́стину глаго́лю, не ве́руете Мне.

⁴⁶ Кто от вас облича́ет Мя о гресе́? А́ще ли и́стину глаго́лю, почто́ вы не ве́руете Мне?

⁴⁷ И́же есть от Бо́га, глаго́лы Бо́жия послу́шает, сего́ ра́ди вы не послу́шаете, я́ко от Бо́га не́сте.

⁴⁸ Отвеща́ша у́бо иуде́е и ре́ша Ему́: не до́бре ли мы глаго́лем, я́ко самаряни́н еси́ Ты и бе́са и́маши?

⁴⁹ Отвеща́ Иису́с: Аз бе́са не и́мам, но чту Отца́ Моего́, и вы не чте́те Мене́.

⁵⁰ Аз же не ищу́ сла́вы Моея́, есть Ищя́ и Судя́.

⁵¹ Ами́нь, ами́нь глаго́лю вам, а́ще кто сло́во Мое́ соблюде́т, сме́рти не и́мать ви́дети во ве́ки.

⁵² Ре́ша у́бо Ему́ жи́дове: ны́не разуме́хом, я́ко бе́са и́маши. Авраа́м у́мре и проро́цы, и Ты глаго́леши: а́ще кто сло́во Мое́ соблюде́т, сме́рти не и́мать вкуси́ти во ве́ки.

⁵³ Еда́ Ты бо́лий еси́ отца́ на́шего Авраа́ма, и́же у́мре? И проро́цы умро́ша, кого́ Ся Сам Ты твори́ши?

⁵⁴ Отвеща́ Иису́с: а́ще Аз сла́влюся Сам, сла́ва Моя́ ничесо́же есть, есть Оте́ц Мой сла́вяй Мя, Его́же вы глаго́лете, я́ко Бог наш есть.

⁵⁵ И не позна́сте Его́, Аз же вем Его́, и а́ще реку́, я́ко не вем Его́, бу́ду подо́бен вам ложь, но вем Его́ и сло́во Его́ соблюда́ю.

⁵⁶ Авраа́м оте́ц ваш рад бы был, дабы́ ви́дел день Мой, и ви́де и возра́довася.

⁵⁷ Ре́ша у́бо иуде́е к Нему́: пяти́десять лет не у́ и́маши, и Авраа́ма ли еси́ ви́дел?

⁵⁸ Рече́ же им Иису́с: ами́нь, ами́нь глаго́лю вам, пре́жде да́же Авраа́м не бысть, Аз есмь.

⁵⁹ Взя́ша у́бо ка́мение, да ве́ргут Нань, Иису́с же скры́ся и изы́де из це́ркве, проше́д посреде́ их, и мимохожда́ше та́ко.

Глава 9

¹ И мимоиды́й ви́де челове́ка сле́па от рождества́.

² И вопроси́ша Его́ ученицы́ Его́, глаго́люще: Равви́, кто согреши́, сей ли, или́ роди́теля его́, да слеп роди́ся?

³ Отвеща́ Иису́с: ни сей согреши́, ни роди́теля его́, но да явя́тся дела́ Бо́жия на нем.

⁴ Мне подоба́ет де́лати дела́ Посла́вшаго Мя, до́ндеже день есть, прии́дет нощь, егда́ никто́же мо́жет де́лати.

⁵ Егда́ в міре есмь, свет есмь міру.

⁶ Сия́ рек, плю́ну на зе́млю, и сотвори́ бре́ние от плюнове́ния, и пома́за о́чи бре́нием слепо́му.

⁷ И рече́ ему́: иди́, умы́йся в купе́ли Силоа́мсте, е́же сказа́ется по́слан. И́де у́бо и умы́ся, и прии́де ви́дя.

⁸ Сосе́ди же и и́же бя́ху ви́дели его́ пре́жде, я́ко слеп бе, глаго́лаху: не сей ли есть седя́й и прося́й?

⁹ О́вии глаго́лаху, я́ко сей есть, ини́и же глаго́лаху, я́ко подо́бен ему́ есть. Он же глаго́лаше, я́ко аз есмь.

¹⁰ Глаго́лаху же ему́: ка́ко ти отверзо́стеся о́чи?

¹¹ Отвеща́ он и рече́: Челове́к нарица́емый Иису́с бре́ние сотвори́ и пома́за о́чи мои́ и рече́ ми: иди́ в купе́ль Силоа́млю и умы́йся. Шед же и умы́вся, прозре́х.

¹² Ре́ша у́бо ему́: кто Той есть? ^[142] Глаго́ла: не вем.

¹³ Ведо́ша же его́ к фарисе́ом, и́же бе иногда́ слеп.

¹⁴ Бе же суббо́та, егда́ сотвори́ бре́ние Иису́с и отве́рзе ему́ о́чи.

¹⁵ Па́ки же вопроша́ху его́ и фарисе́е, ка́ко прозре́. Он же рече́ им: бре́ние положи́ мне на о́чи, и умы́хся, и ви́жу.

¹⁶ Глаго́лаху у́бо от фарисе́й не́цыи: несть Сей от Бо́га Челове́к, я́ко суббо́ту не храни́т. О́вии глаго́лаху: ка́ко мо́жет челове́к гре́шен сицева́ зна́мения твори́ти? И ра́спря бе в них.

¹⁷ Глаго́лаху у́бо слепцу́ па́ки: ты что глаго́леши о Нем, я́ко отве́рзе о́чи твои́? Он же рече́, я́ко проро́к есть.

¹⁸ Не я́ша у́бо ве́ры иуде́е о нем, я́ко слеп бе и прозре́, до́ндеже возгласи́ша роди́теля того́ прозре́вшаго.

¹⁹ И вопроси́ша я́, глаго́люще: сей ли есть сын ва́ю, ^[143] его́же вы глаго́лете, я́ко слеп роди́ся? Ка́ко у́бо ны́не ви́дит?

²⁰ Отвеща́ста же и́м роди́теля его́ и ре́ста: ве́мы, я́ко сей есть сын на́ю и я́ко слеп роди́ся.

²¹ Ка́ко же ны́не ви́дит, не ве́мы, или́ кто отве́рзе ему́ о́чи, мы не ве́мы, сам во́зраст и́мать, самого́ вопроси́те, сам о себе́ да глаго́лет.

²² Сия́ реко́ста роди́теля его́, я́ко боя́стася жидо́в, уже́ бо бя́ху сложи́лися жи́дове, да а́ще кто Его́ испове́сть Христа́, отлуче́н от со́нмища бу́дет,

²³ сего́ ра́ди роди́теля его́ реко́ста, я́ко во́зраст и́мать, самого́ вопроси́те.

²⁴ Возгласи́ша же втори́цею челове́ка, и́же бе слеп, и ре́ша ему́: даждь сла́ву Бо́гу, мы ве́мы, я́ко Челове́к Сей гре́шен есть.

²⁵ Отвеща́ же он и рече́: а́ще гре́шен есть, не вем, еди́но вем, я́ко слеп бех, ны́не же ви́жу.

²⁶ Ре́ша же ему́ па́ки: что сотвори́ тебе́? Ка́ко отве́рзе о́чи твои́?

²⁷ Отвеща́ им: реко́х вам уже́, и не слы́шасте, что па́ки хо́щете слы́шати? Еда́ и вы ученицы́ Его́ хо́щете бы́ти?

²⁸ Они́ же укори́ша его́ и ре́ша ему́: ты учени́к еси́ Того́, мы же Моисе́овы есмы́ ученицы́.

²⁹ Мы ве́мы, я́ко Моисе́ови глаго́ла Бог, Сего́ же не ве́мы, отку́ду есть.

³⁰ Отвеща́ челове́к и рече́ им: о сем бо ди́вно есть, я́ко вы не ве́сте, отку́ду есть, и отве́рзе о́чи мои́.

³¹ Вем же, я́ко гре́шники Бог не послу́шает, но а́ще кто Богочте́ц есть и во́лю Его́ твори́т, того́ послу́шает.

³² От ве́ка несть слы́шано, я́ко кто отве́рзе о́чи сле́пу рожде́ну.

³³ А́ще не бы был Сей от Бо́га, не могл бы твори́ти ничесо́же.

³⁴ Отвеща́ша и ре́ша ему́: во гресе́х ты роди́лся еси́ весь, и ты ли ны учи́ши? И изгна́ша его́ вон.

³⁵ Услы́ша Иису́с, я́ко изгна́ша его́ вон, и обре́т его́, рече́ ему́: ты ве́руеши ли в Сы́на Бо́жия?

³⁶ Отвеща́ он и рече́: и кто есть, Го́споди, да ве́рую в Него́?

³⁷ Рече́ же ему́ Иису́с: и ви́дел еси́ Его́, и Глаго́ляй с тобо́ю Той есть.

³⁸ Он же рече́: ве́рую, Го́споди. И поклони́ся Ему́.

³⁹ И рече́ Иису́с: на суд Аз в міръ сей приидо́х, да неви́дящии ви́дят, и ви́дящии сле́пи бу́дут.

⁴⁰ И слы́шаша от фарисе́й сия́ су́щии с Ним и ре́ша Ему́: еда́ и мы сле́пи есмы́?

⁴¹ Рече́ им Иису́с: а́ще бы́сте сле́пи бы́ли, не бы́сте име́ли греха́, ны́не же глаго́лете, я́ко ви́дим, грех ваш пребыва́ет.

Глава 10

¹ Ами́нь, ами́нь глаго́лю вам, не входя́й две́рьми во двор о́вчий, но прела́зя и́нуде, той тать есть и разбо́йник.

² А входя́й две́рьми па́стырь есть овца́м.

³ Сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их.

⁴ И егда́ своя́ о́вцы иждене́т, пред ни́ми хо́дит, и о́вцы по нем и́дут, я́ко ве́дят глас его́.

⁵ По чужде́м же не и́дут, но бежа́т от него́, я́ко не зна́ют чужда́го гла́са.

⁶ Сию́ при́тчу рече́ им Иису́с, они́ же не разуме́ша, что бя́ше, я́же глаго́лаше им.

⁷ Рече́ же па́ки им Иису́с: ами́нь, ами́нь глаго́лю вам, я́ко Аз есмь дверь овца́м.

⁸ Вси, ели́ко их прии́де пре́жде Мене́, та́тие суть и разбо́йницы, но не послу́шаша их о́вцы.

⁹ Аз есмь дверь, Мно́ю а́ще кто вни́дет, спасе́тся, и вни́дет и изы́дет, и па́жить обря́щет.

¹⁰ Тать не прихо́дит, ра́зве да укра́дет, и убие́т, и погуби́т, Аз приидо́х, да живо́т и́мут и ли́шше и́мут.

¹¹ Аз есмь па́стырь до́брый, па́стырь до́брый ду́шу свою́ полага́ет за о́вцы.

¹² А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы.

¹³ А нае́мник бежи́т, я́ко нае́мник есть и неради́т о овца́х.

¹⁴ Аз есмь па́стырь до́брый, и зна́ю Моя́, и зна́ют Мя Моя́.

¹⁵ Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы.

¹⁶ И и́ны о́вцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет еди́но ста́до, и еди́н Па́стырь.

¹⁷ Сего́ ра́ди Мя Оте́ц лю́бит, я́ко Аз ду́шу Мою́ полага́ю, да па́ки прииму́ ю́.

¹⁸ Никто́же во́змет ю́ от Мене́, но Аз полага́ю ю́ о Себе́, о́бласть ^[144] и́мам положи́ти ю́ и о́бласть и́мам па́ки прия́ти ю́, сию́ за́поведь прия́х от Отца́ Моего́.

¹⁹ Ра́спря же па́ки бысть во иуде́ех за словеса́ сия́.

²⁰ Глаго́лаху же мно́зи от них: бе́са и́мать и неи́стов есть, что Его́ послу́шаете?

²¹ Ини́и глаго́лаху: си́и глаго́ли не суть бесну́ющагося, еда́ мо́жет бес слепо́му о́чи отве́рсти?

²² Бы́ша же тогда́ обновле́ния во Иерусоли́мех, и зима́ бе.

²³ И хожда́ше Иису́с в це́ркви, в притво́ре Соломо́ни.

²⁴ Обыдо́ша же Его́ иуде́е и глаго́лаху Ему́: доко́ле ду́ши на́ша взе́млеши? А́ще Ты еси́ Христо́с, рцы нам не обину́яся.

²⁵ Отвеща́ им Иису́с: рех вам, и не ве́руете, дела́, я́же Аз творю́ о и́мени Отца́ Моего́, та свиде́тельствуют о Мне.

²⁶ Но вы не ве́руете, не́сте бо от ове́ц Мои́х, я́коже рех вам.

²⁷ О́вцы Моя́ гла́са Моего́ слу́шают, и Аз зна́ю их, и по Мне гряду́т.

²⁸ И Аз живо́т ве́чный дам им, и не поги́бнут во ве́ки, и не восхи́тит их никто́же от руки́ Моея́.

²⁹ Оте́ц Мой, И́же даде́ Мне, бо́лий всех есть, и никто́же мо́жет восхи́тити их от руки́ Отца́ Моего́.

³⁰ Аз и Оте́ц еди́но есма́.

³¹ Взя́ша же ка́мение па́ки иуде́е, да побию́т Его́.

³² Отвеща́ им Иису́с: мно́га добра́ дела́ яви́х вам от Отца́ Моего́, за ко́е их де́ло ка́мение ме́щете на Мя?

³³ Отвеща́ша Ему́ иуде́е, глаго́люще: о добре́ де́ле ка́мение не ме́щем на Тя, но о хуле́, я́ко Ты, челове́к сый, твори́ши Себе́ Бо́га.

³⁴ Отвеща́ им Иису́с: несть ли пи́сано в зако́не ва́шем: Аз рех, бо́зи есте́?

³⁵ А́ще о́ны рече́ бо́ги, к ни́мже сло́во Бо́жие бысть, и не мо́жет разори́тися Писа́ние,

³⁶ Его́же Оте́ц святи́ и посла́ в міръ, вы глаго́лете, я́ко хулу́ глаго́леши, зане́ рех: Сын Бо́жий есмь.

³⁷ А́ще не творю́ дела́ Отца́ Моего́, не ими́те Ми ве́ры.

³⁸ А́ще ли творю́, а́ще и Мне не ве́руете, дело́м Мои́м ве́руйте, да разуме́ете и ве́руете, я́ко во Мне Оте́ц, и Аз в Нем.

³⁹ Иска́ху у́бо па́ки я́ти Его́: и изы́де от рук их.

⁴⁰ И иде па́ки на он пол Иорда́на, на ме́сто, иде́же бе Иоа́нн пре́жде крестя́, и пребы́сть ту.

⁴¹ И мно́зи приидо́ша к Нему́ и глаго́лаху, я́ко Иоа́нн у́бо зна́мения не сотвори́ ни еди́наго: вся же, ели́ка рече́ Иоа́нн о сем, и́стинна бя́ху.

⁴² И мно́зи ве́роваша в Него́ ту.

Глава 11

¹ Бе не́кто боля́ Ла́зарь от Вифа́нии, от ве́си Мари́ины и Ма́рфы сестры́ ея́.

² Бе же Мари́а пома́завшая Го́спода мν́ром и оте́ршая но́зе Его́ власы́ свои́ми, ея́же брат Ла́зарь боля́ше.

³ Посла́сте у́бо сестре́ к Нему́, глаго́люще: Го́споди, се его́же лю́биши, боли́т.

⁴ Слы́шав же Иису́с рече́: сия́ боле́знь несть к сме́рти, но о сла́ве Бо́жии, да просла́вится Сын Бо́жий ея́ ра́ди.

⁵ Любля́ше же Иису́с Ма́рфу и сестру́ ея́ и Ла́заря.

⁶ Егда́ же услы́ша, я́ко боли́т, тогда́ пребы́сть на не́мже бе ме́сте два дни.

⁷ Пото́м же глаго́ла ученико́м: и́дем во Иуде́ю па́ки.

⁸ Глаго́лаша Ему́ ученицы́: Равви́, ны́не иска́ху Тебе́ ка́мением поби́ти иуде́е, и па́ки ли и́деши та́мо?

⁹ Отвеща́ Иису́с: не два ли на́десяте часа́ еста́ во дне?

¹⁰ А́ще кто хо́дит во дне, не по́ткнется, я́ко свет міра сего́ ви́дит, а́ще же кто хо́дит в нощи́, по́ткнется, я́ко несть све́та в нем.

¹¹ Сия́ рече́ и посе́м глаго́ла им: Ла́зарь друг наш у́спе, но иду́, да возбужу́ его́.

¹² Ре́ша же ученицы́ Его́: Го́споди, а́ще у́спе, спасе́н бу́дет.

¹³ Рече́ же Иису́с о сме́рти его́, они́ же мне́ша, я́ко о успе́нии сна глаго́лет.

¹⁴ Тогда́ рече́ им Иису́с не обину́яся: Ла́зарь у́мре,

¹⁵ И ра́дуюся вас ра́ди, да ве́руете, я́ко не бех та́мо, но и́дем к нему́.

¹⁶ Рече́ же Фома́, глаго́лемый Близне́ц, ученико́м: и́дем и мы, да у́мрем с ним.

¹⁷ Прише́д же Иису́с, обре́те его́ четы́ри дни уже́ иму́ща во гро́бе.

¹⁸ Бе же Вифа́ниа близ Иерусали́ма, я́ко ста́дий пятьна́десять.

¹⁹ И мно́зи от иуде́й бя́ху пришли́ к Ма́рфе и Мари́и, да уте́шат их о бра́те ею́.

²⁰ Ма́рфа у́бо егда́ услы́ша, я́ко Иису́с гряде́т, сре́те Его́, Мари́а же до́ма седя́ше.

²¹ Рече́ же Ма́рфа ко Иису́су: Го́споди, а́ще бы зде был, не бы брат мой у́мерл.

²² Но и ны́не вем, я́ко ели́ка а́ще про́сиши от Бо́га, даст Тебе́ Бог.

²³ Глаго́ла ей Иису́с: воскре́снет брат твой.

²⁴ Глаго́ла Ему́ Ма́рфа: вем, я́ко воскре́снет в воскреше́ние, в после́дний день.

²⁵ Рече́ же ей Иису́с: Аз есмь воскреше́ние и живо́т. Ве́руяй в Мя, а́ще и у́мрет, оживе́т.

²⁶ И всяк живы́й и ве́руяй в Мя не у́мрет во ве́ки. Е́млеши ли ве́ру сему́?

²⁷ Глаго́ла Ему́: ей, Го́споди, аз ве́ровах, я́ко Ты еси́ Христо́с Сын Бо́жий, и́же в міръ гряды́й.

²⁸ И сия́ ре́кши, и́де и пригласи́ Мари́ю сестру́ свою́ тай, ре́кши: Учи́тель прише́л есть и глаша́ет тя.

²⁹ Она́ же я́ко услы́ша, воста́ ско́ро и и́де к Нему́.

³⁰ Не уже́ бо бе прише́л Иису́с в весь, но бе на ме́сте, иде́же сре́те Его́ Ма́рфа.

³¹ Иуде́е же у́бо су́щии с не́ю в дому́ и утеша́юще ю́, ви́девше Мари́ю, я́ко ско́ро воста́ и изы́де, по ней идо́ша, глаго́люще, я́ко и́дет на гроб, да пла́чет та́мо.

³² Мари́а же я́ко прии́де, иде́же бе Иису́с, ви́девши Его́, паде́ Ему́ на ногу́, глаго́лющи Ему́: Го́споди, а́ще бы еси́ был зде, не бы у́мерл мой брат.

³³ Иису́с же, я́ко ви́де ю́ пла́чущуся и прише́дшия с не́ю иуде́и пла́чущя, запрети́ ду́ху и возмути́ся Сам

³⁴ И рече́: где положи́сте его́? Глаго́лаша Ему́: Го́споди, прииди́ и виждь.

³⁵ Прослези́ся Иису́с.

³⁶ Глаго́лаху у́бо жи́дове: виждь, ка́ко любля́ше его́.

³⁷ Не́цыи же от них ре́ша: не можа́ше ли Сей, отве́рзый о́чи слепо́му, сотвори́ти, да и сей не у́мрет?

³⁸ Иису́с же па́ки претя́ в себе́, прии́де ко гро́бу. Бе же пеще́ра, и ка́мень лежа́ше на ней.

³⁹ Глаго́ла Иису́с: возьми́те ка́мень. Глаго́ла Ему́ сестра́ уме́ршаго Ма́рфа: Го́споди, уже́ смерди́т, четверодне́вен бо есть.

⁴⁰ Глаго́ла ей Иису́с: не рех ли ти, я́ко а́ще ве́руеши, у́зриши сла́ву Бо́жию?

⁴¹ Взя́ша у́бо ка́мень, иде́же бе уме́рый лежя́. Иису́с же возве́д о́чи горе́ и рече́: О́тче, хвалу́ Тебе́ воздаю́, я́ко услы́шал еси́ Мя.

⁴² Аз же ве́дех, я́ко всегда́ Мя послу́шаеши, но наро́да ра́ди стоя́щаго о́крест рех, да ве́ру и́мут, я́ко Ты Мя посла́л еси́.

⁴³ И сия́ рек, гла́сом вели́ким воззва́: Ла́заре, гряди́ вон.

⁴⁴ И изы́де уме́рый, обя́зан рука́ма и нога́ма укро́ем, и лице́ его́ убру́сом обя́зано. Глаго́ла им Иису́с: разреши́те его́ и оста́вите ити́.

⁴⁵ Мно́зи у́бо от иуде́й прише́дшии к Мари́и и ви́девше, я́же сотвори́ Иису́с, ве́роваша в Него́.

⁴⁶ Не́цыи же от них идо́ша к фарисе́ом и реко́ша им, я́же сотвори́ Иису́с.

⁴⁷ Собра́ша у́бо архиере́е и фарисе́е сонм и глаго́лаху: что сотвори́м? Я́ко Челове́к Сей мно́га зна́мения твори́т?

⁴⁸ А́ще оста́вим Его́ та́ко, вси ве́руют в Него́, и прии́дут ри́мляне и во́змут ме́сто и язы́к наш.

⁴⁹ Еди́н же не́кто от них Каиа́фа, архиере́й сый ле́ту тому́, рече́ им: вы не ве́сте ничесо́же,

⁵⁰ Ни помышля́ете, я́ко у́не есть нам, да еди́н челове́к у́мрет за лю́ди, а не весь язы́к поги́бнет.

⁵¹ Сего́ же о себе́ не рече́, но архиере́й сый ле́ту тому́, прорече́, я́ко хотя́ше Иису́с умре́ти за лю́ди,

⁵² И не то́кмо за лю́ди, но да и ча́да Бо́жия расточе́нная собере́т во еди́но.

⁵³ От того́ же дне совеща́ша, да убию́т Его́.

⁵⁴ Иису́с же ктому́ не я́ве хожда́ше во Иуде́ех, но и́де отту́ду во страну́ близ пусты́ни, во Ефре́м нарица́емый град, и ту хожда́ше со ученики́ Свои́ми.

⁵⁵ Бе же близ Па́сха Иуде́йска, и взыдо́ша мно́зи во Иерусали́м от стран пре́жде Па́схи, да очи́стятся.

⁵⁶ Иска́ху у́бо Иису́са и глаго́лаху к себе́, в це́ркви стоя́ще: что мни́тся вам, я́ко не и́мать ли приити́ в пра́здник?

⁵⁷ Да́ша у́бо архиере́е и фарисе́е за́поведь, да а́ще кто ощути́т Его́, где бу́дет, пове́сть, я́ко да и́мут Его́.

Глава 12

¹ Иису́с же пре́жде шести́ дний Па́схи прии́де в Вифа́нию, иде́же бе Ла́зарь уме́рый, его́же воскреси́ от ме́ртвых.

² Сотвори́ша же Ему́ ве́черю ту, и Ма́рфа служа́ше, Ла́зарь же еди́н бе от возлежа́щих с Ним.

³ Мари́а же прие́мши ли́тру мν́ра на́рда писти́ка многоце́нны, пома́за но́зе Иису́сове, и отре́ власы́ свои́ми но́зе Его́. Хра́мина же испо́лнися от вони́ ма́сти благово́нныя.

⁴ Глаго́ла же еди́н от учени́к Его́, Иу́да Си́монов Искарио́тский, и́же хотя́ше Его́ преда́ти:

⁵ Чесо́ ра́ди мν́ро сие́ не продано́ бысть на трех стех пе́нязь и дано́ ни́щим?

⁶ Сие́ же рече́, не я́ко о ни́щих печа́шеся, но я́ко тать бе, и ковче́жец име́яше, и вмета́емая ноша́ше.

⁷ Рече́ же Иису́с: не де́йте ея́, да в день погребе́ния Моего́ соблюде́т е́.

⁸ Ни́щия бо всегда́ и́мате с собо́ю, Мене́ же не всегда́ и́мате.

⁹ Разуме́ же наро́д мног от иуде́й, я́коту есть, и приидо́ша не Иису́са ра́ди то́кмо, но да и Ла́заря ви́дят, его́же воскреси́ от ме́ртвых.

¹⁰ Совеща́ша же архиере́е, да и Ла́заря убию́т,

¹¹ Я́ко мно́зи его́ ра́ди идя́ху от иуде́й и ве́роваху во Иису́са.

¹² Во у́трий же день наро́д мног прише́дый в пра́здник, слы́шавше, я́ко Иису́с гряде́т во Иерусали́м,

¹³ Прия́ша ва́иа от фи́ник и изыдо́ша в сре́тение Ему́, и зва́ху глаго́люще: оса́нна, благослове́н гряды́й во и́мя Госпо́дне, Царь Изра́илев.

¹⁴ Обре́т же Иису́с осля́, все́де на не, я́коже есть пи́сано:

¹⁵ Не бо́йся, дщи Сио́ня, се Царь твой гряде́т, седя́ на жребя́ти о́сли.

¹⁶ Сих же не разуме́ша ученицы́ Его́ пре́жде, но егда́ просла́вися Иису́с, тогда́ помяну́ша, я́ко сия́ бы́ша о Нем пи́сана, и сия́ сотвори́ша Ему́.

¹⁷ Свиде́тельствоваше же наро́д, и́же бе пре́жде с Ним, егда́ Ла́заря возгласи́ от гро́ба и воскреси́ его́ от ме́ртвых.

¹⁸ Сего́ ра́ди и сре́те Его́ наро́д, я́ко слы́шаша Его́ сие́ сотво́рша зна́мение.

¹⁹ Фарисе́е же ре́ша к себе́: ви́дите, я́ко ни ка́яже по́льза есть? Се міръ по Нем и́дет.

²⁰ Бя́ху же не́цыи е́ллини от вше́дших, да покло́нятся в пра́здник.

²¹ Си́и у́бо приступи́ша к Фили́ппу, и́же бе от Вифсаи́ды Галиле́йския, и моля́ху его́, глаго́люще: го́споди, хо́щем Иису́са ви́дети.

²² Прии́де Фили́пп и глаго́ла Андре́ови, и па́ки Андре́й и Фили́пп глаго́ласта Иису́сови.

²³ Иису́с же отвеща́ и́ма, глаго́ля: прии́де час, да просла́вится Сын Челове́ческий.

²⁴ Ами́нь, ами́нь глаго́лю вам, а́ще зе́рно пшени́чно пад на земли́ не у́мрет, то еди́но пребыва́ет, а́ще же у́мрет, мног плод сотвори́т.

²⁵ Любя́й ду́шу свою́ погуби́т ю́, и ненави́дяй ду́шу свою́ в міре сем в животе́ ве́чнем сохрани́т ю́.

²⁶ А́ще кто Мне слу́жит, Мне да после́дствует, и иде́же есмь Аз, ту и слуга́ Мой бу́дет, и а́ще кто Мне слу́жит, почти́т его́ Оте́ц Мой.

²⁷ Ны́не душа́ Моя́ возмути́ся, и что реку́? О́тче, спаси́ Мя от часа́ сего́, но сего́ ра́ди приидо́х на час сей.

²⁸ О́тче, просла́ви и́мя Твое́. Прии́де же глас с небесе́: и просла́вих, и па́ки просла́влю.

²⁹ Наро́д же стоя́й и слы́шав, глаго́лаху: гром бысть. Ини́и глаго́лаху: А́нгел глаго́ла Ему́.

³⁰ Отвеща́ Иису́с и рече́: не Мене́ ра́ди глас сей бысть, но наро́да ра́ди.

³¹ Ны́не суд есть міру сему́, ны́не князь міра сего́ изгна́н бу́дет вон.

³² И а́ще Аз вознесе́н бу́ду от земли́, вся привлеку́ к Себе́.

³³ Сие́ же глаго́лаше, назна́менуя, ко́ею сме́ртию хотя́ше умре́ти.

³⁴ Отвеща́ Ему́ наро́д: мы слы́шахом от зако́на, я́ко Христо́с пребыва́ет во ве́ки, ка́ко Ты глаго́леши, вознести́ся подоба́ет Сы́ну Челове́ческому? Кто есть Сей Сын Челове́ческий?

³⁵ Рече́ же им Иису́с: еще́ ма́ло вре́мя свет в вас есть. Ходи́те, до́ндеже свет и́мате, да тма вас не и́мет, и ходя́й во тме не весть, ка́мо и́дет.

³⁶ До́ндеже свет и́мате, ве́руйте во свет, да сы́нове све́та бу́дете. Сия́ глаго́ла Иису́с, и отше́д скры́ся от них.

³⁷ Толи́ка зна́мения сотво́ршу Ему́ пред ни́ми, не ве́роваху в Него́.

³⁸ Да сбу́дется сло́во Иса́ии проро́ка, е́же рече́: Го́споди, кто ве́рова слу́ху на́шему, и мы́шца Госпо́дня кому́ откры́ся?

³⁹ Сего́ ра́ди не можа́ху ве́ровати, я́ко па́ки рече́ Иса́иа:

⁴⁰ Ослепи́ о́чи их и ока́менил есть сердца́ их, да не ви́дят очи́ма, ни разуме́ют се́рдцем, и обратя́тся, и исцелю́ их.

⁴¹ Сия́ рече́ Иса́иа, егда́ ви́де сла́ву Его́ и глаго́ла о Нем.

⁴² Оба́че у́бо и от князь мно́зи ве́роваша в Него́, но фарисе́й ра́ди не испове́доваху, да не из со́нмищ изгна́ни бу́дут.

⁴³ Возлюби́ша бо па́че сла́ву челове́ческую, не́же сла́ву Бо́жию.

⁴⁴ Иису́с же воззва́ и рече́: ве́руяй в Мя не ве́рует в Мя, но в Посла́вшаго Мя.

⁴⁵ И ви́дяй Мя ви́дит Посла́вшаго Мя.

⁴⁶ Аз свет в міръ приидо́х, да всяк ве́руяй в Мя во тме не пребу́дет.

⁴⁷ И а́ще кто услы́шит глаго́лы Моя́ и не ве́рует, Аз не сужду́ ему́, не приидо́х бо, да сужду́ мірови, но да спасу́ міръ.

⁴⁸ Отмета́яйся Мене́ и не прие́мляй глаго́л Мои́х и́мать судя́щаго ему́, сло́во, е́же глаго́лах, то су́дит ему́ в после́дний день.

⁴⁹ Я́ко Аз о Себе́ не глаго́лах, но посла́вый Мя Оте́ц, Той Мне за́поведь даде́, что реку́ и что возглаго́лю.

⁵⁰ И вем, я́ко за́поведь Его́ живо́т ве́чный есть, я́же у́бо Аз глаго́лю, я́коже рече́ Мне Оте́ц, та́ко глаго́лю.

Глава 13

¹ Пре́жде же пра́здника Па́схи, ве́дый Иису́с, я́ко прии́де Ему́ час, да пре́йдет от міра сего́ ко Отцу́, возлю́бль Своя́ су́щия в міре, до конца́ возлюби́ их.

² И ве́чери бы́вши, диа́волу уже́ вложи́вшу в се́рдце Иу́де Си́монову Искарио́тскому, да Его́ преда́ст,

³ Ве́дый Иису́с, я́ко вся даде́ Ему́ Оте́ц в ру́це, и я́ко от Бо́га изы́де и к Бо́гу гряде́т,

⁴ Воста́в с ве́чери и положи́ ри́зы, и прие́м ле́нтион, препоя́сася.

⁵ Пото́м же влия́ во́ду во умыва́льницу и нача́т умыва́ти но́ги ученико́м и отира́ти ле́нтием, и́мже бе препоя́сан.

⁶ Прии́де же к Си́мону Петру́, и глаго́ла Ему́ той: Го́споди, Ты ли мои́ умы́еши но́зе?

⁷ Отвеща́ Иису́с и рече́ ему́: е́же Аз творю́, ты не ве́си ны́не, разуме́еши же по сих.

⁸ Глаго́ла Ему́ Петр: не умы́еши но́гу мое́ю во ве́ки. Отвеща́ ему́ Иису́с: а́ще не умы́ю тебе́, не и́маши ча́сти со Мно́ю.

⁹ Глаго́ла Ему́ Си́мон Петр: Го́споди, не но́зе мои́ то́кмо, но и ру́це и главу́.

¹⁰ Глаго́ла ему́ Иису́с: измове́нный не тре́бует, то́кмо но́зе умы́ти, есть бо весь чист, и вы чи́сти есте́, но не вси.

¹¹ Ве́дяше бо предаю́щаго Его́, сего́ ра́ди рече́, я́ко не вси чи́сти есте́.

¹² Егда́ же умы́ но́ги их, прия́т ри́зы Своя́, возле́г па́ки, рече́ им: ве́сте ли, что сотвори́х вам?

¹³ Вы глаша́ете Мя Учи́теля и Го́спода, и до́бре глаго́лете, есмь бо.

¹⁴ А́ще у́бо Аз умы́х ва́ши но́зе, Госпо́дь и Учи́тель, и вы до́лжни есте́ друг дру́гу умыва́ти но́зе.

¹⁵ О́браз бо дах вам, да я́коже Аз сотвори́х вам, и вы твори́те.

¹⁶ Ами́нь, ами́нь глаго́лю вам: несть раб бо́лий го́спода своего́, ни посла́нник бо́лий посла́вшаго его́.

¹⁷ А́ще сия́ ве́сте, блаже́ни есте́, а́ще творите́ я́.

¹⁸ Не о всех вас глаго́лю: Аз бо вем, и́хже избра́х: но да Писа́ние сбу́дется: яды́й со Мною хлеб воздви́же на Мя пя́ту свою́.

¹⁹ Отсе́ле глаго́лю вам, пре́жде да́же не бу́дет, да, егда́ бу́дет, ве́ру и́мете, я́ко Аз есмь.

²⁰ Ами́нь, ами́нь глаго́лю вам: прие́мляй, а́ще кого́ послю́, Мене́ прие́млет: а прие́мляй Мене́ прие́млет Посла́вшаго Мя.

²¹ Сия рек Иису́с возмути́ся ду́хом и свиде́тельствова и рече́: ами́нь, ами́нь глаго́лю вам, я́ко еди́н от вас преда́ст Мя.

²² Сзира́ху же ся между́ собо́ю ученицы́, недоуме́ющеся, о ком глаго́лет.

²³ Бе же еди́н от учени́к Его́ возлежя́ на ло́не Иису́сове, его́же любля́ше Иису́с:

²⁴ Поману́ же сему́ Си́мон Петр вопроси́ти, кто́ бы был, о не́мже глаго́лет.

²⁵ Напа́д же той на пе́рси Иису́совы, глаго́ла Ему́: Го́споди, кто́ есть?

²⁶ Отвеща́ Иису́с: той есть, ему́же Аз омочи́в хлеб пода́м. И омо́чь хлеб, даде́ Иу́де Си́монову Искарио́тскому.

²⁷ И по хле́бе тогда́ вни́де в онь сатана́. Глаго́ла у́бо ему́ Иису́с: е́же твори́ши, сотвори́ ско́ро.

²⁸ Сего́ же никто́же разуме́ от возлежа́щих, к чесому́ рече́ ему́.

²⁹ Не́цыи же мня́ху, поне́же ковче́жец имя́ше Иу́да, я́ко глаго́лет ему́ Иису́с: купи́, е́же тре́буем на пра́здник: или́ ни́щим да не́что даст.

³⁰ Прии́м же он хлеб, а́бие изы́де: бе же нощь. Егда́ изы́де,

³¹ Глаго́ла Иису́с: Ны́не просла́вися Сын Челове́ческий, и Бог просла́вися о Нем.

³² А́ще Бог просла́вися о Нем, и Бог просла́вит Его́ в Себе́, и а́бие просла́вит Его́.

³³ Ча́дца, еще́ с ва́ми ма́ло есмь, взы́щете Мене́, и я́коже рех иуде́ем, я́ко а́може Аз иду́, вы не мо́жете приити́, и вам глаго́лю ны́не.

³⁴ За́поведь но́вую даю́ вам, да лю́бите друг дру́га, я́коже возлюби́х вы, да и вы лю́бите себе́.

³⁵ О сем разуме́ют вси, я́ко Мои́ ученицы́ есте́, а́ще любо́вь и́мате между́ собо́ю.

³⁶ Глаго́ла Ему́ Си́мон Петр: Го́споди, ка́мо и́деши? Отвеща́ ему́ Иису́с: а́може Аз иду́, не мо́жеши ны́не по Мне ити́, последи́ же по Мне и́деши.

³⁷ Глаго́ла Ему́ Петр: Го́споди, почто́ не могу́ ны́не по Тебе́ ити́? ны́не ду́шу мою́ за Тя положу́.

³⁸ Отвеща́ ему́ Иису́с: ду́шу ли твою́ за Мя положи́ши? Ами́нь, ами́нь глаго́лю тебе́, не возгласи́т але́ктор, до́ндеже отве́ржешися Мене́ три́щи.

Глава 14

¹ Да не смуща́ется се́рдце ва́ше, ве́руйте в Бо́га, и в Мя ве́руйте.

² В дому́ Отца́ Моего́ оби́тели мно́ги суть, а́ще ли же ни, рекл бых вам: иду́ угото́вати ме́сто вам.

³ И а́ще ^[145] угото́влю ме́сто вам, па́ки прииду́ и поиму́ вы к Себе́, да иде́же есмь Аз, и вы бу́дете,

⁴ И а́може Аз иду́, ве́сте, и путь ве́сте.

⁵ Глаго́ла Ему́ Фома́: Го́споди, не ве́мы, ка́мо и́деши, и ка́ко мо́жем путь ве́дети?

⁶ Глаго́ла ему́ Иису́с: Аз есмь путь и и́стина и живо́т, никто́же прии́дет ко Отцу́, то́кмо Мно́ю.

⁷ А́ще Мя бы́сте зна́ли, и Отца́ Моего́ зна́ли бы́сте у́бо, и отсе́ле позна́сте Его́, и ви́десте Его́.

⁸ Глаго́ла Ему́ Фили́пп: Го́споди, покажи́ нам Отца́, и довле́ет нам.

⁹ Глаго́ла ему́ Иису́с: толи́ко вре́мя с ва́ми есмь, и не позна́л еси́ Мене́, Фили́ппе? Ви́девый Мене́ ви́де Отца́, и ка́ко ты глаго́леши: покажи́ нам Отца́?

¹⁰ Не ве́руеши ли, я́ко Аз во Отце́, и Оте́ц во Мне есть? Глаго́лы, я́же Аз глаго́лю вам, о Себе́ не глаго́лю, Оте́ц же во Мне пребыва́яй, Той твори́т дела́.

¹¹ Ве́руйте Мне, я́ко Аз во Отце́, и Оте́ц во Мне. А́ще ли же ни, за та дела́ ве́ру ими́те Ми.

¹² Ами́нь, ами́нь глаго́лю вам: ве́руяй в Мя, дела́, я́же Аз творю́, и той сотвори́т, и бо́льша сих сотвори́т, я́ко Аз ко Отцу́ Моему́ гряду́.

¹³ И е́же а́ще что про́сите от Отца́ о и́мени Мое́м, то сотворю́, да просла́вится Оте́ц в Сы́не.

¹⁴ И а́ще чесо́ про́сите во и́мя Мое́, Аз сотворю́.

¹⁵ А́ще лю́бите Мя, за́поведи Моя́ соблюди́те.

¹⁶ И Аз умолю́ Отца́, и ино́го Уте́шителя даст вам, да бу́дет с ва́ми в век,

¹⁷ Дух и́стины, Его́же міръ не мо́жет прия́ти, я́ко не ви́дит Его́, ниже́ зна́ет Его́, вы же зна́ете Его́, я́ко в вас пребыва́ет и в вас бу́дет.

¹⁸ Не оста́влю вас си́ры, прииду́ к вам.

¹⁹ Еще́ ма́ло, и міръ ктому́ не ви́дит Мене́, вы же ви́дите Мя, я́ко Аз живу́, и вы жи́ви бу́дете.

²⁰ В той день разуме́ете вы, я́ко Аз во Отце́ Мое́м, и вы во Мне, и Аз в вас.

²¹ Име́яй за́поведи Моя́ и соблюда́яй их, той есть любя́й Мя, а любя́й Мя возлю́блен бу́дет Отце́м Мои́м, и Аз возлюблю́ его́ и явлю́ся ему́ Сам.

²² Глаго́ла Ему́ Иу́да не Искарио́тский: Го́споди, и что бысть, я́ко нам хо́щеши яви́тися, а не мірови?

²³ Отвеща́ Иису́с и рече́ ему́: а́ще кто лю́бит Мя, сло́во Мое́ соблюде́т, и Оте́ц Мой возлю́бит его́, и к нему́ прии́дема и оби́тель у него́ сотвори́ма.

²⁴ Не любя́й Мя слове́с Мои́х не соблюда́ет, и сло́во, е́же слы́шасте, несть Мое́, но посла́вшаго Мя Отца́.

²⁵ Сия́ глаго́лах вам в вас сый,

²⁶ Уте́шитель же, Дух Святы́й, Его́же по́слет Оте́ц во и́мя Мое́, той вы научи́т всему́ и воспомяне́т вам вся, я́же рех вам.

²⁷ Мир оставля́ю вам, мир Мой даю́ вам, не я́коже міръ дае́т, Аз даю́ вам. Да не смуща́ется се́рдце ва́ше, ни устраша́ет.

²⁸ Слы́шасте, я́ко Аз рех вам: иду́ и прииду́ к вам. А́ще бы́сте люби́ли Мя, возра́довалися бы́сте у́бо, я́ко рех: иду́ ко Отцу́, я́ко Оте́ц Мой бо́лий Мене́ есть.

²⁹ И ны́не рех вам, пре́жде да́же не бу́дет, да, егда́ бу́дет, ве́ру и́мете.

³⁰ Ктому́ не мно́го глаго́лю с ва́ми, гряде́т бо сего́ міра князь и во Мне не и́мать ничесо́же.

³¹ Но да разуме́ет міръ, я́ко люблю́ Отца́, и я́коже запове́да Мне Оте́ц, та́ко творю́, воста́ните, и́дем отсю́ду.

Глава 15

¹ Аз есмь лоза́ и́стинная, и Оте́ц Мой де́латель есть.

² Вся́ку розгу́ о Мне не творя́щую плода́, и́змет ю́, и вся́ку творя́щую плод, отреби́т ю́, да мно́жайший плод принесе́т.

³ Уже́ вы чи́сти есте́ за сло́во, е́же глаго́лах вам.

⁴ Бу́дите во Мне, и Аз в вас. Я́коже розга́ не мо́жет плода́ сотвори́ти о себе́, а́ще не бу́дет на лозе́, та́ко и вы, а́ще во Мне не пребу́дете.

⁵ Аз есмь лоза́, вы же ро́ждие, и и́же бу́дет во Мне, и Аз в нем, той сотвори́т плод мног, я́ко без Мене́ не мо́жете твори́ти ничесо́же.

⁶ А́ще кто во Мне не пребу́дет, изве́ржется вон, я́коже розга́, и изсы́шет, и собира́ют ю́ и во огнь влага́ют, и сгара́ет.

⁷ А́ще пребу́дете во Мне и глаго́лы Мои́ в вас пребу́дут, ему́же а́ще хо́щете, проси́те, и бу́дет вам.

⁸ О сем просла́вися Оте́ц Мой, да плод мног сотворите́ и бу́дете Мои́ учениицы́.

⁹ Я́коже возлюби́ Мя Оте́ц, и Аз возлюби́х вас, бу́дите в любви́ Мое́й.

¹⁰ А́ще за́поведи Моя́ соблюде́те, пребу́дете в любви́ Мое́й, я́коже Аз за́поведи Отца́ Моего́ соблюдо́х и пребыва́ю в Его́ любви́.

¹¹ Сия́ глаго́лах вам, да ра́дость Моя́ в вас бу́дет и ра́дость ва́ша испо́лнится.

¹² Сия́ есть за́поведь Моя́, да лю́бите друг дру́га, я́коже возлюби́х вы.

¹³ Бо́льши сея́ любве́ никто́же и́мать, да кто ду́шу свою́ положи́т за дру́ги своя́.

¹⁴ Вы дру́зи Мои́ есте́, а́ще творите́, ели́ка Аз запове́даю вам.

¹⁵ Не ктому́ вас глаго́лю рабы́, я́ко раб не весть, что твори́т госпо́дь его́, вас же реко́х дру́ги, я́ко вся, я́же слы́шах от Отца́ Моего́, сказа́х вам.

¹⁶ Не вы Мене́ избра́сте, но Аз избра́х вас и положи́х, да вы и́дете и плод принесе́те, и плод ваш пребу́дет, да его́же а́ще про́сите от Отца́ во и́мя Мое́, даст вам.

¹⁷ Си запове́даю вам, да лю́бите друг дру́га.

¹⁸ А́ще міръ вас ненави́дит, ве́дите, я́ко Мене́ пре́жде вас возненави́де.

¹⁹ А́ще от міра бы́сте бы́ли, міръ у́бо свое́ люби́л бы, я́коже от міра не́сте, но Аз избра́х вы от міра, сего́ ра́ди ненави́дит вас міръ.

²⁰ Помина́йте сло́во, е́же Аз рех вам: несть раб бо́лий го́спода своего́. А́ще Мене́ изгна́ша, и вас изжену́т, а́ще сло́во Мое́ соблюдо́ша, и ва́ше соблюду́т.

²¹ Но сия́ вся творя́т вам за и́мя Мое́, я́ко не ве́дят Посла́вшаго Мя.

²² А́ще не бых прише́л и глаго́лал им, греха́ не бы́ша име́ли, ны́не же вины́ ^[146] не и́мут о гресе́ свое́м.

²³ Ненави́дяй Мене́, и Отца́ Моего́ ненави́дит.

²⁴ А́ще дел не бых сотвори́л в них, и́хже ин никто́же сотвори́, греха́ не бы́ша име́ли, ны́не же и ви́деша, и возненави́деша Мене́ и Отца́ Моего́.

²⁵ Но да сбу́дется сло́во, пи́санное в зако́не их, я́ко возненави́деша Мя ту́не.

²⁶ Егда́ же прии́дет Уте́шитель, Его́же Аз послю́ вам от Отца́, Дух и́стины, И́же от Отца́ исхо́дит, Той свиде́тельствует о Мне.

²⁷ И вы же свиде́тельствуете, я́ко искони́ со Мно́ю есте́.

Глава 16

¹ Сия́ глаго́лах вам, да не соблазните́ся.

² От со́нмищ иждену́т вы, но прии́дет час, да всяк, и́же убие́т вы, мни́тся слу́жбу приноси́ти Бо́гу.

³ И сия́ сотворя́т, я́ко не позна́ша Отца́, ни Мене́.

⁴ Но сия́ глаго́лах вам, да егда́ прии́дет час, помина́йте се, я́ко Аз рех вам. Сих же вам испе́рва не рех, я́ко с ва́ми бех.

⁵ Ны́не же иду́ к Посла́вшему Мя, и никто́же от вас вопроша́ет Мене́: ка́мо и́деши?

⁶ Но я́ко сия́ глаго́лах вам, ско́рби испо́лних сердца́ ва́ша.

⁷ Но Аз и́стину вам глаго́лю: у́не есть вам, да Аз иду́, а́ще бо не иду́ Аз, Уте́шитель не прии́дет к вам, а́ще ли же иду́, послю́ Его́ к вам.

⁸ И прише́д Он обличи́т міръ о гресе́ и о пра́вде и о суде́.

⁹ О гресе́ у́бо, я́ко не ве́руют в Мя.

¹⁰ О пра́вде же, я́ко ко Отцу́ Моему́ иду́, и ктому́ не ви́дите Мене́.

¹¹ О суде́ же, я́ко князь міра сего́ осужде́н бысть.

¹² Еще́ мно́го и́мам глаго́лати вам, но не мо́жете носи́ти ны́не.

¹³ Егда́ же прии́дет Он, Дух и́стины, наста́вит вы на вся́ку и́стину, не о Себе́ бо глаго́лати и́мать, но ели́ка а́ще услы́шит, глаго́лати и́мать, и гряду́щая возвести́т вам.

¹⁴ Он Мя просла́вит, я́ко от Моего́ прии́мет и возвести́т вам.

¹⁵ Вся, ели́ка и́мать Оте́ц, Моя́ суть, сего́ ра́ди рех, я́ко от Моего́ прии́мет и возвести́т вам.

¹⁶ Вма́ле, и ктому́ не ви́дите Мене́, и па́ки вма́ле, и у́зрите Мя, я́ко иду́ ко Отцу́.

¹⁷ Ре́ша же от учени́к Его́ к себе́, что есть сие́, е́же глаго́лет нам: вма́ле, и не ви́дите Мене́, и па́ки вма́ле, и у́зрите Мя? И я́ко Аз иду́ ко Отцу́?

¹⁸ Глаго́лаху у́бо: что сие́ есть, е́же глаго́лет, вма́ле? Не ве́мы, что глаго́лет.

¹⁹ Разуме́ же Иису́с, я́ко хотя́ху Его́ вопроша́ти, и рече́ им: о сем ли стяза́етеся между́ собо́ю, я́ко рех: вма́ле, и не ви́дите Мене́, и па́ки вма́ле, и у́зрите Мя?

²⁰ Ами́нь, ами́нь глаго́лю вам, я́ко воспла́четеся и возрыда́ете вы, а міръ возра́дуется, вы же печа́льни бу́дете, но печа́ль ва́ша в ра́дость бу́дет.

²¹ Жена́ егда́ ражда́ет, скорбь и́мать, я́ко прии́де год ея́, егда́ же роди́т отроча́, ктому́ не по́мнит ско́рби за ра́дость, я́ко роди́ся челове́к в міръ.

²² И вы же печа́ль и́мате у́бо ны́не, па́ки же узрю́ вы, и возра́дуется се́рдце ва́ше, и ра́дости ва́шея никто́же во́змет от вас,

²³ И в той день Мене́ не воспро́сите ничесо́же. Ами́нь, ами́нь глаго́лю вам, я́ко ели́ка а́ще чесо́ про́сите от Отца́ во и́мя Мое́, даст вам.

²⁴ Досе́ле не проси́сте ничесо́же во и́мя Мое́, проси́те, и прии́мете, да ра́дость ва́ша испо́лнена бу́дет.

²⁵ Сия́ в при́тчах глаго́лах вам, но прии́дет час, егда́ ктому́ в при́тчах не глаго́лю вам, но я́ве о Отце́ возвещу́ вам.

²⁶ В той день во и́мя Мое́ воспро́сите, и не глаго́лю вам, я́ко Аз умолю́ Отца́ о вас.

²⁷ Сам бо Оте́ц лю́бит вы, я́ко вы Мене́ возлюби́сте и ве́ровасте, я́ко Аз от Бо́га изыдо́х.

²⁸ Изыдо́х от Отца́ и приидо́х в міръ, и па́ки оставля́ю міръ и иду́ ко Отцу́.

²⁹ Глаго́лаша Ему́ ученицы́ Его́: се ны́не не обину́яся глаго́леши, а при́тчи никоея́же не глаго́леши.

³⁰ Ны́не ве́мы, я́ко ве́си вся и не тре́буеши, да кто Тя вопроша́ет, о сем ве́руем, я́ко от Бо́га изше́л еси́.

³¹ Отвеща́ им Иису́с: ны́не ли ве́руете?

³² Се гряде́т час, и ны́не прии́де, да разы́детеся ко́ждо во своя́ и Мене́ еди́наго оста́вите, и несмь еди́н, я́ко Оте́ц со Мно́ю есть.

³³ Сия́ глаго́лах вам, да во Мне мир и́мате. В міре ско́рбни бу́дете, но дерза́йте, я́ко Аз победи́х міръ.

Глава 17

¹ Сия́ глаго́ла Иису́с и возведе́ о́чи Свои́ на не́бо и рече́: О́тче, прии́де час, просла́ви Сы́на Твоего́, да и Сын Твой просла́вит Тя,

² Я́коже дал еси́ Ему́ власть вся́кия пло́ти, да вся́ко, е́же дал еси́ Ему́, даст им живо́т ве́чный.

³ Се же есть живо́т ве́чный, да зна́ют Тебе́ еди́наго и́стиннаго Бо́га, и Его́же посла́л еси́ Иису́с Христа́.

⁴ Аз просла́вих Тя на земли́, де́ло соверши́х, е́же дал еси́ Мне да сотворю́.

⁵ И ны́не просла́ви Мя Ты, О́тче, у Тебе́ Самаго́ сла́вою, ю́же име́х у Тебе́ пре́жде міръ не бысть.

⁶ Яви́х и́мя Твое́ челове́ком, и́хже дал еси́ Мне от міра, Твои́ бе́ша, и Мне их дал еси́, и сло́во Твое́ сохрани́ша.

⁷ Ны́не разуме́ша, я́ко вся, ели́ка дал еси́ Мне, от Тебе́ суть,

⁸ Я́ко глаго́лы, и́хже дал еси́ Мне, дах им, и ти́и прия́ша и разуме́ша вои́стинну, я́ко от Тебе́ изыдо́х, и ве́роваша, я́ко Ты Мя посла́.

⁹ Аз о сих молю́, не о всем міре молю́, но о тех, и́хже дал еси́ Мне, я́ко Твои́ суть.

¹⁰ И Моя́ вся Твоя́ суть, и Твоя́ Моя́, и просла́вихся в них.

¹¹ И ктому́ несмь в міре, и си́и в міре суть, и Аз к Тебе́ гряду́. О́тче Святы́й, соблюди́ их во и́мя Твое́, и́хже дал еси́ Мне, да бу́дут еди́но, я́коже и Мы.

¹² Егда́ бех с ни́ми в міре, Аз соблюда́х их во и́мя Твое́, и́хже дал еси́ Мне, сохрани́х, и никто́же от них поги́бе, то́кмо сын поги́бельный, да сбу́дется Писа́ние.

¹³ Ны́не же к Тебе́ гряду́, и сия́ глаго́лю в міре, да и́мут ра́дость Мою́ испо́лнену в себе́.

¹⁴ Аз дах им сло́во Твое́, и міръ возненави́де их, я́ко не суть от міра, я́коже и Аз от міра несмь.

¹⁵ Не молю́, да во́змеши их от міра, но да соблюде́ши их от неприя́зни.

¹⁶ От міра не суть, я́коже и Аз от міра несмь.

¹⁷ Святи́ их во и́стину Твою́, сло́во Твое́ и́стина есть.

¹⁸ Я́коже Мене́ посла́л еси́ в міръ, и Аз посла́х их в міръ,

¹⁹ И за них Аз свящу́ Себе́, да и ти́и бу́дут свяще́ни во и́стину.

²⁰ Не о сих же молю́ то́кмо, но и о ве́рующих словесе́ их ра́ди в Мя.

²¹ Да вси еди́но суть, я́коже Ты, О́тче, во Мне, и Аз в Тебе́, да и ти́и в Нас еди́но бу́дут, да и міръ ве́ру и́мет, я́ко Ты Мя посла́л еси́.

²² И Аз сла́ву, ю́же дал еси́ Мне, дах им, да бу́дут еди́но, я́коже Мы еди́но есма́.

²³ Аз в них, и Ты во Мне, да бу́дут сверше́ни во еди́но, и да разуме́ет міръ, я́ко Ты Мя посла́ еси́ и возлюби́л еси́ их, я́коже Мене́ возлюби́л еси́.

²⁴ О́тче, и́хже дал еси́ Мне, хощу́, да иде́же есмь Аз, и ти́и бу́дут со Мно́ю, да ви́дят сла́ву Мою́, ю́же дал еси́ Мне, я́ко возлюби́л Мя еси́ пре́жде сложе́ния міра.

²⁵ О́тче пра́ведный, и міръ Тебе́ не позна́, Аз же Тя позна́х, и си́и позна́ша, я́ко Ты Мя посла́.

²⁶ И сказа́х им и́мя Твое́, и скажу́, да любы́, е́юже Мя еси́ возлюби́л, в них бу́дет, и Аз в них.

Глава 18

¹ И сия́ рек Иису́с, изы́де со ученики́ Свои́ми на он пол пото́ка Ке́дрска, иде́же бе вертогра́д, во́ньже вни́де Сам и ученицы́ Его́.

² Ве́дяше же Иу́да предая́й Его́ ме́сто, я́ко мно́жицею собира́шеся Иису́с ту со ученики́ Свои́ми.

³ Иу́да же прие́м спи́ру и от архиере́й и фарисе́й слуги́, прии́де та́мо со свети́лы и свеща́ми и ору́жии.

⁴ Иису́с же ве́дый вся гряду́щая Нань, изше́д рече́ им: кого́ и́щете?

⁵ Отвеща́ша Ему́: Иису́са Назоре́а. Глаго́ла им Иису́с: Аз есмь. Стоя́ше же и Иу́да, и́же предая́ше Его́, с ни́ми.

⁶ Да я́коже рече́ им: Аз есмь, идо́ша вспять и падо́ша на земли́.

⁷ Па́ки же вопроси́ их Иису́с: кого́ и́щете? Они́ же ре́ша: Иису́са Назоре́а.

⁸ Отвеща́ Иису́с: рех вам, я́ко Аз есмь. А́ще у́бо Мене́ и́щете, оста́вите сих ити́.

⁹ Да сбу́дется сло́во, е́же рече́, я́ко и́хже дал еси́ Мне, не погуби́х от них ни кого́же.

¹⁰ Си́мон же Петр, имы́й нож, извлече́ его́ и уда́ри архиере́ова раба́ и уре́за ему́ у́хо десно́е, бе же и́мя рабу́ Малх.

¹¹ Рече́ же Иису́с Петро́ви: вонзи́ нож в но́жницу, ча́шу, ю́же даст Мне Оте́ц, не и́мам ли пи́ти ея́?

¹² Спи́ра же и ты́сящник и слуги́ иуде́йския я́ша Иису́са и связа́ша Его́.

¹³ И ведо́ша Его́ ко А́нне пе́рвее, бе бо тесть Каиа́фе, и́же бе архиере́й ле́ту тому́.

¹⁴ Бе же Каиа́фа да́вый сове́т иуде́ом, я́ко у́не есть еди́ному челове́ку умре́ти за лю́ди.

¹⁵ По Иису́се же идя́ше Си́мон Петр и други́й учени́к, учени́к же той бе зна́емь архиере́ови и вни́де со Иису́сом во двор архиере́ов.

¹⁶ Петр же стоя́ше при две́рех вне. Изы́де у́бо учени́к той, и́же бе зна́емь архиере́ови, и рече́ две́рнице и введе́ Петра́.

¹⁷ Глаго́ла же раба́ две́рница Петро́ви: еда́ и ты учени́к еси́ Челове́ка Сего́? Глаго́ла он: несмь.

¹⁸ Стоя́ху же раби́ и слуги́ огнь сотво́рше, я́ко зима́ бе, и гре́яхуся, бе же с ни́ми Петр стоя́ и гре́яся.

¹⁹ Архиере́й же вопроси́ Иису́са о ученице́х Его́ и о уче́нии Его́.

²⁰ Отвеща́ ему́ Иису́с: Аз не обину́яся глаго́лах міру, Аз всегда́ уча́х на со́нмищах и в це́ркви, иде́же всегда́ иуде́е сне́млются, и тай не глаго́лах ничесо́же.

²¹ Что Мя вопроша́еши? Вопроси́ слы́шавших, что глаго́лах им, се си́и ве́дят, я́же рех Аз.

²² Сия́ же ре́кшу Ему́, еди́н от предстоя́щих слуг уда́ри в лани́ту Иису́са, рек: та́ко ли отвещава́еши архиере́ови?

²³ Отвеща́ ему́ Иису́с: а́ще зле глаго́лах, свиде́тельствуй о зле, а́ще ли до́бре, что Мя бие́ши?

²⁴ Посла́ же Его́ А́нна свя́зана к Каиа́фе архиере́ови.

²⁵ Бе же Си́мон Петр стоя́ и гре́яся. Ре́ша же ему́: еда́ и ты от учени́к Его́ еси́? Он же отве́ржеся и рече́: несмь.

²⁶ Глаго́ла еди́н от раб архиере́ов, ю́жика сый, ему́же Петр уре́за у́хо: не аз ли тя ви́дех в вертогра́де с Ним?

²⁷ Па́ки у́бо Петр отве́ржеся, и а́бие пе́тель возгласи́.

²⁸ Ведо́ша же Иису́са от Каиа́фы в прето́р. Бе же у́тро, и ти́и не внидо́ша в прето́р, да не оскверня́тся, но да ядя́т па́сху.

²⁹ Изы́де же Пила́т к ним вон и рече́: ку́ю речь ^[147] прино́сите на Челове́ка Сего́?

³⁰ Отвеща́ша и ре́ша ему́: а́ще не бы был Сей злоде́й, не бы́хом пре́дали Его́ тебе́.

³¹ Рече́ же им Пила́т: поими́те Его́ вы и по зако́ну ва́шему суди́те Ему́. Ре́ша же ему́ иуде́е: нам не досто́ит уби́ти ни кого́же.

³² Да сло́во Иису́сово сбу́дется, е́же рече́, назна́менуя, ко́ею сме́ртию хотя́ше умре́ти.

³³ Вни́де же па́ки Пила́т в прето́р и гласи́ Иису́са и рече́ Ему́: Ты ли еси́ Царь Иуде́йск?

³⁴ Отвеща́ ему́ Иису́с: о себе́ ли ты сие́ глаго́леши, или́ ини́и тебе́ реко́ша о Мне?

³⁵ Отвеща́ Пила́т: еда́ аз жидови́н есмь? Род Твой и архиере́е преда́ша Тя мне, что еси́ сотвори́л?

³⁶ Отвеща́ Иису́с: Ца́рство Мое́ несть от міра сего́, а́ще от міра сего́ бы́ло бы Ца́рство Мое́, слуги́ Мои́ у́бо подвиза́лися бы́ша, да не пре́дан бых был иуде́ом, ны́не же Ца́рство Мое́ несть отсю́ду.

³⁷ Рече́ же Ему́ Пила́т: у́бо Царь ли еси́ Ты? Отвеща́ Иису́с: ты глаго́леши, я́ко Царь есмь Аз. Аз на сие́ роди́хся и на сие́ приидо́х в міръ, да свиде́тельствую и́стину, и всяк, и́же есть от и́стины, послу́шает гла́са Моего́.

³⁸ Глаго́ла Ему́ Пила́т: что есть и́стина? И сие́ рек, па́ки изы́де ко иуде́ом и глаго́ла им: аз ни еди́ныя вины́ обрета́ю в Нем.

³⁹ Есть же обы́чай вам, да еди́наго вам отпущу́ на Па́сху, хо́щете ли у́бо, да отпущу́ вам Царя́ Иуде́йска?

⁴⁰ Возопи́ша же па́ки вси, глаго́люще: не Сего́, но Вара́вву. Бе же Вара́вва разбо́йник.

Глава 19

¹ Тогда́ у́бо Пила́т поя́т Иису́са и би Его́.

² И во́ини спле́тше вене́ц от те́рния, возложи́ша Ему́ на главу́, и в ри́зу багря́ну облеко́ша Его́.

³ И глаго́лаху: ра́дуйся, Царю́ Иуде́йский. И бия́ху Его́ по лани́тома.

⁴ Изы́де у́бо па́ки вон Пила́т и глаго́ла им: се извожу́ Его́ вам вон, да разуме́ете, я́ко в Нем ни еди́ныя вины́ обрета́ю.

⁵ Изы́де же вон Иису́с, нося́ терно́вен вене́ц и багря́ну ри́зу. И глаго́ла им: се Челове́к.

⁶ Егда́ же ви́деша Его́ архиере́е и слуги́, возопи́ша глаго́люще: распни́, распни́ Его́. Глаго́ла им Пила́т: поими́те Его́ вы и распни́те, аз бо не обрета́ю в Нем вины́.

⁷ Отвеща́ша ему́ иуде́е: мы зако́н и́мамы, и по зако́ну на́шему до́лжен есть умре́ти, я́ко Себе́ Сы́на Бо́жия сотвори́.

⁸ Егда́ же слы́ша Пила́т сие́ сло́во, па́че убоя́ся.

⁹ И вни́де в прето́р па́ки и глаго́ла Иису́сови: отку́ду еси́ Ты? Иису́с же отве́та не даде́ ему́.

¹⁰ Глаго́ла же Ему́ Пила́т: мне ли не глаго́леши? Не ве́си ли, я́ко власть и́мам распя́ти Тя и власть и́мам пусти́ти Тя?

¹¹ Отвеща́ Иису́с: не и́маши вла́сти ни еди́ныя на Мне, а́ще не бы ти дано́ свы́ше, сего́ ра́ди преда́вый Мя тебе́ бо́лий грех и́мать.

¹² От сего́ иска́ше Пила́т пусти́ти Его́. Иуде́е же вопия́ху, глаго́люще: а́ще Сего́ пу́стиши, не́си друг ке́сарев. Всяк, я́же царя́ себе́ творя́й, проти́вится ке́сарю.

¹³ Пила́т у́бо слы́шав сие́ сло́во, изведе́ вон Иису́са и се́де на суди́щи, на ме́сте глаго́лемем Лифострото́н, ^[148] евре́йски же Гавва́фа.

¹⁴ Бе же пято́к Па́сце, час же я́ко шесты́й. И глаго́ла иуде́ом: се Царь ваш.

¹⁵ Они́ же вопия́ху: возми́, возми́, распни́ Его́. Глаго́ла им Пила́т: Царя́ ли ва́шего распну́? Отвеща́ша архиере́е: не и́мамы царя́ то́кмо ке́саря.

¹⁶ Тогда́ же предаде́ Его́ им, да ра́спнется. Пое́мше же Иису́са и ведо́ша.

¹⁷ И нося́ крест Свой, изы́де в глаго́лемое Ло́бное ме́сто, е́же глаго́лется евре́йски Голго́фа,

¹⁸ Иде́же пропя́ша Его́ и с Ним и́на два сю́ду и сю́ду, посреде́ же Иису́са.

¹⁹ Написа́ же и ти́тла Пила́т и положи́ на кресте́. Бе же напи́сано: Иису́с Назоряни́н, Царь Иуде́йский.

²⁰ Сего́ же ти́тла мно́зи что́ша от иуде́й, я́ко близ бе ме́сто гра́да, иде́же пропя́ша Иису́са. И бе напи́сано евре́йски, гре́чески, ри́мски.

²¹ Глаго́лаху у́бо Пила́ту архиере́е Иуде́йстии: не пиши́, Царь Иуде́йский, но я́ко Сам рече́: Царь есмь Иуде́йский.

²² Отвеща́ Пила́т: е́же писа́х, писа́х.

²³ Во́ини же, егда́ пропя́ша Иису́са, прия́ша ри́зы Его́ и сотвори́ша четы́ри ча́сти, коему́ждо во́ину часть, и хито́н. Бе же хито́н не швен, свы́ше истка́н весь.

²⁴ Ре́ша же к себе́: не предере́м его́, но ме́тнем жре́бия о нем, кому́ бу́дет, да сбу́дется Писа́ние, глаго́лющее: раздели́ша ри́зы Моя́ себе́ и о имати́сме Мое́й мета́ша жре́бия. Во́ини у́бо сия́ сотвори́ша.

²⁵ Стоя́ху же при кресте́ Иису́сове Ма́ти Его́ и сестра́ Ма́тере Его́ Мари́а Клео́пова и Мари́а Магдали́на.

²⁶ Иису́с же ви́дев Ма́терь и ученика́ стоя́ща, его́же любля́ше, глаго́ла Ма́тери Свое́й: Же́но, се сын Твой.

²⁷ Пото́м же глаго́ла ученику́: се Ма́ти твоя́. И от того́ часа́ поя́т Ю́ учени́к во своя́си.

²⁸ Посе́м ве́дый Иису́с, я́ко вся уже́ соверши́шася, да сбу́дется Писа́ние, глаго́ла: жа́жду.

²⁹ Сосу́д же стоя́ше полн о́цта. Они́ же испо́лнивше гу́бу о́цта и на трость во́нзше, приде́ша ко усто́м Его́.

³⁰ Егда́ же прия́т о́цет Иису́с, рече́: соверши́шася. И прекло́нь главу́, предаде́ дух.

³¹ Иуде́е же, поне́же пято́к бе, да не оста́нут на кресте́ телеса́ в суббо́ту, бе бо вели́к день тоя́ суббо́ты, моли́ша Пила́та, да пребию́т го́лени их и во́змут.

³² Приидо́ша же во́ини, и пе́рвому у́бо преби́ша го́лени, и друго́му распя́тому с Ним.

³³ На Иису́са же прише́дше, я́ко ви́деша Его́ уже́ уме́рша, не преби́ша Ему́ го́лений.

³⁴ Но еди́н от во́ин копие́м ре́бра Ему́ прободе́, и а́бие изы́де кровь и вода́.

³⁵ И ви́девый свиде́тельствова, и и́стинно есть свиде́тельство его́, и той весть, я́ко и́стину глаго́лет, да вы ве́ру и́мете.

³⁶ Бы́ша бо сия́, да сбу́дется Писа́ние: кость не сокруши́тся от Него́.

³⁷ И па́ки друго́е Писа́ние глаго́лет: воззря́т Нань, Его́же прободо́ша.

³⁸ По сих же моли́ Пила́та Ио́сиф, и́же от Аримафе́а, сый учени́к Иису́сов, потае́н же стра́ха ра́ди иуде́йска, да во́змет те́ло Иису́сово, и повеле́ Пила́т.

³⁹ Прии́де же и взят те́ло Иису́сово. Прии́де же и Никоди́м, прише́дый ко Иису́сови но́щию пре́жде, нося́ смеше́ние смν́рнено и ало́йно, я́ко литр сто.

⁴⁰ Прия́ста же те́ло Иису́сово и обви́ста е́ ри́зами со арома́ты, я́коже обы́чай есть иуде́ом погреба́ти.

⁴¹ Бе же на ме́сте, иде́же распя́тся, верт, ^[149] и в ве́рте гроб нов, в не́мже николи́же никто́же положе́н бе.

⁴² Ту у́бо пятка́ ра́ди иуде́йска, я́ко близ бя́ше гроб, положи́ста Иису́са.

Глава 20

¹ Во еди́ну же от суббо́т Мари́а Магдали́на прии́де зау́тра, еще́ су́щи тме, на гроб, и ви́де ка́мень взят от гро́ба.

² Тече́ у́бо и прии́де к Си́мону Петру́ и к друго́му ученику́, его́же любля́ше Иису́с, и глаго́ла и́ма: взя́ша Го́спода от гро́ба, и не вем, где положи́ша Его́.

³ Изы́де же Петр и други́й учени́к и идя́ста ко гро́бу.

⁴ Теча́ста же о́ба вку́пе, и други́й учени́к тече́ скоре́е Петра́ и прии́де пре́жде ко гро́бу.

⁵ И прини́к ви́де ри́зы лежа́щя, оба́че не вни́де.

⁶ Прии́де же Си́мон Петр вслед его́, и вни́де во гроб, и ви́де ри́зы еди́ны лежа́щя,

⁷ И суда́рь, и́же бе на главе́ Его́, не с ри́зами лежа́щь, но осо́бь свит на еди́ном ме́сте.

⁸ Тогда́ у́бо вни́де и други́й учени́к, прише́дый пре́жде ко гро́бу, и ви́де и ве́рова.

⁹ Не у́ бо ве́дяху Писа́ния, я́ко подоба́ет Ему́ из ме́ртвых воскре́снути.

¹⁰ Идо́ста же па́ки к себе́ ученика́.

¹¹ Мари́а же стоя́ше у гро́ба вне пла́чущи. Я́коже пла́кашеся, прини́че во гроб,

¹² И ви́де два А́нгела в бе́лых ри́зах седя́ща, еди́наго у главы́ и еди́наго у ногу́, иде́же бе лежа́ло те́ло Иису́сово.

¹³ И глаго́ласта ей о́на: же́но, что пла́чешися? Глаго́ла и́ма: я́ко взя́ша Го́спода моего́, и не вем, где положи́ша Его́.

¹⁴ И сия́ ре́кши обрати́ся вспять и ви́де Иису́са стоя́ща, и не ве́дяше, я́ко Иису́с есть.

¹⁵ Глаго́ла ей Иису́с: же́но, что пла́чеши? Кого́ и́щеши? Она́ же мня́щи, я́ко вертогра́дарь есть, глаго́ла Ему́: го́споди, а́ще ты еси́ взял Его́, пове́ждь ми, где еси́ положи́л Его́, и аз возму́ Его́.

¹⁶ Глаго́ла ей Иису́с: Мари́е. Она́ же обра́щшися глаго́ла Ему́: Раввуни́, е́же глаго́лется, Учи́телю.

¹⁷ Глаго́ла ей Иису́с: не прикаса́йся Мне, не у́ бо взыдо́х ко Отцу́ Моему́. Иди́ же ко бра́тии Мое́й и рцы им: восхожду́ ко Отцу́ Моему́ и Отцу́ ва́шему, и Бо́гу Моему́ и Бо́гу ва́шему.

¹⁸ Прии́де же Мари́а Магдали́на пове́дающи ученико́м, я́ко ви́де Го́спода, и сия́ рече́ ей.

¹⁹ Су́щу же по́зде в день той во еди́ну от суббо́т, и две́рем затворе́нным, иде́же бя́ху ученицы́ Его́ со́брани, стра́ха ра́ди иуде́йска, прии́де Иису́с и ста посреде́ и глаго́ла им: мир вам.

²⁰ И сие́ рек, показа́ им ру́це и но́зе и ре́бра Своя́. Возра́довашася у́бо ученицы́, ви́девше Го́спода.

²¹ Рече́ же им Иису́с па́ки: мир вам, я́коже посла́ Мя Оте́ц, и Аз посыла́ю вы.

²² И сие́ рек, ду́ну и глаго́ла им: приими́те Дух Свят.

²³ И́мже отпустите́ грехи́, отпу́стятся им, и и́мже держите́, держа́тся.

²⁴ Фома́ же, еди́н от обоюна́десяте, глаго́лемый Близне́ц, не бе ту с ни́ми, егда́ прии́де Иису́с.

²⁵ Глаго́лаху же ему́ друзи́и ученицы́: ви́дехом Го́спода. Он же рече́ им: а́ще не ви́жу на руку́ Его́ я́звы гвозди́нныя, и вложу́ пе́рста моего́ в я́звы гвозди́нныя, и вложу́ ру́ку мою́ в ре́бра Его́, не иму́ ве́ры.

²⁶ И по днех осми́х па́ки бя́ху внутрь ученицы́ Его́, и Фома́ с ни́ми. Прии́де Иису́с две́рем затворе́нным, и ста посреде́ их и рече́: мир вам.

²⁷ Пото́м глаго́ла Фоме́: принеси́ перст твой се́мо и виждь ру́це Мои́, и принеси́ ру́ку твою́ и вложи́ в ре́бра Моя́, и не бу́ди неве́рен, но ве́рен.

²⁸ И отвеща́ Фома́ и рече́ Ему́: Госпо́дь мой и Бог мой.

²⁹ Глаго́ла ему́ Иису́с: я́ко ви́дев Мя, ве́рова, блаже́ни не ви́девшии и ве́ровавше.

³⁰ Мно́га же и и́на зна́мения сотвори́ Иису́с пред ученики́ Свои́ми, я́же не суть пи́сана в кни́гах сих.

³¹ Сия́ же пи́сана бы́ша, да ве́руете, я́ко Иису́с есть Христо́с Сын Бо́жий, и да ве́рующе живота́ и́мате во и́мя Его́.

Глава 21

¹ Посе́м яви́ся па́ки Иису́с ученико́м Свои́м, воста́в от ме́ртвых, на мо́ри Тивериа́дстем. Яви́ся же си́це:

² Бя́ху вку́пе Си́мон Петр, и Фома́ нарица́емыи Близне́ц, и Нафана́ил, и́же бе от Ка́ны Галиле́йския, и сы́на Зеведе́ова, и и́на от учени́к Его́ два.

³ Глаго́ла им Си́мон Петр: иду́ ры́бы лови́ти. Глаго́лаша ему́: и́дем и мы с тобо́ю. Изыдо́ша же и вседо́ша а́бие в кора́бль, и в ту нощь не я́ша ничесо́же.

⁴ У́тру же бы́вшу, ста Иису́с при бре́зе, не позна́ша же ученицы́, я́ко Иису́с есть.

⁵ Глаго́ла же им Иису́с: де́ти, еда́ что сне́дно и́мате? Отвеща́ша Ему́: ни.

⁶ Он же рече́ им: вве́рзите мре́жу одесну́ю страну́ корабля́ и обря́щете. Вверго́ша же и ктому́ не можа́ху привлещи́ ея́ от мно́жества рыб.

⁷ Глаго́ла же учени́к той, его́же любля́ше Иису́с, Петро́ви: Госпо́дь есть. Си́мон же Петр слы́шав, я́ко Госпо́дь есть, епенди́том ^[150] препоя́сася, бе бо наг, и вве́ржеся в мо́ре.

⁸ А друзи́и ученицы́ кораблеце́м приидо́ша, [не бе́ша бо дале́че от земли́, но я́ко две́ сте́ лакте́й,] влеку́ще мре́жу рыб.

⁹ Я́коже излезо́ша на зе́млю, ви́деша огнь лежа́щь и ры́бу на нем лежа́щу и хлеб.

¹⁰ И глаго́ла им Иису́с: принеси́те от рыб, я́же я́сте ны́не.

¹¹ Влез же Си́мон Петр, извлече́ мре́жу на зе́млю, по́лну вели́ких рыб сто и пятьдеся́т и три, и толи́ку су́щу, не прото́ржеся мре́жа.

¹² Глаго́ла им Иису́с: прииди́те, обе́дуйте. Ни еди́н же сме́яше от учени́к истяза́ти Его́: Ты кто еси́? Ве́дяще, я́ко Госпо́дь есть.

¹³ Прии́де же Иису́с, и прия́т хлеб и даде́ им, и ры́бу та́кожде.

¹⁴ Се уже́ тре́тие яви́ся Иису́с ученико́м Свои́м, воста́в от ме́ртвых.

¹⁵ Егда́ же обе́доваше, глаго́ла Си́мону Петру́ Иису́с: Си́моне Ио́нин, лю́биши ли Мя па́че сих? Глаго́ла Ему́: ей, Го́споди, Ты ве́си, я́ко люблю́ Тя. Глаго́ла ему́: паси́ а́гнцы Моя́.

¹⁶ Глаго́ла ему́ па́ки второ́е: Си́моне Ио́нин, лю́биши ли Мя? Глаго́ла ему́: ей, Го́споди, Ты ве́си, я́ко люблю́ Тя. Глаго́ла ему́: паси́ о́вцы Моя́.

¹⁷ Глаго́ла ему́ тре́тие: Си́моне Ио́нин, лю́биши ли Мя? Оскорбе́ же Петр, я́ко рече́ ему́ тре́тие, лю́биши ли Мя; и глаго́ла Ему́: Го́споди, Ты вся ве́си, Ты ве́си, я́ко люблю́ Тя. Глаго́ла ему́ Иису́с: паси́ о́вцы Моя́.

¹⁸ Ами́нь, ами́нь, глаго́лю тебе́, егда́ бе юн, поя́сашеся сам, и хожда́ше, а́може хотя́ше, егда́ же состаре́ешися и возде́жеши ру́це твои́, и ин тя поя́шет, и веде́т, а́може не хо́щеши.

¹⁹ Сие́ же рече́, назна́менуя, ко́ею сме́ртию просла́вит Бо́га. И сия́ рек, глаго́ла ему́: иди́ по Мне.

²⁰ Обра́щься же Петр, ви́де ученика́, его́же любля́ше Иису́с, во след иду́ща, и́же и возлеже́ на ве́чери на пе́рси Его́, и рече́: Го́споди, кто есть предая́й Тя?

²¹ Сего́ ви́дев Петр, глаго́ла Иису́сови: Го́споди, сей же что?

²² Глаго́ла ему́ Иису́с: а́ще хощу́, да той пребыва́ет, до́ндеже прииду́, что к тебе́? Ты по Мне гряди́.

²³ Изы́де же сло́во се в бра́тию, я́ко учени́к той не у́мрет, и не рече́ ему́ Иису́с, я́ко не у́мрет, но а́ще хощу́ тому́ пребыва́ти, до́ндеже прииду́, что к тебе́?

²⁴ Сей есть учени́к свиде́тельствуяй о сих, и́же и написа́ сия́, и вем, я́ко и́стинно есть свиде́тельство его́.

²⁵ Суть же и и́на мно́га, я́же сотвори́ Иису́с, я́же а́ще по еди́ному пи́сана быва́ют, ни самому́ мню всему́ міру вмести́ти пи́шемых книг. Ами́нь.

Дея́ния Святы́х Апо́столов

Глава 1

¹ Пе́рвое у́бо сло́во сотвори́х о всех, о Фео́филе, я́же нача́т Иису́с твори́ти же и учи́ти,

² Да́же до дне, во́ньже, запове́дав апо́столом Ду́хом Святы́м, и́хже избра́, вознесе́ся.

³ Пред ни́миже и поста́ви Себе́ жи́ва по страда́нии Свое́м во мно́зех [и́стинных] зна́мениих, де́ньми четы́редесятьми явля́яся им и глаго́ля я́же о Ца́рствии Бо́жии.

⁴ С ни́миже и яды́й, повеле́ им от Иерусали́ма не отлуча́тися, но жда́ти обетова́ния О́тча, е́же слы́шасте от Мене́:

⁵ Я́ко Иоа́нн у́бо крести́л есть водо́ю, вы же и́мате крести́тися Ду́хом Святы́м, не по мно́зех сих днех.

⁶ Они́ же у́бо соше́дшеся, вопроша́ху Его́, глаго́люще: Го́споди, а́ще в ле́то сие́ устроя́еши ца́рствие Изра́илево?

⁷ Рече́ же к ним: несть ва́ше разуме́ти времена́ и ле́та, я́же Оте́ц положи́ во Свое́й вла́сти.

⁸ Но прии́мете си́лу, наше́дшу Свято́му Ду́ху на вы, и бу́дете Ми свиде́телие во Иерусали́ме же и во всей Иуде́и и Самари́и, и да́же до после́дних земли́.

⁹ И сия́ рек, зря́щим им, взя́тся, и о́блак подъя́т Его́ от о́чию их.

¹⁰ И я́ко взира́юще бя́ху на не́бо, иду́щу Ему́, и се му́жа два ста́ста пред ни́ми во оде́жди беле́.

¹¹ Я́же и реко́ста: му́жие Галиле́йстии, что стоите́ зря́ще на не́бо? Сей Иису́с, вознесы́йся от вас на не́бо, та́кожде прии́дет, и́мже о́бразом ви́десте Его́ иду́ща на не́бо.

¹² Тогда́ возврати́шася во Иерусали́м от горы́ нарица́емыя Елео́н, я́же есть близ Иерусали́ма, суббо́ты иму́щия путь.

¹³ И егда́ внидо́ша, взыдо́ша на го́рницу, иде́же бя́ху пребыва́юще, Петр же и Иа́ков, и Иоа́нн и Андре́й, Фили́пп и Фома́, Варфоломе́й и Матфе́й, Иа́ков Алфе́ов и Си́мон Зило́т и Иу́да Иа́ковль.

¹⁴ Си́и вси бя́ху терпя́ще единоду́шно в моли́тве и моле́нии, с жена́ми и Мари́ею Ма́терию Иису́совою и с бра́тиею Его́.

¹⁵ И во дни ты́я воста́в Петр посреде́ учени́к, рече́: [бе же име́н наро́да вку́пе я́ко сто и два́десять:]

¹⁶ Му́жие бра́тие, подоба́ше сконча́тися Писа́нию сему́, е́же предрече́ Дух Святы́й усты́ Дави́довыми о Иу́де, бы́вшем вожди́ е́мшим Иису́са,

¹⁷ Я́ко причте́н бе с на́ми и прия́л бя́ше жре́бий слу́жбы сея́.

¹⁸ Сей у́бо стяжа́ село́ от мзды непра́ведныя, и ниц быв просе́деся посреде́, и излия́ся вся утро́ба его́.

¹⁹ И разу́мно бысть всем живу́щим во Иерусали́ме, я́ко нарещи́ся селу́ тому́ свои́м их язы́ком Акелдама́, е́же есть село́ кро́ве.

²⁰ Пи́шется бо в кни́зе Псало́мстей: да бу́дет двор его́ пуст, и да не бу́дет живу́щаго в нем, и епи́скопство его́ да прии́мет ин.

²¹ Подоба́ет у́бо от сходи́вшихся с на́ми муже́й во вся́ко ле́то, в не́же вни́де и изы́де в нас Госпо́дь Иису́с,

²² Наче́н от креще́ния Иоа́ннова да́же до дне, во́ньже вознесе́ся [на не́бо] от нас, свиде́телю воскресе́ния Его́ бы́ти с на́ми еди́ному от сих.

²³ И поста́виша два, Ио́сифа нарица́емаго Варса́ву, и́же нарече́н бысть Иу́ст, и Матфи́а.

²⁴ И помоли́вшеся ре́ша: Ты, Го́споди, Сердцеве́дче всех, покажи́, его́же избра́л еси́ от сею́ двою́ еди́наго,

²⁵ Прия́ти жре́бий служе́ния сего́ и апо́стольства, из него́же испаде́ Иу́да, ити́ в ме́сто свое́.

²⁶ И да́ша жре́бия и́ма, и паде́ жре́бий на Матфи́а, и причте́н бысть ко единона́десяти апо́столом.

Глава 2

¹ И егда́ скончава́шася дни́е Пятьдеся́тницы, бе́ша вси [апо́столи] единоду́шно вку́пе.

² И бысть внеза́пу с небесе́ шум, я́ко носи́му дыха́нию бу́рну, и испо́лни весь дом, иде́же бя́ху седя́ще,

³ И яви́шася им разделе́ни язы́цы я́ко о́гненни, се́де же на еди́ном ко́емждо их.

⁴ И испо́лнишася вси Ду́ха Свя́та и нача́ша глаго́лати ины́ми язы́ки, я́коже Дух дая́ше им провещава́ти.

⁵ Бя́ху же во Иерусали́ме живу́щии иуде́е, му́жие благогове́йнии, от всего́ язы́ка, и́же под небесе́м.

⁶ Бы́вшу же гла́су сему́, сни́деся наро́д и смяте́ся, я́ко слы́шаху еди́н ко́йждо их свои́м язы́ком глаго́лющих их.

⁷ Дивля́хуся же вси и чудя́хуся, глаго́люще друг ко дру́гу: не се ли, вси си́и суть глаго́лющии галиле́ане?

⁸ И ка́ко мы слы́шим ко́ждо свой язы́к наш, в не́мже роди́хомся?

⁹ Па́рфяне и ми́дяне и елами́те, и живу́щии в Месопота́мии, во Иуде́и же и Каппадоки́и, в По́нте и во Аси́и,

¹⁰ Во Фриги́и же и Памфили́и, во Еги́пте и страна́х Ливи́и, я́же при Кирини́и, и приходя́щии ри́мляне,

¹¹ Иуде́и же и прише́льцы, ^[151] кри́тяне и ара́вляне, слы́шим глаго́лющих их на́шими язы́ки вели́чия Бо́жия.

¹² Ужаса́хуся же вси и недоумева́хуся, друг ко дру́гу глаго́люще: что́ у́бо хо́щет сие́ бы́ти?

¹³ Ини́и же руга́ющеся глаго́лаху, я́ко вино́м испо́лнени суть.

¹⁴ Став же Петр со единона́десятьми, воздви́же глас свой и рече́ им: му́жие Иуде́йстии и живу́щии во Иерусали́ме вси, сие́ вам разу́мно да бу́дет, и внуши́те глаго́лы моя́,

¹⁵ Не бо, я́коже вы непщу́ете, си́и пия́ни суть, есть бо час тре́тий дне.

¹⁶ Но сие́ есть рече́нное проро́ком Ио́илем:

¹⁷ И бу́дет в после́дния дни, [глаго́лет Госпо́дь,] излию́ от Ду́ха Моего́ на вся́ку плоть, и прореку́т сы́нове ва́ши и дще́ри ва́ша, и ю́ноши ва́ши виде́ния у́зрят, и ста́рцы ва́ши со́ния ви́дят.

¹⁸ И́бо на рабы́ Моя́ и на рабы́ни Моя́ во дни о́ны излию́ от Ду́ха Моего́, и прореку́т.

¹⁹ И дам чудеса́ на небеси́ горе́ и зна́мения на земли́ ни́зу, кровь и огнь и куре́ние ды́ма.

²⁰ Со́лнце преложи́тся во тьму, и луна́ в кровь, пре́жде да́же не приити́ дню Госпо́дню вели́кому и просвеще́нному.

²¹ И бу́дет, всяк, и́же а́ще призове́т и́мя Госпо́дне, спасе́тся.

²² Му́жие Изра́ильстии, послу́шайте слове́с сих: Иису́са Назоре́а, Му́жа от Бо́га изве́ствованна в вас си́лами и чудесы́ и зна́мении, я́же сотвори́ Тем Бог посреде́ вас, я́коже и са́ми ве́сте.

²³ Сего́ нарекова́нным сове́том и проразуме́нием Бо́жиим пре́дана прие́мше, рука́ми беззако́нных пригво́ждьше уби́сте.

²⁴ Его́же Бог воскреси́, разреши́в боле́зни сме́ртныя, я́коже не бя́ше мо́щно держа́ну бы́ти Ему́ от нея́.

²⁵ Дави́д бо глаго́лет о Нем: предзре́х Го́спода пре́до мно́ю вы́ну, я́ко одесну́ю мене́ есть, да не подви́жуся.

²⁶ Сего́ ра́ди возвесели́ся се́рдце мое́, и возра́довася язы́к мой: еще́ же и плоть моя́ всели́тся на упова́нии.

²⁷ Я́ко не оста́виши души́ моея́ во а́де, ниже́ да́си преподо́бному Твоему́ ви́дети истле́ния.

²⁸ Сказа́л ми еси́ пути́ живота́: испо́лниши мя весе́лия с лице́м Твои́м.

²⁹ Му́жие бра́тие, досто́ит рещи́ с дерзнове́нием к вам о патриа́рсе Дави́де, я́ко и у́мре и погребе́н бысть, и гроб его́ есть в нас да́же до дне сего́.

³⁰ Проро́к у́бо сый и ве́дый, я́ко кля́твою кля́тся ему́ Бог от плода́ чресл его́ по пло́ти воздви́гнути Христа́ и посади́ти Его́ на престо́ле его́,

³¹ Предви́дев глаго́ла о воскресе́нии Христо́ве, я́ко не оста́вися душа́ Его́ во а́де, ни плоть Его́ ви́де истле́ния.

³² Сего́ Иису́са воскреси́ Бог, ему́же вси мы есмы́ свиде́тели.

³³ Десни́цею у́бо Бо́жиею вознесе́ся, и обетова́ние Свята́го Ду́ха прие́м от Отца́, излия́ сие́, е́же вы ны́не ви́дите и слы́шите.

³⁴ Не бо Дави́д взы́де на небеса́, глаго́лет бо сам: рече́ Госпо́дь Го́сподеви моему́: седи́ одесну́ю Мене́,

³⁵ До́ндеже положу́ враги́ Твоя́ подно́жие ног Твои́х.

³⁶ Тве́рдо у́бо да разуме́ет весь дом Изра́илев, я́ко и Го́спода и Христа́ его́ Бог сотвори́л есть, Сего́ Иису́са, Его́же вы распя́сте.

³⁷ Слы́шавше же умили́шася се́рдцем и ре́ша к Петру́ и про́чим Апо́столом: что́ сотвори́м, му́жие бра́тие?

³⁸ Петр же рече́ к ним: пока́йтеся, и да крести́тся ки́йждо вас во и́мя Иису́са Христа́ во оставле́ние грехо́в, и прии́мете дар Свята́го Ду́ха.

³⁹ Вам бо есть обетова́ние и ча́дом ва́шим и всем да́льним, ели́ки а́ще призове́т Госпо́дь Бог наш.

⁴⁰ И ины́ми словесы́ мно́жайшими засвиде́тельствоваше и моля́ше я́, глаго́ля: спаси́теся от ро́да стропти́ваго сего́.

⁴¹ И́же у́бо любе́зно прия́ша сло́во его́, крести́шася, и приложи́шася в день той душ я́ко три ты́сящи.

⁴² Бя́ху же терпя́ще во уче́нии Апо́стол и во обще́нии и в преломле́нии хле́ба и в моли́твах.

⁴³ Бысть же на вся́кой души́ страх: мно́га бо чудеса́ и зна́мения Апо́столы бы́ша во Иерусали́ме.

⁴⁴ Страх же ве́лий бя́ше на всех их. Вси же ве́ровавшии бя́ху вку́пе и имя́ху вся о́бща.

⁴⁵ И стяжа́ния и име́ния продая́ху, и раздая́ху всем, его́же а́ще кто тре́боваше.

⁴⁶ По вся же дни терпя́ще единоду́шно в це́ркви и ломя́ще по домо́м хлеб, приима́ху пи́щу в ра́дости и в простоте́ се́рдца,

⁴⁷ Хва́ляще Бо́га и иму́ще благода́ть у всех люде́й. Госпо́дь же прилага́ше по вся дни Це́ркви спаса́ющияся.

Глава 3

¹ Вку́пе же Петр и Иоа́нн восхожда́ста во святи́лище на моли́тву в час девя́тый.

² И не́кий муж, хром от чре́ва ма́тере своея́ сый, носи́мь быва́ше, его́же полага́ху по вся дни пред две́рьми церко́вными, реко́мыми Кра́сными, проси́ти ми́лостыни от входя́щих в це́рковь.

³ И́же ви́дев Петра́ и Иоа́нна хотя́щия вни́ти в це́рковь, проша́ше ми́лостыни.

⁴ Воззре́в же Петр нань со Иоа́нном, рече́: воззри́ на ны.

⁵ Он же прилежа́ше и́ма, мня не́что от нею́ прия́ти.

⁶ Рече́ же Петр: сребра́ и зла́та несть у мене́, но е́же и́мам, сие́ ти даю́, во и́мя Иису́са Христа́ Назоре́а воста́ни и ходи́.

⁷ И ем его́ за десну́ю ру́ку воздви́же, а́бие же утверди́стеся его́ плесне́ и гле́зне.

⁸ И вскочи́в ста и хожда́ше, и вни́де с ни́ма в це́рковь, ходя́ и скачя́ и хваля́ Бо́га.

⁹ И ви́деша его́ вси лю́дие ходя́ща и хва́ляща Бо́га,

¹⁰ Зна́ху же его́, я́ко сей бя́ше, и́же ми́лостыни ра́ди седя́ше при Кра́сных две́рех церко́вных: и испо́лнишася чу́да и у́жаса о приключи́вшемся ему́.

¹¹ Держа́щу же ся исцеле́вшему хромо́му Петра́ и Иоа́нна, притеко́ша к ним вси лю́дие в притво́р, нарица́емый Соломо́нов, ужа́сни.

¹² Ви́дев же Петр отвещава́ше к лю́дем: му́жие Изра́ильтяне, что чудите́ся о сем, или́ на ны что взира́ете, я́ко свое́ю ли си́лою или́ благоче́стием сотвори́хом его́ ходи́ти?

¹³ Бог Авраа́мов и Исаа́ков и Иа́ковль, Бог оте́ц на́ших, просла́ви О́трока Своего́ Иису́са, Его́же вы преда́сте, и отверго́стеся Его́ пред лице́м Пила́товым, су́ждьшу О́ному пусти́ти.

¹⁴ Вы же Свята́го и Пра́веднаго отверго́стеся, и испроси́сте му́жа уби́йцу да́ти вам,

¹⁵ Нача́льника же жи́зни уби́сте, Его́же Бог воскреси́ от ме́ртвых, ему́же мы свиде́тели есмы́.

¹⁶ И о ве́ре и́мене Его́, сего́, его́же ви́дите и зна́ете, утверди́ и́мя Его́, и ве́ра, я́же Его́ ра́ди, даде́ ему́ всю це́лость сию́ пред все́ми ва́ми.

¹⁷ И ны́не, бра́тие, вем, я́ко по неве́дению сие́ сотвори́сте, я́коже и кня́зи ва́ши:

¹⁸ Бог же, я́же предвозвести́ усты́ всех проро́к Свои́х пострада́ти Христу́, испо́лни та́ко.

¹⁹ Пока́йтеся и обрати́теся, да очи́ститеся от грех ва́ших.

²⁰ Я́ко да прии́дут времена́ прохла́дна от лица́ Госпо́дня, и по́слет пронарече́ннаго вам Христа́ Иису́са,

²¹ Его́же подоба́ет небеси́ у́бо прия́ти да́же до лет устрое́ния всех, я́же глаго́ла Бог усты́ всех святы́х Свои́х проро́к от ве́ка.

²² Моисе́й у́бо ко отце́м рече́: я́ко Проро́ка вам воздви́гнет Госпо́дь Бог ваш от бра́тии ва́шея, я́ко мене́, Того́ послу́шайте по всему́, ели́ка а́ще рече́т к вам.

²³ Бу́дет же, вся́ка душа́, я́же а́ще не послу́шает Проро́ка о́наго, потреби́тся от люде́й.

²⁴ И вси же проро́цы от Саму́ила и и́же по сих, ели́цы глаго́лаша, та́кожде предвозвести́ша дни сия́.

²⁵ Вы есте́ сы́нове проро́к и заве́та, его́же завеща́ Бог ко отце́м ва́шим, глаго́ля ко Авраа́му: и о се́мени твое́м возблагословя́тся вся оте́чествия земна́я.

²⁶ Вам пе́рвее Бог, воздви́гий О́трока Своего́ Иису́са, посла́ Его́ благословя́ща вас, во е́же отврати́тися вам кому́ждо от злоб ва́ших.

Глава 4

¹ Глаго́лющим же им к лю́дем, наидо́ша на них свяще́нницы и воево́да церко́вный и саддуке́и,

² Жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых.

³ И возложи́ша на них ру́ки и положи́ша их в соблюде́ние до у́трия, бе бо ве́чер уже́.

⁴ Мно́зи же от слы́шавших сло́во ве́роваша: и бысть число́ муже́й я́ко ты́сящ пять.

⁵ Бысть же нау́трие собра́тися князе́м их и ста́рцем и кни́жником во Иерусали́м,

⁶ И А́нне архиере́ю и Каиа́фе и Иоа́нну и Алекса́ндру, и ели́цы бе́ша от ро́да архиере́йска.

⁷ И поста́вльше их посреде́, вопроша́ху: ко́ею си́лою или́ ко́им и́менем сотвори́сте сие́ вы?

⁸ Тогда́ Петр, испо́лнився Ду́ха Свя́та, рече́ к ним: кня́зи лю́дстии и ста́рцы изра́илевы,

⁹ А́ще мы днесь истязу́еми есмы́ о благодея́нии челове́ка не́мощна, о чесо́м сей спасе́ся,

¹⁰ Разу́мно бу́ди всем вам и всем лю́дем изра́илевым, я́ко во и́мя Иису́са Христа́ Назоре́а, Его́же вы распя́сте, Его́же Бог воскреси́ от ме́ртвых, о Сем сей стои́т пред ва́ми здрав.

¹¹ Сей есть ка́мень укоре́ный от вас зи́ждущих, бы́вый во главу́ у́гла, и несть ни о еди́ном же ино́м спасе́ния.

¹² Несть бо ино́го и́мене под небесе́м, да́ннаго в челове́цех, о не́мже подоба́ет спасти́ся нам.

¹³ Ви́дяще же Петро́во дерзнове́ние и Иоа́нново и разуме́вше, я́ко челове́ка некни́жна еста́ и про́ста, дивля́хуся, зна́ху же их, я́ко со Иису́сом бе́ста.

¹⁴ Ви́дяще же исцеле́вшаго челове́ка с ни́ма стоя́ща, ничто́же имя́ху проти́ву рещи́.

¹⁵ Повеле́вше же и́ма вон из со́нмища изы́ти, стяза́хуся ко друг дру́гу,

¹⁶ Глаго́люще: что сотвори́м челове́кома си́ма? Я́ко у́бо наро́читое зна́мение бысть и́ма, всем живу́щим во Иерусали́ме я́ве, и не мо́жем отврещи́ся.

¹⁷ Но да не бо́лее простре́тся в лю́дех, преще́нием да запрети́м и́ма ктому́ не глаго́лати о и́мени сем ни еди́ному от челове́к.

¹⁸ И призва́вше их, запове́даша и́ма отню́д не провещава́ти ниже́ учи́ти о и́мени Иису́сове.

¹⁹ Петр же и Иоа́нн отвеща́вше к ним ре́ста: а́ще пра́ведно есть пред Бо́гом вас послу́шати па́че, не́жели Бо́га, суди́те?

²⁰ Не мо́жем бо мы, я́же ви́дехом и слы́шахом, не глаго́лати.

²¹ Они́ же призапре́щше и́ма, пусти́ша я́, ничто́же обре́тше ка́ко му́чити их, люде́й ра́ди, я́ко вси прославля́ху Бо́га о бы́вшем.

²² Лет бо бя́ше мно́жае четы́редесяти челове́к той, на не́мже бысть чу́до сие́ исцеле́ния.

²³ Отпуще́на же бы́вша апо́стола приидо́ста ко свои́м и возвести́ста, ели́ка к ни́ма архиере́и и ста́рцы ре́ша.

²⁴ Они́ же слы́шавше единоду́шно воздвиго́ша глас к Бо́гу и реко́ша: Влады́ко, ты, Бо́же, сотвори́вый не́бо и зе́млю и мо́ре и вся, я́же в них!

²⁵ И́же усты́ Дави́да о́трока Твоего́ рече́: вску́ю шата́шася язы́цы, и лю́дие поучи́шася тще́тным?

²⁶ Предста́ша ца́рие зе́мстии, и кня́зи собра́шася вку́пе на Го́спода и на Христа́ Его́.

²⁷ Собра́шася бо вои́стинну во гра́де сем на Свята́го О́трока Твоего́ Иису́са, Его́же пома́зал еси́, И́род же и Понти́йский Пила́т с язы́ки и людьми́ изра́илевыми,

²⁸ Сотвори́ти, ели́ка рука́ Твоя́ и сове́т Твой преднарече́ бы́ти.

²⁹ И ны́не, Го́споди, при́зри на преще́ния их и даждь рабо́м Твои́м со вся́ким дерзнове́нием глаго́лати сло́во Твое́,

³⁰ Внегда́ ру́ку Твою́ простре́ти Ти во исцеле́ния, и зна́мением и чудесе́м быва́ти и́менем Святы́м О́трока Твоего́ Иису́са.

³¹ И помоли́вшимся им, подви́жеся ме́сто, иде́же бя́ху со́брани, и испо́лнишася вси Ду́ха Свя́та и глаго́лаху сло́во Бо́жие со дерзнове́нием.

³² Наро́ду же ве́ровавшему бе се́рдце и душа́ еди́на, и ни еди́н же что от име́ний свои́х глаго́лаше свое́ бы́ти, но бя́ху им вся о́бща.

³³ И ве́лиею си́лою воздая́ху свиде́тельство Апо́столи воскресе́нию Го́спода Иису́са Христа́, благода́ть же бе ве́лия на всех их.

³⁴ Не бя́ше бо нищь ни еди́н в них: ели́цы бо госпо́дие се́лом или́ домово́м бя́ху, продаю́ще приноша́ху це́́ны продае́мых,

³⁵ И полага́ху при нога́х Апо́стол: дая́ше же ся коему́ждо, его́же а́ще кто тре́боваше.

³⁶ Иоси́а же, нарече́нный Варна́ва от Апо́стол, [е́же есть сказа́емо сын утеше́ния,] леви́т, Ки́прянин ро́дом,

³⁷ Име́я село́, прода́в принесе́ це́ну и положи́ пред нога́ми Апо́стол.

Глава 5

¹ Муж же не́кий, Ана́ниа и́менем, с Сапфи́рою жено́ю свое́ю, прода́ста село́,

² И утаи́ от цены́, све́дущей и жене́ его́, и прине́с часть не́кую, пред нога́ми Апо́стол положи́.

³ Рече́ же Петр: Ана́ние, почто́ испо́лни сатана́ се́рдце твое́ солга́ти Ду́ху Свято́му и утаи́ти от цены́ села́?

⁴ Су́щее тебе́ не твое́ ли бе, и прода́ное не в твое́й ли вла́сти бя́ше? Что я́ко положи́л еси́ в се́рдце твое́м вещь сию́? Не челове́ком солга́л еси́, но Бо́гу.

⁵ Слы́шав же Ана́ниа словеса́ сия́, пад и́здше. И бысть страх вели́к на всех слы́шащих сия́.

⁶ Вста́вше же ю́ноши взя́ша его́ и изне́сше погребо́ша.

⁷ Бысть же я́ко трем часо́м мину́вшим, и жена́ его́ не ве́дущи бы́вшаго вни́де.

⁸ Отвеща́в же ей Петр: рцы ми, а́ще на толи́це село́ отда́ста? Она́ же рече́: ей, на толи́це.

⁹ Петр же рече́ к ней: что я́ко согласи́стася искуси́ти Ду́ха Госпо́дня? Се, но́ги погре́бших му́жа твоего́ при две́рех, и изнесу́т тя.

¹⁰ Паде́ же а́бие пред нога́ма его́ и и́здше, вше́дше же ю́ноши обрето́ша ю́ ме́ртву и изне́сше погребо́ша близ му́жа ея́.

¹¹ И бысть страх вели́к на всей це́ркви и на всех слы́шаших сия́.

¹² Рука́ми же апо́стольскими бы́ша зна́мения и чудеса́ в лю́дех мно́га, и бя́ху единоду́шно вси в притво́ре Соломо́ни.

¹³ От про́чих же никто́же сме́яше прилепля́тися им, но велича́ху их лю́дие.

¹⁴ Па́че же прилага́хуся ве́рующии Го́сподеви, мно́жество муже́й же и жен.

¹⁵ Я́ко и на сто́гны износи́ти неду́жныя и полага́ти на посте́лях и на одре́х, да гряду́щу Петру́, поне́ сень его́ осени́т не́коего от них.

¹⁶ Схожда́ше же ся и мно́жество от окре́стных градо́в во Иерусали́м, принося́ще неду́жныя и стра́ждущия от дух нечи́стых, и́же исцелева́хуся вси.

¹⁷ Воста́в же архиере́й, и вси и́же с ним, су́щая е́ресь саддуке́йская, испо́лнишася за́висти.

¹⁸ И возложи́ша ру́ки своя́ на апо́столы, и посла́ша их в соблюде́ние о́бщее.

¹⁹ А́нгел же Госпо́день но́щию отве́рзе две́ри темни́цы, изве́д же их, рече́:

²⁰ Иди́те, и ста́вше, глаго́лите в це́ркви лю́дем вся глаго́лы жи́зни сея́.

²¹ Слы́шавше же внидо́ша по у́тренице ^[152] в це́рковь и уча́ху. Прише́д же архиере́й и и́же с ним, созва́ша собо́р и вся ста́рцы от сыно́в Изра́илевых и посла́ша во узи́лище, привести́ их.

²² Слуги́ же ше́дше не обрето́ша их в темни́це, возвра́щше же ся возвести́ша,

²³ Глаго́люще, я́ко темни́цу у́бо обрето́хом заключе́ну со вся́ким утвержде́нием и блюсти́тели стоя́щия пред две́рьми, отве́рзше же, внутрь ни еди́наго обрето́хом.

²⁴ Я́коже слы́шаша словеса́ сия́ архиере́й же и воево́да церко́вный и первосвяще́нницы, недоумева́хуся о них, что у́бо бу́дет сие́.

²⁵ Прише́д же не́кто возвести́ им, глаго́ля, я́ко се му́жие, и́хже всади́сте в темни́цу, суть в це́ркви стоя́ще и уча́ще лю́ди.

²⁶ Тогда́ шед воево́да со слуга́ми, приведе́ их не с ну́ждею: [боя́хуся бо люде́й, да не ка́мением побию́т их.]

²⁷ Приве́дше же их, поста́виша на со́нмищи, и вопроси́ их архиере́й, глаго́ля:

²⁸ Не запреще́нием ли запрети́хом вам не учи́ти о и́мени сем? И се испо́лнисте Иерусали́м уче́нием ва́шим и хо́щете навести́ на ны кровь Челове́ка Сего́.

²⁹ Отвеща́в же Петр и Апо́столи ре́ша: повинова́тися подоба́ет Бо́гови па́че, не́жели челове́ком.

³⁰ Бог оте́ц на́ших воздви́же Иису́са, Его́же вы уби́сте, пове́сивше на дре́ве.

³¹ Сего́ Бог Нача́льника и Спа́са возвы́си десни́цею Свое́ю, да́ти покая́ние Изра́илеви и оставле́ние грехо́в.

³² И мы есмы́ Того́ свиде́тели глаго́л сих, и Дух же Святы́й, Его́же даде́ Бог повину́ющимся Ему́.

³³ Они́ же слы́шавше распыха́хуся и совеща́ша уби́ти их.

³⁴ Воста́в же не́кий на со́нмищи фарисе́й, и́менем Гамалии́л, законоучи́тель че́стен всем лю́дем, повеле́ вне ма́ло что Апо́столом уступи́ти.

³⁵ Рече́ же к ним: му́жие Изра́ильтяне, внима́йте себе́ о челове́цех сих, что́ хо́щете сотвори́ти?

³⁶ Пред си́ми бо де́ньми воста́ Фе́вда, глаго́ля бы́ти вели́ка не́коего себе́, ему́же прилепи́шася число́м муже́й я́ко четы́реста: и́же убие́н бысть, и вси, ели́цы повину́шася ему́, разыдо́шася и бы́ша ни во что́же.

³⁷ Посе́м воста́ Иу́да Галиле́анин во дни написа́ния и отвлече́ лю́ди дово́льны в след себе́: и той поги́бе, и вси, ели́цы послу́шаша его́, разсы́пашася.

³⁸ И ны́не, глаго́лю вам, отступи́те от челове́к сих и оста́вите их: я́ко а́ще бу́дет от челове́к сове́т сей или́ де́ло сие́, разори́тся,

³⁹ А́ще ли же от Бо́га есть, не мо́жете разори́ти то, да не ка́ко и Богобо́рцы обря́щетеся.

⁴⁰ Послу́шаша же его́, и призва́вше Апо́столы, би́вше запрети́ша им не глаго́лати о и́мени Иису́сове и отпусти́ша их.

⁴¹ Они́ же у́бо идя́ху ра́дующеся от лица́ собо́ра, я́ко за и́мя Го́спода Иису́са сподо́бишася безче́стие прия́ти.

⁴² По вся же дни в це́ркви и в доме́х не престая́ху уча́ще и благовеству́юще Иису́са Христа́.

Глава 6

¹ Во днех же сих, умно́жившимся ученико́м, бысть ропта́ние е́ллином ^[153] ко евре́ем, я́ко презира́еми быва́ху во вседне́внем служе́нии вдови́цы их.

² Призва́вше же двана́десять мно́жество учени́к, ре́ша: не уго́дно есть нам, оста́вльшим сло́во Бо́жие, служи́ти трапе́зам.

³ Усмотри́те у́бо, бра́тие, му́жи от вас свиде́тельствованы седмь, испо́лнены Ду́ха Свя́та и прему́дрости, и́хже поста́вим над слу́жбою се́ю.

⁴ Мы же в моли́тве и служе́нии сло́ва пребу́дем.

⁵ И уго́дно бысть сло́во сие́ пред всем наро́дом. И избра́ша Стефа́на, му́жа испо́лнена ве́ры и Ду́ха Свя́та, и Фили́ппа, и Про́хора и Никано́ра, и Ти́мона, и Парме́на, и Никола́а прише́льца Антиохи́йскаго.

⁶ Я́же поста́виша пред апо́столы, и помоли́вшеся положи́ша на ня ру́ки.

⁷ И сло́во Бо́жие растя́ше, и мно́жашеся число́ учени́к во Иерусали́ме зело́, мног же наро́д свяще́нников послу́шаху ве́ры.

⁸ Стефа́н же испо́лнь ве́ры и си́лы творя́ше зна́мения и чудеса́ ве́лия в лю́дех.

⁹ Воста́ша же не́цыи от со́нма глаго́лемаго Ливерти́нска и Кирине́йска и Алекса́ндрска, и и́же от Килики́и и Аси́и, стяза́ющеся со Стефа́ном.

¹⁰ И не можа́ху проти́ву ста́ти прему́дрости и Ду́ху, И́мже глаго́лаше.

¹¹ Тогда́ подусти́ша му́жи глаго́лющия, я́ко слы́шахом его́ глаго́люща глаго́лы ху́льныя на Моисе́а и на Бо́га.

¹² Сподвиго́ша же лю́ди и ста́рцы и кни́жники, и напа́дше восхи́тиша его́ и приведо́ша на со́нмище.

¹³ Поста́виша же свиде́тели ло́жны глаго́лющия, я́ко челове́к сей не престае́т глаго́лы ху́льныя глаго́ля на ме́сто свято́е сие́ и зако́н.

¹⁴ Слы́шахом бо его́ глаго́люща, я́ко Иису́с Назоре́й сей разори́т ме́сто сие́ и измени́т обы́чаи, я́же предаде́ нам Моисе́й.

¹⁵ И воззре́вше нань вси седя́щии в со́нмищи, ви́деша лице́ его́ я́ко лице́ А́нгела.

Глава 7

¹ Рече́ же архиере́й: а́ще у́бо сия́ та́ко суть?

² Он же рече́: му́жие бра́тие и отцы́, послу́шайте. Бог сла́вы яви́ся отцу́ на́шему Авраа́му су́щу в Месопота́мии, пре́жде да́же не всели́тися ему́ в Харра́нь.

³ И рече́ к нему́: изы́ди от земли́ твоея́ и от ро́да твоего́ и от до́му отца́ твоего́, и прииди́ в зе́млю, ю́же а́ще ти покажу́.

⁴ Тогда́ изше́д от земли́ Халде́йския, всели́ся в Харра́нь, и отту́ду, по уме́ртвии отца́ его́, пресели́ его́ в зе́млю сию́, на не́йже вы ны́не живете́,

⁵ И не даде́ ему́ насле́дия в ней, ниже́ стопы́ но́гу. И обеща́ да́ти ему́ ю́ во одержа́ние и се́мени его́ по нем, не су́щу ему́ ча́ду.

⁶ Глаго́ла же си́це Бог, я́ко бу́дет се́мя его́ прише́льцы в земли́ чу́ждей, и порабо́тят е́ и озло́бят лет четы́реста.

⁷ И язы́ку, ему́же порабо́тают, сужду́ Аз, рече́ Бог: и по сих изы́дут и послу́жат Ми на ме́сте сем.

⁸ И даде́ ему́ заве́т обре́зания. И та́ко роди́ Исаа́ка и обре́за его́ в день осмы́й: и Исаа́к Иа́кова, и Иа́ков двана́десять патриа́рх.

⁹ И патриа́рси позави́девше Ио́сифу прода́ша его́ во Еги́пет: и бе Бог с ним.

¹⁰ И изъя́т его от всех скорбе́й его́, и даде́ ему́ благода́ть и прему́дрость пред фарао́ном царе́м Еги́петским: и поста́ви его́ нача́льника над Еги́птом и над всем до́мом свои́м.

¹¹ Прии́де же глад на всю зе́млю Еги́петскую и Ханаа́ню и скорбь ве́лия, и не обрета́ху сы́тости отцы́ на́ши.

¹² Слы́шав же Иа́ков су́щую пшени́цу во Еги́пте, посла́ отцы́ на́шя пе́рвее.

¹³ И внегда́ второ́е приидо́ша, позна́н бысть Ио́сиф бра́тии свое́й, и я́ве бысть фарао́ну род Ио́сифов.

¹⁴ Посла́в же Ио́сиф призва́ отца́ своего́ Иа́кова и все сро́дство свое́, се́дмьдесят и пять душ.

¹⁵ Сни́де же Иа́ков во Еги́пет, и сконча́ся сам и отцы́ на́ши.

¹⁶ И принесе́ни бы́ша в Сихе́м и положе́ни бы́ша во гро́бе, его́же купи́ Авраа́м цено́ю сребра́ от сыно́в Еммо́ра Сихе́мова.

¹⁷ И я́коже приближа́шеся вре́мя обетова́ния, и́мже кля́тся Бог Авраа́му, возрасто́ша лю́дие и умно́жишася во Еги́пте,

¹⁸ До́ндеже наста́ царь ин во Еги́пте, и́же не зна́ше Ио́сифа.

¹⁹ Сей зле умы́слив о ро́де на́шем, озло́би отцы́ на́шя, умори́ти младе́нцы их и не оживи́ти. ^[154]

²⁰ В не́же вре́мя роди́ся Моисе́й и бе уго́ден Бо́гови, и́же пита́н бысть ме́сяцы три в дому́ отца́ своего́.

²¹ Изве́ржена же его́, взят его́ дщи фарао́нова и воспита́ и себе́ в сы́на.

²² И нака́зан бысть Моисе́й всей прему́дрости Еги́петстей, бе же си́лен в словесе́х и де́лех.

²³ Егда́ же исполня́шеся ему́ лет четы́редесятих вре́мя, взы́де на се́рдце ему́ посети́ти бра́тию свою́, сы́ны Изра́илевы.

²⁴ И ви́дев не́коего оби́дима, посо́бствова и сотвори́ отмще́ние оби́димому, уби́в Еги́птянина.

²⁵ Мня́ше же разуме́ти бра́тиям свои́м, я́ко Бог руко́ю его́ даст им спасе́ние: они́ же не разуме́ша.

²⁶ Во у́трий же день яви́ся им тя́жущимся и привлача́ше их в примире́ние, рек: му́жие, бра́тия есте́ вы, вску́ю оби́дите друг дру́га?

²⁷ Оби́дяй же бли́жняго отри́ну его́, рек: кто тя поста́ви кня́зя и судию́ над на́ми?

²⁸ Еда́ уби́ти мя ты хо́щеши, и́мже о́бразом уби́л еси́ вчера́ Еги́птянина?

²⁹ Бежа́ же Моисе́й о словеси́ сем и бысть пришле́ц в земли́ Мадиа́мстей, иде́же роди́ сы́на два.

³⁰ И испо́лньшимся ле́том четы́редесятим, яви́ся ему́ в пусты́ни горы́ Сина́йския А́нгел Госпо́день в пла́мени о́гнене в купине́.

³¹ Моисе́й же ви́дев дивля́шеся виде́нию: приступа́ющу же ему́ разуме́ти, бысть глас Госпо́день к нему́:

³² Аз Бог оте́ц твои́х, Бог Авраа́мов и Бог Исаа́ков и Бог Иа́ковль. Тре́петен же быв Моисе́й не сме́яше смотри́ти.

³³ Рече́ же ему́ Госпо́дь: иззу́й сапоги́ но́гу твое́ю, ме́сто бо, на не́мже стои́ши, земля́ свята́ есть.

³⁴ Ви́дя ви́дех озлобле́ние люде́й Мои́х, и́же во Еги́пте, и стена́ние их услы́шах, и снидо́х изъя́ти их: и ны́не гряди́, послю́ тя во Еги́пет.

³⁵ Сего́ Моисе́а, его́же отри́нуша, ре́кше: кто́ тя поста́ви нача́льника и судию́? Сего́ Бог кня́зя и изба́вителя посла́ руко́ю А́нгела я́вльшагося ему́ в купине́.

³⁶ Сей изведе́ их, сотво́рь чудеса́ и зна́мения в земли́ Еги́петстей и в Чермно́м мо́ри, и в пусты́ни лет четы́редесять.

³⁷ Сей есть Моисе́й реки́й сыно́м Изра́илевым: Проро́ка вам воздви́гнет Госпо́дь Бог ваш от бра́тии ва́шея я́ко мене́: Того́ послу́шайте.

³⁸ Сей есть бы́вый в це́ркви в пусты́ни со А́нгелом, глаго́лавшим ему́ на горе́ Сина́йстей, и со отцы́ на́шими, иже прия́т словеса́ жи́ва да́ти нам.

³⁹ Его́же не восхоте́ша послу́шати отцы́ на́ши, но отри́нуша и и обрати́шася се́рдцем свои́м во Еги́пет,

⁴⁰ Ре́кше Ааро́ну: сотвори́ нам бо́ги, и́же предъи́дут пред на́ми, Моисе́ю бо сему́, и́же изведе́ нас от земли́ Еги́петския, не ве́мы, что бысть ему́.

⁴¹ И сотвори́ша тельца́ во дни о́ны, и принесо́ша же́ртву и́долу, и веселя́хуся в де́лех руку́ свое́ю.

⁴² Отврати́ся же Бог и предаде́ их служи́ти во́ем небе́сным, я́коже пи́сано есть в кни́зе проро́к: еда́ заколе́ния и же́ртвы принесо́сте Ми лет четы́редесять в пусты́ни, до́ме Изра́илев?

⁴³ И восприя́сте ски́нию Моло́хову и звезду́ бо́га ва́шего Ремфа́на, о́бразы, я́же сотвори́сте покланя́тися им: и преселю́ вы да́лее Вавило́на.

⁴⁴ Сень свиде́ния бя́ше отце́м на́шим в пусты́ни, я́коже повеле́ Глаго́ляй Моисе́ови, сотвори́ти ю́ по о́бразу, его́же ви́де.

⁴⁵ Ю́же и внесо́ша прие́мше отцы́ на́ши со Иису́сом во одержа́ние язы́ков, и́хже изри́ну Бог от лица́ оте́ц на́ших, да́же до дний Дави́да.

⁴⁶ И́же обре́те благода́ть пред Бо́гом и испроси́ обрести́ селе́ние Бо́гу Иа́ковлю.

⁴⁷ Соломо́н же созда́ Ему́ храм.

⁴⁸ Но Вы́шний не в рукотворе́нных це́рквах живе́т, я́коже проро́к глаго́лет:

⁴⁹ Не́бо Мне престо́л есть, земля́ же подно́жие нога́ма Мои́ма. Кий храм сози́ждете Ми, глаго́лет Госпо́дь, или́ ко́е ме́сто поко́ищу Моему́?

⁵⁰ Не рука́ ли Моя́ сотвори́ сия́ вся?

⁵¹ Жестоковы́йнии и необре́заннии се́рдцы и ушесы́, вы при́сно Ду́ху Свято́му проти́витеся, я́коже отцы́ ва́ши, та́ко и вы.

⁵² Кого́ от проро́к не изгна́ша отцы́ ва́ши? И уби́ша предвозвести́вшия о прише́ствии Пра́веднаго, Его́же вы ны́не преда́теле и уби́йцы бы́сте,

⁵³ И́же прия́сте зако́н устрое́нием А́нгельским и не сохрани́сте.

⁵⁴ Слы́шаще же сия́, распыха́хуся сердцы́ свои́ми и скрежета́ху зубы́ нань.

⁵⁵ [Стефа́н же] сый испо́лнь Ду́ха Свя́та, воззре́в на не́бо, ви́де сла́ву Бо́жию и Иису́са стоя́ща одесну́ю Бо́га,

⁵⁶ И рече́: се ви́жу небеса́ отве́рста и Сы́на Челове́ча одесну́ю стоя́ща Бо́га.

⁵⁷ Возопи́вше же гла́сом ве́лиим, затыка́ху у́ши свои́ и устреми́шася единоду́шно нань.

⁵⁸ И изве́дше вне гра́да, ка́мением побива́ху его́, и свиде́телие, [сне́мше] ри́зы своя́ положи́ша при ногу́ ю́ноши нарица́емаго Са́вла,

⁵⁹ И ка́мением побива́ху Стефа́на, моля́щася и глаго́люща: Го́споди Иису́се, приими́ дух мой.

⁶⁰ Прекло́нь же коле́на, возопи́ гла́сом ве́лиим: Го́споди, не поста́ви им греха́ сего́. И сия́ рек у́спе.

Глава 8

¹ Са́вл же бе соизволя́я уби́йству его́. Бысть же в той день гоне́ние ве́лие на це́рковь Иерусали́мскую: вси же разсе́яшася по стра́нам Иуде́йским и Самари́йским, кроме́ Апо́стол.

² Погребо́ша же Стефа́на му́жие благогове́йнии и сотвори́ша плачь ве́лий над ним.

³ Са́вл же озлобля́ше це́рковь, в до́мы входя́, и влачя́ му́жи и жены́, предая́ше в темни́цу.

⁴ Разсе́явшиися же прохожда́ху, благовеству́юще сло́во.

⁵ Фили́пп же соше́д во град самари́йский, пропове́даше им Христа́.

⁶ Внима́ху же наро́ди глаго́лемым от Фили́ппа единоду́шно, слы́шаще и ви́дяще зна́мения, я́же творя́ше.

⁷ Ду́си бо нечи́стии от мно́гих иму́щих я́, вопию́ще гла́сом ве́лиим, исхожда́ху, мно́зи же разсла́бленнии и хро́мии исцели́шася.

⁸ И бысть ра́дость ве́лия во гра́де том.

⁹ Муж же не́кий, и́менем Си́мон, пре́жде бе во гра́де волхву́я и удивля́я язы́к самари́йский, глаго́ля не́коего бы́ти себе́ вели́ка.

¹⁰ Ему́же внима́ху вси от ма́ла да́же до вели́ка, глаго́люще: сей есть си́ла Бо́жия вели́кая.

¹¹ Внима́ху же ему́ за сие́, я́ко дово́льно вре́мя волхвова́нии удивля́ше их.

¹² Егда́ же ве́роваша Фили́ппу благовеству́ющу я́же о Ца́рствии Бо́жии и о и́мени Иису́с Христо́ве, креща́хуся му́жие же и жены́.

¹³ Си́мон же и той ве́рова и кре́щься бе пребыва́я у Фили́ппа, ви́дя же си́лы и зна́мения ве́лия быва́ема, ужа́сен дивля́шеся.

¹⁴ Слы́шавше же и́же во Иерусали́ме Апо́столи, я́ко прия́т Самари́а сло́во Бо́жие, посла́ша к ним Петра́ и Иоа́нна,

¹⁵ И́же соше́дше помоли́шася о них, я́ко да прии́мут Ду́ха Свята́го.

¹⁶ [Еще́ бо ни на еди́наго их бе прише́л, то́чию креще́ни бя́ху во и́мя Го́спода Иису́са.]

¹⁷ Тогда́ возложи́ша ру́це на ня, и прия́ша Ду́ха Свята́го.

¹⁸ Ви́дев же Си́мон, я́ко возложе́нием рук Апо́стольских дае́тся Дух Святы́й, принесе́ им сребро́,

¹⁹ Глаго́ля: дади́те и мне власть сию́, да, на него́же а́ще положу́ ру́це, прии́мет Ду́ха Свята́го.

²⁰ Петр же рече́ к нему́: сребро́ твое́ с тобо́ю да бу́дет в поги́бель, я́ко дар Бо́жий непщева́л еси́ сребро́м стяжа́ти.

²¹ Несть ти ча́сти ни жре́бия в словеси́ сем, и́бо се́рдце твое́ несть пра́во пред Бо́гом.

²² Пока́йся у́бо о зло́бе твое́й сей и моли́ся Бо́гу, а́ще у́бо отпу́стится ти помышле́ние се́рдца твоего́,

²³ В же́лчи бо го́рести и сою́зе непра́вды зрю тя су́ща.

²⁴ Отвеща́в же Си́мон рече́: помоли́теся вы о мне ко Го́споду, я́ко да ничто́же сих на́йдет на мя, я́же реко́сте.

²⁵ Они́ же у́бо, засвиде́тельствовавше и глаго́лавше сло́во Госпо́дне, возврати́шася во Иерусали́м и мно́гим ве́сем Самари́йским благовести́ша.

²⁶ А́нгел же Госпо́день рече́ к Фили́ппу, глаго́ля: воста́ни и иди́ на полу́дне, на путь сходя́щий от Иерусали́ма в Га́зу, и той есть пуст.

²⁷ И воста́в по́йде. И се муж Му́рин, евну́х си́лен Кандаки́и цари́цы Му́ринския, и́же бе над все́ми сокро́вищи ея́, и́же прии́де поклони́тися во Иерусали́м.

²⁸ Бе же возвраща́яся, и седя́ на колесни́це свое́й, чтя́ше проро́ка Иса́ию.

²⁹ Рече́ же Дух к Фили́ппу: приступи́ и прилепи́ся колесни́це сей.

³⁰ Прите́к же Фили́пп услы́ша его́ чту́ща проро́ка Иса́ию и рече́: у́бо разуме́еши ли, я́же чте́ши?

³¹ Он же рече́: ка́ко у́бо могу́ [разуме́ти], а́ще не кто наста́вит мя? Умоли́ же Фили́ппа, возше́дша се́сти с ним.

³² Сло́во же Писа́ния, е́же чтя́ше, бе сие́: я́ко овча́ на заколе́ние веде́ся, и я́ко а́гнец пря́мо стригу́щему его́ безгла́сен, та́ко не отверза́ет уст Свои́х.

³³ Во смире́нии Его́ суд Его́ взя́тся, род же Его́ кто испове́сть? Я́ко взе́млется от земли́ живо́т Его́.

³⁴ Отвеща́в же ка́женик к Фили́ппу, рече́: молю́ тя, о ком проро́к глаго́лет сие́? О себе́ ли, или́ о ино́м не́коем?

³⁵ Отве́рз же Фили́пп уста́ своя́ и наче́н от Писа́ния сего́, благовести́ ему́ Иису́са.

³⁶ Я́коже идя́ху путе́м, приидо́ша на не́кую во́ду, и рече́ ка́женик: се вода́: что возбраня́ет ми крести́тися?

³⁷ Рече́ же ему́ Фили́пп: а́ще ве́руеши от всего́ се́рдца твоего́, мо́щно ти есть. Отвеща́в же рече́: ве́рую Сы́на Бо́жия бы́ти Иису́са Христа́.

³⁸ И повеле́ ста́ти колесни́це, и снидо́ста о́ба на во́ду, Фили́пп же и ка́женик, и крести́ его́.

³⁹ Егда́ же изыдо́ста от воды́, Дух Святы́й нападе́ на ка́женика. А́нгел же Госпо́день восхи́ти Фили́ппа, и не ви́де его́ ктому́ ка́женик, идя́ше бо в путь свой ра́дуяся.

⁴⁰ Фили́пп же обре́теся во Азо́те и проходя́ благовествова́ше градо́м всем, до́ндеже приити́ ему́ в Кесари́ю.

Глава 9

¹ Савл же, еще́ дыха́я преще́нием и уби́йством на ученики́ Госпо́дни, присту́пль ко архиере́ю,

² Испроси́ от него́ посла́ния в Дама́ск к собо́рищем, я́ко да а́ще не́кия обря́щет того́ пути́ су́щия, му́жи же и жены́, свя́заны приведе́т во Иерусали́м.

³ Внегда́ же ити́, бысть ему́ прибли́житися к Дама́ску, и внеза́пу облиста́ его́ свет от небесе́.

⁴ И пад на зе́млю, слы́ша глас глаго́лющь ему́: Са́вле, Са́вле, что Мя го́ниши?

⁵ Рече́ же: кто еси́, Го́споди? Госпо́дь же рече́: Аз есмь Иису́с, Его́же ты го́ниши. Жестоко́ ти есть проти́ву рожну́ ^[155] пра́ти.

⁶ Трепе́ща же и ужаса́яся глаго́ла: Го́споди, что мя хо́щеши твори́ти? И Госпо́дь рече́ к нему́: воста́ни и вни́ди во град, и рече́тся ти, что ти подоба́ет твори́ти.

⁷ Му́жие же иду́щии с ним стоя́ху чудя́щеся, слы́шаще у́бо глас, никого́же ви́дяще.

⁸ Воста́в же Савл от земли́ и отве́рстыма очи́ма свои́ма ни еди́наго ви́дяше, веду́ще же его́ за ру́ку, введо́ша в Дама́ск.

⁹ И бе дни три не ви́дя, и ни яде́, ниже́ пит.

¹⁰ Бе же не́кто учени́к в Дама́сце, и́менем Ана́ниа, и рече́ к нему́ Госпо́дь в виде́нии: Ана́ние. Он же рече́: се аз, Го́споди.

¹¹ Госпо́дь же к нему́: воста́в поиди́ на сто́гну нарица́емую Пра́вую и взыщи́ в дому́ Иу́дове Са́вла и́менем, Тарсяни́на, се бо, моли́тву де́ет.

¹² [И ви́де в виде́нии му́жа, и́менем Ана́нию, вше́дша и возло́жша нань ру́ку, я́ко да про́зрит.]

¹³ Отвеща́ же Ана́ниа: Го́споди, слы́шах от мно́гих о му́жи сем, коли́ка зла сотвори́ святы́м Твои́м во Иерусали́ме.

¹⁴ И зде и́мать власть от архиере́й связа́ти вся нарица́ющия и́мя Твое́.

¹⁵ Рече́ же к нему́ Госпо́дь: иди́, я́ко сосу́д избра́н Ми есть сей, пронести́ и́мя Мое́ пред язы́ки и царьми́ и сынми́ изра́илевыми.

¹⁶ Аз бо скажу́ ему́, ели́ка подоба́ет ему́ о и́мени Мое́м пострада́ти.

¹⁷ По́йде же Ана́ниа и вни́де в хра́мину, и возло́жь нань ру́це, рече́: Са́вле бра́те, Госпо́дь Иису́с явле́й ти ся на пути́, и́мже шел еси́, посла́ мя, я́ко да про́зриши и испо́лнишися Ду́ха Свя́та.

¹⁸ И а́бие отпадо́ша от о́чию его́ я́ко чешуя́: прозре́ же а́бие, и воста́в крести́ся,

¹⁹ И прие́м пи́щу, укрепи́ся. Бысть же Савл с су́щими в Дама́сце ученика́ми дни не́кия.

²⁰ И а́бие на со́нмищах пропове́даше Иису́са, я́ко Сей есть Сын Бо́жий.

²¹ Дивля́хуся же вси слы́шащии и глаго́лаху: не сей ли есть гони́вый во Иерусали́ме нарица́ющия и́мя сие́, и зде на сие́ прии́де, да свя́заны ты́я приведе́т ко архиере́ем?

²² Савл же па́че крепля́шеся и смуща́ше иуде́и живу́щия в Дама́сце, препира́я, я́ко Сей есть Христо́с.

²³ Я́коже испо́лнишася дни́е дово́льни, совеща́ша Иуде́е уби́ти его́.

²⁴ Уве́дан же бысть Са́влу сове́т их: стрежа́ху же врат день и нощь, я́ко да убию́т его́.

²⁵ Пое́мше же его́ ученицы́ но́щию, све́сиша по стене́ в ко́шнице.

²⁶ Прише́д же Савл во Иерусали́м, покуша́шеся прилепля́тися ученико́м, и вси боя́хуся его́, не ве́рующе, я́ко есть учени́к.

²⁷ Варна́ва же прие́м его́, приведе́ ко Апо́столом и пове́да им, ка́ко на пути́ ви́де Го́спода, и я́ко глаго́ла ему́, и ка́ко в Дама́сце дерза́ше о и́мени Иису́сове.

²⁸ И бя́ше с ни́ми входя́ и исходя́ во Иерусали́ме и дерза́я о и́мени Го́спода Иису́са.

²⁹ Глаго́лаше же и стяза́шеся с Е́ллины: они́ же иска́ху уби́ти его́.

³⁰ Разуме́вше же бра́тия, сведо́ша его́ в Кесари́ю и отпусти́ша его́ в Тарс.

³¹ Це́ркви же по всей Иуде́и и Галиле́и и Самари́и име́яху мир, созида́ющеся и ходя́ще в стра́се Госпо́дни, и утеше́нием Свята́го Ду́ха умножа́хуся.

³² И бысть Петру́, посеща́ющу всех, сни́ти и ко святы́м живу́щим в Ли́дде.

³³ Обре́те же та́мо челове́ка не́коего, и́менем Ене́а, от осми́ лет лежа́ща на одре́, и́же бе разсла́блен.

³⁴ И рече́ ему́ Петр: Ене́е, исцеля́ет тя Иису́с Христо́с, воста́ни с посте́ли твоея́. И а́бие воста́.

³⁵ И ви́деша его́ вси живу́щии в Ли́дде и во Ассаро́не, и́же обрати́шася ко Го́споду.

³⁶ Во Иоппи́и же бе не́кая учени́ца, и́менем Тави́фа, я́же сказа́ема глаго́лется: се́рна, сия́ бя́ше испо́лнена благи́х дел и ми́лостынь, я́же творя́ше.

³⁷ Бысть же во дни ты́я, боле́вшей ей умре́ти, омы́вше же ю́, положи́ша в го́рнице.

³⁸ Близ же су́щей Ли́дде Иоппи́и, ученицы́ слы́шавше, я́ко Петр есть в ней, посла́ша два му́жа к нему́, моля́ще его́ не облени́тися приити́ до них.

³⁹ Воста́в же Петр и́де с ни́ма, его́же прише́дша возведо́ша в го́рницу, и предста́ша ему́ вся вдови́цы пла́чуща, и показу́юща ри́зы и оде́жды, ели́ка творя́ше, с ни́ми су́щи, Се́рна.

⁴⁰ Изгна́в же вон вся Петр, прекло́нь коле́на помоли́ся, и обра́щься к те́лу, рече́: Тави́фо, воста́ни. Она́ же отве́рзе о́чи свои́, и ви́девши Петра́, се́де.

⁴¹ Пода́в же ей ру́ку, воздви́же ю́, и призва́в святы́я и вдови́цы, поста́ви ю́ жи́ву.

⁴² Уве́дано же бысть се по всей Иоппи́и, и мно́зи ве́роваша в Го́спода.

⁴³ Бысть же дни дово́льны пребы́ти ему́ во Иоппи́и у не́коего Си́мона усмаря́. ^[156]

Глава 10

¹ Муж же не́кий бе в Кесари́и, и́менем Корни́лий, со́тник от спи́ры нарица́ющияся Итали́йския,

² Благогове́ин и боя́йся Бо́га со всем до́мом свои́м, творя́й ми́лостыни мно́ги лю́дем и моля́йся Бо́гу всегда́.

³ Ви́де в виде́нии я́ве, я́ко в час девя́тый дне, А́нгела Бо́жия сше́дша к нему́ и ре́кша ему́: Корни́лие.

⁴ Он же воззре́в нань и пристра́шен быв рече́: что есть, Го́споди? Рече́ же ему́: моли́твы твоя́ и ми́лостыни твоя́ взыдо́ша на па́мять пред Бо́га.

⁵ И ны́не посли́ во Иоппи́ю муже́й и призови́ Си́мона, нарица́емаго Петра́.

⁶ Сей стра́нствует у не́коего Си́мона усмаря́, ему́же есть дом при мо́ри, той рече́т тебе́ глаго́лы, в ни́хже спасе́шися ты и весь дом твой.

⁷ И я́коже оты́де А́нгел глаго́ляй Корни́лию, пригласи́в два от рабо́в свои́х и во́ина благочести́ва от служа́щих ему́,

⁸ И сказа́в им вся, посла́ их во Иоппи́ю.

⁹ Воу́трие же, путьше́ствующим им и ко гра́ду приближа́ющимся, взы́де Пе́тр на го́рницу помоли́тися, в час шесты́й.

¹⁰ Бысть же приа́лчен и хотя́ше вкуси́ти, гото́вящим же о́нем, нападе́ нань у́жас,

¹¹ И ви́де не́бо отве́рсто и сходя́щ нань сосу́д не́кий, я́ко плащани́цу ве́лию, по четы́рем кра́ем привя́зан и ни́зу спуща́емь на зе́млю,

¹² В не́мже бя́ху вся четвероно́гая земли́ и зве́рие и га́ди и пти́цы небе́сныя.

¹³ И бысть глас к нему́: воста́в, Пе́тре, заколи́ и яждь.

¹⁴ Пе́тр же рече́: ника́коже, Го́споди, я́ко николи́же ядо́х вся́ко скве́рно или́ нечи́сто.

¹⁵ И се глас па́ки к нему́ втори́цею: я́же Бог очи́стил есть, ты не скверни́.

¹⁶ Сие́ же бысть три́щи, и па́ки взя́ся сосу́д на не́бо.

¹⁷ Я́коже в себе́ недоумева́шеся Пе́тр, что́ бы бы́ло виде́ние, е́же ви́де, и се, му́жие по́сланнии от Корни́лиа, вопро́шше и уве́девше дом Си́монов, ста́ша пред враты́.

¹⁸ И возгла́шше вопроша́ху, а́ще Си́мон, нарица́емый Пе́тр, зде́ стра́нствует?

¹⁹ Петру́ же размышля́ющу о виде́нии, рече́ ему́ Дух: се́, му́жие трие́ и́щут тебе́,

²⁰ Но воста́в сни́ди и иди́ с ни́ми, ничто́же разсужда́я: зане́ Аз посла́х их.

²¹ Соше́д же Петр к муже́м по́сланным к нему́ от Корни́лиа, рече́: се аз есмь, его́же и́щете. Ка́я есть вина́, ея́же ра́ди приидо́сте?

²² Они́ же реко́ша: Корни́лий со́тник, муж пра́веден и боя́йся Бо́га, свиде́тельствован от всего́ язы́ка Иуде́йска, увеще́н есть от А́нгела свя́та призва́ти тя в дом свой и слы́шати глаго́лы от тебе́.

²³ Призва́в же их учреди́: нау́трие же Петр воста́в и́де с ни́ми, и не́цыи от бра́тий, и́же от Иоппи́и, идо́ша с ним.

²⁴ И нау́трие внидо́ша в Кесари́ю. Корни́лий же бе ча́я их, созва́в сро́дники своя́ и любе́зныя дру́ги.

²⁵ Я́коже бысть вни́ти Петру́, сре́те его́ Корни́лий, и пад на но́гу его́ поклони́ся.

²⁶ Петр же воздви́же его́, глаго́ля: воста́ни, и аз сам челове́к есмь.

²⁷ И с ним бесе́дуя, вни́де и обре́те собра́вшияся мно́ги.

²⁸ Рече́ же к ним: вы ве́сте, я́ко не ле́по есть му́жу Иуде́анину прилепля́тися или́ приходи́ти ко иноплеме́ннику, и мне Бог показа́ ни еди́наго скве́рна или́ нечи́ста глаго́лати челове́ка.

²⁹ Те́мже и без сумне́ния приидо́х призва́н: вопроша́ю вы у́бо, ко́им сло́вом посла́сте по мене́?

³⁰ И Корни́лий рече́: от четве́ртаго дне да́же до сего́ часа́ бех постя́ся и в девя́тый час моля́ся в дому́ мое́м, и се муж ста пре́до мно́ю во оде́жде све́тле

³¹ И рече́: Корни́лие, услы́шана бысть моли́тва твоя́, и ми́лостыни твоя́ помяну́шася пред Бо́гом.

³² Посли́ у́бо во Иоппи́ю и призови́ Си́мона, и́же нарица́ется Петр, сей стра́нствует в дому́ Си́мона усмаря́ близ мо́ря, и́же прише́д возглаго́лет тебе́.

³³ А́бие у́бо посла́х к тебе́, ты же до́бре сотвори́л еси́ прише́д. Ны́не у́бо вси мы пред Бо́гом предстои́м слы́шати вся повеле́нная тебе́ от Бо́га.

³⁴ Отве́рз же Петр уста́, рече́: пои́стинне разумева́ю, я́ко не на лица́ зрит Бог,

³⁵ Но во вся́ком язы́це боя́йся Его́ и де́лаяй пра́вду прия́тен Ему́ бысть.

³⁶ Сло́во, е́же посла́ сыно́м Изра́илевым, благовеству́я мир Иису́с Христо́м, Сей есть всем Госпо́дь.

³⁷ Вы ве́сте глаго́л бы́вший по всей Иуде́и, наче́ншийся от Галиле́и, по креще́нии, е́же пропове́да Иоа́нн:

³⁸ Иису́са, И́же от Назаре́та, я́ко пома́за Его́ Бог Ду́хом Святы́м и си́лою, И́же про́йде благоде́тельствуя и исцеля́я вся наси́лованныя от диа́вола, я́ко Бог бя́ше с Ним.

³⁹ И мы есмы́ свиде́теле всех, я́же сотвори́ во стране́ Иуде́йстей и во Иерусали́ме: Его́же и уби́ша, пове́шше на дре́ве.

⁴⁰ Сего́ Бог воскреси́ в тре́тий день и даде́ Ему́ явле́ну бы́ти,

⁴¹ Не всем лю́дем, но нам свиде́телем преднарече́нным от Бо́га, и́же с Ним ядо́хом и пи́хом, по воскресе́нии Его́ от ме́ртвых.

⁴² И повеле́ нам пропове́дати лю́дем и засвиде́тельствовати, я́ко Той есть нарече́нный от Бо́га Судия́ живы́м и ме́ртвым.

⁴³ О Сем вси проро́цы свиде́тельствуют, оставле́ние грехо́в прия́ти и́менем Его́ вся́кому ве́рующему вонь.

⁴⁴ Еще́ же глаго́лющу Петру́ глаго́лы сия́, нападе́ Дух Святы́й на вся слы́шащия сло́во.

⁴⁵ И ужасо́шася и́же от обре́зания ве́рнии, ели́цы приидо́ша с Петро́м, я́ко и на язы́ки дар Свята́го Ду́ха излия́ся:

⁴⁶ Слы́шаху бо их глаго́лющих язы́ки и велича́ющих Бо́га. Тогда́ отвеща́ Петр:

⁴⁷ Еда́ во́ду возбрани́ти мо́жет кто, е́же не крести́тися сим, и́же Дух Святы́й прия́ша, я́коже и мы?

⁴⁸ Повеле́ же им крести́тися во и́мя Иису́с Христо́во. Тогда́ моли́ша его́ пребы́ти у них дни не́кия.

Глава 11

¹ Слы́шаша же Апо́столи и бра́тия су́щии во Иуде́и, я́ко и язы́цы прия́ша сло́во Бо́жие.

² И егда́ взы́де Петр во Иерусали́м, препира́хуся с ним и́же от обре́зания,

³ Глаго́люще, я́ко к муже́м обре́зания не иму́щим вшел еси́ и ял еси́ с ни́ми.

⁴ Наче́нже Петр, ска́зоваше им поря́ду, глаго́ля:

⁵ Аз бех во гра́де Иоппи́йстем моля́ся и ви́дех во у́жасе виде́ние, сходя́щь сосу́д не́кий, я́ко плащани́цу ве́лию, от четы́рех кра́ев низпуща́ему с небесе́, и прии́де да́же до мене́.

⁶ В ню́же воззре́в смотря́х, и ви́дех четвероно́гая земна́я и зве́ри и га́ды и пти́цы небе́сныя.

⁷ Слы́шах же глас глаго́лющь мне: воста́в, Пе́тре, заколи́ и яждь.

⁸ Рех же: ника́коже, Го́споди, я́ко вся́ко скве́рно или́ нечи́сто николи́же вни́де во уста́ моя́.

⁹ Отвеща́ же ми глас втори́цею с небесе́ глаго́лющь: я́же Бог очи́стил есть, ты не скверни́.

¹⁰ Сие́ же бысть три́жды, и па́ки взя́шася вся на не́бо.

¹¹ И се, а́бие трие́ му́жие ста́ша пред хра́миною, в не́йже бех, по́слани от Кесари́и ко мне.

¹² Рече́ же ми Дух ити́ с ни́ми, ничто́же разсужда́я: приидо́ша же со мною и шесть бра́тия си́и, и внидо́хом в дом му́жа.

¹³ И возвести́ нам, ка́ко ви́де А́нгела [свя́та] в дому́ свое́м, ста́вша и ре́кша ему́: посли́ во Иоппи́ю му́жи и призови́ Си́мона, нарица́емаго Петра́,

¹⁴ И́же рече́т глаго́лы к тебе́, в ни́хже спасе́шися ты и весь дом твой.

¹⁵ Внегда́ же нача́х глаго́лати, нападе́ Дух Святы́й на них, я́коже и на ны в нача́ле.

¹⁶ Помяну́х же глаго́л Госпо́день, я́коже глаго́лаше: Иоа́нн у́бо крести́́л есть водою, вы же и́мате крести́тися Ду́хом Святы́м.

¹⁷ Да а́ще у́бо ра́вен дар даде́ им Бог, я́коже и нам ве́ровавшим в Го́спода на́шего Иису́са Христа́, аз же кто бех моги́й возбрани́ти Бо́га?

¹⁸ Слы́шавше же сия́, умолко́ша и сла́вляху Бо́га, глаго́люще: у́бо и язы́ком Бог покая́ние даде́ в живо́т.

¹⁹ Разсе́явшии же ся от ско́рби, бы́вшия при Стефа́не, проидо́ша да́же до Финики́и, и Ки́пра, и Антиохи́и, ни еди́ному же глаго́люще сло́ва, то́кмо иуде́ем.

²⁰ Бя́ху же не́цыи от них му́жие ки́прстии и кирине́йстии, и́же вше́дше во Антиохи́ю, глаго́лаху к е́ллином, благовеству́юще Го́спода Иису́са.

²¹ И бе рука́ Госпо́дня с ни́ми: мно́гое же число́ ве́ровавше обрати́шася ко Го́споду.

²² Слы́шано же бысть сло́во о них во у́шию це́ркве су́щия во Иерусали́ме, и посла́ша Варна́ву преити́ да́же до Антиохи́и.

²³ И́же прише́д и ви́дев благода́ть Бо́жию, возра́довася и утеша́ше вся изволе́нием се́рдца терпе́ти о Го́споде.

²⁴ Я́ко бе муж благ, и испо́лнь Ду́ха Свя́та и ве́ры. И приложи́ся наро́д мног Го́сподеви.

²⁵ Изы́де же Варна́ва в Тарс взыска́ти Са́вла, и обре́т его́, приведе́ его́ во Антиохи́ю.

²⁶ Бы́сть же им ле́то це́ло собира́тися в це́ркви, и учи́ти наро́д мног, нарещи́ же пре́жде во Антиохи́и ученики́, Христиа́ны.

²⁷ В ты́я же дни́ снидо́ша от Иерусали́ма проро́цы во Антиохи́ю.

²⁸ Воста́в же еди́н от них, и́менем Ага́в, назна́менаше Ду́хом гла́д вели́к хотя́щь бы́ти по всей вселе́нней, и́же и бысть при Клавди́и ке́саре.

²⁹ От учени́к же, по ели́ку кто име́яше что, изво́лиша ки́йждо их на слу́жбу посла́ти живу́щим во Иуде́и бра́тиям,

³⁰ Е́же и сотвори́ша, посла́вше к ста́рцем руко́ю Варна́влею и Са́влею.

Глава 12

¹ Во о́но же вре́мя возложи́ И́род царь ру́це озло́бити не́кия и́же от це́ркве.

² Уби́ же Иа́кова, бра́та Иоа́ннова, мече́м.

³ И ви́дев, я́ко го́де есть Иуде́ем, приложи́ я́ти и Петра́, [бя́ху же дни́е опресно́чнии.]

⁴ Его́же и емь всади́ в темни́цу, преда́в четы́рем четвери́цам во́инов стрещи́ его́, хотя́ по Па́сце извести́ его́ к лю́дем.

⁵ И у́бо Петра́ стрежа́ху в темни́це: моли́тва же бе приле́жна быва́емая от це́ркве к Бо́гу о нем.

⁶ Егда́ же хотя́ше его́ извести́ И́род, в нощи́ той бе Петр спя между́ двема́ во́инома, свя́зан желе́знома у́жема двема́, стра́жие же пред две́рьми стрежа́ху темни́цы.

⁷ И се А́нгел Госпо́день предста́, и свет возсия́ в хра́мине: толкну́в же в ре́бра Петра́, воздви́же его́, глаго́ля: воста́ни вско́ре. И спадо́ша ему́ у́жя желе́зная с руку́.

⁸ Рече́ же А́нгел к нему́: препоя́шися и вступи́ в плесни́цы твоя́. Сотвори́ же та́ко. И глаго́ла ему́: облецы́ся в ри́зу твою́ и после́дствуй ми.

⁹ И изше́д вслед его́ идя́ше и не ве́дяше, я́ко и́стина есть бы́вшее от А́нгела, мня́ше же виде́ние зре́ти.

¹⁰ Проше́дша же пе́рвую стра́жу и втору́ю, приидо́ста ко врато́м желе́зным, вводя́щим во град, я́же о себе́ отверзо́шася и́ма, и изше́дше преидо́ша сто́гну еди́ну, и а́бие отступи́ А́нгел от него́.

¹¹ И Петр быв в себе́, рече́: ны́не вем вои́стинну, я́ко посла́ Бог А́нгела Своего́ и изъя́т мя из руки́ И́родовы и от всего́ ча́яния люде́й иуде́йских.

¹² Смотри́в же прии́де в дом Мари́ин ма́тере Иоа́нновы, нарица́емаго Ма́рка, иде́же бя́ху мно́зи со́брани и моля́щеся.

¹³ Толкну́вшу же Петру́ во врата́ двора́, приступи́ слы́шати отрокови́ца, и́менем Ро́ди,

¹⁴ И позна́вши глас Петро́в, от ра́дости не отве́рзе врат, прите́кши же сказа́ Петра́ стоя́ща пред враты́.

¹⁵ Они́ же к ней ре́ша: бесну́еши ли ся? Она́ же крепля́шеся та́ко бы́ти. Они́ же глаго́лаху: А́нгел его́ есть.

¹⁶ Петр же пребыва́ше толки́й: отве́рзше же ви́деша его́ и ужасо́шася.

¹⁷ Помаа́в же им руко́ю молча́ти, сказа́ им, ка́ко Госпо́дь его́ изведе́ из темни́цы. Рече́ же: возвести́те Иа́кову и бра́тиям сия́. И изше́д и́де во и́но ме́сто.

¹⁸ Бы́вшу же дню, бе молва́ не ма́ла в во́инех, что́ у́бо Петру́ бысть.

¹⁹ И́род же, поиска́в его́ и не обре́т и истяза́в стра́жи, повеле́ отвести́ их. И изше́д от Иуде́и в Кесари́ю, живя́ше.

²⁰ Бе же И́род гне́ваяся на Ти́ряны и Сидо́няны: и́же единоду́шно приидо́ша к нему́, и умоли́вше Вла́ста посте́льника царе́ва, проша́ху ми́ра, поне́же страны́ их от ца́рства его́ пита́хуся.

²¹ В нарече́нный же день И́род, обо́лкся во оде́жду ца́рску и сед на суди́ще пред наро́дом, глаго́лаше к ним.

²² Наро́д же возглаша́ше: глас Бо́жий, а не челове́чь.

²³ Внеза́пу же порази́ его́ А́нгел Госпо́день, зане́ не даде́ сла́вы Бо́гу: и быв червьми́ изъя́ден, издше́.

²⁴ Сло́во же Бо́жие растя́ше и мно́жашеся.

²⁵ Варна́ва же и Савл возврати́стася из Иерусали́ма во Антиохи́ю, испо́лнивше слу́жбу, пое́мше с собо́ю и Иоа́нна, нарица́емаго Ма́рка.

Глава 13

¹ Бя́ху же не́цыи во це́ркви су́щей во Антиохи́и проро́цы и учи́телие: Варна́ва же и Симео́н, нарица́емый Ни́гер, и Луки́й Кирине́анин, и Манаи́н со И́родом четвертовла́стником воспита́нный, и Савл.

² Служа́щим же им Го́сподеви и постя́щимся, рече́ Дух Святы́й: отдели́те Ми Варна́ву и Са́вла на де́ло, на не́же призва́х их.

³ Тогда́ пости́вшеся и помоли́вшеся и возло́жше ру́ки на ня, отпусти́ша их.

⁴ Сия́ у́бо по́слана бы́вша от Ду́ха Свя́та, снидо́ста в Селевки́ю, отту́ду же отплы́ша в Кипр.

⁵ И бы́вше в Салами́не, возвеща́ста сло́во Бо́жие в со́нмищах Иуде́йских, име́ста же и Иоа́нна слугу́.

⁶ Проше́дша же о́стров да́же до Па́фа, обрето́ста не́коего му́жа волхва́ лжепроро́ка Иуде́анина, ему́же и́мя Вариису́с,

⁷ И́же бе со анфипа́том Се́ргием Па́влом, му́жем разу́мным. Сей призва́в Варна́ву и Са́вла, взыска́ услы́шати сло́во Бо́жие.

⁸ Сопротивля́шеся же и́ма Елли́ма волхв, [та́ко бо сказу́ется и́мя его́,] иски́й разврати́ти анфипа́та от ве́ры.

⁹ Савл же, и́же и Па́вел, испо́лнися Ду́ха Свя́та, и воззре́в нань,

¹⁰ Рече́: о, испо́лненне вся́кия льсти и вся́кия зло́бы, сы́не диа́воль, вра́же вся́кия пра́вды, не преста́неши ли развраща́я пути́ Госпо́дни пра́выя?

¹¹ И ны́не, се рука́ Госпо́дня на тя, и бу́деши слеп, не ви́дя со́лнца до вре́мене. Внеза́пу же нападе́ нань мрак и тма, и осяза́я иска́ше вожда́.

¹² Тогда́ ви́дев анфипа́т бы́вшее, ве́рова, дивя́ся о уче́нии Госпо́дни.

¹³ Отве́зшеся же от Па́фа, Па́вел и су́щии с ним, приидо́ша в Перги́ю Памфили́йскую. Иоа́нн же, отлучи́вся от них, возврати́ся во Иерусали́м.

¹⁴ Они́ же, проше́дше от Перги́и, приидо́ша во Антиохи́ю Писиди́йскую, и вше́дше в со́нмище в день суббо́тный, седо́ша.

¹⁵ По чте́нии же зако́на и проро́к, посла́ша нача́льницы со́нмища к ним, глаго́люще: му́жие бра́тие, а́ще есть сло́во в вас утеше́ния к лю́дем, глаго́лите.

¹⁶ Воста́в же Па́вел и помаа́в руко́ю, рече́: му́жие изра́ильтяне и боя́щиися Бо́га, услы́шите.

¹⁷ Бог люде́й сих избра́ отцы́ на́ши и лю́ди вознесе́ в прише́льствии в земли́ Еги́петстей, и мы́шцею высо́кою изведе́ их из нея́.

¹⁸ И до четы́редесяти лет препита́ их в пусты́ни.

¹⁹ И низложи́в язы́к седмь в земли́ Ханаа́нстей, даде́ им в насле́дие зе́млю их.

²⁰ И по сих, я́ко лет четы́реста и пятьдеся́т, даде́ им судии́ до Саму́ила проро́ка.

²¹ И отту́ду проси́ша царя́, и даде́ им Бог Сау́ла сы́на Ки́сова, му́жа от коле́на Вениами́нова, лет четы́редесять.

²² И преста́вль его́, воздви́же им Дави́да в царя́, ему́же и рече́ свиде́тельствовав: обрето́х Дави́да сы́на Иессе́ова, му́жа по се́рдцу Моему́, и́же сотвори́т вся хоте́ния Моя́.

²³ От сего́ се́мене Бог по обетова́нию воздви́же Изра́илю спасе́ние Иису́са.

²⁴ Пропове́давшу Иоа́нну пред лице́м вни́тия Его́ креще́ние покая́ния всем лю́дем изра́илевым.

²⁵ И я́коже скончава́ше Иоа́нн тече́ние, глаго́лаше: кого́ мя непщу́ете бы́ти, несмь аз, но се гряде́т по мне, Ему́же несмь досто́ин разреши́ти реме́нь сапогу́ Его́.

²⁶ Му́жие, бра́тие, сы́нове ро́да Авраа́мля, и и́же в вас, боя́щиися Бо́га, вам сло́во спасе́ния Сего́ посла́ся.

²⁷ Живу́щии бо во Иерусали́ме и кня́зи их сего́ не разуме́вше, и гла́сы проро́ческия, по вся суббо́ты что́мыя, осуди́вше Его́, испо́лниша.

²⁸ И ни еди́ныя вины́ сме́ртныя обре́тше, проси́ша у Пила́та уби́ти Его́.

²⁹ Я́коже сконча́ша вся, я́же о Нем пи́сана, сне́мше с дре́ва, положи́ша во гро́бе.

³⁰ Бог же воскреси́ Его́ от ме́ртвых.

³¹ И́же яви́ся на дни мно́ги совозше́дшим с Ним от Галиле́и во Иерусали́м, и́же ны́не суть свиде́телие Его́ к лю́дем.

³² И мы вам благовеству́ем обетова́ние, бы́вшее ко отце́м, я́ко сие́ Бог испо́лнил есть нам, ча́дом их, воздви́г Иису́са.

³³ Я́коже и во псалме́ второ́м пи́сано есть: Сын Мой еси́ Ты, Аз днесь роди́х Тя.

³⁴ А я́коже воскреси́ Его́ от ме́ртвых, не ктому́ хотя́ща возврати́тися во истле́ние, си́це рече́: я́ко дам вам преподо́бная Дави́дова ве́рная.

³⁵ Те́мже и в друго́м глаго́лет: не да́си Преподо́бному Твоему́ ви́дети истле́ния.

³⁶ Дави́д бо у́бо своему́ ро́ду послужи́в, Бо́жиим сове́том у́спе, и приложи́ся ко отце́м свои́м, и ви́де истле́ние.

³⁷ А Его́же Бог воздви́же, не ви́де истле́ния.

³⁸ Ве́домо у́бо да бу́дет вам, му́жие бра́тие, я́ко Его́ ра́ди вам оставле́ние грехо́в пропове́дается; и от всех, от и́хже не возмого́сте в зако́не Моисе́ове оправди́тися,

³⁹ О сем всяк ве́руяй оправда́ется.

⁴⁰ Блюди́те у́бо, да не прии́дет на вас рече́нное во проро́цех:

⁴¹ Ви́дите, неради́вии, и чуди́теся, и у́зрите и исче́знете: я́ко де́ло Аз соде́лаю во дни ва́шя, ему́же не и́мате ве́ровати, а́ще кто пове́сть вам.

⁴² Исходя́щим же им от со́нмища Иуде́йска, моля́ху язы́цы в другу́ю суббо́ту глаго́латися им глаго́лом сим:

⁴³ Разше́дшуся же собо́ру, после́доваша мно́зи от Иуде́й и чести́вых пришле́ц, Па́влу и Варна́ве, и́же глаго́люще им, увеща́ху их пребыва́ти в благода́ти Бо́жией.

⁴⁴ Во гряду́щую же суббо́ту ма́ло не весь град собра́ся послу́шати сло́ва Бо́жия.

⁴⁵ Ви́девше же Иуде́и наро́ды, испо́лнишася за́висти и вопреки́ глаго́лаху глаго́лемым от Па́вла, сопроти́в глаго́люще и хуля́ще.

⁴⁶ Дерзну́вша же Па́вел и Варна́ва реко́ста: вам бе ле́по пе́рвее глаго́лати сло́во Бо́жие: а поне́же отверго́сте е́ и недосто́йны творите́ са́ми себе́ ве́чному животу́, се обраща́емся во язы́ки.

⁴⁷ Та́ко бо запове́да нам Госпо́дь: положи́х Тя во свет язы́ком, е́же бы́ти Тебе́ во спасе́ние да́же до после́дних земли́.

⁴⁸ Слы́шаще же язы́цы ра́довахуся и сла́вляху сло́во Госпо́дне, и ве́роваша, ели́цы учине́ни бя́ху в жи́знь ве́чную.

⁴⁹ Проноша́шеся же сло́во Госпо́дне по все́й стране́.

⁵⁰ Иуде́и же наусти́ша чести́выя жены́ и благообра́зныя и старе́йшины гра́да, и воздвиго́ша гоне́ние на Па́вла и Варна́ву, и изгна́ша я от преде́л свои́х.

⁵¹ О́на же, отря́сша прах от ног свои́х на них, приидо́ста во Икони́ю.

⁵² Ученицы́ же исполня́хуся ра́дости и Ду́ха Свя́та.

Глава 14

¹ Бы́сть же во Икони́и, вку́пе вни́ти и́ма в со́нмище Иуде́йское и глаго́лати та́ко, я́ко ве́ровати Иуде́ев и Е́ллинов мно́жеству мно́гу.

² Неве́рующии же Иуде́и воздвиго́ша и озло́биша ^[157] ду́ши язы́ков на бра́тию.

³ Дово́льно же у́бо вре́мя пребы́ша дерза́юще о Го́споде, свиде́тельствующем сло́ву благода́ти Своея́ и даю́щем зна́мения и чудеса́ бы́ти рука́ма их.

⁴ Раздели́ша же ся мно́жество гра́да: и о́ви у́бо бя́ху со Иуде́и, о́ви же со Апо́столы.

⁵ И я́коже бы́сть стремле́ние язы́ком же и Иуде́ем с нача́льники их, досади́ти и ка́мением поби́ти их.

⁶ Уве́девша же, прибего́ста во гра́ды Ликао́нския, в Ли́стру и Де́рвию, и во окре́стныя их,

⁷ И та́мо бе́ста благовеству́юща.

⁸ И не́кто муж в Ли́стрех не́мощен нога́ма седя́ше, хром от чре́ва ма́тере своея́ сый, и́же николи́же бе ходи́л.

⁹ Сей слы́шаше Па́вла глаго́люща, и́же воззре́в нань и ви́дев, я́ко ве́ру и́мать здрав бы́ти,

¹⁰ Рече́ ве́лиим гла́сом: тебе́ глаго́лю во и́мя Го́спода Иису́са Христа́, вста́ни на но́гу твою́ прав. И а́бие возскочи́ и хожда́ше.

¹¹ Наро́ди же ви́девше, е́же сотвори́ Па́вел, воздвиго́ша глас свой, ликао́нски глаго́люще: бо́зи уподо́бльшеся челове́ком снидо́ша к нам.

¹² Нарица́ху же у́бо Варна́ву Ди́а, Па́вла же Ерми́а, поне́же той бя́ше нача́льник сло́ва.

¹³ Жрец же Ди́ев, су́щаго пред гра́дом их, приведе́ юнцы́, и принесе́ венцы́ пред врата́, с наро́ды хотя́ше жре́ти.

¹⁴ Слы́шавша же апо́стола Варна́ва и Па́вел, растерза́вша ри́зы своя́, вскочи́ста в наро́д, зову́ща и глаго́люща:

¹⁵ Му́жие, что сия́ твори́те? И мы подобостра́стна есма́ вам челове́ка, благовеству́юща вам, от сих су́етных обраща́тися к Бо́гу жи́ву, И́же сотвори́ не́бо и зе́млю, и мо́ре и вся, я́же в них.

¹⁶ И́же в мимоше́дшия ро́ды оста́вил бе вся язы́ки ходи́ти в путе́х их.

¹⁷ И у́бо не несвиде́тельствована Себе́ оста́ви, благотворя́, с небесе́ нам дожде́вы ^[158] дая́, и времена́ плодоно́сна, исполня́я пи́щею и весе́лием сердца́ на́ша.

¹⁸ И сия́ глаго́люща, едва́ уста́виста наро́ды не жре́ти и́ма, но отыти́ коему́ждо во своя́си. Пребыва́ющема же и́ма и уча́щема,

¹⁹ Приидо́ша от Антиохи́и и Икони́и не́цыи Иуде́е, и стяза́ющемася и́ма с дерзнове́нием, наусти́ша наро́ды отступи́ти от нею́, глаго́люще: я́ко ничто́же и́стинно глаго́лета, но все лже́та. И наусти́вше наро́ды и ка́мением поби́вше Па́вла, извлеко́ша вне гра́да, мня́ще его́ уме́рша.

²⁰ О́крест же ста́вшим его́ ученико́м, воста́в вни́де во гра́д. И нау́трие изы́де с Варна́вою в Де́рвию.

²¹ Благовествова́ста же гра́ду тому́ и научи́ста мно́ги, возврати́стася в Ли́стру и Икони́ю и Антиохи́ю,

²² Утвержда́юща ду́ши ученико́в, моля́ща пребы́ти в ве́ре, и я́ко мно́гими скорбьми́ подоба́ет нам вни́ти в Ца́рствие Бо́жие.

²³ Рукополо́жше же им пресви́теры на вся це́ркви и помоли́вшеся с посто́м, преда́ста их Го́сподеви, в Него́же ве́роваша.

²⁴ И проше́дша Писиди́ю, приидо́ста в Памфили́ю.

²⁵ И глаго́лавша в Перги́и сло́во Госпо́дне, снидо́ста во Аттали́ю.

²⁶ И отту́ду отплы́ста во Антиохи́ю, отню́дуже бе́ста пре́дана благода́ти Бо́жией в де́ло, е́же сконча́ста.

²⁷ Прише́дша же и собра́вша це́рковь, сказа́ста, ели́ка сотвори́ Бог с ни́ма и я́ко отве́рзе язы́ком дверь ве́ры.

²⁸ Пребы́ста же та́мо вре́мя не ма́ло со ученики́.

Глава 15

¹ И не́цыи сше́дше от Иуде́и, уча́ху бра́тию, я́ко а́ще не обре́жетеся по обы́чаю Моисе́ову, не мо́жете спасти́ся.

² Бы́вши же ра́спри и стяза́нию не ма́лу Па́влу и Варна́ве к ним, учини́ша взы́ти Па́влу и Варна́ве и не́ким други́м от них ко Апо́столом и ста́рцем во Иерусали́м о вопроше́нии сем.

³ Они́ же у́бо, предпо́слани бы́вше от Це́ркве, прохожда́ху Финики́ю и Самари́ю, пове́дающе обраще́ние язы́ков, и творя́ху ра́дость ве́лию всей бра́тии.

⁴ Прише́дше же во Иерусали́м, прия́ти бы́ша от це́ркве и Апо́стол и ста́рец, сказа́ша же, ели́ка сотвори́ Бог с ни́ми и я́ко отве́рзе язы́ком дверь ве́ры.

⁵ Воста́ша же не́цыи от е́реси фарисе́йския ве́ровавшии, глаго́люще, я́ко подоба́ет обре́зати их, завещава́ти же блюсти́ зако́н Моисе́ов.

⁶ Собра́шася же Апо́столи и ста́рцы ве́дети о словеси́ сем.

⁷ Мно́гу же взыска́нию бы́вшу, воста́в Петр рече́ к ним: му́жие бра́тие, вы ве́сте, я́ко от дний пе́рвых Бог в нас избра́ усты́ мои́ми услы́шати язы́ком сло́во Благове́стия и ве́ровати.

⁸ И Сердцеве́дец Бог свиде́тельствова им, дав им Ду́ха Свята́го, я́коже и нам.

⁹ И ничто́же разсуди́ между́ на́ми же и о́неми, ве́рою очи́щь сердца́ их.

¹⁰ Ны́не у́бо что искуша́ете Бо́га, хотя́ще возложи́ти и́го на вы́и ученико́м, его́же ни отцы́ на́ши, ни мы возмого́хом понести́?

¹¹ Но благода́тию Го́спода Иису́са Христа́ ве́руем спасти́ся, я́коже и они́.

¹² Умолча́ же все мно́жество и послу́шаху Варна́вы и Па́вла пове́дающих, ели́ка сотвори́ Бог зна́мения и чудеса́ во язы́цех и́ма.

¹³ По умолча́нии же их отвеща́ Иа́ков глаго́ля: му́жие бра́тие, послу́шайте мене́.

¹⁴ Симео́н пове́да, я́ко пре́жде Бог посети́ прия́ти от язы́к лю́ди о и́мени Свое́м.

¹⁵ И сему́ согласу́ют словеса́ проро́к, я́коже пи́шет:

¹⁶ По сих обращу́ся и сози́жду кров Дави́дов па́дший, и раско́паная его́ сози́жду и испра́влю его́,

¹⁷ Я́ко да взы́щут про́чии челове́цы Го́спода, и вси язы́цы, в ни́хже нарече́ся и́мя Мое́, глаго́лет Госпо́дь, творя́й сия́ вся.

¹⁸ Разу́мна от ве́ка суть Бо́гови вся дела́ Его́.

¹⁹ Сего́ ра́ди аз сужду́ не стужа́ти от язы́к обраща́ющимся к Бо́гу,

²⁰ Но запове́дати им огреба́тися от треб и́дольских и от блуда́ и уда́вленины и от кро́ве, и ели́ка неуго́дна себе́ бы́ти, ины́м не твори́ти.

²¹ Моисе́й бо от родо́в дре́вних по вся гра́ды пропове́дающия его́ и́мать, в со́нмищах по вся суббо́ты что́мый.

²² Тогда́ изво́лися Апо́столом и ста́рцем со все́ю це́рковию, избра́вше му́жа от них, посла́ти во Антиохи́ю с Па́влом и Варна́вою, Иу́ду нарица́емаго Варса́ву, и Си́лу, му́жа наро́чита в бра́тии.

²³ Написа́вше рука́ма их сия́: Апо́столи и ста́рцы и бра́тия, су́щим во Антиохи́и и Сири́и и Килики́и бра́тии, и́же от язы́к, о Го́споде ра́доватися.

²⁴ Поне́же у́бо слы́шахом, я́ко не́цыи от нас изше́дше возмути́ша вас словесы́, развраща́юще ду́ши ва́ша, глаго́люще обре́затися и блюсти́ зако́н, и́мже мы не завеща́хом,

²⁵ Изво́лися нам собра́вшимся единоду́шно, избра́нныя му́жи посла́ти к вам, с возлю́бленныма на́шима Варна́вою и Па́влом,

²⁶ Челове́кома преда́вшема душа́ своя́ о и́мени Го́спода на́шего Иису́са Христа́.

²⁷ Посла́хом у́бо Иу́ду и Си́лу, и тех сло́вом сказу́ющих та́яжде.

²⁸ Изво́лися бо Свято́му Ду́ху и нам, ничто́же мно́жае возложи́ти вам тяготы́, ра́зве ну́ждных сих:

²⁹ Огреба́тися от идоложе́ртвенных и кро́ве, и уда́вленины, и блуда́, и ели́ка не хо́щете вам бы́ти, други́м не твори́те. От ни́хже соблюда́юще себе́, до́бре сотворите́, здра́вствуйте.

³⁰ Они́ же у́бо по́слани бы́вше приидо́ша во Антиохи́ю, и собра́вше наро́д, вда́ша посла́ние.

³¹ Проче́тше же, возра́довашася о утеше́нии.

³² Иу́да же и Си́ла, и та проро́ка су́ща, сло́вом мно́зем уте́шиста бра́тию и утверди́ста.

³³ Пребы́вше же та́мо вре́мя, отпуще́на бы́ста с ми́ром от бра́тий ко Апо́столом.

³⁴ Изво́лися же Си́ле пребы́ти та́мо, Иу́да же возврати́ся во Иерусали́м.

³⁵ Па́вел же и Варна́ва живя́ста во Антиохи́и, уча́ща и благовеству́юща сло́во Госпо́дне, и со ине́ми мно́гими.

³⁶ По не́ких же днех рече́ Па́вел к Варна́ве: возвра́щшеся подоба́ет посети́ти бра́тию на́шу во всех гра́дех, в ни́хже пропове́дахом сло́во Госпо́дне, ка́ко пребыва́ют.

³⁷ Варна́ва же восхоте́ поя́ти с собо́ю Иоа́нна нарица́емаго Ма́рка.

³⁸ Па́вел же глаго́лаше отсту́пльшаго от на́ю от Памфили́и и не ше́дшаго с на́ма на де́ло, на не́же положе́ни бы́хом, не поя́ти сего́ с собо́ю.

³⁹ Бысть у́бо ра́спря, я́ко отлучи́тися и́ма от себе́: Варна́ва у́бо пое́м Ма́рка отплы́ в Кипр.

⁴⁰ Па́вел же избра́в Си́лу изы́де пре́дан благода́ти Бо́жией от бра́тий.

⁴¹ Прохожда́ше же Сири́ю и Килики́ю, утвержда́я це́ркви.

Глава 16

¹ Прии́де же в Де́рвию и Ли́стру. И се, учени́к не́кий бе ту, и́менем Тимофе́й, сын жены́ не́кия Иуде́аныни ве́рны, отца́ же Е́ллина:

² И́же свиде́тельствован бе от су́щих в Ли́стрех и Икони́и бра́тии.

³ Сего́ восхоте́ Па́вел с собо́ю изы́ти: и прие́мь обре́за его́ Иуде́й ра́ди, су́щих на ме́стех о́нех: ве́дяху бо вси отца́ его́, я́ко Е́ллин бя́ше.

⁴ И я́коже прохожда́ху гра́ды, предая́ше им храни́ти уста́вы сужде́нныя от Апо́стол и ста́рец, и́же во Иерусали́ме.

⁵ Це́ркви же утвержда́хуся ве́рою и прибыва́ху в число́ по вся дни.

⁶ Проше́дше же Фриги́ю и Галати́йскую страну́, возбране́ни бы́ша от Свята́го Ду́ха глаго́лати сло́во во Аси́и.

⁷ Прише́дше же в Миси́ю, покуша́хуся в Вифини́ю поити́: и не оста́ви их Дух.

⁸ Преше́дше же Миси́ю, снидо́ша в Троа́ду.

⁹ И виде́ние в нощи́ яви́ся Па́влу: муж не́кий бе Македо́нянин стоя́, моля́ его́ и глаго́ля: прише́д в Македо́нию, помози́ нам.

¹⁰ И я́коже виде́ние ви́де, а́бие взыска́хом изы́ти в Македо́нию, разуме́вше, яко призва́ ны Госпо́дь благовести́ти им.

¹¹ Отве́зшеся же от Троа́ды, приидо́хом в Самофра́к, во у́трие же в Неапо́ль,

¹² Отту́ду же в Филиппу́сы, и́же есть пе́рвый град ча́сти Македо́нии, коло́ниа. Бе́хом же в том гра́де пребыва́юще дни не́кия.

¹³ В день же суббо́тный изыдо́хом вон из гра́да при реце́, иде́же мня́шеся моли́твенница бы́ти, и се́дше глаго́лахом к собра́вшимся жена́м.

¹⁴ И не́кая жена́, и́менем Лиди́а, порфиропрода́льница от гра́да Фиати́рскаго, чту́щи Бо́га, послу́шаше: е́йже Госпо́дь отве́рзе се́рдце внима́ти глаго́лемым от Па́вла.

¹⁵ Я́коже крести́ся та и дом ея́, моля́ше ны глаго́лющи: а́ще смотри́сте мя ве́рну Го́сподеви бы́ти, вше́дше в дом мой, пребу́дите. И прину́ди нас.

¹⁶ Бысть же иду́щим нам на моли́тву, отрокови́ца не́кая иму́щая дух пытли́в сре́те нас, я́же стяжа́ние мно́го дая́ше господе́м свои́м волхву́ющи.

¹⁷ Та после́довавши Па́влу и нам, взыва́ше глаго́лющи: си́и челове́цы раби́ Бо́га Вы́шняго суть, и́же возвеща́ют нам путь спасе́ния.

¹⁸ Се же творя́ше на мно́ги дни. Стужи́в же си Па́вел, и обра́щся, ду́хови рече́: запреща́ю ти и́менем Иису́са Христа́, изы́ди из нея́. И изы́де в том часе́.

¹⁹ Ви́девше же госпо́дие ея́, я́ко изы́де наде́жда тяжа́ния их, пое́мше Па́вла и Си́лу, влеко́ша на торг ко князе́м.

²⁰ И вве́дше их к воево́дам, ре́ша: си́и челове́цы возмуща́ют град наш, иуде́е су́ще.

²¹ И завещава́ют обы́чаи, я́же не досто́ит нам приима́ти, ни твори́ти, ри́мляном су́щим.

²² И сни́деся наро́д на них, и воево́ды растерза́вше им ри́зы, веля́ху па́лицами би́ти их.

²³ Мно́ги же да́вше им ра́ны, всади́ша в темни́цу, завеща́вше темни́чному стра́жу тве́рдо стрещи́ их.

²⁴ И́же таково́ завеща́ние прие́м, всади́ их во вну́треннюю темни́цу, и но́ги их заби́ в кла́де.

²⁵ В полу́нощи же Па́вел и Си́ла моля́щася поя́ста Бо́га, послу́шаху же их ю́зницы.

²⁶ Внеза́пу же трус бысть ве́лий, я́ко поколеба́тися основа́нию темни́чному, отверзо́ша же ся а́бие две́ри вся, и всем ю́зы ослабе́ша.

²⁷ Возбу́ждься же темни́чный страж, и ви́дев отве́рсты две́ри темни́цы, извле́к нож, хотя́ше себе́ уби́ти, мня избе́гша ю́зники.

²⁸ Возгласи́ же гла́сом ве́лиим Па́вел, глаго́ля: ничто́же сотвори́ себе́ зла, вси бо есмы́ зде.

²⁹ Проси́в же свещи́, вскочи́, и тре́петен быв, припаде́ к Па́влу и Си́ле.

³⁰ И изве́д их вон, рече́: госпо́дие, что ми подоба́ет твори́ти, да спасу́ся?

³¹ О́на же реко́ста: ве́руй в Го́спода Иису́са Христа́, и спасе́шися ты и весь дом твой.

³² И глаго́ласта ему́ сло́во Госпо́дне, и всем и́же в дому́ его́.

³³ И пое́м я́ в той же час но́щи, измы́ от ран, и крести́ся сам и свои́ ему́ вси а́бие.

³⁴ Введ же я́ в дом свой, поста́ви трапе́зу, и возра́довася со всем до́мом свои́м, ве́ровав Бо́гу.

³⁵ Дню же бы́вшу, посла́ша воево́ды па́личники, глаго́люще: отпусти́ челове́ка о́на.

³⁶ Сказа́ же темни́чный страж словеса́ сия́ Па́влу, я́ко посла́ша воево́ды, да отпуще́на бу́дета: ны́не у́бо изше́дша, иди́та с ми́ром.

³⁷ Па́вел же рече́ к ним: би́вше на́ю пред людьми́, неосужде́нна челове́ка Ри́млянина су́ща, всади́ша в темни́цу, и ны́не о́тай изво́дят на́ю? Ни у́бо, но да прише́дше са́ми изведу́т на́ю.

³⁸ Сказа́ша же па́личницы воево́дам глаго́лы сия́: и убоя́шася слы́шавше, я́ко Ри́млянина еста́.

³⁹ И прише́дше умоли́ша их и изве́дше моля́ху изы́ти из гра́да.

⁴⁰ Изше́дша же из темни́цы приидо́ста к Лиди́и, и ви́девша бра́тию, уте́шиста их и изыдо́ста.

Глава 17

¹ Преше́дша же Амфипо́ль и Аполло́нию, внидо́ста в Солу́нь, иде́же бе со́нмище Иуде́йское.

² По обы́чаю же своему́ Па́вел вни́де к ним и по суббо́ты три стяза́шеся с ни́ми от Писа́ний,

³ Сказу́я и предлага́я им, я́ко Христу́ подоба́ше пострада́ти и воскре́снути от ме́ртвых, и я́ко Сей Иису́с, Его́же аз пропове́даю вам, есть Христо́с.

⁴ И не́цыи от них ве́роваша и приложи́шася к Па́влу и Си́ле, от чести́вых Е́ллин мно́жество мно́го и от жен благоро́дных не ма́ло.

⁵ Зазре́вше же непоко́ршиися Иуде́е и прие́мше крамо́льники не́кия му́жи злы́я, и собра́вше наро́д, мо́лвяху по гра́ду, наше́дше же на дом Иассо́нов, иска́ху их извести́ к наро́ду.

⁶ Не обре́тше же их, влеча́ху Иассо́на и не́кия от бра́тий ко градонача́льником, вопию́ще, я́ко и́же разврати́ша вселе́нную, си́и и зде приидо́ша,

⁷ И́же прия́т Иассо́н. И си́и вси проти́вно веле́нием ке́саревым творя́т, царя́ глаго́люще ино́го бы́ти, Иису́са.

⁸ Смято́ша же наро́д и градонача́льники слы́шащия сия́.

⁹ Взе́мше же дово́льное от Иассо́на и от про́чих, отпусти́ша их.

¹⁰ Бра́тия же а́бие в нощи́ отсла́ша Па́вла и Си́лу в Бе́рию, и́же прише́дша, идо́ша в собо́р Иуде́йский.

¹¹ Си́и же бя́ху благоро́днейши живу́щих в Солу́не, и́же прия́ша сло́во со всем усе́рдием, по вся дни разсужда́юще Писа́ния, а́ще суть сия́ та́ко.

¹² Мно́зи у́бо от них ве́роваша, и от е́ллинских жен благообра́зных и муже́й не ма́ло.

¹³ И я́ко уве́даша и́же от Солу́ня иуде́е, я́ко и в Бе́рии пропове́дася от Па́вла сло́во Бо́жие, приидо́ша и та́мо дви́жуще и смуща́юще наро́ды.

¹⁴ А́бие же тогда́ бра́тия отпусти́ша Па́вла ити́ на помо́рие, оста́ста же Си́ла и Тимофе́й та́мо.

¹⁵ Провожда́ющии же Па́вла ведо́ша его́ да́же до Афи́н, и прие́мше за́поведь к Си́ле и Тимофе́ю, да я́ко скоре́е прии́дут к нему́, изыдо́ша.

¹⁶ Во Афи́нех же жду́щу их Па́влу, раздража́шеся дух его́ в нем зря́щем и́дол полн сущь град.

¹⁷ Стяза́шеся же у́бо на со́нмищи со иуде́и и с чести́выми, и на то́ржищи по вся дни с приключа́ющимися.

¹⁸ Не́цыи же от епику́р и от сто́ик филосо́ф стяза́хуся с ним, и не́цыи глаго́лаху: что у́бо хо́щет суесло́вивый сей глаго́лати? Ини́и же: чужди́х бого́в мни́тся пропове́дник бы́ти, я́ко Иису́са и воскресе́ние благовествова́ше им.

¹⁹ Пое́мше же его́, ведо́ша на ареопа́г, глаго́люще: мо́жем ли разуме́ти, что но́вое сие́ глаго́лемое тобо́ю уче́ние?

²⁰ Стра́нна бо не́кая влага́еши во ушеса́ на́ша, хо́щем у́бо разуме́ти, что хотя́т сия́ бы́ти?

²¹ [Афине́и же вси и приходя́щии стра́ннии ни во что́же и́но упражня́хуся, ра́зве глаго́лати что или́ слы́шати но́вое.]

²² Став же Па́вел посреде́ ареопа́га, рече́: му́жие афине́йстии, по всему́ зрю вы а́ки благочести́выя.

²³ Проходя́ бо и согля́дая чествова́ния ва́ша, обрето́х и ка́пище, на не́мже бе напи́сано: неве́домому Бо́гу. Его́же у́бо не ве́дуще благоле́пно чтете́, Сего́ аз пропове́дую вам.

²⁴ Бог сотвори́вый міръ и вся, я́же в нем, Сей небесе́ и земли́ Госпо́дь сый, не в рукотворе́нных хра́мех живе́т,

²⁵ Ни от рук челове́ческих угожде́ния прие́млет, тре́буя что, Сам дая́ всем живо́т и дыха́ние и вся.

²⁶ Сотвори́л же есть от еди́ныя кро́ве весь язы́к челове́чь, жи́ти по всему́ лицу́ земно́му, уста́вив предучине́ная времена́ и преде́лы селе́ния их,

²⁷ Взыска́ти Го́спода, да поне́ ося́жут Его́ и обря́щут, я́ко не дале́че от еди́наго коего́ждо нас су́ща.

²⁸ О Нем бо живе́м и дви́жемся и есмы́, я́коже и не́цыи от ва́ших кни́жник реко́ша: Сего́ бо и род есмы́.

²⁹ Род у́бо су́ще Бо́жий, не до́лжни есмы́ непщева́ти подо́бно бы́ти Божество́ зла́ту, или́ сребру́, или́ ка́меню худо́жне начерта́нну, и смышле́нию челове́чу.

³⁰ Ле́та у́бо неве́дения презира́я Бог, ны́не повелева́ет челове́ком всем всю́ду пока́ятися.

³¹ Зане́ уста́вил есть день, во́ньже хо́щет суди́ти вселе́нней в пра́вде, о Му́же, Его́же предуста́ви, ве́ру подая́ всем, воскреси́в Его́ от ме́ртвых.

³² Слы́шавше же воскресе́ние ме́ртвых, о́вии у́бо руга́хуся, о́вии же ре́ша: да слы́шим тя па́ки о сем.

³³ И та́ко Па́вел изы́де от среды́ их.

³⁴ Не́цыи же му́жие прилепи́вшеся ему́, ве́роваша, в ни́хже бе и Диони́сий Ареопаги́тский, и жена́ и́менем Да́марь, и друзи́и с ни́ми.

Глава 18

¹ По сих же отлучи́вся Па́вел от Афи́н, прии́де в Кори́нф.

² И обре́те не́коего иуде́анина и́менем Аки́лу, По́нтянина ро́дом, но́во прише́дша от Итали́и, и Приски́ллу жену́ его́, [зане́ повеле́л бя́ше Клавди́й отлучи́тися всем Иуде́ем от Ри́ма,] прии́де к ним,

³ И зане́ единохудо́жником бы́ти им, пребы́сть у них и де́лаше, бя́ху бо скинотво́рцы хи́тростию.

⁴ Стяза́шеся же на со́нмищах по вся суббо́ты и препира́ше иуде́и и е́ллины.

⁵ И я́коже снидо́ста от Македо́нии Си́ла же и Тимофе́й, тужа́ше ду́хом Па́вел, свиде́тельствуя иуде́ом Иису́са бы́ти Христа́.

⁶ Проти́вящимся же им и ху́лящим, отря́с ри́зы своя́, рече́ к ним: кровь ва́ша на глава́х ва́ших, чист аз, отны́не во язы́ки иду́.

⁷ И преше́д отту́ду, прии́де в дом не́коего и́менем Иу́ста, чту́ща Бо́га, ему́же хра́мина бе вскрай со́нмища.

⁸ Крисп же нача́льник собо́ра ве́рова Го́сподеви со всем до́мом свои́м, и мно́зи от Кори́нфян слы́шавше ве́роваху и креща́хуся.

⁹ Рече́ же Госпо́дь в виде́нии нощно́м Па́влу: не бо́йся, но глаго́ли и да не умо́лкнеши,

¹⁰ Зане́ Аз есмь с тобо́ю, и никто́же приложи́т озло́бити тя, зане́ лю́дие суть Ми мно́зи во гра́де сем.

¹¹ Седя́ше же та́мо ле́то и ме́сяц шесть, учя́ в них сло́ву Бо́жию.

¹² Галлио́ну же анфипа́ту су́щу во Аха́ии, нападо́ша единоду́шно Иуде́и на Па́вла и приведо́ша его́ на суди́лище,

¹³ Глаго́люще, я́ко проти́ву зако́ну сей увещава́ет челове́ки чти́ти Бо́га.

¹⁴ Хотя́щу же Па́влу отве́рсти уста́, рече́ Галлио́н ко Иуде́ем: а́ще бы непра́вда была́ ка́я или́ де́ло зло́е, о, Иуде́е, по сло́ву послу́шал бых вас.

¹⁵ А́ще ли же стяза́ния суть о словеси́ и о и́менех и о зако́не ва́шем, ве́дите са́ми: судия́ бо аз сим не хощу́ бы́ти.

¹⁶ И изгна́ их от суди́лища.

¹⁷ Е́мше же вси Е́ллини Сосфе́на нача́льника собо́ра, бия́ху пред суди́лищем: и ни еди́но о сих Галлио́ну раде́ние бысть.

¹⁸ Па́вел же, еще́ пребы́в дни дово́льны и целова́в бра́тию, отплы́ в Сири́ю [и с ним Аки́ла и Приски́лла], остри́г главу́ в Ке́гхреих: обре́кся бо бе.

¹⁹ Приста́ же во Ефе́се и тех оста́ви та́мо, сам же вшед в со́нмище, стяза́шеся со Иуде́и.

²⁰ Моля́щим же им его́ на мно́го вре́мя пребы́ти у них, не изво́ли,

²¹ Но отрече́ся им, глаго́ля, я́ко подоба́ет ми вся́ко пра́здник гряду́щий сотвори́ти во Иерусали́ме: па́ки же возвращу́ся к вам, Бо́гу хотя́щу. И отвезе́ся от Ефе́са: Аки́ла же и Приски́лла оста́ша во Ефе́се.

²² И соше́д в Кесари́ю, возше́д и целова́в це́рковь, сни́де во Антиохи́ю.

²³ И сотво́рь вре́мя не́кое, изы́де, проходя́ поря́ду Галати́йскую страну́ и Фриги́ю, утвержда́я вся ученики́.

²⁴ Иуде́анин же не́кто, Аполло́с и́менем, алекса́ндрянин ро́дом, муж слове́сен, прии́де во Ефе́с, си́лен сый в кни́гах.

²⁵ Сей бе оглаше́н пути́ Госпо́дню, и горя́ ду́хом, глаго́лаше и уча́ше изве́стно я́же о Го́споде, ве́дый то́кмо креще́ние Иоа́нново.

²⁶ Сей же нача́т дерза́ти на со́нмищах. Слы́шавша же его́ Аки́ла и Приски́лла, прия́ша его́ и изве́стнее тому́ сказа́ша путь Госпо́день.

²⁷ Хотя́щу же ему́ преити́ во Аха́ию, предпосла́вше бра́тия написа́ша ученико́м прия́ти его́, и́же прише́д та́мо посо́бствова мно́го ве́ровавшим благода́тию.

²⁸ Тве́рдо бо иуде́и не престая́ облича́ше пред людьми́, сказу́я Писа́ньми, Иису́са бы́ти Христа́.

Глава 19

¹ Бысть же внегда́ бы́ти Аполло́су в Кори́нфе, Па́влу же, проше́дшу вы́шния страны́, приити́ во Ефе́с, и обре́т не́кия ученики́,

² Рече́ к ним: а́ще у́бо Дух Свят прия́ли есте́, ве́ровавше? Они́ же ре́ша к нему́: но ниже́, а́ще Дух Святы́й есть, слы́шахом.

³ Рече́ же к ним: во что у́бо крести́стеся? Они́ же реко́ша: во Иоа́нново креще́ние.

⁴ Рече́ же Па́вел: Иоа́нн у́бо крести́ креще́нием покая́ния, лю́дем глаго́ля: во Гряду́щаго по нем да ве́руют, си́речь во Христа́ Иису́са.

⁵ Слы́шавше же, крести́шася во И́мя Го́спода Иису́са.

⁶ И возло́жшу Па́влу на ня ру́це, прии́де Дух Святы́й на ня: глаго́лаху же язы́ки и проро́чествоваху.

⁷ Бя́ше же всех муже́й я́ко двана́десять.

⁸ Вшед же в со́нмище, дерза́ше, не обину́яся, три ме́сяцы бесе́дуя и уверя́я я́же о Ца́рствии Бо́жии.

⁹ И я́коже не́цыи ожесточа́хуся и пря́хуся, злосло́вяще путь Госпо́день пред наро́дом, отсту́пль от них отлучи́ ученики́, по вся дни стяза́яся во учи́лищи мучи́теля ^[159] не́коего.

¹⁰ Сие́ же бысть два ле́та, я́ко всем живу́щим во Аси́и слы́шати сло́во Го́спода Иису́са, Жидо́м же и Е́ллином.

¹¹ Си́лы же непро́сты творя́ше Бог рука́ма Па́вловыма,

¹² Я́ко и на неду́жныя наноси́ти от (по́та) те́ла его́ главотя́жи и убру́сцы, и исцели́тися им от неду́г, и духо́м лука́вым исходи́ти от них.

¹³ Нача́ша же не́цыи от скита́ющихся Иуде́й обая́нник ^[160] именова́ти над иму́щими ду́хи лука́выя и́мя Го́спода Иису́са, глаго́люще: заклина́ем вы Иису́сом, Его́же Па́вел пропове́дует.

¹⁴ Бя́ху же не́цыи сы́нове Ске́вы Иуде́анина архиере́а се́дмь, и́же сие́ творя́ху.

¹⁵ Отвеща́в же дух лука́вый, рече́: Иису́са зна́ю, и Па́вла свем, вы́ же кто́ есте́?

¹⁶ И скачя́ на них челове́к, в не́мже бе дух лука́вый, и одоле́в им, укрепи́ся на них, я́коже наги́м и ура́неным избежа́ти от хра́ма о́наго.

¹⁷ Сие́ же бысть разу́мно всем живу́щим во Ефе́се Иуде́ем же и Е́ллином, и нападе́ страх на всех их, и велича́шеся и́мя Го́спода Иису́са.

¹⁸ Мно́зи же от ве́ровавших прихожда́ху, испове́дающе и сказу́юще дела́ своя́.

¹⁹ Дово́льни же от сотво́рших чародея́ния, собра́вше кни́ги своя́, сжига́ху пред все́ми: и сложи́ша це́ны их и обрето́ша сребра́ пять тем.

²⁰ Си́це кре́пко сло́во Госпо́дне растя́ше и крепля́шеся.

²¹ И я́коже сконча́шася сия́, положи́ Па́вел в ду́се, проше́д Македо́нию и Аха́ию, ити́ во Иерусали́м, рек, я́ко бы́вшу ми та́мо, подоба́ет ми и Рим ви́дети.

²² Посла́в же в Македо́нию два от служа́щих ему́, Тимофе́а и Ера́ста, сам же пребы́сть вре́мя во Аси́и.

²³ Бысть же во вре́мя о́но молва́ не ма́ла о пути́ Госпо́дни.

²⁴ Дими́трий бо не́кто и́менем, среброкова́чь, творя́й хра́мы сре́бряны Артеми́де, дая́ше хитреце́м де́лание ^[161] не ма́ло.

²⁵ И́хже собра́в и и́ны сицевы́х веще́й де́латели, рече́: му́жие, ве́сте, я́ко от сего́ де́лания дово́льство житию́ на́шему есть.

²⁶ И ви́дите и слы́шите, я́ко не то́кмо Ефе́с, но ма́ло не всю Аси́ю Па́вел сей препре́в, обрати́ мног наро́д, глаго́ля, я́ко не суть бо́зи, и́же рука́ми челове́ческими быва́ют.

²⁷ Не то́кмо же сия́ беду́ прие́млет на́ша часть, е́же бы во обличе́ние не приити́, но дабы и вели́кия боги́ни Артеми́ды храм ни во что́же не вмени́лся, и́мать же разори́тися и вели́чество ея́, ю́же вся Аси́а и вселе́нная почита́ет.

²⁸ Слы́шавше же и бы́вше испо́лнени я́рости, вопия́ху глаго́люще: вели́ка Артеми́да Ефе́сская.

²⁹ И испо́лнися град весь мяте́жа: устреми́шася же единоду́шно на позо́рище, восхи́щше Га́иа и Ариста́рха Македо́няны, дру́ги ^[162] Па́вловы.

³⁰ Па́влу же хотя́щу вни́ти в наро́д, не оставля́ху его́ ученицы́.

³¹ Не́цыи же от Аси́йских нача́льник, су́ще ему́ дру́зи, посла́вше к нему́, моля́ху не вда́ти себе́ в позо́р.

³² Друзи́и же у́бо и́но не́что вопия́ху: бе́ бо собра́ние смуще́но, и мно́жайшии от них не ве́дяху, чесо́ ра́ди собра́шася.

³³ От наро́да же избра́ша Алекса́ндра, изве́дшим его́ Иуде́ем. Алекса́ндр же, помаа́в руко́ю, хотя́ше отвеща́ти наро́ду.

³⁴ Разуме́вше же, я́ко Иуде́анин есть, глас бысть еди́н от всех, я́ко на два часа́ вопию́щих: вели́ка Артеми́да Ефе́сская.

³⁵ Ути́шив же кни́жник наро́д, рече́: му́жие Ефе́сстии, кто́ бо есть челове́к, и́же не весть, я́ко Ефе́сский град служи́тель есть вели́кия боги́ни Артеми́ды и Диопе́та?

³⁶ Без вся́каго у́бо прекосло́вия сим си́це су́щим, потре́бно есть вам безмо́лвным бы́ти и ничто́же безчи́нно твори́ти.

³⁷ Приведо́сте бо му́жей сих, ни храм [Артеми́дин] окра́дших, ниже́ боги́ню ва́шу ху́лящих.

³⁸ А́ще у́бо Дими́трий и и́же с ним худо́жницы и́мут к кому́ сло́во, суды́ суть и анфипа́ти суть: да пое́млют друг на дру́га.

³⁹ А́ще ли же что́ о ины́х и́щете, в зако́нном собра́нии разреши́тся.

⁴⁰ И́бо бе́дствуем порица́еми бы́ти о крамоле́ дне́шней, ни еди́ней вине́ су́щей, о не́йже возмо́жем возда́ти сло́во стремле́ния сего́. И сия рек распусти́ собра́вшийся наро́д.

Глава 20

¹ По утише́нии же молвы́, призва́в Па́вел ученики́, уте́шив и целова́в их, изы́де ити́ в Македо́нию.

² Проше́д же страны́ о́ны и уте́шив их сло́вом мно́гим, прии́де во Елла́ду.

³ Пожи́в же ме́сяцы три, бы́вшу на́нь наве́ту от Иуде́й, хотя́щу отвезти́ся в Сири́ю, бысть хоте́ние возврати́тися сквозе́ Македо́нию.

⁴ После́дова же ему́ да́же до Аси́и Сосипа́тр Пи́рров Бе́рянин, Солу́няне же Ариста́рх и Секу́нд, и Гаи́й Де́рвянин и Тимофе́й, Аси́ане же Ти́хик и Трофи́м.

⁵ Си́и предше́дше жда́ху нас в Троа́де.

⁶ Мы же отвезо́хомся по днех опресно́чных от Фили́пп и приидо́хом к ним в Троа́ду во дне́х пяти́, иде́же пребы́хом дни́й се́дмь.

⁷ Во еди́ну же от суббо́т, собра́вшимся ученико́м преломи́ти хлеб, Па́вел бесе́доваше к ним, хотя́ изы́ти нау́трие, простре́ же сло́во до полу́нощи.

⁸ Бя́ху же свещи́ мно́ги в го́рнице, иде́же бе́хом со́брани.

⁹ Седя́ же не́кто ю́ноша, и́менем Евти́х, во окне́, отягче́н сном глубо́ким, глаго́лющу Па́влу о мно́зе, прекло́нься от сна, паде́ от трекро́вника до́лу, и взя́ша его́ ме́ртва.

¹⁰ Соше́д же Па́вел нападе́ нань, и обе́м его́ рече́: не мо́лвите, и́бо душа́ его́ в нем есть.

¹¹ Возше́д же и прело́мль хлеб и вкушь, дово́льно же бесе́довав да́же до зари́, и та́ко изы́де.

¹² Приведо́ша же о́трока жи́ва и уте́шишася не ма́ло.

¹³ Мы же, прише́дше в кора́бль, отвезо́хомся во А́ссон, отту́ду хотя́ще поя́ти Па́вла: та́ко бо нам бе повеле́л, хотя́ сам пе́ш ити́.

¹⁴ И я́коже сни́деся с на́ми во А́ссоне, взе́мше его́ приидо́хом в Митили́н.

¹⁵ И отту́ду отве́зшеся, во у́трие приста́хом проти́ву Хи́ю, в други́й же отвезо́хомся в Са́мон, и пребы́вше в Трогилли́и, в гряду́щий же день приидо́хом в Мили́т.

¹⁶ Суди́ бо Па́вел ми́мо ити́ Ефе́с, я́ко да не бу́дет ему́ закосне́ти во Аси́и, тща́ше бо ся, а́ще возмо́жно бу́дет, в день Пятьдеся́тный бы́ти во Иерусали́ме.

¹⁷ От Мили́та же посла́в во Ефе́с, призва́ пресви́теры церко́вныя.

¹⁸ И я́коже приидо́ша к нему́, рече́ к ним: вы ве́сте, я́ко от пе́рваго дне, отне́лиже приидо́х во Аси́ю, ка́ко с ва́ми все вре́мя бых,

¹⁹ Рабо́тая Го́сподеви со вся́ким смиреному́дрием и мно́гими слеза́ми и напа́стьми, прилучи́вшимися мне от Иуде́йских наве́т.

²⁰ Я́ко ни в чесо́м от поле́зных обину́хся, е́же сказа́ти вам и научи́ти вас пред людьми́ и по домо́м,

²¹ Засвиде́тельствуя Иуде́ем же и Е́ллином е́же к Бо́гу покая́ние и ве́ру я́же в Го́спода на́шего Иису́са Христа́.

²² И ны́не, се, аз свя́зан Ду́хом гряду́ во Иерусали́м, я́же в нем хотя́щая приключи́тися мне не ве́дый,

²³ То́чию я́ко Дух Святы́й по вся гра́ды свиде́тельствует, глаго́ля, я́ко у́зы мене́ и ско́рби ждут.

²⁴ Но ни еди́но же попече́ние творю́, ниже́ и́мам ду́шу мою́ че́стну себе́, ра́зве е́же сконча́ти тече́ние мое́ с ра́достию и слу́жбу, ю́же прия́х от Го́спода Иису́са, засвиде́тельствовати Ева́нгелие благода́ти Бо́жия.

²⁵ И ны́не, се, аз ве́м, я́ко ктому́ не у́зрите лица́ моего́ вы вси́, в ни́хже проидо́х пропове́дуя Ца́рствие Бо́жие.

²⁶ Те́мже свиде́тельствую вам во дне́шний день, я́ко чист аз от кро́ве всех.

²⁷ Не обину́хся бо сказа́ти вам всю во́лю Бо́жию.

²⁸ Внима́йте у́бо себе́ и всему́ ста́ду, в не́мже вас Дух Святы́й поста́ви епи́скопы, пасти́ Це́рковь Го́спода и Бо́га, ю́же стяжа́ Кро́вию Свое́ю.

²⁹ Аз бо вем сие́, я́ко по отше́ствии мое́м вни́дут во́лцы тя́жцы в вас, не щадя́щии ста́да.

³⁰ И от вас саме́х воста́нут му́жиеглаго́лющии развраще́ная, е́же отторга́ти ученики́ вслед себе́.

³¹ Сего́ ра́ди бди́те, помина́юще, я́ко три ле́та нощь и день не престая́х уча́ со слеза́ми еди́наго кого́ждо вас.

³² И ны́не предаю́ вас, бра́тие, Бо́гови и сло́ву благода́ти Его́, могу́щему назда́ти и да́ти вам насле́дие во освяще́нных всех.

³³ Сребра́ или́ зла́та или́ риз ни еди́наго возжела́х.

³⁴ Са́ми ве́сте, я́ко тре́бованию моему́ и су́щим со мно́ю послужи́сте ру́це мои́ си́и.

³⁵ Вся сказа́х вам, я́ко та́ко тружда́ющимся подоба́ет заступа́ти немощны́я, помина́ти же сло́во Го́спода Иису́са, я́ко Сам рече́: блаже́ннее есть па́че дая́ти, не́жели приима́ти.

³⁶ И сия́ рек, прекло́нь коле́на своя́, со все́ми и́ми помоли́ся.

³⁷ Мно́г же бысть плачь всем: и напа́дше на вы́ю Па́влову, облобыза́ху его́,

³⁸ Скорбя́ще наипа́че о словеси́, е́же рече́, я́ко ктому́ не и́мут лица́ его́ узре́ти. Провожда́ху же его́ в кора́бль.

Глава 21

¹ И я́коже бысть отвезти́ся нам, отто́ргшимся от них, пря́мо ше́дше приидо́хом в Ко́н, в други́й же день в Ро́дос и отту́ду в Пата́ру,

² И обре́тше кора́бль преходя́щь в Финики́ю, возше́дше отвезо́хомся.

³ Возни́кший же нам Кипр оста́вльше ошу́юю, плы́хом в Сири́ю и приста́хом в Ти́ре, та́мо бо бя́ше кораблю́ изложи́ти бре́мя.

⁴ И обре́тше ученики́, пребы́хом ту дни́й седмь: и́же Па́влови глаго́лаху Ду́хом не восходи́ти во Иерусали́м.

⁵ Егда́ же бысть нам сконча́ти дни, изше́дше идо́хом, провожда́ющим нас всем с жена́ми и детьми́ да́же до вне гра́да: и прекло́ньше коле́на при бре́зе помоли́хомся.

⁶ И целова́вше друг дру́га внидо́хом в кора́бль, они́ же возврати́шася во своя́ си́.

⁷ Мы́ же, пла́вание наче́нше от Ти́ра, приста́хом во Птолемаи́де, и целова́вше бра́тию, пребы́хом день еди́н у них.

⁸ Во у́трие же изше́дше Па́вел и и́же с ним, приидо́хом в Кесари́ю, и вше́дше в дом Фили́ппа благове́стника, су́ща от седми́ диа́кон, пребы́хом у него́.

⁹ Сего́ же бя́ху дще́ри деви́цы четы́ри прорица́ющия.

¹⁰ Пребыва́ющим же нам та́мо дни мно́ги, сни́де не́кто от Иуде́и проро́к, и́менем Ага́в,

¹¹ И прише́д к нам и взем по́яс Па́влов, связа́в же свои́ ру́це и но́зе, рече́: та́ко глаго́лет Дух Святы́й, му́жа, его́же есть по́яс сей, та́ко свя́жут его́ во Иерусали́ме иуде́е и предадя́т в ру́це язы́ков.

¹² И я́коже слы́шахом сия́, моли́хом мы же и наме́стнии, ^[163] не восходи́ти ему́ во Иерусали́м.

¹³ Отвеща́в же Па́вел и рече́: что творите́, пла́чуще и сокруша́юще ми се́рдце? Аз бо не то́чию свя́зан бы́ти хощу́, но и умре́ти во Иерусали́ме гото́в есмь за и́мя Го́спода Иису́са.

¹⁴ Не повину́ющуся же ему́, умолча́хом, ре́кше: во́ля Госпо́дня да бу́дет.

¹⁵ По дне́х же сих угото́вльшеся взыдо́хом во Иерусали́м.

¹⁶ Приидо́ша же с на́ми и не́цыи ученицы́ от Кесари́и, веду́ще с собо́ю, у него́же бы обита́ти нам, Мна́сона не́коего Ки́прянина, дре́вняго ученика́.

¹⁷ Бы́вшим же нам во Иерусали́ме, любе́зно прия́ша нас бра́тия.

¹⁸ На у́трие же вни́де Па́вел с на́ми ко Иа́кову, вси же приидо́ша ста́рцы.

¹⁹ И целова́в их, сказа́ше по еди́ному ко́еждо, е́же сотвори́ Бог во язы́цех служе́нием его́.

²⁰ Они́ же слы́шавше сла́вляху Бо́га и реко́ша ему́: ви́диши ли, бра́те, коли́ко тем есть Иуде́й ве́ровавших? И вси́ ревни́тели зако́ну су́ть.

²¹ Увести́шася же о тебе́, я́ко отступле́нию учи́ши от зако́на Моисе́ова живу́щия во язы́цех вся Иуде́и, глаго́ля не обре́зовати им чад свои́х, ниже́ во обы́чаех оте́ческих ходи́ти.

²² Что́ у́бо есть? Вся́ко подоба́ет наро́ду сни́тися: услы́шат бо, я́ко прише́л еси́.

²³ Сие́ у́бо сотвори́, е́же ти глаго́лем: суть у нас му́жие четы́ри обеща́вше себе́ Бо́гу.

²⁴ Сия́ пои́м очи́стися с ни́ми и иждиви́ на них, да остри́жут си главы́: и разуме́ют вси, я́ко возвеще́нная им о тебе́ ничто́же суть, но пребыва́еши и сам зако́н храня́.

²⁵ А о ве́ровавших язы́цех мы посла́хом, суди́вше ничто́же таково́е соблюда́ти им, то́кмо храни́ти себе́ от идоложе́ртвенных и кро́ве, и уда́вленины и блуда́.

²⁶ Тогда пое́м Па́вел му́жи о́ны, нау́трие с ни́ми очи́щься вни́де во святи́лище, возвеща́я исполне́ние дней очище́ния, до́ндеже принесено́ бысть за еди́наго коего́ждо их приноше́ние.

²⁷ И я́коже хотя́ху седмь дний сконча́тися, и́же от Аси́и иуде́и, ви́девше его́ во святи́лищи, нава́диша весь наро́д и возложи́ша нань ру́це,

²⁸ Вопию́ще: му́жие изра́ильстии, помози́те, сей есть челове́к, и́же на лю́ди и зако́н и на ме́сто сие́ всех всю́ду учи́т, еще́ же и е́ллины введе́ в це́рковь и оскверни́ свято́е ме́сто сие́.

²⁹ [Бя́ху бо ви́дели Трофи́ма Ефе́сянина во гра́де с ним, его́же мня́ху, я́ко в це́рковь ввел есть Па́вел.]

³⁰ Подви́жеся же град весь, и бысть стече́ние лю́дем, и е́мше Па́вла, влеча́ху его́ вон из це́ркве, и а́бие затвори́шася две́ри.

³¹ И́щущим же им уби́ти его́, взы́де весть к ты́сящнику спи́ры, я́ко весь возмути́ся Иерусали́м.

³² Он же а́бие пои́м во́ины и со́тники, притече́ на ня, они́ же ви́девше ты́сящника и во́ины, преста́ша би́ти Па́вла.

³³ Присту́пль же ты́сящник я́т его́ и повеле́ связа́ти его́ вери́гома желе́знома двема́, и вопроша́ше: кто́ у́бо есть и что́ есть сотвори́л.

³⁴ Друзи́и же и́но не́что вопия́ху в наро́де: не моги́й же разуме́ти изве́стное молвы́ ра́ди, повеле́ отвести́ его́ в по́лк. ^[164]

³⁵ Егда́ же бысть на степе́нех, прилучи́ся воздви́жену бы́ти ему́ от во́ин ну́жды ра́ди наро́да.

³⁶ После́доваше бо мно́жество люде́й зову́щих: возьми́ его́.

³⁷ Хотя́ же вни́ти в по́лк Па́вел глаго́ла ты́сящнику: а́ще ле́ть ми́ есть глаго́лати что́ тебе́? Он же рече́: гре́чески уме́еши ли?

³⁸ Не ты ли еси́ Еги́птянин, пре́жде сих дни́й превеща́вый и изведы́й в пусты́ню четы́ри ты́сящи муже́й сикаре́й?

³⁹ Рече́ же Па́вел: аз челове́к у́бо есмь Иуде́анин, Та́рсянин, сла́внаго гра́да в Килики́и жи́тель: молю́ же тя, повели́ ми глаго́лати к лю́дем.

⁴⁰ Повеле́вшу же ему́, Па́вел стоя́ на степе́нех помаа́в руко́ю к лю́дем: мно́гу же безмо́лвию бы́вшу, возгласи́ евре́йским язы́ком, глаго́ля:

Глава 22

¹ Му́жие бра́тие и отцы́, услы́шите мой к вам ны́не отве́т.

² [Слы́шавше же, я́ко евре́йским язы́ком возгласи́ к ним, па́че приложи́ша безмо́лвие. И рече́:]

³ А́з у́бо е́смь муж Иуде́анин, роди́вся в Та́рсе Килики́йстем, воспита́н же во гра́де сем при ногу́ Гамалии́лову, нака́зан изве́стно оте́ческому зако́ну, ревни́тель сый Бо́жий, я́коже вси́ вы есте́ днесь.

⁴ И́же се́й путь гони́х да́же до сме́рти, вяжя́ и предая́ в темни́цу му́жи же и жены́,

⁵ Я́коже и архиере́й свиде́тельствует ми и вси́ ста́рцы: от ни́хже и посла́ния прие́м к живу́щим в Дама́сце бра́тиям, идя́х привести́ су́щия та́мо свя́заны во Иерусали́м, да му́чатся.

⁶ Бы́сть же ми́ иду́щу и приближа́ющуся к Дама́ску в полу́дне, внеза́пу с небесе́ облиста́ свет мног о́крест мене́.

⁷ Падо́х же на зе́млю и слы́шах глас глаго́лющь ми́: Са́вле, Са́вле, что́ Мя го́ниши?

⁸ Аз же отвеща́х: Кто́ еси́, Го́споди? Рече́ же ко мне: Аз есмь Иису́с Назоре́й, Его́же ты го́ниши.

⁹ Со мно́ю же су́щии свет у́бо ви́деша, и пристра́шни бы́ша, гла́са же не слы́шаша Глаго́лющаго ко мне.

¹⁰ Реко́х же: что́ сотворю́, Го́споди? Госпо́дь же рече́ ко мне: воста́в иди́ в Дама́ск, и та́мо рече́тся ти́ о всех, я́же вчине́но ти есть твори́ти.

¹¹ И я́коже не ви́дех от сла́вы све́та о́наго, за ру́ку ведо́мь от су́щих со мно́ю, внидо́х в Дама́ск.

¹² Ана́ниа же не́кий, муж благогове́ин по зако́ну, свиде́тельствован от всех живу́щих в Дама́сце Иуде́й,

¹³ Прише́д ко мне и став рече́ ми: Са́вле бра́те, прозри́. И аз в той час воззре́х нань.

¹⁴ Он же рече́ ми: Бог оте́ц на́ших изво́ли ^[165] тя разуме́ти хоте́ние Его́, и ви́дети Пра́ведника, и слы́шати глас от уст его́:

¹⁵ Я́ко бу́деши Ему́ свиде́тель у всех челове́ков о сих, я́же ви́дел еси́ и слы́шал.

¹⁶ И ны́не что́ ме́длиши? Воста́в крести́ся и омы́й грехи́ твоя́, призва́в и́мя Го́спода Иису́са.

¹⁷ Бысть же возврати́вшумися во Иерусали́м и моля́щумися в це́ркви, бы́ти во изступле́нии,

¹⁸ И ви́дети Его́ глаго́люща ми: потщи́ся и изы́ди ско́ро из Иерусали́ма, зане́ не прии́мут свиде́тельства твоего́, е́же о Мне.

¹⁹ И аз ре́х: Го́споди, са́ми ве́дят, я́ко аз бех всажда́я в темни́цу и бия́ по со́нмищих ве́рующия в Тя.

²⁰ И егда́ излива́шеся кровь Стефа́на свиде́теля Твоего́, и сам бех стоя́ и соизволя́я убие́нию его́ и стреги́й ри́з убива́ющих его́.

²¹ И Рече́ ко мне́: иди́, я́ко Аз во язы́ки дале́че послю́ тя.

²² Послу́шаху же его́ да́же до сего́ словесе́ и воздвиго́ша глас свой, глаго́люще: возьми́ от земли́ такова́го, не подоба́ет бо ему́ жи́ти.

²³ Вопию́щим же им и ме́щущим ри́зы и прах возмета́ющим на возду́х,

²⁴ Повеле́ ты́сящник отвести́ его́ в полк, ^[166] рек ра́нами истяза́ти его́, да разуме́ет, за ку́ю вину́ та́ко вопия́ху на́нь.

²⁵ И я́коже протяго́ша его́ вервьми́, рече́ к стоя́щему со́тнику Па́вел: челове́ка Ри́млянина и неосужде́на леть ли есть вам би́ти?

²⁶ Слы́шав же со́тник, приступи́ к ты́сящнику, сказа́, глаголя́: ви́ждь, что́ хо́щеши сотвори́ти? Челове́к бо се́й Ри́млянин есть.

²⁷ Присту́пль же ты́сящник рече́ ему́: глаго́ли ми, Ри́млянин ли еси́ ты? Он же рече́: е́й.

²⁸ Отвеща́ же ты́сящник: аз мно́гою цено́ю нарече́ние жи́тельства сего́ стяжа́х. Па́вел же рече́: аз же и роди́хся в нем.

²⁹ А́бие у́бо отступи́ша от него́ хотя́щии его́ истяза́ти, и ты́сящник же убоя́ся, разуме́в, я́ко Ри́млянин есть, и я́ко бе́ его́ связа́л.

³⁰ На у́трие же, хотя́ разуме́ти и́стину, чесо́ ра́ди оклевета́ется от Иуде́й, разреши́ его́ от уз и повеле́ приити́ архиере́ем и всему́ собо́ру их: и све́д Па́вла, поста́ви [его́] пред ни́ми.

Глава 23

¹ Воззре́в же Па́вел на сонм, рече́: му́жие бра́тие, аз все́ю со́вестию благо́ю жи́тельствовах пред Бо́гом да́же до сего́ дне.

² Архиере́й же Ана́ниа повеле́ предстоя́щим ему́ би́ти его́ уста́.

³ Тогда́ Па́вел рече́ к нему́: би́ти тя и́мать Бог, стено́ пова́пленая, и ты седи́ши судя́ ми по зако́ну, преступа́я же зако́н вели́ши, да бию́т мя.

⁴ Предстоя́щии же ре́ша: архиере́ю ли Бо́жию досажда́еши?

⁵ Рече́ же Па́вел: не ве́дах, бра́тие, я́ко архиере́й есть. Пи́сано бо есть: кня́зю люде́й твои́х да не рече́ши зла.

⁶ Разуме́в же Па́вел, я́ко еди́на часть есть саддуке́й, друга́я же фарисе́й, воззва́ в со́нмищи: му́жие бра́тие, аз фарисе́й есмь, сын фарисе́ов, о упова́нии и о воскресе́нии ме́ртвых аз суд прие́млю.

⁷ Се же ему́ ре́кшу, бысть ра́спря между́ саддуке́и и фарисе́и, и раздели́ся наро́д.

⁸ Саддуке́и бо глаго́лют не бы́ти воскресе́ния, ни А́нгела, ни ду́ха, фарисе́и же испове́дуют обоя́.

⁹ Бысть же кличь вели́к, и воста́вше кни́жницы ча́сти фарисе́йския пря́хуся между́ собо́ю, глаго́люще: ни еди́но зло обрета́ем в челове́це сем, а́ще же дух глаго́ла ему́ или́ А́нгел, не проти́вимся Бо́гу.

¹⁰ Мно́зе же бы́вшей ра́спре, боя́ся ты́сящник, да не растерза́н бу́дет Па́вел от них, повеле́ во́ином сни́ти и восхи́тити его́ от среды́ их и вести́ его́ в полк.

¹¹ В наста́вшую же нощь предста́в ему́ Госпо́дь, рече́: дерза́й, Па́вле, я́коже бо свиде́тельствовал еси́ я́же о Мне во Иерусали́ме, си́це ти подоба́ет и в Ри́ме свиде́тельствовати.

¹² Бы́вшу же дню, сотво́рше не́цыи от Иуде́й сове́т, ^[167] закля́ша себе́, глаго́люще не я́сти ни пи́ти, до́ндеже убию́т Па́вла.

¹³ Бя́ху же мно́жае четы́редесятих сию кля́тву сотво́ршии.

¹⁴ И́же присту́пльше ко архиере́ем и ста́рцем, ре́ша: кля́твою прокля́хом себе́ ничто́же вкуси́ти, до́ндеже убие́м Па́вла.

¹⁵ Ны́не у́бо вы скажи́те ты́сящнику с собо́ром, я́ко да у́тре сведе́т его́ к вам, а́ки бы хотя́ще разуме́ти изве́стнее я́же о нем: мы же, пре́жде да́же не прибли́житися ему́, гото́ви есмы́ уби́ти его́.

¹⁶ Слы́шав же сын сестры́ Па́вловы ко́в, ^[168] прише́д и вше́д в полк, сказа́ Па́влу.

¹⁷ Призва́в же Па́вел еди́наго от со́тник, рече́: ю́ношу сего́ отведи́ к ты́сящнику: и́мать бо не́что сказа́ти ему́.

¹⁸ Он же у́бо пои́м его́ приведе́ к ты́сящнику и рече́: у́зник Па́вел призва́в мя, умоли́ сего́ ю́ношу привести́ к тебе́, иму́ща не́что глаго́лати тебе́.

¹⁹ Пои́м же его́ за ру́ку ты́сящник и отше́д на едине́, вопроша́ше его́: что́ е́сть, е́же и́маши возвести́ти ми?

²⁰ Рече́ же, я́ко Иуде́е совеща́ша умоли́ти тя, я́ко да у́тре сведе́ши Па́вла к ним в собо́р, а́ки бы хотя́щим изве́стнее истяза́ти я́же о не́м.

²¹ Ты у́бо не послу́шай их: ло́вят бо его́ от них му́жие мно́жае четы́редесяти, и́же закля́ша себе́ ни я́сти ни пи́ти, до́ндеже убию́т его́: и ны́не гото́ви суть, ча́юще обеща́ния, е́же от тебе́.

²² Ты́сящник у́бо отпусти́ ю́ношу, завеща́в ни еди́ному же пове́дати, я́ко сия́ яви́л еси́ мне.

²³ И призва́в два́ не́кия от со́тник, рече́: угото́вита (ми) во́инов вооруже́нных две́сте, я́ко да и́дут до Кесари́и, и ко́нник се́дмьдесят, и стреле́ц две́сте, от тре́тияго часа́ но́щи.

²⁴ И скоты́ привести́, да всади́вше Па́вла прово́дят до Фи́ликса иге́мона.

²⁵ Написа́ же (и́) посла́ние иму́щее о́браз се́й:

²⁶ Клавди́й Лиси́а держа́вному иге́мону Фи́ликсу ра́доватися:

²⁷ Му́жа сего́ я́та от Иуде́й и иму́ща убие́на бы́ти от них, присту́пль с во́ины отъя́х его́, уве́дев, я́ко Ри́млянин есть.

²⁸ Хотя́ же разуме́ти вину́, ея́же ра́ди поима́ху нань, сведо́х его́ в со́нмище их.

²⁹ Его́же обрето́х оглаго́луема о взыска́нии зако́на их, ни еди́но же досто́йно сме́рти или у́зам согреше́ние иму́ща.

³⁰ Ска́зану же бы́вшу ми ко́ву хотя́щу бы́ти от Иуде́й на му́жа сего́, а́бие посла́х (его́) к тебе́, завеща́в и клеветнико́м (его́) глаго́лати пред тобо́ю, я́же нань: здра́в бу́ди.

³¹ Во́ини же у́бо по повеле́нному им, взе́мше Па́вла, ведо́ша об но́щь во Антипатри́ду.

³² Во у́трие же, оста́вльше ко́нники ити́ с ним, возврати́шася в полк.

³³ Они́ же прише́дше в Кесари́ю и вда́вше посла́ние иге́мону, предста́виша ему́ и Па́вла.

³⁴ Проче́т же иге́мон посла́ние и вопро́шь, от ко́ея о́бласти есть, и уве́дев, я́ко от Килики́и, рече́:

³⁵ Услы́шу о тебе́, егда́ и клеветницы́ твои́ прии́дут. И повеле́ в прето́ре И́родове стрещи́ его́.

Глава 24

¹ По пяти́х же днех сни́де архиере́й Ана́ниа со ста́рцы и с ри́тором не́киим Терти́ллом, и́же сказа́ша иге́мону о Па́вле.

² При́звану же бы́вшу ему́, нача́т клевета́ти Терти́лл, глаго́ля:

³ Мног мир улуча́юще тобо́ю, и исправле́ния быва́емая язы́ку сему́ твои́м промышле́нием, вся́ким же о́бразом и везде́ прие́млем, держа́вный Фи́ликсе, со вся́ким благодаре́нием.

⁴ Но да не мно́жае стужа́ю тебе́, молю́ тя послу́шати нас вкра́тце твое́ю кро́тостию.

⁵ Обрето́хом бо му́жа сего́ губи́теля и дви́жуща противле́ние всем Иуде́ем живу́щим по вселе́нней и предста́теля (су́ща) Назоре́йстей е́реси,

⁶ И́же и це́рковь покуси́ся оскверни́ти, его́же и я́хом и по зако́ну на́шему хоте́хом суди́ти ему́.

⁷ Прише́д же Лиси́а ты́сящник, мно́гою си́лою от рук на́ших исхити́ его́ и к тебе́ посла́.

⁸ Повеле́в [и нам] пое́млющим на́нь ити́ к тебе́: от него́же возмо́жеши сам разсуди́в о всех сих позна́ти, о ни́хже мы пое́млем на́нь.

⁹ Сложи́шася же и Иуде́и, глаго́люще сим та́ко бы́ти.

¹⁰ Отвеща́ же Па́вел, поману́вшу ему́ иге́мону глаго́лати: от мно́гих лет су́ща тя судию́ пра́ведна язы́ку сему́ све́дый, благоду́шнее я́же о мне отвеща́ю.

¹¹ Могу́щу ти разуме́ти, я́ко не мно́жае ми есть дни́й двана́десятих, отне́леже взыдо́х поклони́тися во Иерусали́м.

¹² И ни в це́ркви обрето́ша мя к кому́ глаго́люща или развра́т творя́ща наро́ду, ни в со́нмищих, ни во гра́де,

¹³ Ниже́ довести́ мо́гут, ели́ка тебе́ ны́не на мя глаго́лют.

¹⁴ Испове́дую же тебе́ сие́, я́ко в пути́, его́же си́и глаго́лют е́ресь, та́ко служу́ оте́ческому Бо́гу, ве́руя всем су́щим в зако́не и проро́цех пи́саным.

¹⁵ Упова́ние имы́й на Бо́га, я́ко воскресе́ние хо́щет бы́ти ме́ртвым, пра́ведником же и гре́шником, его́же и са́ми си́и ча́ют.

¹⁶ О сем же и аз подвиза́юся, непоро́чну со́весть име́ти всегда́ пред Бо́гом же и челове́ки.

¹⁷ По ле́тех же мно́гих приидо́х сотвори́ти ми́лостыни во язы́к мо́й и приноше́ния.

¹⁸ В ни́хже обрето́ша мя очище́нна в це́ркви, ни с наро́дом, ниже́ с молво́ю.

¹⁹ Не́цыи от Аси́и Иуде́е, и́мже подоба́ше пред тя приити́ и глаго́лати, а́ще и́мут что́ на мя.

²⁰ Или́ са́ми ти́и да глаго́лют, а́ще ку́ю обрето́ша во мне непра́вду, ста́вшу ми в со́нмищи.

²¹ Ра́зве еди́наго сего́ гла́са, и́мже возопи́х стоя́ в них, я́ко о воскресе́нии ме́ртвых аз суд прие́млю днесь от вас.

²² Слы́шав же сия Фи́ликс отвеща́ ^[169] им, изве́стнее уве́дев я́же о пути́ сем, глаго́ля: егда́ Лиси́а ты́сящник прии́дет, разсужду́ я́же о вас.

²³ Повеле́ же со́тнику стрещи́ Па́вла, и име́ти осла́бу, и ни еди́ному же возбраня́ти от свои́х ему́ служи́ти или́ приходи́ти к нему́.

²⁴ По днех же не́киих прише́д Фи́ликс со Друси́ллиею жено́ю свое́ю су́щею Иуде́анынею, призва́ Па́вла, да слы́шит от него́ ве́ру, я́же во Христа́ Иису́са.

²⁵ Глаго́лющу же ему́ о пра́вде и о воздержа́нии и о суде́ хотя́щем бы́ти, пристра́шен быв Фи́ликс отвеща́: ны́не у́бо иди́, вре́мя же получи́в призову́ тя.

²⁶ Вку́пе же и наде́яся, я́ко мзда да́стся ему́ от Па́вла, я́ко да отпу́стит его́: те́мже и ча́сто призыва́я его́, бесе́доваше с ним.

²⁷ Двема́ же ле́тома сконча́вшемася прия́т измене́ние Фи́ликс Порки́а Фи́ста: хотя́ же уго́дное сотвори́ти Иуде́ем Фи́ликс, оста́ви Па́вла свя́зана.

Глава 25

¹ Фист же у́бо прии́м вла́сть, по трие́х дне́х взы́де во Иерусали́м от Кесари́и.

² Сказа́ша же ему́ архиере́е и пе́рвии от Иуде́й на Па́вла и моля́ху его́,

³ Прося́ще благода́ти на́нь, я́ко да по́слет его́ во Иерусали́м, ко́в творя́ще, я́ко да убию́т его́ на пути́.

⁴ Фист же повеле́ Па́вла стрещи́ в Кесари́и, сам та́мо хотя́ вско́ре изы́ти.

⁵ И́же у́бо си́льнии в вас, рече́, со мно́ю ше́дше, а́ще есть ка́я непра́вда в му́жи се́м, да глаго́лют на́нь.

⁶ Пребы́в же у них не мно́жае десяти́ дни́й, сни́де в Кесари́ю: на у́трие се́д на суди́щи, повеле́ Па́вла привести́.

⁷ Приведе́ну же бы́вшу ему́, о́крест ста́ша и́же от Иерусали́ма сше́дшии Иуде́е, мно́ги и тя́жки вины́ принося́ще на Па́вла, и́хже не можа́ху изъяви́ти.

⁸ Отвещава́ющу ему́, я́ко ни на зако́н Иуде́йский, ни на це́рковь, ни на ке́саря что́ согреши́х.

⁹ Фист же хотя́ уго́дное Иуде́ем сотвори́ти, отвеща́в Па́влови рече́: хо́щеши ли, во Иерусали́м возше́д, та́мо о сих суд прия́ти от мене́?

¹⁰ Рече́ же Па́вел: на суди́щи ке́сареве стоя́ есмь, иде́же ми досто́ит суд прия́ти: Иуде́й ни чи́мже оби́дех, я́коже и ты до́бре ве́си.

¹¹ А́ще бо непра́вдую или́ досто́йно сме́рти сотвори́х что́, не отме́щуся умре́ти: а́ще ли же ничто́же есть во мне, е́же си́и на мя клеве́щут, никто́же мя мо́жет тем вы́дати: ке́саря нарица́ю.

¹² Тогда́ Фист состяза́вся с сове́тники, отвеща́: ке́саря ли наре́кл еси́? К ке́сарю по́йдеши.

¹³ Дне́м же мину́вшим не́ким, Агри́ппа царь и Верники́а снидо́ста в Кесари́ю целова́ти Фи́ста.

¹⁴ И я́коже мно́ги дни пребы́ста ту, Фист сказа́ царю́ я́же о Па́вле, глаго́ля: муж не́кий есть оста́влен от Фи́ликса у́зник,

¹⁵ О не́мже, бы́вшу ми во Иерусали́ме, яви́ша архиере́е и ста́рцы Иуде́йстии, прося́ще нань суда́.

¹⁶ К ни́мже отвеща́х, я́ко несть обы́чай ри́мляном вы́дати челове́ка ко́его на поги́бель, пре́жде да́же оклевета́емый не и́мать пред лице́м клеве́щущих его́ и ме́сто отве́та прии́мет о свое́м согреше́нии.

¹⁷ Сше́дшимся же им зде, закосне́ние ни еди́но сотво́рь, нау́трие сед на суди́щи, повеле́х привести́ му́жа.

¹⁸ О́крест же его́ ста́вше клеветницы́, ни еди́ну вину́, я́же аз непщева́х, нанесо́ша.

¹⁹ Стяза́ния же не́кая о свое́й разли́чней ве́ре имя́ху к нему́ и о не́коем Иису́се уме́ршем, Его́же глаго́лаше Па́вел жи́ва бы́ти.

²⁰ Недоуме́яся же аз о взыска́нии сих, глаго́лах, а́ще хо́щет ити́ во Иерусали́м и та́мо суд прия́ти о сих.

²¹ Па́влу же наре́кшу блюде́ну бы́ти ему́ до разсужде́ния А́вгуста, повеле́х блюсти́ его́, до́ндеже послю́ его́ к ке́сарю.

²² Агри́ппа же к Фи́сту рече́: хоте́л бых и сам челове́ка сего́ слы́шати. Он же рече́: у́тре услы́шиши его́.

²³ На у́трие же прише́дшу Агри́ппе и Верники́и со мно́гою го́рдостию и вше́дшим в суде́бную пала́ту с ты́сящники и с наро́читыми му́жи гра́да, и повеле́вшу Фи́сту, приведе́н бысть Па́вел.

²⁴ И рече́ Фист: Агри́ппо царю́ и вси су́щии с на́ми му́жие, ви́дите сего́, о не́мже все мно́жество Иуде́й стужа́ху ми во Иерусали́ме же и зде́, вопию́ще, я́ко не подоба́ет жи́ти ему́ ктому́.

²⁵ Аз же разуме́в ничто́же досто́йно сме́рти сотво́рша его́, и самому́ же сему́ наре́кшу Сева́ста, суди́х посла́ти его́.

²⁶ О не́мже изве́стное что́ писа́ти господи́ну не и́мам: те́мже и приведо́х его́ пред вас, наипа́че же пред тя, Агри́ппо царю́, я́ко да разсужде́нию бы́вшу и́мам что́ писа́ти.

²⁷ Безслове́сно бо мни́тся ми, посыла́ющу ю́зника, а вины́, я́же на́нь, не сказа́ти.

Глава 26

¹ Агри́ппа же к Па́влу рече́: повелева́ется ти о себе́ самому́ глаго́лати. Тогда́ Па́вел просте́р ру́ку отвещава́ше:

² О всех, о ни́хже оклевета́емь есмь от Иуде́й, царю́ Агри́ппо, непщу́ю себе́ блаже́нна бы́ти, я́ко пред тобо́ю отвеща́ти днесь и́мам,

³ Па́че же ве́дца тя су́ща све́дый всех иуде́йских обы́чаев и взыска́ний. Те́мже молю́ся ти долготерпели́вно послу́шати мене́.

⁴ Житие́ у́бо мое́ е́же от ю́ности, испе́рва бы́вшее во язы́це мое́м во Иерусали́ме, ве́дят вси Иуде́е,

⁵ Ве́дяще мя испе́рва, а́ще хотя́т свиде́тельствовати, я́ко по изве́стней е́реси на́шея ве́ры жих фарисе́й.

⁶ И ны́не о упова́нии обетова́ния, бы́вшаго от Бо́га ко отце́м на́шим, стою́ суди́м,

⁷ В не́же обана́десяте коле́на на́ша безпреста́ни день и нощь служа́ще наде́ются доити́: о не́мже упова́нии оклевета́емь есмь, царю́ Агри́ппо, от Иуде́й.

⁸ Что́? Неве́рно ли су́дится ва́ми, я́ко Бог ме́ртвыя возставля́ет?

⁹ Аз у́бо мнех, я́ко подоба́ет ми мно́га сопроти́вна проти́ву и́мене Иису́са Назоре́а сотвори́ти.

¹⁰ Е́же и сотвори́х во Иерусали́ме, и мно́ги от святы́х аз в темни́цах затворя́х, власть от архиере́й прие́м: убива́емым же им прилага́х сове́т.

¹¹ И на всех со́нмищих мно́жицею му́чя их, принужда́х ху́лити: преизли́ха же вражду́я на них, гоня́х да́же и до вне́шних градо́в.

¹² В ни́хже иды́й в Дама́ск со вла́стию и повеле́нием, е́же от архиере́й,

¹³ В полу́дни на пути́ ви́дех, царю́, с небесе́ па́че сия́ния со́лнечнаго осия́вший мя свет и со мно́ю иду́щих.

¹⁴ Всем же па́дшим нам на зе́млю, слы́шах глас глаго́лющь ко мне и веща́ющь евре́йским язы́ком: Са́вле, Са́вле, что Мя го́ниши? Же́стоко ти есть проти́ву рожна́ пра́ти.

¹⁵ Аз же рех: кто еси́, Го́споди? Он же рече́: Аз есмь Иису́с, Его́же ты го́ниши.

¹⁶ Но воста́ни и ста́ни на ногу́ твое́ю, на се бо яви́хся ти, сотвори́ти тя слугу́ и свиде́теля, я́же ви́дел еси́ и я́же явлю́ тебе́,

¹⁷ Изыма́я тя от люде́й иуде́йских и от язы́к, к ни́мже Аз тя послю́,

¹⁸ Отве́рсти о́чи их, да обратя́тся от тмы в свет и от о́бласти сатанины́ к Бо́гу, е́же прия́ти им оставле́ние грехо́в и достоя́ние во святы́х ве́рою, я́же в Мя.

¹⁹ Те́мже, царю́ Агри́ппо, не бых проти́вен небе́сному виде́нию,

²⁰ Но су́щим в Дама́сце пре́жде и во Иерусали́ме, и во вся́кой стране́ иуде́йстей и язы́ком пропове́дую пока́ятися и обрати́тися к Бо́гу, досто́йна покая́нию дела́ творя́ще.

²¹ Си́х ра́ди мя Иуде́е е́мше во святи́лищи хотя́ху растерза́ти.

²² По́мощь у́бо улучи́в я́же от Бо́га, да́же до дне сего́ стою́, свиде́тельствуя ма́лу же и вели́ку, ничто́же веща́я, ра́зве я́же проро́цы реко́ша хотя́щая бы́ти и Моисе́й,

²³ Я́ко Христо́с име́яше пострада́ти, я́ко пе́рвый от воскресе́ния ме́ртвых, свет хотя́ше пропове́дати лю́дем (Иуде́йским) и язы́ком.

²⁴ Сия́ же ему́ отвещава́ющу, Фист ве́лиим гла́сом рече́: бесну́ешися ли, Па́вле? Мно́гия тя кни́ги в неи́стовство прелага́ют.

²⁵ Он же: не бесну́юся, рече́, держа́вный Фи́сте, но и́стины и целому́дрия глаго́лы веща́ю.

²⁶ Весть бо о сих царь, к нему́же и с дерзнове́нием глаго́лю: утаи́тися бо ему́ от сих не ве́рую ничесому́же, несть бо во у́гле сотворе́но сие́.

²⁷ Ве́руеши ли, царю́ Агри́ппо, проро́ком? Ве́м, я́ко ве́руеши.

²⁸ Агри́ппа же к Па́влу рече́: вма́ле мя препира́еши Христиа́нина бы́ти.

²⁹ Па́вел же рече́: моли́л у́бо бых Бо́га, и вма́ле и во мно́зе, не то́кмо тебе́, но и все́х слы́шащих мя днесь, бы́ти им та́цем, яко́в ^[170] и аз есмь, кроме́ уз сих.

³⁰ И сия́ ре́кшу ему́, воста́ царь и иге́мон, и Верники́а и седя́щии с ни́ми.

³¹ И отше́дше бесе́доваху друг ко дру́гу, глаго́люще, я́ко ничто́же сме́рти досто́йно или́ уз твори́т челове́к сей.

³² Агри́ппа же Фи́сту рече́: отпуще́н бы́ти можа́ше челове́к се́й, а́ще не бы́ ке́саря нарица́л. И та́ко суди́ иге́мон посла́ти его́ к ке́сарю.

Глава 27

¹ И я́коже су́ждено бысть отплы́ти нам во Итали́ю, преда́ху Па́вла же и ины́я не́кия ю́зники со́тнику, и́менем Иу́лию, спи́ры Севасти́йския.

² Вше́дше же в кора́бль Адрами́тский, восхоте́вше плы́ти во Аси́йская ме́ста, отвезо́хомся, су́щу с на́ми Ариста́рху Македо́нянину от Солу́ня.

³ В други́й же приста́хом в Сидо́не: человеколю́бие же Иу́лий Па́влови де́я, повеле́ к друго́м ше́дшу прилежа́ние ^[171] улучи́ти.

⁴ И отту́ду отве́зшеся приплы́хом в Кипр, зане́ ве́три бя́ху проти́вни.

⁵ Пучи́ну же Килики́йскую и Памфили́йскую преплы́вше, приидо́хом в Мν́ры Лики́йския.

⁶ И та́мо обре́т со́тник кора́бль Александри́йский плову́щь во Итали́ю, всади́ ны вонь.

⁷ Во мно́ги же дни ко́сно пла́вающе и едва́ бы́вше в Кни́де, не оставля́ющу нас ве́тру, приплы́хом под Крит при Салмо́не.

⁸ Едва́ же избира́юще край, приидо́хом на ме́сто не́кое, нарица́емое До́брое Приста́нище, ему́же близ бе град Ласе́й.

⁹ Мно́гу же вре́мени мину́вшу и су́щу уже́ небезбе́дну пла́ванию, зане́же и пост уже́ бе преше́л, сове́товаше Па́вел,

¹⁰ Глаго́ля им: му́жие, ви́жу, я́ко с досажде́нием и мно́гою тщето́ю не то́кмо бре́мене и корабля́, но и душ на́ших хо́щет бы́ти пла́вание.

¹¹ Со́тник же ко́рмчия и навкли́ра послу́шаше па́че, не́жели Па́влом глаго́лемых.

¹² Не добру́ же приста́нищу су́щу ко озиме́нию, мно́зи сове́т дая́ху отвезти́ся отту́ду, а́ще ка́ко возмо́гут, дости́гше Финики́и, озиме́ти в приста́нищи Кри́тстем, зря́щем к ли́ву и к хо́ру.

¹³ Дхну́вшу же ю́гу, мне́вше во́лю свою́ улучи́ти, воздви́гше ве́трила, плы́ху вскрай Кри́та.

¹⁴ Не по мно́зе же возве́я проти́вен ему́ ветр бу́рен, нарица́емый еврокли́дон.

¹⁵ Восхище́ну же бы́вшу кораблю́ и не могу́щу сопроти́витися ве́тру, вда́вшеся волна́м носи́ми бе́хом.

¹⁶ О́стров же не́кий мимоте́кше, нарица́ющься Клавди́й, едва́ возмого́хом удержа́ти ладию́,

¹⁷ Ю́же востя́гше, вся́ким о́бразом помога́ху, подтвержда́юще кора́бль, боя́щеся же, да не в сирть ^[172] впаду́т, низпусти́вше па́рус, си́це носи́ми бе́ху.

¹⁸ Вельми́ же обурева́емым нам, нау́трие измета́ние творя́ху.

¹⁹ И в тре́тий день свои́ми рука́ми я́дрило кора́бленое изверго́хом.

²⁰ Ни со́лнцу же, ни звезда́м я́вльшимся на мно́ги дни, и зиме́ не ма́ле належа́щи, про́чее отима́шеся наде́жда вся, е́же спасти́ся нам.

²¹ Мно́гу же неяде́нию су́щу, тогда́ став Па́вел посреде́ их, рече́: подоба́ше у́бо, о му́жие, послу́шавше мене́, не отвезти́ся от Кри́та и избы́ти досажде́ния сего́ и тщеты́.

²² И се ны́не молю́ вы благоду́шствовати, поги́бель бо ни еди́ной души́ от вас бу́дет, ра́зве корабля́.

²³ Предста́ бо ми в сию́ нощь, Его́же аз есмь, Ему́же и служу́, А́нгел Бо́жий,

²⁴ Глаго́ля: не бо́йся, Па́вле, ке́сарю ти подоба́ет предста́ти, и се дарова́ тебе́ Бог вся пла́вающия с тобо́ю.

²⁵ Те́мже дерза́йте, му́жие, ве́рую бо Бо́гови, я́ко та́ко бу́дет, и́мже о́бразом рече́но ми бысть.

²⁶ Во о́стров же не́кий подоба́ет нам приста́ти.

²⁷ И я́коже четвертаяна́десять нощь бысть, носи́мым нам во Адриа́тской пучи́не, в полу́нощи непщева́ху кора́бленицы приближа́тися им к не́коей стране́,

²⁸ И изме́ривше глубину́ обрето́ша саже́ней два́десять. Ма́ло же преше́дше и па́ки изме́ривше, обрето́ша саже́ней пятьна́десять.

²⁹ Боя́щеся же, да не ка́ко в пру́дная ме́ста впаду́т, от но́са корабля́ ве́ргше ко́твы четы́ре, моля́хомся, да день бу́дет.

³⁰ Кора́блеником же и́щущим бежа́ти из корабля́ и низве́сившим ладию́ в мо́ре, изве́том а́ки от но́са хотя́щим ко́твы просте́рти,

³¹ Рече́ Па́вел со́тнику и во́ином: а́ще не си́и пребу́дут в корабли́, вы спасти́ся не мо́жете.

³² Тогда́ во́ини отре́заша у́жя ладии́ и оста́виша ю́ отпа́сти.

³³ Егда́ же у́бо хотя́ше день бы́ти, моля́ше Па́вел вся прия́ти пи́щу, глаго́ля: четыренадеся́тый днесь день ча́юще, не я́дше пребыва́ете, ничто́же вкуси́вше.

³⁴ Те́мже молю́ вас прия́ти пи́щу, се бо к ва́шему спасе́нию есть, ни еди́ному бо от вас влас главы́ отпаде́т.

³⁵ Рек же сия́ и прие́м хлеб, благодари́ Бо́га пред все́ми и прело́мль нача́т я́сти.

³⁶ Благонаде́жни же бы́вше вси, и ти́и прия́ша пи́щу.

³⁷ Бе же в корабли́ всех душ две́сте се́дмьдесят и шесть.

³⁸ Насы́щшеся же бра́шна, облегчи́ша кора́бль, измета́юще пшени́цу в мо́ре.

³⁹ Егда́ же день бысть, земли́ не познава́ху, не́дро же не́кое смотря́ху иму́щее песо́к, ^[173] на не́же совеща́ша, а́ще мо́щно есть, извлещи́ кора́бль.

⁴⁰ И ко́твы собра́вше, везя́хуся по мо́рю, и ку́пно осла́бивше у́жя корми́лом, и воздви́гше ма́лое ве́трило к ды́шущему ве́трецу, везо́хомся на край. ^[174]

⁴¹ Впа́дше же в ме́сто исо́пное, увязи́ша кора́бль, и нос у́бо увя́зший пребы́сть недви́жимь, корми́ло же разбива́шеся от ну́жды волн.

⁴² Во́ином же сове́т бысть, да у́зники убию́т, да не кто поплы́в избе́гнет.

⁴³ Со́тник же, хотя́ соблюсти́ Па́вла, возбрани́ сове́ту их, повеле́ же могу́щим пла́вати, да изскочи́вше пе́рвее изы́ти на край,

⁴⁴ А про́чии, о́ви у́бо на дщи́цах, о́ви же на не́чем от корабля́. И та́ко бысть всем спасти́ся на зе́млю.

Глава 28

¹ Спасе́ни же бы́вше и́же о Па́вле от корабля́, ^[175] тогда́ разуме́ша, я́ко о́стров Мели́т нарица́ется.

² Ва́рвари же творя́ху не ма́лое милосе́рдие нам: возгне́щше бо огнь, прия́ша всех нас, за настоя́щий дождь и зи́му.

³ Сграма́ждшу же Па́влу ро́ждия мно́жество, и возло́жшу на огнь, ехи́дна от теплоты́ изше́дши, секну́ в ру́ку его́.

⁴ И я́коже ви́деша ва́рвари ви́сящу змию́ от руки́ его́, глаго́лаху друг ко дру́гу: вся́ко уби́йца есть челове́к сей, его́же спасе́на от мо́ря суд Бо́жий жи́ти не оста́ви.

⁵ Той же у́бо, оттря́с змию́ во огнь, ничто́же зло пострада́.

⁶ Они́ же ча́яху его́ хотя́ща возгоре́тися, или́ па́сти внеза́пу ме́ртва, на мно́зе же того́ ча́ющим, и ничто́же зло в нем бы́вше ви́дящим, претво́ршеся, глаго́лаху Бо́га того́ бы́ти.

⁷ О́крест же ме́ста о́наго бя́ху се́ла пе́рваго во о́строве, и́менем Попли́а, и́же прии́м нас, три дни любе́зне учреди́.

⁸ Бысть же отцу́ Попли́еву огне́м и водны́м ^[176] трудо́м одержи́му лежа́ти, к нему́же Па́вел вшед, и помоли́вся, и возло́ж ру́це свои́ нань, исцели́ его́.

⁹ Сему́ же бы́вшу, и про́чии иму́щии неду́ги во о́строве том, прихожда́ху и исцелева́хуся.

¹⁰ И́же и мно́гими честьми́ почто́ша нас, и отвозя́щимся нам, я́же на потре́бу вложи́ша.

¹¹ По трех же ме́сяцех отвезо́хомся в корабли́ александри́йстем, подпи́саном Диоску́ры, презиме́вшем во о́строве.

¹² И доплы́вше в Сираку́сы, пребы́хом дни три.

¹³ Отту́ду же отплы́вше, приидо́хом в Риги́ю, и по еди́ном дни возве́явшу ю́гу, во вторы́й день приидо́хом в Потио́лы.

¹⁴ Иде́же обре́тше бра́тию, умоле́ни бы́хом от них пребы́ти дней седмь, и та́ко в Рим идо́хом.

¹⁵ И от та́мо бра́тия, слы́шавше я́же о нас, изыдо́ша во сре́тение на́ше да́же до Аппи́ева торга́, и трие́х корче́мниц, и́хже ви́дев Па́вел и благодари́в Бо́га, прия́т дерзнове́ние.

¹⁶ Егда́ же приидо́хом в Рим, со́тник предаде́ у́зники воево́де, Па́влу же повеле́ пребыва́ти осо́бь, соблюда́ющим его́ во́ином.

¹⁷ Бысть же по днех трех, созва́ти Па́влу су́щия от иуде́ев пе́рвыя, сше́дшимся же им, глаго́лаше к ним: му́жие бра́тие, аз ничто́же проти́вно сотво́рь лю́дем или́ обы́чаем оте́ческим, у́зник от иерусали́млян пре́дан бых в ру́це ри́мляном.

¹⁸ И́же разсуди́вше я́же о мне, хотя́ху пусти́ти, зане́ ни еди́ней вине́ сме́ртней бы́ти во мне.

¹⁹ Сопроти́в же глаго́лющим иуде́ем, ну́жда ми бысть нарещи́ ке́саря, не я́ко язы́к мой име́я в чесо́м оклевета́ти.

²⁰ Сея́ ра́ди у́бо вины́ умоли́х вас ви́дети и бесе́довати, наде́жды бо ра́ди изра́илевы вери́гами си́ми обложе́н есмь.

²¹ Они́ же к нему́ ре́ша: мы ниже́ писа́ния о тебе́ прия́хом от иуде́й, ниже́ прише́д кто от бра́тий возвести́ или́ глаго́ла что о тебе́ зло.

²² Мо́лимся же от тебе́ слы́шати, я́же му́дрствуеши, о е́реси бо сей ^[177] ве́домо есть нам, я́ко всю́ду сопроти́в глаго́лема есть.

²³ Уста́вивше же ему́ день, приидо́ша к нему́ в странноприе́мницу мно́жайшии, и́мже сказа́ше свиде́тельствуя Ца́рствие Бо́жие, и уверя́я их, я́же о Иису́се от зако́на Моисе́ова и проро́к, от у́тра да́же до ве́чера.

²⁴ И о́ви у́бо ве́роваху глаго́лемым, о́ви же не ве́роваху.

²⁵ Несогла́сни же су́ще друг ко дру́гу отхожда́ху, ре́кшу Па́влу глаго́л еди́н, я́ко до́бре Дух Святы́й глаго́ла Иса́ием проро́ком ко отце́м на́шим,

²⁶ Глаго́ля: иди́ к лю́дем сим и рцы: слу́хом услы́шите, и не и́мате разуме́ти, и ви́дяще у́зрите, и не и́мате ви́дети.

²⁷ Одебеле́ бо се́рдце люде́й сих, и уши́ма тя́жко слы́шаша, и о́чи свои́ смежи́ша, да не ка́ко уви́дят очи́ма, и уши́ма услы́шат, и се́рдцем уразуме́ют, и обратя́тся, и исцелю́ их.

²⁸ Ве́домо у́бо да бу́дет вам, я́ко язы́ком посла́ся спасе́ние Бо́жие, си́и и услы́шат.

²⁹ И сия́ тому́ ре́кшу, отыдо́ша иуде́и, мно́гое иму́ще между́ собо́ю состяза́ние.

³⁰ Пребы́сть же Па́вел два ле́та испо́лнь свое́ю мздо́ю, и приима́ше вся приходя́щия к нему́,

³¹ Пропове́дуя Ца́рствие Бо́жие и уча́ я́же о Го́споде на́шем Иису́се Христе́ со вся́ким дерзнове́нием невозбра́нно.

Собо́рные посла́ния Святы́х Апо́столов

Посла́ние Иа́кова

Глава 1

¹ Иа́ков, Бо́гу и Го́споду Иису́су Христу́ раб, обемана́десяте коле́нома, и́же в разсе́янии, ра́доватися.

² Вся́ку ра́дость име́йте, бра́тие моя́, егда́ во искуше́ния впа́даете разли́чна,

³ Ве́дяще, я́ко искуше́ние ва́шея ве́ры соде́ловает терпе́ние,

⁴ Терпе́ние же де́ло соверше́нно да и́мать, я́ко да бу́дете соверше́нни и всеце́ли, ни в чем же лише́ни.

⁵ А́ще же кто от вас лише́н есть прему́дрости, да про́сит от даю́щаго Бо́га всем вку́пе и не поноша́ющаго, и да́стся ему́.

⁶ Да про́сит же ве́рою, ничто́же сумня́ся, сумня́й бо ся уподо́бися волне́нию морско́му, ве́тры возмета́ему и развева́ему.

⁷ Да не мнит бо челове́к он, я́ко прии́мет что от Бо́га.

⁸ Муж двоеду́шен неустро́ен во всех путе́х свои́х.

⁹ Да хва́лится же брат смире́нный в высоте́ свое́й,

¹⁰ Бога́тый же во смире́нии свое́м, зане́ я́коже цвет травны́й мимои́дет.

¹¹ Возсия́ бо со́лнце со зно́ем, и изсуши́ траву́, и цвет ея́ отпаде́, и благоле́пие ли́ца ея́ поги́бе: си́це и бога́тый в хожде́нии свое́м увяда́ет.

¹² Блаже́н муж, и́же претерпи́т искуше́ние, зане́ иску́сен быв, прии́мет вене́ц жи́зни, его́же обеща́ Бог лю́бящим Его́.

¹³ Никто́же искуша́емь да глаго́лет, я́ко от Бо́га искуша́емь есмь: Бог бо несть искуси́тель злым, ^[178] не искуша́ет же Той ни кого́же.

¹⁴ Ко́ждо же искуша́ется, от своея́ по́хоти влеко́мь и прельща́емь.

¹⁵ Та́же по́хоть заче́нши ражда́ет грех, грех же соде́ян ражда́ет смерть.

¹⁶ Не льсти́теся, бра́тие моя́ возлю́бленная:

¹⁷ Вся́ко дая́ние бла́го и всяк дар соверше́н свы́ше есть, сходя́й от Отца́ све́тов, у Него́же несть премене́ние, или́ преложе́ния стень. ^[179]

¹⁸ Восхоте́в бо породи́ нас сло́вом и́стины, во е́же бы́ти нам нача́ток не́кий созда́нием Его́.

¹⁹ Те́мже, бра́тие моя́ возлю́бленная, да бу́дет всяк челове́к скор услы́шати и ко́сен глаго́лати, ко́сен во гнев.

²⁰ Гнев бо му́жа, пра́вды Бо́жия не соде́ловает.

²¹ Сего́ ра́ди отло́жше вся́ку скве́рну и избы́ток зло́бы, в кро́тости приими́те всажде́нное сло́во, могу́щее спасти́ ду́ши ва́ша.

²² Быва́йте же творцы́ сло́ва, а не то́чию слы́шатели, прельща́юще себе́ саме́х.

²³ Зане́ а́ще кто есть слы́шатель сло́ва, а не творе́ц, таковы́й уподо́бися му́жу смотря́ющу лице́ бытия́ своего́ в зерца́ле:

²⁴ Усмотри́ бо себе́ и оты́де, и а́бие забы́, како́в бе.

²⁵ Прини́кий же в зако́н соверше́н свобо́ды, и пребы́в, сей не слы́шатель забы́тлив быв, но творе́ц де́ла, сей блаже́н в де́лании свое́м бу́дет.

²⁶ А́ще кто мни́тся ве́рен бы́ти в вас, и не обуздова́ет язы́ка своего́, но льстит се́рдце свое́, сего́ су́етна есть ве́ра.

²⁷ Ве́ра бо чиста́ и нескве́рна пред Бо́гом и Отце́м сия́ есть, е́же посеща́ти си́рых и вдови́ц в ско́рбех их, и нескве́рна себе́ блюсти́ от міра.

Глава 2

¹ Бра́тие моя́, не на лица́ зря́ще име́йте ве́ру Го́спода на́шего Иису́са Христа́ сла́вы.

² А́ще бо вни́дет в со́нмище ва́ше муж, злат пе́рстень нося́, в ри́зе све́тле, вни́дет же и нищь в ху́де оде́жде,

³ И воззрите́ на нося́щаго ри́зу све́тлу, и рече́те ему́: ты ся́ди зде до́бре; и ни́щему рече́те: ты ста́ни та́мо, или́ ся́ди зде на подно́жии мое́м;

⁴ И не разсмотри́сте в себе́, и бы́сте судии́ помышле́ний злых.

⁵ Слы́шите, бра́тие моя́ возлю́бленная, не Бог ли избра́ ни́щия міра сего́ бога́ты в ве́ре и насле́дники Ца́рствия, е́же обеща́ лю́бящим Его́?

⁶ Вы же укори́сте ни́щаго. Не бога́тии ли наси́луют вам, и ти́и влеку́т вы на суди́ща?

⁷ Не ти́и ли ху́лят до́брое и́мя нарече́нное на вас?

⁸ А́ще у́бо зако́н соверша́ете ца́рский, по Писа́нию: возлю́биши и́скренняго своего́ я́коже себе́ сама́го, до́бре творите́.

⁹ А́ще же на лица́ зрите́, то грех содева́ете, облича́еми от зако́на я́коже престу́пницы.

¹⁰ И́же бо весь зако́н соблюде́т, согреши́т же во еди́ном, бысть всем пови́нен.

¹¹ Реки́й бо, не прелюбы́ сотвори́ши, рекл есть, и не убие́ши. А́ще же не прелюбы́ сотвори́ши, убие́ши же, был еси́ престу́пник зако́на.

¹² Та́ко глаго́лите и та́ко твори́те, я́ко зако́ном свобо́дным хотя́ще суд прия́ти.

¹³ Суд бо без ми́лости не сотво́ршему ми́лости, и хва́лится ми́лость на суде́.

¹⁴ Ка́я по́льза, братие моя, а́ще ве́ру глаго́лет кто име́ти, дел же не и́мать? Еда́ мо́жет ве́ра спасти́ его́?

¹⁵ А́ще же брат или́ сестра́ на́га бу́дета и лише́на бу́дета дневны́я пи́щи,

¹⁶ Рече́т же и́ма кто от вас: иди́та с ми́ром, гре́йтася и насыща́йтася? Не даст же и́ма тре́бования теле́снаго, ка́я по́льза?

¹⁷ Та́кожде и ве́ра, а́ще дел не и́мать, мертва́ есть о себе́.

¹⁸ Но рече́т кто: ты ве́ру и́маши, аз же дела́ и́мам. Покажи́ ми ве́ру твою́ от дел твои́х, и аз тебе́ покажу́ от дел мои́х ве́ру мою́.

¹⁹ Ты ве́руеши, я́ко Бог еди́н есть, до́бре твори́ши, и бе́си ве́руют, и трепе́щут.

²⁰ Хо́щеши же ли разуме́ти, о челове́че су́етне, я́ко ве́ра без дел мертва́ есть?

²¹ Авраа́м оте́ц наш не от дел ли оправда́ся, возне́с Исаа́ка сы́на своего́ на же́ртвенник?

²² Ви́диши ли, я́ко ве́ра поспе́шествоваше дело́м его́, и от дел соверши́ся ве́ра?

²³ И соверши́ся Писа́ние глаго́лющее: ве́рова же Авраа́м Бо́гови, и вмени́ся ему́ в пра́вду, и друг Бо́жий нарече́ся.

²⁴ Зрите́ ли у́бо, я́ко от дел оправда́ется челове́к, а не от ве́ры еди́ныя?

²⁵ Та́кожде же и Раа́в блудни́ца не от дел ли оправда́ся, прие́мши схо́дники и ины́м путе́м изве́дши их?

²⁶ Я́коже бо те́ло без ду́ха мертво́ есть, та́ко и ве́ра без дел мертва́ есть.

Глава 3

¹ Не мно́зи учи́тели быва́йте, братие моя, ве́дяще, я́ко бо́льшее осужде́ние прии́мем,

² Мно́го бо согреша́ем вси. А́ще кто в сло́ве не согреша́ет, сей соверше́н муж, си́лен обузда́ти и все те́ло.

³ Се бо и ко́нем узды́ во уста́ влага́ем, да повину́ются нам, и все те́ло их обраща́ем.

⁴ Се и корабли́ вели́цы су́ще и от жесто́ких ве́тров заточа́еми, обраща́ются ма́лым корми́льцем, а́може стремле́ние пра́вящаго хо́щет.

⁵ Та́кожде же и язы́к мал уд есть, и вельми́ хва́лится. Се мал огнь, и коль вели́ки ве́щи сожига́ет.

⁶ И язы́к огнь, ле́пота непра́вды: си́це и язы́к водворя́ется во у́дех на́ших, скверня́ все те́ло, и паля́ ко́ло рожде́ния на́шего, и опаля́яся от гее́нны.

⁷ Вся́ко бо естество́ звере́й же и птиц, гад же и рыб, укроча́ется и укроти́тсяестество́м челове́ческим,

⁸ Язы́ка же никто́же мо́жет от челове́к укроти́ти, не удержи́мо бо зло, испо́лнь я́да смертоно́сна.

⁹ Тем благословля́ем Бо́га и Отца́, и тем клене́м челове́ки бы́вшия по подо́бию Бо́жию.

¹⁰ От тех же уст исхо́дит благослове́ние и кля́тва. Не подоба́ет, бра́тие моя́ возлю́бленная, сим та́ко быва́ти.

¹¹ Еда́ ли исто́чник от еди́наго у́стия источа́ет сла́дкое и го́рькое?

¹² Еда́ мо́жет, бра́тие моя́, смоко́вница ма́слины твори́ти, или́ виногра́дная лоза́ смо́квы? Та́кожде ни еди́н исто́чник сла́ну и сла́дку твори́т во́ду.

¹³ Кто прему́др и худо́г в вас, да пока́жет от до́браго жития́ дела́ своя́ в кро́тости и прему́дрости.

¹⁴ А́ще же за́висть го́рьку и́мате и рве́ние в сердца́х ва́ших, не хвали́теся, ни лжи́те на и́стину.

¹⁵ Несть сия́ прему́дрость свы́ше низходя́щи, но зе́мна, душе́вна, бесо́вска.

¹⁶ Иде́же бо за́висть и рве́ние, ту нестрое́ние и вся́ка зла вещь.

¹⁷ А я́же свы́ше прему́дрость, пе́рвее у́бо чиста́ есть, пото́м же ми́рна, кротка́, благопокорли́ва, испо́лнь ми́лости и плодо́в благи́х, несумне́нна и нелицеме́рна.

¹⁸ Плод же пра́вды в ми́ре се́ется творя́щим мир.

Глава 4

¹ Отку́ду бра́ни и сва́ры в вас? Не отсю́ду ли, от сласте́й ва́ших, вою́ющих во у́дех ва́ших?

² Жела́ете и не и́мате, убива́ете и зави́дите, и не мо́жете улучи́ти, сваря́етеся и бо́рете, и не и́мате, зане́ не про́сите.

³ Про́сите и не прие́млете, зане́ зле про́сите, да в сласте́х ва́ших иждиве́те.

⁴ Прелюбоде́и и прелюбоде́йцы, не ве́сте ли, я́ко любы́ міра сего́ вражда́ Бо́гу есть, и́же бо восхо́щет друг бы́ти міру, враг Бо́жий быва́ет.

⁵ Или́ мните́, я́ко всу́е Писа́ние глаго́лет, к за́висти жела́ет дух, и́же всели́ся в ны?

⁶ Бо́льшую же дае́т благода́ть. Те́мже глаго́лет: Госпо́дь го́рдым проти́вится, смире́нным же дае́т благода́ть.

⁷ Повини́теся убо Бо́гу, проти́витеся же диа́волу, и бежи́т от вас.

⁸ Прибли́житеся Бо́гу, и прибли́жится вам; очи́стите ру́це, гре́шницы, испра́вите сердца́ ва́ша, двоеду́шнии.

⁹ Постражди́те и слези́те и пла́читеся, смех ваш в плачь да обрати́тся, и ра́дость в се́тование.

¹⁰ Смири́теся пред Го́сподем, и вознесе́т вы.

¹¹ Не оклевета́йте друг дру́га, бра́тие, оклевета́яй бо бра́та, или́ осужда́яй бра́та своего́, оклевета́ет зако́н и осужда́ет зако́н. А́ще ли зако́н осужда́еши, не́си творе́ц зако́на, но судия́.

¹² Еди́н есть Законополо́жник и Судия́, моги́й спасти́ и погуби́ти, ты же кто еси́ осужда́яй дру́га?

¹³ Слы́шите ны́не, глаго́лющии: днесь или́ у́тре по́йдем во он град, и сотвори́м ту ле́то еди́но, и ку́плю де́ем и приобре́тение. ^[180]

¹⁴ И́же не ве́сте, что у́тре случи́тся. Ка́я бо жизнь ва́ша, па́ра бо есть, я́же вма́ле явля́ется, пото́м же исчеза́ет.

¹⁵ Вме́сто е́же бы глаго́лати вам: а́ще Госпо́дь восхо́щет, и жи́ви бу́дем, и сотвори́м сие́ или́ о́но.

¹⁶ Ны́не же хва́литеся в горды́нях ва́ших: вся́ка хвала́ такова́ зла есть.

¹⁷ Ве́дущему у́бо добро́ твори́ти, и не творя́щему, грех ему́ есть.

Глава 5

¹ Прииди́те ны́не, бога́тии, пла́читеся и рыда́йте о лю́тых ско́рбех ва́ших гряду́щих на вы.

² Бога́тство ва́ше изгни́, и ри́зы ва́ша мо́лие поядо́ша.

³ Зла́то ва́ше и сребро́ изоржа́ве, и ржа их в послушество́ на вас бу́дет, и снесть пло́ти ва́ша а́ки огнь, его́же сниска́сте в после́дния дни.

⁴ Се мзда де́лателей де́лавших ни́вы ва́ша, удержа́ная от вас, вопие́т, и вопие́ния жа́вших во у́ши Го́спода Савао́фа внидо́ша.

⁵ Возвесели́стеся на земли́, и наслади́стеся, упита́сте сердца́ ва́ша а́ки в день заколе́ния.

⁶ Осуди́сте, уби́сте Пра́веднаго, не проти́вится вам.

⁷ Долготерпи́те у́бо, бра́тие моя́, до прише́ствия Госпо́дня. Се земледе́лец ждет честна́го плода́ от земли́, долготерпя́ о нем, до́ндеже прии́мет дождь ран и по́зден.

⁸ Долготерпи́те у́бо и вы, утверди́те сердца́ ва́ша, я́ко прише́ствие Госпо́дне прибли́жися.

⁹ Не воздыха́йте друг на дру́га, бра́тие, да не осужде́ни бу́дете; се Судия́ пред две́рьми стои́т.

¹⁰ О́браз приими́те, бра́тие моя́, злострада́ния и долготерпе́ния, проро́ки, и́же глаго́лаша и́менем Госпо́дним.

¹¹ Се блажи́м терпя́щия. Терпе́ние И́овле слы́шасте и кончи́ну Госпо́дню ви́десте, я́ко многоми́лостив есть Госпо́дь и щедр.

¹² Пре́жде же всех, бра́тие моя́, не клени́теся ни не́бом, ни земле́ю, ни ино́ю ко́ею кля́твою, бу́ди же вам е́же ей, ей, и е́же ни, ни, да не в лицеме́рие впаде́те.

¹³ Злостра́ждет ли кто в вас, да моли́тву де́ет; благоду́шствует ли кто, да пое́т.

¹⁴ Боли́т ли кто в вас, да призове́т пресви́теры Церко́вныя, и да моли́тву сотворя́т над ним, пома́завше его́ еле́ем во и́мя Госпо́дне.

¹⁵ И моли́тва ве́ры спасе́т боля́щаго, и воздви́гнет его́ Госпо́дь, и а́ще грехи́ бу́дет сотвори́л, отпу́стятся ему́.

¹⁶ Испове́дайте у́бо друг дру́гу согреше́ния и моли́теся друг за дру́га, я́ко да исцеле́ете: мно́го бо мо́жет моли́тва пра́веднаго поспешеству́ема.

¹⁷ Илиа́ челове́к бе подобостра́стен нам, и моли́твою помоли́ся, да не бу́дет дождь, и не одожди́ по земли́ ле́та три и ме́сяц шесть.

¹⁸ И па́ки помоли́ся, и не́бо дождь даде́, и земля́ прозябе́ плод свой.

¹⁹ Бра́тие, а́ще кто в вас заблу́дит от пути́ и́стины, и обрати́т кто его́,

²⁰ Да весть, я́ко обрати́вый гре́шника от заблужде́ния пути́ его́ спасе́т ду́шу от сме́рти и покры́ет мно́жество грехо́в.

Пе́рвое посла́ние Петра́

Глава 1

¹ Петр, Апо́стол Иису́с Христо́в, избра́нным прише́льцем разсе́яния По́нта, Галати́и, Каппадоки́и, Аси́и и Вифини́и,

² По прозре́нию Бо́га Отца́, во святы́ню Ду́ха, в послуша́ние и кропле́ние Кро́ве Иису́с Христо́вы, благода́ть вам и мир да умно́жится.

³ Благослове́н Бог и Оте́ц Го́спода на́шего Иису́са Христа́, И́же по мно́зей Свое́й ми́лости порожде́й нас во упова́ние жи́во воскресе́нием Иису́с Христо́вым от ме́ртвых,

⁴ В насле́дие нетле́нно, и нескве́рно, и неувяда́емо, соблюде́но на Небесе́х вас ра́ди,

⁵ И́же си́лою Бо́жиею соблюде́ни ве́рою во спасе́ние, гото́вое яви́тися во вре́мя после́днее.

⁶ О не́мже ра́дуйтеся, ма́ло ны́не, а́ще ле́по есть, приско́рбни бы́вше в разли́чных напа́стех,

⁷ Да искуше́ние ва́шея ве́ры многочестне́йше зла́та ги́бнуща, огне́м же искуше́на, обря́щется в похвалу́ и честь и сла́ву, во открове́нии Иису́с Христо́ве.

⁸ Его́же не ви́девше, лю́бите, и на Него́же ны́не не зря́ще, ве́рующе же, ра́дуетеся ра́достию неизглаго́ланною и просла́вленною,

⁹ Прие́млюще кончи́ну ве́ре ва́шей, спасе́ние душа́м.

¹⁰ О не́мже спасе́нии взыска́ша и испыта́ша проро́цы, и́же о ва́шей благода́ти прореко́ша,

¹¹ Испыта́юще, в каково́ или́ в ко́е вре́мя явля́ше в них Дух Христо́в, пре́жде свиде́тельствуя о Христо́вых страсте́х, и я́же по сих сла́вах.

¹² И́мже откры́ся, я́ко не им саме́м, но нам служа́ху сия́, я́же ны́не возвести́шася вам благовествова́вшими вам Ду́хом Святы́м по́сланным с небесе́, в ня́же жела́ют А́нгели прини́кнути.

¹³ Те́мже, возлю́бленнии, препоя́савше чре́сла помышле́ния ва́шего, трезвя́щеся соверше́нне, упова́йте на приноси́мую вам благода́ть открове́нием Иису́с Христо́вым.

¹⁴ Я́ко ча́да послуша́ния, не преобразу́ющеся пе́рвыми неве́дения ва́шего похоте́нии,

¹⁵ Но по зва́вшему вы Свято́му, и са́ми свя́ти во всем житии́ бу́дите.

¹⁶ Зане́ пи́сано есть: свя́ти бу́дите, я́ко Аз Свят есмь.

¹⁷ И а́ще Отца́ называ́ете, нелицеме́рно судя́ща кому́ждо по де́лу, со стра́хом жития́ ва́шего вре́мя жи́тельствуйте,

¹⁸ Ве́дяще, я́ко не истле́нным сребро́м или́ зла́том изба́вистеся от су́етнаго ва́шего жития́, отцы́ пре́даннаго,

¹⁹ Но честно́ю кро́вию, я́ко а́гнца непоро́чна и пречи́ста, Христа́.

²⁰ Предуве́дена у́бо пре́жде сложе́ния міра, я́вльшася же в после́дняя ле́та вас ра́ди,

²¹ И́же Его́ ра́ди ве́руете в Бо́га воздви́гшаго Его́ из ме́ртвых и сла́ву ему́ да́вша, я́ко да ве́ра ва́ша и упова́ние бу́дет на Бо́га.

²² Ду́ши ва́ша очи́стивше в послуша́нии и́стины Ду́хом, в братолю́бие нелицеме́рно, от чи́ста се́рдца друг дру́га люби́те приле́жно.

²³ Порожде́ни не от се́мене истле́нна, но неистле́нна, слово́м жива́го Бо́га и пребыва́юща во ве́ки.

²⁴ Зане́ вся́ка пло́ть я́ко трава́, и вся́ка сла́ва челове́ча я́ко цвет тра́вный: и́зсше трава́, и цвет ея́ отпаде́:

²⁵ Глаго́л же Госпо́днь пребыва́ет во ве́ки. Се же есть глаго́л благовествова́нный в вас.

Глава 2

¹ Отло́жше у́бо вся́ку зло́бу и вся́ку ле́сть и лицеме́рие и за́висть и вся клеветы́,

² Я́ко новорожде́ни младе́нцы, слове́сное и неле́стное мле́ко возлюби́те, я́ко да о нем возрасте́те во спасе́ние.

³ Поне́же вкуси́сте, я́ко благ Госпо́дь.

⁴ К Нему́же приходя́ще, ка́мени жи́ву, от челове́к у́бо уничиже́ну, от Бо́га же избра́ну, че́стну,

⁵ И са́ми я́ко ка́мение жи́во зижди́теся во храм духо́вен, святи́тельство свя́то, возноси́ти же́ртвы духо́вны, благоприя́тны Бо́гови Иису́с Христо́м.

⁶ Зане́ пи́сано есть в Писа́нии: се полага́ю в Сио́не ка́мень краеуго́лен, избра́н, че́стен, и ве́руяй вонь не постыди́тся.

⁷ Вам у́бо честь ве́рующим, а проти́вящимся ка́мень, его́же небрего́ша зи́ждущии, сей бысть во главу́ у́гла, и ка́мень претыка́ния и ка́мень собла́зна.

⁸ О не́мже и претыка́ются сло́ву противля́ющиися, на не́же и положе́ни бы́ша.

⁹ Вы же род избра́н, ца́рское свяще́ние, язы́к свят, лю́дие обновле́ния, я́ко да доброде́тели возвестите́ из тмы вас Призва́вшаго в чу́дный Его́ свет,

¹⁰ И́же иногда́ не лю́дие, ны́не же лю́дие Бо́жии; и́же не поми́ловани, ны́не же поми́ловани бы́сте.

¹¹ Возлю́бленнии, молю́, я́ко прише́льцы и стра́нники, огреба́тися от плотски́х похоте́й, я́же вою́ют на ду́шу,

¹² Житие́ ва́ше иму́ще добро́ во язы́цех, да о не́мже клеве́щут вас, а́ки злоде́ев, от до́брых дел ви́девше, просла́вят Бо́га в день посеще́ния.

¹³ Повини́теся у́бо вся́кому челове́чу созда́нию, ^[181] Го́спода ра́ди, а́ще царю́, я́ко преоблада́ющу,

¹⁴ А́ще ли же князе́м, я́ко от Него́ по́сланным, во отмще́ние у́бо злоде́ем, в похвалу́ же благотво́рцем.

¹⁵ Я́ко та́ко есть во́ля Бо́жия, благотворя́щим обуздова́ти безу́мных челове́к неве́жество,

¹⁶ Я́ко свобо́дни, а не я́ко прикрове́ние иму́ще зло́бы свобо́ду, но я́ко раби́ Бо́жии.

¹⁷ Всех почита́йте, бра́тство возлюби́те, Бо́га бо́йтеся, царя́ чти́те.

¹⁸ Раби́, повину́йтеся во вся́ком стра́се влады́кам, не то́кмо благи́м и кро́тким, но и стропти́вым.

¹⁹ Се бо есть уго́дно пред Бо́гом, а́ще со́вести ра́ди Бо́жия терпи́т кто ско́рби, стражда́ без пра́вды.

²⁰ Ка́я бо похвала́, а́ще согреша́юще, му́чими, терпите́? Но а́ще добро́ творя́ще и стра́ждуще терпите́, сие́ уго́дно пред Бо́гом.

²¹ На сие́ бо и зва́ни бы́сте, зане́ и Христо́с пострада́ по нас, нам оста́вль о́браз, да после́дуем стопа́м Его́.

²² И́же греха́ не сотвори́, ни обре́теся лесть во усте́х Его́.

²³ И́же укоря́емь, проти́ву не укоря́ше, стражда́ не преща́ше, предая́ше же судя́щему пра́ведно.

²⁴ И́же грехи́ на́ша Сам вознесе́ на те́ле Свое́м на дре́во, да от грех избы́вше, пра́вдою поживе́м. Его́же я́звою изцеле́сте.

²⁵ Бе́сте бо я́ко о́вцы заблу́ждшия не иму́щя па́стыря, но возврати́стеся ны́не к Па́стырю и Посети́телю душ ва́ших.

Глава 3

¹ Та́кожде же и жены́, повину́ющяся свои́м муже́м, да и а́ще не́цыи не повину́ются сло́ву, же́нским житие́м без сло́ва плене́ни бу́дут,

² Ви́девше е́же со стра́хом чи́сто житие́ ва́ше.

³ И́мже да бу́дет не вне́шняя, плете́ния влас и обложе́ния зла́та, или́ одея́ния риз, ле́пота,

⁴ Но потае́ный се́рдца челове́к, в неистле́нии кро́ткаго и молчали́ваго ду́ха, е́же есть пред Бо́гом многоце́нно.

⁵ Та́ко бо иногда́ и святы́я жены́, упова́ющия на Бо́га, украша́ху себе́, повину́ющяся свои́м муже́м.

⁶ Я́коже Са́рра послу́шаше Авраа́ма, господи́на того́ зову́щи, ея́же бы́сте ча́да, благотворя́щя и не боя́щяся ни еди́наго стра́ха.

⁷ Му́жие та́кожде, вку́пе живу́ще со свои́ми жена́ми по ра́зуму, я́ко немощне́йшу сосу́ду же́нскому воздаю́ще честь, я́ко и снасле́дницы благода́тныя жи́зни, во е́же не прекраща́тися моли́твам ва́шим.

⁸ Коне́ц же, вси единому́дрени бу́дите, ми́лостиви, братолю́бцы, милосе́рдни, благоутро́бни, мудролю́бцы, смиреному́дри,

⁹ Не воздаю́ще зла за зло, или́ досажде́ния за досажде́ние, супроти́вное же благословя́ще, ве́дяще, я́ко на се зва́ни бы́сте, да благослове́ние насле́дите.

¹⁰ Хотя́й бо живо́т люби́ти и ви́дети дни бла́ги, да удержи́т язы́к свой от зла, и устне́ свои́ е́же не глаго́лати льсти.

¹¹ Да уклони́тся от зла, и да сотвори́т бла́го, да взы́щет ми́ра и да держи́тся его́,

¹² Зане́ о́чи Госпо́дни на пра́ведныя, и у́ши Его́ в моли́тву их, лице́ же Госпо́дне на творя́щия злая, е́же потреби́ти их от земли́.

¹³ И кто озло́бит вас, а́ще благо́му подо́бницы бу́дете?

¹⁴ Но а́ще и стра́ждете пра́вды ра́ди, блаже́ни есте́, стра́ха же их не убо́йтеся, ниже́ смуща́йтеся.

¹⁵ Го́спода же Бо́га освяти́те в сердца́х ва́ших: гото́ви же при́сно ко отве́ту вся́кому вопроша́ющему вы сло́во о ва́шем упова́нии,

¹⁶ С кро́тостию и стра́хом, со́весть иму́ще бла́гу, да о не́мже клеве́щут вас а́ки злоде́ев, постыдя́тся злосло́вящии ва́ше благо́е о Христе́ житие́.

¹⁷ Лу́чше бо есть благо́е творя́щим, [а́ще хо́щет во́ля Бо́жия,] пострада́ти, не́жели зло творя́щим.

¹⁸ Зане́ и Христо́с еди́ною о гресе́х на́ших пострада́, пра́ведник за непра́ведники, да приведе́т ны Бо́гови, умерщвле́н у́бо быв пло́тию, ожи́в же ду́хом,

¹⁹ О не́мже и су́щим в темни́це духово́м соше́д пропове́да,

²⁰ Проти́вльшимся иногда́, егда́ ожида́ше Бо́жие долготерпе́ние, во дни Но́евы, де́лаему ковче́гу, в не́мже ма́ло, си́речь осмь душ, спасо́шася от воды́.

²¹ Его́же воображе́ние ны́не и нас спаса́ет креще́ние, не плотски́я отложе́ние скве́рны, но со́вести бла́ги вопроше́ние у Бо́га, воскресе́нием Иису́с Христо́вым,

²² И́же есть одесну́ю Бо́га, возше́д на не́бо, поко́ршимся Ему́ А́нгелом и Власте́м и Си́лам.

Глава 4

¹ Христу́ у́бо пострада́вшу за ны пло́тию, и вы в ту же мысль вооружи́теся, зане́ пострада́вый пло́тию, преста́ от греха́,

² Во е́же не ктому́ в челове́ческия по́хоти, но в во́лю Бо́жию про́чее во пло́ти жи́ти вре́мя.

³ Довле́ет бо вам мимоше́дшее вре́мя жития́, во́лю язы́ческую твори́вшим, хо́ждшим в нечистота́х, в по́хотех, в скотоло́жстве, в по́мыслех, в пия́нстве, в козлогласова́ниих, в лихоима́ниих и богоме́рзких идолослуже́ниих.

⁴ О не́мже дивя́тся, не сходя́щимся вам в то же блуда́ разлия́ние, ху́ляще.

⁵ И́же воздадя́т сло́во гото́ву Су́щему суди́ти живы́м и ме́ртвым.

⁶ На се бо и ме́ртвым благовести́ся, да суд у́бо прии́мут по челове́ку пло́тию, поживу́т же по Бо́зе ду́хом.

⁷ Всем же кончи́на прибли́жися. Уцелому́дритеся у́бо и трезви́теся в моли́твах.

⁸ Пре́жде же всех друг ко дру́гу любо́вь приле́жну име́йте, зане́ любо́вь покрыва́ет мно́жество грехо́в.

⁹ Страннолю́бцы друг ко дру́гу, без ропта́ний.

¹⁰ Ко́ждо я́коже прия́т дарова́ние, между́ себе́ сим служа́ще, я́ко до́брии строи́телие разли́чныя благода́ти Бо́жия.

¹¹ А́ще кто глаго́лет, я́ко словеса́ Бо́жия, а́ще кто слу́жит, я́ко от кре́пости, ю́же подае́т Бог, да о всем сла́вится Бог Иису́с Христо́м, Ему́же есть сла́ва и держа́ва во ве́ки веко́в. Ами́нь.

¹² Возлю́бленнии, не диви́теся е́же в вас раждеже́нию ^[182] ко искуше́нию вам быва́ему, я́ко чу́жду вам случа́ющуся.

¹³ Но поне́же приобща́етеся Христо́вым страсте́м, ра́дуйтеся, я́ко да и в явле́ние сла́вы Его́ возра́дуетеся веселя́щеся.

¹⁴ А́ще укоря́еми быва́ете о и́мени Христо́ве, блаже́ни есте́ я́ко Сла́вы и Бо́жий Дух на вас почива́ет, о́неми у́бо ху́лится, а ва́ми прославля́ется.

¹⁵ Да не кто у́бо от вас постра́ждет я́ко уби́йца, или́ я́ко тать, или́ я́ко злоде́й, или́ я́ко чуждь посети́тель.

¹⁶ А́ще ли же я́ко христиа́нин, да не стыди́тся, да прославля́ет же Бо́га в ча́сти сей.

¹⁷ Я́ко вре́мя нача́ти суд от до́му Бо́жия, а́ще ли пре́жде от вас, ка́я кончи́на проти́вящимся Бо́жию Ева́нгелию?

¹⁸ И а́ще пра́ведник едва́ спасе́тся, нечести́вый и гре́шный где яви́тся?

¹⁹ Те́мже и стра́ждущии по во́ли Бо́жией, я́ко ве́рну Зижди́телю да предадя́т ду́ши своя́ во благотворе́нии.

Глава 5

¹ Ста́рцы и́же в вас молю́, я́ко ста́рец сый и свиде́тель Христо́вым страсте́м, и́же и хотя́щей сла́ве яви́тися о́бщник:

² Паси́те е́же в вас ста́до Бо́жие, посеща́юще не ну́ждею, но во́лею и по Бо́зе, ниже́ непра́ведными прибы́тки, но усе́рдно,

³ Ни я́ко облада́юще при́чту, но о́брази быва́йте ста́ду.

⁴ И я́вльшуся Пастыренача́льнику, прии́мете неувяда́емый сла́вы вене́ц.

⁵ Та́коже ю́нии, повини́теся ста́рцем, вси же друг дру́гу повину́ющеся, смиреному́дрие стяжи́те, зане́ Бог го́рдым проти́вится, смире́нным же дае́т благода́ть.

⁶ Смири́теся у́бо под кре́пкую ру́ку Бо́жию, да вы вознесе́т во вре́мя.

⁷ Всю печа́ль ва́шу возве́ргше Нань, я́ко Той пече́тся о вас.

⁸ Трезви́теся, бо́дрствуйте, зане́ супоста́т ваш диа́вол, я́ко лев рыка́я, хо́дит, иски́й кого́ поглоти́ти.

⁹ Ему́же проти́витеся тве́рди ве́рою, ве́дуще, я́ко те́же стра́сти случа́ются ва́шему бра́тству, е́же в міре.

¹⁰ Бог же вся́кия благода́ти, призва́вый вас в ве́чную Свою́ сла́ву о Христе́ Иису́се ма́ло пострада́вшия, Той да соверши́т вы, да утверди́т, да укрепи́т, да оснуе́т.

¹¹ Тому́ сла́ва и держа́ва во ве́ки веко́в. Ами́нь.

¹² Силуа́ном вам ве́рным бра́том, я́ко непщу́ю, вма́ле написа́х, моля́ и засвиде́тельствуя сей бы́ти и́стинней благода́ти Бо́жией, в не́йже стоите́.

¹³ Целу́ет вы я́же в Вавило́не соизбра́нная, и Ма́рко сын мой.

¹⁴ Целу́йте друг дру́га лобза́нием любве́. Мир вам всем о Христе́ Иису́се. Ами́нь.

Второ́е посла́ние Петра́

Глава 1

¹ Си́мон Петр, раб и посла́нник Иису́с Христо́в, равноче́стную с на́ми получи́вшим ве́ру в пра́вде Бо́га на́шего и Спа́са Иису́са Христа́,

² Благода́ть вам и мир да умно́жится в позна́нии Бо́га, и Христа́ Иису́са Го́спода на́шего.

³ Я́ко вся нам Боже́ственныя си́лы Его́, я́же к животу́ и благоче́стию, подана́ ра́зумом ^[183] Призва́вшаго нас сла́вою и доброде́телию.

⁴ И́миже честна́я нам и вели́кая обетова́ния дарова́шася, я́ко да сих ра́ди бу́дете Боже́ственнаго прича́стницы естества́, отбе́гше, я́же в міре, по́хотныя тли.

⁵ И са́мое же сие́, тща́ние все привне́сше, подади́те в ве́ре ва́шей доброде́тель, в доброде́тели же ра́зум,

⁶ В ра́зуме же воздержа́ние, в воздержа́нии же терпе́ние, в терпе́нии же благоче́стие,

⁷ Во благоче́стии же братолю́бие, в братолю́бии же любо́вь.

⁸ Сим бо су́щим в вас и мно́жащимся, не пра́здных, ниже́ безпло́дных сотворя́т вы в Го́спода на́шего Иису́са Христа́ позна́ние.

⁹ Ему́же бо несть сих, слеп есть, мжай, забве́ние прие́м чище́ния дре́вних свои́х грехо́в.

¹⁰ Те́мже па́че, бра́тие, потщи́теся изве́стно ва́ше зва́ние и избра́ние твори́ти. Сия́ бо творя́ще, не и́мате согреши́ти никогда́же.

¹¹ Си́це бо оби́льно припода́стся вам вход в ве́чное Ца́рство Го́спода на́шего и Спа́са Иису́са Христа́.

¹² Сего́ ра́ди не обленю́ся воспомина́ти при́сно вам о сих, а́ще и ве́дите, и утвержде́ни есте́ в настоя́щей и́стине.

¹³ Пра́ведно бо мню, доне́леже есмь в сем телеси́, возставля́ти вас воспомина́нием:

¹⁴ Ве́дый, я́ко ско́ро есть отложе́ние телесе́ моего́, я́коже и Госпо́дь наш Иису́с Христо́с сказа́ мне.

¹⁵ Потщу́ся же и всегда́ име́ти вас по мое́м исхо́де, е́же о сих па́мять твори́ти.

¹⁶ Не ухищре́нным бо ба́снем после́довавше, сказа́хом вам си́лу и прише́ствие Го́спода на́шего Иису́са Христа́, но самови́дцы бы́вше вели́чествию О́наго.

¹⁷ Прие́м бо от Бо́га Отца́ честь и сла́ву, гла́су прише́дшу к Нему́ такову́ от велеле́пныя сла́вы: Сей есть Сын Мой Возлю́бленный, о Не́мже Аз благоизво́лих.

¹⁸ И сей глас мы слы́шахом с небесе́ сше́дш, с Ним су́ще на горе́ святе́й.

¹⁹ И и́мамы изве́стнейшее проро́ческое сло́во, ему́же внима́юще я́коже свети́лу сия́ющу в те́мнем ме́сте, до́бре творите́, до́ндеже день озари́т, и денни́ца возсия́ет в сердца́х ва́ших.

²⁰ Сие́ пре́жде ве́дуще, я́ко вся́ко проро́чество кни́жное по своему́ сказа́нию не быва́ет.

²¹ Ни бо во́лею бысть когда́ челове́ком проро́чество, но от Свята́го Ду́ха просвеща́еми глаго́лаша святи́и Бо́жии челове́цы.

Глава 2

¹ Бы́ша же и лжи́вии проро́цы в лю́дех, я́коже и в вас бу́дут лжи́вии учи́телие, и́же внесу́т е́реси поги́бели, и иску́пльшаго их Влады́ки отмета́ющеся, приводя́ще себе́ ско́ру поги́бель.

² И мно́зи после́дствуют их нечистота́м, и́миже путь и́стинный поху́лится.

³ И в преумноже́нии льсти́вых слове́с ^[184] вас уловя́т: и́хже суд искони́ не косни́т, и поги́бель их не дре́млет.

⁴ А́ще бо Бог а́нгелов согреши́вших не пощаде́, но плени́цами мра́ка связа́в, предаде́ на суд му́чимы блюсти́.

⁵ И пе́рваго міра не пощаде́, но осма́го Но́а пра́вды пропове́дника сохрани́, пото́п міру нече́ствовавших наведе́.

⁶ И гра́ды Содо́мския и Гомо́ррския сжег, разоре́нием осуди́, о́браз хотя́щим нече́ствовати положи́в.

⁷ И пра́веднаго Ло́та, оби́дима от беззако́нных в нечистоте́ сожи́тия, изба́ви.

⁸ Виде́нием бо и слу́хом пра́ведный, живы́й в них, день от дне ду́шу пра́ведну беззако́нными де́лы му́чаше.

⁹ Весть Госпо́дь благочести́выя от напа́сти избавля́ти, непра́ведники же на день су́дный му́чимы блюсти́.

¹⁰ Наипа́че же во след плотски́я по́хоти скверне́ния ходя́щия и о госпо́дьстве нерадя́щия, продерза́теле, себе́ уго́дницы, сла́вы не трепе́щут ху́ляще,

¹¹ Иде́же А́нгели кре́постию и си́лою бо́льши су́ще, не терпя́т на ся от Го́спода укори́знена суда́. ^[185]

¹² Си́и же, я́ко ско́ти живо́тни естество́м бы́вше в поги́бель и тлю, в ни́хже не разуме́ют ху́ляще, во истле́нии свое́м истле́ют.

¹³ Прие́млюще мзду непра́ведну, сласть мня́ще вседне́вное насыще́ние, скверни́тели и поро́чницы, пита́ющеся лестьми́ свои́ми, яду́ще с ва́ми.

¹⁴ О́чи иму́ще испо́лнь блудодея́ния и непреста́емаго греха́, прельща́юще ду́ши неутвержде́ны, се́рдце науче́но лихои́мству иму́ще, кля́твы ча́да.

¹⁵ Оста́вльше пра́вый путь заблуди́ша, после́довавше пути́ Валаа́мову Восо́рова, и́же мзду непра́ведну возлюби́.

¹⁶ Обличе́ние же име́ своего́ беззако́ния, подъяре́мник безгла́сен, челове́ческим гла́сом провеща́вш, возбрани́ проро́ка безу́мие.

¹⁷ Си́и суть исто́чницы безво́дни, о́блацы и мглы от ветр преноси́ми, и́мже мрак те́мный во ве́ки блюде́тся.

¹⁸ Прего́рдая бо суеты́ веща́юще, прельща́ют в скве́рны плотски́я по́хоти, отбега́юще их отню́д живу́щих во льсти.

¹⁹ Свобо́ду им обещава́юще, са́ми раби́ су́ще тле́ния, и́мже бо кто побежде́н быва́ет, сему́ и рабо́тен есть.

²⁰ А́ще бо отбе́гше скверн міра в ра́зум ^[186] Го́спода и Спа́са на́шего Иису́са Христа́, си́ми же па́ки спле́тшеся побежда́еми быва́ют, бы́ша им после́дняя го́рша пе́рвых.

²¹ Лу́чше бо бе им не позна́ти пути́ пра́вды, не́жели позна́вшим возврати́тися вспять от пре́данныя им святы́я за́поведи.

²² Случи́ся бо им и́стинная при́тча: пес возвра́щься на свою́ блево́тину, и свиния́, омы́вшися, в кал ти́нный.

Глава 3

¹ Сие́ уже́, возлю́бленнии, второ́е вам пишу́ посла́ние, в ни́хже возбужда́ю воспомина́нием ваш чи́стый смысл,

² Помяну́ти пре́жде рече́нныя глаго́лы от святы́х проро́к, и Апо́стол ва́ших за́поведь Го́спода и Спа́са.

³ Сие́ пре́жде ве́дяще, я́ко прии́дут в после́дния дни руга́теле, по свои́х по́хотех ходя́ще

⁴ И глаго́люще: где есть обетова́ние прише́ствия Его́, отне́леже бо отцы́ успо́ша, вся та́ко пребыва́ют от нача́ла созда́ния.

⁵ Таи́тся бо им сие́ хотя́щим, я́ко небеса́ бе́ша испе́рва, и земля́ от воды́ и водо́ю ^[187] соста́влена, Бо́жиим сло́вом,

⁶ И́миже тогда́шний міръ, водо́ю потопле́н быв, поги́бе.

⁷ А ны́нешняя небеса́ и земля́ те́мже Сло́вом сокрове́на суть, огню́ блюдо́ма на день суда́ и поги́бели нечести́вых челове́к.

⁸ Еди́но же сие́ да не утаи́тся вас, возлю́бленнии, я́ко еди́н день пред Го́сподем я́ко ты́сяща лет, и ты́сяща лет я́ко день еди́н.

⁹ Не косни́т Госпо́дь обетова́ния, я́коже не́цыи косне́ние мнят, но долготерпи́т на нас, не хотя́ да кто поги́бнет, но да вси в покая́ние прии́дут.

¹⁰ Прии́дет же день Госпо́день я́ко тать в нощи́, во́ньже небеса́ у́бо с шу́мом ми́мо и́дут, ^[188] стихи́и же сжига́емы разоря́тся, земля́ же и я́же на ней дела́ сгоря́т.

¹¹ Сим у́бо всем разоря́емым, ка́цем подоба́ет бы́ти вам во святы́х пребыва́ниих и благоче́стиих,

¹² Ча́ющим и скоре́е бы́ти жела́ющим прише́ствия Бо́жияго дне, его́же ра́ди небеса́ жего́ма разоря́тся, и стихи́и опаля́емы раста́ются?

¹³ Но́ва же небесе́ и но́вы земли́ по обетова́нию Его́ ча́ем, в ни́хже пра́вда живе́т.

¹⁴ Те́мже, возлю́бленнии, сих ча́юще, потщи́теся нескве́рни и непоро́чни Тому́ обрести́ся в ми́ре,

¹⁵ И Го́спода на́шего долготерпе́ние спасе́ние непщу́йте, я́коже и возлю́бленный наш брат Па́вел по да́нней ему́ прему́дрости написа́ вам.

¹⁶ Я́коже и во всех свои́х посла́ниих, глаго́ля в них о сих, в ни́хже суть неудо́бь разу́мна не́кая, я́же ненауче́ни и неутвержде́ни развраща́ют, я́коже и про́чая Писа́ния, к свое́й поги́бели им.

¹⁷ Вы же у́бо, возлю́бленнии, предве́дяще храни́теся, да не ле́стию беззако́нных сведе́ни бы́вше, отпаде́те своего́ утвержде́ния.

¹⁸ Но да расте́те во благода́ти и ра́зуме Го́спода на́шего и Спа́са Иису́са Христа́. Тому́ сла́ва и ны́не и в день ве́ка. Ами́нь.

Пе́рвое посла́ние Иоа́нна Богосло́ва

Глава 1

¹ Е́же бе испе́рва, е́же слы́шахом, е́же ви́дехом очи́ма на́шима, е́же узре́хом, и ру́ки на́ша осяза́ша, о Словеси́ Живо́тнем.

² [И Живо́т яви́ся, и ви́дехом, и свиде́тельствуем, и возвеща́ем вам Живо́т ве́чный, И́же бе у Отца́, и яви́ся нам.]

³ Е́же ви́дехом и слы́шахом, пове́даем вам, да и вы обще́ние и́мате с на́ми: обще́ние же на́ше со Отце́м и с Сы́ном Его́ Иису́сом Христо́м.

⁴ И сия́ пи́шем вам, да ра́дость ва́ша бу́дет испо́лнена.

⁵ И сие́ есть обетова́ние, е́же слы́шахом от Него́, и пове́даем вам, я́ко Бог Свет есть, и тмы в Нем несть ни еди́ныя.

⁶ А́ще рече́м, я́ко обще́ние и́мамы с Ним, и во тме хо́дим, лжем и не твори́м и́стины.

⁷ А́ще ли же во све́те хо́дим, я́коже Сам Той есть во све́те, обще́ние и́мамы друг ко дру́гу, и кровь Иису́са Христа́ Сы́на Его́ очища́ет нас от вся́каго греха́.

⁸ А́ще рече́м, я́ко греха́ не и́мамы, себе́ прельща́ем, и и́стины несть в нас.

⁹ А́ще испове́даем грехи́ на́ша, ве́рен есть и пра́веден да оста́вит нам грехи́ на́ша и очи́стит нас от вся́кия непра́вды.

¹⁰ А́ще рече́м, я́ко не согреши́хом, лжа твори́м Его́, и сло́во Его́ несть в нас.

Глава 2

¹ Ча́дца моя́, сия́ пишу́ вам, да не согреша́ете, и а́ще кто согреши́т, хода́тая и́мамы ко Отцу́, Иису́са Христа́ Пра́ведника.

² И Той очище́ние есть о гресе́х на́ших, не о на́ших же то́чию, но и о всего́ міра.

³ И о сем разуме́ем, я́ко позна́хом Его́, а́ще за́поведи Его́ соблюда́ем.

⁴ Глаго́ляй, я́ко позна́х Его́, и за́поведи Его́ не соблюда́ет, ложь есть, и в сем и́стины несть.

⁵ И́же бо а́ще блюде́т сло́во Его́, пои́стинне в сем любы́ Бо́жия соверше́нна есть. О сем разуме́ем, я́ко в Нем есмы́.

⁶ Глаго́ляй, в Нем пребыва́ти, до́лжен есть, я́коже Он ходи́л есть, и сей та́кожде да хо́дит.

⁷ Возлю́бленнии, не за́поведь но́ву пишу́ вам, но за́поведь ве́тху, ю́же име́сте испе́рва. За́поведь ве́тха есть сло́во, е́же слы́шасте испе́рва.

⁸ Па́ки за́поведь но́ву пишу́ вам, е́же есть пои́стинне в Нем и в вас, я́ко тма ми́мо хо́дит и свет и́стинный сей сия́ет.

⁹ Глаго́ляй во све́те бы́ти, а бра́та своего́ ненави́дит, во тме есть досе́ле.

¹⁰ Любя́й бра́та своего́ во све́те пребыва́ет, и собла́зна в нем несть.

¹¹ А ненави́дяй бра́та своего́ во тме есть, и во тме хо́дит, и не весть ка́мо и́дет, я́ко тма ослепи́ о́чи ему́.

¹² Пишу́ вам ча́дца, я́ко оставля́ются вам греси́ и́мене Его́ ра́ди.

¹³ Пишу́ вам отцы́, я́ко позна́сте Безнача́льнаго. Пишу́ вам ю́ноши, я́ко победи́сте лука́ваго.

¹⁴ Пишу́ вам де́ти, я́ко позна́сте Отца́. Писа́х вам отцы́, я́ко позна́сте Иско́ннаго. Писа́х вам ю́ноши, я́ко кре́пцы есте́, и сло́во Бо́жие в вас пребыва́ет, и победи́сте лука́ваго.

¹⁵ Не люби́те міра, ни я́же в міре, а́ще кто лю́бит міръ, несть любве́ О́тчи в нем.

¹⁶ Я́ко все е́же в міре, по́хоть плотска́я и по́хоть очи́ма и го́рдость жите́йская, несть от Отца́, но от міра сего́ есть.

¹⁷ И міръ прехо́дит, и по́хоть его́, а творя́й во́лю Бо́жию пребыва́ет во ве́ки.

¹⁸ Де́ти, после́дняя годи́на есть. И я́коже слы́шасте, я́ко анти́христ гряде́т, и ны́не анти́христи мно́зи бы́ша, от сего́ разумева́ем, я́ко после́дний час есть.

¹⁹ От нас изыдо́ша, но не бе́ша от нас, а́ще бы от нас бы́ли, пребы́ли у́бо бы́ша с на́ми, но да явя́тся, я́ко не суть вси от нас.

²⁰ И вы пома́зание и́мате от Свята́го, и ве́сте вся.

²¹ Не писа́х вам, я́ко не ве́сте и́стины, но я́ко ве́сте ю́ и я́ко вся́ка лжа от и́стины несть.

²² Кто есть лжи́вый, то́чию отмета́яйся, я́ко Иису́с несть Христо́с? Сей есть анти́христ, отмета́яйся Отца́ и Сы́на.

²³ Всяк отмета́яйся Сы́на, ни Отца́ и́мать, а испове́даяй Сы́на, и Отца́ и́мать.

²⁴ Вы у́бо е́же слы́шасте испе́рва, в вас да пребыва́ет, и а́ще в вас пребу́дет, е́же испе́рва слы́шасте, и вы в Сы́не и Отце́ пребу́дете.

²⁵ И сие́ есть обетова́ние, е́же Сам обеща́ нам, живо́т ве́чный.

²⁶ Сия́ писа́х вам о льстя́щих вас.

²⁷ И вы е́же пома́зание е́же прия́сте от Него́, в вас пребыва́ет, и не тре́буете, да кто учи́т вы, но я́ко то са́мо пома́зание учи́т вы о всем, и и́стинно есть, и несть ло́жно, и я́коже научи́ вас, пребыва́йте в нем.

²⁸ И ны́не ча́дца, пребыва́йте в Нем, да егда́ яви́тся, и́мамы дерзнове́ние и не посрами́мся от Него́ в прише́ствии Его́.

²⁹ А́ще ве́сте, я́ко пра́ведник есть, разуме́йте, я́ко всяк творя́й пра́вду от Него́ роди́ся.

Глава 3

¹ Ви́дите, какову́ любо́вь дал есть Оте́ц нам, да ча́да Бо́жия нарече́мся, и есмы́. Сего́ ра́ди міръ не зна́ет нас, зане́ не позна́ Его́.

² Возлю́бленнии, ны́не ча́да Бо́жия есмы́, и не у́ яви́ся, что́ бу́дем: ве́мы же, я́ко егда́ яви́тся, подо́бни Ему́ бу́дем, и у́зрим Его́, я́коже есть.

³ И всяк име́яй наде́жду сию́ Нань, очища́ет себе́, я́коже Он чист есть.

⁴ Всяк творя́й грех, и беззако́ние твори́т, и грех есть беззако́ние.

⁵ И ве́сте, я́ко Он яви́ся, да грехи́ на́ша во́змет, и греха́ в Нем несть.

⁶ Всяк, и́же в Нем пребыва́яй, не согреша́ет, всяк согреша́яй не ви́де Его́, ни позна́ Его́.

⁷ Ча́дца, никто́же да льстит вас. Творя́й пра́вду пра́ведник есть, я́коже Он пра́веден есть.

⁸ Творя́й грех от диа́вола есть, я́ко испе́рва диа́вол согреша́ет. Сего́ ра́ди яви́ся Сын Бо́жий да разруши́т дела́ диа́воля.

⁹ Всяк рожде́нный от Бо́га греха́ не твори́т, я́ко се́мя Его́ в нем пребыва́ет, и не мо́жет согреша́ти, я́ко от Бо́га рожде́н есть.

¹⁰ Сего́ ра́ди явле́на суть ча́да Бо́жия и ча́да диа́воля: всяк не творя́й пра́вды несть от Бо́га, и не любя́й бра́та своего́.

¹¹ Я́ко се есть завеща́ние, е́же слы́шасте испе́рва, да лю́бим друг дру́га,

¹² Не я́коже Ка́ин от лука́ваго бе и закла́ бра́та своего́. За ку́ю вину́ закла́ его́? Я́ко дела́ его́ лука́ва бе́ша, а бра́та его́ пра́ведна.

¹³ Не чуди́теся, бра́тие моя́, а́ще ненави́дит вас міръ.

¹⁴ Мы ве́мы, я́ко преидо́хом от сме́рти в живо́т, я́ко лю́бим бра́тию, не любя́й бо бра́та пребыва́ет в сме́рти.

¹⁵ Всяк ненави́дяй бра́та своего́ человекоуби́йца есть, и ве́сте, я́ко всяк человекоуби́йца не и́мать живота́ ве́чнаго в себе́ пребыва́юща.

¹⁶ О сем позна́хом любо́вь, я́ко Он по нас ду́шу Свою́ положи́, и мы до́лжни есмы́ по бра́тии ду́ши полага́ти.

¹⁷ И́же у́бо и́мать бога́тство міра сего́, и ви́дит бра́та своего́ тре́бующа, и затвори́т утро́бу свою́ от него́, ка́ко любы́ Бо́жия пребыва́ет в нем?

¹⁸ Ча́дца моя́, не лю́бим сло́вом ниже́ язы́ком, но де́лом и и́стиною.

¹⁹ И о сем разуме́ем, я́ко от и́стины есмы́, и пред Ним смиря́ем сердца́ на́ша,

²⁰ Зане́ а́ще зазира́ет нам се́рдце на́ше, я́ко бо́лий есть Бог се́рдца на́шего и весть вся.

²¹ Возлю́бленнии, а́ще се́рдце на́ше не за́зрит нам, дерзнове́ние и́мамы к Бо́гу.

²² И его́же а́ще про́сим, прие́млем от Него́, я́ко за́поведи Его́ соблюда́ем, и уго́дная пред Ним твори́м.

²³ И сия́ есть за́поведь Его́, да ве́руем во И́мя Сы́на Его́ Иису́са Христа́ и лю́бим друг дру́га, я́коже дал есть за́поведь нам.

²⁴ И соблюда́яй за́поведи Его́, в Нем пребыва́ет, и Той в нем, и о сем разуме́ем, я́ко пребыва́ет в нас, от Ду́ха, Его́же дал есть нам.

Глава 4

¹ Возлю́бленнии, не вся́кому ду́ху ве́руйте, но искуша́йте ду́хи, а́ще от Бо́га суть, я́ко мно́зи лжепроро́цы изыдо́ша в міръ.

² О сем познава́йте Ду́ха Бо́жия и ду́ха ле́стча: всяк дух, и́же испове́дует Иису́са Христа́ во пло́ти прише́дша, от Бо́га есть.

³ И всяк дух, и́же не испове́дует Иису́са Христа́ во пло́ти прише́дша, от Бо́га несть, и сей есть анти́христов, его́же слы́шасте, я́ко гряде́т, и ны́не в міре есть уже́.

⁴ Вы от Бо́га есте́, ча́дца, и победи́сте тех, я́ко бо́лий есть И́же в вас, не́жели и́же в міре.

⁵ Они́ от міра суть, сего́ ра́ди от міра глаго́лют, и міръ тех послу́шает.

⁶ Мы от Бо́га есмы́, и́же зна́ет Бо́га, послу́шает нас, и и́же несть от Бо́га, не послу́шает нас. О сем познава́ем Ду́ха И́стины и ду́ха ле́стча.

⁷ Возлю́бленнии, возлю́бим друг дру́га, я́ко любы́ от Бо́га е́сть, и всяк любя́й от Бо́га рожде́н есть, и зна́ет Бо́га.

⁸ А не любя́й не позна́ Бо́га, я́ко Бог любы́ есть.

⁹ О сем яви́ся любы́ Бо́жия в нас, я́ко Сы́на Своего́ Единоро́днаго посла́ Бог в міръ, да жи́ви бу́дем им.

¹⁰ О сем есть любы́, не я́ко мы возлюби́хом Бо́га, но я́ко Той возлюби́ нас, и посла́ Сы́на Своего́ очище́ние о гресе́х на́ших.

¹¹ Возлю́бленнии, а́ще си́це возлюби́л есть нас Бог, и мы до́лжни есмы́ друг дру́га люби́ти.

¹² Бо́га никто́же нигде́же ви́де. А́ще друг дру́га лю́бим, Бог в нас пребыва́ет, и любы́ Его́ соверше́нна есть в нас.

¹³ О сем разуме́ем, я́ко в Нем пребыва́ем и Той в нас, я́ко от Ду́ха Своего́ дал есть нам.

¹⁴ И мы ви́дехом и свиде́тельствуем, я́ко Оте́ц посла́ Сы́на Спаси́теля міру.

¹⁵ И́же а́ще испове́сть, я́ко Иису́с есть Сын Бо́жий, Бог в нем пребыва́ет, и той в Бо́зе.

¹⁶ И мы позна́хом и ве́ровахом любо́вь, ю́же и́мать Бог в нас. Бог Любы́ есть, и пребыва́яй в любви́ в Бо́зе пребыва́ет, и Бог в нем пребыва́ет.

¹⁷ О сем соверша́ется любы́ с на́ми, да дерзнове́ние и́мамы в день су́дный, зане́ я́коже Он есть, и мы есмы́ в міре сем.

¹⁸ Стра́ха несть в любви́, но соверше́нна любы́ вон изгоня́ет страх, я́ко страх му́ку и́мать, боя́йся же не соверши́ся в любви́.

¹⁹ Мы лю́бим Его́, я́ко Той пе́рвее возлюби́л есть нас.

²⁰ А́ще кто рече́т, я́ко люблю́ Бо́га, а бра́та своего́ ненави́дит, ложь есть, и́бо не любя́й бра́та своего́, его́же ви́де, Бо́га, Его́же не ви́де, ка́ко мо́жет люби́ти?

²¹ И сию́ за́поведь и́мамы от Него́, да любя́й Бо́га лю́бит и бра́та своего́.

Глава 5

¹ Всяк ве́руяй, я́ко Иису́с есть Христо́с, от Бо́га рожде́н есть, и всяк любя́й Ро́ждшаго лю́бит и рожде́ннаго от Него́.

² О сем ве́мы, я́ко лю́бим ча́да Бо́жия, егда́ Бо́га лю́бим и за́поведи Его́ соблюда́ем.

³ Сия́ бо есть любы́ Бо́жия, да за́поведи Его́ соблюдаем, и за́поведи Его́ тя́жки не суть.

⁴ Я́ко всяк рожде́нный от Бо́га побежда́ет міръ, и сия́ есть побе́да, побе́ждшая міръ, ве́ра на́ша.

⁵ Кто есть побежда́яй міръ, то́кмо ве́руяй, я́ко Иису́с есть Сын Бо́жий?

⁶ Сей есть прише́дый водо́ю и кро́вию и Ду́хом, Иису́с Христо́с, не водо́ю то́чию, но водо́ю и кро́вию, и Дух есть свиде́тельствуяй, я́ко Дух есть и́стина.

⁷ Я́ко трие́ суть свиде́тельствующии на небеси́, Оте́ц, Сло́во и Святы́й Дух, и Си́и три еди́но суть.

⁸ И трие́ суть свиде́тельствующии на земли́, дух и вода́, и кровь, и трие́ во еди́но суть.

⁹ А́ще свиде́тельство челове́ческое прие́млем, свиде́тельство Бо́жие бо́ле есть, я́ко сие́ есть свиде́тельство Бо́жие, е́же свиде́тельствова о Сы́не Свое́м.

¹⁰ Ве́руяй в Сы́на Бо́жия и́мать свиде́тельство в себе́, не ве́руяй Бо́гови лжа сотвори́л есть Его́, я́ко не ве́рова во свиде́тельство, е́же свиде́тельствова Бог о Сы́не Свое́м.

¹¹ И сие́ есть свиде́тельство, я́ко живо́т ве́чный дал есть нам Бог, и сей живо́т в Сы́не Его́ есть.

¹² Име́яй Сы́на Бо́жия и́мать живо́т, а не име́яй Сы́на Бо́жия живота́ не и́мать.

¹³ Сия́ писа́х вам ве́рующим во и́мя Сы́на Бо́жия, да ве́сте, я́ко живо́т ве́чный и́мате, и да ве́руете во и́мя Сы́на Бо́жия.

¹⁴ И сие́ есть дерзнове́ние, е́же и́мамы к Нему́, я́ко а́ще чесо́ про́сим по во́ли Его́, послу́шает нас.

¹⁵ И а́ще ве́мы, я́ко послу́шает нас, е́же а́ще про́сим, ве́мы, я́ко и́мамы проше́ния, и́хже проси́хом от Него́.

¹⁶ А́ще кто у́зрит бра́та своего́ согреша́юща грех не к сме́рти, да про́сит, и даст ему́ живо́т, согреша́ющим не к сме́рти. Есть грех к сме́рти, не о том глаго́лю, да мо́лится.

¹⁷ Вся́ка непра́вда грех есть, и есть грех не к сме́рти.

¹⁸ Ве́мы, я́ко всяк рожде́нный от Бо́га не согреша́ет, но рожде́нный от Бо́га блюде́т себе́, и лука́вый не прикаса́ется ему́.

¹⁹ Ве́мы, я́ко от Бо́га есмы́, и міръ весь во зле лежи́т.

²⁰ Ве́мы же, я́ко Сын Бо́жий прии́де и дал есть нам свет и ра́зум, да позна́ем Бо́га и́стиннаго и да бу́дем во и́стиннем Сы́не Его́ Иису́се Христе́, Сей есть и́стинный Бог и живо́т ве́чный.

²¹ Ча́дца, храни́те себе́ от треб и́дольских. Ами́нь.

Второ́е посла́ние Иоа́нна Богосло́ва

¹ Ста́рец избра́нней господы́не и ча́дом ея́, и́хже аз люблю́ вои́стинну, и не аз то́чию, но и вси разуме́вшии и́стину.

² За и́стину пребыва́ющую в нас, и с на́ми бу́дет во ве́ки.

³ Да бу́дет с ва́ми благода́ть, ми́лость, мир от Бо́га Отца́, и от Го́спода Иису́са Христа́, Сы́на О́тча, во и́стине и любви́.

⁴ Возра́довахся зело́, я́ко обрето́х от чад твои́х ходя́щя во и́стине, я́коже за́поведь прия́хом от Отца́.

⁵ И ны́не молю́ тя, госпоже́, не я́ко за́поведь пишу́ тебе́ но́ву, но ю́же и́мамы испе́рва, да лю́бим друг дру́га.

⁶ И сия́ есть любы́, да хо́дим по за́поведем Его́. Сия́ есть за́поведь, я́коже слы́шасте испе́рва, да в ней хо́дите.

⁷ Зане́ мно́зи лестцы́ внидо́ша в міръ, не испове́дающе Иису́са Христа́ прише́дша во пло́ти, сей есть льстец и анти́христ.

⁸ Блюди́те себе́, да не погубите́ я́же де́ласте до́брая, но да мзду соверше́нну восприи́мете.

⁹ Всяк преступа́яй и не пребыва́яй во уче́нии Христо́ве, Бо́га не и́мать, пребыва́яй же во уче́нии Христо́ве, сей и Отца́ и Сы́на и́мать.

¹⁰ А́ще кто прихо́дит к вам, и сего́ уче́ния не прино́сит, не прие́млите его́ в дом, и ра́доватися ему́ не глаго́лите.

¹¹ Глаго́ляй бо ему́ ра́доватися, сообща́ется дело́м его́ злым.

¹² Мно́га име́х писа́ти вам, и не восхоте́х хартие́ю и черни́лом, но наде́юся приити́ к вам и усты́ ко усто́м глаго́лати, да ра́дость ва́ша бу́дет испо́лнена.

¹³ Целу́ют тя ча́да сестры́ твоея́ избра́нныя. Ами́нь.

Тре́тие посла́ние Иоа́нна Богосло́ва

¹ Ста́рец Га́иеви возлю́бленному, его́же аз люблю́ вои́стинну.

² Возлю́бленне, па́че во всех молю́ся о тебе́, спе́ятися ^[189] тебе́, здра́вствовати, я́коже спе́ется ти душа́.

³ Возра́довахся зело́, прише́дшим бра́тиям и свиде́тельствующим твою́ и́стину, я́коже ты во и́стине хо́диши.

⁴ Бо́льши сея́ не и́мам ра́дости, да слы́шу моя́ ча́да во и́стине ходя́ща.

⁵ Возлю́бленне, ве́рно твори́ши, е́же а́ще де́лаеши в бра́тию и в стра́нныя, и́же свиде́тельствоваша о твое́й любви́ пред це́рковию.

⁶ И́хже предпосла́в досто́йно Бо́гу, до́бре твори́ши.

⁷ О и́мени бо Его́ изыдо́ша, ничто́же прие́млюще от язы́к.

⁸ Мы у́бо до́лжни есмы́ приима́ти таковы́х, да поспе́шницы бу́дем и́стине.

⁹ Писа́х це́ркви, но первстволю́бец их Диотрефи́с не прие́млет нас.

¹⁰ Сего́ ра́ди, а́ще прииду́, воспомяну́ ему́ дела́, я́же твори́т, словесы́ лука́выми укоря́я нас, и недово́лен быва́я о сих, ни сам прие́млет бра́тию, и хотя́щим возбраня́ет, и отце́ркве изго́нит.

¹¹ Возлю́бленне, не уподобля́йся зло́му, но благо́му. Благотворя́й от Бо́га есть, а злотворя́й не ви́де Бо́га.

¹² Дими́триеви свиде́тельствовася от всех и от са́мыя и́стины, и мы же свиде́тельствуем, и ве́сте, я́ко свиде́тельство на́ше и́стинно есть.

¹³ Мно́га име́х писа́ти, но не хощу́ черни́лом и тро́стию писа́ти тебе́.

¹⁴ Упова́ю же а́бие ви́дети тя и усты́ ко усто́м глаго́лати.

¹⁵ Мир тебе́. Целу́ют тя дру́зи, целу́й дру́ги по и́мени. Ами́нь.

Посла́ние Иу́ды

¹ Иу́да, Иису́су Христу́ раб, брат же Иа́кову, су́щим о Бо́зе Отце́ освяще́нным, Иису́с Христо́м соблюде́нным зва́нным,

² Ми́лость вам, и мир, и любы́ да умно́жится.

³ Возлю́бленнии, вся́ко тща́ние творя́ писа́ти вам о о́бщем спасе́нии ва́шем, ну́жда ми бысть писа́ти вам, моля́ подвиза́тися о преда́нней ве́ре святы́м еди́ною.

⁴ Привнидо́ша бо не́цыи челове́цы, [дре́вле предуста́вленнии на сие́ осужде́ние,] нечести́вии, Бо́га на́шего благода́ть прелага́ющии в скве́рну, и еди́наго Влады́ки Бо́га и Го́спода на́шего Иису́са Христа́ отмета́ющиися.

⁵ Воспомяну́ти же вам хощу́, ве́дущим и вам еди́ною сие́, я́ко Госпо́дь лю́ди от земли́ Еги́петския спасе́, последи́ неве́ровавшия погуби́.

⁶ А́нгелы же не соблю́дшия своего́ нача́льства, но оста́вльшия свое́ жили́ще, на суд вели́каго дне, у́зами ве́чными под мра́ком соблюде́.

⁷ Я́коже Содо́ма и Гомо́рра и окре́стныя их гра́ды, подо́бным их о́бразом преблуди́вша и ходи́вша в след пло́ти ины́я, предлежа́т в показа́ние, огня́ ве́чнаго суд подъе́мше.

⁸ Та́кожде у́бо и си́и, со́ния ви́дяще плоть у́бо скверня́т, госпо́дьства же отмета́ются, сла́вы же ху́ляще [не трепе́щут].

⁹ Михаи́л же Арха́нгел егда́ со диа́волом разсужда́я ^[190] глаго́лаше о Моисе́ове телеси́, не сме́яше суда́ навести́ ху́льна, но рече́: да запрети́т тебе́ Госпо́дь.

¹⁰ Си́и же, ели́ка у́бо не ве́дят, ху́лят: ели́ка же по естеству́, я́ко безслове́сная живо́тная ве́дят, в сих скверня́тся. ^[191]

¹¹ Го́ре им, я́ко в путь Ка́инов ходи́ша, и в лесть Валаа́мовы мзды пролия́шася, и в пререка́нии Корре́ове погибо́ша.

¹² Си́и суть в любва́х ва́ших скверни́тели, с ва́ми яду́ще, без боя́зни себе́ пасу́ще, о́блацы безво́дни, от ветр преноси́ми, древеса́ есе́нна безпло́дна, два́жды уме́рша, искорене́на.

¹³ Во́лны свире́пыя мо́ря, воспеня́юще своя́ стыде́ния, зве́зды преле́стныя, и́мже мрак тьмы во ве́ки блюде́тся.

¹⁴ Проро́чествова же и о сих седмы́й от Ада́ма Ено́х, глаго́ля: се прии́дет Госпо́дь во тьмах святы́х [А́нгел] Свои́х,

¹⁵ Сотвори́ти суд о всех и изобличи́ти всех нечести́вых о всех де́лех нече́стия их, и́миже нече́ствоваша, и о всех жесто́ких словесе́х их, я́же глаго́лаша нань гре́шницы нечести́вии.

¹⁶ Си́и суть ропотницы́, укори́тели, часть поро́чна, в по́хотех свои́х ходя́ще нече́стием и законопреступле́нием, и уста́ их глаго́лют прего́рдая, чудя́щеся ли́цам по́льзы ра́ди.

¹⁷ Вы же, возлю́бленнии, помина́йте глаго́лы, преждерече́нныя от апо́стол Го́спода на́шего Иису́са Христа́.

¹⁸ Зане́ глаго́лаху вам, я́ко в после́днее вре́мя бу́дут руга́тели, по свои́х по́хотех ходя́ще и нече́стиих.

¹⁹ Си́и суть отделя́юще себе́ от еди́ности ве́ры и суть теле́сни, ^[192] Ду́ха не иму́ще.

²⁰ Вы же, возлю́бленнии, свято́ю ва́шею ве́рою назида́юще себе́, Ду́хом Святы́м, и моля́щеся,

²¹ Cа́ми себе́ в любви́ Бо́жией соблюда́йте, жду́ще ми́лости Го́спода на́шего Иису́са Христа́, в жизнь ве́чную.

²² И о́вех у́бо ми́луйте разсужда́юще,

²³ О́вех же стра́хом спаса́йте, от огня́ восхища́юще. Облича́йте же с боя́знию, ненави́дяще и я́же от пло́ти оскверне́нную ри́зу.

²⁴ Могу́щему же сохрани́ти вы без греха́ и без скве́рны, и поста́вити пред сла́вою Свое́ю непоро́чны в ра́дости,

²⁵ Еди́ному прему́дрому Бо́гу и Спа́су на́шему, [Иису́сом Христо́м Го́сподем на́шим,] сла́ва и вели́чие, держа́ва и власть пре́жде всего́ ве́ка, и ны́не, и во вся ве́ки. Ами́нь.

Посла́ния Свято́го Апо́стола Па́вла

Посла́ние к ри́млянам

Глава 1

¹ Па́вел, раб Иису́с Христо́в, зван Апо́стол, избра́н в благове́стие Бо́жие, е́же пре́жде обеща́ проро́ки Свои́ми в писа́ниих святы́х,

² О Сы́не Свое́м, бы́вшем от се́мене Дави́дова по пло́ти,

³ Нарече́ннем Сы́не Бо́жии в си́ле, по ду́ху святы́ни, из воскресе́ния от ме́ртвых, Иису́са Христа́ Го́спода на́шего,

⁴ И́мже прия́хом благода́ть и апо́стольство в послуша́ние ве́ры во всех язы́цех, о и́мени Его́.

⁵ В ни́хже есте́ и вы, зва́ни Иису́су Христу́.

⁶ Всем су́щим в Ри́ме возлю́бленным Бо́гу, зва́нным святы́м. Благода́ть вам и мир от Бо́га Отца́ на́шего, и Го́спода Иису́са Христа́.

⁷ Пе́рвое у́бо благодарю́ Бо́га моего́ Иису́сом Христо́м о всех вас, я́ко ве́ра ва́ша возвеща́ется во всем міре.

⁸ Свиде́тель бо ми есть Бог, Ему́же служу́ ду́хом мои́м во благовествова́нии Сы́на Его́, я́ко безпреста́ни па́мять о вас творю́,

⁹ Всегда́ в моли́твах мои́х моля́ся, а́ще у́бо когда́ поспе́шен бу́ду во́лею Бо́жиею приити́ к вам.

¹⁰ Жела́ю бо ви́дети вас, да не́кое пода́м вам дарова́ние духо́вное, ко утвержде́нию ва́шему.

¹¹ Сие́ же есть, соуте́шитися в вас ве́рою о́бщею, ва́шею же и мое́ю.

¹² Всем су́щим в Ри́ме возлю́бленным Бо́гу, зва́нным святы́м. Благода́ть вам и мир от Бо́га Отца́ на́шего, и Го́спода Иису́са Христа́.

¹³ Не хощу́ же не ве́дети вам, бра́тие, я́ко мно́жицею восхоте́х приити́ к вам, и возбране́н бых досе́ле, да не́кий плод име́ю и в вас, я́коже и в про́чих язы́цех.

¹⁴ Е́ллином же и ва́рваром, му́дрым же и неразу́мным до́лжен есмь.

¹⁵ Та́ко есть, е́же по моему́ усе́рдию и вам су́щим в Ри́ме благовести́ти.

¹⁶ Не стыжу́ся бо благовествова́нием Христо́вым: си́ла бо Бо́жия есть во спасе́ние вся́кому ве́рующему, Иуде́ови же пре́жде и Е́ллину.

¹⁷ Пра́вда бо Бо́жия в нем явля́ется от ве́ры в ве́ру, я́коже есть пи́сано: пра́ведный же от ве́ры жив бу́дет.

¹⁸ Открыва́ется бо гнев Бо́жий с небесе́ на вся́кое нече́стие и непра́вду челове́ческую, содержа́щих и́стину в непра́вде.

¹⁹ Зане́же разу́мное Бо́жие ^[193] я́ве есть в них, Бог бо яви́л есть им.

²⁰ Неви́димая бо Его́, от созда́ния міра творе́ньми помышля́ема, ви́дима суть, и присносу́щная си́ла Его́ и Божество́, во е́же бы́ти им безотве́тным.

²¹ Зане́же разуме́вше Бо́га, не я́ко Бо́га просла́виша или́ благодари́ша, но осуети́шася помышле́нии свои́ми, и омрачи́ся неразу́мное их се́рдце.

²² Глаго́лющеся бы́ти му́дры, объюроде́ша,

²³ И измени́ша сла́ву нетле́ннаго Бо́га в подо́бие о́браза тле́нна челове́ка и птиц и четвероно́г и гад.

²⁴ Те́мже и предаде́ их Бог в по́хотех серде́ц их в нечистоту́, во е́же скверни́тися телесе́м их в себе́ саме́х.

²⁵ И́же премени́ша и́стину Бо́жию во лжу, и почто́ша и послужи́ша тва́ри па́че Творца́, И́же есть благослове́н во ве́ки, ами́нь.

²⁶ Сего́ ра́ди предаде́ их Бог в стра́сти безче́стия. И жены́ бо их измени́ша есте́ственную подо́бу в презъесте́ственную. ^[194]

²⁷ Та́кожде и му́жи, оста́вльше есте́ственную подо́бу же́нска по́ла, разжего́шася по́хотию свое́ю друг на дру́га, му́жи на муже́х студ содева́юще, и возме́здие, е́же подоба́ше пре́лести их, в себе́ восприе́млюще.

²⁸ И я́коже не искуси́ша име́ти Бо́га в ра́зуме, сего́ ра́ди предаде́ их Бог в неиску́сен ум, твори́ти неподо́бная, испо́лнены вся́кия непра́вды, блуже́ния, лука́вства, лихоима́ния, зло́бы.

²⁹ Испо́лнены за́висти, уби́йства, рве́ния, льсти, злонра́вия, шепотники́,

³⁰ Клеветники́, богоме́рзки, досади́тели, велича́вы, го́рды, обрета́тели злых, роди́телем непокори́вы,

³¹ Неразу́мны, непримири́тельны, нелюбо́вны, неклятвохрани́тельны, неми́лостивны.

³² Не́цыи же и оправда́ние Бо́жие разуме́вше, я́ко такова́я творя́щии досто́йни сме́рти суть, не то́чию са́ми творя́т, но и соизволя́ют творя́щим.

Глава 2

¹ Сего́ ра́ди безотве́тен еси́, о, челове́че всяк судя́й: и́мже бо судо́м су́диши дру́га, себе́ осужда́еши. Та́яжде бо твори́ши судя́й.

² Ве́мы же, я́ко суд Бо́жий есть пои́стинне на творя́щих такова́я.

³ Помышля́еши ли же сия́, о челове́че, судя́й такова́я творя́щим и творя́ сам та́яжде, я́ко ты избежи́ши ли суда́ Бо́жия?

⁴ Или́ о бога́тстве бла́гости Его́ и кро́тости и долготерпе́нии неради́ши, неве́дый, я́ко бла́гость Бо́жия на покая́ние тя веде́т?

⁵ По жесто́кости же твое́й и непока́янному се́рдцу, собира́еши себе́ гнев в день гне́ва и открове́ния пра́веднаго суда́ Бо́жия,

⁶ И́же возда́ст коему́ждо по дело́м его́.

⁷ О́вым у́бо, по терпе́нию де́ла блага́го, сла́ву и честь и нетле́ние и́щущим, живо́т ве́чный.

⁸ А и́же по рве́нию противля́ющимся у́бо и́стине, повину́ющимся же непра́вде, я́рость и гнев.

⁹ Скорбь и теснота́ на вся́ку ду́шу челове́ка творя́щаго зло́е, иуде́а же пре́жде и е́ллина.

¹⁰ Сла́ва же и честь и мир вся́кому де́лающему благо́е, иуде́еви же пре́жде и е́ллину.

¹¹ Несть бо на лица́ зре́ния у Бо́га.

¹² Ели́цы бо беззако́нно ^[195] согреши́ша, беззако́нно ^[196] и поги́бнут, и ели́цы в зако́не согреши́ша, зако́ном суд прии́мут.

¹³ Не слы́шателие бо зако́на пра́ведни пред Бо́гом, но творцы́ зако́на, си́и оправдя́тся.

¹⁴ Егда́ бо язы́цы, не иму́ще зако́на, естество́м зако́нная творя́т; си́и, зако́на не иму́ще, са́ми себе́ суть зако́н.

¹⁵ И́же явля́ют де́ло зако́нное напи́сано в сердца́х свои́х, спослушеству́ющи им со́вести, и между́ собо́ю помысло́м осужда́ющим или́ отвеща́ющим,

¹⁶ В день, егда́ су́дит Бог та́йная челове́ком, по благове́стию моему́, Иису́сом Христо́м.

¹⁷ Се ты Иуде́й имену́ешися, и почива́еши на зако́не, и хва́лишися о Бо́зе,

¹⁸ И разуме́еши во́лю, и разсужда́еши лу́чшая, науча́емь от зако́на.

¹⁹ Упова́я же себе́ вожда́ бы́ти слепы́м, све́та су́щим во тме,

²⁰ Наказа́теля безу́мным, учи́теля младе́нцем, иму́ща о́браз ра́зума и и́стины в зако́не.

²¹ Науча́я у́бо ина́го, себе́ ли не учи́ши?

²² Пропове́дая не кра́сти, кра́деши? глаго́ля не прелюбы́ твори́ти, прелюбы́ твори́ши? гнуша́яся и́дол, свята́я кра́деши?

²³ И́же в зако́не хва́лишися, преступле́нием зако́на Бо́га безче́ствуеши.

²⁴ И́мя бо Бо́жие ва́ми ху́лится во язы́цех, я́коже есть пи́сано.

²⁵ Обре́зание у́бо по́льзует, а́ще зако́н твори́ши. А́ще же зако́на престу́пник еси́, обре́зание твое́ необре́зание бысть.

²⁶ А́ще у́бо необре́зание оправда́ние зако́на сохрани́т, не необре́зание ли его́ во обре́зание вмени́тся?

²⁷ И осу́дит е́же от естества́ необре́зание, зако́н соверша́ющее, тебе́, и́же Писа́нием и обре́занием су́ща престу́пника зако́на.

²⁸ Не бо и́же я́ве, Иуде́й есть, ни е́же я́ве во пло́ти, обре́зание,

²⁹ Но и́же вта́йне Иуде́й, и обре́зание се́рдца ду́хом, а не Писа́нием, ему́же похвала́ не от челове́к, но от Бо́га.

Глава 3

¹ Что у́бо ли́шшее иуде́ю? ^[197] Или́ ка́я по́льза обре́зания?

² Мно́го по вся́кому образу: пе́рвее ^[198] у́бо, я́ко вве́рена бы́ша им словеса́ Бо́жия.

³ Что бо, а́ще не ве́роваша не́цыи? Еда́ у́бо неве́рствие их ве́ру Бо́жию упраздни́т?

⁴ Да не бу́дет: да бу́дет же Бог и́стинен, всяк же челове́к ложь, я́коже есть пи́сано: я́ко да оправди́шися во словесе́х Твои́х, и победи́ши, внегда́ суди́ти Ти.

⁵ А́ще ли непра́вда на́ша Бо́жию пра́вду составля́ет, что рече́м? Еда́ ли непра́веден Бог нанося́й гнев? [По челове́ку глаго́лю,]

⁶ Да не бу́дет, поне́же ка́ко суди́ти и́мать Бог міру?

⁷ А́ще у́бо и́стина Бо́жия в мое́й лжи избы́точествова в сла́ву Его́, что еще́ и аз я́ко гре́шник осужда́юся?

⁸ И не [я́коже ху́лимся, и я́коже глаго́лют не́цыи нас глаго́лати:] я́ко сотвори́м злая, да прии́дут блага́я, и́хже суд пра́веден есть.

⁹ Что у́бо, преиме́ем ли? Ника́коже, предукори́хом бо ^[199] иуде́и же и е́ллины вся ^[200] под грехо́м бы́ти,

¹⁰ Я́коже есть пи́сано: я́ко несть пра́веден никто́же.

¹¹ Несть разумева́яй, и несть взыска́яй Бо́га.

¹² Вси уклони́шася, вку́пе непотре́бни бы́ша. Несть творя́й благосты́ню, несть да́же до еди́наго.

¹³ Гроб отве́рст горта́нь их, язы́ки свои́ми льща́ху. Яд а́спидов под устна́ми их.

¹⁴ И́хже уста́ кля́твы и го́рести по́лна суть.

¹⁵ Ско́ры но́ги их пролия́ти кровь.

¹⁶ Сокруше́ние и озлобле́ние на путе́х их.

¹⁷ И пути́ ми́рнаго не позна́ша.

¹⁸ Несть стра́ха Бо́жия пред очи́ма их.

¹⁹ Ве́мы же, я́ко ели́ка зако́н глаго́лет, су́щим в зако́не глаго́лет, да вся́ка уста́ заградя́тся, и пови́нен бу́дет весь міръ Бо́гови.

²⁰ Зане́ от дел зако́на не оправди́тся вся́ка плоть пред Ним, зако́ном бо позна́ние греха́.

²¹ Ны́не же кроме́ зако́на пра́вда Бо́жия яви́ся, свиде́тельствуема от зако́на и проро́к.

²² Пра́вда же Бо́жия ве́рою Иису́с Христо́вою во вся и на всех ве́рующих. Несть бо ра́знствия,

²³ Вси бо согреши́ша, и лише́ни суть сла́вы Бо́жия,

²⁴ Оправда́еми ту́не благода́тию Его́, избавле́нием, е́же о Христе́ Иису́се.

²⁵ Его́же предположи́ Бог очище́ние ве́рою в Кро́ви Его́, в явле́ние пра́вды Своея́, за отпуще́ние пре́жде бы́вших грехо́в,

²⁶ В долготерпе́нии Бо́жии, и в показа́ние пра́вды Его́ в ны́нешнее вре́мя, во е́же бы́ти Ему́ пра́ведну и оправда́ющу су́щаго от ве́ры Иису́совы.

²⁷ Где́ у́бо похвала́? Отгна́ся. Кото́рым зако́ном? Де́лы ли? Ни́, но зако́ном ве́ры.

²⁸ Мы́слим ве́рою оправда́тися челове́ку, без дел зако́на.

²⁹ Или́ иуде́ев Бог то́кмо, а не и язы́ков? Ей и язы́ков.

³⁰ Поне́же еди́н Бог, И́же оправди́т обре́зание от ве́ры и необре́зание ве́рою.

³¹ Зако́н ли у́бо разоря́ем ве́рою? Да не бу́дет, но зако́н утвержда́ем.

Глава 4

¹ Что у́бо рече́м, Авраа́ма отца́ на́шего обрести́ по пло́ти?

² А́ще бо Авраа́м от дел оправда́ся, и́мать похвалу́, но не у Бо́га.

³ Что бо Писа́ние глаго́лет? Ве́рова же Авраа́м Бо́гови, и вмени́ся ему́ в пра́вду.

⁴ Де́лающему же мзда не вменя́ется по благода́ти, но по до́лгу.

⁵ А не де́лающему, ве́рующему же во Оправда́ющаго нечести́ва, вменя́ется ве́ра его́ в пра́вду.

⁶ Я́коже и Дави́д глаго́лет блаже́нство челове́ка, ему́же вменя́ет Бог пра́вду, без дел зако́на:

⁷ Блаже́ни, и́хже отпусти́шася беззако́ния и и́хже прикры́шася греси́.

⁸ Блаже́н муж, ему́же не вмени́т Госпо́дь греха́.

⁹ Блаже́нство у́бо сие́ на обре́зание ли, или́ на необре́зание? Глаго́лем бо, я́ко вмени́ся Авраа́му ве́ра в пра́вду.

¹⁰ Ка́ко у́бо вмени́ся ему́, во обре́зании ли су́щу, или́ в необре́зании, не во обре́зании, но в необре́зании.

¹¹ И зна́мение прия́т обре́зания, печа́ть пра́вды ве́ры, я́же в необре́зании. Я́ко бы́ти ему́ отцу́ всех ве́рующих в необре́зании, во е́же вмени́тися и тем в пра́вду.

¹² И отцу́ обре́зания, не су́щим то́чию от обре́зания, но и ходя́щим в стопа́х ве́ры, я́же в необре́зании отца́ на́шего Авраа́ма.

¹³ Не зако́ном бо обетова́ние Авраа́му, или́ се́мени его́, е́же бы́ти ему́ насле́днику мірови, но пра́вдою ве́ры.

¹⁴ А́ще бо су́щии от зако́на насле́дницы, испраздни́ся ве́ра, и разори́ся обетова́ние.

¹⁵ Зако́н бо гнев соде́ловает: иде́же бо несть зако́на, ту ни преступле́ния.

¹⁶ Сего́ ра́ди от ве́ры, да по благода́ти, во е́же бы́ти изве́стну обетова́нию всему́ се́мени, не то́чию су́щему от зако́на, но и су́щему от ве́ры Авраа́мовы, и́же есть оте́ц всем нам.

¹⁷ Я́коже есть пи́сано: я́ко отца́ мно́гим язы́ком положи́х тя, пря́мо Ему́же ве́рова Бо́гу, животворя́щему ме́ртвыя и нарица́ющу не су́щая я́ко су́щая.

¹⁸ И́же па́че упова́ния во упова́ние ве́рова, во е́же бы́ти ему́ отцу́ мно́гим язы́ком, по рече́нному: та́ко бу́дет се́мя твое́.

¹⁹ И не изнемо́г ве́рою, ни усмотре́ своея́ пло́ти уже́ умерщвле́нныя, столе́тен не́где сый, и ме́ртвости ложе́сн Са́рриных.

²⁰ Во обетова́нии же Бо́жии не усумне́ся неве́рованием, но возмо́же ве́рою, дав сла́ву Бо́гови.

²¹ И изве́стен быв, я́ко е́же обеща́, си́лен есть и сотвори́ти.

²² Те́мже и вмени́ся ему́ в пра́вду.

²³ Не пи́сано же бысть за того́ еди́наго то́чию, я́ко вмени́ся ему́,

²⁴ Но и за ны, и́мже хо́щет вмени́тися, ве́рующим во Воскреси́вшаго Иису́са Христа́ Го́спода на́шего из ме́ртвых,

²⁵ И́же пре́дан бысть за прегреше́ния на́ша и воста́ за оправда́ние на́ше.

Глава 5

¹ Оправди́вшеся у́бо ве́рою, мир и́мамы к Бо́гу Го́сподем на́шим Иису́с Христо́м.

² И́мже и приведе́ние обрето́хом ве́рою во благода́ть сию́, в не́йже стои́м, и хва́лимся упова́нием сла́вы Бо́жия.

³ Не то́чию же, но и хва́лимся в ско́рбех, ве́дяще, я́ко скорбь терпе́ние соде́ловает,

⁴ Терпе́ние же иску́сство, иску́сство же упова́ние,

⁵ Упова́ние же не посрами́т. Я́ко любы́ Бо́жия излия́ся в сердца́ на́ша Ду́хом Святы́м да́нным нам.

⁶ Еще́ бо Христо́с су́щим нам немощны́м, по вре́мени за нечести́вых у́мре.

⁷ Едва́ бо за пра́ведника кто у́мрет, за блага́го бо не́гли кто и де́рзнет умре́ти.

⁸ Составля́ет же Свою́ любо́вь к нам Бог, я́ко еще́ гре́шником су́щим нам, Христо́с за ны у́мре.

⁹ Мно́го у́бо па́че, оправда́ни бы́вше ны́не Кро́вию Его́, спасе́мся Им от гне́ва.

¹⁰ А́ще бо врази́ бы́вше примири́хомся Бо́гу сме́ртию Сы́на Его́, мно́жае па́че примири́вшеся спасе́мся в животе́ Его́.

¹¹ Не то́чию же, но и хва́лимся о Бо́зе Го́сподем на́шим Иису́с Христо́м, И́мже ны́не примире́ние прия́хом.

¹² Сего́ ра́ди я́коже еди́нем челове́ком грех в міръ вни́де, и грехо́м смерть, и та́ко смерть во вся челове́ки вни́де, в не́мже вси согреши́ша.

¹³ До зако́на бо грех бе в міре, грех же не вменя́шеся, не су́щу зако́ну.

¹⁴ Но ца́рствова смерть от Ада́ма да́же до Моисе́а и над несогре́шшими по подо́бию преступле́ния Ада́мова, и́же есть о́браз бу́дущаго.

¹⁵ Но не я́коже прегреше́ние, та́ко и дар. А́ще бо прегреше́нием еди́наго мно́зи умро́ша, мно́жае па́че благода́ть Бо́жия и дар благода́тию еди́наго Челове́ка Иису́са Христа́ во мно́гих преизли́шествова.

¹⁶ И не я́коже еди́нем согре́шшим, дарова́ние. Грех бо из еди́наго во осужде́ние, дар же от мно́гих прегреше́ний во оправда́ние.

¹⁷ А́ще бо еди́наго прегреше́нием смерть ца́рствова еди́нем, мно́жае па́че избы́ток благода́ти и дар пра́вды прие́млюще, в жи́зни воцаря́тся еди́нем Иису́с Христо́м.

¹⁸ Те́мже у́бо, я́коже еди́наго прегреше́нием во вся челове́ки вни́де осужде́ние, та́кожде и еди́наго оправда́нием во вся челове́ки вни́де оправда́ние жи́зни.

¹⁹ Я́коже бо ослуша́нием еди́наго челове́ка гре́шни бы́ша мно́зи, си́це и послуша́нием еди́наго пра́ведни бу́дут мно́зи.

²⁰ Зако́н же привни́де, да умно́жится прегреше́ние, иде́же бо умно́жися грех, преизбы́точествова благода́ть.

²¹ Да я́коже ца́рствова грех во смерть, та́кожде и благода́ть воцари́тся пра́вдою в жизнь ве́чную, Иису́с Христо́м Го́сподем на́шим.

Глава 6

¹ Что у́бо рече́м, пребу́дем ли во гресе́ да благода́ть преумно́жится? Да не бу́дет.

² И́же бо умро́хом греху́, ка́ко па́ки оживе́м о нем? ^[201]

³ Или́ не разуме́ете, я́ко ели́цы во Христа́ Иису́са крести́хомся, в смерть Его́ крести́хомся.

⁴ Спогребо́хомся у́бо Ему́ креще́нием в смерть, да я́коже воста́ Христо́с от ме́ртвых сла́вою О́тчею, та́ко и мы во обновле́нии жи́зни ходи́ти на́чнем. ^[202]

⁵ А́ще бо сообра́зни ^[203] бы́хом подо́бию сме́рти Его́, то и воскресе́нию бу́дем.

⁶ Сие́ ве́дяще, я́ко ве́тхий наш челове́к с Ним распя́тся, да упраздни́тся те́ло грехо́вное, я́ко ктому́ не рабо́тати нам греху́.

⁷ Уме́рый бо, оправди́ся от греха́.

⁸ А́ще ли умро́хом со Христо́м, ве́руем, я́ко и жи́ви бу́дем с Ним,

⁹ Ве́дяще, я́ко Христо́с воста́ от ме́ртвых, ктому́ уже́ не умира́ет, смерть Ему́ ктому́ не облада́ет.

¹⁰ Е́же бо у́мре, греху́ у́мре еди́ною, а е́же живе́т, Бо́гови живе́т.

¹¹ Та́кожде и вы помышля́йте себе́, ме́ртвым у́бо бы́ти греху́, живы́м же Бо́гови, о Христе́ Иису́се Го́споде на́шем.

¹² Да не ца́рствует у́бо грех в ме́ртвеннем ва́шем те́ле, во е́же послу́шати его́ в по́хотех его́,

¹³ Ниже́ представля́йте у́ды ва́ша ору́жия непра́вды греху́, но представля́йте себе́ Бо́гови я́ко от ме́ртвых жи́вы, и у́ды ва́ша ору́жия пра́вды Бо́гови.

¹⁴ Грех бо ва́ми да не облада́ет. Не́сте бо под зако́ном, но под благода́тию.

¹⁵ Что у́бо, согреши́м ли, зане́ не́смы под зако́ном, но под благода́тию, да не бу́дет.

¹⁶ Не ве́сте ли, я́ко ему́же представля́ете себе́ рабы́ в послуша́ние, раби́ есте́, его́же послу́шаете, или́ греха́ в смерть, или́ послуша́ния в пра́вду?

¹⁷ Благодари́м у́бо Бо́га, я́ко бе́сте раби́ греху́, послу́шасте же от се́рдца, во́ньже и преда́стеся о́браз уче́ния.

¹⁸ Свобо́ждшеся же от греха́, порабо́тистеся пра́вде.

¹⁹ Челове́ческо глаго́лю, за не́мощь пло́ти ва́шея. Я́коже у́бо предста́висте у́ды ва́ша рабы́ нечистоте́ и беззако́нию в беззако́ние, та́ко ны́не предста́вите у́ды ва́ша рабы́ пра́вде во святы́ню.

²⁰ Егда́ бо раби́ бе́сте греха́, свобо́дни бе́сте от пра́вды.

²¹ Кий у́бо тогда́ име́сте плод? О ни́хже ны́не стыдите́ся, кончи́на бо о́нех, смерть.

²² Ны́не же свобо́ждшеся от греха́, порабо́щшеся же Бо́гови, и́мате плод ваш во святы́ню, кончи́ну же жизнь ве́чную.

²³ Обро́цы бо греха́ смерть: дарова́ние же Бо́жие живо́т ве́чный о Христе́ Иису́се Го́споде на́шем.

Глава 7

¹ Или́ не разуме́ете, бра́тие, [ве́дущим зако́н глаго́лю,] я́ко зако́н облада́ет над челове́ком, во ели́ко вре́мя живе́т?

² И́бо мужа́тая жена́ жи́ву му́жу привя́зана есть зако́ном, а́ще ли же у́мрет муж ея́, разреши́тся от зако́на му́жескаго.

³ Те́мже у́бо, жи́ву су́щу му́жу, прелюбоде́йца быва́ет, а́ще бу́дет му́жеви ино́му, а́ще ли у́мрет муж ея́, свобо́дна есть от зако́на, не бы́ти ей прелюбоде́йце, бы́вшей му́жу ино́му.

⁴ Те́мже, бра́тие моя́, и вы умро́сте зако́ну те́лом Христо́вым, во е́же бы́ти вам ино́му, Воста́вшему из ме́ртвых, да плод принесе́м Бо́гови.

⁵ Егда́ бо бе́хом во пло́ти, стра́сти грехо́вныя, я́же зако́ном, де́йствоваху во у́дех на́ших, во е́же плод твори́ти сме́рти.

⁶ Ны́не же упраздни́хомся от зако́на, уме́рше, и́мже держи́ми бе́хом, я́ко рабо́тати нам [Бо́гови] во обновле́нии ду́ха, а не в ве́тхости пи́смене.

⁷ Что у́бо рече́м? Зако́н ли грех? Да не бу́дет. Но греха́ не знах, то́чию зако́ном, по́хоти же не ве́дах, а́ще не бы зако́н глаго́лаше: не похо́щеши.

⁸ Вину́ же прие́м грех за́поведию, соде́ла во мне вся́ку по́хоть, без зако́на бо грех мертв есть.

⁹ Аз же живя́х кроме́ зако́на иногда́, прише́дши же за́поведи, грех у́бо оживе́,

¹⁰ Аз же умро́х, и обре́теся ми за́поведь, я́же в живо́т, сия́ в смерть.

¹¹ Грех бо вину́ прие́м за́поведию, прельсти́ мя, и то́ю умертви́ мя.

¹² Те́мже у́бо зако́н свят, и за́поведь свята́ и пра́ведна и блага́.

¹³ Благо́е ли у́бо бысть мне смерть? Да не бу́дет, но грех, да яви́тся грех, благи́м ми содева́я смерть, да бу́дет по премно́гу гре́шен грех за́поведию.

¹⁴ Ве́мы бо, я́ко зако́н духо́вен есть, аз же пло́тян есмь, про́дан под грех.

¹⁵ Е́же бо содева́ю, не разуме́ю, не е́же бо хощу́, сие́ творю́, но е́же ненави́жду, то соде́ловаю.

¹⁶ А́ще ли, е́же не хощу́, сие́ творю́, хвалю́ зако́н я́ко добр.

¹⁷ Ны́не же не ктому́ аз сие́ содева́ю, но живы́й во мне грех.

¹⁸ Вем бо, я́ко не живе́т во мне, си́речь во пло́ти мое́й, до́брое: е́же бо хоте́ти прилежи́т ми, а е́же соде́яти до́брое, не обрета́ю.

¹⁹ Не е́же бо хощу́ до́брое, творю́, но е́же не хощу́ зло́е, сие́ содева́ю.

²⁰ А́ще ли, е́же не хощу́ аз, сие́ творю́, уже́ не аз сие́ творю́, но живы́й во мне грех.

²¹ Обрета́ю у́бо зако́н, хотя́щу ми твори́ти до́брое, я́ко мне зло́е прилежи́т.

²² Соуслажда́юся бо зако́ну Бо́жию по вну́треннему челове́ку.

²³ Ви́жду же ин зако́н во у́дех мои́х, проти́ву вою́ющь зако́ну ума́ моего́ и пленя́ющь мя зако́ном грехо́вным, су́щим во у́дех мои́х.

²⁴ Окая́нен аз челове́к, кто мя изба́вит от те́ла сме́рти сея́?

²⁵ Благодарю́ Бо́га моего́ Иису́с Христо́м Го́сподем на́шим. Те́мже у́бо сам аз умо́м мои́м рабо́таю зако́ну Бо́жию, пло́тию же зако́ну грехо́вному.

Глава 8

¹ Ни еди́но у́бо ны́не осужде́ние су́щим о Христе́ Иису́се не по пло́ти ходя́щим, но по ду́ху.

² Зако́н бо ду́ха жи́зни о Христе́ Иису́се свободи́л мя есть от зако́на грехо́внаго и сме́рти.

³ Немощно́е бо зако́на, в не́мже немоществова́ше пло́тию, Бог Сы́на Своего́ посла́ в подо́бии пло́ти греха́, и о гресе́ осуди́ грех во пло́ти,

⁴ Да оправда́ние зако́на испо́лнится в нас, не по пло́ти ходя́щих, но по ду́ху.

⁵ Су́щии бо по пло́ти, плотска́я му́дрствуют. А и́же по ду́ху, духо́вная.

⁶ Мудрова́ние бо плотско́е смерть есть, а мудрова́ние духо́вное живо́т и мир.

⁷ Зане́ мудрова́ние плотско́е вражда́ на Бо́га, зако́ну бо Бо́жию не покаря́ется, ниже́ бо мо́жет.

⁸ Су́щии же во пло́ти, Бо́гу угоди́ти не мо́гут.

⁹ Вы же не́сте во пло́ти, но в ду́се, поне́же Дух Бо́жий живе́т в вас. А́ще же кто Ду́ха Христо́ва не и́мать, сей несть Его́в.

¹⁰ А́ще ли Христо́с в вас, плоть у́бо мертва́ греха́ ра́ди, дух же живе́т пра́вды ра́ди.

¹¹ А́ще ли же Дух Воскреси́вшаго Иису́са от ме́ртвых живе́т в вас, Воздви́гий Христа́ из ме́ртвых оживотвори́т и ме́ртвенная телеса́ ва́ша, живу́щим Ду́хом Его́ в вас.

¹² Те́мже у́бо, бра́тие, до́лжни есмы́ не пло́ти, е́же по пло́ти жи́ти.

¹³ А́ще бо по пло́ти живете́, и́мате умре́ти, а́ще ли ду́хом дея́ния плотска́я умерщвля́ете, жи́ви бу́дете.

¹⁴ Ели́цы бо Ду́хом Бо́жиим во́дятся, си́и суть сы́нове Бо́жии.

¹⁵ Не прия́сте бо ду́ха рабо́ты па́ки в боя́знь, но прия́сте Ду́ха сыноположе́ния, о Не́мже вопие́м: А́вва О́тче.

¹⁶ Са́мый Дух спослушеству́ет ду́хови на́шему, я́ко есмы́ ча́да Бо́жия.

¹⁷ А́ще же ча́да, и насле́дницы: насле́дницы у́бо Бо́гу, снасле́дницы же Христу́, поне́же с Ним стра́ждем, да и с Ним просла́вимся.

¹⁸ Непщу́ю бо, я́ко недосто́йны стра́сти ны́нешняго вре́мене к хотя́щей сла́ве яви́тися в нас.

¹⁹ Ча́яние бо тва́ри, открове́ния сыно́в Бо́жиих ча́ет.

²⁰ Суете́ бо тварь повину́ся не во́лею, но за повину́вшаго ю́, на упова́нии,

²¹ Я́ко и сама́ тварь свободи́тся от рабо́ты истле́ния в свобо́ду сла́вы чад Бо́жиих.

²² Ве́мы бо, я́ко вся тварь с на́ми совоздыха́ет и сболе́знует да́же доны́не,

²³ Не то́чию же, но и са́ми нача́ток Ду́ха иму́ще, и мы са́ми в себе́ воздыха́ем, всыновле́ния ча́юще, избавле́ния те́лу на́шему.

²⁴ Упова́нием бо спасо́хомся. Упова́ние же ви́димое, несть упова́ние, е́же бо ви́дит кто, что и упова́ет?

²⁵ А́ще ли, его́же не ви́дим, наде́емся, терпе́нием ждем.

²⁶ Си́це же и Дух спосо́бствует нам в не́мощех на́ших, о чесо́м бо помо́лимся, я́коже подоба́ет, не ве́мы, но Сам Дух хода́тайствует о нас воздыха́нии неизглаго́ланными.

²⁷ Испыта́яй же сердца́ весть, что есть мудрова́ние Ду́ха, я́ко по Бо́гу припове́дует ^[204] о святы́х.

²⁸ Ве́мы же, я́ко лю́бящим Бо́га вся поспешеству́ют во благо́е, су́щим по предуве́дению зва́нным.

²⁹ И́хже бо предуве́де, [тех] и предуста́ви сообра́зным бы́ти о́бразу Сы́на Своего́, я́ко бы́ти Ему́ перворо́дну во мно́гих бра́тиях.

³⁰ А и́хже предуста́ви, тех и призва́, а и́хже призва́, сих и оправда́, а и́хже оправда́, сих и просла́ви.

³¹ Что у́бо рече́м к сим, а́ще Бог по нас, кто на ны?

³² И́же у́бо Своего́ Сы́на не пощаде́, но за ны вся пре́дал есть Его́, ка́ко у́бо не и с Ним вся нам да́рствует?

³³ Кто пое́млет на избра́нныя Бо́жия? Бог оправда́яй.

³⁴ Кто осужда́яй? Христо́с Иису́с уме́рый, па́че же и воскресы́й, И́же и есть одесну́ю Бо́га, И́же и хода́тайствует о нас.

³⁵ Кто ны разлучи́т от любве́ Бо́жия? Скорбь ли, или́ теснота́, или́ гоне́ние, или́ глад, или́ нагота́, или́ беда́, или́ мечь? Я́коже есть пи́сано:

³⁶ Я́ко Тебе́ ра́ди умерщвля́еми есмы́ весь день, вмени́хомся я́коже о́вцы заколе́ния.

³⁷ Но о сих всех препобежда́ем за Возлю́бльшаго ны.

³⁸ Извести́хся бо, я́ко ни смерть, ни живо́т, ни А́нгели, ни Нача́ла, ниже́ Си́лы, ни настоя́щая, ни гряду́щая,

³⁹ Ни высота́, ни глубина́, ни и́на тварь ка́я возмо́жет нас разлучи́ти от любве́ Бо́жия, я́же о Христе́ Иису́се Го́споде на́шем.

Глава 9

¹ И́стину глаго́лю о Христе́, не лгу, послушеству́ющи ми со́вести мое́й Ду́хом Святы́м,

² Я́ко скорбь ми есть ве́лия и непрестаю́щая боле́знь се́рдцу моему́.

³ Моли́л бых ся бо сам аз отлуче́н бы́ти от Христа́ по бра́тии мое́й, сро́дницех мои́х по пло́ти,

⁴ И́же суть изра́ильте, и́хже всыновле́ние и сла́ва, и заве́ти и законоположе́ние, и служе́ние и обетова́ния,

⁵ И́хже отцы́, и от ни́хже Христо́с по пло́ти, сый над все́ми Бог благослове́н во ве́ки, ами́нь.

⁶ Не та́коже я́ко отпаде́ сло́во Бо́жие, не вси бо су́щии от Изра́иля, си́и Изра́иль,

⁷ Ни зане́ суть се́мя Авраа́мле, вси ча́да, но во Исаа́це, рече́, нарече́тся ти се́мя.

⁸ Си́речь, не ча́да плотска́я, сия́ ча́да Бо́жия, но ча́да обетова́ния причита́ются в се́мя.

⁹ Обетова́ния бо сло́во сие́: на сие́ вре́мя прииду́, и бу́дет Са́рре сын.

¹⁰ Не то́чию же, но и Реве́кка от еди́наго ло́жа Исаа́ка отца́ на́шего иму́щи.

¹¹ Не у́бо не ро́ждшимся, ни сотво́ршим чесо́ бла́го или́ зло, да по избра́нию предложе́ние Бо́жие пребу́дет,

¹² Не от дел, но от Призыва́ющаго, рече́ся ей, я́ко бо́лий порабо́тает ме́ньшему.

¹³ Я́коже есть пи́сано: Иа́кова возлюби́х, Иса́ва же возненави́дех.

¹⁴ Что у́бо рече́м? Еда́ непра́вда у Бо́га? Да не бу́дет.

¹⁵ Моисе́ови бо глаго́лет: поми́лую, его́же а́ще поми́лую, и уще́дрю, его́же а́ще уще́дрю.

¹⁶ Те́мже у́бо ни хотя́щаго, ни теку́щаго, но ми́лующаго Бо́га.

¹⁷ Глаго́лет бо Писа́ние фарао́нови: я́ко на и́стое сие́ воздвиго́х тя, я́ко да покажу́ тобо́ю си́лу Мою́ и я́ко да возвести́тся и́мя Мое́ по всей земли́.

¹⁸ Те́мже у́бо, его́же хо́щет, ми́лует, а его́же хо́щет, ожесточа́ет.

¹⁹ Рече́ши же ми у́бо: чесо́ ра́ди у́бо укоря́ет, во́ли бо Его́ кто проти́витися мо́жет?

²⁰ Те́мже у́бо, о челове́че, ты кто еси́, проти́в отвеща́яй Бо́гови? Еда́ рече́т зда́ние созда́вшему е́: почто́ мя сотвори́л еси́ та́ко?

²¹ Или́ не и́мать вла́сти скуде́льник на бре́нии, от того́же смеше́ния сотвори́ти ов у́бо сосу́д в честь, ов же не в честь?

²² А́ще ли же хотя́ Бог показа́ти гнев Свой и яви́ти си́лу Свою́, пренесе́ во мно́зе долготерпе́нии сосу́ды гне́ва соверше́ны в поги́бель,

²³ И да ска́жет бога́тство сла́вы Своея́ на сосу́дех ми́лости, я́же предугото́ва в сла́ву,

²⁴ И́хже и призва́ нас не то́чию от иуде́й, но и от язы́к.

²⁵ Я́коже и во Оси́и глаго́лет: нареку́ не лю́ди Моя́ лю́ди Моя́, и невозлю́бленую возлю́блену.

²⁶ И бу́дет на ме́сте, иде́же рече́ся им: не лю́дие Мои́ есте́ вы, та́мо нареку́тся сы́нове Бо́га жива́го.

²⁷ Иса́иа же вопие́т о Изра́или: а́ще бу́дет число́ сыно́в Изра́илевых я́ко песо́к морски́й, оста́нок спасе́тся.

²⁸ Сло́во бо скончава́я и сокраща́я в пра́вде, я́ко сло́во сокраще́но сотвори́т Госпо́дь на земли́.

²⁹ И я́коже прорече́ Иса́иа: а́ще не бы Госпо́дь Савао́ф оста́вил нам се́мене, я́коже Содо́м у́бо бы́ли бы́хом, и я́коже Гомо́рру уподо́билися бы́хом.

³⁰ Что у́бо рече́м, я́ко язы́цы, не гоня́щии пра́вду, постиго́ша пра́вду, пра́вду же, я́же от ве́ры.

³¹ Изра́иль же, гоня́ зако́н пра́вды, в зако́н пра́вды не пости́же.

³² Чесо́ ра́ди? Зане́ не от ве́ры, но от дел зако́на, преткну́шася бо о ка́мень претыка́ния.

³³ Я́коже есть пи́сано: се полага́ю в Сио́не ка́мень претыка́ния и ка́мень собла́зна, и всяк ве́руяй во́нь не постыди́тся.

Глава 10

¹ Бра́тие, благоволе́ние у́бо моего́ се́рдца и моли́тва, я́же к Бо́гу по Изра́или, есть во спасе́ние.

² Свиде́тельствую бо им, я́ко ре́вность Бо́жию и́мут, но не по ра́зуму.

³ Не разуме́юще бо Бо́жия пра́вды и свою́ пра́вду и́щуще поста́вити, пра́вде Бо́жией не повину́шася.

⁴ Кончи́на бо зако́на Христо́с, в пра́вду вся́кому ве́рующему.

⁵ Моисе́й бо пи́шет пра́вду ю́же от зако́на, я́ко сотвори́вый та челове́к жив бу́дет в них.

⁶ А я́же от ве́ры пра́вда си́це глаго́лет: да не рече́ши в се́рдцы твое́м, кто взы́дет на не́бо, си́речь Христа́ свести́.

⁷ Или́ кто сни́дет в бе́здну, си́речь Христа́ от ме́ртвых возвести́.

⁸ Но что глаго́лет Писа́ние? Близ ти глаго́л есть, во усте́х твои́х и в се́рдце твое́м, си́речь глаго́л ве́ры, его́же пропове́даем.

⁹ Я́ко а́ще испове́си усты́ твои́ми Го́спода Иису́са, и ве́руеши в се́рдце твое́м, я́ко Бог Того́ воздви́же из ме́ртвых, спасе́шися.

¹⁰ Се́рдцем бо ве́руется в пра́вду, усты́ же испове́дуется во спасе́ние.

¹¹ Глаго́лет бо Писа́ние: всяк ве́руяй вонь не постыди́тся.

¹² Несть бо ра́знствия иуде́еви же и е́ллину: Той бо Бог всех, богатя́й ^[205] во всех призыва́ющих Его́.

¹³ Всяк бо, и́же а́ще призове́т и́мя Госпо́дне, спасе́тся. Ка́ко у́бо призову́т, в Него́же не ве́роваша?

¹⁴ Ка́ко же уве́руют, Его́же не услы́шаша? Ка́ко же услы́шат без пропове́дающаго?

¹⁵ Ка́ко же пропове́дят, а́ще не по́слани бу́дут? Я́коже есть пи́сано: коль красны́ но́ги благовеству́ющих мир, благовеству́ющих блага́я.

¹⁶ Но не вси послу́шаша благовествова́ния. Иса́иа бо глаго́лет: Го́споди, кто ве́рова слу́ху на́шему?

¹⁷ Те́мже у́бо ве́ра от слу́ха, слух же глаго́лом Бо́жиим.

¹⁸ Но глаго́лю: еда́ не слы́шаша, те́мже у́бо, ^[206] во всю зе́млю изы́де веща́ние их, и в концы́ вселе́нныя глаго́лы их.

¹⁹ Но глаго́лю: еда́ не разуме́ Изра́иль? Пе́рвый Моисе́й глаго́лет: Аз раздражу́ вы не о язы́це, но о язы́це неразу́мне ^[207] прогне́ваю вас.

²⁰ Иса́иа же дерза́ет и глаго́лет: обрето́хся не и́щущим Мене́, явле́н бых не вопроша́ющим о Мне.

²¹ Ко Изра́илю же глаго́лет: весь день возде́х ру́це Мои́ к лю́дем непокори́вым и пререка́ющим.

Глава 11

¹ Глаго́лю у́бо: еда́ отри́ну Бог лю́ди Своя́? Да не бу́дет. И́бо и аз Изра́ильтянин есмь, от се́мене Авраа́мля, коле́на Вениами́нова.

² Не отри́ну Бог люде́й Свои́х, и́хже пре́жде разуме́. Или́ не ве́сте о Илии́, что глаго́лет Писа́ние, я́ко припове́дует Бо́гови на Изра́иля, ^[208] глаго́ля:

³ Го́споди, проро́ки Твоя́ изби́ша и олтари́ Твоя́ раскопа́ша, и аз оста́х еди́н, и и́щут ду́шу мою́ изъя́ти.

⁴ Но что глаго́лет ему́ Боже́ственный отве́т? Оста́вих Себе́ седмь ты́сящ муже́й, и́же не преклони́ша коле́на пред Ваа́лом.

⁵ Та́ко у́бо и в ны́нешнее вре́мя оста́нок по избра́нию благода́ти бысть.

⁶ А́ще ли по благода́ти, то не от дел, зане́ благода́ть уже́ не быва́ет благода́ть. А́ще ли от дел, ктому́ несть благода́ть, зане́ бо де́ло уже́ несть де́ло.

⁷ Что у́бо? Его́же иска́ше Изра́иль, сего́ не получи́, а избра́ние получи́. Про́чии же ослепи́шася.

⁸ Я́коже есть пи́сано: даде́ им Бог дух умиле́ния, ^[209] о́чи не ви́дети и у́ши не слы́шати, да́же до дне́шняго дне.

⁹ И Дави́д глаго́лет: да бу́дет трапе́за их в сеть и в лов, и в собла́зн и в воздая́ние им.

¹⁰ Да помрача́тся о́чи их е́же не ви́дети, и хребе́т их вы́ну сляца́й.

¹¹ Глаго́лю у́бо: еда́ согреши́ша, да отпаду́т? Да не бу́дет. Но тех паде́нием спасе́ние язы́ком, во е́же раздражи́ти их.

¹² А́ще ли же прегреше́ние их бога́тство міра, и отпаде́ние их бога́тство язы́ком, кольми́ па́че исполне́ние их?

¹³ Вам бо глаго́лю язы́ком, поне́же у́бо есмь аз язы́ком Апо́стол, слу́жбу мою́ прославля́ю.

¹⁴ А́ще ка́ко раздражу́ мою́ плоть, и спасу́ не́кия от них?

¹⁵ А́ще бо отложе́ние их, примире́ние міру, что прия́тие, ра́зве жизнь из ме́ртвых?

¹⁶ А́ще ли нача́ток свят, то и примеше́ние, и а́ще ко́рень свят, то и ве́тви.

¹⁷ А́ще ли не́цыи от ве́твей отломи́шася, ты же, ди́вия ма́слина сый, прицепи́лся еси́ в них, и прича́стник ко́рене и ма́сти ма́слинныя был еси́.

¹⁸ Не хвали́ся на ве́тви, а́ще ли же хва́лишися, не ты ко́рень но́сиши, но ко́рень тебе́.

¹⁹ Рече́ши у́бо: отломи́шася ве́тви, да аз прицеплю́ся.

²⁰ До́бре, неве́рием отломи́шася, ты же ве́рою стои́ши. Не высокому́дрствуй, но бо́йся.

²¹ А́ще бо Бог есте́ственных ве́твей не пощаде́, да не ка́ко и тебе́ не пощади́т.

²² Виждь у́бо бла́гость и непощаде́ние Бо́жие: на отпа́дших у́бо непощаде́ние, а на тебе́ бла́гость Бо́жия, а́ще пребу́деши в бла́гости, а́ще ли же ни, то и ты отсе́чен бу́деши.

²³ И они́ же, а́ще не пребу́дут в неве́рствии, прицепя́тся, си́лен бо есть Бог па́ки прицепи́ти их.

²⁴ А́ще бо ты от есте́ственныя отсе́чен ди́вия ма́слины, и чрез естество́ прицепи́лся еси́ к до́брей ма́слине, кольми́ па́че си́и, и́же по естеству́, прицепя́тся свое́й ма́слине?

²⁵ Не бо хощу́ вас не ве́дети та́йны сея́, [да не бу́дете о себе́ му́дри,] я́ко ослепле́ние от ча́сти Изра́илеви бысть, до́ндеже исполне́ние язы́ков вни́дет.

²⁶ И та́ко весь Изра́иль спасе́тся, я́коже есть пи́сано: прии́дет от Сио́на Избавля́яй, и отврати́т нече́стие от Иа́кова.

²⁷ И сей им от Мене́ заве́т, егда́ отиму́ грехи́ их.

²⁸ По благовествова́нию у́бо, врази́ вас ра́ди, по избра́нию же, возлю́блени оте́ц ра́ди.

²⁹ Нераска́янна бо дарова́ния и зва́ние Бо́жие.

³⁰ Я́коже бо и вы иногда́ проти́вистеся Бо́гови, ны́не же поми́ловани бы́сте сих противле́нием. ^[210]

³¹ Та́кожде и си́и ны́не проти́вишася ва́шей ми́лости, ^[211] да и ти́и поми́ловани бу́дут.

³² Затвори́ бо Бог всех в противле́ние, да всех поми́лует.

³³ О, глубина́ бога́тства и прему́дрости и ра́зума Бо́жия! Я́ко неиспы́тани су́дове Его́, и неизсле́довани путие́ Его́.

³⁴ Кто бо разуме́ ум Госпо́день, или́ кто сове́тник Ему́ бысть?

³⁵ Или́ кто пре́жде даде́ Ему́, и возда́стся Ему́?

³⁶ Я́ко из Того́ и Тем и в Нем вся́ческая. Тому́ сла́ва во ве́ки. Ами́нь.

Глава 12

¹ Молю́ у́бо вас щедро́тами Бо́жиими, предста́вите телеса́ ва́ша же́ртву жи́ву, свя́ту, благоуго́дну Бо́гови, слове́сное служе́ние ва́ше,

² И не сообразу́йтеся ве́ку сему́, но преобразу́йтеся обновле́нием ума́ ва́шего, во е́же искуша́ти вам, что есть во́ля Бо́жия, блага́я и уго́дная, и соверше́нная.

³ Глаго́лю бо благода́тию да́вшеюся мне, вся́кому су́щему в вас не му́дрствовати па́че, е́же подоба́ет му́дрствовати, но му́дрствовати в целому́дрии, коему́ждо я́коже Бог раздели́л есть ме́ру ве́ры.

⁴ Я́коже бо во еди́ном телеси́ мно́ги у́ды и́мамы, у́ды же вси не то́жде и́мут де́лание,

⁵ Та́кожде мно́зи еди́но те́ло есмы́ о Христе́, а по еди́ному друг дру́гу у́ди.

⁶ Иму́ще же дарова́ния по благода́ти да́нней нам разли́чна, а́ще проро́чество, по ме́ре ве́ры,

⁷ А́ще ли служе́ние, в служе́нии, а́ще учя́й, во уче́нии,

⁸ А́ще утеша́яй, во утеше́нии, подава́яй, в простоте́, предстоя́й, ^[212] со тща́нием, ми́луяй, с до́брым изволе́нием.

⁹ Любы́ нелицеме́рна, ненави́дящи зло́е, прилепля́ющися благо́му.

¹⁰ Братолю́бием друг ко дру́гу любе́зни, че́стию друг дру́га бо́льша творя́ще.

¹¹ Тща́нием не лени́ви, ду́хом горя́ще, Го́сподеви рабо́тающе.

¹² Упова́нием ра́дующеся, ско́рби терпя́ще, в моли́тве пребыва́юще.

¹³ Тре́бованием святы́х приобща́ющеся, страннолю́бия держа́щеся.

¹⁴ Благословля́йте гоня́щия вы, благослови́те, а не клени́те.

¹⁵ Ра́доватися с ра́дующимися, и пла́кати с пла́чущими.

¹⁶ То́жде друг ко дру́гу му́дрствующе. Не высо́кая му́дрствующе, но смире́нными веду́щеся, не быва́йте му́дри о себе́.

¹⁷ Ни еди́ному же зла за зло воздаю́ще, промышля́юще до́брая пред все́ми челове́ки.

¹⁸ А́ще возмо́жно, е́же от вас, со все́ми челове́ки мир име́йте.

¹⁹ Не себе́ отмща́юще, возлю́блении, но дади́те ме́сто гне́ву. Пи́сано бо есть: Мне отмще́ние, Аз возда́м, глаго́лет Госпо́дь.

²⁰ А́ще у́бо а́лчет враг твой, ухле́би его́, а́ще ли жа́ждет, напо́й его́. Сие́ бо творя́, у́глие о́гнено собира́еши на главу́ его́.

²¹ Не побежде́н быва́й от зла, но побежда́й благи́м зло́е.

Глава 13

¹ Вся́ка душа́ власте́м предержа́щим да повину́ется, несть бо власть а́ще не от Бо́га, су́щия же вла́сти от Бо́га учинены́ суть.

² Те́мже противля́яйся вла́сти, Бо́жию повеле́нию противля́ется, противля́ющиися же себе́ грех прие́млют.

³Кня́зи бо не суть боя́знь до́брым дело́м, но злым. Хо́щеши же ли не боя́тися вла́сти? Благо́е твори́, и име́ти бу́деши похвалу́ от него́.

⁴ Бо́жий бо слуга́ есть, тебе́ во благо́е. А́ще ли зло́е твори́ши, бо́йся, не бо без ума́ ^[213] мечь но́сит, Бо́жий бо слуга́ есть, отмсти́тель в гнев зло́е творя́щему.

⁵ Те́мже потре́ба повинова́тися не то́кмо за гнев, но и за со́весть.

⁶ Сего́ бо ра́ди и да́ни даете́, служи́тели бо Бо́жии суть, во и́стое сие́ пребыва́юще.

⁷ Воздади́те у́бо всем до́лжная: ему́же у́бо уро́к, уро́к, а ему́же дань, дань, а ему́же страх, страх, и ему́же честь, честь.

⁸ Ни еди́ному же ничи́мже до́лжни быва́йте, то́чию е́же люби́ти друг дру́га: любя́й бо дру́га, зако́н испо́лни.

⁹ Е́же бо, не прелюбы́ сотвори́ши, не убие́ши, не укра́деши, не лжесвиде́тельствуеши, не похо́щеши, и а́ще ка́я и́на за́поведь, в сем словеси́ соверша́ется, во е́же возлю́биши и́скренняго твоего́, я́коже сам себе́.

¹⁰ Любы́ и́скреннему зла не твори́т. Исполне́ние у́бо зако́на любы́ есть.

¹¹ И сие́, ве́дяще вре́мя, я́ко час уже́ нам от сна воста́ти. Ны́не ближа́йшее нам спасе́ние, не́жели егда́ ве́ровахом.

¹² Нощь у́бо пре́йде, а день прибли́жися: отложи́м у́бо дела́ те́мная, и облече́мся во ору́жие све́та.

¹³ Я́ко во дни, благообра́зно да хо́дим, не козлогласова́нии и пия́нствы, не любодея́нии и студодея́нии, не рве́нием и за́вистию,

¹⁴ Но облецы́теся Го́сподем на́шим Иису́с Христо́м, и пло́ти уго́дия не твори́те в по́хоти.

Глава 14

¹ Изнемога́ющаго же в ве́ре прие́млите, не в сомне́ние помышле́ний.

² Ов бо ве́рует я́сти вся, а изнемога́яй зе́лия да яст.

³ Яды́й не яду́щаго да не укоря́ет, и не яды́й яду́щаго да не осужда́ет, Бог бо его́ прия́т.

⁴ Ты кто еси́ судя́й чужде́му рабу́? Своему́ Го́сподеви стои́т, или́ па́дает, ста́нет же, си́лен бо есть Бог поста́вити его́.

⁵ Ов у́бо разсужда́ет день чрез день, о́в же су́дит на всяк день. Ки́иждо свое́ю мы́слию да известву́ется.

⁶ Му́дрствуяй день, Го́сподеви му́дрствует, и не му́дрствуяй день, Го́сподеви не му́дрствует. Яды́й, Го́сподеви яст, благодари́т бо Бо́га, и не яды́й, Го́сподеви не яст, и благодари́т Бо́га.

⁷ Никто́же бо нас себе́ живе́т, и никто́же себе́ умира́ет.

⁸ А́ще у́бо живе́м, Го́сподеви живе́м, а́ще же умира́ем, Го́сподеви умира́ем, а́ще у́бо живе́м, а́ще умира́ем, Госпо́дни есмы́.

⁹ На сие́ бо Христо́с и у́мре и воскре́се и оживе́, да и ме́ртвыми и живы́ми облада́ет.

¹⁰ Ты же почто́ осужда́еши бра́та твоего́, или́ ты что уничижа́еши бра́та твоего́? Вси бо предста́нем суди́щу Христо́ву.

¹¹ Пи́сано бо есть: живу́ Аз, глаго́лет Госпо́дь, я́ко Мне поклони́тся вся́ко коле́но, и всяк язы́к испове́стся Бо́гови.

¹² Те́мже у́бо ки́йждо нас о себе́ сло́во даст Бо́гу.

¹³ Не ктому́ у́бо друг дру́га осужда́ем, но сие́ па́че суди́те, е́же не полага́ти претыка́ния бра́ту или́ собла́зна.

¹⁴ Вем и извеще́н есмь о Христе́ Иису́се я́ко ничто́же скве́рно са́мо собо́ю, то́чию помышля́ющему что скве́рно бы́ти, о́ному скве́рно есть.

¹⁵ А́ще у́бо бра́шна ра́ди брат твой скорби́т, уже́ не по любви́ хо́диши, не бра́шном твои́м того́ погубля́й, за него́же Христо́с у́мре.

¹⁶ Да не ху́лится у́бо ва́ше благо́е.

¹⁷ Несть бо Ца́рство Бо́жие бра́шно и питие́, но пра́вда, и мир, и ра́дость о Ду́се Свя́те.

¹⁸ И́же бо си́ми слу́жит Христо́ви, благоуго́ден есть Бо́гови и иску́сен челове́ком.

¹⁹ Те́мже у́бо мир возлю́бим и я́же к созда́нию друг ко дру́гу.

²⁰ Не бра́шна ра́ди разоря́й де́ло Бо́жие. Вся бо чи́ста, но зло челове́ку претыка́нием яду́щему.

²¹ Добро́ не я́сти мяс, ниже́ пи́ти вина́, ни о не́мже брат твой претыка́ется или́ соблазня́ется, или́ изнемога́ет.

²² Ты ве́ру и́маши? О себе́ сам име́й пред Бо́гом. Блаже́н не осужда́яй себе́, о не́мже искуша́ется.

²³ А сомня́яйся, а́ще яст, осужда́ется, зане́ не от ве́ры, вся́ко же, е́же не от ве́ры, грех есть.

²⁴ Могу́щему же вас утверди́ти по благовествова́нию моему́ и пропове́данию Иису́с Христо́ву, по открове́нию та́йны, ле́ты ве́чными умолча́нныя.

²⁵ Я́вльшияся же ны́не, писа́нии проро́ческими, по повеле́нию ве́чнаго Бо́га, в послуша́ние ве́ры во всех язы́цех позна́вшияся,

²⁶ Еди́ному Прему́дрому Бо́гу, Иису́сом Христо́м, Ему́же сла́ва во ве́ки. Ами́нь.

Глава 15

¹ До́лжни есмы́ мы си́льнии не́мощи немощны́х носи́ти и не себе́ угожда́ти.

² Ки́йждо же вас бли́жнему да угожда́ет во благо́е к созда́нию.

³ И́бо и Христо́с не Себе́ угоди́, но я́коже есть пи́сано: поноше́ния понося́щих Тебе́ нападо́ша на мя.

⁴ Ели́ка бо преднапи́сана бы́ша, в на́ше наказа́ние преднаписа́шася, да терпе́нием и утеше́нием Писа́ний упова́ние и́мамы.

⁵ Бог же терпе́ния и утеше́ния, да даст вам то́жде му́дрствовати друг ко дру́гу о Христе́ Иису́се.

⁶ Да единоду́шно еди́ными усты́ сла́вите Бо́га и Отца́ Го́спода на́шего Иису́са Христа́.

⁷ Те́мже прие́млите друг дру́га, я́коже и Христо́с прия́т вас во сла́ву Бо́жию.

⁸ Глаго́лю же Христа́ Иису́са служи́теля бы́вша обре́зания по и́стине Бо́жией, во е́же утверди́ти обетова́ния отце́в.

⁹ А язы́ком по ми́лости, просла́вити Бо́га, я́коже есть пи́сано: сего́ ра́ди испове́мся Тебе́ во язы́цех, Го́споди, и и́мени Твоему́ пою́.

¹⁰ И па́ки глаго́лет: возвесели́теся, язы́цы, с людьми́ Его́.

¹¹ И па́ки: хвали́те Го́спода, вси язы́цы, и похвали́те Его́, вси лю́дие.

¹² И па́ки Иса́иа глаго́лет: бу́дет ко́рень Иессе́ов, и востая́й владе́ти над язы́ки, на Того́ язы́цы упова́ют.

¹³ Бог же упова́ния да испо́лнит вас вся́кия ра́дости и ми́ра в ве́ре, избы́точествовати вам во упова́нии, си́лою Ду́ха Свята́го.

¹⁴ Извеще́н же есмь, бра́тие моя́, и сам аз о вас, я́ко и са́ми вы по́лни есте́ бла́гости, испо́лнени вся́каго ра́зума, могу́ще и ины́я научи́ти.

¹⁵ Де́рзее же писа́х вам, бра́тие моя́, от ча́сти, я́ко воспомина́я вам, за благода́ть да́нную ми от Бо́га,

¹⁶ Во е́же бы́ти ми служи́телю Иису́с Христо́ву во язы́цех, священноде́йствующу благовествова́ние Бо́жие, да бу́дет приноше́ние е́же от язы́к благоприя́тно и освяще́нно Ду́хом Святы́м.

¹⁷ И́мам у́бо похвалу́ о Христе́ Иису́се, я́же к Бо́гу.

¹⁸ Не сме́ю бо глаго́лати что, и́хже не соде́я Христо́с мно́ю, в послуша́ние язы́ков, сло́вом и де́лом,

¹⁹ В си́ле зна́мений и чуде́с, си́лою Ду́ха Бо́жия, я́коже ми от Иерусали́ма и о́крест да́же до Иллири́ка испо́лнити благовествова́ние Христо́во.

²⁰ Си́це же потща́хся благовести́ти, не иде́же именова́ся Христо́с, да не на чуже́м основа́нии сози́жду,

²¹ Но я́коже есть пи́сано: и́мже не возвести́ся о Нем, у́зрят, и и́же не слы́шаша, уразуме́ют.

²² Те́мже и возбране́н бых мно́гажды приити́ к вам.

²³ Ны́не же ктому́ ме́ста не имы́й в страна́х сих, жела́ние же имы́й приити́ к вам от мно́гих лет,

²⁴ Я́ко а́ще поиду́ во Испа́нию, прииду́ к вам. Упова́ю бо ми́мо гряды́й ви́дети вас и ва́ми проводи́тися та́мо, а́ще вас пре́жде от ча́сти насы́щуся.

²⁵ Ны́не же гряду́ во Иерусали́м, служя́й святы́м.

²⁶ Благоволи́ша бо Македо́ниа и Аха́иа обще́ние не́кое сотвори́ти к ни́щим святы́м живу́щим во Иерусали́ме.

²⁷ Благоволи́ша бо, и до́лжни им суть. А́ще бо в духо́вных их прича́стники бы́ша язы́цы, до́лжни суть и в плотски́х послужи́ти им.

²⁸ Сие́ у́бо сконча́в, и запечатле́в им плод сей, поиду́ ва́ми во Испа́нию.

²⁹ Вем же, я́ко гряды́й к вам, во исполне́нии благослове́ния благове́стия Христо́ва прииду́.

³⁰ Молю́ же вы, бра́тие, Го́сподем на́шим Иису́с Христо́м и любо́вию Ду́ха, споспе́шствуйте ми в моли́твах о мне к Бо́гу,

³¹ Да изба́влюся от противля́ющихся во Иуде́и, и да слу́жба моя́, я́же во Иерусали́ме, благоприя́тна бу́дет святы́м.

³² Да с ра́достию прииду́ к вам во́лею Бо́жиею и упоко́юся с ва́ми.

³³ Бог же ми́ра со все́ми ва́ми. Ами́нь.

Глава 16

¹ Вруча́ю же вам Фи́ву, сестру́ на́шу, су́щу служи́тельницу це́ркве, я́же в Кегхре́ех.

² Да прии́мете ю́ о Го́споде досто́йне святы́м, и споспе́шствуйте ей, о не́йже а́ще от вас потре́бует ве́щи, и́бо сия́ засту́пница мно́гим бысть, и самому́ мне.

³ Целу́йте Приски́ллу и Аки́лу, споспе́шника моя́ о Христе́ Иису́се,

⁴ И́же по души́ мое́й своя́ вы́я положи́ша, и́хже не аз еди́н благодарю́, но и вся це́ркви язы́ческия, и дома́шнюю их це́рковь.

⁵ Целу́йте Епене́та возлю́бленнаго ми, и́же есть нача́ток Аха́ии во Христа́.

⁶ Целу́йте Мариа́мь, я́же мно́го труди́ся о нас.

⁷ Целу́йте Андрони́ка и Иуни́ю, сро́дники моя́ и спле́нники моя́, и́же суть наро́читы во Апо́столех, и́же и пре́жде мене́ ве́роваша во Христа́.

⁸ Целу́йте Ампли́а возлю́бленнаго ми о Го́споде.

⁹ Целу́йте Урва́на споспе́шника на́шего о Христе́, и Стахи́а возлю́бленнаго ми.

¹⁰ Целу́йте Апе́ллиа иску́сна о Христе́. Целу́йте су́щия от Аристову́ла.

¹¹ Целу́йте Иродио́на сро́дника моего́. Целу́йте и́же от Нарки́сса су́щия о Го́споде.

¹² Целу́йте Трифе́ну и Трифо́су тружда́ющияся о Го́споде. Целу́йте Перси́ду возлю́бленную, я́же мно́го труди́ся о Го́споде.

¹³ Целу́йте Ру́фа избра́ннаго о Го́споде, и ма́терь его́ и мою́.

¹⁴ Целу́йте Асигкри́та, Фле́гонта, Е́рма, Патро́ва, Ерми́а, и су́щую с ни́ми бра́тию.

¹⁵ Целу́йте Филоло́га и Иули́ю, Нире́а и сестру́ его́, и Олимпа́на, и су́щия с ни́ми вся святы́я.

¹⁶ Целу́йте друг дру́га лобза́нием святы́м. Целу́ют вы вся це́ркви Христо́вы.

¹⁷ Молю́ же вы, бра́тие, блюди́теся от творя́щих ра́спри и раздо́ры, кроме́ уче́ния, ему́же вы научи́стеся, и уклони́теся от них.

¹⁸ Такови́и бо Го́сподеви на́шему Иису́су Христу́ не рабо́тают, но своему́ чре́ву: и́же благи́ми словесы́ и благослове́нием прельща́ют сердца́ незло́бивых.

¹⁹ Ва́ше бо послуша́ние ко всем дости́же. Ра́дуюся же е́же о вас. Хощу́ же вас му́дрым у́бо бы́ти во благо́е, просты́м же в зло́е.

²⁰ Бог же ми́ра да сокруши́т сатану́ под но́ги ва́ша вско́ре. Благода́ть Го́спода на́шего Иису́са Христа́ с ва́ми. Ами́нь.

²¹ Целу́ет вас Тимофе́й споспе́шник мой, и Луки́й и Иа́сон и Сосипа́тр, сро́дницы мои́.

²² Целу́ю вы и аз, Те́ртий, написа́вый посла́ние сие́, о Го́споде. Целу́ет вы Га́ие странноприи́мец мой и це́ркве всея́.

²³ Целу́ет вы Ера́ст строи́тель гра́дский, и Куа́рт брат.

²⁴ Благода́ть Го́спода на́шего Иису́са Христа́ со все́ми ва́ми. Ами́нь.

Пе́рвое посла́ние к Кори́нфянам

Глава 1

¹ Па́вел, зван Апо́стол Иису́с Христо́в во́лею Бо́жиею, и Сосфе́н брат,

² Це́ркви Бо́жией су́щей в Кори́нфе, освяще́нным о Христе́ Иису́се зва́нным святы́м, со все́ми призыва́ющими и́мя Го́спода на́шего Иису́са Христа́, во вся́ком ме́сте, тех же и на́шем.

³ Благода́ть вам и мир от Бо́га Отца́ на́шего и Го́спода Иису́са Христа́.

⁴ Благодарю́ Бо́га моего́ всегда́ о вас, о благода́ти Бо́жией да́нней вам о Христе́ Иису́се,

⁵ Я́ко во всем обогати́стеся о Нем, во вся́ком сло́ве и вся́ком ра́зуме,

⁶ Я́коже свиде́тельство Христо́во извести́ся в вас,

⁷ Я́ко вам не лиши́тися ни во еди́ном дарова́нии, ча́ющим открове́ния Го́спода на́шего Иису́са Христа́,

⁸ И́же и утверди́т вас да́же до конца́ непови́нны в день Го́спода на́шего Иису́са Христа́.

⁹ Ве́рен Бог, И́мже зва́ни бы́сте во обще́ние Сы́на Его́ Иису́са Христа́, Го́спода на́шего.

¹⁰ Молю́ же вы, братие, и́менем Го́спода на́шего Иису́са Христа́, да то́жде глаго́лете вси, и да не суть в вас ра́спри, да есте́ же утвержде́ни в то́мже разуме́нии и в то́йже мы́сли.

¹¹ Возвести́ся бо ми о вас, бра́тие моя́, по́сланным от Хло́иса, ^[214] я́ко рве́ния в вас суть.

¹² Глаго́лю же се я́ко ко́йждо вас глаго́лет: аз у́бо есмь Па́влов, аз же Аполло́сов, аз же Ки́фин, аз же Христо́в.

¹³ Еда́ раздели́ся Христо́с, еда́ Па́вел распя́тся по вас? Или́ во и́мя Па́влово крести́стеся?

¹⁴ Благодарю́ Бо́га, я́ко ни еди́наго от вас крести́х, то́чию Кри́спа и Га́иа,

¹⁵ Да никто́же рече́т, я́ко в мое́ и́мя крести́х.

¹⁶ Крести́х же и Стефани́нов дом, про́чее не вем, а́ще кого́ ина́го крести́х.

¹⁷ Не посла́ бо мене́ Христо́с крести́ти, но благовести́ти, не в прему́дрости сло́ва, да не испраздни́тся крест Христо́в.

¹⁸ Сло́во бо кре́стное погиба́ющим у́бо юро́дство есть, а спаса́емым нам си́ла Бо́жия есть.

¹⁹ Пи́сано бо есть: погублю́ прему́дрость прему́дрых, и ра́зум разу́мных отве́ргу.

²⁰ Где прему́др? Где кни́жник? Где совопро́сник ве́ка сего́? Не обуи́ ли Бог прему́дрость міра сего́?

²¹ Поне́же бо в прему́дрости Бо́жией не разуме́ міръ прему́дростию Бо́га, благоизво́лил Бог бу́йством про́поведи спасти́ ве́рующих.

²² Поне́же и иуде́е зна́мения про́сят, и е́ллини прему́дрости и́щут:

²³ Мы же пропове́дуем Христа́ ра́спята, иуде́ем у́бо собла́зн, е́ллином же безу́мие.

²⁴ Саме́м же зва́нным, иуде́ем же и е́ллином, Христа́, Бо́жию си́лу и Бо́жию прему́дрость.

²⁵ Зане́ бу́ее Бо́жие, прему́дрее челове́к есть, и немощно́е Бо́жие крепча́е челове́к есть.

²⁶ Ви́дите бо зва́ние ва́ше, бра́тие, я́ко не мно́зи ли прему́дри по пло́ти, не мно́зи ли си́льни, не мно́зи ли благородни?

²⁷ Но бу́яя міра избра́ Бог, да прему́дрыя посрами́т, и не́мощная міра избра́ Бог, да посрами́т кре́пкая.

²⁸ И худоро́дная міра, и уничиже́нная избра́ Бог, и не су́щая, да су́щая упраздни́т,

²⁹ Я́ко да не похва́лится вся́ка плоть пред Бо́гом.

³⁰ Из него́же вы есте́ о Христе́ Иису́се и́же бысть нам прему́дрость от Бо́га, пра́вда же и освяще́ние, и избавле́ние.

³¹ Да, я́коже пи́шется, хваля́йся, о Го́споде да хва́лится.

Глава 2

¹ И аз прише́д к вам, бра́тие, приидо́х не по превосхо́дному словеси́, или́ прему́дрости, возвеща́я вам свиде́тельство Бо́жие.

² Не суди́х бо ве́дети что в вас, то́чию Иису́са Христа́, и Сего́ ра́спята.

³ И аз в не́мощи и стра́се и тре́пете мно́зе бых в вас.

⁴ И сло́во мое́ и про́поведь моя́ не в препре́тельных челове́ческия прему́дрости словесе́х, но в явле́нии ду́ха и си́лы,

⁵ Да ве́ра ва́ша не в му́дрости челове́честей, но в си́ле Бо́жией бу́дет.

⁶ Прему́дрость же глаго́лем в соверше́нных, прему́дрость же не ве́ка сего́, ни князе́й ве́ка сего́ престаю́щих,

⁷ Но глаго́лем прему́дрость Бо́жию, в та́йне сокрове́нную, и́же предуста́ви Бог пре́жде век в сла́ву на́шу,

⁸ Ю́же никто́же от князе́й ве́ка сего́ разуме́. А́ще бо бы́ша разуме́ли, не бы́ша Го́спода сла́вы ра́спяли.

⁹ Но я́коже есть пи́сано: и́хже о́ко не ви́де, и у́хо не слы́ша, и на се́рдце челове́ку не взыдо́ша, я́же угото́ва Бог лю́бящим Его́.

¹⁰ Нам же Бог откры́л есть Ду́хом Свои́м: Дух бо вся испыту́ет, и глубины́ Бо́жия.

¹¹ Кто́ бо весть от челове́к, я́же в челове́це, то́чию дух челове́ка, живу́щий в нем? Та́кожде и Бо́жия никто́же весть, то́чию Дух Бо́жий.

¹² Мы же не дух міра сего́ прия́хом, но Дух и́же от Бо́га, да ве́мы я́же от Бо́га дарова́нная нам.

¹³ Я́же и глаго́лем не в науче́ных челове́ческия прему́дрости словесе́х, но в науче́ных Ду́ха Свята́го, духо́вная духо́вными сразсужда́юще.

¹⁴ Душе́вен же челове́к не прие́млет я́же Ду́ха Бо́жия: юро́дство бо ему́ есть, и не мо́жет разуме́ти, зане́ духо́вне востязу́ется.

¹⁵ Духо́вный же востязу́ет у́бо вся, а сам той ни от еди́наго востязу́ется.

¹⁶ Кто бо разуме́ ум Госпо́день, и́же изъясни́т и? Мы же ум Христо́в и́мамы.

Глава 3

¹ И аз, бра́тие, не мого́х вам глаго́лати я́ко духо́вным, но я́ко пло́тяным, я́ко младе́нцем о Христе́.

² Млеко́м вы напои́х, а не бра́шном, не у́бо можа́сте, но ни еще́ мо́жете ны́не,

³ Еще́ бо пло́тстии есте́. Иде́же бо в вас за́висти, и рве́ния, и ра́спри, не пло́тстии ли есте́ и по челове́ку хо́дите?

⁴ Егда́ бо глаго́лет кто: аз у́бо есмь Па́влов, други́й же: аз Аполло́сов, не пло́тстии ли есте́?

⁵ Кто у́бо есть Па́вел? Кто же ли Аполло́с? Но то́чию служи́теле, и́миже ве́ровасте, и кому́ждо я́коже Госпо́дь даде́.

⁶ Аз насади́х, Аполло́с напои́, Бог же возрасти́.

⁷ Те́мже ни насажда́яй есть что, ни напая́яй, но возраща́яй Бог.

⁸ Насажда́яй же и напая́яй еди́но еста́, ки́йждо же свою́ мзду прии́мет по своему́ труду́.

⁹ Бо́гу бо есмы́ споспе́шницы: Бо́жие тяжа́ние, Бо́жие зда́ние есте́.

¹⁰ По благода́ти Бо́жией да́нней мне, я́ко прему́др архите́ктон основа́ние положи́х, ин же назида́ет, ки́йждо же да блюде́т, ка́ко назида́ет.

¹¹ Основа́ния бо ина́го никто́же мо́жет положи́ти па́че лежа́щаго, е́же есть Иису́с Христо́с.

¹² А́ще ли кто назида́ет на основа́нии сем зла́то, сребро́, ка́мение честно́е, дрова́, се́но, тро́стие,

¹³ Кого́ждо де́ло явле́но бу́дет, день бо яви́т, зане́ огне́м открыва́ется, и кого́ждо де́ло, яково́же есть, огнь иску́сит.

¹⁴ И его́же а́ще де́ло пребу́дет, его́же назда́, мзду прии́мет.

¹⁵ А его́же де́ло сгори́т, отщети́тся: сам же спасе́тся, та́кожде я́коже огне́м.

¹⁶ Не ве́сте ли, я́ко храм Бо́жий есте́, и Дух Бо́жий живе́т в вас?

¹⁷ А́ще кто Бо́жий храм растли́т, растли́т сего́ Бог, храм бо Бо́жий свят есть, и́же есте́ вы.

¹⁸ Никто́же себе́ да прельща́ет. А́ще кто мни́тся мудр бы́ти в вас в ве́це сем, буй да быва́ет, я́ко да прему́др бу́дет.

¹⁹ Прему́дрость бо міра сего́ бу́йство у Бо́га есть, пи́сано бо есть: запина́яй прему́дрым в кова́рстве их.

²⁰ И па́ки: Госпо́дь весть помышле́ния челове́ческа, ^[215] я́ко суть су́етна.

²¹ Те́мже никто́же да хва́лится в челове́цех, вся бо ва́ша суть.

²² А́ще Па́вел, или́ Аполло́с, или́ Ки́фа, или́ міръ, или́ живо́т, или́ смерть, или́ настоя́щая, или́ бу́дущая, вся ва́ша суть.

²³ Вы же Христо́вы, Христо́с же Бо́жий.

Глава 4

¹ Та́ко нас да непщу́ет челове́к, я́ко слуги́ Христо́вы и строи́тели та́йнам Бо́жиим.

² А е́же про́чее и́щется в строи́телех, да ве́рен кто обря́щется.

³ Мне же не вели́ко есть, да от вас истяжу́ся, или́ от челове́ческаго дне, ^[216] но ни сам себе́ востязу́ю.

⁴ Ничесо́же бо в себе́ свем, но ни о сем оправда́юся, востязу́яй же мя Госпо́дь есть.

⁵ Те́мже пре́жде вре́мене ничто́же суди́те, до́ндеже прии́дет Госпо́дь, И́же во све́те приведе́т та́йная тмы и объяви́т сове́ты серде́чныя, и тогда́ похвала́ бу́дет кому́ждо от Бо́га.

⁶ Сия́ же, бра́тие моя́, преобрази́х на себе́ и Аполло́са вас ра́ди, да от на́ю научите́ся не па́че напи́санных му́дрствовати, да не еди́н по еди́ному гордите́ся на друга́го.

⁷ Кто бо тя разсужда́ет? Что же и́маши, его́же не́си прия́л? А́ще же и прия́л еси́, что хва́лишися я́ко не прие́м?

⁸ Се сы́ти есте́, се обогати́стеся, без нас ца́рствовасте, и еще́ у́бо да воцарите́ся, да и мы бы́хом с ва́ми ца́рствовали.

⁹ Мню бо, яко Бог ны посла́нники после́дния яви́, я́ко насме́ртники, зане́ позо́р бы́хом міру и А́нгелом и челове́ком.

¹⁰ Мы у́бо бу́и Христа́ ра́ди, вы же му́дри о Христе́, мы не́мощни, вы же кре́пцы, вы сла́вни, мы же безче́стни.

¹¹ До ны́нешняго часа́ и а́лчем, и жа́ждем, и наготу́ем, и стра́ждем, и скита́емся,

¹² И тружда́емся, де́лающе свои́ми рука́ми. Укоря́еми, благословля́ем, гони́ми, терпи́м,

¹³ Ху́лими, утеша́емся, ^[217] я́коже отре́би міру бы́хом, всем попра́ние досе́ле.

¹⁴ Не срамля́я вас сия́ пишу́, но я́коже ча́да моя́ возлю́бленная наказу́ю.

¹⁵ А́ще бо и мно́ги пе́стуны и́мате о Христе́, но не мно́ги отцы́, о Христе́ бо Иису́се благовествова́нием аз вы роди́х.

¹⁶ Молю́ же вас: подо́бни мне быва́йте, я́коже аз Христу́.

¹⁷ Сего́ ра́ди посла́х к вам Тимофе́а, и́же ми есть ча́до возлю́блено и ве́рно о Го́споде, и́же вам воспомя́нет пути́ моя́, я́же о Христе́ Иису́се я́коже везде́ и во вся́кой це́ркви учу́.

¹⁸ Я́ко не гряду́щу ми к вам, разгорде́шася не́цыи.

¹⁹ Прииду́ же ско́ро к вам, а́ще Госпо́дь восхо́щет, и уразуме́ю не сло́во разгорде́вшихся, но си́лу.

²⁰ Не в словеси́ бо Ца́рство Бо́жие, но в си́ле.

²¹ Что хо́щете? С па́лицею ли прииду́ к вам, или́ с любо́вию и ду́хом кро́тости?

Глава 5

¹ Отню́д слы́шится в вас блуже́ние, и таково́ блуже́ние, яково́ же ни во язы́цех имену́ется, я́ко не́коему име́ти жену́ о́тчую.

² И вы разгорде́сте, и не па́че пла́касте, да и́змется от среды́ вас соде́явый де́ло сие́.

³ Аз у́бо я́ко не у вас сый те́лом, ту же живы́й ду́хом, уже́ суди́х, я́ко та́мо сый, соде́явшаго си́це сие́,

⁴ О и́мени Го́спода на́шего Иису́са Христа́ собра́вшимся вам и моему́ ду́ху, с си́лою Го́спода на́шего Иису́са Христа́,

⁵ Преда́ти такова́го сатане́ во изможде́ние пло́ти, да дух спасе́тся в день Го́спода на́шего Иису́са Христа́.

⁶ Не добра́ похвала́ ва́ша. Не ве́сте ли, я́ко мал квас все́ смеше́ние ква́сит?

⁷ Очи́стите у́бо ве́тхий квас, да бу́дете но́во смеше́ние, я́коже есте́ безква́сни, и́бо Па́сха на́ша за ны пожре́н бысть, Христо́с.

⁸ Те́мже да пра́зднуем, не в ква́се ве́тсе ни в ква́се зло́бы и лука́вства, но в безква́сиих чистоты́ и и́стины.

⁹ Писа́х вам в посла́нии не примеша́тися блуднико́м.

¹⁰ И не вся́ко блуднико́м міра сего́, или́ лихои́мцем, или́ хи́щником, или́ идолослужи́телем, поне́же у́бо до́лжни бы есте́ от міра сего́ изы́ти.

¹¹ Ны́не же писа́х вам не примеша́тися, а́ще не́кий брат имену́емь, бу́дет блудни́к, или́ лихои́мец, или́ идолослужи́тель, или́ досади́тель, или́ пия́ница, или́ хи́щник, с таковы́м ниже́ я́сти.

¹² Что бо ми и вне́шних суди́ти? Не вну́тренним ли вы су́дите?

¹³ Вне́шним же Бог су́дит. И изми́те зла́го от вас саме́х.

Глава 6

¹ Сме́ет ли кто от вас, вещь име́я ко ино́му, суди́тися от непра́ведных, а не от святы́х?

² Не ве́сте ли, я́ко святи́и мірови хотя́т суди́ти? И а́ще ва́ми суд прии́мет міръ, недосто́йни есте́ суди́щем худы́м?

³ Не ве́сте ли, я́ко а́нгелов суди́ти хо́щем, а не то́чию жите́йским?

⁴ Жите́йская бо суди́ща а́ще и́мате, уничиже́нных в це́ркви, сих посажда́йте.

⁵ К сра́му вам глаго́лю: та́ко ли несть в вас мудр ни еди́н, и́же мо́жет разсуди́ти между́ бра́тий свои́х?

⁶ Но брат с бра́том су́дится, и то пред неве́рными.

⁷ Уже́ у́бо отню́д вам срам есть, я́ко тяжбы́ и́мате между́ собо́ю. Почто́ не па́че оби́дими есте́? Почто́ не па́че лише́ни быва́ете?

⁸ Но вы са́ми оби́дите и лиша́ете, да еще́ бра́тию.

⁹ Или́ не ве́сте, я́ко непра́ведницы Ца́рствия Бо́жия не насле́дят? Не льсти́те себе́, ни блудницы́, ни идолослужи́тели, ни прелюбоде́и, ни скверни́тели, ни малаки́и, ни мужело́жницы,

¹⁰ Ни лихои́мцы, ни та́тие, ни пия́ницы, ни досади́тели, ни хи́щницы Ца́рствия Бо́жия не насле́дят.

¹¹ И си́ми у́бо не́цыи бе́сте, но омы́стеся, но освяти́стеся, но оправди́стеся и́менем Го́спода на́шего Иису́са Христа́ и Ду́хом Бо́га на́шего.

¹² Вся ми леть суть, но не вся на по́льзу: вся ми леть суть, но не аз облада́н бу́ду от кого́.

¹³ Бра́шна чре́ву, и чре́во бра́шном, Бог же и сие́ и сия́ да упраздни́т. Те́ло же не блуже́нию, но Го́сподеви, и Госпо́дь те́лу.

¹⁴ Бог же и Го́спода воздви́же, и нас воздви́гнет си́лою Свое́ю.

¹⁵ Не ве́сте ли, я́ко телеса́ ва́ша у́дове Христо́вы суть? Взем ли у́бо у́ды Христо́вы, сотворю́ у́ды блудни́чи? Да не бу́дет.

¹⁶ Или́ не ве́сте, я́ко прилепля́яйся скверноде́йце, еди́но те́ло есть [с блудоде́йцею]? Бу́дета бо, рече́, о́ба в плоть еди́ну.

¹⁷ Прилепля́яйся же Го́сподеви, еди́н дух есть с Го́сподем.

¹⁸ Бе́гайте блудодея́ния: всяк бо грех, его́же а́ще сотвори́т челове́к, кроме́ те́ла есть, а блудя́й, во свое́ те́ло согреша́ет.

¹⁹ Или́ не ве́сте, я́ко телеса́ ва́ша храм живу́щаго в вас Свята́го Ду́ха суть, Его́же и́мате от Бо́га, и не́сте свои́?

²⁰ Ку́плени бо есте́ цено́ю. Просла́вите у́бо Бо́га в телесе́х ва́ших и в душа́х ва́ших, я́же суть Бо́жия.

Глава 7

¹ А о ни́хже писа́сте ми, добро́ челове́ку жене́ не прикаса́тися.

² Но блудодея́ния ра́ди ки́йждо свою́ жену́ да и́мать, и ка́яждо жена́ своего́ му́жа да и́мать.

³ Жене́ муж до́лжную любо́вь да воздае́т, та́кожде и жена́ му́жу.

⁴ Жена́ свои́м те́лом не владе́ет, но муж, та́кожде и муж свои́м те́лом не владе́ет, но жена́.

⁵ Не лиша́йте себе́ друг дру́га, то́чию по согла́сию ко вре́мени, да пребыва́ете в посте́ и моли́тве, и па́ки вку́пе собира́йтеся, да не искуша́ет вас сатана́ невоздержа́нием ва́шим.

⁶ Сие́ же глаго́лю по сове́ту, а не по повеле́нию.

⁷ Хощу́ бо, да вси челове́цы бу́дут, я́коже и аз, но ко́ждо свое́ дарова́ние и́мать от Бо́га, ов у́бо си́це, ов же си́це.

⁸ Глаго́лю же безбра́чным и вдови́цам: добро́ им есть, а́ще пребу́дут я́коже и аз.

⁹ А́ще ли не удержа́тся, да посяга́ют: лу́чше бо есть жени́тися, не́жели разжиза́тися.

¹⁰ А ожени́вшимся завещава́ю не аз, но Госпо́дь: жене́ от му́жа не разлуча́тися.

¹¹ А́ще ли же и разлучи́тся, да пребыва́ет безбра́чна, или́ да смири́тся с му́жем свои́м, и му́жу жены́ не отпуща́ти.

¹² Про́чим же аз глаго́лю, а не Госпо́дь: а́ще кото́рый брат жену́ и́мать неве́рну, и та благоволи́т жи́ти с ним, да не оставля́ет ея́.

¹³ И жена́ а́ще и́мать му́жа неве́рна, и той благоволи́т жи́ти с не́ю, да не оставля́ет его́.

¹⁴ Святи́тся бо муж неве́рен о жене́ ве́рне, и святи́тся жена́ неве́рна о му́жи ве́рне, ина́че бо ча́да ва́ша нечи́ста бы́ли бы, ны́не же свя́та суть.

¹⁵ А́ще ли неве́рный отлуча́ется, да разлучи́тся, не порабо́тися бо брат или́ сестра́ в таковы́х, в мир бо призва́ нас Госпо́дь Бог.

¹⁶ Что бо ве́си, же́но, а́ще му́жа спасе́ши? Или́ что ве́си, му́жу, а́ще жену́ спасе́ши?

¹⁷ То́чию коему́ждо я́коже раздели́л есть Бог, ки́йждо я́коже при́зван бысть Го́сподем, та́ко да хо́дит, и та́ко во всех це́рквах повелева́ю.

¹⁸ Во обре́зании ли кто при́зван бысть? Да не отто́ргнется, ^[218] в необре́зании ли кто при́зван бысть? Да не обре́зуется.

¹⁹ Обре́зание ничто́же есть, и необре́зание ничто́же есть, но соблюде́ние за́поведей Бо́жиих.

²⁰ Ки́йждо в зва́нии, в не́мже при́зван бысть, в том да пребыва́ет.

²¹ Раб ли при́зван был еси́? Да не неради́ши, ^[219] но а́ще и мо́жеши свобо́ден бы́ти, бо́льши порабо́ти себе́.

²² При́званный бо о Го́споде раб, свобо́дник Госпо́день есть, та́кожде и при́званный свобо́дник, раб есть Христо́в.

²³ Цено́ю ку́плени есте́, не бу́дите раби́ челове́ком.

²⁴ Ки́йждо, в не́мже при́зван бысть, бра́тие, в том да пребыва́ет пред Бо́гом.

²⁵ О де́вах же повеле́ния Госпо́дня не и́мам, сове́т же даю́, я́ко поми́лован от Го́спода ве́рен бы́ти.

²⁶ Мню у́бо сие́ добро́ бы́ти за настоя́щую ну́жду, я́ко добро́ челове́ку та́ко бы́ти.

²⁷ Привяза́л ли ся еси́ жене́? Не ищи́ разреше́ния. Отреши́л ли ся еси́ жены́? Не ищи́ жены́.

²⁸ А́ще ли же и оже́нишися, не согреши́л еси́, и а́ще пося́гнет де́ва, не согреши́ла есть. Скорбь же пло́ти име́ти бу́дут такови́и, аз же вы щажду́.

²⁹ Сие́ же глаго́лю, бра́тие, я́ко вре́мя прекраще́но есть про́чее, да и иму́щии жены́, я́коже не иму́щии бу́дут.

³⁰ И пла́чущиися, я́коже не пла́чущии, и ра́дующиися, я́коже не ра́дующеся, и купу́ющии, я́ко не содержа́ще.

³¹ И тре́бующии міра сего́, я́ко не тре́бующе: прехо́дит бо о́браз міра сего́.

³² Хощу́ же вас безпеча́льны бы́ти. Не ожени́выйся пече́тся о Госпо́дних, ка́ко угоди́ти Го́сподеви,

³³ А ожени́выйся пече́тся о мірски́х, ка́ко угоди́ти жене́. Раздели́ся жена́ и де́ва.

³⁴ Непося́гшая пече́тся о Госпо́дних, да есть свя́та и те́лом, и ду́хом, а пося́гшая пече́тся о мірски́х, ка́ко угоди́ти му́жу.

³⁵ Сие́ же на по́льзу вам саме́м глаго́лю, не да сило́ вам наложу́, но к благообра́зию и благоприступа́нию Го́сподеви безмо́лвну.

³⁶ А́ще ли же кто безобрази́ти о де́ве свое́й непщу́ет, а́ще есть превозра́стна, и та́ко должна́ есть бы́ти, е́же хо́щет, да твори́т, не согреша́ет, а́ще пося́гнет.

³⁷ А и́же стои́т тве́рдо се́рдцем, не имы́й ну́жды, власть же и́мать о свое́й во́ли, и се разсуди́л есть в се́рдце свое́м блюсти́ де́ву свою́, до́бре твори́т.

³⁸ Те́мже и вдая́й бра́ку свою́ де́ву до́бре твори́т, и не вдая́й лу́чше твори́т.

³⁹ Жена́ привя́зана есть зако́ном, в ели́ко вре́мя живе́т муж ея́. А́ще же у́мрет муж ея́, свобо́дна есть, за него́же хо́щет, пося́гнути, то́чию о Го́споде.

⁴⁰ Блаже́ннейша же есть, а́ще та́ко пребу́дет, по моему́ сове́ту, мню бо ся и аз Ду́ха Бо́жия име́ти.

Глава 8

¹ О идоложе́ртвенных же ве́мы, я́ко вси ра́зум и́мамы. Ра́зум у́бо кичи́т, а любы́ созида́ет.

² А́ще ли кто мни́тся ве́дети что, не у́ что разуме́, я́коже подоба́ет разуме́ти.

³ А́ще же кто лю́бит Бо́га, сей позна́н бысть от Него́.

⁴ О яде́нии же идоложе́ртвенных ве́мы, я́ко и́дол ничто́же есть в міре, и я́ко никто́же Бог ин, то́кмо Еди́н.

⁵ А́ще бо и суть глаго́лемии бо́зи, или́ на небеси́, или́ на земли́, [я́коже суть бо́зи мно́зи и госпо́дие мно́зи,]

⁶ Но нам еди́н Бог Оте́ц, из Него́же вся, и мы у Него́, и еди́н Госпо́дь Иису́с Христо́с, И́мже вся, и мы Тем.

⁷ Но не во всех ра́зум, не́цыи же со́вестию и́дольскою да́же досе́ле я́коже идоложе́ртвенное ядя́т, и со́весть их, немощна́ су́щи, скверни́тся.

⁸ Бра́шно же нас не поста́вит пред Бо́гом: ниже́ бо а́ще я́мы, избы́точествуем, ниже́ а́ще не я́мы, лиша́емся.

⁹ Блюди́те же, да не ка́ко власть ва́ша сия́ преткнове́ние бу́дет немощны́м.

¹⁰ А́ще бо кто ви́дит тя, иму́ща ра́зум, в тре́бищи возлежа́ща, не со́весть ли его́ немощна́ су́щи сози́ждется идоложе́ртвенная я́сти?

¹¹ И поги́бнет немощны́й брат в твое́м ра́зуме, его́же ра́ди Христо́с у́мре.

¹² Та́коже согреша́юще в бра́тию, и бию́ще их со́весть не́мощну су́щу, во Христа́ согреша́ете.

¹³ Те́мже а́ще бра́шно соблазня́ет бра́та моего́, не и́мам я́сти мя́са во ве́ки, да не соблазню́ бра́та моего́.

Глава 9

¹ Несмь ли апо́стол? Несмь ли свобо́дь? Не Иису́са Христа́ ли Го́спода на́шего ви́дех? Не де́ло ли мое́ вы есте́ о Го́споде?

² А́ще у́бо ины́м несмь апо́стол, но у́бо вам есмь. Печа́ть бо моего́ апо́стольства вы есте́ о Го́споде.

³ Мой отве́т востязу́ющим мене́ сей есть.

⁴ Еда́ не и́мамы вла́сти я́сти и пи́ти?

⁵ Еда́ не и́мамы вла́сти сестру́ жену́ води́ти, я́ко и про́чии Апо́столи, и бра́тия Госпо́дня, и Ки́фа?

⁶ Или́ еди́н аз и Варна́ва не и́мамы вла́сти е́же не де́лати?

⁷ Кто во́инствует свои́ми обро́ки когда́? Или́ кто насажда́ет виногра́д, и от плода́ его́ не яст? Или́ кто пасе́т ста́до, и от млека́ ста́да не яст?

⁸ Еда́ по челове́ку сия́ глаго́лю? Не и зако́н ли сия́ глаго́лет?

⁹ В Моисе́ове бо зако́не пи́шет: да не загради́ши устну́ вола́ молотя́ща. Еда́ о воло́вех ради́т Бог?

¹⁰ Или́ нас ра́ди вся́ко глаго́лет? Нас бо ра́ди вписа́ся, я́ко о наде́жди до́лжен есть оря́й ора́ти, и молотя́й с наде́ждею своего́ упова́ния причаща́тися.

¹¹ А́ще мы духо́вная се́яхом вам, вели́ко ли, а́ще мы ва́ша теле́сная по́жнем?

¹² А́ще ини́и вла́сти ва́шея причаща́ются, не па́че ли мы? Но не сотвори́хом по о́бласти сей, но вся терпи́м, да не прекраще́ние ко́е да́мы благовествова́нию Христо́ву.

¹³ Не ве́сте ли, я́ко де́лающии свяще́нная от святи́лища ядя́т, и служа́щии олтарю́ со олтаре́м сделя́ются?

¹⁴ Та́ко и Госпо́дь повеле́ пропове́дающим Благове́стие от благове́стия жи́ти.

¹⁵ Аз же ни еди́но сотвори́х от сих. Не писа́х же сия́, да та́ко бу́дет о мне: до́брее бо мне па́че умре́ти, не́жели похвалу́ мою́ кто да испраздни́т.

¹⁶ А́ще бо благовеству́ю, несть ми похвалы́, ну́жда бо ми належи́т. Го́ре же мне есть, а́ще не благовеству́ю.

¹⁷ А́ще у́бо во́лею сие́ творю́, мзду и́мам: а́ще ли нево́лею, строе́ние ми есть предано́.

¹⁸ Кая у́бо ми есть мзда? Да благовеству́яй без мзды положу́ Благове́стие Христо́во, во е́же не твори́ти ми по о́бласти мое́й в благовествова́нии.

¹⁹ Свобо́ден бо сый от всех, всем себе́ порабо́тих, да множа́йшия приобря́щу.

²⁰ Бых иуде́ем я́ко иуде́й, да иуде́и приобря́щу, подзако́нным я́ко подзако́нен, да подзако́нныя приобря́щу.

²¹ Беззако́нным я́ко беззако́нен, [не сый беззако́нник Бо́гу, но зако́нник Христу́,] да приобря́щу беззако́нныя.

²² Бых немощны́м я́ко не́мощен, да немощны́я приобря́щу. Всем бых вся, да вся́ко не́кия спасу́.

²³ Сие́ же творю́ за Благове́стие, да соо́бщник ему́ бу́ду.

²⁴ Не ве́сте ли, я́ко теку́щии в позо́рищи вси у́бо теку́т, еди́н же прие́млет по́честь? Та́ко тецы́те, да пости́гнете.

²⁵ Всяк же подвиза́яйся от всех воздержи́тся, и они́ у́бо да истле́нен вене́ц прии́мут, мы же неистле́нен.

²⁶ Аз у́бо та́ко теку́, не я́ко безве́стно, та́ко подвиза́юся, не я́ко возду́х бия́й,

²⁷ Но умерщвля́ю те́ло мое́ и порабоща́ю, да не ка́ко ины́м пропове́дуя, сам неключи́мь бу́ду.

Глава 10

¹ Не хощу́ же вас не ве́дети, бра́тие, я́ко отцы́ на́ши вси под о́блаком бы́ша и вси сквозе́ мо́ре проидо́ша.

² И вси в Моисе́я крести́шася во о́блаце и в мо́ри.

³ И вси то́жде бра́шно духо́вное ядо́ша.

⁴ И вси то́жде пи́во духо́вное пи́ша, пия́ху бо от духо́внаго после́дующаго ка́мене, ка́мень же бе Христо́с.

⁵ Но не во множа́йших их благоволи́ Бог, пораже́ни бо бы́ша в пусты́ни.

⁶ Сия́ же о́брази нам бы́ша, я́ко не бы́ти нам похотнико́м злых, я́коже и они́ похоте́ша.

⁷ Ни идолослужи́тели быва́йте, я́коже не́цыи от них, я́коже есть пи́сано: седо́ша лю́дие я́сти и пи́ти, и воста́ша игра́ти.

⁸ Ниже́ соблу́дим, я́коже не́цыи от них соблуди́ша, и падо́ша во еди́н день два́десять три ты́сящи.

⁹ Ни да искуша́им Христа́, я́коже не́цыи от них искуси́ша и от змий погибо́ша.

¹⁰ Ни ропщи́те, я́коже не́цыи от них ропта́ша и погибо́ша от всегуби́теля.

¹¹ Сия́ же вся о́брази прилуча́хуся о́нем: пи́сана же бы́ша в науче́ние на́ше, в ни́хже концы́ век достиго́ша.

¹² Те́мже мня́йся стоя́ти да блюде́тся, да не паде́т.

¹³ Искуше́ние вас не дости́же, то́чию челове́ческое, ве́рен же Бог, И́же не оста́вит вас искуси́тися па́че, е́же мо́жете, но сотвори́т со искуше́нием и избы́тие, я́ко возмощи́ вам понести́.

¹⁴ Те́мже, бра́тие моя́ возлю́бленная, бе́гайте от идолослуже́ния.

¹⁵ Я́ко му́дрым глаго́лю: суди́те вы, е́же глаго́лю.

¹⁶ Ча́ша благослове́ния, ю́же благословля́ем, не обще́ние ли Кро́ве Христо́вы есть? Хлеб, его́же ло́мим, не обще́ние ли Те́ла Христо́ва есть?

¹⁷ Я́ко еди́н хлеб, еди́но те́ло есмы́ мно́зи: вси бо от еди́наго хле́ба причаща́емся.

¹⁸ Ви́дите Изра́иля по пло́ти, не яду́щии ли же́ртвы о́бщницы олтаре́ви суть?

¹⁹ Что у́бо глаго́лю? Я́ко и́дол что есть? Или́ идоложе́ртвенное что есть?

²⁰ Но зане́, я́же жрут язы́цы, бесо́м жрут, а не Бо́гови, не хощу́ же вас о́бщников бы́ти бесо́м.

²¹ Не мо́жете ча́шу Госпо́дню пи́ти и ча́шу бесо́вскую, не мо́жете трапе́зе Госпо́дней причаща́тися и трапе́зе бесо́встей.

²² Или́ раздража́ем Го́спода? Еда́ крепча́йши Его́ есмы́?

²³ Вся ми леть суть, но не вся на по́льзу; вся ми леть суть, но не вся назида́ют.

²⁴ Никто́же своего́ си да и́щет, но е́же бли́жняго ко́йждо.

²⁵ Все е́же на то́ржищи продае́мое, яди́те, ничто́же сумня́щеся за со́весть.

²⁶ Госпо́дня бо земля́ и исполне́ние ея́.

²⁷ А́ще ли кто от неве́рных призыва́ет вы, и хо́щете ити́, все предлага́емое вам яди́те, ничто́же сумня́щеся, за со́весть.

²⁸ А́ще ли же кто вам рече́т: сие́ идоложе́ртвенно есть, не яди́те за о́ного пове́давшаго и со́весть. Госпо́дня бо земля́ и исполне́ние ея́.

²⁹ Со́весть же глаго́лю не свою́, но друга́го, вску́ю бо свобо́да моя́ су́дится от ины́я со́вести?

³⁰ А́ще аз благода́тию причаща́юся, почто́ хулу́ прие́млю, о не́мже аз благодарю́?

³¹ А́ще у́бо я́сте, а́ще ли пиете́, а́ще ли и́но что творите́, вся в сла́ву Бо́жию твори́те.

³² Безпреткнове́ни быва́йте иуде́ем и е́ллином, и це́ркви Бо́жией.

³³ Я́коже и аз во всем всем угожда́ю, не иски́й своея́ по́льзы, но мно́гих, да спасу́тся.

Глава 11

¹ Подража́тели мне быва́йте, я́коже и аз Христу́.

² Хвалю́ же вы, бра́тие, я́ко вся моя́ по́мните, и я́коже преда́х вам, преда́ния держите́.

³ Хощу́ же вас ве́дети, я́ко вся́кому му́жу глава́ Христо́с есть, глава́ же жене́ муж, глава́ же Христу́ Бог.

⁴ Всяк муж, моли́тву де́яй или́ проро́чествуяй покры́тою главо́ю, срамля́ет главу́ свою́.

⁵ И вся́ка жена́, моли́тву де́ющая или́ проро́чествующая открове́нною главо́ю, срамля́ет главу́ свою́: еди́но бо есть и то́жде ^[220] остри́женней.

⁶ А́ще у́бо не покрыва́ется жена́, да стриже́тся, а́ще ли же срам жене́ стри́щися или́ бри́тися, да покрыва́ется.

⁷ Муж бо не до́лжен есть покрыва́ти главу́, о́браз и сла́ва Бо́жия сый, жена́ же сла́ва му́жу есть.

⁸ Несть бо муж от жены́, но жена́ от му́жа,

⁹ И́бо не со́здан бысть муж жены́ ра́ди, но жена́ му́жа ра́ди.

¹⁰ Сего́ ра́ди должна́ есть жена́ власть име́ти на главе́ А́нгел ра́ди.

¹¹ Оба́че ни муж без жены́, ни жена́ без му́жа, о Го́споде.

¹² Я́коже бо жена́ от му́жа, си́це и муж жено́ю, вся же от Бо́га.

¹³ В вас саме́х суди́те, ле́по ли есть жене́ открове́нне Бо́гу моли́тися?

¹⁴ Или́ и не са́мое естество́ учи́т вы, я́ко муж у́бо а́ще власы́ расти́т, безче́стие ему́ есть.

¹⁵ Жена́ же а́ще власы́ расти́т, сла́ва ей есть? Зане́ расте́ние власо́в вме́сто одея́ния дано́ бысть ей.

¹⁶ А́ще ли кто мни́тся спо́рлив бы́ти, мы такова́го обы́чая не и́мамы, ниже́ це́ркви Бо́жия.

¹⁷ Сие́ же завещава́я не хвалю́, я́ко не на лу́чшее, но на ху́дшее сбира́етеся.

¹⁸ Пе́рвое у́бо, сходя́щимся вам в це́рковь, слы́шу в вас ра́спри су́щя, и часть не́кую сих ве́рую.

¹⁹ Подоба́ет бо и ересе́м в вас бы́ти, да иску́снии явле́ни быва́ют в вас.

²⁰ Сходя́щимся у́бо вам вку́пе, несть Госпо́дскую ве́черю я́сти,

²¹ Ко́ждо бо свою́ ве́черю предваря́ет в снеде́ние, и ов у́бо а́лчет, ов же упива́ется.

²² Еда́ бо домо́в не и́мате, во е́же я́сти и пи́ти? Или́ о це́ркви Бо́жией нерадите́ и срамля́ете не иму́щия? Что вам реку́? Похвалю́ ли вы о сем? Не похвалю́.

²³ Аз бо прия́х от Го́спода, е́же и преда́х вам, я́ко Госпо́дь Иису́с в нощь, в ню́же пре́дан быва́ше, прие́м хлеб,

²⁴ И благодари́в преломи́, и рече́: приими́те, яди́те, сие́ есть Те́ло Мое́, е́же за вы ломи́мое; сие́ твори́те в Мое́ воспомина́ние.

²⁵ Та́кожде и ча́шу по ве́чери, глаго́ля: сия́ ча́ша Но́вый Заве́т есть в Мое́й Кро́ви; сие́ твори́те, ели́жды а́ще пие́те, в Мое́ воспомина́ние.

²⁶ Ели́жды бо а́ще я́сте хлеб сей и ча́шу сию́ пие́те, смерть Госпо́дню возвеща́ете, до́ндеже у́бо прии́дет.

²⁷ Те́мже и́же а́ще яст хлеб сей или́ пие́т ча́шу Госпо́дню недосто́йне, пови́нен бу́дет Те́лу и Кро́ви Госпо́дни.

²⁸ Да искуша́ет же челове́к себе́, и та́ко от хле́ба да яст и от ча́ши да пие́т.

²⁹ Яды́й бо и пия́й недосто́йне, суд себе́ яст и пие́т, не разсужда́я те́ла Госпо́дня.

³⁰ Сего́ ра́ди в вас мно́зи не́мощни и неду́жливи, и спят ^[221] дово́льни.

³¹ А́ще бо бы́хом себе́ разсужда́ли, не бы́хом осужде́ни бы́ли.

³² Суди́ми же, от Го́спода наказу́емся, да не с міром осу́димся.

³³ Те́мже, бра́тие моя́, сходя́щеся я́сти, друг дру́га жди́те.

³⁴ А́ще ли кто а́лчет, в дому́ да яст, да не в грех схо́дитеся. О про́чих же, егда́ прииду́, устро́ю.

Глава 12

¹ О духо́вных же, бра́тие, не хощу́ вас не ве́дети.

² Ве́сте, я́ко егда́ неве́рни бе́сте, ко и́долом безгла́сным я́ко ведо́ми ведо́стеся.

³ Те́мже сказу́ю вам, я́ко никто́же, Ду́хом Бо́жиим глаго́ляй, рече́т ана́фема Иису́са, и никто́же мо́жет рещи́ Го́спода Иису́са, то́чию Ду́хом Святы́м.

⁴ Разделе́ния же дарова́ний суть, а то́йжде Дух,

⁵ И разделе́ния служе́ний суть, а то́йжде Госпо́дь,

⁶ И разделе́ния действ суть, а то́йжде есть Бог, де́йствуяй вся во всех.

⁷ Кому́ждо же дае́тся явле́ние Ду́ха на по́льзу.

⁸ О́вому бо Ду́хом дае́тся сло́во прему́дрости, ино́му же сло́во ра́зума, о то́мже Ду́се,

⁹ Друго́му же ве́ра, те́мже Ду́хом, ино́му же дарова́ния исцеле́ний, о то́мже Ду́се.

¹⁰ Друго́му же де́йствия сил, ино́му же проро́чество, друго́му же разсужде́ния духово́м, ино́му же ро́ди язы́ков, друго́му же сказа́ния язы́ков.

¹¹ Вся же сия́ де́йствует еди́н и то́йжде Дух, разделя́я вла́стию коему́ждо я́коже хо́щет.

¹² Я́коже бо те́ло еди́но есть и у́ды и́мать мно́ги, вси же у́ды еди́наго те́ла, мно́зи су́ще, еди́но суть те́ло, та́ко и Христо́с.

¹³ И́бо еди́нем Ду́хом мы вси во еди́но те́ло крести́хомся, а́ще иуде́и, а́ще е́ллини, или́ раби́, или́ свобо́дни, и вси еди́нем Ду́хом напои́хомся.

¹⁴ И́бо те́ло несть еди́н уд, но мно́зи.

¹⁵ А́ще рече́т нога́, я́ко несмь рука́, несмь от те́ла,еда́ сего́ ра́ди несть от те́ла?

¹⁶ И а́ще рече́т у́хо, я́ко несмь о́ко, несмь от те́ла, еда́ сего́ ра́ди несть от те́ла?

¹⁷ А́ще все те́ло о́ко, где слух? А́ще же все слух, где уха́ние?

¹⁸ Ны́не же положи́ Бог у́ды, еди́наго коего́ждо их в телеси́, я́коже изво́ли.

¹⁹ А́ще ли бы́ша вси еди́н уд, где те́ло?

²⁰ Ны́не же мно́зи у́бо у́дове, еди́но же те́ло.

²¹ Не мо́жет же о́ко рещи́ руце́: не тре́бе ми еси́, или́ па́ки глава́ нога́ма: не тре́бе ми есте́.

²² Но мно́го па́че, мня́щиися у́ди те́ла немощне́йши бы́ти, ну́жнейши суть,

²³ И и́хже мним безче́стнейших бы́ти те́ла, сим честь мно́жайшую прилага́ем.

²⁴ И неблагообра́знии на́ши благообра́зие мно́жайше и́мут, а благообра́знии на́ши не тре́бе и́мут. Но Бог раствори́ те́ло, худе́йшему бо́льшу дав честь,

²⁵ Да не бу́дет ра́спри в телеси́, но да то́жде в себе́ ^[222] пеку́тся у́ди.

²⁶ И а́ще стра́ждет еди́н уд, с ним стра́ждут вси у́ди, а́ще ли же сла́вится еди́н уд, с ним ра́дуются вси у́ди.

²⁷ Вы же есте́ те́ло Христо́во и у́ди от ча́сти.

²⁸ И о́вы у́бо положи́ Бог в Це́ркви, пе́рвее апо́столы, второ́е проро́ки, тре́тие учи́тели, пото́м же си́лы, та́же дарова́ния исцеле́ний, заступле́ния, правле́ния, ро́ди язы́ков.

²⁹ Еда́ вси апо́столи? Еда́ вси проро́цы? Еда́ вси учи́тели? Еда́ вси си́лы?

³⁰ Еда́ вси дарова́ния и́мут исцеле́ний? Еда́ вси язы́ки глаго́лют? Еда́ вси сказу́ют?

³¹ Ревну́йте же дарова́ний бо́льших, и еще́ по превосхожде́нию путь вам показу́ю.

Глава 13

¹ А́ще язы́ки челове́ческими глаго́лю и а́нгельскими, любве́ же не и́мам, бых [я́ко] медь звеня́щи, или́ кимва́л звяца́яй.

² И а́ще и́мам проро́чество и вем та́йны вся, и весь ра́зум, и а́ще и́мам всю ве́ру, я́ко и го́ры преставля́ти, любве́ же не и́мам, ничто́же есмь.

³ И а́ще разда́м вся име́ния моя́, и а́ще преда́м те́ло мое́, во е́же сжещи́ е́, любве́ же не и́мам, ника́я по́льза ми есть.

⁴ Любы́ долготерпи́т, милосе́рдствует, любы́ не зави́дит, любы́ не превозно́сится, не горди́тся,

⁵ Ни безчи́нствует, не и́щет своя́ си, не раздража́ется, не мы́слит зла,

⁶ Не ра́дуется о непра́вде, ра́дуется же о и́стине;

⁷ Вся лю́бит, ^[223] всему́ ве́ру е́млет, вся упова́ет, вся терпи́т.

⁸ Любы́ николи́же отпа́дает, а́ще же проро́чествия упраздня́тся, а́ще ли язы́цы умо́лкнут, а́ще ра́зум испраздни́тся.

⁹ Отча́сти бо разумева́ем и отча́сти проро́чествуем.

¹⁰ Егда́ же прии́дет соверше́нное, тогда́ е́же от ча́сти упраздни́тся.

¹¹ Егда́ бех младе́нец, я́ко младе́нец глаго́лах, я́ко младе́нец му́дрствовах, я́ко младе́нец смышля́х, егда́ же бых муж, отверго́х младе́нческая.

¹² Ви́дим у́бо ны́не я́коже зерца́лом в гада́нии, тогда́ же лице́м к лицу́, ны́не разуме́ю от ча́сти, тогда́ же позна́ю, я́коже и позна́н бых.

¹³ Ны́не же пребыва́ют ве́ра, наде́жда, любы́, три сия́, бо́льши же сих любы́.

Глава 14

¹ Держи́теся любве́, ревну́йте же духо́вным, па́че же да проро́чествуете.

² Глаго́ляй бо язы́ки, не челове́ком глаго́лет, но Бо́гу, никто́же бо слы́шит, ду́хом же глаго́лет та́йны.

³ Проро́чествуяй же, челове́ком глаго́лет созида́ние и утеше́ние, и утвержде́ние.

⁴ Глаго́ляй бо язы́ки себе́ зи́ждет, а проро́чествуяй це́рковь зи́ждет.

⁵ Хощу́ же всех вас глаго́лати язы́ки, па́че же да прорица́ете, бо́лий бо проро́чествуяй, не́жели глаго́ляй язы́ки, ра́зве а́ще кто сказу́ет, да це́рковь созида́ние прие́млет.

⁶ Ны́не же, бра́тие, а́ще прииду́ к вам язы́ки глаго́ля, ку́ю вам по́льзу сотворю́, а́ще вам не глаго́лю или́ во открове́нии, или́ в ра́зуме, или́ в проро́чествии, или́ в науче́нии?

⁷ Оба́че безду́шная глас даю́щая, а́ще сопе́ль, а́ще гу́сли, а́ще ра́знствия писка́нием не дадя́т, ка́ко разу́мно бу́дет писка́ние или́ гуде́ние?

⁸ И́бо а́ще безве́стен глас труба́ даст, кто угото́вится на брань?

⁹ Та́ко и вы а́ще не благоразу́мно сло́во дадите́ язы́ком, ка́ко уразуме́ется глаго́лемое? Бу́дете бо на возду́х глаго́люще.

¹⁰ Толи́ки у́бо, а́ще ключи́тся, роди́ гласо́в суть в міре, и ни еди́н их безгла́сен.

¹¹ А́ще у́бо не уве́м си́лы гла́са, бу́ду глаго́лющему иноязы́чник, и глаго́лющий мне иноязы́чник.

¹² Та́ко и вы, поне́же ревни́теле есте́ духово́м, я́же к созида́нию це́ркве проси́те, ^[224] да избы́точествуете.

¹³ Те́мже глаго́ляй язы́ком да мо́лится, да сказу́ет.

¹⁴ А́ще бо молю́ся язы́ком, дух мой мо́лится, а ум мой без плода́ есть.

¹⁵ Что у́бо есть? Помолю́ся ду́хом, помолю́ся же и умо́м, воспою́ ду́хом, воспою́ же и умо́м.

¹⁶ Поне́же а́ще благослови́ши ду́хом, исполня́яй ме́сто неве́жды ка́ко рече́т ами́нь, по твоему́ благодаре́нию? Поне́же не весть, что глаго́леши.

¹⁷ Ты у́бо до́бре благодари́ши, но други́й не созида́ется.

¹⁸ Благодарю́ Бо́га моего́, па́че всех вас язы́ки глаго́ля,

¹⁹ Но в це́ркви хощу́ пять слове́с умо́м мои́м глаго́лати, да и и́ны по́льзую, не́жели тмы слове́с язы́ком.

²⁰ Бра́тие, не де́ти быва́йте умы́, но зло́бою младе́нствуйте, умы́ же соверше́ни быва́йте.

²¹ В зако́не пи́шет: я́ко ины́ми язы́ки и устны́ ины́ми возглаго́лю лю́дем сим, и ни та́ко послу́шают Мене́, глаго́лет Госпо́дь.

²² Те́мже язы́цы в зна́мение суть не ве́рующим, но неве́рным, а проро́чество не неве́рным, но ве́рующим.

²³ А́ще у́бо сни́дется це́рковь вся вку́пе, и вси язы́ки глаго́лют, вни́дут же и неразу́мивии или́ неве́рнии, не реку́т ли, я́ко бесну́етеся?

²⁴ А́ще же вси проро́чествуют, вни́дет же не́кий неве́рен или́ неве́жда, облича́ется все́ми, и истязу́ется от всех.

²⁵ И си́це та́йная се́рдца его́ явле́на быва́ют, и та́ко пад ниц покло́нится Бо́гови, возвеща́я, я́ко вои́стинну Бог с ва́ми есть.

²⁶ Что́ у́бо есть, бра́тие? Егда́ схо́дитеся, ко́ждо вас псало́м и́мать, уче́ние и́мать, язы́к и́мать открове́ние и́мать, сказа́ние и́мать, вся же к созда́нию да быва́ют.

²⁷ А́ще язы́ком кто глаго́лет, по двема́, или́ мно́жае по трие́м, и по ча́сти, и еди́н да сказу́ет.

²⁸ А́ще ли не бу́дет сказа́тель, да молчи́т в це́ркви, себе́ же да глаго́лет и Бо́гови.

²⁹ Проро́цы же два или́ трие́ да глаго́лют, и друзи́и да разсужда́ют.

³⁰ А́ще ли ино́му откры́ется седя́щу, пе́рвый да молчи́т.

³¹ Мо́жете бо вси по еди́ному проро́чествовати, да вси уча́тся и вси утеша́ются.

³² И ду́си проро́честии проро́ком повину́ются.

³³ Несть бо нестрое́ния Бог, но ми́ра, я́ко во всех це́рквах святы́х.

³⁴ Жены́ ва́ша в це́рквах да молча́т, не повеле́ся бо им глаго́лати, но повинова́тися, я́коже и зако́н глаго́лет.

³⁵ А́ще ли чесому́ научи́тися хотя́т, в дому́ свои́х муже́й да вопроша́ют: сра́мно бо есть жене́ в це́ркви глаго́лати.

³⁶ Или́ от вас сло́во Бо́жие изы́де? Или́ вас еди́ных дости́же?

³⁷ А́ще кто мни́тся проро́к бы́ти или́ духо́вен, да разуме́ет, я́же пишу́ вам, зане́ Госпо́дни суть за́поведи?

³⁸ А́ще ли кто не разуме́ет, да не разумева́ет.

³⁹ Те́мже, бра́тие моя́, ревну́йте е́же проро́чествовати, и е́же глаго́лати язы́ки не возбраня́йте.

⁴⁰ Вся же благообра́зно и по чи́ну да быва́ют.

Глава 15

¹ Сказу́ю же вам, братие, Благовествова́ние, е́же благовести́х вам, е́же и прия́сте, в не́мже и стоите́,

² И́мже и спаса́етеся, ка́цем сло́вом благовести́х вам, а́ще содержите́, ра́зве а́ще не всуе ве́ровасте.

³ Преда́х бо вам испе́рва, е́же и прия́х, я́ко Христо́с у́мре грех на́ших ра́ди, по Писа́нием,

⁴ И я́ко погребе́н бысть, и я́ко воста́ в тре́тий день, по Писа́нием,

⁵ И я́ко яви́ся Ки́фе, та́же единона́десятим.

⁶ Пото́м же яви́ся бо́ле пяти́ сот бра́тиям еди́ною, от ни́хже мно́жайшии пребыва́ют досе́ле, не́цыи же и почи́ша.

⁷ Пото́м же яви́ся Иа́кову, та́же Апо́столом всем.

⁸ Последи́ же всех, я́ко не́коему и́звергу, яви́ся и мне.

⁹ Аз бо есмь мний Апо́столов, и́же несмь досто́ин нарещи́ся Апо́стол, зане́ гони́х це́рковь Бо́жию.

¹⁰ Благода́тию же Бо́жиею есмь, е́же есмь, и благода́ть Его́, я́же во мне, не тща бысть, но па́че всех их потруди́хся, не аз же, но благода́ть Бо́жия, я́же со мно́ю.

¹¹ А́ще у́бо аз, а́ще ли они́, та́ко пропове́дуем, и та́ко ве́ровасте.

¹² А́ще же Христо́с пропове́дуется, я́ко из ме́ртвых воста́, ка́ко глаго́лют не́цыи в вас, я́ко воскресе́ния ме́ртвых несть?

¹³ И а́ще воскресе́ния ме́ртвых несть, то ни Христо́с воста́.

¹⁴ А́ще же Христо́с не воста́, тще у́бо пропове́дание на́ше, тща же и ве́ра ва́ша.

¹⁵ Обрета́емся же и лжесвиде́теле Бо́жии, я́ко послушествова́хом на Бо́га, я́ко воскреси́ Христа́, Его́же не воскреси́,

¹⁶ А́ще у́бо ме́ртвии не востаю́т, а́ще бо ме́ртвии не востаю́т, то ни Христо́с воста́.

¹⁷ А́ще же Христо́с не воста́, су́етна ве́ра ва́ша, еще́ есте́ во гресе́х ва́ших.

¹⁸ У́бо и уме́ршии о Христе́, погибо́ша.

¹⁹ И а́ще в животе́ сем то́чию упова́юще есмы́ во Христа́ то́чию, окая́ннейши всех челове́к есмы́.

²⁰ Ныне же, Христо́с воста́ от ме́ртвых, нача́ток уме́ршим бысть.

²¹ Поне́же бо челове́ком смерть бысть, и челове́ком воскресе́ние ме́ртвых.

²² Я́коже бо о Ада́ме вси умира́ют, та́кожде и о Христе́ вси оживу́т.

²³ Ко́ждо же во свое́м чину́: нача́ток Христо́с, пото́м же Христу́ ве́ровавшии в прише́ствии Его́.

²⁴ Та́же кончи́на, егда́ преда́ст Ца́рство Бо́гу и Отцу́, егда́ испраздни́т вся́ко нача́льство и вся́ку власть и си́лу.

²⁵ Подоба́ет бо Ему́ ца́рствовати, до́ндеже положи́т вся враги́ под нога́ма Свои́ма.

²⁶ После́дний же враг испраздни́тся смерть,

²⁷ Вся бо покори́ под но́зе Его́, внегда́ же рещи́, я́ко вся покоре́на суть Ему́, я́ве я́ко ра́зве Поко́ршаго Ему́ вся.

²⁸ Егда́ же покори́т Ему́ вся́ческая, тогда́ и Сам Сын покори́тся Поко́ршему Ему́ вся́ческая, да бу́дет Бог вся́ческая во всех.

²⁹ Поне́же что сотворя́т крестя́щиися ме́ртвых ра́ди? А́ще отню́д ме́ртвии не востаю́т, что и креща́ются ме́ртвых ра́ди?

³⁰ Почто́ же и мы беды́ прие́млем на всяк час?

³¹ По вся дни умира́ю, та́ко ми ва́ша похвала́, бра́тие, ю́же и́мам о Христе́ Иису́се Го́споде на́шем.

³² А́ще бо по челове́ку со зве́рем боря́хся в Ефе́се ка́я ми по́льза, а́ще ме́ртвии не востаю́т? Да я́мы и пие́м, у́тре бо у́мрем.

³³ Не льсти́теся: тлят обы́чаи бла́ги бесе́ды злы.

³⁴ Истрезви́теся пра́ведно и не согреша́йте, неве́дение бо Бо́жие не́цыи и́мут, к сра́му вам глаго́лю.

³⁵ Но рече́т не́кто: ка́ко воста́нут ме́ртвии? Ко́им же те́лом прии́дут?

³⁶ Безу́мне, ты е́же се́еши, не оживе́т, а́ще не у́мрет.

³⁷ И е́же се́еши, не те́ло бу́дущее се́еши, но голо́ зе́рно, а́ще случи́тся, пшени́цы или́ ино́го от про́чих,

³⁸ Бог же дае́т ему́ те́ло, я́коже восхо́щет, и коему́ждо се́мени свое́ те́ло.

³⁹ Не вся́ка плоть та́же плоть, но и́на у́бо плоть челове́ком, и́на же плоть ското́м, и́на же ры́бам, и́на же пти́цам.

⁴⁰ И телеса́ небе́сная, и телеса́ земна́я, но и́на у́бо небе́сным сла́ва, и и́на земны́м.

⁴¹ И́на сла́ва со́лнцу, и и́на сла́ва луне́, и и́на сла́ва звезда́м: звезда́ бо от звезды́ ра́знствует во сла́ве.

⁴² Та́кожде и воскресе́ние ме́ртвых: се́ется в тле́ние, востае́т в нетле́нии,

⁴³ Се́ется не в честь, востае́т в сла́ве, се́ется в не́мощи, востае́т в си́ле,

⁴⁴ Се́ется те́ло душе́вное, востае́т те́ло духо́вное. Есть те́ло душе́вное, и есть те́ло духо́вное.

⁴⁵ Та́ко и пи́сано есть: бысть пе́рвый челове́к Ада́м в ду́шу жи́ву, после́дний Ада́м в дух животворя́щь.

⁴⁶ Но не пре́жде духо́вное, но душе́вное, пото́м же духо́вное.

⁴⁷ Пе́рвый челове́к от земли́ пе́рстен, вторы́й Челове́к Госпо́дь с небесе́.

⁴⁸ Яко́в пе́рстный, такови́ и пе́рстнии, и яко́в небе́сный, та́цы же и небе́снии.

⁴⁹ И я́коже облеко́хомся во о́браз пе́рстнаго, да облече́мся и во о́браз Небе́снаго.

⁵⁰ Сие́ же глаго́лю, бра́тие, я́ко плоть и кровь Ца́рствия Бо́жия насле́дити не мо́гут, ниже́ тле́ние нетле́ния насле́дствует.

⁵¹ Се та́йну вам глаго́лю: вси бо не у́спнем, вси же измени́мся.

⁵² Вско́ре, во мгнове́нии о́ка, в после́дней трубе́: востру́бит бо, и ме́ртвии воста́нут нетле́нни, и мы измени́мся.

⁵³ Подоба́ет бо тле́нному сему́ облещи́ся в нетле́ние, и ме́ртвенному сему́ облещи́ся в безсме́ртие.

⁵⁴ Егда́ же тле́нное сие́ облече́тся в нетле́ние, и сме́ртное сие́ облече́тся в безсме́ртие, тогда́ бу́дет сло́во напи́санное: поже́рта бысть смерть побе́дою.

⁵⁵ Где ти сме́рте, жа́ло; где ти а́де, побе́да?

⁵⁶ Жа́ло же сме́рти грех, си́ла же греха́ зако́н.

⁵⁷ Бо́гу же благодаре́ние, да́вшему нам побе́ду Го́сподем на́шим Иису́с Христо́м.

⁵⁸ Те́мже, бра́тие моя́ возлю́бленная, тве́рди быва́йте, непосту́пни, избы́точествующе в де́ле Госпо́дни всегда́, ве́дяще, я́ко труд ваш несть тощь пред Го́сподем.

Глава 16

¹ О ми́лостыни же, я́же ко святы́м, я́коже устро́их це́рквам Галати́йским, та́ко и вы сотворя́йте.

² По еди́ней от суббо́т ко́ждо вас да полага́ет у себе́ сохраня́я, е́же а́ще что бла́го поспеши́тся, да не егда́ прииду́, тогда́ собра́ния быва́ют.

³ Егда́ же прииду́, и́хже а́ще иску́сите посла́ньми, сих послю́ отнести́ благода́ть ва́шу во Иерусали́м.

⁴ А́ще же досто́йно бу́дет и мне ити́, со мно́ю по́йдут.

⁵ Прииду́ же к вам, егда́ Македо́нию прейду́: [Македо́нию бо прохожду́.]

⁶ У вас же, а́ще случи́тся мне, пребу́ду, или́ и озиме́ю, да вы мя прово́дите, а́може а́ще поиду́.

⁷ Не хощу́ бо вас ны́не в мимохожде́нии ви́дети, упова́ю же вре́мя не́кое пребы́ти у вас, а́ще Госпо́дь повели́т.

⁸ Пребу́ду же во Ефе́се до Пентико́стии,

⁹ Дверь бо ми отве́рзеся вели́ка и поспе́шна, и сопроти́внии мно́зи.

¹⁰ А́ще же прии́дет Тимофе́й, блюди́те, да без стра́ха бу́дет у вас, де́ло бо Госпо́дне де́лает, я́коже и аз.

¹¹ Да никто́же у́бо его́ уничижи́т, проводи́те же его́ с ми́ром, да прии́дет ко мне, жду бо его́ с бра́тиею.

¹² О Аполло́се же бра́те, мно́го моли́х его́, да прии́дет к вам с бра́тиею, и вся́ко не бе во́ля, да ны́не прии́дет, прии́дет же, егда́ упраздни́тся.

¹³ Бо́дрствуйте, сто́йте в ве́ре, мужа́йтеся, утвержда́йтеся.

¹⁴ Вся вам любо́вию да быва́ют.

¹⁵ Молю́ же вы, бра́тие, ве́сте дом Стефани́нов, я́ко есть нача́ток Аха́ии, и в служе́ние святы́м учини́ша себе́,

¹⁶ Да и вы повину́йтеся таковы́м и вся́кому споспе́шствующу и тружда́ющуся.

¹⁷ Возра́довахся же о прише́ствии Стефани́нове и Фуртуна́тове и Аха́икове, я́ко ва́ше лише́ние си́и испо́лниша.

¹⁸ Поко́иша бо мой дух и ваш. Познава́йте у́бо таковы́я.

¹⁹ Целу́ют вы це́ркви Аси́йския. Целу́ют вы о Го́споде мно́го Аки́ла и Приски́лла с дома́шнею их це́рковию.

²⁰ Целу́ют вы бра́тия вся. Целу́йте друг дру́га лобза́нием святы́м.

²¹ Целова́ние мое́ю руко́ю Па́влею.

²² А́ще кто не лю́бит Го́спода Иису́са Христа́, да бу́дет про́клят, мара́н афа́. ^[225]

²³ Благода́ть Го́спода на́шего Иису́са Христа́ с ва́ми,

²⁴ И любы́ моя́ со все́ми ва́ми о Христе́ Иису́се. Ами́нь.

Второ́е посла́ние к Кори́нфянам

Глава 1

¹ Па́вел, посла́нник Иису́с Христо́в во́лею Бо́жиею, и Тимофе́й брат, це́ркви Бо́жией су́щей в Кори́нфе, со святы́ми все́ми су́щими во всей Аха́ии:

² Благода́ть вам и мир от Бо́га Отца́ на́шего, и Го́спода Иису́са Христа́.

³ Благослове́н Бог и Оте́ц Го́спода на́шего Иису́са Христа́, Оте́ц щедро́т и Бог вся́кия уте́хи,

⁴ Утеша́яй нас о вся́кой ско́рби на́шей, я́ко возмощи́ нам уте́шити су́щия во вся́кой ско́рби, утеше́нием, и́мже утеша́емся са́ми от Бо́га.

⁵ Зане́ я́коже избы́точествуют страда́ния Христо́ва в нас, та́ко Христо́м избы́точествует и утеше́ние на́ше.

⁶ А́ще ли же скорби́м, о ва́шем утеше́нии и спасе́нии, де́йствующемся в терпе́нии те́хже страда́ний, я́же и мы стра́ждем,

⁷ И упова́ние на́ше изве́стно о вас. А́ще ли утеша́емся, о ва́шем утеше́нии и спасе́нии, ве́дяще, зане́ я́коже о́бщницы есте́ страсте́м на́шим, та́кожде и утеше́нию.

⁸ Не бо хо́щем вас, бра́тие, не ве́дети о ско́рби на́шей, бы́вшей нам во Аси́и, я́ко по премно́гу и па́че си́лы отяготи́хомся, я́ко не наде́ятися нам и жи́ти.

⁹ Но са́ми в себе́ осужде́ние сме́рти име́хом, да не наде́ющеся бу́дем на ся, но на Бо́га возставля́ющаго ме́ртвыя,

¹⁰ И́же от толи́кия сме́рти изба́вил ны есть и избавля́ет, На́ньже и упова́хом, я́ко и еще́ изба́вит.

¹¹ Поспеша́ющим и вам по нас моли́твою, да от мног лиц е́же в нас дарова́ние, мно́гими благодари́тся о вас. ^[226]

¹² Похвале́ние бо на́ше сие́ есть, свиде́тельство со́вести на́шея, я́ко в простоте́ и чистоте́ Бо́жией, а не в му́дрости пло́ти, но благода́тию Бо́жиею жи́хом в міре, мно́жае же у вас.

¹³ Не ина́я бо пи́шем вам, но я́же чтете́ и разумева́ете, упова́ю же, я́ко и до конца́ уразуме́ете,

¹⁴ Я́коже и разуме́сте нас от ча́сти, я́ко похвале́ние вам есмы́, я́коже и вы нам, в день Го́спода на́шего Иису́са Христа́.

¹⁵ И сим упова́нием хоте́х к вам приити́ пре́жде, да втору́ю благода́ть и́мате,

¹⁶ И ва́ми проити́ в Македо́нию, и па́ки от Македо́нии приити́ к вам, и ва́ми проводи́тися во Иуде́ю.

¹⁷ Сие́ же хотя́, еда́ что у́бо легкото́ю де́ях? Или́ я́же совещава́ю, по пло́ти совещава́ю, да бу́дет у мене́ е́же ей, ей, и е́же ни́, ни́.

¹⁸ Ве́рен же Бог, я́ко сло́во на́ше, е́же к вам, не бысть ей и ни.

¹⁹ И́бо Бо́жий Сын Иису́с Христо́с, и́же у вас на́ми пропове́данный, мно́ю и Силуа́ном и Тимофе́ем, не бысть ей и ни, но в Нем Само́м ей бысть.

²⁰ Ели́ка бо обетова́ния Бо́жия, в Том ей, и в Том ами́нь, Бо́гу к сла́ве на́ми.

²¹ Известву́яй же нас с ва́ми во Христа́ и пома́завый нас Бог,

²² И́же и запечатле́вый нас, и да́вый обруче́ние Ду́ха в сердца́ на́ша.

²³ Аз же свиде́теля Бо́га призыва́ю на мою́ ду́шу, я́ко щадя́ вас, ктому́ не приидо́х в Кори́нф,

²⁴ Не я́ко облада́ем ве́рою ва́шею, но я́ко споспе́шницы есмы́ ва́шей ра́дости: ве́рою бо стоите́.

Глава 2

¹ Суди́х же в себе́ сие́, не па́ки ско́рбию к вам приити́.

² А́ще бо аз скорбь творю́ вам, то кто есть веселя́яй мя, то́чию прие́мляй скорбь от мене́?

³ И́бо писа́х вам сие́ и́стое, да не прише́д скорбь на скорбь прииму́, о ни́хже подоба́ше ми ра́доватися, наде́яся на вся вы, я́ко моя́ ра́дость всех вас есть.

⁴ От печа́ли бо мно́гия и туги́ се́рдца написа́х вам мно́гими слеза́ми, не я́ко да оскорбите́ся, но любо́вь да позна́ете, ю́же и́мам изоби́льно к вам.

⁵ А́ще ли кто оскорби́л мене́, не мене́ оскорби́, но от ча́сти, да не отягчу́, всех вас.

⁶ Дово́льно бо таково́му запреще́ние сие́, е́же от мно́гих.

⁷ Те́мже сопроти́вное па́че вам дарова́ти и уте́шити, да не ка́ко мно́гою ско́рбию поже́рт бу́дет таковы́й.

⁸ Те́мже молю́ вы, утверди́те к нему́ любо́вь.

⁹ На сие́ бо и писа́х, да разуме́ю иску́сство ва́ше, а́ще во всем послушли́ви есте́.

¹⁰ Ему́же а́ще что да́руете, и аз, и́бо аз а́ще что дарова́х, ему́же дарова́х, вас ра́ди, о лице́ Иису́с Христо́ве.

¹¹ Да не оби́дими бу́дем от сатаны́, не неразумева́ем бо умышле́ний его́.

¹² Прише́д же в Троа́ду во благове́стие Христо́во, и две́ри отве́рзене ми бы́вшей о Го́споде,

¹³ Не име́х поко́я ду́ху моему́, не обре́тшу ми Ти́та бра́та моего́, но отре́кся им, ^[227] изыдо́х в Македо́нию.

¹⁴ Бо́гу же благодаре́ние, всегда́ победи́тели нас творя́щему о Христе́ Иису́се и воню́ ра́зума Его́ явля́ющу на́ми во вся́ком ме́сте.

¹⁵ Я́ко Христо́во благоуха́ние есмы́ Бо́гови, в спаса́емых и в погиба́ющих.

¹⁶ О́вем у́бо воня́ сме́ртная в смерть, о́вем же воня́ живо́тная в живо́т. И к сим кто дово́лен?

¹⁷ Не́смы бо, я́коже мно́зи, нечи́сто пропове́дающии сло́во Бо́жие, но я́ко от чистоты́, но я́ко от Бо́га, пред Бо́гом, во Христе́ глаго́лем.

Глава 3

¹ Зачина́ем ли па́ки я́же нас саме́х извещава́ти вам? Или́ тре́буем, я́коже не́цыи, извещава́тельных посла́ний к вам, или́ от вас извести́тельных?

² Посла́ние бо на́ше вы есте́, напи́саное в сердца́х на́ших, зна́емое и прочита́емое от всех челове́к.

³ Явля́еми, я́ко есте́ посла́ние Христо́во слу́женое на́ми, напи́сано не черни́лом, но Ду́хом Бо́га жи́ва, не на скрижа́лех ка́менных, но на скрижа́лех се́рдца пло́тяных.

⁴ Наде́яние же таково́ и́мамы Христо́м к Бо́гу,

⁵ Не я́ко дово́льни есмы́ от себе́ помы́слити что, я́ко от себе́, но дово́льство на́ше от Бо́га.

⁶ И́же и удово́ли нас служи́тели бы́ти Но́ву Заве́ту, не пи́смени, но ду́ху: писмя́ бо убива́ет, а дух животвори́т.

⁷ А́ще ли служе́ние сме́рти писмены́, образова́но в ка́менех, бысть в сла́ву, я́ко не мощи́ взира́ти сыно́м Изра́илевым на лице́ Моисе́ово, сла́вы ра́ди ли́ца его́ престаю́щия.

⁸ Ка́ко не мно́жае па́че служе́ние ду́ха бу́дет в сла́ве?

⁹ А́ще бо служе́ние осужде́ния, сла́ва, мно́го па́че избы́точествует служе́ние пра́вды в сла́ве.

¹⁰ И́бо не просла́вися просла́вленное в ча́сти сей, за превосходя́щую сла́ву.

¹¹ А́ще бо престаю́щее, сла́вою, мно́го па́че пребыва́ющее, в сла́ве.

¹² Иму́ще у́бо таково́ упова́ние, мно́гим дерзнове́нием де́йствуем,

¹³ И не я́коже Моисе́й полага́ше покрыва́ло на лице́ свое́м, за е́же не мощи́ взира́ти сыно́м Изра́илевым на коне́ц престаю́щаго.

¹⁴ Но ослепи́шася помышле́ния их: да́же бо до сего́ дне то́жде покрыва́ло во чте́нии Ве́тхаго Заве́та пребыва́ет не открове́но, зане́ о Христе́ престае́т.

¹⁵ Но да́же до днесь, внегда́ чте́тся Моисе́й, покрыва́ло на се́рдце их лежи́т,

¹⁶ Внегда́ же обратя́тся ко Го́споду, взима́ется покрыва́ло.

¹⁷ Госпо́дь же Дух есть, а иде́же Дух Госпо́день, ту свобо́да.

¹⁸ Мы же вси открове́нным лице́м сла́ву Госпо́дню взира́юще, в то́йже о́браз преобразу́емся от сла́вы в сла́ву, я́коже от Госпо́дня Ду́ха.

Глава 4

¹ Сего́ ра́ди иму́ще служе́ние сие́, я́коже поми́ловани бы́хом, не стужа́ем си.

² Но отреко́хомся та́йных сра́ма, не в лука́вствии ходя́ще, ни льстя́ще словесе́ Бо́жия, но явле́нием и́стины представля́юще себе́ ко вся́кой со́вести челове́честей, пред Бо́гом.

³ А́ще ли же есть покрове́но благовествова́ние на́ше, в ги́бнущих есть покрове́но,

⁴ В ни́хже бог ве́ка сего́ ослепи́ ра́зумы неве́рных, во е́же не возсия́ти им све́ту благовествова́ния сла́вы Христо́вы, И́же есть о́браз Бо́га неви́димаго.

⁵ Не себе́ бо пропове́даем, но Христа́ Иису́са Го́спода, себе́ же саме́х рабы́ вам Иису́са [Го́спода] ра́ди.

⁶ Я́ко Бог реки́й из тмы све́ту возсия́ти, и́же возсия́ в сердца́х на́ших, к просвеще́нию ра́зума сла́вы Бо́жия о лице́ Иису́с Христо́ве.

⁷ И́мамы же сокро́вище сие́ в скуде́льных сосу́дех, да премно́жество си́лы бу́дет Бо́жия, а не от нас.

⁸ Во всем скорбя́ще, но не стужа́юще си, неча́еми, но не отчаява́еми,

⁹ Гони́ми, но не оставля́еми, низлага́еми, но не погиба́юще.

¹⁰ Всегда́ ме́ртвость Го́спода Иису́са в те́ле нося́ще, да и живо́т Иису́сов в те́ле на́шем яви́тся.

¹¹ При́сно бо мы живи́и в смерть предае́мся Иису́са ра́ди, да и живо́т Иису́сов яви́тся в ме́ртвенней пло́ти на́шей.

¹² Те́мже смерть у́бо в нас де́йствует, а живо́т в вас.

¹³ Иму́ще же то́йже дух ве́ры, по пи́санному: ве́ровах, те́мже возглаго́лах, и мы ве́руем, те́мже и глаго́лем,

¹⁴ Ве́дяще, я́ко Воздви́гий Го́спода Иису́са, и нас со Иису́сом воздви́гнет, и предпоста́вит с ва́ми.

¹⁵ Вся бо вас ра́ди, да благода́ть умно́жившаяся, мно́жайшими благодаре́нии избы́точествит в сла́ву Бо́жию.

¹⁶ Те́мже не стужа́ем си, но а́ще и вне́шний наш челове́к тле́ет, но вну́тренний обновля́ется по вся дни.

¹⁷ Е́же бо ны́не ле́гкое печа́ли на́шея, по преумноже́нию в преспе́яние тяготу́ ве́чныя сла́вы соде́ловает нам.

¹⁸ Не смотря́ющим нам ви́димых, но неви́димых: ви́димая бо вре́менна, неви́димая же ве́чна.

Глава 5

¹ Ве́мы бо, я́ко а́ще земна́я на́ша хра́мина те́ла разори́тся, созда́ние от Бо́га и́мамы, хра́мину нерукотворе́ну, ве́чну на небесе́х.

² И́бо о сем воздыха́ем, в жили́ще на́ше небе́сное облещи́ся жела́юще,

³ А́ще и обле́кшеся, не на́зи обря́щемся.

⁴ И́бо су́щии в те́ле сем воздыха́ем отягча́еми, поне́же не хо́щем совлещи́ся, но пооблещи́ся, да поже́рто бу́дет ме́ртвенное живото́м.

⁵ Сотвори́вый же нас в сие́ и́стое Бог, И́же и даде́ нам обруче́ние Ду́ха.

⁶ Дерза́юще у́бо всегда́ и ве́дяще, я́ко живу́ще в те́ле отхо́дим от Го́спода:

⁷ [Ве́рою бо хо́дим, а не виде́нием.]

⁸ Дерза́ем же и благоволи́м па́че отити́ от те́ла и вни́ти ко Го́споду.

⁹ Те́мже и тщи́мся, а́ще входя́ще, а́ще отходя́ще, благоуго́дни Ему́ бы́ти.

¹⁰ Всем бо яви́тися нам подоба́ет пред суди́щем Христо́вым, да прии́мет ко́ждо, я́же с те́лом соде́ла, или́ бла́га, или́ зла.

¹¹ Ве́дуще у́бо страх Госпо́день, челове́ки увещава́ем, Бо́гови же явле́ни бы́хом, упова́ем же, я́ко и в со́вестех ва́ших явле́ни есмы́.

¹² Не па́ки бо себе́ хва́лим пред ва́ми, но вину́ дае́м вам похвале́нию по нас, да и́мате к хва́лящимся в лице́, а не в се́рдцы.

¹³ А́ще бо изуми́хомся, Бо́гови, а́ще ли целому́дрствуем, вам.

¹⁴ И́бо любы́ Бо́жия содержи́т нас, су́ждших сие́: я́ко а́ще Еди́н за всех у́мре, то у́бо вси умро́ша.

¹⁵ Христо́с же за вся у́мре, да живу́щии не ктому́ себе́ живу́т, но уме́ршему за них и воскре́сшему.

¹⁶ Те́мже и мы отны́не ни еди́наго ве́мы по пло́ти, а́ще же и разуме́хом по пло́ти Христа́, но ны́не ктому́ не разуме́ем.

¹⁷ Те́мже а́ще ка́я о Христе́, нова́ тварь: дре́вняя мимоидо́ша, се бы́ша вся нова́.

¹⁸ Вся́ческая же от Бо́га, примири́вшаго нас Себе́ Иису́с Христо́м и да́вшаго нам служе́ние примире́ния.

¹⁹ Зане́ Бог бе во Христе́ міръ примиря́я Себе́, не вменя́я им согреше́ний их и положи́в в нас сло́во примире́ния.

²⁰ По Христе́ у́бо мо́лим, ^[228] я́ко Бо́гу моля́щу на́ми, мо́лимся у́бо по Христе́, примири́теся с Бо́гом.

²¹ Не ве́девшаго бо греха́ по нас грех сотвори́, да мы бу́дем пра́вда Бо́жия о Нем.

Глава 6

¹ Поспе́шствующе же и мо́лим, не вотще́ благода́ть Бо́жию прия́ти вам.

² Глаго́лет бо: во вре́мя прия́тно послу́шах тебе́, и в день спасе́ния помого́х ти. Се ны́не вре́мя благоприя́тно, се ны́не день спасе́ния.

³ Ни еди́но ни в че́мже даю́ще претыка́ние, да служе́ние безпоро́чно бу́дет.

⁴ Но во всем представля́юще себе́ я́коже Бо́жия слуги́, в терпе́нии мно́зе, в ско́рбех, в беда́х, в теснота́х,

⁵ В ра́нах, в темни́цах, в нестрое́ниих, в труде́х, во бде́ниих, в поще́ниих,

⁶ Во очище́нии, в ра́зуме, в долготерпе́нии, в бла́гости, в Ду́се Свя́те, в любви́ нелицеме́рне,

⁷ В словеси́ и́стины, в си́ле Бо́жией, ору́жии пра́вды десны́ми и шу́ими.

⁸ Сла́вою и безче́стием, гажде́нием и благохвале́нием, я́ко лестцы́, и и́стинни,

⁹ Я́ко незна́еми, и познава́еми, я́ко умира́юще, и се жи́ви есмы́, я́ко наказу́еми, а не умерщвля́еми,

¹⁰ Я́ко скорбя́ще, при́сно же ра́дующеся, я́ко ни́щи, а мно́гих богатя́ще, я́ко ничто́же иму́ще, а вся содержа́ще.

¹¹ Уста́ на́ша отверзо́шася к вам, Кори́нфяне, се́рдце на́ше распространи́ся.

¹² Не те́сно вмеща́етеся в нас, утесня́етеся же во утро́бах ва́ших.

¹³ То́жде возме́здие, [я́коже ча́дом глаго́лю,] распространи́теся и вы.

¹⁴ Не быва́йте удо́бь прело́жни ко ино́му ярму́, я́коже неве́рнии. ^[229] Ко́е бо прича́стие пра́вде к беззако́нию? Или́ ко́е обще́ние све́ту ко тьме?

¹⁵ Ко́е же согла́сие Христо́ви с велиа́ром? Или́ ка́я часть ве́рну с неве́рным?

¹⁶ Или́ ко́е сложе́ние це́ркви Бо́жией со и́долы? Вы бо есте́ це́ркви Бо́га жи́ва, я́коже рече́ Бог, я́ко вселю́ся в них и похожду́, и бу́ду им Бог, и ти́и бу́дут Мне лю́дие.

¹⁷ Те́мже изыди́те от среды́ их, и отлучи́теся, глаго́лет Госпо́дь, и нечистоте́ не прикаса́йтеся, и Аз прииму́ вы.

¹⁸ И бу́ду вам во Отца́, и вы бу́дете Мне в сы́ны и дще́ри, глаго́лет Госпо́дь Вседержи́тель.

Глава 7

¹ Сицева́ у́бо иму́ще обетова́ния, о возлю́бленнии, очи́стим себе́ от вся́кия скве́рны пло́ти и ду́ха, творя́ще святы́ню в стра́се Бо́жии.

² Вмести́те ны: ни еди́наго оби́дехом, ни еди́наго истли́хом, ни еди́наго лихои́мствовахом.

³ Не на осужде́ние глаго́лю, пре́жде бо рех, я́ко в сердца́х на́ших есте́, во е́же умре́ти с ва́ми и сожи́ти.

⁴ Мно́го ми дерзнове́ние к вам, мно́га ми похвала́ по вас, испо́лнихся уте́хи, преизбы́точествую ра́достию о вся́кой печа́ли на́шей.

⁵ И́бо прише́дшим нам в Македо́нию, ни еди́наго име́ поко́я плоть на́ша, но во всем скорбя́ще: внеу́ду бра́ни, внутрью́ду боя́зни.

⁶ Но утеша́яй смире́нныя, уте́ши нас Бог прише́ствием Ти́товым.

⁷ Не то́кмо же прише́ствием его́, но и утеше́нием, и́мже уте́шися о вас, пове́дая нам ва́ше жела́ние, ва́ше рыда́ние, ва́шу ре́вность по мне, я́ко ми па́че возра́доватися.

⁸ Я́ко а́ще и оскорби́х вас посла́нием, не раска́юся, а́ще и раска́ял бых ся. Ви́жду бо, я́ко посла́ние о́но, а́ще и в час, оскорби́ вас.

⁹ Ны́не ра́дуюся, не я́ко ско́рбни бы́сте, но я́ко оскорби́стеся в покая́ние: оскорбе́сте бо по Бо́зе, да ни о еди́ном отщетите́ся от нас.

¹⁰ Печа́ль бо, я́же по Бо́зе, покая́ние нераска́янно во спасе́ние соде́ловает.

¹¹ Се бо сие́ са́мое, е́же по Бо́зе оскорби́тися вам, коли́ко соде́ла в вас тща́ние? Но отве́т, но негодова́ние, но страх, но вожделе́ние, но ре́вность, но отмще́ние? Во всем предста́висте себе́ чи́сты бы́ти в ве́щи.

¹² А́ще бо и писа́х вам, не оби́девшаго ра́ди, ниже́ оби́димаго ра́ди, но за е́же яви́тися в вас тща́нию на́шему, е́же о вас пред Бо́гом.

¹³ Сего́ ра́ди уте́шихомся о утеше́нии ва́шем: ли́шше же па́че возра́довахомся о ра́дости Ти́тове, я́ко поко́ися дух его́ от всех вас.

¹⁴ Я́ко а́ще что ему́ о вас похвали́хся, не посрами́хся, но я́ко вся вои́стинну глаго́лахом вам, та́ко и похвале́ние на́ше, е́же к Ти́ту, и́стинно бысть.

¹⁵ И утро́ба его́ и́злиха к вам есть, воспомина́ющаго всех вас послуша́ние, я́ко со стра́хом и тре́петом прия́сте его́.

¹⁶ Ра́дуюся у́бо, я́ко во всем дерза́ю в вас.

Глава 8

¹ Сказу́ем же вам, братие, благода́ть Бо́жию, да́нную в це́рквах Македо́нских,

² Я́ко во мно́зем искуше́нии скорбе́й избы́ток ра́дости их, и я́же во глубине́ нищета́ их избы́точествова в бога́тство простоты́ их.

³ Я́ко по си́ле их, [свиде́тельствую,] и па́че си́лы доброхо́тни,

⁴ Со мно́гим моле́нием моля́ще нас, благода́ть и обще́ние служе́ния, е́же во святы́х, прия́ти нам.

⁵ И не я́коже наде́яхомся, но себе́ вда́ша пе́рвее Го́сподеви, и нам во́лею Бо́жиею.

⁶ Во е́же умоли́ти нам Ти́та, да я́коже пре́жде нача́т, та́кожде и сконча́ет в вас и благода́ть сию́.

⁷ Но я́коже во всем избы́точествуете, ве́рою и сло́вом, и ра́зумом, и вся́цем тща́нием, и любо́вию, я́же от вас к нам, да и в сей благода́ти избы́точествуете.

⁸ Не по повеле́нию глаго́лю, но за ины́х тща́ние и ва́шея любве́ и́стинное искуша́я.

⁹ Ве́сте бо благода́ть Го́спода на́шего Иису́са Христа́, я́ко вас ра́ди обнища́ бога́т сый, да вы нището́ю Его́ обогатите́ся.

¹⁰ И сове́т даю́ о сем: се бо вам есть на по́льзу, и́же не то́чию, е́же твори́ти, но и е́же хоте́ти, пре́жде нача́сте от преше́дшаго ле́та.

¹¹ Ны́не же и е́же твори́ти сконча́йте, да я́коже бысть усе́рдие хоте́ти, та́ко да бу́дет и испо́лнити от е́же име́ти.

¹² А́ще бо усе́рдие предлежи́т, по ели́ку а́ще кто и́мать, благоприя́тен есть, а не по ели́ку не и́мать.

¹³ Не бо да ины́м у́бо отра́да, вам же скорбь, но от изравне́ния.

¹⁴ В ны́нешнее вре́мя ва́ше избы́точествие во о́нех лише́ние, да и о́нех избы́ток бу́дет в ва́ше лише́ние, я́ко да бу́дет ра́венство.

¹⁵ Я́коже есть пи́сано: и́же мно́гое не преумно́жил есть, и и́же ма́лое не ума́лил. ^[230]

¹⁶ Благодаре́ние же Бо́гови, да́вшему то́жде тща́ние о вас в се́рдце Ти́тово.

¹⁷ Я́ко моле́ние у́бо прия́т, тщали́вейший ^[231] же сый, свое́ю во́лею изы́де к вам.

¹⁸ Посла́хом же с ним и бра́та, его́же похвала́ во Ева́нгелии по всем це́рквам.

¹⁹ Не то́чию же, но и освя́щся от церкве́й с на́ми ходи́ти, со благода́тию се́ю, служи́мою на́ми к Самого́ Го́спода сла́ве и усе́рдию ва́шему,

²⁰ Блюду́щеся того́, да не кто нас порече́т во оби́лии сем служи́мем на́ми,

²¹ Промышля́юще до́брая не то́кмо пред Бо́гом, но и пред челове́ки.

²² Посла́хом же с ни́ми и бра́та на́шего, его́же искуси́хом во мно́гих мно́гащи встанли́ва ^[232] су́ща, ны́не же зело́ встанли́вейша, ^[233] наде́янием мно́гим е́же в вас.

²³ А́ще ли же о Ти́те, о́бщник мне и в вас поспе́шник, а́ще ли бра́тия на́ша, посла́нницы церкве́й, сла́ва Христо́ва.

²⁴ Показа́ние у́бо любве́ ва́шея и на́шего хвале́ния о вас, в них покажи́те, в лице́ церкве́й.

Глава 9

¹ О слу́жбе бо, я́же ко святы́м, ли́шше ми есть писа́ти вам,

² Вем бо усе́рдие ва́ше, и́мже о вас хвалю́ся Македо́няном, я́ко Аха́иа пригото́вися от мимоше́дшаго ле́та, и я́же от вас ре́вность раздражи́ мно́жайших.

³ Посла́х же бра́тию, да не похвале́ние на́ше, е́же о вас, испра́зднится в ча́сти сей, но да [я́коже глаго́лах,] пригото́вани бу́дете.

⁴ Да не ка́ко, а́ще прии́дут со мно́ю Македо́няне и обря́щут вы не пригото́ванных, постыди́мся мы, [да не глаго́лем вы,] в ча́сти сей похвале́ния.

⁵ Потре́бно у́бо умы́слих умоли́ти бра́тию, да пре́жде прии́дут к вам и предугото́вят пре́жде возвеще́нное благослове́ние ва́ше, сие́ гото́во бы́ти та́ко, я́коже благослове́ние, а не я́ко лихои́мство.

⁶ Се же глаго́лю: се́яй ску́достию, ску́достию и по́жнет, а се́яй о благослове́нии, о благослове́нии и по́жнет.

⁷ Ко́ждо я́коже изволе́ние и́мать се́рдцем, не от ско́рби, ни от ну́жды: доброхо́тна бо да́теля лю́бит Бог.

⁸ Си́лен же Бог вся́ку благода́ть изоби́ловати в вас, да о всем всегда́ вся́ко дово́льство иму́ще, избы́точествуете во вся́ко де́ло бла́го.

⁹ Я́коже есть пи́сано: расточи́, даде́ убо́гим, пра́вда его́ пребыва́ет во ве́ки.

¹⁰ Дая́й же се́мя се́ющему и хлеб в снедь, да пода́ст и умно́жит се́мя ва́ше, и да возрасти́т жи́та пра́вды ва́шея.

¹¹ Да о всем богатя́щеся во вся́ку простоту́, я́же содева́ет на́ми благодаре́ние Бо́гу.

¹² Я́ко рабо́та сего́ служе́ния не то́кмо есть исполня́ющая лише́ния святы́х, но и избы́точествующая мно́гими благодаре́ньми Бо́гови.

¹³ Искуше́нием служе́ния сего́ сла́вяще Бо́га о покоре́нии испове́дания ва́шего в Благовествова́нии Христо́во, и о простоте́ сообще́ния к ним и ко всем.

¹⁴ И тех моли́твою по вас, возжеле́ющим вас за премно́гую благода́ть Бо́жию на вас.

¹⁵ Благодаре́ние же Бо́гови о неисповеди́мем Его́ да́ре.

Глава 10

¹ Сам же аз Па́вел молю́ вы кро́тостию и ти́хостию Христо́вою, и́же в лице́ у́бо смире́н в вас, не сый же у вас дерза́ю в вас.

² Молю́ же е́же не сый ту дерза́ти наде́янием, и́мже помышля́ю сме́ти на не́кия непщу́ющия нас я́ко по пло́ти ходя́щих.

³ Во пло́ти бо ходя́ще, не по пло́ти во́инствуем.

⁴ Ору́жия бо во́инства на́шего не плотска́я, но си́льна Бо́гови на разоре́ние тве́рдем, помышле́ния низлага́юще,

⁵ И вся́ко возноше́ние взима́ющееся на ра́зум Бо́жий, и пленя́юще всяк ра́зум в послуша́ние Христо́во,

⁶ И гото́во иму́ще отмсти́ти вся́ко преслуша́ние, егда́ испо́лнится ва́ше послуша́ние.

⁷ И́же ли пред лице́м, зри́те? А́ще кто наде́ется себе́ Христо́ва бы́ти, да помышля́ет па́ки от себе́, зане́, я́коже он Христо́в, та́кожде и мы Христо́вы.

⁸ А́ще бо и ли́шше что похвалю́ся о вла́сти на́шей, ю́же даде́ нам Госпо́дь в созда́ние, а не на разоре́ние ва́ше, не постыжу́ся.

⁹ Но да не явлю́ся, я́ко страшя́ вас посла́ньми.

¹⁰ Я́ко посла́ния у́бо, рече́, тя́жка и кре́пка, а прише́ствие те́ла не́мощно, и сло́во уничиже́нно.

¹¹ Сие́ да помышля́ет таковы́й, я́ко я́цы же есмы́ сло́вом посла́ний, отстоя́ще, такови́и и ту су́ще есмы́ де́лом.

¹² Не сме́ем бо суди́ти, ^[234] или́ прикла́довати себе́ ины́м хва́лящим себе́ саме́х, но са́ми в себе́ себе́ измеря́юще, и прилага́юще себе́, себе́ не разумева́ют.

¹³ Мы же не в безме́рная похва́лимся, но по ме́ре пра́вила, его́же раздели́ нам Бог ме́ру, достиза́ти да́же и до вас.

¹⁴ Не я́ко бо не дося́жуще до вас, па́че простира́ем себе́, да́же бо и до вас достиго́хом благове́стием Христо́вым.

¹⁵ Не в безме́рная хва́лящеся, ниже́ в чужди́х труде́х, упова́ние же иму́ще, расту́щей ве́ре ва́шей, в вас велича́тися по пра́вилу на́шему изоби́льно.

¹⁶ Во е́же и в да́льших вас [страна́х] благовести́ти, не чужи́м пра́вилом в гото́вая похвали́тися.

¹⁷ Хваля́йся же, о Го́споде да хва́лится.

¹⁸ Не хваля́й бо себе́ сей иску́сен, но его́же Бог восхваля́ет.

Глава 11

¹ О, да бы́сте ма́ло потерпе́ли безу́мию моему́! Но и потерпи́те мя.

² Ревну́ю бо о вас Бо́жиею ре́вностию: обручи́х бо вас еди́ному му́жу, де́ву чи́сту предста́вити Христо́ви.

³ Бою́ся же, да не ка́ко, я́коже змия́ Е́ву прельсти́ лука́вством свои́м, та́ко истле́ют и ра́зумы ва́ша от простоты́, я́же о Христе́.

⁴ А́ще бо гряды́й и́наго Иису́са пропове́дает, его́же не пропове́дахом, или́ Ду́ха ина́го прие́млете, его́же не прия́сте, или́ благовествова́ние и́но, е́же не прия́сте, до́бре бы́сте потерпе́ли.

⁵ Непщу́ю бо ничи́мже лиши́тися пре́дних Апо́стол.

⁶ А́ще бо и неве́жда сло́вом, но не ра́зумом, но везде́ я́вльшеся о всем в вас. ^[235]

⁷ Или́ грех сотвори́х себе́ смиря́я, да вы вознесе́теся, я́ко ту́не Бо́жие Благовествова́ние благовести́х вам?

⁸ От ины́х церкве́й уи́м, прии́м обро́к к ва́шему служе́нию, и прише́д к вам, и в ску́дости быв, не стужи́х ни еди́ному.

⁹ Ску́дость бо мою́ испо́лниша бра́тия, прише́дше от Македо́нии, и во всем без стуже́ния вам себе́ соблюдо́х и соблюду́.

¹⁰ Есть и́стина Христо́ва во мне, я́ко похвале́ние сие́ не загради́тся о мне в страна́х Аха́йстех.

¹¹ Почто́? Зане́ не люблю́ ли вас? Бог весть. А е́же творю́, и сотворю́,

¹² Да отсеку́ вину́ хотя́щим вины́, да о не́мже хва́лятся, обря́щутся я́коже и мы.

¹³ Такови́и бо лжи́ви апо́столи, де́лателе льсти́вии, преобразу́ющеся во Апо́столы Христо́вы.

¹⁴ И не ди́вно: сам бо сатана́ преобразу́ется во А́нгела све́тла.

¹⁵ Не ве́лие у́бо, а́ще и служи́телие его́ преобразу́ются я́ко служи́тели пра́вды, и́мже кончи́на бу́дет по дело́м их.

¹⁶ Па́ки глаго́лю, да никто́же мнит мя безу́мна бы́ти, а́ще ли ни, поне́ я́ко безу́мна приими́те мя, да и аз ма́ло что похвалю́ся.

¹⁷ А е́же глаго́лю, не глаго́лю по Го́споде, но я́ко в безу́мии в сей ча́сти похвалы́.

¹⁸ Поне́же мно́зи хва́лятся по пло́ти, и аз похвалю́ся.

¹⁹ Любе́зно бо прие́млете безу́мныя, му́дри су́ще.

²⁰ Прие́млете бо, а́ще кто вас порабоща́ет, а́ще кто пояда́ет, а́ще кто не вле́поту прото́рит, ^[236] а́ще кто по лицу́ бие́т вы, а́ще кто велича́ется.

²¹ По досажде́нию глаго́лю, зане́ а́ки мы изнемого́хом. О не́мже а́ще дерза́ет кто, [несмы́сленно глаго́лю,] дерза́ю и аз.

²² Евре́и ли суть? И аз. Изра́ильте ли суть? И аз. Се́мя Авраа́мле ли суть? И аз.

²³ Служи́телие ли Христо́вы суть? [Не в му́дрости глаго́лю,] па́че аз. В труде́х мно́жае, в ра́нах пребо́ле, в темни́цах и́злиха, в сме́ртех мно́гащи.

²⁴ От иуде́й пятькра́ты четы́ридесять, ра́зве еди́ныя, прия́х.

²⁵ Три́щи па́лицами бие́н бых, еди́ною ка́меньми наме́тан бых; трикра́ты кора́бль опрове́ржеся со мно́ю; нощь и день во глубине́ сотвори́х.

²⁶ В пу́тных ше́ствиих мно́жицею: беды́ в река́х, беды́ от разбо́йник, беды́ от сро́дник, беды́ от язы́к, беды́ во граде́х, беды́ в пусты́ни, беды́ в мо́ри, беды́ во лжебра́тии.

²⁷ В труде́ и по́двизе, во бде́ниих мно́жицею, во а́лчбе и жа́жди, в поще́ниих мно́гащи, в зиме́ и наготе́.

²⁸ Кроме́ вне́шних, нападе́ние е́же по вся дни, и попече́ние всех церкве́й.

²⁹ Кто изнемога́ет, и не изнемога́ю; кто соблазня́ется, и аз не разжиза́юся?

³⁰ А́ще хвали́тися ми подоба́ет, я́же о не́мощи мое́й похвалю́ся.

³¹ Бог и Оте́ц Го́спода на́шего Иису́са Христа́ весть, Сый благослове́н во ве́ки, я́ко не лгу.

³² В Дама́сце язы́ческий князь Аре́фы царя́ стрежа́ше Дама́ск град, я́ти мя хотя́, и око́нцем в ко́шнице све́шен бых по стене́, и избего́х из руку́ его́.

Глава 12

¹ Похвали́тися же не по́льзует ми: прииду́ бо в виде́ния и открове́ния Госпо́дня.

² Вем челове́ка о Христе́, пре́жде лет четырина́десяти, [а́ще в те́ле, не вем, а́ще ли кроме́ те́ла, не вем, Бог весть,] восхище́на бы́вша такова́го до тре́тиягоНебесе́.

³ И вем такова́ челове́ка, [а́ще в те́ле, или́ кроме́ те́ла, не вем, Бог весть,]

⁴ Я́ко восхище́н бысть в рай, и слы́ша неизрече́нны глаго́лы, и́хже не леть есть челове́ку глаго́лати.

⁵ О такове́м похвалю́ся, о себе́ же не похвалю́ся, то́кмо о не́мощех мои́х.

⁶ А́ще бо восхощу́ похвали́тися, не бу́ду безу́мен, и́стину бо реку́, щажду́ же, да не ка́ко кто вознепщу́ет о мне па́че, е́же ви́дит мя, или́ слы́шит что от мене́.

⁷ И за премно́гая открове́ния да не превозношу́ся, даде́ся ми па́костник пло́ти, а́ггел сатани́н, да ми па́кости де́ет, да не превозношу́ся.

⁸ О сем трикра́ты Го́спода моли́х, да и отсту́пит от мене́.

⁹ И рече́ ми: довле́ет ти благода́ть Моя́, си́ла бо Моя́ в не́мощи соверша́ется. Сла́дце у́бо похвалю́ся па́че в не́мощех мои́х, да всели́тся в мя си́ла Христо́ва.

¹⁰ Темже благоволю́ в не́мощех, в досажде́ниих, в беда́х, во изгна́ниих, в теснота́х по Христе́: егда́ бо немощству́ю, тогда́ си́лен есмь.

¹¹ Бых несмы́слен хваля́ся, вы мя пону́дисте. Аз бо до́лжен бех от вас хвали́м быва́ти, ничи́мже бо лиши́хся пе́рвейших Апо́стол, а́ще и ничто́же есмь.

¹² Зна́мения бо Апо́столова соде́яшася в вас во вся́ком терпе́нии, в зна́мениих и чудесе́х и си́лах.

¹³ Что бо есть, его́же лиши́стеся па́че про́чих це́рквей, а́ще то́чию я́ко аз сам не стужи́х вам? Дади́те ми непра́вду сию́.

¹⁴ Се тре́тие гото́в есмь приити́ к вам, и не стужу́ вам: не ищу́ бо ва́ших, но вас. Не до́лжна бо суть ча́да роди́телем сниска́ти име́ния, но роди́тели ча́дом.

¹⁵ Аз же в сла́дость иждиву́ и иждиве́н бу́ду по душа́х ва́ших, а́ще и изли́шше вас любя́, ме́ньши люби́мь есмь.

¹⁶ Бу́ди же, аз не отягчи́х вас, но кова́рен сый, ле́стию вас прия́х.

¹⁷ Еда́ ко́им от по́сланных к вам лихои́мствовах вас?

¹⁸ Умоли́х Ти́та, и с ним посла́х бра́та, еда́ лихои́мствова чим вас Тит? Не те́мже ли ду́хом ходи́хом? Не те́ми же ли стопа́ми?

¹⁹ Па́ки ли мните́, я́ко отве́т вам твори́м? Пред Бо́гом, о Христе́ глаго́лем: вся же, возлю́бленнии, о ва́шем созда́нии [и утвержде́нии.]

²⁰ Бою́ся же, еда́ ка́ко прише́д, не я́цех же хощу́, обря́щу вас, и аз обря́щуся вам, якова́ же не хо́щете: да не ка́ко [бу́дут] рве́ния, за́висти, я́рости, ре́ти, клеветы́, шепта́ния, киче́ния, нестрое́ния.

²¹ Да не па́ки прише́дша мя смири́т Бог мой у вас, и воспла́чуся мно́гих пре́жде согре́шших и не пока́явшихся о нечистоте́ и блуже́нии и студоло́жствии, я́же соде́яша.

Глава 13

¹ Трети́цею се гряду́ к вам: при усте́х двою́ или́ трие́х свиде́телей ста́нет всяк глаго́л.

² Пре́жде рех и предглаго́лю, я́ко у вас быв второ́е, и не сый ны́не пишу́ пре́жде согре́шшим и про́чим всем, я́ко а́ще прииду́ па́ки, не пощажу́.

³ Поне́же искуше́ния и́щете глаго́лющаго во мне Христа́, И́же в вас не изнемога́ет, но мо́жет в вас.

⁴ И́бо а́ще и ра́спят бысть от не́мощи, но жив есть от си́лы Бо́жия, и́бо и мы немощству́ем в Нем, но жи́ви бу́дем с Ним от си́лы Бо́жия в вас.

⁵ Себе́ искуша́йте, а́ще есте́ в ве́ре: себе́ искуша́йте. Или́ не зна́ете себе́, я́ко Иису́с Христо́с в вас есть? А́ще то́чию чим неиску́сни есте́.

⁶ Упова́ю же, я́ко разуме́ти и́мате, я́ко мы не́смы неиску́сни.

⁷ Мо́лимся же к Бо́гу, не сотвори́ти вам ни еди́наго зла, не я́ко да мы иску́сни яви́мся, но да вы до́брое сотворите́, мы же я́ко неиску́сни бу́дем.

⁸ Ничто́же бо мо́жем на и́стину, но по и́стине.

⁹ Ра́дуемся же, егда́ мы немощству́ем, вы же си́льни быва́ете, се бо и мо́лимся, о ва́шем соверше́нии.

¹⁰ Сего́ ра́ди не сый у вас сия́ пишу́, да не прише́д безща́дно сотворю́ по вла́сти, ю́же Госпо́дь дал ми есть в созда́ние, а не на разоре́ние.

¹¹ Про́чее же, бра́тие, ра́дуйтеся, соверша́йтеся, утеша́йтеся, то́жде му́дрствуйте, мир име́йте. И Бог любве́ и ми́ра бу́дет с ва́ми.

¹² Целу́йте друг дру́га лобза́нием святы́м. Целу́ют вы святи́и вси.

¹³ Благода́ть Го́спода на́шего Иису́са Христа́, и любы́ Бо́га и Отца́, и обще́ние Свята́го Ду́ха со все́ми ва́ми. Ами́нь.

Посла́ние к Гала́там

Глава 1

¹ Па́вел, Апо́стол [ни от челове́к, ни челове́ком, но Иису́с Христо́м и Бо́гом Отце́м воскреси́вшим Его́ из ме́ртвых,]

² И и́же со мно́ю вся бра́тия, це́рквам Галати́йским.

³ Благода́ть вам и мир от Бо́га Отца́ и Го́спода на́шего Иису́са Христа́,

⁴ Да́вшаго Себе́ по гресе́х на́ших, я́ко да изба́вит ны от настоя́щаго ве́ка лука́ваго, по во́ли Бо́га и Отца́ на́шего,

⁵ Ему́же сла́ва во ве́ки веко́в, ами́нь.

⁶ Чужду́ся, я́ко та́ко ско́ро прелага́етеся от зва́вшаго вы благода́тию Христо́вою, во и́но благовествова́ние:

⁷ Е́же несть и́но, то́чию не́цыи суть смуща́ющии вы и хотя́щии преврати́ти благовествова́ние Христо́во.

⁸ Но и а́ще мы, или́ А́нгел с небесе́ благовести́т вам па́че, е́же благовести́хом вам, ана́фема да бу́дет.

⁹ Я́коже предреко́хом, и ны́не па́ки глаго́лю: а́ще кто вам благовести́т па́че, е́же прия́сте, ана́фема да бу́дет.

¹⁰ Ны́не бо челове́ки препира́ю, или́ Бо́га, или́ ищу́ челове́ком угожда́ти? А́ще бо бых еще́ челове́ком угожда́л, Христо́в раб не бых у́бо был.

¹¹ Сказу́ю же вам, бра́тие, Благовествова́ние благовеще́нное от мене́, я́ко несть по челове́ку.

¹² Ни бо аз от челове́ка прия́х е́, ниже́ научи́хся, но явле́нием Иису́с Христо́вым.

¹³ Слы́шасте бо мое́ житие́ иногда́ в жидо́встве, я́ко попремно́гу гони́х Це́рковь Бо́жию и разруша́х ю́,

¹⁴ И преспева́х в жидо́встве па́че мно́гих све́рстник мои́х в ро́де мое́м, и́злиха ревни́тель сый оте́ческих мои́х преда́ний.

¹⁵ Егда́ же благоволи́ Бог, Избра́вый мя от чре́ва ма́тере моея́ и призва́вый благода́тию Свое́ю,

¹⁶ Яви́ти Сы́на Своего́ во мне, да благовеству́ю Его́ во язы́цех, а́бие не приложи́хся пло́ти и кро́ви,

¹⁷ Ни взыдо́х во Иерусали́м к пре́дним мене́ апо́столом, но идо́х во Арави́ю, и па́ки возврати́хся в Дама́ск.

¹⁸ Пото́м же по трие́х ле́тех взыдо́х во Иерусали́м согля́дати Петра́, и пребы́х у него́ дний пятьна́десять.

¹⁹ Ино́го же от апо́стол не ви́дех, то́кмо Иа́кова бра́та Госпо́дня.

²⁰ А я́же пишу́ вам, се пред Бо́гом, я́ко не лгу.

²¹ Пото́м же приидо́х в страны́ Си́рския и Килики́йския.

²² Бех же не зна́емь лице́м це́рквам иуде́йским, я́же о Христе́,

²³ То́чию же слы́шаще бя́ху, я́ко гоня́й нас иногда́, ны́не благовеству́ет ве́ру, ю́же иногда́ разруша́ше.

²⁴ И сла́вляху о мне Бо́га.

Глава 2

¹ Пото́м же по четырена́десяти ле́тех па́ки взыдо́х во Иерусали́м с Варна́вою, пое́м с собо́ю и Ти́та.

² Взыдо́х же по открове́нию, и возложи́х им благовествова́ние, е́же пропове́дую во язы́цех, наедине́ же мни́мым, да не ка́ко вотще́ теку́, или́ теко́х.

³ Но ни Тит, и́же со мно́ю, е́ллин сый, ну́жден бысть обре́затися.

⁴ И за привше́дшую лжебра́тию, и́же привнидо́ша согля́дати свобо́ды на́шея, ю́же и́мамы о Христе́ Иису́се да нас порабо́тят.

⁵ И́мже ни к часу́ повину́хомся в покоре́ние, да и́стина благове́стия пребу́дет в вас.

⁶ От мня́щихся же бы́ти что́, [якови́ не́когда бе́ша, ничто́же ми ра́знствует: лица́ Бог челове́ча не прие́млет.] Мне бо мни́мии ничто́же привозложи́ша.

⁷ Но сопроти́вное, уразуме́вше, я́ко уве́рено ми бысть благове́стие необре́зания, я́коже Петру́ обре́зания.

⁸ [И́бо Споспе́шествовавый Петру́ в посла́ние обре́зания, поспе́шествова и мне во язы́ки.]

⁹ И позна́вше благода́ть да́нную ми, Иа́ков и Ки́фа и Иоа́нн, мни́мии столпи́ бы́ти, де́сная да́ша мне и Варна́ве обще́ния, да мы во язы́ки, они́ же во обре́зание,

¹⁰ То́чию ни́щих да по́мнима, е́же и потща́хся сие́ и́стое сотвори́ти.

¹¹ Егда́ же прии́де Петр во Антиохи́ю, в лице́ ему́ проти́вустах, я́ко зазо́рен бе.

¹² Пре́жде бо да́же не приити́ не́ким от Иа́кова, с язы́ки ядя́ше, егда́ же приидо́ша, опря́ташеся и отлуча́шеся, боя́ся су́щих от обре́зания.

¹³ И лицеме́ришася с ним и про́чии иуде́и, я́ко и Варна́ве приста́ти лицеме́рству их.

¹⁴ Но егда́ ви́дех, я́ко не пра́во хо́дят ко и́стине Благовествова́ния, реко́х Петру́ пред все́ми: а́ще ты, иуде́й сый, язы́чески, а не иуде́йски живе́ши, почто́ язы́ки ну́диши иуде́йски жи́тельствовати?

¹⁵ Мы естество́м иуде́и, а не от язы́к гре́шницы.

¹⁶ Уве́девше же, я́ко не оправди́тся челове́к от дел зако́на, но то́кмо ве́рою Иису́с Христо́вою, и мы во Христа́ Иису́са ве́ровахом, да оправди́мся от ве́ры Христо́вы, а не от дел зако́на, зане́ не оправди́тся от дел зако́на вся́ка плоть.

¹⁷ А́ще ли, и́щуще оправди́тися о Христе́, обрето́хомся и са́ми гре́шницы, Христо́с у́бо греху́ ли служи́тель? Да не бу́дет.

¹⁸ А́ще бо, я́же разори́х, сия́ па́ки созида́ю, престу́пника себе́ представля́ю.

¹⁹ Аз бо зако́ном зако́ну умро́х, да Бо́гови жив бу́ду. Христо́ви сраспя́хся.

²⁰ Живу́ же не ктому́ аз, но живе́т во мне Христо́с. А е́же ны́не живу́ во пло́ти, ве́рою живу́ Сы́на Бо́жия, возлюби́вшаго мене́ и преда́вшаго Себе́ по мне.

²¹ Не отмета́ю благода́ти Бо́жия. А́ще бо зако́ном пра́вда, у́бо Христо́с ту́не у́мре.

Глава 3

¹ О, несмы́сленнии Гала́те, кто вы прельсти́л есть не покори́тися и́стине, и́мже пред очи́ма Иису́с Христо́с преднапи́сан бысть, в вас ра́спят?

² Сие́ еди́но хощу́ уве́дети от вас, от дел ли зако́на Ду́ха прия́сте, или́ от слу́ха ве́ры?

³ Та́ко ли несмы́сленни есте́? Наче́нше ду́хом, ны́не пло́тию скончава́ете?

⁴ Толи́ка пострада́сте ту́не, а́ще же и ту́не.

⁵ Подая́й у́бо вам Ду́ха и де́йствуяй си́лы в вас, от дел ли зако́на, или́ от слу́ха ве́ры?

⁶ Я́коже Авраа́м ве́рова Бо́гу, и вмени́ся ему́ в пра́вду.

⁷ Разуме́йте у́бо, я́ко су́щии от ве́ры, си́и суть сы́нове Авраа́мли.

⁸ Предуви́девше же Писа́ние, я́ко от ве́ры оправда́ет язы́ки Бог, пре́жде благовествова́ Авраа́му, я́ко благословя́тся о тебе́ вси язы́цы.

⁹ Те́мже су́щии от ве́ры, благословя́тся с ве́рным Авраа́мом.

¹⁰ Ели́цы бо от дел зако́на суть, под кля́твою суть. Пи́сано бо есть: про́клят всяк, и́же не пребу́дет во всех пи́санных в кни́зе зако́нней, я́ко твори́ти я́.

¹¹ А я́ко в зако́не никто́же оправда́ется от Бо́га, я́ве, я́ко пра́ведный от ве́ры жив бу́дет.

¹² Зако́н же несть от ве́ры, но сотвори́вый та челове́к жив бу́дет в них.

¹³ Христо́с ны искупи́л есть от кля́твы зако́нныя, быв по нас кля́тва. Пи́сано бо есть: про́клят всяк ви́сяй на дре́ве.

¹⁴ Да в язы́цех благослове́ние Авраа́мле бу́дет о Христе́ Иису́се да обетова́ние Ду́ха прии́мем ве́рою.

¹⁵ Бра́тие, [по челове́ку глаго́лю,] оба́че челове́ку предутвержде́нна заве́та никто́же отмета́ет или́ приповелева́ет.

¹⁶ Авраа́му же рече́ни бы́ша обе́ты, и се́мени его́. Не глаго́лет же: и се́менем, я́ко о мно́зех, но я́ко о еди́ном: и се́мени твоему́, и́же есть Христо́с.

¹⁷ Сие́ же глаго́лю, заве́та предутвержде́нна от Бо́га во Христа́, и́же по ле́тех четы́риста и три́десятих бы́вый зако́н не отмета́ет, во е́же разори́ти обетова́ние.

¹⁸ А́ще бо от зако́на насле́дие, не ктому́ уже́ от обетова́ния, Авраа́му же обетова́нием дарова́ Бог.

¹⁹ Что у́бо зако́н? Преступле́ния ра́ди приложи́ся, до́ндеже прии́дет се́мя, ему́же обетова́ся, вчине́н А́нгелы, руко́ю хода́тая.

²⁰ Хода́тай же еди́наго несть, Бог же еди́н есть.

²¹ Зако́н ли у́бо проти́ву обетова́нием Бо́жиим? Да не бу́дет. А́ще бо дан бысть зако́н моги́й оживи́ти, вои́стинну от зако́на бы была́ пра́вда.

²² Но затвори́ Писа́ние всех под грехо́м, да обетова́ние от ве́ры Иису́с Христо́вы да́стся ве́рующим.

²³ Пре́жде же прише́ствия ве́ры, под зако́ном стрего́ми бе́хом, затворе́ни в хотя́щую ве́ру откры́тися.

²⁴ Те́мже зако́н пе́стун нам бысть во Христа́, да от ве́ры оправди́мся.

²⁵ Прише́дши же ве́ре, уже́ не под пе́стуном есмы́.

²⁶ Вси бо вы сы́нове Бо́жии есте́ ве́рою о Христе́ Иису́се:

²⁷ Ели́цы бо во Христа́ крести́стеся, во Христа́ облеко́стеся.

²⁸ Несть иуде́й, ни е́ллин, несть раб, ни свобо́дь, несть му́жеский пол, ни же́нский, вси бо вы еди́но есте́ о Христе́ Иису́се.

²⁹ А́ще ли вы Христо́вы, у́бо Авраа́мле се́мя есте́, и по обетова́нию насле́дницы.

Глава 4

¹ Глаго́лю же: в нели́ко вре́мя насле́дник млад есть, ничи́мже лу́чший есть раба́, госпо́дь сый всех,

² Но под повели́тели и приста́вники есть да́же до наро́ка о́тча.

³ Та́кожде и мы, егда́ бе́хом мла́ди, под стихи́ами бе́хом міра порабоще́ни.

⁴ Егда́ же прии́де кончи́на ле́та, посла́ Бог Сы́на Своего́ Единоро́днаго, ражда́емаго от жены́, быва́ема под зако́ном,

⁵ Да подзако́нныя иску́пит, да всыновле́ние восприи́мем.

⁶ Да я́ко eсте́ сы́нове, посла́ Бог Ду́ха Сы́на Своего́ в сердца́ ва́ша, вопию́ща: А́вва, Oтче.

⁷ Те́мже уже́ не́си раб, но сын, а́ще ли же сын, и насле́дник Бо́жий Иису́с Христо́м.

⁸ Но тогда́ у́бо, не ве́дуще Бо́га служи́сте не по естеству́ су́щим бого́м.

⁹ Ны́не же, позна́вше Бо́га, па́че же позна́ни бы́вше от Бо́га, ка́ко возвраща́етеся па́ки на немощны́я и худы́я стихи́и, и́мже па́ки свы́ше ^[237] служи́ти хо́щете?

¹⁰ Дни смотря́ете, и ме́сяцы, и времена́, и ле́та.

¹¹ Бою́ся о вас, еда́ ка́ко всу́е труди́хся в вас.

¹² Бу́дите я́коже аз, зане́ и аз, я́коже вы, бра́тие, молю́ вы. Ничи́мже мене́ оби́десте.

¹³ Ве́сте же, я́ко за не́мощь пло́ти благовести́х вам пе́рвее.

¹⁴ И искуше́ния моего́, е́же во пло́ти мое́й, не уничижи́сте, ни оплева́сте, но я́коже А́нгела Бо́жия прия́сте мя, я́ко Христа́ Иису́са.

¹⁵ Ко́е у́бо бя́ше блаже́нство ва́ше, свиде́тельствую бо вам, я́ко а́ще бы бы́ло мо́щно, очеса́ ва́ша изверте́вше да́ли бы́сте ми.

¹⁶ Те́мже враг вам бых, и́стину вам глаго́ля?

¹⁷ Ревну́ют по вам не до́бре, но отлучи́ти вас хотя́т, да им ревну́ете.

¹⁸ Добро́ же, е́же ревнова́ти всегда́ в до́бром, и не то́чию внегда́ приходи́ти ми к вам.

¹⁹ Ча́дца моя́, и́миже па́ки боле́зную, до́ндеже вообрази́тся Христо́с в вас.

²⁰ Хоте́х же приити́ к вам ны́не и измени́ти глас мой, я́ко не домышля́юся о вас.

²¹ Глаго́лите ми, и́же под зако́ном хотя́щии бы́ти, зако́на ли не слу́шаете?

²² Пи́сано бо есть, я́ко Авраа́м два сы́на име́: еди́наго от рабы́, а друга́го от свобо́дныя.

²³ Но и́же от рабы́, по пло́ти роди́ся, а и́же от свобо́дныя, по обетова́нию.

²⁴ Я́же еста́ иносказа́ема, сия́ бо еста́ два заве́та: еди́н у́бо от горы́ Сина́йския, в рабо́ту ражда́яй, и́же есть Ага́рь.

²⁵ Ага́рь бо, Сина́ гора́ есть во Арави́и, прилага́ется же ны́нешнему Иерусали́му, рабо́тает же с ча́ды свои́ми.

²⁶ А вы́шний Иерусали́м свобо́дь есть, и́же есть ма́ти всем нам.

²⁷ Пи́сано бо есть: возвесели́ся, непло́ды, не ражда́ющая, расто́ргни и возопи́, неболя́щая, я́ко мно́га ча́да пусты́я па́че, не́жели иму́щия му́жа.

²⁸ Мы же, бра́тие, по Исаа́ку обетова́ния ча́да есмы́.

²⁹ Но я́коже тогда́ по пло́ти роди́выйся гоня́ше духо́внаго, та́ко и ны́не.

³⁰ Но что глаго́лет Писа́ние? Изжени́ рабу́ и сы́на ея́, не и́мать бо насле́довати сын рабы́нин с сы́ном свобо́дныя.

³¹ Те́мже, бра́тие, не́смы рабы́нина ча́да, но свобо́дныя.

Глава 5

¹ Свобо́дою у́бо, е́юже Христо́с нас свободи́, сто́йте, и не па́ки под и́гом рабо́ты держи́теся.

² Се аз Па́вел глаго́лю вам, я́ко а́ще обре́заетеся, Христо́с вас ничто́же по́льзует.

³ Свиде́тельствую же па́ки вся́кому челове́ку обре́зающемуся, я́ко до́лжен есть весь зако́н твори́ти.

⁴ Упраздни́стеся от Христа́, и́же зако́ном оправда́етеся, от благода́ти отпадо́сте.

⁵ Мы бо ду́хом от ве́ры упова́ния пра́вды ждем.

⁶ О Христе́ бо Иису́се ни обре́зание что мо́жет, ни необре́зание, но ве́ра любо́вию поспешеству́ема.

⁷ Теча́сте до́бре, кто вам возбрани́ не покаря́тися и́стине?

⁸ Препре́ние не от Призва́вшаго вы.

⁹ Мал квас все смеше́ние ква́сит.

¹⁰ Аз наде́юся о вас о Го́споде, я́ко ничто́же и́но разуме́ти бу́дете, смуща́яй же вас понесе́т грех, и́же а́ще есть.

¹¹ Аз же, бра́тие, а́ще обре́зание еще́ пропове́дую, почто́ еще́ гони́мь есмь? У́бо упраздни́ся собла́зн креста́.

¹² О, дабы́ отсе́чени бы́ли развраща́ющии вас.

¹³ Вы бо на свобо́ду зва́ни бы́сте, бра́тие, то́чию да не свобо́да ва́ша в вину́ пло́ти, но любо́вию рабо́тайте друг дру́гу.

¹⁴ И́бо весь зако́н в еди́ном словеси́ исполня́ется, во е́же возлю́биши бли́жняго твоего́ я́коже себе́.

¹⁵ А́ще же друг дру́га угрыза́ете и снеда́ете, блюди́теся, да не друг от дру́га истребле́ни бу́дете.

¹⁶ Глаго́лю же: ду́хом ходи́те, и по́хоти плотски́я не соверша́йте,

¹⁷ Плоть бо похотству́ет на ду́ха, дух же на плоть, сия́ же друг дру́гу проти́вятся, да не я́же хо́щете, сия́ творите́.

¹⁸ А́ще ли ду́хом води́ми есте́, не́сте под зако́ном.

¹⁹ Явле́на же суть дела́ плотска́я, я́же суть прелюбодея́ние, блуд, нечистота́, студодея́ние,

²⁰ Идолослуже́ние, чародея́ния, вражды́, рве́ния, зави́ды, я́рости, разжже́ния, ра́спри, собла́зны, е́реси,

²¹ За́висти, уби́йства, пия́нства, безчи́нны кли́чи и подо́бная сим, я́же предглаго́лю вам, и предреко́х, я́ко такова́я творя́щии Ца́рствия Бо́жия не насле́дят.

²² Плод же духо́вный есть любы́, ра́дость, мир, долготерпе́ние, бла́гость, милосе́рдие, ве́ра,

²³ Кро́тость, воздержа́ние: на таковы́х несть зако́на.

²⁴ А и́же Христо́вы суть, плоть распя́ша со страстьми́ и похотьми́.

²⁵ А́ще живе́м ду́хом, ду́хом и да хо́дим.

²⁶ Не быва́им тщесла́вни, друг дру́га раздража́юще, друг дру́гу зави́дяще.

Глава 6

¹ Бра́тие, а́ще и впаде́т челове́к в не́кое прегреше́ние, вы духо́внии исправля́йте такова́го ду́хом кро́тости: блюды́й себе́, да не и ты искуше́н бу́деши.

² Друг дру́га тяготы́ носи́те, и та́ко испо́лните зако́н Христо́в.

³ А́ще бо кто мнит себе́ бы́ти что, ничто́же сый, умо́м льстит себе́.

⁴ Де́ло же свое́ да искуша́ет ко́йждо, и тогда́ в себе́ то́чию хвале́ние да и́мать, а не во ино́м.

⁵ Ко́йждо бо свое́ бре́мя понесе́т.

⁶ Да обща́ется же учя́йся словеси́ уча́щему во всех благи́х.

⁷ Не льсти́теся, Бог поруга́емь не быва́ет. Е́же бо а́ще се́ет челове́к, то́жде и по́жнет.

⁸ Я́ко се́яй в плоть свою́, от пло́ти по́жнет истле́ние, а се́яй в дух, от ду́ха по́жнет живо́т ве́чный.

⁹ До́брое же творя́ще, да не стужа́ем си, во вре́мя бо свое́ по́жнем, не ослабе́юще.

¹⁰ Те́мже у́бо, до́ндеже вре́мя и́мамы, да де́лаим благо́е ко всем, па́че же к при́сным в ве́ре.

¹¹ Ви́дите коли́цеми кни́гами писа́х вам мое́ю руко́ю.

¹² Ели́цы хотя́т хвали́тися по пло́ти, си́и ну́дят вы обре́затися, то́чию да не Кресто́м Христо́вым го́нятся.

¹³ Ни бо обре́зающиися са́ми зако́н храня́т, но хотя́т вам обре́зоватися, да в ва́шей пло́ти похва́лятся.

¹⁴ Мне же да не бу́дет хвали́тися, то́кмо о Кресте́ Го́спода на́шего Иису́са Христа́, и́мже мне міръ распя́ся, и аз міру.

¹⁵ О Христе́ бо Иису́се ни обре́зание что мо́жет, ни необре́зание, но нова́ тварь.

¹⁶ И ели́цы пра́вилом сим жи́тельствуют, мир на них и ми́лость, и на Изра́или Бо́жии.

¹⁷ Про́чее, труды́ да никто́же ми дае́т: аз бо я́звы Го́спода Иису́са на те́ле мое́м ношу́.

¹⁸ Благода́ть Го́спода на́шего Иису́са Христа́ со ду́хом ва́шим, бра́тие. Ами́нь.

Посла́ние к Ефеся́нам

Глава 1

¹ Па́вел, посла́нник Иису́с Христо́в во́лею Бо́жиею, святы́м су́щим во Ефе́се и ве́рным о Христе́ Иису́се

² Благода́ть вам и мир от Бо́га Отца́ на́шего и Го́спода Иису́са Христа́.

³ Благослове́н Бог и Оте́ц Го́спода на́шего Иису́са Христа́, благослови́вый нас вся́цем благослове́нием духо́вным в небе́сных о Христе́.

⁴ Я́коже избра́ нас в Нем пре́жде сложе́ния міра, бы́ти нам святы́м и непоро́чным пред Ним в любви́.

⁵ Пре́жде наре́к нас во усыне́ние Иису́с Христо́м в Него́, по благоволе́нию хоте́ния Его́,

⁶ В похвалу́ сла́вы благода́ти Его́, в не́йже облагодати́ нас о Возлю́бленнем.

⁷ О Не́мже и́мамы избавле́ние Кро́вию Его́, и оставле́ние прегреше́ний, по бога́тству благода́ти Его́,

⁸ Ю́же преумно́жил есть в нас во вся́кой прему́дрости и ра́зуме,

⁹ Сказа́в нам та́йну во́ли Своея́ по благоволе́нию Его́, е́же пре́жде положи́ в Нем,

¹⁰ В смотре́ние исполне́ния време́н, возгла́вити вся́ческая о Христе́, я́же на небесе́х и я́же на земли́ в нем,

¹¹ В Не́мже и насле́дницы бы́хом, пре́жде нарече́ни бы́вше по прозре́нию Бо́жию вся Де́йствующаго по сове́ту во́ли Своея́,

¹² Я́ко бы́ти нам в похвале́ние сла́вы Его́, пре́жде упова́вшим во Христа́.

¹³ В Не́мже и вы, слы́шавше сло́во и́стины, благовествова́ние спасе́ния на́шего, в Не́мже и ве́ровавше зна́менастеся Ду́хом обетова́ния Святы́м,

¹⁴ И́же есть обруче́ние насле́дия на́шего, во избавле́ние снабде́ния, в похвалу́ сла́вы Его́.

¹⁵ Сего́ ра́ди и аз слы́шав ва́шу ве́ру о Христе́ Иису́се и любо́вь, я́же ко всем святы́м,

¹⁶ Не престаю́ благодаря́ о вас, помина́ние о вас творя́ в моли́твах мои́х,

¹⁷ Да Бог Го́спода на́шего Иису́са Христа́, Оте́ц сла́вы, даст вам Ду́ха прему́дрости и открове́ния, в позна́ние Его́,

¹⁸ Просвеще́нна очеса́ се́рдца ва́шего, я́ко уве́дети вам, ко́е есть упова́ние зва́ния Его́,

¹⁹ И ко́е бога́тство сла́вы достоя́ния Его́ во святы́х, и ко́е преспе́ющее вели́чество си́лы Его́ в нас ве́рующих по де́йству держа́вы кре́пости Его́,

²⁰ Ю́же соде́я о Христе́, воскреси́в Его́ от ме́ртвых и поса́ждь одесну́ю Себе́ на небе́сных,

²¹ Превы́ше вся́каго Нача́льства и Вла́сти и Си́лы и Госпо́дства, и вся́каго и́мене имену́емаго не то́чию в ве́це сем, но и во гряду́щем.

²² И вся покори́ под но́зе Его́, и Того́ даде́ главу́ вы́ше всех Це́ркви,

²³ Я́же есть Те́ло Его́, исполне́ние Исполня́ющаго вся́ческая во всех.

Глава 2

¹ И вас су́щих прегреше́ньми ме́ртвых и грехи́ ва́шими.

² В ни́хже иногда́ ходи́сте по ве́ку міра сего́, по кня́зю вла́сти возду́шныя, ду́ха, и́же ны́не де́йствует в сыне́х противле́ния.

³ В ни́хже и мы вси жи́хом иногда́ в по́хотех пло́ти на́шея, творя́ще во́лю пло́ти и помышле́ний, и бе́хом естество́м ча́да гне́ва, я́коже и про́чии.

⁴ Бог же, бога́т сый в ми́лости, за премно́гую любо́вь Свою́, е́юже возлюби́ нас,

⁵ И су́щих нас ме́ртвых прегреше́ньми, сооживи́ Христо́м, [благода́тию есте́ спасе́ни,]

⁶ И с Ним воскреси́, и спосади́ на небе́сных во Христе́ Иису́се

⁷ Да яви́т в ве́цех гряду́щих презе́льное бога́тство благода́ти Своея́ благосты́нею на нас о Христе́ Иису́се.

⁸ Благода́тию бо есте́ спасе́ни чрез ве́ру, [и сие́ не от вас, Бо́жий дар,]

⁹ Не от дел, да никто́же похва́лится.

¹⁰ Того́ бо есмы́ творе́ние, созда́ни во Христе́ Иису́се на дела́ блага́я, я́же пре́жде угото́ва Бог, да в них хо́дим.

¹¹ Те́мже помина́йте, я́ко вы, и́же иногда́ язы́цы во пло́ти, глаго́лемии необре́зание от реко́маго обре́зания во пло́ти, рукотворе́ннаго,

¹² Я́ко бе́сте во вре́мя о́но без Христа́, отчужде́ни жития́ Изра́илева и чу́жди от заве́т обетова́ния, упова́ния не иму́ще и безбо́жни в міре.

¹³ Ны́не же о Христе́ Иису́се, вы бы́вшии иногда́ дале́че, близ бы́сте Кро́вию Христо́вою.

¹⁴ То́й бо есть мир наш, сотвори́вый обоя́ еди́но, и средосте́ние огра́ды разори́вый, вражду́ Пло́тию Свое́ю,

¹⁵ Зако́н за́поведей уче́ньми упраздни́в, да о́ба сози́ждет Собо́ю во еди́наго но́ваго челове́ка, творя́ мир,

¹⁶ И примири́т обои́х во еди́ном те́ле Бо́гови кресто́м, уби́в вражду́ на нем.

¹⁷ И прише́д благовести́ мир вам, да́льним и бли́жним,

¹⁸ Зане́ Тем и́мамы приведе́ние о́бои во еди́ном Ду́се ко Отцу́.

¹⁹ Те́мже у́бо ктому́ не́сте стра́нни и прише́льцы, но сожи́теле святы́м и при́снии Бо́гу,

²⁰ Назда́ни бы́вше на основа́нии Апо́стол и проро́к, су́щу краеуго́льну Самому́ Иису́су Христу́,

²¹ О Не́мже вся́ко созда́ние составля́емо расте́т в це́рковь святу́ю о Го́споде,

²² О Не́мже и вы созида́етеся в жили́ще Бо́жие Ду́хом.

Глава 3

¹ Сего́ ра́ди аз Па́вел, ю́зник Иису́с Христо́в о вас язы́цех, похвалю́ся.

² А́ще у́бо ^[238] слы́шасте смотре́ние благода́ти Бо́жия да́нныя мне в вас,

³ Я́ко по открове́нию сказа́ ми ся та́йна, я́коже преднаписа́х вма́ле.

⁴ О не́мже ^[239] мо́жете чту́ще разуме́ти ра́зум мой в та́йне Христо́ве,

⁵ Я́же во ине́х ро́дех не сказа́ся сыно́м челове́ческим, я́коже ны́не откры́ся святы́м Его́ Апо́столом и проро́ком Ду́хом Святы́м,

⁶ Я́ко бы́ти язы́ком снасле́дником и стеле́сником и сприча́стником обетова́ния Его́ о Христе́ Иису́се благовествова́нием,

⁷ Ему́же бых служи́тель по да́ру благода́ти Бо́жия, да́нныя мне по де́йству си́лы Его́.

⁸ Мне ме́ньшему всех святы́х дана́ бысть благода́ть сия́, во язы́цех благовести́ти неизсле́дованное бога́тство Христо́во,

⁹ И просвети́ти всех, что есть смотре́ние та́йны сокрове́нныя от веко́в в Бо́зе, созда́вшем вся́ческая Иису́с Христо́м.

¹⁰ Да ска́жется ны́не нача́лом и власте́м на небе́сных Це́рковию многоразли́чная прему́дрость Бо́жия,

¹¹ По предложе́нию век, е́же сотвори́ о Христе́ Иису́се Го́споде на́шем,

¹² О Не́мже и́мамы дерзнове́ние и приведе́ние в наде́янии ве́рою Его́.

¹³ Те́мже молю́ вы не стужа́ти си в ско́рбех мои́х о вас, я́же есть сла́ва ва́ша.

¹⁴ Сего́ ра́ди преклоня́ю коле́на моя́ ко Отцу́ Го́спода на́шего Иису́са Христа́,

¹⁵ Из Него́же вся́ко оте́чество на небесе́х и на земли́ имену́ется,

¹⁶ Да даст вам по бога́тству сла́вы Своея́, си́лою утверди́тися Ду́хом Его́ во вну́треннем челове́це,

¹⁷ Всели́тися Христу́ ве́рою в сердца́ ва́ша: в любви́ вкорене́ни и основа́ни,

¹⁸ Да возмо́жете разуме́ти со все́ми святы́ми, что широта́, и долгота́, и глубина́, и высота́,

¹⁹ Разуме́ти же преспе́ющую ра́зум любо́вь Христо́ву, да испо́лнитеся во вся́ко исполне́ние Бо́жие.

²⁰ Могу́щему же па́че вся твори́ти по преизбы́точествию, и́хже про́сим или́ разуме́ем, по си́ле де́йствуемей в нас,

²¹ Тому́ сла́ва в Це́ркви о Христе́ Иису́се во вся ро́ды ве́ка веко́в. Ами́нь.

Глава 4

¹ Молю́ убо вас, аз ю́зник о Го́споде, досто́йно ходи́ти зва́ния, в не́же зва́ни бы́сте,

² Со вся́ким смиреному́дрием и кро́тостию, с долготерпе́нием, терпя́ще друг дру́гу любо́вию,

³ Тща́щеся блюсти́ едине́ние ду́ха в сою́зе ми́ра.

⁴ Еди́но те́ло, еди́н дух, я́коже и зва́ни бы́сте во еди́ном упова́нии зва́ния ва́шего.

⁵ Еди́н Госпо́дь, еди́на ве́ра, еди́но креще́ние,

⁶ Еди́н Бог и Оте́ц всех, И́же над все́ми и чрез всех и во всех нас.

⁷ Еди́ному же кому́ждо нас даде́ся благода́ть по ме́ре дарова́ния Христо́ва.

⁸ Те́мже глаго́лет: возше́д на высоту́, плени́л еси́ плен, и даде́ дая́ния челове́ком.

⁹ А е́же взы́де, что есть, то́чию я́ко и сни́де пре́жде в до́льнейшия страны́ земли́?

¹⁰ Сше́дый, Той есть и возше́дый превы́ше всех небе́с, да испо́лнит вся́ческая.

¹¹ И Той дал есть о́вы у́бо Апо́столы, о́вы же проро́ки, о́вы же Благове́стники, о́вы же па́стыри и учи́тели,

¹² К соверше́нию святы́х, в де́ло служе́ния, в созида́ние Те́ла Христо́ва,

¹³ До́ндеже дости́гнем вси во едине́ние ве́ры и позна́ния Сы́на Бо́жия, в му́жа соверше́нна, в ме́ру во́зраста исполне́ния Христо́ва.

¹⁴ Да не быва́ем ктому́ младе́нцы, вла́ющеся и скита́ющеся вся́ким ве́тром уче́ния, во лжи челове́честей, в кова́рстве ко́зней льще́ния.

¹⁵ И́стинствующе же в любви́, да возрасти́м в Него́ вся́ческая, И́же есть глава́ Христо́с,

¹⁶ Из Него́же все те́ло, составля́емо и счинева́емо прили́чне вся́цем осяза́нием подая́ния, по де́йству в ме́ре еди́ныя коея́ждо ча́сти, возраще́ние те́ла твори́т в созда́ние сама́го себе́ любо́вию.

¹⁷ Сие́ у́бо глаго́лю и послушеству́ю о Го́споде, ктому́ не ходи́ти вам, я́коже и про́чии язы́цы хо́дят в суете́ ума́ их,

¹⁸ Помраче́ни смы́слом, су́ще отчужде́ни от жи́зни Бо́жия, за неве́жество су́щее в них, за окамене́ние серде́ц их,

¹⁹ И́же в неча́яние вло́жшеся, преда́ша себе́ студодея́нию, в де́лание вся́кия нечистоты́ в лихоима́нии.

²⁰ Вы же не та́ко позна́сте Христа́.

²¹ А́ще у́бо ^[240] слы́шасте Его́ и о Нем научи́стеся, я́коже есть и́стина о Иису́се:

²² Отложи́ти вам, по пе́рвому житию́, ве́тхаго челове́ка, тле́ющаго в по́хотех преле́стных,

²³ Обновля́тися же ду́хом ума́ ва́шего,

²⁴ И облещи́ся в но́ваго челове́ка, созда́ннаго по Бо́гу в пра́вде и в преподо́бии и́стины.

²⁵ Те́мже отло́жше лжу, глаго́лите и́стину ки́йждо ко и́скреннему своему́, зане́ есмы́ друг дру́гу у́дове.

²⁶ Гне́вайтеся и не согреша́йте, со́лнце да не за́йдет в гне́ве ва́шем,

²⁷ Ниже́ дади́те ме́ста диа́волу.

²⁸ Крады́й ктому́ да не кра́дет, но па́че да тружда́ется, де́лая свои́ма рука́ма благо́е, да и́мать подая́ти тре́бующему.

²⁹ Вся́ко сло́во гни́ло да не исхо́дит из уст ва́ших, но то́чию е́же есть бла́го к созда́нию ве́ры, да даст благода́ть слы́шащим.

³⁰ И не оскорбля́йте Ду́ха Свята́го Бо́жия, о Не́мже зна́менастеся в день избавле́ния.

³¹ Вся́ка го́ресть, и гнев, и я́рость, и кличь, и хула́ да во́змется от вас, со вся́кою зло́бою.

³² Быва́йте же друг ко дру́гу бла́зи, милосе́рди, проща́юще друг дру́гу, я́коже и Бог во Христе́ прости́л есть вам.

Глава 5

¹ Быва́йте у́бо подража́тели Бо́гу, я́коже ча́да возлю́бленная,

² И ходи́те в любви́, я́коже и Христо́с возлюби́л есть нас, и предаде́ Себе́ за ны приноше́ние и же́ртву Бо́гу в воню́ благоуха́ния.

³ Блуд же и вся́ка нечистота́, и лихои́мство ниже́ да имену́ется в вас, я́коже подоба́ет святы́м,

⁴ И скверносло́вие, и буесло́вие, или́ кощу́ны, и я́же неподо́бная, но па́че благодаре́ние.

⁵ Сие́ бо да есте́ ве́дуще, я́ко всяк блудни́к, или́ нечи́ст, или́ лихои́мец, и́же есть идолослужи́тель, не и́мать достоя́ния в Ца́рствии Христа́ и Бо́га.

⁶ Никто́же вас да льстит су́етными словесы́, сих бо ра́ди гряде́т гнев Бо́жий на сы́ны непокори́выя.

⁷ Не быва́йте у́бо соприча́стницы сим.

⁸ Бе́сте бо иногда́ тма, ны́не же свет о Го́споде.

⁹ Я́коже ча́да све́та ходи́те, [плод бо Духо́вный eсть во вся́кой благосты́ни и пра́вде и и́стине,]

¹⁰ Искуша́юще, что eсть благоуго́дно Бо́гови.

¹¹ И не приoбща́йтеся к дело́м непло́дным тмы, па́че же и облича́йте.

¹² Быва́eмая бо о́тай от них, сра́мно eсть и глаго́лати.

¹³ Вся же облича́eмая, от све́та явля́ются: все бо явля́емое свет eсть.

¹⁴ Сего́ ра́ди глаго́лет: воста́ни, спяй, и воскресни́ от ме́ртвых, и освети́т тя Христо́с.

¹⁵ Блюди́те у́бо, ка́ко опа́сно хо́дите, не я́коже нему́дри, но я́коже прему́дри,

¹⁶ Искупу́юще вре́мя, я́ко дни́е лука́ви суть.

¹⁷ Сего́ ра́ди не быва́йте несмы́сленни, но разумева́юще, что eсть во́ля Бо́жия.

¹⁸ И не упива́йтеся вино́м, в не́мже eсть блуд, но па́че исполня́йтеся Ду́хом,

¹⁹ Глаго́люще себе́ во псалме́х и пе́ниих, и пе́снех духо́вных, воспева́юще и пою́ще в сердца́х ва́ших Го́сподеви.

²⁰ Благодаря́ще всегда́ о всех, о и́мени Го́спода на́шего Иису́са Христа́ Бо́гу и Отцу́,

²¹ Повину́ющеся друг дру́гу в стра́се Бо́жии.

²² Жены́, свои́м му́жем повину́йтеся, я́коже Го́споду,

²³ Зане́ муж глава́ есть жены́, я́коже и Христо́с глава́ Це́ркве, и Той есть Спаси́тель те́ла.

²⁴ Но я́коже Це́рковь повину́ется Христу́, та́кожде и жены́ свои́м муже́м во всем.

²⁵ Му́жие, люби́те своя́ жены́, я́коже и Христо́с возлюби́ Це́рковь, и Себе́ предаде́ за ню,

²⁶ Да освяти́т ю́, очи́стив ба́нею водно́ю в глаго́ле.

²⁷ Да предста́вит ю́ Себе́ сла́вну Це́рковь, не иму́щу скве́рны, или́ поро́ка, или́ не́что от таковы́х, но да есть свята́ и непоро́чна.

²⁸ Та́ко до́лжни суть му́жие люби́ти своя́ жены́, я́ко своя́ телеса́: любя́й бо свою́ жену́, себе́ сама́го лю́бит.

²⁹ Никто́же бо когда́ свою́ плоть возненави́де, но пита́ет и гре́ет ю́, я́коже и Госпо́дь Це́рковь.

³⁰ Зане́ у́ди есмы́ те́ла Его́, от пло́ти Его́, и от косте́й Его́.

³¹ Сего́ ра́ди оста́вит челове́к отца́ своего́ и ма́терь, и прилепи́тся к жене́ свое́й, и бу́дета два в плоть еди́ну.

³² Та́йна сия́ вели́ка есть, аз же глаго́лю во Христа́ и во Це́рковь.

³³ Оба́че и вы по еди́ному, ки́йждо свою́ жену́ си́це да лю́бит, я́коже и себе́, а жена́ да бои́тся своего́ му́жа.

Глава 6

¹ Ча́да, послу́шайте свои́х роди́телей о Го́споде, сие́ бо есть пра́ведно.

² Чти отца́ твоего́ и ма́терь, [я́же есть за́поведь пе́рвая во обетова́нии,]

³ Да бла́го ти бу́дет, и бу́деши долголе́тен на земли́.

⁴ И отцы́, не раздража́йте чад свои́х, но воспитова́йте их в наказа́нии и уче́нии Госпо́дни.

⁵ Раби́, послу́шайте госпо́дий свои́х по пло́ти со стра́хом и тре́петом, в простоте́ се́рдца ва́шего, я́коже и Христа́,

⁶ Не пред очи́ма то́чию рабо́тающе я́ко человекоуго́дницы, но я́коже раби́ Христо́вы, творя́ще во́лю Бо́жию от души́,

⁷ Со благоразу́мием служа́ще я́коже Го́споду, а не я́ко челове́ком,

⁸ Ве́дяще, я́ко ко́ждо, е́же а́ще сотвори́т благо́е, сие́ прии́мет от Го́спода, а́ще раб, а́ще свобо́дь.

⁹ И госпо́дие, та́яжде твори́те к ним, послабля́юще им преще́ния, ве́дуще, я́ко и вам саме́м и тем Госпо́дь есть на небесе́х, и обинове́ния лица́ несть у Него́.

¹⁰ Про́чее же, бра́тие моя́, возмога́йте о Го́споде и в держа́ве кре́пости Его́.

¹¹ Облецы́теся во вся ору́жия Бо́жия, я́ко возмощи́ вам ста́ти проти́ву ко́знем диа́вольским.

¹² Я́ко несть на́ша брань к ^[241] кро́ви и пло́ти, но к нача́лом и ко власте́м и к міродержи́телем тмы ве́ка сего́, к духово́м зло́бы поднебе́сным.

¹³ Сего́ ра́ди приими́те вся ору́жия Бо́жия, да возмо́жете проти́витися в день лют и вся соде́явше ста́ти.

¹⁴ Ста́ните у́бо препоя́сани чресла́ ва́ша и́стиною, и обо́лкшеся в броня́ пра́вды,

¹⁵ И обу́вше но́зе во угото́вание благовествова́ния ми́ра,

¹⁶ Над все́ми же восприи́мше щит ве́ры, в не́мже возмо́жете вся стре́лы лука́ваго разжже́нныя угаси́ти.

¹⁷ И шлем спасе́ния восприими́те, и мечь духо́вный, и́же есть глаго́л Бо́жий.

¹⁸ Вся́кою моли́твою и моле́нием моля́щеся на вся́ко вре́мя ду́хом, и в сие́ и́стое бдя́ще во вся́ком терпе́нии и моли́тве о всех святы́х,

¹⁹ И о мне, да да́стся ми сло́во во отверзе́ние уст мои́х, с дерзнове́нием сказа́ти та́йну благовествова́ния,

²⁰ О не́мже посо́льствую во у́зах, да в нем дерза́ю, я́коже подоба́ет ми глаго́лати.

²¹ Да уве́сте же и вы, я́же о мне, что де́лаю, вся ска́жет вам Тихи́к, возлю́бленный брат и ве́рен служи́тель о Го́споде,

²² Его́же посла́х к вам на сие́ и́стое, да уве́сте, я́же о нас, и да уте́шит сердца́ ва́ша.

²³ Мир бра́тии и любо́вь с ве́рою от Бо́га Отца́ и Го́спода Иису́са Христа́.

²⁴ Благода́ть со все́ми лю́бящими Го́спода на́шего Иису́са Христа́ в неистле́нии. Ами́нь.

Посла́ние к Филиппи́йцам

Глава 1

¹ Па́вел и Тимофе́й, раби́ Иису́с Христо́вы, всем святы́м о Христе́ Иису́се су́щим в Фили́ппех, с епи́скопы и диа́коны,

² Благода́ть вам и мир от Бо́га Отца́ на́шего и Го́спода Иису́са Христа́.

³ Благодарю́ Бо́га моего́ о всей па́мяти ва́шей,

⁴ Всегда́ во вся́кой моли́тве мое́й за всех вас с ра́достию моли́тву мою́ творя́,

⁵ О обще́нии ва́шем в благовествова́ние от пе́рваго дне да́же и доны́не,

⁶ Наде́явся на сие́ и́стое, я́ко начны́й де́ло бла́го в вас соверши́т е́ да́же до дне Иису́с Христо́ва.

⁷ Я́коже есть пра́ведно мне сие́ му́дрствовати о всех вас, за е́же име́ти ми в се́рдце вас, во у́зах мои́х и во отве́те и извеще́нии благове́стия, соо́бщников ми благода́ти всех вас су́щих.

⁸ Свиде́тель бо ми есть Бог, я́ко люблю́ всех вас по ми́лости Иису́с Христо́ве. ^[242]

⁹ И о сем молю́ся, да любо́вь ва́ша еще́ па́че и па́че избы́точествует в ра́зуме и во вся́ком чу́вствии.

¹⁰ Во е́же искуша́ти вам лу́чшая, да бу́дете чи́сти и непреткнове́нни в день Христо́в,

¹¹ Испо́лнени плодо́в пра́вды Иису́с Христо́м, в сла́ву и похвалу́ Бо́жию.

¹² Разуме́ти же хощу́ вам, бра́тие, я́ко я́же о мне па́че во успе́х благовествова́ния приидо́ша.

¹³ Я́ко у́зам мои́м явле́нным о Христе́ бы́вшим во всем суди́щи и в про́чих всех.

¹⁴ И мно́жайшии бра́тиям о Го́споде, наде́явшимся о у́зах мои́х, па́че дерза́ти без стра́ха сло́во Бо́жие глаго́лати.

¹⁵ Не́цыи у́бо по за́висти и ре́вности, друзи́и же и за благоволе́ние Христа́ пропове́дают.

¹⁶ О́ви у́бо от рве́ния Христа́ возвеща́ют нечи́сте, мня́ще печа́ль нанести́ у́зам мои́м,

¹⁷ О́ви же от любве́, ве́дяще, я́ко во отве́те благовествова́ния лежу́. ^[243]

¹⁸ Что у́бо? Оба́че вся́цем о́бразом, а́ще вино́ю, ^[244] а́ще и́стиною Христо́с пропове́даемь есть, и о сем ра́дуюся, но и возра́дуюся.

¹⁹ Вем бо, я́ко сие́ сбу́дется ми во спасе́ние ва́шею моли́твою и подая́нием Ду́ха Иису́с Христо́ва,

²⁰ По ча́янию и упова́нию моему́, я́ко ни о еди́ном же постыжу́ся, но во вся́ком дерзнове́нии, я́коже всегда́, и ны́не возвели́чится Христо́с в те́ле мое́м, а́ще живото́м, а́ще ли сме́ртию.

²¹ Мне бо е́же жи́ти, Христо́с, и е́же умре́ти, приобре́тение есть.

²² А́ще ли е́же жи́ти ми те́лом, сие́ мне плод дела́, и что изво́лю, не вем.

²³ Обдержи́мь же есмь от обою́, жела́ние имы́й разреши́тися и со Христо́м бы́ти, мно́го па́че лу́чше,

²⁴ А е́же пребыва́ти во пло́ти, ну́жднейше есть вас ра́ди.

²⁵ И сие́ изве́стне вем, я́ко бу́ду и спребу́ду вам всем в ваш успе́х и ра́дость ве́ры.

²⁶ Я́ко да похвала́ ва́ша избы́точествует о Христе́ Иису́се во мне, мои́м прише́ствием па́ки к вам.

²⁷ То́чию досто́йне благовествова́нию Христо́ву жи́тельствуйте, да а́ще прише́д и ви́дев вас, а́ще и не сый у вас, услы́шу я́же о вас, я́ко и́стиною стоите́ во еди́ном ду́се и единоду́шне сподвиза́ющеся по ве́ре Благовествова́ния во́лею,

²⁸ И не коле́блющеся ни о еди́ном же от сопроти́вных, е́же тем у́бо есть явле́ние поги́бели, вам же спасе́ния, и сие́ от Бо́га.

²⁹ Я́ко вам дарова́ся, е́же о Христе́, не то́кмо е́же в Него́ ве́ровати, но и е́же по Нем страда́ти,

³⁰ То́йже по́двиг иму́ще, яко́в же во мне ви́десте и ны́не слы́шите о мне.

Глава 2

¹ А́ще у́бо ко́е утеше́ние о Христе́, или́ а́ще ка́я уте́ха любве́, а́ще ко́е обще́ние ду́ха, а́ще ко́е милосе́рдие и щедро́ты,

² Испо́лните мою́ ра́дость, да то́жде му́дрствуете, ту́же любо́вь иму́ще, единоду́шни, единому́дренни,

³ Ничто́же по рве́нию или́ тщесла́вию, но смиреному́дрием друг дру́га че́стию бо́льша себе́ творя́ще.

⁴ Не свои́х си ки́йждо, но и дру́жних ки́йждо смотря́йте.

⁵ Сие́ бо да му́дрствуется в вас, е́же и во Христе́ Иису́се,

⁶ И́же во о́бразе Бо́жии сый, не восхище́нием непщева́ бы́ти ра́вен Бо́гу.

⁷ Но Себе́ ума́лил, ^[245] зрак раба́ прии́м, в подо́бии челове́честем быв, и о́бразом обре́теся я́коже челове́к.

⁸ Смири́л Себе́, послушли́в быв да́же до сме́рти, сме́рти же кре́стныя.

⁹ Те́мже и Бог Его́ превознесе́ и дарова́ Ему́ и́мя, е́же па́че вся́каго и́мене,

¹⁰ Да о и́мени Иису́сове вся́ко коле́но поклони́тся небе́сных и земны́х и преиспо́дних,

¹¹ И всяк язы́к испове́сть, я́ко Госпо́дь Иису́с Христо́с в сла́ву Бо́га Отца́.

¹² Те́мже, возлю́бленнии мои́, я́коже всегда́ послу́шасте мене́, не я́коже в прише́ствии мое́м то́чию, но ны́не мно́го па́че во отше́ствии мое́м, со стра́хом и тре́петом свое́ спасе́ние содева́йте.

¹³ Бог бо есть де́йствуяй в вас и е́же хоте́ти и е́же де́яти о благоволе́нии.

¹⁴ Вся твори́те без ропта́ния и размышле́ния,

¹⁵ Да бу́дете непоро́чни и це́ли, ча́да Бо́жия непоро́чна посреде́ ро́да стропти́ва и развраще́на, в ни́хже явля́етеся я́коже свети́ла в міре,

¹⁶ Сло́во живо́тно предержа́ще, в похвалу́ мне в день Христо́в. Я́ко не вотще́ теко́х, ни вотще́ труди́хся.

¹⁷ Но а́ще и жрен быва́ю о же́ртве и слу́жбе ве́ры ва́шея, ра́дуюся и сра́дуюся всем вам.

¹⁸ Та́кожде и вы ра́дуйтеся и сра́дуйте ми ся.

¹⁹ Упова́ю же о Го́споде Иису́се Тимофе́а вско́ре посла́ти к вам, да и аз благоду́шствую, уве́дев я́же о вас.

²⁰ Ни еди́наго бо и́мам равноду́шна, и́же при́снее о вас попече́тся,

²¹ Вси бо свои́х си и́щут, а не я́же Христа́ Иису́са.

²² Иску́сство же его́ зна́ете, зане́ я́коже отцу́ ча́до, со мно́ю порабо́тал в благове́стии.

²³ Сего́ же у́бо упова́ю посла́ти а́бие, по внегда́ уве́м я́же о мне.

²⁴ Наде́юся же о Го́споде, я́ко и сам ско́ро прииду́ к вам.

²⁵ Потре́бнее же возмне́х Епафроди́та бра́таи споспе́шника и сво́инника моего́, ва́шего же посла́нника и служи́теля потре́бе мое́й, посла́ти к вам.

²⁶ Поне́же жела́нием жела́ше ви́дети всех вас, и тужа́ше, зане́ слы́шасте, я́ко боле́.

²⁷ И́бо боле́ близ сме́рти, но Бог поми́лова его́, не его́ же то́кмо, но и мене́, да не скорбь на скорбь прииму́.

²⁸ Скоре́е у́бо посла́х его́, да ви́девше его́ па́ки, возра́дуетеся, и аз безпеча́лен пребу́ду.

²⁹ Приими́те у́бо его́ о Го́споде со вся́кою ра́достию, и таковы́я че́стны име́йте,

³⁰ Зане́ за де́ло Христо́во да́же до сме́рти прибли́жися, пону́див себе́ вседу́шно, ^[246] да испо́лнит ва́ше лише́ние, е́же к мое́й слу́жбе.

Глава 3

¹ Про́чее же, бра́тие моя́, ра́дуйтеся о Го́споде. Та́яжде бо писа́ти вам, мне у́бо неле́ностно, вам же тве́рдо.

² Блюди́теся от псов, блюди́теся от злых де́лателей, блюди́теся от сече́ния неве́рных.

³ Мы бо есмы́ обре́зание, и́же ду́хом Бо́гу слу́жим и хва́лимся о Христе́ Иису́се, а не в пло́ти наде́емся.

⁴ И́бо и аз име́ю наде́яние во пло́ти. А́ще кто ин мнит наде́ятися во пло́ти, аз па́че.

⁵ Обре́зан осмодне́вно, от ро́да Изра́илева, коле́на Вениами́нова, евре́ин от евре́й, по зако́ну фарисе́й.

⁶ По ре́вности гони́х Це́рковь Бо́жию, по пра́вде зако́нней быв непоро́чен.

⁷ Но я́же ми бя́ху приобре́тения, сия́ вмени́х Христа́ ра́ди тщету́.

⁸ Но у́бо вменя́ю вся тщету́ бы́ти за превосходя́щее ра́зума Христа́ Иису́са Го́спода моего́, Его́же ра́ди всех отщети́хся, и вменя́ю вся уме́ты бы́ти, да Христа́ приобря́щу.

⁹ И обря́щуся в Нем, не имы́й моея́ пра́вды, я́же от зако́на, но я́же ве́рою Иису́с Христо́вою, су́щею от Бо́га пра́вду в ве́ре,

¹⁰ Я́ко ^[247] разуме́ти Его́, и си́лу воскресе́ния Его́, и сообще́ние страсте́й Его́, сообразу́яся сме́рти Его́,

¹¹ А́ще ка́ко дости́гну в воскресе́ние ме́ртвых.

¹² Не зане́ уже́ достиго́х, или́ уже́ соверши́хся, гоню́ же, а́ще и пости́гну, о не́мже и постиже́н бых от Христа́ Иису́са.

¹³ Бра́тие, аз себе́ не у помышля́ю дости́гша, еди́но же, за́дняя у́бо забыва́я, в пре́дняя же простира́яся,

¹⁴ Со усе́рдием гоню́, ^[248] к по́чести вы́шняго зва́ния Бо́жия о Христе́ Иису́се.

¹⁵ Ели́цы у́бо соверше́нни, сие́ да му́дрствуим, и е́же а́ще и́но что мы́слите, и сие́ Бог вам откры́ет.

¹⁶ Оба́че в не́же достиго́хом, то́же му́дрствовати и те́мже пра́вилом жи́тельствовати.

¹⁷ Подо́бни ми быва́йте, бра́тие, и смотря́йте та́ко ходя́щия, я́коже и́мате о́браз нас.

¹⁸ Мно́зи бо хо́дят, и́хже мно́гажды глаго́лах вам, ны́не же и пла́чя глаго́лю, враги́ креста́ Христо́ва,

¹⁹ И́мже кончи́на поги́бель, и́мже бог чре́во, и сла́ва в студе́ их, и́же земна́я му́дрствуют.

²⁰ На́ше бо житие́ на небесе́х есть, отону́дуже и Спаси́теля ждем, Го́спода на́шего Иису́са Христа́,

²¹ И́же преобрази́т те́ло смире́ния на́шего, я́ко бы́ти сему́ сообра́зну те́лу сла́вы Его́, по де́йству е́же возмога́ти Ему́ и покори́ти Себе́ вся́ческая.

Глава 4

¹ Те́мже, бра́тие моя́ возлю́бленная и вожделе́нная, ра́досте и ве́нче мой, та́ко сто́йте о Го́споде, возлю́бленнии.

² Ево́дию молю́ и Синти́хию молю́ то́жде му́дрствовати о Го́споде.

³ Ей, молю́ и тебе́, супру́жниче при́сный, споспе́шствуй им, я́же во благовествова́нии сподвиза́шася со мно́ю и с Кли́ментом и с про́чими споспе́шники мои́ми, и́хже имена́ в кни́гах живо́тных.

⁴ Ра́дуйтеся всегда́ о Го́споде, и па́ки реку́, ра́дуйтеся.

⁵ Кро́тость ва́ша разу́мна да бу́дет всем челове́ком. Госпо́дь близ.

⁶ Ни о че́мже пецы́теся, но во всем моли́твою и моле́нием со благодаре́нием проше́ния ва́ша да сказу́ются к Бо́гу.

⁷ И ми́р Бо́жий, превосходя́й всяк ум, да соблюде́т сердца́ ва́ша и разуме́ния ва́ша о Христе́ Иису́се.

⁸ Про́чее же, бра́тие моя́, ели́ка суть и́стинна, ели́ка че́стна, ели́ка пра́ведна, ели́ка пречи́ста, ели́ка прелюбе́зна, ели́ка доброхва́льна, а́ще ка́я доброде́тель, и а́ще ка́я похвала́, сия́ помышля́йте.

⁹ И́мже и научи́стеся, и прия́сте, и слы́шасте, и ви́десте во мне, сия́ твори́те, и Бог ми́ра бу́дет с ва́ми.

¹⁰ Возра́довахся же о Го́споде вельми́, я́ко уже́ когда́ воспомяну́сте пещи́ся о мне, поне́же и печа́стеся, но непого́дным ^[249] вре́менем обдержа́стеся.

¹¹ Не я́ко по ску́дости глаго́лю, аз бо навыко́х, в ни́хже есмь, дово́лен бы́ти.

¹² Вем и смири́тися, вем и избы́точествовати, во всем и во всех навыко́х, и насыща́тися и алка́ти, и избы́точествовати и лиша́тися.

¹³ Вся могу́ о укрепля́ющем мя Иису́се Христе́.

¹⁴ Оба́че до́бре сотвори́сте, сприобщи́вшеся печа́ли мое́й.

¹⁵ Ве́сте же и вы, Филипписи́ане, я́ко в нача́ле благовествова́ния, егда́ изыдо́х от Македо́нии, ни еди́на ми це́рковь общева́ся в сло́во дая́ния и прия́тия, то́чию вы еди́ни.

¹⁶ Я́ко и в Солу́нь и еди́ною и два́щи в тре́бование мое́ посла́сте ми.

¹⁷ Не я́ко ищу́ дая́ния, но ищу́ плода́ мно́жащагося в сло́во ва́ше. ^[250]

¹⁸ Прия́х же вся и избы́точествую: испо́лнихся, прие́м от Епафроди́та по́сланная от вас, воню́ благоуха́ния, же́ртву прия́тну, благоуго́дну Бо́гу.

¹⁹ Бог же мой да испо́лнит вся́кое тре́бование ва́ше по бога́тству Своему́ в сла́ве, о Христе́ Го́споде.

²⁰ Бо́гу же и Отцу́ на́шему сла́ва во ве́ки веко́в. Ами́нь.

²¹ Целу́йте вся́каго свя́та о Христе́ Иису́се.

²² Целу́ют вы су́щая со мно́ю бра́тия. Целу́ют вы святи́и вси, па́че же и́же от ке́сарева до́му.

²³ Благода́ть Го́спода на́шего Иису́са Христа́ со все́ми ва́ми. Ами́нь.

Посла́ние к Колосся́нам

Глава 1

¹ Па́вел, Апо́стол Иису́с Христо́в во́лею Бо́жиею, и Тимофе́й брат,

² Су́щим в Колосса́ех святы́м и ве́рным бра́тиям о Христе́ Иису́се.

³ Благода́ть вам и мир от Бо́га Отца́ на́шего, и Го́спода Иису́са Христа́. Благодари́м Бо́га и Отца́ Го́спода на́шего Иису́са Христа́, всегда́ о вас моля́щеся,

⁴ Слы́шавше ве́ру ва́шу, я́же о Христе́ Иису́се и любо́вь, ю́же и́мате ко всем святы́м,

⁵ За упова́ние отложе́нное вам на небесе́х, е́же пре́жде слы́шасте в словеси́ и́стины благовествова́ния,

⁶ Су́щаго в вас, я́коже и во всем міре: и есть плодоно́сно и расти́мо, я́коже и в вас, от него́же дне слы́шасте и разуме́сте благода́ть Бо́жию во и́стине.

⁷ Я́коже и уве́десте от Епафра́са, возлю́бленнаго срабо́тника на́шего,

⁸ И́же есть ве́рен о вас служи́тель Христо́в, и́же и яви́ нам ва́шу любо́вь в ду́се.

⁹ Сего́ ра́ди и мы, от него́же дне слы́шахом, не престае́м о вас моля́щеся и прося́ще, да испо́лнитеся в ра́зуме во́ли Его́, во вся́кой прему́дрости и ра́зуме духо́внем,

¹⁰ Я́ко ходи́ти вам досто́йне Бо́гу во вся́ком угожде́нии и вся́ком де́ле бла́зе, плодонося́ще и возраста́юще в ра́зуме Бо́жии,

¹¹ Вся́кою си́лою возмога́юще по держа́ве сла́вы Его́, во вся́ком терпе́нии и долготерпе́нии с ра́достию.

¹² Благодаря́ще Бо́га и Отца́, призва́вшаго вас в прича́стие насле́дия святы́х во све́те.

¹³ И́же изба́ви нас от вла́сти те́мныя и преста́ви в Ца́рство Сы́на любве́ Своея́,

¹⁴ О Не́мже и́мамы избавле́ние Кро́вию Его́ и оставле́ние грехо́в.

¹⁵ И́же есть о́браз Бо́га неви́димаго, перворожде́н всея́ тва́ри.

¹⁶ Я́ко о Нем создана́ бы́ша вся́ческая, я́же на небеси́, и я́же на земли́, ви́димая и неви́димая, а́ще престо́ли, а́ще госпо́дствия, а́ще нача́ла, а́ще вла́сти, вся́ческая Тем и о Нем созда́шася.

¹⁷ И Той есть пре́жде всех, и вся́ческая в Нем состоя́тся.

¹⁸ И Той есть глава́ те́лу Це́ркве, И́же есть нача́ток, перворожде́н из ме́ртвых, я́ко да бу́дет во всех Той пе́рвенствуя.

¹⁹ Я́ко в Нем благоизво́ли всему́ исполне́нию всели́тися.

²⁰ И Тем примири́ти вся́ческая к Себе́, умиротвори́в Кро́вию креста́ Его́, чрез Него́, а́ще земна́я, а́ще ли небе́сная.

²¹ И вас, иногда́ су́щих очужде́нных и враго́в помышле́ньми в де́лех лука́вых,

²² Ны́не же примири́ в те́ле Пло́ти Его́ сме́ртию Его́, предста́вити вас свя́ты и непоро́чны и непови́нны пред Собо́ю.

²³ А́ще у́бо пребыва́ете в ве́ре основа́ни и тве́рди, и неподви́жими от упова́ния благовествова́ния, е́же слы́шасте, пропове́данное всей тва́ри поднебе́сней, ему́же бых аз Па́вел служи́тель.

²⁴ Ны́не ра́дуюся во страда́ниих мои́х о вас, я́ко исполня́ю лише́ние скорбе́й Христо́вых во пло́ти мое́й за Те́ло Его́, е́же есть Це́рковь.

²⁵ Е́йже бых аз служи́тель по смотре́нию Бо́жию, да́нному мне в вас, испо́лнити сло́во Бо́жие,

²⁶ Та́йну сокрове́нную от век и от родо́в, ны́не же яви́ся святы́м Его́.

²⁷ И́мже восхоте́ Бог сказа́ти, ко́е бога́тство сла́вы та́йны сея́ во язы́цех, и́же есть Христо́с в вас, упова́ние сла́вы,

²⁸ Его́же мы пропове́дуем, наказу́юще вся́каго челове́ка и уча́ще вся́кой прему́дрости, да предста́вим вся́каго челове́ка соверше́нна о Христе́ Иису́се,

²⁹ В Не́мже и тружда́юся и подвиза́юся по де́йству Его́ де́йствуемому во мне си́лою.

Глава 2

¹ Хощу́ у́бо вас ве́дети, коли́к по́двиг и́мам о вас и о су́щих в Лаодики́и и во Иерапо́ли, и ели́цы не ви́деша ли́ца моего́ во пло́ти,

² Да уте́шатся сердца́ их, сне́мшихся в любви́ и во вся́ком бога́тстве извеще́ния ра́зума, в позна́ние та́йны Бо́га и Отца́ и Христа́,

³ В Не́мже суть вся сокро́вища прему́дрости и ра́зума сокрове́нна.

⁴ Сие́ же глаго́лю, да никто́же вас прельсти́т в словопре́нии.

⁵ А́ще бо и пло́тию отстою́, но ду́хом с ва́ми есмь, ра́дуяся и ви́дя ваш чин и утвержде́ние ва́шея ве́ры, я́же во Христа́.

⁶ Я́коже у́бо прия́сте Христа́ Иису́са Го́спода, та́коже в Нем ходи́те,

⁷ Укорене́ни и назда́ни в Нем и изве́ствовани ве́рою, я́коже научи́стеся, избы́точествующе в ней благодаре́нием.

⁸ [Бра́тие,] блюди́теся, да никто́же вас бу́дет прельща́я филосо́фиею и тще́тною ле́стию, по преда́нию челове́ческому, по стихи́ам міра, а не по Христе́.

⁹ Я́ко в том живе́т вся́ко исполне́ние Божества́ теле́сне.

¹⁰ И да бу́дете в Нем испо́лнени, и́же есть глава́ вся́кому нача́лу и вла́сти;

¹¹ О Не́мже и обре́зани бы́сте обре́занием нерукотворе́нным, в совлече́нии те́ла грехо́внаго пло́ти, во обре́зании Христо́ве,

¹² Спогре́бшеся Ему́ креще́нием; о Не́мже и совоста́сте ве́рою, де́йством Бо́га, воскреси́вшаго Его́ из ме́ртвых.

¹³ И вас, ме́ртвых су́щих в прегреше́ниих и в необре́зании пло́ти ва́шея, сооживи́л есть со Христо́м, дарова́в нам вся прегреше́ния,

¹⁴ Истреби́в е́же на нас рукописа́ние уче́ньми, е́же бе сопроти́вно нам, и то взят от среды́, пригвозди́в е́ на Кресте́,

¹⁵ Совле́к нача́ла и вла́сти, изведе́ в позо́р дерзнове́нием, изобличи́в их в Себе́. ^[251]

¹⁶ Да никто́же у́бо вас осужда́ет о яде́нии, или́ о питии́, или́ о ча́сти пра́здника, или́ о новоме́сячиих, или́ о суббо́тах,

¹⁷ Я́же суть стень гряду́щих, те́ло же Христо́во.

¹⁸ Никто́же вас да прельща́ет изволе́нным ему́ смиреному́дрием и слу́жбою А́нгельскою, я́же не уве́де учя́, без ума́ ^[252] дмя́ся от ума́ пло́ти своея́,

¹⁹ И не держя́ главы́, из нея́же все те́ло, соста́вы и соу́зы подае́мо и сне́млемо, расти́т возраще́ние Бо́жие.

²⁰ А́ще у́бо умро́сте со Христо́м от стихи́й міра, почто́ а́ки живу́ще в міре стяза́етеся?

²¹ Не косни́ся, ниже́ вкуси́, ни осяжи́;

²² Я́же суть вся во истле́ние употребле́нием, по за́поведем и уче́нием челове́ческим;

²³ Я́же суть сло́во у́бо иму́ще прему́дрости в самово́льней слу́жбе, и смиреному́дрии и непощаде́нии те́ла, не в че́сти ко́ей к сы́тости пло́ти.

Глава 3

¹ А́ще у́бо воскресну́сте со Христо́м, вы́шних ищи́те, иде́же есть Христо́с одесну́ю Бо́га седя́;

² Го́рняя му́дрствуйте, а не земна́я.

³ Умро́сте бо, и живо́т ваш сокрове́н есть со Христо́м в Бо́зе.

⁴ Егда́ же Христо́с яви́тся, живо́т ваш, тогда́ и вы с Ним явите́ся в сла́ве.

⁵ Умертви́те у́бо у́ды ва́ша, я́же на земли́, блуд, нечистоту́, страсть, по́хоть злу́ю, и лихоима́ние, е́же есть идолослуже́ние.

⁶ И́хже ра́ди гряде́т гнев Бо́жий на сы́ны противле́ния.

⁷ В ни́хже и вы иногда́ ходи́сте, егда́ живя́сте в них.

⁸ Ны́не же отложи́те и вы та вся: гнев, я́рость, зло́бу, хуле́ние, срамосло́вие от уст ва́ших.

⁹ Не лжи́те друг на дру́га, совле́кшеся ве́тхаго челове́ка с дея́ньми его́.

¹⁰ И обле́кшеся в но́ваго, обновля́емаго в ра́зум, по о́бразу созда́вшаго его́.

¹¹ Иде́же несть е́ллин, ни иуде́й, обре́зание, и необре́зание, ва́рвар и скиф, раб и свобо́дь, но вся́ческая и во всех Христо́с.

¹² Облецы́теся у́бо, [я́коже избра́ннии Бо́жии, свя́ти и возлю́бленни,] во утро́бы щедро́т, бла́гость, смиреному́дрие, кро́тость и долготерпе́ние,

¹³ Прие́млюще друг дру́га и проща́юще себе́, а́ще кто на кого́ и́мать порече́ние, я́коже и Христо́с прости́л есть вам, та́ко и вы.

¹⁴ Над все́ми же си́ми стяжи́те любо́вь, я́же есть соу́з соверше́нства.

¹⁵ И мир Бо́жий да водворя́ется в сердца́х ва́ших, во́ньже и зва́ни бы́сте во еди́ном те́ле, и благода́рни быва́йте.

¹⁶ Сло́во Христо́во да вселя́ется в вас бога́тно, во вся́кой прему́дрости, уча́ще и вразумля́юще себе́ саме́х во псалме́х и пе́ниих и пе́снех духо́вных, во благода́ти пою́ще в сердца́х ва́ших Го́сподеви.

¹⁷ И все е́же а́ще что твори́те сло́вом или́ делом, вся во и́мя Го́спода Иису́са Христа́, благодаря́ще Бо́га и Отца́ Тем.

¹⁸ Жены́, повину́йтеся свои́м муже́м, я́коже подоба́ет о Го́споде.

¹⁹ Му́жие, люби́те жены́ ва́ша, и не огорча́йтеся к ним.

²⁰ Ча́да, послу́шайте роди́телей свои́х во всем, сие́ бо уго́дно есть Го́сподеви.

²¹ Отцы́, не раздража́йте чад ва́ших, да не уныва́ют.

²² Раби́, послу́шайте по всему́ плотски́х госпо́дий ва́ших, не пред очи́ма то́чию рабо́тающе а́ки человекоуго́дницы, но в простоте́ се́рдца, боя́щеся Бо́га.

²³ И вся́ко, е́же а́ще что творите́, от души́ де́лайте, я́коже Го́споду, а не челове́ком,

²⁴ Ве́дяще, я́ко от Го́спода прии́мете воздая́ние достоя́ния, Го́споду бо Христу́ рабо́таете.

²⁵ А оби́дяй восприи́мет, е́же оби́де, и несть лица́ обинове́ния.

Глава 4

¹ Госпо́дие, пра́вду и уравне́ние рабо́м подава́йте, ве́дяще, я́ко и вы и́мате Го́спода на небесе́х.

² В моли́тве терпи́те, бо́дрствующе в ней со благодаре́нием.

³ Моля́щеся и о нас вку́пе, да Бог отве́рзет нам две́ри сло́ва, проглаго́лати та́йну Христо́ву, ея́же ра́ди и свя́зан есмь,

⁴ Да явлю́ ю́, я́коже подоба́ет ми глаго́лати.

⁵ В прему́дрости ходи́те ко вне́шним, вре́мя искупу́юще.

⁶ Сло́во ва́ше да быва́ет всегда́ во благода́ти, со́лию растворе́но, ве́дети, ка́ко подоба́ет вам еди́ному кому́ждо отвещава́ти.

⁷ А я́же о мне, вся ска́жет вам Тихи́к, возлю́бленный брат и ве́рен служи́тель и срабо́тник о Го́споде.

⁸ Его́же посла́х к вам на се и́стое, я́ко да разуме́ет я́же о вас и уте́шит сердца́ ва́ша,

⁹ Со Они́симом, ве́рным и возлю́бленным бра́том на́шим, и́же есть от вас, вся вам ска́жут, я́же зде.

¹⁰ Целу́ет вы Ариста́рх спле́нник мой, и Ма́рко анепсе́й Варна́вин, о не́мже прия́сте за́поведи, а́ще прии́дет к вам, приими́те его́,

¹¹ И Иису́с нарече́нный Иу́ст, су́щии от обре́зания: си́и еди́ни споспе́шницы во Ца́рство Бо́жие, и́же бы́ша ми утеше́ние.

¹² Целу́ет вы Епафра́с, и́же от вас, раб Иису́са Христа́, всегда́ подвиза́яйся о вас в моли́твах, да бу́дете соверше́ни и испо́лнени во вся́кой во́ли Бо́жией.

¹³ Свиде́тельствую бо о нем, я́ко и́мать ре́вность мно́гу и боле́знь о вас и о су́щих в Лаодики́и и во Иерапо́ли.

¹⁴ Целу́ет вы Лука́ врачь возлю́бленный, и Дима́с.

¹⁵ Целу́йте бра́тию су́щую в Лаодики́и, и Нимфа́на, и дома́шнюю его́ це́рковь.

¹⁶ И егда́ прочте́тся посла́ние сие́ у вас, сотвори́те, да и в Лаодики́йстей це́ркви прочте́но бу́дет, и напи́саное от Лаодики́и да и вы прочте́те.

¹⁷ И рцы́те Архи́ппу: блюди́ служе́ние, е́же прия́л еси́ о Го́споде, да доверши́ши е́.

¹⁸ Целова́ние мое́ю руко́ю Па́влею. Помина́йте моя́ у́зы. Благода́ть со все́ми ва́ми. Ами́нь.

Пе́рвое посла́ние к Солу́нянам

Глава 1

¹ Па́вел и Силуа́н, и Тимофе́й це́ркви Солу́нстей о Бо́зе Отце́ и Го́споде Иису́се Христе́: благода́ть вам и мир от Бо́га Отца́ на́шего и Го́спода Иису́са Христа́.

² Благодари́м Бо́га всегда́ о всех вас, помина́ние ва́ше творя́ще в моли́твах на́ших,

³ Непреста́нно помина́юще ва́ше де́ло ве́ры, и труд любве́, и терпе́ние упова́ния Го́спода на́шего Иису́са Христа́, пред Бо́гом и Отце́м на́шим.

⁴ Ве́дяще, бра́тие возлю́бленная, от Бо́га избра́ние ва́ше,

⁵ Я́ко благовествова́ние на́ше не бысть к вам в сло́ве то́чию, но и си́лою, и Ду́хом Святы́м, и во извеще́нии мно́зе, я́коже и ве́сте, какови́ бы́хом в вас ра́ди вас.

⁶ И вы подо́бницы бы́сте нам и Го́споду, прие́мше сло́во в ско́рби мно́зе с ра́достию Ду́ха Свята́го,

⁷ Я́ко бы́ти вам о́браз всем ве́рующим в Македо́нии и Аха́ии.

⁸ От вас бо промче́ся сло́во Госпо́дне не то́кмо в Македо́нии и Аха́ии, но и во вся́ко ме́сто ве́ра ва́ша, я́же к Бо́гу, изы́де, я́ко не тре́бовати нам глаго́лати что.

⁹ Ти́и бо о нас возвеща́ют, како́в вход име́хом к вам, и ка́ко обрати́стеся к Бо́гу от и́дол, рабо́тати Бо́гу жи́ву и и́стинну

¹⁰ И жда́ти Сы́на Его́ с небе́с, Его́же воскреси́ из ме́ртвых, Иису́са, избавля́ющаго нас от гне́ва гряду́щаго.

Глава 2

¹ Са́ми бо ве́сте, бра́тие, вход наш и́же к вам, я́ко не вотще́ бысть,

² Но предпострада́вше и досажде́ни бы́вше, я́коже ве́сте, в Фили́ппех, дерзну́хом о Бо́зе на́шем глаго́лати к вам благовествова́ние Бо́жие со мно́гим по́двигом.

³ Утеше́ние бо на́ше не от пре́лести, ни от нечистоты́, ни ле́стию,

⁴ Но я́коже искуси́хомся от Бо́га ве́рни бы́ти прия́ти благовествова́ние, та́ко глаго́лем, не а́ки челове́ком угожда́юще, но Бо́гу искуша́ющему сердца́ на́ша.

⁵ Никогда́же бо в словеси́ ласка́ния бы́хом к вам, я́коже ве́сте, ниже́ вино́ю лихоима́ния, Бог свиде́тель!

⁶ Ни и́щуще от челове́к сла́вы, ни от вас, ни от ине́х,

⁷ Могу́ще в тяготе́ бы́ти, я́коже Христо́вы Апо́столи, но бы́хом ти́си посреде́ вас, я́коже дои́лица гре́ет своя́ ча́да.

⁸ Та́ко жела́юще вас, благоволи́хом пода́ти вам не то́чию благовествова́ние Бо́жие, но и ду́ши своя́, зане́же возлю́блени бы́сте нам.

⁹ По́мните бо, бра́тие, труд наш и по́двиг: нощь бо и день де́лающе, да не отяготи́ти ни еди́наго от вас, пропове́дахом вам благовествова́ние Бо́жие.

¹⁰ Вы свиде́тели и Бог, я́ко преподо́бно и пра́ведно, и непоро́чно вам ве́рующим бы́хом,

¹¹ Я́коже ве́сте, зане́ еди́наго кого́ждо вас, я́коже оте́ц ча́да своя́,

¹² Моля́ще и утеша́юще вас, и свиде́тельствующе вам ходи́ти досто́йно Бо́гу, призва́вшему вы во Свое́ Ца́рство и сла́ву.

¹³ Сего́ ра́ди и мы благодари́м Бо́га непреста́нно, я́ко прие́мше сло́во слы́шания Бо́жия от нас, прия́сте не а́ки сло́во челове́ческо, но [я́коже есть вои́стинну] сло́во Бо́жие, е́же и де́йствуется в вас ве́рующих.

¹⁴ Вы бо подо́бницы бы́сте, бра́тие, це́рквам Бо́жиим су́щим во Иуде́и о Христе́ Иису́се. Зане́ та́яжде и вы пострада́сте от свои́х сплеме́нник, я́коже и ти́и от иуде́й,

¹⁵ Уби́вших и Го́спода Иису́са и Его́ проро́ки, и нас изгна́вших, и Бо́гу не угоди́вших, и всем челове́ком проти́вящихся,

¹⁶ И возбраня́ющих нам глаго́лати язы́ком, да спасу́тся, во е́же испо́лнити им грехи́ своя́ всегда́, пости́же же на них гнев до конца́.

¹⁷ Мы же, бра́тие, осироте́вше от вас ко вре́мени часа́ лице́м, а не се́рдцем, ли́шше тща́хомся лице́ ва́ше ви́дети мно́гим жела́нием.

¹⁸ Те́мже хоте́хом приити́ к вам, аз у́бо Па́вел, еди́ною и два́жды, и возбрани́ нам сатана́.

¹⁹ Кто бо нам упова́ние или́ ра́дость, или́ вене́ц похвале́ния? Не и вы ли пред Го́сподем на́шим Иису́с Христо́м во прише́ствии Его́?

²⁰ Вы бо есте́ сла́ва на́ша и ра́дость.

Глава 3

¹ Те́мже уже́ не терпя́ще, благоволи́хом оста́тися во Афи́нех еди́ни.

² И посла́хом Тимофе́а, бра́та на́шего и служи́теля Бо́жия и споспе́шника на́шего во благове́стии Христо́ве, утверди́ти вас и уте́шити о ве́ре ва́шей,

³ Я́ко ни еди́ному смуща́тися в ско́рбех сих, са́ми бо ве́сте, я́ко на сие́ и́стое лежи́м. ^[253]

⁴ И́бо егда́ у вас бе́хом, предреко́хом вам, я́ко и́мамы скорбе́ти, е́же и бысть, и ве́сте.

⁵ Сего́ ра́ди и аз ктому́ не терпя́, посла́х разуме́ти ве́ру ва́шу, да не ка́ко искуси́л вы бу́дет искуша́яй, и вотще́ бу́дет труд наш.

⁶ Ны́не же прише́дшу Тимофе́ю к нам от вас и благовести́вшу нам ве́ру ва́шу и любо́вь, и я́ко и́мате па́мять о нас бла́гу, всегда́ жела́юще нас ви́дети, я́коже и мы вас.

⁷ Сего́ ра́ди уте́шихомся, бра́тие, о вас, во вся́кой ско́рби и ну́жде на́шей, ва́шею ве́рою.

⁸ Я́ко мы ны́не жи́ви есмы́, а́ще вы стоите́ о Го́споде.

⁹ Ко́е бо благодаре́ние Бо́гу мо́жем возда́ти о вас, о вся́кой ра́дости, е́юже ра́дуемся вас ра́ди пред Бо́гом на́шим,

¹⁰ Нощь и день преизли́ха моля́щеся ви́дети лице́ ва́ше и соверши́ти лише́ние ве́ры ва́шея?

¹¹ Сам же Бог и Оте́ц наш и Госпо́дь наш Иису́с Христо́с да испра́вит путь наш к вам.

¹² Вас же Госпо́дь да умно́жит и да избы́точествит любо́вию друг ко дру́гу и ко всем, я́коже и мы к вам,

¹³ Во е́же утверди́ти сердца́ ва́ша непоро́чна в святы́ни пред Бо́гом и Отце́м на́шим, в прише́ствие Го́спода на́шего Иису́са Христа́ со все́ми святы́ми Его́. Ами́нь.

Глава 4

¹ Те́мже у́бо, бра́тие, про́сим вы и мо́лим о Христе́ Иису́се да я́коже прия́сте от нас, ка́ко подоба́ет вам ходи́ти и угожда́ти Бо́гови, я́коже и ходи́те, да избы́точествуете па́че,

² Ве́сте бо, какова́ повеле́ния да́хом вам Го́сподем Иису́сом.

³ Сия́ бо есть во́ля Бо́жия, свя́тость ва́ша, храни́ти себе́ саме́х от блуда́,

⁴ И ве́дети кому́ждо от вас свой сосу́д стяжава́ти во святы́ни и че́сти,

⁵ А не в стра́сти по́хотней, я́коже и язы́цы не ве́дящии Бо́га.

⁶ И е́же не преступа́ти и лихои́мствовати в ве́щи бра́та своего́, зане́ мсти́тель есть Госпо́дь о всех сих, я́коже и пре́жде реко́хом к вам и засвиде́тельствовахом.

⁷ Не призва́ бо нас Бог на нечистоту́, но во свя́тость.

⁸ Те́мже у́бо отмета́яй не челове́ка отмета́ет, но Бо́га, да́вшаго Дух Свой Святы́й в нас.

⁹ О братолю́бии же, не тре́буете, да пи́шется к вам, са́ми бо вы Бо́гом уче́ни есте́, е́же люби́ти друг дру́га,

¹⁰ И́бо творите́ то ко всей бра́тии, су́щей во всей Македо́нии. Мо́лим же вы, бра́тие, избы́точествовати па́че,

¹¹ И любе́зно прилежа́ти, е́же безмо́лвствовати и де́яти своя́ и де́лати свои́ми рука́ма, я́коже повеле́хом вам,

¹² Да хо́дите благообра́зно ко вне́шним и ни еди́наго же тре́бовати.

¹³ Не хощу́ же вас, бра́тие, неве́дети о уме́рших, да не скорбите́, я́коже и про́чии не иму́щии упова́ния.

¹⁴ А́ще бо ве́руем, я́ко Иису́с у́мре и воскре́се та́ко и Бог уме́ршия во Иису́се приведе́т с Ним.

¹⁵ Сие́ бо вам глаго́лем сло́вом Госпо́дним, я́ко мы живу́щии, оста́вшии в прише́ствие Госпо́дне, не и́мамы предвари́ти уме́рших.

¹⁶ Я́ко Сам Госпо́дь в повеле́нии, во гла́се Арха́нгелове и в трубе́ Бо́жии сни́дет с небесе́, и ме́ртвии о Христе́ воскре́снут пе́рвее.

¹⁷ Пото́м же мы, живу́щии оста́вшии, ку́пно с ни́ми восхище́ни бу́дем на о́блацех в сре́тение Госпо́дне на возду́се и та́ко всегда́ с Го́сподем бу́дем.

¹⁸ Те́мже утеша́йте друг дру́га в словесе́х сих.

Глава 5

¹ А о ле́тех и о времене́х, братие, не тре́бе есть вам писа́ти.

² Са́ми бо вы изве́стно ве́сте, я́ко день Госпо́день, я́коже тать в нощи́, та́ко прии́дет.

³ Егда́ бо реку́т: мир и утвержде́ние, тогда́ внеза́пу нападе́т на них всегуби́тельство, я́коже боле́знь во чре́ве иму́щей, и не и́мут избежа́ти.

⁴ Вы же, бра́тие, не́сте во тме, да день вас я́коже тать пости́гнет.

⁵ Вси бо вы сы́нове све́та есте́, и сы́нове дне, не́смы но́щи, ниже́ тмы.

⁶ Те́мже у́бо да не спим, я́коже и про́чии, но да бо́дрствуим и трезви́мся.

⁷ Спя́щии бо, в нощи́ спят, и упива́ющиися в нощи́ упива́ются.

⁸ Мы же, сы́нове су́ще дне, да трезви́мся, обо́лкшеся в броню́ ве́ры и любве́, и шлем упова́ния спасе́ния.

⁹ Я́ко не положи́ нас Бог в гнев, но в получе́ние спасе́ния Го́сподем на́шим Иису́с Христо́м,

¹⁰ Уме́ршим за нас, да а́ще бдим, а́ще ли спим, ку́пно с Ним и оживе́м.

¹¹ Сего́ ра́ди утеша́йте друг дру́га, и созида́йте ко́йждо бли́жняго, я́коже и творите́.

¹² Мо́лим же вы, бра́тие, зна́йте тружда́ющихся у вас, и настоя́телей ва́ших о Го́споде, и наказу́ющих вы.

¹³ И име́йте я́ по преизли́ха в любви́ за де́ло их, ми́рствуйте в себе́.

¹⁴ Мо́лим же вы, братие: вразумля́йте безчи́нныя, утеша́йте малоду́шныя, заступа́йте немощны́я, долготерпи́те ко всем.

¹⁵ Блюди́те, да никто́же зла за зло кому́ возда́ст, но всегда́ до́брое гони́те, и друг ко дру́гу, и ко всем.

¹⁶ Всегда́ ра́дуйтеся,

¹⁷ Непреста́нно моли́теся.

¹⁸ О всем благодари́те, сия́ бо есть во́ля Бо́жия о Христе́ Иису́се в вас.

¹⁹ Ду́ха не угаша́йте,

²⁰ Проро́чествия не уничижа́йте.

²¹ Вся же искуша́юще, до́брая держи́те.

²² От вся́кия ве́щи злы́я ^[254] отгреба́йтеся.

²³ Сам же Бог ми́ра да освяти́т вы всесоверше́нны о всем, и всесоверше́н ваш дух, и душа́, и те́ло непоро́чно в прише́ствие Го́спода на́шего Иису́са Христа́ да сохрани́тся.

²⁴ Ве́рен Призва́вый вас, И́же и сотвори́т.

²⁵ Бра́тие, моли́теся о нас.

²⁶ Целу́йте бра́тию всю лобза́нием святы́м.

²⁷ Заклина́ю вы Го́сподем, прочести́ посла́ние сие́ пред все́ю свято́ю бра́тиею.

²⁸ Благода́ть Го́спода на́шего Иису́са Христа́ с ва́ми. Ами́нь.

Второ́е посла́ние к Солу́нянам

Глава 1

¹ Па́вел и Силуа́н, и Тимофе́й, це́ркви Солу́нстей, о Бо́зе Отце́ на́шем и Го́споде Иису́се Христе́,

² Благода́ть вам и мир от Бо́га Отца́ на́шего, и Го́спода Иису́са Христа́.

³ Благодари́ти до́лжни есмы́ Бо́га всегда́ о вас, бра́тие, я́коже досто́йно есть, я́ко превозраста́ет ве́ра ва́ша, и мно́жится любо́вь еди́наго коего́ждо всех вас друг ко дру́гу,

⁴ Я́ко саме́м нам хвали́тися о вас в це́рквах Бо́жиих, о терпе́нии ва́шем и ве́ре во всех гоне́ниих ва́ших и ско́рбех, и́хже прие́млете,

⁵ Показа́ние пра́веднаго суда́ Бо́жия, во е́же сподо́битися вам Ца́рствия Бо́жия, его́же ра́ди и стра́ждете.

⁶ А́ще у́бо пра́ведно у Бо́га, возда́ти скорбь оскорбля́ющим вас,

⁷ А вам оскорбля́емым отра́ду с на́ми, во открове́нии Го́спода Иису́са с небесе́, со А́нгелы си́лы Своея́,

⁸ Во огни́ пла́менне даю́щаго отмще́ние не ве́дущим Бо́га и не послу́шающим благовествова́ния Го́спода на́шего Иису́са Христа́.

⁹ И́же му́ку прии́мут, поги́бель ве́чную, от лица́ Госпо́дня и от сла́вы кре́пости Его́,

¹⁰ Егда́ прии́дет просла́витися во святы́х Свои́х и ди́вен бы́ти во всех ве́ровавших, я́ко уве́рися свиде́тельство на́ше в вас в день он.

¹¹ За е́же и мо́лимся всегда́ о вас, да вы сподо́бит зва́нию Бог наш и испо́лнит вся́ко благоволе́ние бла́гости и де́ло ве́ры в си́ле,

¹² Я́ко да просла́вится и́мя Го́спода на́шего Иису́са Христа́ в вас, и вы в Нем, по благода́ти Бо́га на́шего и Го́спода Иису́са Христа́.

Глава 2

¹ Мо́лим же вы, бра́тие, о прише́ствии Го́спода на́шего Иису́са Христа́ и на́шем собра́нии о Нем,

² Не ско́ро подвиза́тися вам от ума́, ни ужаса́тися ниже́ ду́хом, ниже́ сло́вом, ни посла́нием а́ки от нас по́сланным, я́ко уже́ настои́т день Христо́в.

³ Да никто́же вас прельсти́т ни по еди́ному же о́бразу, я́ко а́ще не прии́дет отступле́ние пре́жде, и откры́ется челове́к беззако́ния, сын поги́бели,

⁴ Проти́вник и превознося́йся па́че вся́каго глаго́лемаго Бо́га или́ чти́лища, я́коже ему́ се́сти в це́ркви Бо́жией а́ки Бо́гу, показу́ющу себе́, я́ко Бог есть.

⁵ Не по́мните ли, я́ко еще́ живы́й у вас, сия́ глаго́лах вам?

⁶ И ны́не одержа́щее ве́сте, во е́же яви́тися ему́ в свое́ ему́ вре́мя.

⁷ Та́йна бо уже́ де́ется беззако́ния, то́чию держя́й ны́не до́ндеже от среды́ бу́дет,

⁸ И тогда́ яви́тся беззако́нник, его́же Госпо́дь Иису́с убие́т ду́хом уст Свои́х, и упраздни́т явле́нием прише́ствия Своего́,

⁹ Его́же есть прише́ствие по де́йству сатанину́ во вся́кой си́ле и зна́мениих и чудесе́х ло́жных,

¹⁰ И во вся́кой льсти непра́вды в погиба́ющих, зане́ любве́ и́стины не прия́ша, во е́же спасти́ся им.

¹¹ И сего́ ра́ди по́слет им Бог де́йство льсти, во е́же ве́ровати им лжи,

¹² Да суд прии́мут вси неве́ровавшии и́стине, но благоволи́вше в непра́вде.

¹³ Мы же до́лжни есмы́ благодари́ти Бо́га всегда́ о вас, бра́тие возлю́бленная от Го́спода, я́ко избра́л есть вас Бог от нача́ла во спасе́ние во святы́ни Ду́ха и ве́ры и́стины,

¹⁴ В не́же призва́ вас благовествова́нием на́шим, в получе́ние сла́вы Го́спода на́шего Иису́са Христа́.

¹⁵ Те́мже у́бо, бра́тие, сто́йте и держи́те преда́ния, и́мже научи́стеся или́ сло́вом, или́ посла́нием на́шим.

¹⁶ Сам же Госпо́дь наш Иису́с Христо́с, и Бог и Оте́ц наш, возлюби́вый нас, и да́вый утеше́ние ве́чно, и упова́ние бла́го в благода́ти,

¹⁷ Да уте́шит сердца́ ва́ша, и да утверди́т ^[255] во вся́ком сло́ве и де́ле бла́зе.

Глава 3

¹ Про́чее же моли́теся о нас, бра́тие, да сло́во Госпо́дне тече́т и сла́вится, я́коже и в вас,

² И да изба́вимся от злых и лука́вых челове́к, не всех бо есть ве́ра.

³ Ве́рен есть Госпо́дь, И́же утверди́т вы и сохрани́т от лука́ваго.

⁴ Упова́ем же на Го́спода о вас, я́ко я́же повелева́ем вам, и творите́ и сотворите́.

⁵ Госпо́дь же да испра́вит сердца́ ва́ша в любо́вь Бо́жию и в терпе́ние Христо́во.

⁶ Повелева́ем же вам, братие, о и́мени Го́спода на́шего Иису́са Христа́, отлуча́тися вам от вся́каго бра́та безчи́нно ходя́ща, а не по преда́нию, е́же прия́ша от нас.

⁷ Са́ми бо ве́сте, ка́ко ле́по есть вам подо́битися нам, я́ко не безчи́нновахом у вас,

⁸ Ни ту́не хлеб ядо́хом у кого́, но в труде́ и по́двизе, нощь и день де́лающе, да не отягчи́м никого́же от вас.

⁹ Не я́ко не и́мамы вла́сти, но я́ко да себе́ о́браз да́мы вам, во е́же уподо́битися нам.

¹⁰ И́бо егда́ бе́хом у вас, сие́ завещава́хом вам: я́ко а́ще кто не хо́щет де́лати ниже́ да яст.

¹¹ Слы́шим бо не́кия безчи́нно ходя́щия у вас, ничто́же де́лающия, но лука́вно обходя́щия.

¹² Таковы́м запреща́ем и мо́лим о Го́споде на́шем Иису́се Христе́, да с безмо́лвием де́лающе, свой хлеб ядя́т.

¹³ Вы же, бра́тие, не стужа́йте си до́брое творя́ще.

¹⁴ А́ще ли же кто не послу́шает словесе́ на́шего посла́нием, сего́ назна́менуйте и не примеша́йтеся ему́, да посрами́тся.

¹⁵ И не а́ки врага́ име́йте его́, но наказу́йте я́коже бра́та.

¹⁶ Сам же Госпо́дь ми́ра да даст вам мир всегда́ во вся́ком о́бразе. Госпо́дь со все́ми ва́ми.

¹⁷ Целова́ние мое́ю руко́ю Па́влею, е́же есть зна́мение во вся́ком посла́нии, си́це пишу́:

¹⁸ Благода́ть Го́спода на́шего Иису́са Христа́ со все́ми ва́ми. Ами́нь.

Пе́рвое посла́ние к Тимофе́ю

Глава 1

¹ Па́вел, посла́нник Иису́с Христо́в по повеле́нию Бо́га Спа́са на́шего и Го́спода Иису́са Христа́ упова́ния на́шего,

² Тимофе́ю при́сному ча́ду в ве́ре, благода́ть, ми́лость, мир от Бо́га Отца́ на́шего и Христа́ Иису́са Го́спода на́шего.

³ Я́коже умоли́х тя пребы́ти во Ефе́се иды́й в Македо́нию, да завеща́еши не́ким не и́нако учи́ти,

⁴ Ниже́ внима́ти ба́снем и родосло́вием безконе́чным, я́же стяза́ния творя́т па́че, не́жели Бо́жие строе́ние, е́же в ве́ре.

⁵ Коне́ц же завеща́ния есть любы́ от чи́ста се́рдца и со́вести бла́ги и ве́ры нелицеме́рныя,

⁶ И́хже не́цыи погреши́вше, уклони́шася в суесло́вия,

⁷ Хотя́ще бы́ти законоучи́теле, не разуме́юще ни я́же глаго́лют, ни о ни́хже утвержда́ют.

⁸ Ве́мы же я́ко добр зако́н есть, а́ще кто его́ зако́нне твори́т,

⁹ Ве́дый сие́, я́ко пра́веднику зако́н не лежи́т, ^[256] но беззако́нным и непокори́вым, нечести́вым же и гре́шником, непра́ведным и скве́рным, отца́ и ма́тере досади́телем, мужеуби́йцам,

¹⁰ Блуднико́м, мужело́жником, разбо́йником, клеветнико́м, скотоло́жником, лжи́вым, клятвопресту́пником, и а́ще что и́но здра́вому уче́нию проти́вится,

¹¹ По благове́стию сла́вы блаже́ннаго Бо́га, е́же мне уве́рено бысть.

¹² И благодарю́ укрепля́ющаго мя Христа́ Иису́са Го́спода на́шего, я́ко ве́рна мя непщева́, положи́в мя в слу́жбу,

¹³ Бы́вша мя иногда́ ху́льника и гони́теля и досади́теля, но поми́лован бых, я́ко неве́дый сотвори́х в неве́рствии,

¹⁴ Упреумно́жися же благода́ть Го́спода на́шего Иису́са Христа́ с ве́рою и любо́вию я́же о Христе́ Иису́се.

¹⁵ Ве́рно сло́во и вся́каго прия́тия досто́йно, я́ко Христо́с Иису́с прии́де в міръ гре́шники спасти́, от ни́хже пе́рвый есмь аз.

¹⁶ Но сего́ ра́ди поми́лован бых, да о мне пе́рвом пока́жет Иису́с Христо́с все долготерпе́ние, за о́браз хотя́щих ве́ровати Ему́ в жизнь ве́чную.

¹⁷ Царю́ же веко́в нетле́нному, неви́димому, еди́ному прему́дрому Бо́гу, честь и сла́ва во ве́ки веко́в. Ами́нь.

¹⁸ Сие́ же завеща́ние предаю́ тебе́ по бы́вших на тя пре́жде проро́чествиих, да во́инствуеши в них до́брое во́инство,

¹⁹ Име́я ве́ру и благу́ю со́весть, ю́же не́цыи отри́нувше, от ве́ры отпадо́ша.

²⁰ От ни́хже есть Имене́й и Алекса́ндр, и́хже преда́х сатане́, я́ко да нака́жутся не ху́лити.

Глава 2

¹ Молю́ у́бо пре́жде всех твори́ти моли́твы, моле́ния, проше́ния, благодаре́ния за вся челове́ки,

² За царя́ и за вся, и́же во вла́сти суть, да ти́хое и безмо́лвное житие́ поживе́м во вся́ком благоче́стии и чистоте́.

³ Сие́ бо добро́ и прия́тно пред Спаси́телем на́шим Бо́гом,

⁴ И́же всем челове́ком хо́щет спасти́ся и в ра́зум и́стины приити́.

⁵ Еди́н бо есть Бог, и еди́н хода́тай Бо́га и челове́ков, челове́к Христо́с Иису́с,

⁶ Да́вый Себе́ избавле́ние за всех, свиде́тельство времены́ свои́ми.

⁷ В не́же поста́влен бых аз пропове́дник и Апо́стол, [и́стину глаго́лю о Христе́, не лгу,] учи́тель язы́ков в ве́ре и и́стине.

⁸ Хощу́ у́бо, да моли́твы творя́т му́жие на вся́ком ме́сте, возде́юще преподо́бныя ру́ки без гне́ва и размышле́ния.

⁹ Та́кожде и жены́ во украше́нии ле́потном, со стыде́нием и целому́дрием да украша́ют себе́ не в плете́ниих, ни зла́том, или́ би́сером, или́ ри́зами многоце́нными,

¹⁰ Но [е́же подоба́ет жена́м обещава́ющимся благоче́стию,] делесы́ благи́ми.

¹¹ Жена́ в безмо́лвии да учи́тся со вся́ким покоре́нием.

¹² Жене́ же учи́ти не повелева́ю, ни владе́ти му́жем, но бы́ти в безмо́лвии.

¹³ Ада́м бо пре́жде со́здан бысть, пото́м же Е́ва.

¹⁴ И Ада́м не прельсти́ся, жена́ же прельсти́вшися, в преступле́нии бысть.

¹⁵ Спасе́тся же чадоро́дия ра́ди, ^[257] а́ще пребу́дет в ве́ре и любви́, и во святы́ни с целому́дрием.

Глава 3

¹ Ве́рно сло́во: а́ще кто епи́скопства хо́щет, добра́ де́ла жела́ет.

² Подоба́ет у́бо епи́скопу бы́ти непоро́чну, еди́ныя жены́ му́жу, тре́звену, целому́дру, благогове́йну, че́стну, страннолюби́ву, учи́тельну,

³ Не пия́нице, не би́йце, не сварли́ву, не мшелои́мцу, но кро́тку, не зави́стливу, не сребролю́бцу,

⁴ Свой дом до́бре пра́вящу, ча́да иму́щу в послуша́нии со вся́кою чистото́ю. ^[258]

⁵ [А́ще же кто своего́ до́му не уме́ет пра́вити, ка́ко о Це́ркви Бо́жией прилежа́ти возмо́жет?]

⁶ Не новокреще́нну, да не разгорде́вся в суд впаде́т и в сеть диа́волю.

⁷ Подоба́ет же ему́ и свиде́тельство добро́ име́ти от вне́шних, да не в поноше́ние впаде́т и в сеть неприя́знену.

⁸ Диа́коном та́кожде чи́стым, ^[259] не двоязы́чным, не вину́ мно́гу внима́ющим, не скверностяжа́тельным,

⁹ Иму́щим та́инство ве́ры в чи́стей со́вести.

¹⁰ И си́и у́бо да искуша́ются пре́жде, пото́м же да слу́жат, непоро́чни су́ще.

¹¹ Жена́м та́кожде чи́стым, ^[260] не клевети́вым, не нава́дницам, тре́звенным, ве́рным о всем.

¹² Диа́кони да быва́ют еди́ныя жены́ му́жие, ча́да до́бре заступа́юще и своя́ до́мы.

¹³ И́бо служи́вшии до́бре степе́нь себе́ добр сниска́ют и мно́гое дерзнове́ние в ве́ре, я́же о Христе́ Иису́се.

¹⁴ Сия́ пишу́ тебе́, упова́я приити́ к тебе́ ско́ро,

¹⁵ А́ще же заме́длю, да уве́си, ка́ко подоба́ет в дому́ Бо́жии жи́ти, я́же есть Це́рковь Бо́га жи́ва, столп и утвержде́ние и́стины.

¹⁶ И испове́дуемо ве́лия есть благоче́стия та́йна: Бог яви́ся во пло́ти, оправда́ся в Ду́се показа́ся А́нгелом, пропове́дан бысть во язы́цех, ве́ровася в міре, вознесе́ся во сла́ве.

Глава 4

¹ Дух же я́вственне глаго́лет, я́ко в после́дняя времена́ отсту́пят не́цыи от ве́ры, вне́млюще духово́м ле́стьчым и уче́нием бесо́вским,

² В лицеме́рии лжеслове́сник, сожже́нных свое́ю со́вестию,

³ Возбраня́ющих жени́тися, удаля́тися от бра́шен, я́же Бог сотвори́ в снеде́ние со благодаре́нием ве́рным и позна́вшим и́стину.

⁴ Зане́ вся́кое созда́ние Бо́жие добро́, и ничто́же отме́тно, со благодаре́нием прие́млемо,

⁵ Освяща́ется бо сло́вом Бо́жиим и моли́твою.

⁶ Сия́ вся сказу́я бра́тии, добр бу́деши служи́тель Иису́са Христа́, пита́емь словесы́ ве́ры и до́брым уче́нием, ему́же после́довал еси́.

⁷ Скве́рных же и ба́биих ба́сней отрица́йся, обуча́й же себе́ ко благоче́стию.

⁸ Теле́сное бо обуче́ние вма́ле есть поле́зно, а благоче́стие на все поле́зно есть, обетова́ние име́юще живота́ ны́нешняго и гряду́щаго.

⁹ Ве́рно сло́во и вся́каго прия́тия досто́йно.

¹⁰ На сие́ бо и тружда́емся и поноша́еми есмы́, я́ко упова́хом на Бо́га жи́ва, И́же есть Спаси́тель всем челове́ком, па́че же ве́рным.

¹¹ Завещава́й сия́ и учи́.

¹² Никто́же о ю́ности твое́й да неради́т, но о́браз бу́ди ве́рным сло́вом, житие́м, любо́вию, ду́хом, ве́рою, чистото́ю.

¹³ До́ндеже прииду́, внемли́ чте́нию, утеше́нию, уче́нию.

¹⁴ Не неради́ о свое́м дарова́нии живу́щем в тебе́, е́же дано́ тебе́ бысть проро́чеством с возложе́нием рук свяще́нничества.

¹⁵ В сих поуча́йся, в сих пребыва́й, [в сих разумева́й,] да преспе́яние твое́ явле́но бу́дет во всех.

¹⁶ Внима́й себе́ и уче́нию и пребыва́й в них: сия́ бо творя́, и сам спасе́шися и послу́шающии тебе́.

Глава 5

¹ Ста́рцу ^[261] не твори́ па́кости, но утеша́й я́коже отца́: ю́ноши, я́коже бра́тию,

² Cта́рицы, я́коже ма́тери, ю́ныя, я́коже сестры́, со вся́кою чистото́ю.

³ Вдови́цы чти, су́щия и́стинныя вдови́цы.

⁴ А́ще же ка́я вдови́ца ча́да или́ внуча́та и́мать, да уча́тся пре́жде свой дом благочести́вно устро́ити и взае́м воздая́ти роди́телем, сие́ бо есть благоуго́дно пред Бо́гом.

⁵ А су́щая и́стинная вдови́ца и уедине́на, упова́ на Бо́га и пребыва́ет в моли́твах и моле́ниих день и нощь.

⁶ Пита́ющаяся же простра́нно, жива́ умерла́.

⁷ И сия́ завещава́й, да непоро́чни бу́дут.

⁸ А́ще же кто о свои́х, па́че же о при́сных ^[262] не промышля́ет, ве́ры отве́рглся есть и неве́рнаго го́рши есть.

⁹ Вдови́ца же да причита́ется не ме́ньши лет шести́десятих, бы́вши еди́ному му́жу жена́,

¹⁰ В де́лех до́брых свиде́тельствуема, а́ще ча́да воспита́ла есть, а́ще святы́х но́зе умы́, а́ще стра́нныя прия́т, а́ще ско́рбным утеше́ние бысть, ^[263] а́ще вся́кому де́лу бла́гу после́довала есть.

¹¹ Ю́ных же вдови́ц отрица́йся: егда́ бо разсвире́пеют о Христе́, ^[264] посяга́ти хотя́т,

¹² иму́щя грех, я́ко пе́рвыя ве́ры отверго́шася.

¹³ Ку́пно же и пра́здны уча́тся обходи́ти до́мы, не то́чию же пра́здны, но и бляди́вы и оплази́вы, ^[265] глаго́лющия, я́же не подоба́ет.

¹⁴ Хощу́ у́бо ю́ным вдови́цам посяга́ти, ча́да ражда́ти, дом стро́ити, ни еди́ны же вины́ дая́ти проти́вному хулы́ ра́ди.

¹⁵ Се у́бо не́кия разврати́шася вслед сатаны́.

¹⁶ А́ще кто ве́рен или́ ве́рна и́мать вдови́цы, да довли́т их, я́ко да не тяготи́тся Це́рковь, да су́щих и́стинных вдови́ц удово́лит.

¹⁷ Прилежа́щии же до́бре пресви́тери сугу́быя че́сти да сподобля́ются, па́че же тружда́ющиися в сло́ве и уче́нии.

¹⁸ Глаго́лет бо Писа́ние: вола́ молотя́ща не оброти́ши, и досто́ин де́латель мзды своея́.

¹⁹ На пресви́тера хулы́ не прие́мли, ра́зве при двою́или́ трие́х свиде́телех.

²⁰ Согреша́ющих же пред все́ми и облича́й, да и про́чии страх и́мут.

²¹ Засвиде́тельствую пред Бо́гом, и Го́сподем Иису́с Христо́м, и избра́нными его́ А́нгелы, да сия́ сохрани́ши без лицеме́рия, ничесо́же творя́ по уклоне́нию.

²² Руки́ ско́ро не возлага́й ни на кого́же, ниже́ приобща́йся чужи́м грехо́м, себе́ чи́ста соблюда́й.

²³ Ктому́ не пий воды́, но ма́ло вина́ прие́мли, стома́ха ра́ди твоего́ и ча́стых твои́х неду́гов.

²⁴ Не́ких же челове́к греси́ явле́ни суть, предваря́юще на суд, не́ким же и после́дствуют.

²⁵ Та́коже и до́брая дела́ явле́на суть, и су́щая и́нако, утаи́тися не мо́гут.

Глава 6

¹ Ели́цы суть под и́гом раби́, своя́ господы́ вся́кия че́сти да сподобля́ют, да и́мя Бо́жие не ху́лится и уче́ние.

² Иму́щии же ве́рны господы́ да не нерадя́т о них, поне́же бра́тия суть, но па́че да рабо́тают, зане́ ве́рни суть и возлю́блени, и́же благода́ть восприе́млющии. Сия́ учи́ и моли́.

³ А́ще ли кто и́нако учи́т и не приступа́ет к здра́вым словесе́м Го́спода на́шего Иису́са Христа́ и уче́нию, е́же по благове́рию,

⁴ Разгорде́вся, ничто́же ве́дый, но неду́гуяй о стяза́ниих и словопре́ниих, от ни́хже быва́ет за́висть, рве́ние, хулы́, непщева́ния лука́ва,

⁵ Бесе́ды злы́я растле́нных челове́ков умо́м и лише́нных и́стины, непщу́ющих приобре́тение бы́ти благоче́стие. Отступа́й от таковы́х.

⁶ Есть же сниска́ние ве́лие благоче́стие с дово́льством.

⁷ Ничто́же бо внесо́хом в мир сей я́ве, я́ко ниже́ изнести́ что мо́жем.

⁸ Име́юще же пи́щу и одея́ние, си́ми дово́льни бу́дем.

⁹ А хотя́щии богати́тися впа́дают в напа́сти и се́ти, и в по́хоти мно́ги несмы́сленны и врежда́ющия, я́же погружа́ют челове́ки во всегуби́тельство и поги́бель.

¹⁰ Ко́рень бо всем злым сребролю́бие есть, его́же не́цыи жела́юще заблуди́ша от ве́ры, и себе́ пригвозди́ша боле́знем мно́гим.

¹¹ Ты же, о челове́че Бо́жий, сих бе́гай. Гони́ же пра́вду, благоче́стие, ве́ру, любо́вь, терпе́ние, кро́тость.

¹² Подвиза́йся до́брым по́двигом ве́ры, емли́ся за ве́чную жизнь, в ню́же и зван был еси́, и испове́дал еси́ до́брое испове́дание пред мно́гими свиде́тели.

¹³ Завещава́ю ти пред Бо́гом оживля́ющим вся́ческая, и Христо́м Иису́сом свиде́тельствовавшим при Понти́йстем Пила́те до́брое испове́дание,

¹⁴ Соблюсти́ тебе́ за́поведь нескве́рну и незазо́рну, да́же до явле́ния Го́спода на́шего Иису́са Христа́.

¹⁵ Е́же во своя́ времена́ яви́т блаже́нный и еди́н си́льный, Царь ца́рствующих и Госпо́дь госпо́дствующих,

¹⁶ Еди́н име́яй безсме́ртие и во све́те живы́й непристу́пнем, Его́же никто́же ви́дел есть от челове́к, ниже́ ви́дети мо́жет, ему́же честь и держа́ва ве́чная. Ами́нь.

¹⁷ Бога́тым в ны́нешнем ве́це запреща́й не высокому́дрствовати, ниже́ упова́ти на бога́тство погиба́ющее, но на Бо́га жи́ва, даю́щаго нам вся оби́льно в наслажде́ние,

¹⁸ Благо́е де́лати, богати́тися в де́лех до́брых, благопода́тливым бы́ти, общи́тельным,

¹⁹ Сокро́вищующе себе́ основа́ние добро́ в бу́дущее, да прии́мут ве́чную жизнь.

²⁰ О, Тимофе́е, преда́ние сохрани́, уклоня́яся скве́рных суесло́вий и прекосло́вий лжеиме́ннаго ра́зума.

²¹ О не́мже не́цыи хва́лящеся, о ве́ре погреши́ша. Благода́ть с тобо́ю. Ами́нь.

Второ́е посла́ние к Тимофе́ю

Глава 1

¹ Па́вел, Апо́стол Иису́с Христо́в во́лею Бо́жиею, по обетова́нию жи́зни, я́же о Христе́ Иису́се

² Тимофе́ю возлю́бленному ча́ду благода́ть, ми́лость, мир от Бо́га Отца́ и Христа́ Иису́са Го́спода на́шего.

³ Благодарю́ Бо́га, Ему́же служу́ от прароди́телей чи́стою со́вестию, я́ко непреста́нную и́мам о тебе́ па́мять в моли́твах мои́х день и нощь,

⁴ Жела́я ви́дети тя, помина́я сле́зы твоя́, да ра́дости испо́лнюся,

⁵ Воспомина́ние прие́мля о су́щей в тебе́ нелицеме́рней ве́ре, я́же всели́ся пре́жде в ба́бу твою́ Лои́ду и в ма́терь твою́ Евники́ю: изве́стен же есмь, я́ко и в тебе́.

⁶ Ея́же ра́ди вины́ воспомина́ю тебе́ возгрева́ти дар Бо́жий живу́щий в тебе́ возложе́нием руку́ мое́ю.

⁷ Не бо даде́ нам Бог ду́ха стра́ха, но си́лы и любве́, и целому́дрия.

⁸ Не постыди́ся у́бо стра́стию ^[266] Го́спода на́шего Иису́са Христа́, ни мно́ю ю́зником Его́, но спостражди́ благовествова́нию Христо́ву по си́ле Бо́га,

⁹ Cпа́сшаго нас и призва́вшаго зва́нием святы́м, не по дело́м на́шим, но по Своему́ благоволе́нию ^[267] и благода́ти да́нней нам о Христе́ Иису́се пре́жде лет ве́чных,

¹⁰ Я́вльшися же ны́не просвеще́нием Спаси́теля на́шего Иису́са Христа́, разруши́вшаго у́бо смерть и возсия́вшаго жизнь и нетле́ние благовествова́нием,

¹¹ В не́же поста́влен бых аз пропове́дник и Апо́стол и учи́тель язы́ков.

¹² Ея́же ра́ди вины́ и сия́ стражду́, но не стыжду́ся. Вем бо, Ему́же ве́ровах, и извести́хся, я́ко си́лен есть преда́ние мое́ сохрани́ти в день он.

¹³ О́браз име́й здра́вых слове́с, и́хже от мене́ слы́шал еси́, в ве́ре и любви́, я́же о Христе́ Иису́се.

¹⁴ До́брое завеща́ние соблюди́ Ду́хом Святы́м живу́щим в нас.

¹⁵ Ве́си ли сие́, я́ко отврати́шася от мене́ вси, и́же от Аси́и, от ни́хже есть Фиге́лл и Ермоге́н.

¹⁶ Да даст же ми́лость Госпо́дь Ониси́форову дому́, я́ко мно́гажды мя упоко́и и вери́г мои́х не постыде́ся,

¹⁷ Но прише́д в Рим, то́щнее взыска́ мя и обре́те.

¹⁸ Да даст ему́ Госпо́дь обрести́ ми́лость от Го́спода в день он, и ели́ко во Ефе́се послужи́ ми, до́брее ты ве́си.

Глава 2

¹ Ты у́бо, ча́до мое́, возмога́й во благода́ти, я́же о Христе́ Иису́се

² И я́же слы́шал еси́ от мене́ мно́гими свиде́тели, сия́ преда́ждь ве́рным челове́ком, и́же дово́льни бу́дут и ины́х научи́ти.

³ Ты у́бо злопостражди́ я́ко добр во́ин Иису́с Христо́в.

⁴ Никто́же бо во́ин быва́я обязу́ется ку́плями жите́йскими, да воево́де уго́ден бу́дет.

⁵ А́ще же и постра́ждет ^[268] кто, не венча́ется, а́ще не зако́нно му́чен бу́дет. ^[269]

⁶ Тружда́ющемуся де́лателю пре́жде подоба́ет от плода́ вкуси́ти.

⁷ Разуме́й, я́же глаго́лю: да даст у́бо тебе́ Госпо́дь ра́зум о всем.

⁸ Помина́й Го́спода Иису́са Христа́ воста́вшаго от ме́ртвых, от се́мене Дави́дова, по благовествова́нию моему́,

⁹ В не́мже злостражду́ да́же до уз, я́ко злоде́й, но сло́во Бо́жие не вя́жется.

¹⁰ Сего́ ра́ди вся терплю́ избра́нных ра́ди, да и ти́и спасе́ние улуча́т е́же о Христе́ Иису́се со сла́вою ве́чною.

¹¹ Ве́рно сло́во: а́ще бо со Христо́м умро́хом, то с Ним и оживе́м.

¹² А́ще терпи́м, с Ним и воцари́мся, а́ще отве́ржемся, и Той отве́ржется нас,

¹³ А́ще не ве́руем, Он ве́рен пребыва́ет, отрещи́ бо ся Себе́ не мо́жет.

¹⁴ Сия́ воспомина́й, засвиде́тельствуя пред Го́сподем, не словопре́тися, ни на ку́юже потре́бу, на разоре́ние слы́шащих.

¹⁵ Потщи́ся себе́ иску́сна поста́вити пред Бо́гом, де́лателя непосты́дна, пра́во пра́вяща сло́во и́стины.

¹⁶ Скве́рных же тщегла́сий отмета́йся, наипа́че бо преспе́ют в нече́стие,

¹⁷ И сло́во их я́ко га́ггрена жир обря́щет, ^[270] от ни́хже есть Имене́й и Фили́т,

¹⁸ И́же о и́стине погреши́ста, глаго́люща, я́ко воскресе́ние уже́ бысть, и возмуща́ют не́которых ве́ру.

¹⁹ Тве́рдое у́бо основа́ние Бо́жие стои́т, иму́щее печа́ть сию́: позна́ Госпо́дь су́щия Своя́, и да отсту́пит от непра́вды всяк имену́яй и́мя Госпо́дне.

²⁰ В вели́цем же дому́ не то́чию сосу́ди зла́ти и сре́бряни суть, но и дре́вяни и гли́няни, и о́ви у́бо в честь, о́ви же не в честь.

²¹ А́ще же кто очи́стит себе́ от сих, бу́дет сосу́д в честь, освяще́н и благопотре́бен Влады́це, на вся́кое де́ло благо́е угото́ван.

²² Похоте́й ю́ных бе́гай, держи́ся же пра́вды, ве́ры, любве́, ми́ра со все́ми призыва́ющими Го́спода от чи́стаго се́рдца.

²³ Бу́их же и ненака́занных стяза́ний отрица́йся, ве́дый, я́ко ражда́ют сва́ры.

²⁴ Рабу́ же Госпо́дню не подоба́ет свари́тися, но ти́ху бы́ти ко всем, учи́тельну, незло́биву,

²⁵ С кро́тостию наказу́ющу проти́вныя, еда́ ка́ко даст им Бог покая́ние в ра́зум и́стины,

²⁶ И возни́кнут от диа́вольския се́ти, жи́ви уловле́ни от него́ в свою́ его́ во́лю.

Глава 3

¹ Сие́ же веждь, я́ко в после́дния дни наста́нут времена́ лю́та.

² Бу́дут бо челове́цы самолю́бцы, сребролю́бцы, велича́ви, го́рды, ху́льницы, роди́телем проти́вящиися, неблагода́рни, непра́ведни, нелюбо́вни,

³ Непримири́тельни, проде́рзиви, ^[271] возносли́ви, прелага́тае, ^[272] клеветницы́, невозде́ржницы, некро́тцы, неблаголю́бцы,

⁴ Преда́теле, на́гли, напыще́ни, сластолю́бцы па́че не́жели боголю́бцы,

⁵ Иму́щии о́браз благоче́стия, си́лы же его́ отве́ргшиися. И сих отвраща́йся.

⁶ От сих бо суть поныря́ющии в до́мы и пленя́ющии жени́шца отягоще́ны греха́ми, води́мы по́хотьми разли́чными,

⁷ Всегда́ уча́щяся и николи́же в ра́зум и́стины приити́ могу́щя.

⁸ Я́коже Ианни́й и Иамври́й проти́вистася Моисе́ю, та́кожде и си́и противля́ются и́стине, челове́цы растле́нни умо́м и неиску́сни о ве́ре.

⁹ Но не преуспе́ют бо́лее: безу́мие бо их явле́но бу́дет всем, я́коже и о́нех бысть.

¹⁰ Ты же после́довал еси́ моему́ уче́нию, житию́, приве́ту, ве́ре, долготерпе́нию, любви́, терпе́нию,

¹¹ Изгна́нием, страда́нием, якова́ ми бы́ша во Антиохи́и, и во Икони́и, и в Ли́стрех, якова́ изгна́ния прия́х, и от всех мя изба́вил есть Госпо́дь.

¹² И вси же хотя́щии благоче́стно жи́ти о Христе́ Иису́се гони́ми бу́дут.

¹³ Лука́вии же челове́цы и чароде́и преуспе́ют на го́ршее, прельща́юще и прельща́еми.

¹⁴ Ты же пребыва́й в ни́хже науче́н еси́ и я́же вве́рена суть тебе́, ве́дый, от кого́ научи́лся еси́.

¹⁵ И я́ко из мла́да свяще́нная писа́ния уме́еши, могу́щая тя умудри́ти во спасе́ние ве́рою, я́же о Христе́ Иису́се.

¹⁶ Вся́ко Писа́ние богодухнове́нно и поле́зно есть ко уче́нию, ко обличе́нию, ко исправле́нию, к наказа́нию е́же в пра́вде,

¹⁷ Да соверше́н бу́дет Бо́жий челове́к, на вся́кое де́ло благо́е угото́ван.

Глава 4

¹ Засвиде́тельствую же аз пред Бо́гом и Го́сподем на́шим Иису́с Христо́м, хотя́щим суди́ти живы́м и ме́ртвым в явле́нии Его́ и Ца́рствии Его́.

² Пропове́дуй сло́во, насто́й благовре́менне и безвре́менне, обличи́, запрети́, умоли́ со вся́ким долготерпе́нием и уче́нием.

³ Бу́дет бо вре́мя, егда́ здра́ваго уче́ния не послу́шают, но по свои́х по́хотех изберу́т себе́ учи́тели, че́шеми слу́хом.

⁴ И от и́стины слух отвратя́т, и к ба́снем уклоня́тся.

⁵ Ты же трезви́ся о всем, злопостражди́, де́ло сотвори́ благове́стника, служе́ние твое́ изве́стно сотвори́.

⁶ Аз бо уже́ жрен быва́ю, и вре́мя моего́ отше́ствия наста́.

⁷ По́двигом до́брым подвиза́хся, тече́ние сконча́х, ве́ру соблюдо́х,

⁸ Про́чее у́бо соблюда́ется ми вене́ц пра́вды, его́же возда́ст ми Госпо́дь в день он, пра́ведный Судия́, не то́кмо же мне, но и всем возлю́бльшим явле́ние Его́.

⁹ Потщи́ся ско́ро приити́ ко мне.

¹⁰ Дима́с бо мене́ оста́ви, возлюби́в ны́нешний век, и и́де в Солу́нь, Кри́скент в Галати́ю, Тит в Далма́тию.

¹¹ Лука́ еди́н есть со мно́ю. Ма́рка пое́м приведи́ с собо́ю, есть бо ми благопотре́бен в слу́жбу.

¹² Тихи́ка же посла́х во Ефе́с.

¹³ Фело́н, его́же оста́вих в Троа́де у Ка́рпа, гряды́й принеси́, и кни́ги, па́че же ко́жаныя.

¹⁴ Алекса́ндр кова́чь мно́га ми зла сотвори́, да возда́ст ему́ Госпо́дь по дело́м его́,

¹⁵ От него́же и ты себе́ блюди́, зело́ бо проти́вится словесе́м на́шим.

¹⁶ В пе́рвый мой отве́т никто́же бысть со мно́ю, но вси мя оста́виша, да не вмени́тся им.

¹⁷ Госпо́дь же мне предста́ и укрепи́ мя, да мно́ю пропове́дание изве́стно бу́дет, и услы́шат вси язы́цы, и изба́влен бых от уст львов.

¹⁸ И изба́вит мя Госпо́дь от вся́каго дела́ лука́ва и спасе́т во Ца́рствие Свое́ Небе́сное, Ему́же сла́ва во ве́ки веко́в. Ами́нь.

¹⁹ Целу́й Приски́ллу и Аки́лу и Ониси́форов дом.

²⁰ Ера́ст оста́ в Кори́нфе, Трофи́ма же оста́вих в Мили́те боля́ща.

²¹ Потщи́ся пре́жде зимы́ приити́. Целу́ют тя Евву́л и Пуд, и Лин, и Клавди́а, и бра́тия вся.

²² Госпо́дь Иису́с Христо́с со ду́хом твои́м. Благода́ть с ва́ми. Ами́нь.

Посла́ние к Ти́ту

Глава 1

¹ Па́вел, раб Бо́жий, Апо́стол же Иису́с Христо́в, по ве́ре избра́нных Бо́жиих и ра́зуму и́стины, я́же по благоче́стию,

² О упова́нии жи́зни ве́чныя, ю́же обетова́ нело́жный Бог пре́жде лет ве́чных,

³ Яви́ же во времена́ своя́ сло́во Свое́ пропове́данием, е́же мне поруче́но бысть по повеле́нию Спаси́теля на́шего Бо́га,

⁴ Ти́ту, при́сному ча́ду по о́бщей ве́ре, благода́ть, ми́лость, мир от Бо́га Отца́ и Го́спода Иису́са Христа́ Спа́са на́шего.

⁵ Сего́ ра́ди оста́вих тя в Кри́те, да недоконча́нная испра́виши и устро́иши по всем градо́м пресви́теры, я́коже тебе́ аз повеле́х.

⁶ А́ще кто есть непоро́чен, еди́ныя жены́ муж, ча́да имы́й ве́рна, не во укоре́нии блуда́, или́ непокори́ва.

⁷ Подоба́ет бо епи́скопу без поро́ка бы́ти, я́коже Бо́жию строи́телю: не себе́ угожда́ющу, не де́рзу, не напра́сливу, не гневли́ву, не пия́нице, не би́йце, не скверностяжа́тельну,

⁸ Но страннолюби́ву, благолю́бцу, целому́дренну, пра́ведну, преподо́бну, воздержа́тельну,

⁹ Держа́щемуся ве́рнаго словесе́ по уче́нию, да си́лен бу́дет и утеша́ти во здра́вем уче́нии, и проти́вящияся облича́ти.

¹⁰ Суть бо мно́зи непокори́ви, суесло́вцы и умо́м прельще́ни, наипа́че же су́щии от обре́зания,

¹¹ И́хже подоба́ет уста́ загражда́ти, и́же вся до́мы развраща́ют, уча́ще я́же не подоба́ет, скве́рнаго ра́ди прибы́тка.

¹² Рече́ же не́кто от них, свой им проро́к: Кри́тяне при́сно лжи́ви, зли́и зве́рие, утро́бы пра́здныя.

¹³ Свиде́тельство сие́ и́стинно есть. Ея́же ра́ди вины́ облича́й их неща́дно, да здра́ви бу́дут в ве́ре,

¹⁴ Не внима́юще иуде́йским ба́снем, ни за́поведем челове́к отвраща́ющихся от и́стины.

¹⁵ Вся у́бо чи́ста чи́стым, оскверне́ным же и неве́рным ничто́же чи́сто, но оскверни́ся их и ум и со́весть.

¹⁶ Бо́га испове́дуют ве́дети, а де́лы отме́щутся Его́, ме́рзцы су́ще и непокори́ви и на вся́кое де́ло благо́е неиску́сни.

Глава 2

¹ Ты же глаго́ли, я́же подоба́ет здра́вому уче́нию.

² Ста́рцем тре́звенным бы́ти, че́стным, целому́дренным, здра́вствующим ве́рою, любо́вию, терпе́нием.

³ Ста́рицам та́кожде во украше́нии святоле́пным, не клевети́вым, не вину́ мно́гу порабоще́нным, доброучи́тельным,

⁴ Я́ко да уцелому́дрят ю́ныя, мужелю́бицам бы́ти, чадолю́бицам,

⁵ Целому́дренным, чи́стым, до́мы до́бре пра́вящим, благи́м, покаря́ющимся свои́м муже́м, да не сло́во Бо́жие ху́лится.

⁶ Ю́ноши та́кожде моли́ целому́дрствовати.

⁷ О всем же сам себе́ подава́я о́браз до́брых дел, во уче́нии незави́стное, ^[273] че́стность, нетле́ние,

⁸ Сло́во здра́вое, незазо́рное. Да проти́вный посрами́тся, ничто́же име́я глаго́лати о нас уко́рно.

⁹ Рабы́, свои́м господе́м повинова́тися, во всем благоуго́дным бы́ти, не прекосло́вным,

¹⁰ Не кра́дущим, но ве́ру вся́ку явля́ющим бла́гу, да уче́ние Спаси́теля на́шего Бо́га украша́ют во всем.

¹¹ Яви́ся бо благода́ть Бо́жия спаси́тельная всем челове́ком,

¹² Наказу́ющи нас, да отве́ргшеся нече́стия и мірски́х похоте́й, целому́дренно, и пра́ведно, и благоче́стно поживе́м в ны́нешнем ве́це.

¹³ Жду́ще блаже́ннаго упова́ния и явле́ния сла́вы Вели́каго Бо́га и Спа́са на́шего Иису́са Христа́.

¹⁴ И́же дал есть Себе́ за ны, да изба́вит ны от вся́каго беззако́ния и очи́стит Себе́ лю́ди избра́нны, ревни́тели до́брым дело́м.

¹⁵ Сия́ глаго́ли, и моли́, и облича́й со вся́ким повеле́нием, да никто́же тя преоби́дит. ^[274]

Глава 3

¹ Воспомина́й тем нача́льствующим и владе́ющим повинова́тися и покаря́тися, и ко вся́кому де́лу бла́гу гото́вым бы́ти:

² Ни еди́наго ху́лити, не сварли́вым бы́ти, но ти́хим, вся́ку явля́ющим кро́тость ко всем челове́ком.

³ Бе́хом бо иногда́ и мы несмы́сленни, и непокори́ви, и прельще́ни, рабо́тающе похоте́м и сласте́м разли́чным, в зло́бе и за́висти живу́ще, ме́рзцы су́ще и ненави́дяще друг дру́га.

⁴ Егда́ же благода́ть и человеколю́бие яви́ся Спа́са на́шего Бо́га,

⁵ Не от дел пра́ведных, и́хже сотвори́хом мы, но по Свое́й Его́ ми́лости, спасе́ нас ба́нею пакибытия́ и обновле́нием Ду́ха Свята́го,

⁶ Его́же излия́ на нас оби́льно Иису́с Христо́м, Спаси́телем на́шим,

⁷ Да оправди́вшеся благода́тию Его́, насле́дницы бу́дем по упова́нию жи́зни ве́чныя.

⁸ [Ча́до Ти́те,] ве́рно сло́во, и о сих хощу́ тя извеща́ти, ^[275] да пеку́тся до́брым дело́м прилежа́ти ве́ровавшии Бо́гу, сия́ суть поле́зна челове́ком и добра́.

⁹ Бу́их же стяза́ний и родосло́вий и рве́ний и сва́ров зако́нных отступа́й: суть бо неполе́зны и су́етны.

¹⁰ Еретика́ челове́ка по пе́рвом и второ́м наказа́нии отрица́йся,

¹¹ Ве́дый, я́ко разврати́ся таковы́й, и согреша́ет, и есть самоосужде́н.

¹² Егда́ послю́ Арте́му к тебе́ или́ Тихи́ка, потщи́ся приити́ ко мне в Никопо́ль, ту бо суди́х озиме́ти.

¹³ Зи́ну зако́нника и Аполло́са ско́ро предпосли́, и да ничто́же и́ма ску́дно бу́дет.

¹⁴ Да уча́тся же и на́ши до́брым дело́м прилежа́ти в ну́жная тре́бования, да не бу́дут безпло́дни.

¹⁵ Целу́ют тя со мно́ю су́щии вси. Целу́й лю́бящия ны в ве́ре. Благода́ть со все́ми ва́ми. Ами́нь.

Посла́ние к Филимо́ну

¹ Па́вел, ю́зник Иису́с Христо́в, и Тимофе́й брат, Филимо́ну возлю́бленному и споспе́шнику на́шему,

² И Апфи́и сестре́ возлю́бленней, и Архи́ппу сово́инственнику на́шему, и дома́шней твое́й це́ркви,

³ Благода́ть вам и мир от Бо́га Отца́ на́шего, и Го́спода Иису́са Христа́.

⁴ Благодарю́ Бо́га моего́, всегда́ па́мять о тебе́ творя́ в моли́твах мои́х,

⁵ Слы́шав любо́вь твою́ и ве́ру, ю́же и́маши ко Го́споду Иису́су и ко всем святы́м.

⁶ Я́ко да обще́ние твоея́ ве́ры де́йственно бу́дет в ра́зуме вся́каго бла́га, е́же в вас, о Христе́ Иису́се.

⁷ Ра́дость бо и́мам мно́гу и утеше́ние о любви́ твое́й, я́ко утро́бы святы́х почи́ша тобо́ю, бра́те.

⁸ Сего́ ра́ди мно́гое дерзнове́ние име́я во Христе́ повелева́ти тебе́, е́же потре́бно есть,

⁹ Любве́ же ра́ди па́че молю́, тако́в сый я́коже Па́вел ста́рец, ны́не же и ю́зник Иису́са Христа́,

¹⁰ Молю́ тя о мое́м ча́де, его́же роди́х во у́зах мои́х Они́сима,

¹¹ Иногда́ тебе́ непотре́бнаго, ны́не же тебе́ и мне благопотре́бна,

¹² Его́же возпосла́х тебе́, ты же его́, си́речь мою́ утро́бу, приими́.

¹³ Его́же аз хоте́х у себе́ держа́ти, да в тебе́ ме́сто послу́жит ми во у́зах благовествова́ния.

¹⁴ Без твоея́ же во́ли ничто́же восхоте́х сотвори́ти, да не а́ки по ну́жди благо́е твое́ бу́дет, но по во́ли.

¹⁵ Не́гли бо ра́ди сего́ разлучи́ся на час, да ве́чна того́ прии́меши,

¹⁶ Не ктому́ а́ки раба́, но вы́ше раба́, бра́та возлю́бленна, па́че же мне, кольми́ же па́че тебе́, и по пло́ти и о Го́споде.

¹⁷ А́ще у́бо и́маши мене́ о́бщника, приими́ сего́ я́коже мене́.

¹⁸ А́ще же в чесо́м оби́де тебе́, или́ до́лжен есть, мне сие́ вмени́.

¹⁹ Аз Па́вел написа́х руко́ю мое́ю, аз возда́м, да не реку́ тебе́, я́ко и сам себе́ ми еси́ до́лжен.

²⁰ Ей, бра́те, аз да получу́ е́же прошу́ у тебе́ ^[276] о Го́споде: упоко́й мою́ утро́бу о Го́споде.

²¹ Наде́явся послуша́нию твоему́ написа́х тебе́, ве́дый, я́ко и па́че, е́же глаго́лю, сотвори́ши.

²² Ку́пно же и угото́ви ми оби́тель: упова́ю бо, я́ко моли́твами ва́шими дарова́н бу́ду вам.

²³ Целу́ет тя Епафра́с, спле́нник мой о Христе́ Иису́се,

²⁴ Ма́рко, Ариста́рх, Дима́с, Лука́, споспе́шницы мои́.

²⁵ Благода́ть Го́спода на́шего Иису́са Христа́ со ду́хом ва́шим. Ами́нь.

Посла́ние ко евре́ям

Глава 1

¹ Многоча́стне и многообра́зне дре́вле Бог, глаго́лавый отце́м во проро́цех.

² В после́док дний сих глаго́ла нам в Сы́не, Его́же положи́ насле́дника всем, И́мже и ве́ки сотвори́.

³ И́же Сый сия́ние сла́вы и о́браз Ипоста́си Его́, нося́ же вся́ческая глаго́лом си́лы Своея́, Собо́ю очище́ние сотвори́в грехо́в на́ших, се́де одесну́ю Престо́ла вели́чествия на высо́ких.

⁴ Толи́ко лу́чший быв А́нгел, ели́ко пресла́внее па́че их насле́дствова и́мя.

⁵ Кому́ бо рече́ когда́ от А́нгел: Сын Мой еси́ Ты, Аз днесь роди́х Тя? И па́ки: Аз бу́ду Ему́ во Отца́, и Той бу́дет Мне в Сы́на.

⁶ Егда́ же па́ки вво́дит Перворо́днаго во вселе́нную, глаго́лет: и да покло́нятся Ему́ вси А́нгели Бо́жии.

⁷ И ко А́нгелом у́бо глаго́лет: творя́й А́нгелы Своя́ ду́хи и слуги́ Своя́ огнь паля́щ.

⁸ К Сы́ну же: престо́л Твой, Бо́же, в век ве́ка, жезл пра́вости, жезл Ца́рствия Твоего́.

⁹ Возлюби́л еси́ пра́вду и возненави́дел еси́ беззако́ние, сего́ ра́ди пома́за Тя, Бо́же, Бог Твой еле́ем ра́дости па́че прича́стник Твои́х.

¹⁰ И па́ки: в нача́ле Ты, Го́споди, зе́млю основа́л еси́, и дела́ руку́ Твое́ю суть небеса́.

¹¹ Та поги́бнут, Ты же пребыва́еши, и вся, я́коже ри́за, обетша́ют,

¹² И я́ко оде́жду, свие́ши их, и изменя́тся; Ты же то́йжде еси́, и лета́ Твоя́ не оскуде́ют.

¹³ Кому́ же от А́нгел рече́ когда́: седи́ одесну́ю Мене́, до́ндеже положу́ враги́ Твоя́ подно́жие ног Твои́х?

¹⁴ Не вси ли суть служе́бнии ду́си, в служе́ние посыла́еми за хотя́щих насле́довати спасе́ние?

Глава 2

¹ Сего́ ра́ди подоба́ет нам ли́шше внима́ти слы́шанным, да не когда́ отпа́днем.

² А́ще бо глаго́ланное А́нгелы сло́во бысть изве́стно и вся́ко преступле́ние и ослуша́ние, пра́ведное прия́т мздовоздая́ние.

³ Ка́ко мы убежи́м, о толи́цем неради́вше спасе́нии, е́же зача́ло прие́мше, глаго́латися от Го́спода слы́шавшими в нас извести́ся.

⁴ Сосвиде́тельствующу Бо́гу зна́меньми же и чудесы́, и разли́чными си́лами, и Ду́ха Свята́го разделе́ньми, по Свое́й Ему́ во́ли?

⁵ Не А́нгелом бо покори́ Бог вселе́нную гряду́щую, о не́йже глаго́лем.

⁶ Засвиде́тельствова же не́где не́кто, глаго́ля: что есть челове́к, я́ко по́мниши его́? Или́ сын челове́ческий, я́ко посеща́еши и́?

⁷ Ума́лил еси́ его́ ма́лым не́чим от А́нгел, сла́вою и че́стию венча́л еси́ его́ и поста́вил еси́ его́ над де́лы руку́ Твое́ю,

⁸ Вся покори́л еси́ под но́зе его́. Внегда́ же покори́ти ему́ вся́ческая, ничто́же оста́ви ему́ непокоре́но. Ны́не же не у́ ви́дим ему́ вся́ческая покоре́на.

⁹ А ума́ленаго ма́лым чим от А́нгел ви́дим Иису́са, за прия́тие сме́рти сла́вою и че́стию венча́нна, я́ко да благода́тию Бо́жиею за всех вку́сит сме́рти.

¹⁰ Подоба́ше бо ему́, Его́же ра́ди вся́ческая и И́мже вся́ческая, приве́дшу мно́ги сы́ны в сла́ву, нача́льника спасе́ния их страда́ньми соверши́ти.

¹¹ И святя́й и освяща́емии, от Еди́наго вси, ея́же ра́ди вины́ не стыди́тся бра́тию нарица́ти их, глаго́ля:

¹² Возвещу́ И́мя Твое́ бра́тии Мое́й, посреде́ Це́ркве воспою́ Тя. И па́ки: Аз бу́ду наде́яся Нань.

¹³ И па́ки: се Аз и де́ти, я́же Ми дал есть Бог.

¹⁴ Поне́же у́бо де́ти приобщи́шася пло́ти и кро́ви, и Той прии́скренне приобщи́ся те́хже, да сме́ртию упраздни́т иму́щаго держа́ву сме́рти, си́речь диа́вола,

¹⁵ И изба́вит сих, ели́цы стра́хом сме́рти чрез все житие́ пови́нни бе́ша рабо́те.

¹⁶ Не от А́нгел у́бо когда́ ^[277] прие́млет, но от се́мене Авраа́мова прие́млет;

¹⁷ Отню́дуже до́лжен бе по всему́ подо́битися бра́тии, да ми́лостив бу́дет и ве́рен первосвяще́нник в тех, я́же к Бо́гу, во е́же очи́стити грехи́ людски́я.

¹⁸ В не́мже бо пострада́, Сам искуше́н быв, мо́жет и искуша́емым помощи́.

Глава 3

¹ Те́мже, бра́тие свята́я, зва́ния небе́снаго прича́стницы, разуме́йте Посла́нника и Святи́теля испове́дания на́шего Иису́са Христа́.

² Ве́рна су́ща Сотво́ршему Его́, я́коже и Моисе́й во всем дому́ Его́.

³ Мно́жайшей бо сла́ве Сей па́че Моисе́а сподо́бися, ели́ко мно́жайшую честь и́мать па́че до́му сотвори́вый его́.

⁴ Всяк бо дом созида́ется от не́коего, а сотвори́вый вся́ческая Бог.

⁵ И Моисе́й ве́рен бе во всем дому́ Его́, я́коже слуга́, во свиде́тельство глаго́латися име́вшим,

⁶ Христо́с же я́коже Сын в дому́ Свое́м, Его́же дом мы есмы́, а́ще у́бо дерзнове́ние и похвалу́ упова́ния да́же до конца́ изве́стно удержи́м.

⁷ Те́мже, я́коже глаго́лет Дух Святы́й: днесь, а́ще глас Его́ услы́шите,

⁸ Не ожесточи́те серде́ц ва́ших, я́коже в прогне́вании, по дни искуше́ния в пусты́ни,

⁹ Иде́же искуси́ша Мя отцы́ ва́ши, искуси́ша Мя и ви́деша дела́ Моя́ четы́редесять лет.

¹⁰ Сего́ ра́ди негодова́х ро́да того́ и рех: при́сно блу́дят се́рдцем, ти́и же не позна́ша путе́й Мои́х.

¹¹ Я́ко кля́хся во гне́ве Мое́м, а́ще вни́дут в поко́й Мой.

¹² Блюди́те, братие, да не когда́ бу́дет в не́коем от вас се́рдце лука́во, испо́лнено неве́рия, во е́же отступи́ти от Бо́га жи́ва.

¹³ Но утеша́йте себе́ на всяк день до́ндеже днесь нарица́ется, да не ожесточи́тся не́кто от вас ле́стию грехо́вною.

¹⁴ Прича́стницы бо бы́хом Христу́, а́ще у́бо нача́ток соста́ва да́же до конца́ изве́стен удержи́м.

¹⁵ Внегда́ глаго́лет: днесь, а́ще глас Его́ услы́шите, не ожесточи́те серде́ц ва́ших, я́коже в прогне́вании.

¹⁶ Не́цыи бо слы́шавше прогне́ваша, но не вси изше́дшии из Еги́пта с Моисе́ом.

¹⁷ Ко́их же негодова́ четы́редесять лет? Не согреши́вших ли, и́хже ко́сти падо́ша в пусты́ни?

¹⁸ Кото́рым же кля́лся не вни́ти в поко́ище Его́? Я́ве, я́ко проти́вльшимся.

¹⁹ И ви́дим, я́ко не возмого́ша вни́ти за неве́рствие.

Глава 4

¹ Да убои́мся у́бо, да не когда́ оста́влену обетова́нию Бо́жию вни́ти в поко́й Его́, яви́тся кто от вас лиши́вся.

² И́бо есмы́ благовествова́ни, я́коже и они́, но не по́льзова о́нех сло́во слу́ха, нерастворе́нное ве́рою слы́шавших.

³ Вхо́дим бо в поко́й ве́ровавшии, я́коже рече́: я́ко кля́хся во гне́ве Мое́м, а́ще вни́дут в поко́й Мой, а́ще и дело́м от сложе́ния міра бы́вшим.

⁴ Рече́ бо не́где о седмо́м си́це: и почи́ Бог в день седмы́й от всех дел Свои́х.

⁵ И в сем па́ки: а́ще вни́дут в поко́й Мой.

⁶ Поне́же у́бо лише́ни не́цыи ^[278] вни́ти в него́, и и́же пре́жде благовествова́ни бы́ша, не внидо́ша за непослуша́ние,

⁷ Па́ки не́кий уставля́ет день, днесь, в Дави́де глаго́ля, по толи́цех ле́тех, я́коже пре́жде глаго́лася: днесь, а́ще глас Его́ услы́шите, не ожесточи́те серде́ц ва́ших.

⁸ А́ще бо бы о́нех Иису́с упоко́ил, не бы о ино́м дни глаго́лал по сих.

⁹ У́бо оста́влено есть и еще́ суббо́тство лю́дем Бо́жиим.

¹⁰ Вше́дый бо в поко́й Его́, и той почи́ от дел свои́х, я́коже от Свои́х Бог.

¹¹ Потщи́мся у́бо вни́ти во о́ный поко́й, да не кто в ту́же при́тчу противле́ния впаде́т.

¹² Жи́во бо сло́во Бо́жие и де́йственно, и остре́йше па́че вся́каго меча́ обою́ду остра́, и проходя́щее да́же до разделе́ния души́ же и ду́ха, члено́в же и мозго́в, и суди́тельно помышле́нием и мы́слем серде́чным.

¹³ И несть тварь неявле́на пред Ним, вся же нага́ и объявле́нна пред очи́ма Его́, к Нему́же нам сло́во.

¹⁴ Иму́ще у́бо Архиере́а вели́ка, проше́дшаго небеса́, Иису́са Сы́на Бо́жия, да держи́мся испове́дания.

¹⁵ Не и́мамы бо архиере́а не могу́ща спострада́ти не́мощем на́шим, но искуше́на по вся́чeским по подо́бию, ра́зве греха́.

¹⁶ Да приступа́ем у́бо с дерзнове́нием к престо́лу благода́ти, я́ко да прии́мем ми́лость и благода́ть обря́щем во благовре́менну по́мощь.

Глава 5

¹ Всяк бо первосвяще́нник, от челове́к прие́млемь, за челове́ки поставля́ется на слу́жбы я́же к Бо́гу, да прино́сит да́ры же и жéртвы о гресе́х.

² Спострада́ти моги́й неве́жствующим и заблужда́ющим, поне́же и той не́мощию обложе́н eсть.

³ И сего́ ра́ди до́лжен eсть я́коже о лю́дех, та́коже и о себе́ приноси́ти за грехи́.

⁴ Никто́же сам о себе́ прие́млет честь, но зва́нный от Бо́га, я́коже и Ааро́н.

⁵ Та́ко и Христо́с, не Себе́ просла́ви бы́ти первосвяще́нника, но Глаго́лавый к Нему́: Сын Мой eси́ Ты, Аз днесь роди́х Тя.

⁶ Я́коже и и́нде глаго́лет: Ты eси́ свяще́нник во век по чи́ну Мелхиседе́кову.

⁷ И́же во днех пло́ти Своея́ моле́ния же и моли́твы к Могу́щему спасти́ Его́ от сме́рти с во́плем кре́пким и со слеза́ми прине́с, и услы́шан быв от благогове́инства.

⁸ А́ще и Сын бя́ше, оба́че навы́че, отону́дуже пострада́, послуша́нию,

⁹ И соверши́вся бысть всем послу́шающим Его́ вино́вен спасе́ния ве́чнаго.

¹⁰ Нарече́н от Бо́га Первосвяще́нник по чи́ну Мелхиседе́кову.

¹¹ О не́мже мно́гое нам сло́во и неудо́бь сказа́емое глаго́лати, поне́же не́мощни бы́сте слу́хи.

¹² И́бо до́лжни су́ще бы́ти учи́тели ле́та ра́ди, па́ки тре́буете учи́тися, ка́я пи́смена нача́ла слове́с Бо́жиих, и бы́сте тре́бующе млека́, а не кре́пкия пи́щи.

¹³ Всяк бо причаща́яйся млека́ неиску́сен сло́ва пра́вды, младе́нец бо есть.

¹⁴ Соверше́нных же есть тве́рдая пи́ща, иму́щих чу́вствия обуче́на до́лгим уче́нием в разсужде́ние добра́ же и зла.

Глава 6

¹ Те́мже оста́вльше нача́ла Христо́ва сло́во, на соверше́ние да веде́мся, не па́ки основа́ние покая́ния полага́юще от ме́ртвых дел, и ве́ры в Бо́га,

² Креще́ний, уче́ния, возложе́ния же рук, воскресе́ния же ме́ртвых и суда́ ве́чнаго.

³ И сие́ сотвори́м, а́ще Бог повели́т.

⁴ Невозмо́жно бо просвеще́нных еди́ною и вкуси́вших да́ра небе́снаго, и прича́стников бы́вших Ду́ха Свята́го,

⁵ И до́браго вкуси́вших Бо́жия глаго́ла и си́лы гряду́щаго ве́ка,

⁶ И отпа́дших, па́ки обновля́ти в покая́ние, второ́е распина́ющих Сы́на Бо́жия себе́ и облича́ющих.

⁷ Земля́ бо пи́вшая сходя́щий на ню мно́жицею дождь и ражда́ющая бы́лия до́брая о́ным, и́миже и де́лаема быва́ет, прие́млет благослове́ние от Бо́га,

⁸ А износя́щая те́рния и волче́ц непотре́бна есть и кля́твы близ, ея́же кончи́на пожже́ние.

⁹ Наде́емся же о вас, возлю́бленнии, лу́чших и придержа́щихся спасе́ния, а́ще и та́ко глаго́лем.

¹⁰ Не оби́длив бо Бог, забы́ти дела́ ва́шего и труда́ любве́, ю́же показа́сте во и́мя Его́, послужи́вше святы́м и служа́ще.

¹¹ Жела́ем же, коего́ждо вас явля́ти то́же тща́ние ко извеще́нию упова́ния да́же до конца́,

¹² Да не лени́ви бу́дете, но подража́тели насле́дствующих обетова́ния ве́рою и долготерпе́нием.

¹³ Авраа́му бо обетова́я Бог, поне́же ни eди́нем имя́ше бо́льшим кля́тися, кля́тся Собо́ю,

¹⁴ Глаго́ля: вои́стинну благосло́вствуя благословлю́ тя, и мно́жя умно́жу тя.

¹⁵ И та́ко долготерпе́в, получи́ обетова́ние.

¹⁶ Челове́цы у́бо бо́льшим клену́тся, и вся́кому их прекосло́вию кончи́на во извеще́ние, кля́тва eсть.

¹⁷ В не́мже ли́шше хотя́ Бог показа́ти насле́дником обетова́ния непрело́жное сове́та Своего́, хода́тайствова кля́твою.

¹⁸ Я́ко да двема́ ве́щма непрело́жныма, в не́юже не возмо́жно солга́ти Бо́гу, кре́пкое утеше́ние и́мамы прибе́гшии, я́тися за предлежа́щее упова́ние.

¹⁹ Éже а́ки ко́тву и́мамы души́, тве́рду же и изве́стну, и входя́щую во вну́треннее заве́сы.

²⁰ Иде́же предте́ча о нас вни́де Иису́с, по чи́ну Мелхиседе́кову, Первосвяще́нник быв во ве́ки.

Глава 7

¹ Сей бо Мелхиседе́к, царь Сали́мский, свяще́нник Бо́га Вы́шняго, и́же сре́те Авраа́ма возвра́щшася от се́ча царе́й и благослови́ его́,

² Ему́же и десяти́ну от всех отдели́ Авраа́м. Пе́рвее у́бо сказу́ется царь пра́вды, пото́м же царь Сали́мский, е́же есть, царь ми́ра,

³ Без отца́, без ма́тере, без при́чта ро́да, ни нача́ла днем, ни животу́ конца́ име́я, уподо́блен же Сы́ну Бо́жию, пребыва́ет свяще́нник вы́ну.

⁴ Ви́дите же, ели́к сей, ему́же и десяти́ну дал есть Авраа́м патриа́рх от избра́нных.

⁵ И прие́млющии у́бо свяще́нство от сыно́в Леви́ин за́поведь и́мут одеся́тствовати лю́ди по зако́ну, си́речь, бра́тию свою́, а́ще и от чресл Авраа́мовых изше́дшую.

⁶ Не причита́емый же ро́дом от них, одеся́тствова Авраа́ма и иму́щаго обетова́ния благослови́.

⁷ Без вся́каго же прекосло́вия ме́ньшее от бо́льшаго благословля́ется.

⁸ И зде у́бо десяти́ны челове́цы умира́ющии прие́млют, та́мо же свиде́тельствуемый, я́ко жив eсть.

⁹ И да си́це реку́, Авраа́мом и Леви́й прие́мляй десяти́ны, десяти́ны дал eсть.

¹⁰ Eще́ бо в чре́слех óтчиих бя́ше, eгда́ сре́те eго́ Мелхиседе́к.

¹¹ А́ще у́бо соверше́нство леви́тским свяще́нством бы́ло, [лю́дие бо на нем взаконе́ни бы́ша:] ка́я eще́ потре́ба по чи́ну Мелхиседе́кову ино́му воста́ти свяще́ннику, а не по чи́ну Ааро́нову глаго́латися?

¹² Прелага́ему у́бо свяще́нству, по ну́жди и зако́ну премене́ние быва́ет.

¹³ О не́мже бо глаго́лются сия́: коле́ну ино́му причасти́ся, от него́же никто́же приступи́ ко oлтарю́.

¹⁴ Я́ве бо, я́ко от коле́на Иу́дова возсия́ Госпо́дь наш, о не́мже коле́не Моисе́й о свяще́нстве ничесо́же глаго́ла.

¹⁵ И ли́шше eще́ я́ве eсть, я́ко по подо́бию Мелхиседе́кову воста́нет Свяще́нник ин,

¹⁶ И́же не по зако́ну за́поведи плотски́я бысть, но по си́ле живота́ неразруша́емаго.

¹⁷ Свиде́тельствует бо, я́ко Ты eси́ свяще́нник во век по чи́ну Мелхиседе́кову.

¹⁸ Отлага́ние у́бо быва́ет пре́жде бы́вшия за́поведи за не́мощное ея́ и неполе́зное.

¹⁹ Ничто́же бо соверши́л зако́н, привведе́ние же есть лу́чшему упова́нию, и́мже приближа́емся к Бо́гу.

²⁰ И по ели́ку не без кля́твы, они́ бо без кля́твы свяще́нницы бы́вшии,

²¹ Сей же с кля́твою чрез глаго́лющаго к Нему́: кля́тся Госпо́дь и не раска́ется, Ты еси́ свяще́нник во век по чи́ну Мелхиседе́кову.

²² По толи́ку лу́чшаго заве́та бысть испору́чник Иису́с.

²³ И они́ множа́йши свяще́нницы бы́вше, зане́ сме́ртию возбране́ни суть пребыва́ти,

²⁴ Сей же, за е́же пребыва́ти Ему́ во ве́ки, непресту́пное и́мать свяще́нство.

²⁵ Те́мже и спасти́ до конца́ мо́жет приходя́щих чрез Него́ к Бо́гу, всегда́ жив сый, во е́же хода́тайствовати о них.

²⁶ Тако́в бо нам подоба́ше Архиере́й, преподо́бен, незло́бив, безскве́рнен, отлуче́н от гре́шник и вы́шше Небе́с быв.

²⁷ И́же не и́мать по вся дни ну́жды, я́коже первосвяще́нницы, пре́жде о свои́х гресе́х же́ртвы приноси́ти, пото́м же о людски́х: сие́ бо сотвори́ еди́ною, Себе́ прине́с.

²⁸ Зако́н бо челове́ки поставля́ет первосвяще́нники, иму́щия не́мощь, сло́во же кля́твенное, е́же по зако́не, Сы́на во ве́ки соверше́нна.

Глава 8

¹ Глава́ же о глаго́лемых, такова́ и́мамы Первосвяще́нника, и́же се́де одесну́ю Престо́ла Вели́чествия на Небесе́х,

² Святы́м служи́тель и ски́нии и́стинней, ю́же водрузи́ Госпо́дь, а не челове́к.

³ Всяк бо первосвяще́нник, во е́же приноси́ти да́ры же и же́ртвы, поставля́емь быва́ет, те́мже потре́ба име́ти что и Сему́, е́же принесе́т.

⁴ А́ще бы у́бо был на земли́, не бы был свяще́нник, су́щим свяще́нником принося́щим по зако́ну да́ры,

⁵ И́же о́бразу и сте́ни слу́жат небе́сных, я́коже глаго́лано бысть Моисе́ю, хотя́щу сотвори́ти ски́нию: виждь бо, рече́, сотвори́ши вся по о́бразу пока́занному ти на горе́.

⁶ Ны́не же лу́чшее улучи́ служе́ние, по ели́ку и лу́чшаго заве́та есть хода́тай, и́же на лу́чшая обетова́ния взако́нися.

⁷ А́ще бо бы пе́рвый он непоро́чен был, не бы второ́му иска́лося ме́сто.

⁸ Укоря́я бо их глаго́лет: се дни́е гряду́т, глаго́лет Госпо́дь, и совершу́ на дом Изра́илев и на дом Иу́дов заве́т нов,

⁹ Не по заве́ту, его́же сотвори́х отце́м их в день, во́ньже е́мшу ми их за ру́ку, извести́ их от земли́ Еги́петския, зане́ ти́и не пребы́ша в заве́те Мое́м, и Аз неради́х о них, глаго́лет Госпо́дь.

¹⁰ Я́ко сей заве́т, его́же завеща́ю дому́ Изра́илеву по о́нех днех, глаго́лет Госпо́дь, дая́ зако́ны Моя́ в мы́сли их, и на сердца́х их напишу́ их, и бу́ду им Бог, и ти́и бу́дут Мне лю́дие.

¹¹ И не и́мать научи́ти ко́ждо и́скренняго своего́ и ко́ждо бра́та своего́, глаго́ля: позна́й Го́спода, я́ко вси уве́дят Мя от ма́ла да́же и до вели́ка их.

¹² Зане́ ми́лостив бу́ду непра́вдам их и грехо́в их и беззако́ний их не и́мам помяну́ти ктому́.

¹³ Внегда́ же глаго́лет нов, обветши́ пе́рваго, а обветша́ющее и состаре́ющееся близ есть истле́ния.

Глава 9

¹ Име́яше у́бо пе́рвая ски́ниа ^[279] оправда́ния слу́жбы, свято́е же людско́е.

² Ски́ниа бо сооружена́ бысть пе́рвая, в не́йже свети́льник, и трапе́за, и предложе́ние хле́бов, я́же глаго́лется Свята́я.

³ По вторе́й же заве́се ски́ниа глаго́лемая, Свята́я святы́х.

⁴ Зла́ту иму́щи кади́льницу, и ковче́г заве́та окова́н всю́ду зла́том, в не́мже ста́мна злата́ иму́щая ма́нну, и жезл Ааро́нов прозя́бший, и скрижа́ли заве́та.

⁵ Превы́шше же eго́ херуви́ми сла́вы, осеня́ющии oлта́рь, ^[280] о ни́хже несть ны́не глаго́лати подро́бну.

⁶ Сим же та́ко устро́eным, в пе́рвую у́бо ски́нию вы́ну вхожда́ху свяще́нницы, слу́жбы соверша́юще.

⁷ Во втору́ю же eди́ною в ле́то eди́н архиере́й, не без кро́ве, ю́же прино́сит за себе́, и о людски́х неве́жествиих.

⁸ Сие́ явля́ющу Ду́ху Свято́му, я́ко не у́ яви́ся святы́х путь, еще́ пе́рвей ски́нии иму́щей стоя́ние.

⁹ Я́же при́тча во вре́мя настоя́щее утверди́ся, в не́же да́рове и же́ртвы прино́сятся, не могу́щия по со́вести соверши́ти служа́щаго,

¹⁰ То́чию в бра́шнах и пития́х, и разли́чных омове́ниих, и оправда́ниих пло́ти, да́же до вре́мене исправле́ния надлежа́щая.

¹¹ Христо́с же прише́д Архиере́й гряду́щих благ, бо́льшею и соверше́ннейшею ски́ниею, нерукотворе́нною, си́речь, не сея́ тва́ри,

¹² Ни кро́вию ко́злею, ни те́льчею, но Свое́ю Кро́вию, вни́де eди́ною во свята́я, ве́чное искупле́ние обреты́й.

¹³ А́ще бо кровь ко́злия и те́льчая, и пе́пел ю́нчий кропя́щий осквернeныя, освяща́ет к пло́тней чистоте́,

¹⁴ Кольми́ па́че Кровь Христо́ва, И́же Ду́хом Святы́м Себе́ принесе́ непоро́чна Бо́гу, очи́стит со́весть на́шу от ме́ртвых дел, во eже служи́ти нам Бо́гу жи́ву и и́стинну.

¹⁵ И сего́ ра́ди но́вому заве́ту хода́тай есть, да я́ко сме́рти бы́вши, во искупле́ние преступле́ний бы́вших в пе́рвом заве́те, обетова́ние ве́чнаго насле́дия прии́мут зва́ннии.

¹⁶ Иде́же бо заве́т, сме́рти ну́жно есть носи́тися завеща́ющаго.

¹⁷ Заве́т бо в ме́ртвых изве́стен есть: поне́же ничесо́же мо́жет, егда́ жив есть завещава́яй.

¹⁸ Те́мже ни пе́рвый без кро́ве обновле́н ^[281] бысть.

¹⁹ Рече́нней бо вся́кой за́поведи по зако́ну от Моисе́а всем лю́дем, прие́м кровь ко́злию и те́льчую, с водо́ю и во́лною червле́ною и иссо́пом, са́мыя же ты́я кни́ги и вся лю́ди покропи́,

²⁰ глаго́ля: сия́ кровь заве́та, его́же завеща́ к вам Бог.

²¹ И ски́нию же и вся сосу́ды служе́бныя кро́вию та́коже покропи́.

²² И отню́д кро́вию вся ^[282] очища́ются по зако́ну, и без кровопроли́тия не быва́ет оставле́ние.

²³ Ну́жда у́бо бя́ше образо́м небе́сных си́ми очища́тися, саме́м же небе́сным лу́чшими же́ртвами, па́че сих.

²⁴ Не в рукотворе́нная бо свята́я вни́де Христо́с, противообра́зная и́стинных, но в са́мое Не́бо, ны́не да яви́тся лицу́ Бо́жию о нас.

²⁵ Ни да мно́гащи прино́сит Себе́, я́коже первосвяще́нник вхо́дит во свята́я [святы́х] по вся ле́та с кро́вию чужде́ю.

²⁶ Поне́же подоба́ше бы Ему́ мно́жицею страда́ти от сложе́ния міра, ны́не же еди́ною в кончи́ну веко́в, во отмета́ние греха́, же́ртвою Свое́ю яви́ся.

²⁷ И я́коже лежи́т ^[283] челове́ком еди́ною умре́ти, пото́м же суд.

²⁸ Та́ко и Христо́с еди́ною принесе́ся, во е́же вознести́ мно́гих грехи́, второ́е без греха́ яви́тся, жду́щим Его́ во спасе́ние.

Глава 10

¹ Сень бо имы́й зако́н гряду́щих благ, а не са́мый о́браз веще́й, на вся́кое ле́то те́миже же́ртвами, и́хже прино́сят вы́ну, никогда́же мо́жет приступа́ющих соверши́ти.

² Поне́же преста́ли бы бы́ти приноси́мы, ни еди́ну ктому́ иму́щим со́весть о гресе́х служа́щим, еди́ною очище́нным.

³ Но в них воспомина́ние грехо́в на ко́еждо ле́то быва́ет.

⁴ Невозмо́жно бо кро́ви ю́нчей и ко́злей отпуща́ти грехи́.

⁵ Те́мже входя́ в міръ, глаго́лет: же́ртвы и приноше́ния не восхоте́л еси́, те́ло же соверши́л Ми еси́,

⁶ Всесожже́ний и ^[284] о гресе́ не благоволи́л еси́.

⁷ Тогда́ рех: се иду́, [в глави́зне кни́жней написа́ся о Мне,] е́же сотвори́ти во́люТвою́, Бо́же.

⁸ Вы́ше глаго́ля: я́ко же́ртвы и приноше́ния и всесожже́ний и ^[285] о гресе́х не восхоте́л еси́, ниже́ благоволи́л еси́, [я́же по зако́ну прино́сятся].

⁹ Тогда́ рече́: се иду́ сотвори́ти во́лю Твою́, Бо́же. Отъе́млет пе́рвое, да второ́е поста́вит.

¹⁰ О не́йже во́ли освяще́ни есмы́ принесе́нием те́ла Иису́с Христо́ва еди́ною.

¹¹ И всяк у́бо свяще́нник стои́т на всяк день служя́ и ты́я же мно́жицею принося́ же́ртвы, я́же никогда́же мо́гут отя́ти грехо́в.

¹² Он же еди́ну о гресе́х прине́с же́ртву, всегда́ седи́т одесну́ю Бо́га.

¹³ Про́чее ожида́я, до́ндеже положа́тся врази́ Его́ подно́жие нога́ма Его́.

¹⁴ Еди́нем бо приноше́нием соверши́л есть во ве́ки освяща́емых.

¹⁵ Свиде́тельствует же нам и Дух Святы́й, по рече́нному пре́жде:

¹⁶ Сей заве́т, его́же завеща́ю к ним по днех о́нех, глаго́лет Госпо́дь, дая́ зако́ны Моя́ на сердца́ их, и в помышле́ниих их напишу́ их.

¹⁷ Та́же глаго́лет Госпо́дь: и грехо́в их и беззако́ний их не и́мам помяну́ти ктому́.

¹⁸ А иде́же отпуще́ние сих, ктому́ несть приноше́ния о гресе́х.

¹⁹ Иму́ще у́бо дерзнове́ние, бра́тие, входи́ти во свята́я Кро́вию Иису́с Христо́вою, путе́м но́вым и живы́м,

²⁰ Его́же обнови́л есть нам заве́сою, си́речь пло́тию Свое́ю,

²¹ И Иере́а вели́ка над до́мом Бо́жиим.

²² Да приступа́ем со и́стинным се́рдцем во извеще́нии ве́ры, окропле́ни сердца́ от со́вести лука́выя, и измове́ни телеса́ водо́ю чи́стою.

²³ Да держи́м испове́дание упова́ния неукло́нное, ве́рен бо есть Обеща́вый.

²⁴ И да разумева́ем друг дру́га в поощре́нии любве́ и до́брых дел.

²⁵ Не оставля́юще собра́ния своего́, я́коже есть не́ким обы́чай, но [друг дру́га] подвиза́юще: и толи́ка па́че, ели́ко ви́дите приближа́ющся день [су́дный].

²⁶ Во́лею бо согреша́ющим нам по прия́тии ра́зума и́стины, ктому́ о гресе́х не обрета́ется же́ртва.

²⁷ Стра́шно же не́кое ча́яние суда́, и огня́ ре́вность, поя́сти хотя́щаго сопроти́вныя.

²⁸ Отве́рглся кто зако́на Моисе́ова, без милосе́рдия при двою́ или́ трие́х свиде́телех умира́ет.

²⁹ Коли́ко, мните́, го́ршия сподо́бится му́ки, и́же Сы́на Бо́жия попра́вый, и Кровь заве́тную скве́рну возмни́в, в не́йже освяти́ся, и Ду́ха благода́ти укори́вый.

³⁰ Ве́мы бо Ре́кшаго: Мне отмще́ние, Аз возда́м, глаго́лет Госпо́дь. И па́ки: я́ко су́дит Госпо́дь лю́дем Свои́м.

³¹ Стра́шно есть е́же впа́сти в ру́це Бо́га Жива́го.

³² Воспомина́йте же пе́рвыя дни ва́ша, в ни́хже просвети́вшеся, мно́гия стра́сти претерпе́сте ^[286] страда́ний,

³³ О́во у́бо, поноше́ньми и скорбьми́ позо́р бы́вше, о́во же, о́бщницы бы́вше живу́щим та́ко.

³⁴ И́бо ю́зам мои́м спострада́сте и разграбле́ние име́ний ва́ших с ра́достию прия́сте, ве́дяще име́ти себе́ име́ние на небесе́х пребыва́ющее и лу́чшее.

³⁵ Не отлага́йте у́бо дерзнове́ния ва́шего, е́же и́мать мздовоздая́ние вели́ко.

³⁶ Терпе́ния бо и́мате потре́бу, да во́лю Бо́жию сотво́рше, прии́мете обетова́ние.

³⁷ И еще́ бо ма́ло ели́ко ели́ко, Гряды́й прии́дет и не укосни́т,

³⁸ А пра́ведный от ве́ры жив бу́дет.

³⁹ Мы же [бра́тие] не́смы обинове́ния в поги́бель, но ве́ры в снабде́ние души́.

Глава 11

¹ Есть же ве́ра упова́емых извеще́ние, веще́й обличе́ние неви́димых.

² В сей бо свиде́тельствовани бы́ша дре́внии.

³ Ве́рою разумева́ем соверши́тися веко́м глаго́лом Бо́жиим, во е́же от неявля́емых ви́димым бы́ти.

⁴ Ве́рою множа́йшую же́ртву А́вель па́че Ка́ина принесе́ Бо́гу, е́юже свиде́тельствован бысть бы́ти пра́ведник, свиде́тельствующу о да́рех его́ Бо́гу, и то́ю уме́рый еще́ глаго́лет.

⁵ Ве́рою Ено́х преложе́н бысть не ви́дети сме́рти, и не обрета́шеся, зане́ преложи́ его́ Бог, пре́жде бо преложе́ния его́ свиде́тельствован бысть, я́ко угоди́ Бо́гу.

⁶ Без ве́ры же невозмо́жно угоди́ти Бо́гу, ве́ровати же подоба́ет приходя́щему к Бо́гу, я́ко есть, и взыска́ющим Его́ мздовозда́тель быва́ет.

⁷ Ве́рою отве́т прии́м Но́е, о ни́хже не у́ бе ви́дев, и убоя́вся, сотвори́ ковче́г во спасе́ние до́му своего́, е́юже осуди́ [весь] мiр, и я́же по ве́ре пра́вды бысть насле́дник.

⁸ Ве́рою зово́м Авраа́м послу́ша изы́ти на ме́сто, е́же хотя́ше прия́ти в насле́дие, и изы́де не ве́дый, ка́мо гряде́т.

⁹ Ве́рою прии́де Авраа́м на зе́млю обетова́ния, я́коже на чу́жду, в кро́вы всели́ся со Исаа́ком и Иа́ковом, снасле́дникома обетова́ния того́жде.

¹⁰ Жда́ше бо основа́ния иму́щаго гра́да, ему́же худо́жник и соде́тель Бог.

¹¹ Ве́рою и сама́ Са́рра непло́ды си́лу во удержа́ние се́мене прия́т и па́че вре́мене во́зраста роди́, поне́же ве́рна непщева́ Обетова́вшаго.

¹² Те́мже и от еди́наго роди́шася, да еще́ умерщвле́ннаго, я́коже зве́зды небе́сныя мно́жеством и я́ко песо́к вскрай мо́ря безчи́сленный.

¹³ По ве́ре умро́ша си́и вси, не прие́мше обетова́ний, но издале́ча ви́девше я́, и целова́вше, и испове́давше, я́ко стра́ннии и прише́льцы суть на земли́.

¹⁴ И́бо такова́я глаго́лющии явля́ются, я́ко оте́чествия взыску́ют.

¹⁵ И а́ще бы у́бо о́но по́мнили, из него́же изыдо́ша, име́ли бы вре́мя возврати́тися,

¹⁶ Ны́не же лу́чшаго жела́ют, си́речь небе́снаго, те́мже не стыди́тся си́ми Бог, Бог нарица́тися их, угото́ва бо им град.

¹⁷ Ве́рою приведе́ Авраа́м Исаа́ка искуша́емь, и единоро́днаго приноша́ше, обетова́ния прие́мый.

¹⁸ К нему́же глаго́лано бысть: я́ко о Исаа́це нарече́т ти ся се́мя.

¹⁹ Помы́слив, я́ко и из ме́ртвых воскреси́ти си́лен есть Бог, те́мже того́ и в при́тчи прия́т.

²⁰ Ве́рою о гряду́щих благослови́ Исаа́к Иа́кова и Иса́ва.

²¹ Ве́рою, Иа́ков умира́я, коего́ждо сы́на Ио́сифова благослови́, и поклони́ся на верх жезла́ его́.

²² Ве́рою, Ио́сиф умира́я, о исхожде́нии сыно́в Изра́илевых па́мятствова, и о косте́х свои́х запове́да.

²³ Ве́рою Моисе́й роди́вся сокрове́н бысть три ме́сяцы от оте́ц свои́х, зане́ ви́деша красно́ отроча́, и не убоя́шася повеле́ния царе́ва.

²⁴ Ве́рою Моисе́й, вели́к быв, отве́ржеся нарица́тися сын дще́ре фарао́новы.

²⁵ Па́че же изво́ли страда́ти с людьми́ Бо́жиими, не́жели име́ти вре́менную греха́ сла́дость.

²⁶ Бо́льшее бога́тство вмени́в еги́петских сокро́вищ поноше́ние Христо́во, взира́ше бо на мздовоздая́ние.

²⁷ Ве́рою оста́ви Еги́пет, не убоя́вся я́рости царе́вы, Неви́димаго бо я́ко ви́дя, терпя́ше.

²⁸ Ве́рою сотвори́ Па́сху и проли́тие кро́ве, да не погубля́яй перворожде́нная ко́снется их.

²⁹ Ве́рою преидо́ша Чермно́е мо́ре а́ки по су́се земли́, его́же искуше́ние прие́мше Еги́птяне истопи́шася.

³⁰ Ве́рою сте́ны Иерихо́нския падо́ша обхожде́нием седми́х дний.

³¹ Ве́рою Раа́в блудни́ца не поги́бе с сопроти́вльшимися, прии́мши схо́дники ^[287] с ми́ром и ины́м путе́м изве́дши.

³² И что еще́ глаго́лю? Не доста́нет бо ми повеству́ющу ле́та о Гедео́не, Вара́це же и Сампсо́не, и Иеффа́и, о Дави́де же и Самуи́ле, и о [други́х] проро́цех,

³³ И́же ве́рою победи́ша ца́рствия, соде́яша пра́вду, получи́ша обетова́ния, загради́ша уста́ львов,

³⁴ Угаси́ша си́лу о́гненную, избего́ша о́стрея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужи́х.

³⁵ Прия́ша жены́ от воскресе́ния ме́ртвыя своя́, ини́и же избие́ни бы́ша, не прие́мше избавле́ния, да лу́чшее воскресе́ние улуча́т.

³⁶ Друзи́и же руга́нием и ра́нами искуше́ние прия́ша, еще́ же и уз, и темни́ц.

³⁷ Ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, проидо́ша в ми́лотех и в ко́зиях ко́жах, лише́ни, скорбя́ще, озло́блени.

³⁸ И́хже не бе досто́ин весь міръ, в пусты́нях скита́ющеся, и в гора́х, и в верте́пах, и в про́пастех земны́х.

³⁹ И си́и вси послу́шествани бы́вше ве́рою, не прия́ша обетова́ния,

⁴⁰ Бо́гу лу́чшее что о нас предзре́вшу, да не без нас соверше́нство прии́мут.

Глава 12

¹ Те́мже у́бо и мы, толи́к иму́ще облежа́щь нас о́блак свиде́телей, го́рдость вся́ку ^[288] отло́жше, и удо́бь обстоя́тельный грех, терпе́нием да тече́м на предлежа́щий нам по́двиг,

² Взира́юще на нача́льника ве́ры и соверши́теля Иису́са, и́же вме́сто предлежа́щия Ему́ ра́дости претерпе́ крест, о срамоте́ неради́в, одесну́ю же престо́ла Бо́жия се́де.

³ Помы́слите у́бо таково́е Пострада́вшаго от гре́шник на Себе́ прекосло́вие, да не стужа́ете, душа́ми свои́ми ослабля́еми.

⁴ Не у́ до кро́ве ста́сте, проти́ву греха́ подвиза́ющеся,

⁵ И забы́сте утеше́ние, е́же вам я́ко сыно́м глаго́лет: сы́не мой, не пренемога́й наказа́нием Госпо́дним, ниже́ ослабе́й, от Него́ облича́емь.

⁶ Его́же бо лю́бит Госпо́дь, наказу́ет, бие́т же вся́каго сы́на, его́же прие́млет.

⁷ А́ще наказа́ние терпите́, я́коже сыново́м обрета́ется вам Бог. Кото́рый бо есть сын, его́же не наказу́ет оте́ц?

⁸ А́ще же без наказа́ния есте́, ему́же прича́стницы бы́ша вси, у́бо прелюбоде́йчищи есте́, а не сы́нове.

⁹ К сим, пло́ти на́шей отца́ име́хом наказа́теля, и срамля́хомся, не мно́го ли па́че повине́мся Отцу́ духово́м, и жи́ви бу́дем?

¹⁰ Они́ бо в ма́ло дней, я́коже го́де им бе, нака́зоваху нас, а Сей на по́льзу, да причасти́мся святы́ни Его́.

¹¹ Вся́кое бо наказа́ние в настоя́щее вре́мя не мни́тся ра́дость бы́ти, но печа́ль: последи́ же плод ми́рен науче́ным тем воздае́т пра́вды.

¹² Те́мже осла́бленныя ру́ки и осла́бленная коле́на испра́вите.

¹³ И стези́ пра́вы сотвори́те нога́ми ва́шими, да не хро́мое соврати́тся, но па́че да исцеле́ет.

¹⁴ Мир име́йте и святы́ню со все́ми, и́хже кроме́ никто́же у́зрит Го́спода.

¹⁵ Смотря́юще, да никто́же лиши́тся благода́ти Бо́жия, да не кий ко́рень го́рести, выспрь прозяба́яй, па́кость сотвори́т, и тем оскверня́тся мно́зи.

¹⁶ Да не кто блудоде́й, или́ скверни́тель, я́коже Иса́в, и́же за ядь еди́ну отда́л есть перворо́дство свое́.

¹⁷ Ве́сте бо, я́ко и пото́м похоте́в насле́довати благослове́ние, отве́ржен бысть, покая́ния бо ме́ста не обре́те, а́ще и со слеза́ми поиска́л его́.

¹⁸ Не приступи́сте бо к горе́ осяза́емей и разгоре́вшемуся огню́, и о́блаку и сумра́ку, и бу́ре,

¹⁹ И тру́бному зву́ку, и гла́су глаго́л, его́же слы́шавшии отреко́шася, да не приложи́тся им сло́во.

²⁰ [Не терпя́ху бо повелева́ющаго, а́ще и зверь прико́снется горе́, ка́мением побие́н бу́дет.

²¹ И та́ко стра́шно бе ви́димое, Моисе́й рече́: пристра́шен есмь и тре́петен.]

²² Но приступи́сте к Сио́нстей горе́ и ко гра́ду Бо́га жива́го, Иерусали́му небе́сному и тмам А́нгелов,

²³ Торжеству́ и це́ркви перворо́дных на небесе́х напи́санных, и Судии́ всех Бо́гу и духо́м пра́ведник соверше́нных,

²⁴ И к Хода́таю заве́та но́ваго Иису́су и Кро́ви кропле́ния, лу́чше глаго́лющей, не́жели А́велева.

²⁵ Блюди́те же, да не отрече́теся Глаго́лющаго, а́ще бо не избежа́ша они́, отре́кшиися проро́чествующаго на земли́, мно́жае па́че мы отрица́ющиися Небе́снаго.

²⁶ Его́же глас зе́млю тогда́ поколеба́, ны́не же обетова́, глаго́ля: еще́ еди́ною Аз потрясу́ не то́кмо земле́ю, но и не́бом.

²⁷ А е́же, еще́ еди́ною, сказу́ет коле́блемых преложе́ние, а́ки сотворе́нных, да пребу́дут, я́же суть не подви́жимая.

²⁸ Темже ца́рство непоколеби́мо прие́млюще, да и́мамы благода́ть, eюже слу́жим благоуго́дно Бо́гу с благогове́нием и стра́хом,

²⁹ И́бо Бог наш oгнь пояда́яй eсть.

Глава 13

¹ Братолю́бие да пребыва́ет.

² Страннолю́бия не забыва́йте, тем бо не ве́дяще не́цыи странноприя́ша а́нгелы.

³ Помина́йте ю́зники, а́ки с ни́ми свя́зани: озлобля́eмыя, а́ки и са́ми су́ще в те́ле.

⁴ Честна́ жени́тва во всех и ло́же нескве́рно, блуднико́м же и прелюбоде́eм су́дит Бог.

⁵ Не сребролю́бцы нра́вом, дово́льни су́щими. Той бо рече́: не и́мам тебе́ оста́вити, ниже́ и́мам от тебe отступи́ти.

⁶ Я́ко дерза́ющим нам глаго́лати: Госпо́дь мне помо́щник, и не убою́ся, что сотвори́т мне челове́к?

⁷ Помина́йте наста́вники ва́ша, и́же глаго́лаша вам сло́во Бо́жие, и́хже взира́юще на сконча́ние жи́тельства, подража́йте ве́ре их.

⁸ Иису́с Христо́с вчера́ и днесь, То́йже и во ве́ки.

⁹ В науче́ния стра́нна и разли́чна не прилага́йтеся, добро́ бо благода́тию утвержда́ти сердца́, а не бра́шны, от ни́хже не прия́ша по́льзы ходи́вшии в них.

¹⁰ И́мамы же олта́рь, от него́же не и́мут вла́сти я́сти служа́щии се́ни.

¹¹ И́хже бо кровь живо́тных вно́сится во свята́я за грехи́ первосвяще́нником, сих телеса́ сжига́ются вне ста́на.

¹² Те́мже Иису́с, да освяти́т лю́ди свое́ю кро́вию, вне врат пострада́ти изво́лил.

¹³ Те́мже у́бо да исхо́дим к нему́ вне ста́на, поноше́ние его́ нося́ще.

¹⁴ Не и́мамы бо зде пребыва́ющаго гра́да, но гряду́щаго взыску́ем.

¹⁵ Тем у́бо прино́сим же́ртву хвале́ния вы́ну Бо́гу, си́речь плод усте́н испове́дающихся и́мени Его́.

¹⁶ Благотворе́ния же и обще́ния не забыва́йте, таковы́ми бо же́ртвами благоугожда́ется Бог.

¹⁷ Повину́йтеся наста́вником ва́шим и покаря́йтеся, ти́и бо бдят о душа́х ва́ших, я́ко сло́во возда́ти хотя́ще, да с ра́достию сие́ творя́т, а не воздыха́юще, несть бо поле́зно вам сие́.

¹⁸ Моли́теся о нас, упова́ем бо, я́ко добру́ со́весть и́мамы во всем, до́бре хотя́ще жи́ти.

¹⁹ Ли́шше же молю́, сие́ твори́те, да вско́ре устро́юся вам. ^[289]

²⁰ Бог же ми́ра, возведы́й из ме́ртвых Па́стыря овца́м вели́каго, кро́вию заве́та ве́чнаго, Го́спода на́шего Иису́са Христа́,

²¹ Да соверши́т вы во вся́ком де́ле бла́зе, сотвори́ти во́лю Его́, творя́ в вас благоуго́дное пред Ним, Иису́с Христо́м. Ему́же сла́ва во ве́ки веко́в. Ами́нь.

²² Молю́ же вы, бра́тие, приими́те сло́во утеше́ния: и́бо вма́ле написа́в посла́х вам.

²³ Зна́йте бра́та на́шего отпуще́на Тимофе́а, с ни́мже, [а́ще скоре́е прии́дет,] узрю́ вас.

²⁴ Целу́йте вся наста́вники ва́шя и вся святы́я. Целу́ют вы и́же от Итали́и су́щии.

²⁵ Благода́ть со все́ми ва́ми. Ами́нь.

Апока́липсис Свято́го Апо́стола Иоа́нна Богосло́ва

Глава 1

¹ Апока́липсис ^[290] Иису́са Христа́, его́же ^[291] даде́ Ему́ Бо́г, показа́ти рабо́м Свои́м, и́мже подоба́ет бы́ти вско́ре. И сказа́, посла́в чрез А́нгела Своего́ рабу́ Своему́ Иоа́нну,

² И́же свиде́тельствова сло́во Бо́жие и свиде́тельство Иису́с Христо́во, и ели́ка ви́де.

³ Блаже́н чты́й, и слы́шащии словеса́ проро́чествия, и соблюда́ющии пи́саная в не́м: вре́мя бо бли́з.

⁴ Иоа́нн седми́м це́рквам, я́же су́ть во Аси́и: благода́ть ва́м и ми́р от Су́щаго, и и́же бе́, и гряду́щаго, и от седми́ духо́в, и́же пред престо́лом Его́ су́ть,

⁵ И от Иису́са Христа́, и́же е́сть свиде́тель ве́рный, пе́рвенец из ме́ртвых и кня́зь царе́й земны́х: лю́бящу ны́ и омы́вшу на́с от гре́х на́ших Кро́вию Свое́ю,

⁶ И сотвори́л е́сть на́с цари́ и иере́и Бо́гу и Отцу́ Своему́, тому́ сла́ва и держа́ва во ве́ки веко́в. Ами́нь.

⁷ Се́, гряде́т со о́блаки, и у́зрит Его́ вся́ко о́ко и и́же Его́ прободо́ша, и пла́чь сотворя́т о Не́м вся́ коле́на земна́я. Е́й, ами́нь.

⁸ А́з е́смь А́льфа и Оме́га, нача́ток и коне́ц, глаго́лет Госпо́дь, сы́й, и и́же бе́, и гряды́й, Вседержи́тель.

⁹ А́з Иоа́нн, и́же и бра́т ва́ш и о́бщник в печа́ли и во ца́рствии и в терпе́нии Иису́с Христо́ве, бы́х во о́строве нарица́емем Па́тмос за сло́во Бо́жие и за свиде́тельство Иису́с Христо́во.

¹⁰ Бы́х в ду́се в де́нь неде́льный, и слы́шах за собо́ю гла́с ве́лий я́ко трубы́ глаго́лющия: Аз е́смь А́льфа и Оме́га, Пе́рвый и После́дний:

¹¹ И: я́же ви́диши, напиши́ в кни́гу, и посли́ це́рквам, я́же су́ть во Аси́и: во Ефе́с и в Сми́рну, в Перга́м и в Фиати́р, и в Сарди́с и в Филаделфи́ю и в Лаодики́ю.

¹² И обрати́хся ви́дети гла́с, и́же глаго́лаше со мно́ю: и обрати́вся ви́дех се́дмь свети́лник златы́х,

¹³ И посреде́ седми́ свети́лников подо́бна Сы́ну Челове́чу, облече́на в поди́р ^[292] и препоя́сана при сосцу́ по́ясом златы́м:

¹⁴ Глава́ же Его́ и вла́си белы́ а́ки яри́на ^[293] бе́лая, я́коже сне́г: и о́чи Его́ я́ко пла́мень о́гнен:

¹⁵ И но́зе Его́ подо́бне халколива́ну, ^[294] я́коже в пещи́ разжже́нне: и гла́с Его́ я́ко гла́с во́д мно́г:

¹⁶ И держя́ в руце́ Свое́й десне́й се́дмь зве́зд: и из у́ст Его́ ме́чь обою́ду о́стр изостре́н исходя́й: и лице́ Его́ я́коже со́лнце сия́ет в си́ле свое́й.

¹⁷ И егда́ ви́дех Его́, падо́х к нога́ма Его́ я́ко ме́ртв. И положи́ десни́цу Свою́ на мне́, глаго́ля ми́: не бо́йся: А́з е́смь Пе́рвый и После́дний

¹⁸ И живы́й: и бы́х ме́ртв, и се́, жи́в е́смь во ве́ки веко́в, ами́нь: и и́мам ключи́ а́да и сме́рти.

¹⁹ Напиши́ у́бо, я́же ви́дел еси́, и я́же су́ть, и и́мже подоба́ет бы́ти по се́м.

²⁰ Та́инство седми́ зве́зд, я́же ви́дел еси́ на десни́це Мое́й, и се́дмь свети́лник златы́х: се́дмь зве́зд А́нгели седми́ церкве́й су́ть: и се́дмь свети́лников, я́же ви́дел еси́, се́дмь церкве́й су́ть.

Глава 2

¹ А́нгелу Ефе́сския це́ркве напиши́: та́ко глаго́лет Держя́й се́дмь зве́зд в десни́це Свое́й, Ходя́й посреде́ седми́ свети́лников златы́х:

² Ве́м твоя́ дела́, и тру́д тво́й, и терпе́ние твое́, и я́ко не мо́жеши носи́ти злы́х, и искуси́л еси́ глаго́лющияся бы́ти апо́столы, и не су́ть, и обре́л еси́ и́х ло́жных:

³ И поне́сл еси́, и терпе́ние и́маши, и за и́мя Мое́ труди́лся еси́ и не изнемо́гл еси́.

⁴ Но и́мам на тя́, я́ко любо́вь твою́ пе́рвую оста́вил еси́.

⁵ Помяни́ у́бо, отку́ду спа́л еси́, и пока́йся, и пе́рвая дела́ сотвори́: а́ще же ни́, гряду́ тебе́ ско́ро и дви́гну свети́лник тво́й от ме́ста своего́, а́ще не пока́ешися.

⁶ Но се́ и́маши, я́ко ненави́диши де́л Николаи́тских, и́хже и А́з ненави́жду.

⁷ Име́яй у́хо да слы́шит, что́ Ду́х глаго́лет це́рквам: побежда́ющему да́м я́сти от дре́ва живо́тнаго, е́же е́сть посреде́ рая́ Бо́жия.

⁸ И А́нгелу це́ркве Сми́рнския напиши́: та́ко глаго́лет Пе́рвый и После́дний, и́же бы́сть ме́ртв, и [се́,] жи́в е́сть:

⁹ Ве́м твоя́ дела́ и ско́рбь и нищету́, но бога́т еси́, и хулы́ глаго́лющихся бы́ти Иуде́й, и не су́ть, но со́нмище сатанино́.

¹⁰ Не бо́йся ничесо́же, я́же и́маши пострада́ти. Се́, и́мать диа́вол всажда́ти от ва́с в темни́цы, да искуси́теся: и име́ти бу́дете ско́рбь до десяти́ дни́й. Бу́ди ве́рен да́же до сме́рти, и да́м ти́ вене́ц живота́.

¹¹ Име́яй у́хо слы́шати да слы́шит, что́ Ду́х глаго́лет це́рквам: побежда́яй не и́мать вреди́тися от сме́рти вторы́я.

¹² И А́нгелу Перга́мския це́ркве напиши́: та́ко глаго́лет Име́яй ме́чь обою́ду изощре́н:

¹³ Ве́м дела́ твоя́, и где́ живе́ши, иде́же престо́л сатани́н: и держи́ши и́мя Мое́, и не отве́рглся еси́ ве́ры Моея́ и в [Моя́] дни́, в ня́же Анти́пас свиде́тель Мо́й ве́рный, и́же убие́н бы́сть в ва́с, иде́же живе́т сатана́.

¹⁴ Но и́мам на тя́ ма́ло, я́ко и́маши ту́ держа́щих уче́ние Валаа́мово, и́же уча́ше Вала́ка положи́ти собла́зн пред сынми́ Изра́илевыми, я́сти же́ртвы и́долския и любы́ твори́ти.

¹⁵ Та́ко и́маши и ты́ держа́щия уче́ние Николаи́тско, его́же ненави́жду.

¹⁶ Пока́йся: а́ще ли ни́, прииду́ тебе́ ско́ро и бра́нь сотворю́ с ни́ми мече́м у́ст Мои́х.

¹⁷ Име́яй у́хо слы́шати да слы́шит, что́ Ду́х глаго́лет це́рквам: побежда́ющему да́м я́сти от ма́нны сокрове́нныя, и да́м ему́ ка́мень бе́л и на ка́мени и́мя но́во напи́сано, его́же никто́же ве́сть, то́кмо прие́мляй.

¹⁸ И А́нгелу Фиати́рския це́ркве напиши́: та́ко глаго́лет Сы́н Бо́жий, име́яй о́чи Свои́ я́ко пла́мень о́гнен, и но́зе Его́ подо́бне халколива́ну:

¹⁹ Ве́м твоя́ дела́ и любо́вь, и слу́жбу и ве́ру, и терпе́ние твое́ и дела́ твоя́, и после́дняя бо́лша пе́рвых.

²⁰ Но и́мам на тя́ ма́ло, я́ко оставля́еши жене́ Иезаве́ли, глаго́лющей себе́ бы́ти проро́чицу, учи́ти и льсти́ти Моя́ рабы́, любоде́йствовати и сне́сти же́ртву и́долскую.

²¹ И да́х е́й вре́мя, да пока́ется от любоде́йства своего́, и не пока́яся.

²² Се́, А́з полага́ю ю́ на одре́ и любоде́ющия с не́ю в ско́рбь ве́лию, а́ще не пока́ются от де́л свои́х:

²³ И ча́да и́х у́мрут сме́ртию ^[295]: и уразуме́ют вся́ це́ркви, я́ко А́з е́смь испыта́яй сердца́ и утро́бы: и да́м ва́м кому́ждо по дело́м ва́шим.

²⁴ Ва́м же глаго́лю и про́чим су́щим в Фиати́ре, и́же не и́мут уче́ния сего́ и и́же не разуме́ют глуби́н сатанины́х, я́коже глаго́лют: не возложу́ на вы́ тяготы́ и́ныя:

²⁵ То́кмо, е́же и́мате, держи́те, до́ндеже прииду́.

²⁶ И побежда́ющему и соблюда́ющему дела́ Моя́ до конца́, да́м ему́ вла́сть на язы́цех,

²⁷ И упасе́т я́ жезло́м желе́зным, я́ко сосу́ды скуде́льничи сокруша́тся, я́коже и А́з прия́х от Отца́ Моего́:

²⁸ И да́м ему́ звезду́ у́треннюю.

²⁹ Име́яй у́хо слы́шати да слы́шит, что́ Ду́х глаго́лет це́рквам.

Глава 3

¹ И А́нгелу Сарди́йския це́ркве напиши́: та́ко глаго́лет Име́яй се́дмь духо́в Бо́жиих и се́дмь зве́зд: ве́м твоя́ дела́, я́ко и́мя и́маши я́ко жи́в, а ме́ртв еси́.

² Бу́ди бдя́ и утвержда́я про́чая, и́мже умре́ти: не обрето́х бо де́л твои́х сконча́ных пред Бо́гом твои́м. ^[296]

³ Помина́й у́бо, ка́ко прия́л еси́ и слы́шал еси́, и соблюда́й и пока́йся. А́ще у́бо не бди́ши, прииду́ на тя́ я́ко та́ть, и не и́маши почу́ти, в ки́й ча́с прииду́ на тя́.

⁴ Но и́маши ма́ло име́н и в Сарди́и, и́же не оскверни́ша ри́з свои́х, и ходи́ти и́мут со Мно́ю в бе́лых, я́ко досто́йни су́ть.

⁵ Побежда́яй, то́й облече́тся в ри́зы бе́лыя, и не и́мам отмы́ти ^[297] и́мене его́ от кни́г живо́тных, и испове́м и́мя его́ пред Отце́м мои́м и пред А́нгелы Его́.

⁶ Име́яй у́хо да слы́шит, что́ Ду́х глаго́лет це́рквам.

⁷ И А́нгелу Филаделфи́йския це́ркве напиши́: та́ко глаго́лет Святы́й И́стинный, име́яй клю́ч Дави́дов, отверза́яй, и никто́же затвори́т, затворя́яй, и никто́же отве́рзет:

⁸ Ве́м твоя́ дела́: се́, да́х пред тобо́ю две́ри отве́рсты, и никто́же мо́жет затвори́ти и́х: я́ко ма́лу и́маши си́лу, и соблю́л еси́ Мое́ сло́во, и не отве́рглся еси́ и́мене Моего́.

⁹ Се́, даю́ от со́нмища сатанина́ глаго́лющияся бы́ти Иуде́и, и не су́ть, но лгу́т: се́, сотворю́ и́х, да прии́дут и поклоня́тся пред нога́ма твои́ма, и уразуме́ют, я́ко А́з возлюби́х тя́.

¹⁰ Я́ко соблю́л еси́ сло́во терпе́ния Моего́, и А́з тя́ соблюду́ от годи́ны искуше́ния, хотя́щия приити́ на всю́ вселе́нную искуси́ти живу́щия на земли́.

¹¹ Се́, гряду́ ско́ро: держи́, е́же и́маши, да никто́же прии́мет венца́ твоего́.

¹² Побежда́ющаго сотворю́ столпа́ в це́ркви Бо́га Моего́, и бо́ле ^[298] не и́мать изы́ти ктому́: и напишу́ на не́м и́мя Бо́га Моего́ и и́мя гра́да Бо́га Моего́, но́ваго Иерусали́ма, сходя́щаго с небе́с от Бо́га Моего́, и и́мя Мое́ но́вое.

¹³ Име́яй у́хо да слы́шит, что́ Ду́х глаго́лет це́рквам.

¹⁴ И А́нгелу Лаодики́йския це́ркве напиши́: та́ко глаго́лет Ами́нь, ^[299] свиде́тель ве́рный и и́стинный, нача́ток созда́ния Бо́жия:

¹⁵ Ве́м твоя́ дела́, я́ко ни студе́н еси́ ни те́пл: не да студе́н бы бы́л ни те́пл. ^[300]

¹⁶ Та́ко, я́ко обуморе́н еси́, и ни те́пл ни студе́н, изблева́ти тя́ от у́ст Мои́х и́мам. ^[301]

¹⁷ Зане́ глаго́леши, я́ко бога́т е́смь и обогати́хся и ничто́же тре́бую: и не ве́си, я́ко ты́ еси́ окая́нен и бе́ден, и ни́щь и сле́п и на́г.

¹⁸ Совеща́ю тебе́ купи́ти от Мене́ зла́то разжже́но огне́м, да обогати́шися, и одея́ние бе́ло, да облече́шися, и да не яви́тся срамота́ наготы́ твоея́: и коллу́рием ^[302] пома́жи о́чи твои́, да ви́диши.

¹⁹ А́з, и́хже а́ще люблю́, облича́ю и наказу́ю. Ревну́й у́бо и пока́йся.

²⁰ Се́, стою́ при две́рех и толку́: а́ще кто́ услы́шит гла́с Мо́й и отве́рзет две́ри, вни́ду к нему́ и вечеря́ю с ни́м, и то́й со Мно́ю.

²¹ Побежда́ющему да́м се́сти со Мно́ю на престо́ле Мое́м, я́коже и А́з победи́х и седо́х со Отце́м Мои́м на престо́ле Его́.

²² Име́яй у́хо да слы́шит, что́ Ду́х глаго́лет це́рквам.

Глава 4

¹ По си́х ви́дех: и се́, две́ри отве́рсты на небеси́, и гла́с пе́рвый, его́же слы́шах я́ко трубу́ глаго́лющь со мно́ю, глаго́ля: взы́ди се́мо, и покажу́ ти, ему́же подоба́ет бы́ти по си́х.

² И а́бие бы́х в ду́се: и се́, престо́л стоя́ше на небеси́, и на престо́ле Седя́щь:

³ И Седя́й бе́ подо́бен виде́нием ка́мени Иа́спису и сарди́нови: и [бе́] дуга́ о́крест престо́ла подо́бна виде́нием смара́гдови.

⁴ И о́крест престо́ла престо́ли два́десять и четы́ри: и на престо́лех ви́дех два́десять и четы́ри ста́рцы седя́щия, облече́ны в бе́лыя ри́зы, и имя́ху венцы́ зла́ты на глава́х свои́х.

⁵ И от престо́ла исхожда́ху мо́лния и гро́ми и гла́си: и се́дмь све́щников о́гненных горя́щих пред престо́лом, и́же су́ть се́дмь духо́в Бо́жиих:

⁶ И пред престо́лом мо́ре сткля́но, подо́бно криста́ллу: и посреде́ престо́ла и о́крест престо́ла четы́ри живо́тна испо́лнена оче́с спреди́ и созади́.

⁷ И живо́тно пе́рвое подо́бно льву́, и второ́е живо́тно подо́бно телцу́, и тре́тие живо́тно иму́щее лице́ я́ко челове́к, и четве́ртое живо́тно подо́бно орлу́ летя́щу.

⁸ И живо́тна четы́ри, еди́но ко́еждо и́х име́яху по ше́сть кри́л о́крест, и внутрьу́ду испо́лнена оче́с: и поко́я не и́мут де́нь и но́щь, глаго́люще: свя́т, свя́т, свя́т Госпо́дь Бо́г Вседержи́тель, и́же бе́ и сы́й и гряды́й.

⁹ И егда́ да́ша живо́тная сла́ву и че́сть и благодаре́ние Седя́щему на престо́ле, Живу́щему во ве́ки веко́в,

¹⁰ Падо́ша два́десять и четы́ри ста́рцы пред Седя́щим на престо́ле, и поклони́шася Живу́щему во ве́ки веко́в, и положи́ша венцы́ своя́ пред престо́лом, глаго́люще:

¹¹ Досто́ин еси́, Го́споди, прия́ти сла́ву и че́сть и си́лу, я́ко Ты́ еси́ созда́л вся́ческая, и во́лею Твое́ю су́ть, и сотворе́на.

Глава 5

¹ И ви́дех в десни́це Седя́щаго на престо́ле кни́гу напи́сану внутрьу́ду и внеу́ду, запеча́тану седмию́ печа́тию.

² И ви́дех А́нгела кре́пка пропове́дающа гла́сом вели́ким: кто́ есть досто́ин разгну́ти кни́гу и разреши́ти печа́ти ея́?

³ И никто́же можа́ше ни на небеси́, ни на земли́, ниже́ под земле́ю, разгну́ти кни́гу, ниже́ зре́ти ю́.

⁴ И а́з пла́кахся мно́го, я́ко ни еди́н обре́теся досто́ин разгну́ти и прочести́ кни́гу, ниже́ зре́ти ю́.

⁵ И еди́н от ста́рец глаго́ла ми́: не пла́чися: се́, победи́л е́сть ле́в, и́же сы́й от коле́на Иу́дова, ко́рень Дави́дов, разгну́ти кни́гу и разреши́ти се́дмь печа́тей ея́.

⁶ И ви́дех, и се́, посреде́ престо́ла и четы́рех живо́тных и посреде́ ста́рец А́гнец стоя́щь я́ко заколе́н, иму́щь рого́в се́дмь и оче́с се́дмь, е́же е́сть се́дмь духо́в Бо́жиих, по́сланных во всю́ зе́млю.

⁷ И прии́де и прия́т кни́гу от десни́цы Седя́щаго на престо́ле.

⁸ И егда́ прия́т кни́гу, четы́ри живо́тна и два́десять и четы́ри ста́рцы падо́ша пред А́гнцем, иму́ще ки́йждо гу́сли и фиа́лы зла́ты по́лны фимиа́ма, и́же су́ть моли́твы святы́х:

⁹ И пою́т пе́снь но́ву, глаго́люще: досто́ин еси́ прия́ти кни́гу и отве́рзти печа́ти ея́, я́ко закла́лся и искупи́л еси́ Богови на́с Кро́вию Свое́ю от вся́каго коле́на и язы́ка и люде́й и племе́н,

¹⁰ И сотвори́л еси́ на́с Богови на́шему цари́ и иере́и: и воцари́мся на земли́.

¹¹ И ви́дех, и слы́шах гла́с А́нгелов мно́гих о́крест престо́ла и живо́тных и ста́рец, и бе́ число́ и́х ты́сяща ты́сящами, ^[303]

¹² Глаго́люще гла́сом вели́ким: досто́ин е́сть А́гнец заколе́нный прия́ти си́лу и бога́тство, и прему́дрость и кре́пость, и че́сть и сла́ву и благослове́ние.

¹³ И вся́ко созда́ние, е́же е́сть на небеси́ и на земли́, и под земле́ю и на мо́ри я́же су́ть, и су́щая в ни́х, вся́ слы́шах глаго́лющия: Седя́щему на престо́ле и А́гнцу благослове́ние и че́сть, и сла́ва и держа́ва во ве́ки веко́в.

¹⁴ И четы́ри живо́тна глаго́лаху: ами́нь. И два́десять и четы́ри ста́рцы падо́ша и поклони́шася Живу́щему во ве́ки веко́в.

Глава 6

¹ И ви́дех, егда́ отве́рзе А́гнец еди́ну от седми́ печа́тей, и слы́шах еди́наго от четы́рех живо́тных глаго́люща я́коже гла́с гро́мный: гряди́ и ви́ждь.

² И ви́дех, и се́, ко́нь бе́л, и седя́й на не́м име́яше лу́к, и да́н бы́сть ему́ вене́ц: и изы́де побежда́яй, и да победи́т.

³ И егда́ отве́рзе печа́ть втору́ю, слы́шах второ́е живо́тно глаго́лющее: гряди́ и ви́ждь.

⁴ И изы́де други́й ко́нь ры́жь: и седя́щему на не́м дано́ бы́сть взя́ти ми́р от земли́, и да убию́т дру́г дру́га: и да́н бы́сть ему́ ме́чь вели́кий.

⁵ И егда́ отве́рзе тре́тию печа́ть, слы́шах тре́тие живо́тно глаго́лющее: гряди́ и ви́ждь. И ви́дех, и се́, ко́нь во́рон, и седя́й на не́м име́яше ме́рило в руце́ свое́й.

⁶ И слы́шах гла́с посреде́ четы́рех живо́тных глаго́лющий: ме́ра пшени́цы за дина́рь и три́ ме́ры ячме́ня за дина́рь: и еле́а и вина́ не вреди́.

⁷ И егда́ отве́рзе четве́ртую печа́ть, слы́шах гла́с четве́ртаго живо́тна глаго́лющий: гряди́ и ви́ждь.

⁸ И ви́дех, и се́, ко́нь бле́д, и седя́й на не́м, и́мя ему́ сме́рть: и а́д идя́ше всле́д его́: и дана́ бы́сть ему́ о́бласть на четве́ртей ча́сти земли́ уби́ти ору́жием и гла́дом, и сме́ртию и зверьми́ земны́ми.

⁹ И егда́ отве́рзе пя́тую печа́ть, ви́дех под олтаре́м ду́ши избие́нных за сло́во Бо́жие и за свиде́тельство, е́же име́яху.

¹⁰ И возопи́ша гла́сом вели́ким, глаго́люще: доко́ле, Влады́ко Святы́й и И́стинный, не су́диши и не мсти́ши кро́ве на́шея от живу́щих на земли́?

¹¹ И даны́ бы́ша коему́ждо и́х ри́зы белы́, и рече́но бы́сть и́м, да почи́ют еще́ вре́мя ма́ло, до́ндеже сконча́ются и клевре́ти и́х и бра́тия и́х, иму́щии избие́ни бы́ти, я́коже и ти́и.

¹² И ви́дех, егда́ отве́рзе шесту́ю печа́ть, и се́, бы́сть тру́с ве́лий, и со́лнце мра́чно бы́сть я́ко вре́тище вла́сяно, и луна́ бы́сть я́ко кро́вь:

¹³ И зве́зды небе́сныя падо́ша на зе́млю, я́коже смоко́вница отмета́ет пу́пы своя́, от ве́тра вели́ка дви́жима:

¹⁴ И не́бо отлучи́ся я́ко сви́ток свива́емо, и вся́ка гора́ и о́стров от ме́ст свои́х дви́гнушася:

¹⁵ И ца́рие зе́мстии и вельмо́жи, и бога́тии и ты́сящницы и си́льнии, и вся́к ра́б и вся́к свобо́дь скры́шася в пеще́рах и ка́мении го́рстем,

¹⁶ И глаго́лаша гора́м и ка́мению: пади́те на ны́ и покры́йте ны́ от лица́ седя́щаго на престо́ле и от гне́ва а́гнча:

¹⁷ Я́ко прии́де де́нь вели́кий гне́ва Его́, и кто́ мо́жет ста́ти?

Глава 7

¹ И по се́м ви́дех четы́ри А́нгелы стоя́щия на четы́рех у́глех земли́, держа́щия четы́ри ве́тры зе́мския, да не ды́шет ве́тр на зе́млю, ни на мо́ре, ни на вся́ко дре́во.

² И ви́дех и́наго А́нгела восходя́ща от восхо́да со́лнца, иму́ща печа́ть Бо́га жива́го. И возопи́ гла́сом ве́лиим к четы́рем А́нгелом, и́мже дано́ бы́сть вреди́ти зе́млю и мо́ре, глаго́ля:

³ Не вреди́те ни земли́, ни мо́ря, ни древе́с, до́ндеже запечатле́ем рабы́ Бо́га на́шего на челе́х и́х.

⁴ И слы́шах число́ запечатле́нных: сто́ четы́редесять четы́ри ты́сящи запечатле́нных от вся́каго коле́на сыно́в Изра́илевых.

⁵ От коле́на Иу́дова двана́десять ты́сящ запечатле́нных: от коле́на Руви́мова двана́десять ты́сящ запечатле́нных: от коле́на Га́дова двана́десять ты́сящ запечатле́нных:

⁶ От коле́на Аси́рова двана́десять ты́сящ запечатле́нных: от коле́на Неффали́мля двана́десять ты́сящ запечатле́нных: от коле́на Манасси́ина двана́десять ты́сящ запечатле́нных:

⁷ От коле́на Симео́нова двана́десять ты́сящ запечатле́нных: от коле́на Леви́ина двана́десять ты́сящ запечатле́нных: от коле́на Иссаха́рова двана́десять ты́сящ запечатле́нных:

⁸ От коле́на Завуло́ня двана́десять ты́сящ запечатле́нных: от коле́на Ио́сифова двана́десять ты́сящ запечатле́нных: от коле́на Вениами́нова двана́десять ты́сящ запечатле́нных.

⁹ По си́х ви́дех, и се́, наро́д мно́г, его́же исчести́ никто́же мо́жет, от вся́каго язы́ка и коле́на, и люди́й и племе́н, стоя́ще пред престо́лом и пред А́гнцем, облече́ны в ри́зы белы́, и фи́ницы в рука́х и́х.

¹⁰ И возопи́ша гла́сом ве́лиим, глаго́люще: спасе́ние седя́щему на престо́ле Бо́гу на́шему и А́гнцу.

¹¹ И вси́ А́нгели стоя́ху о́крест престо́ла и ста́рец и четы́рех живо́тных: и падо́ша на лицы́ пред престо́лом и поклони́шася Бо́гу,

¹² Глаго́люще: ами́нь: благослове́ние и сла́ва, и прему́дрость и хвала́, и че́сть и си́ла и кре́пость Бо́гу на́шему во ве́ки веко́в. Ами́нь.

¹³ И отвеща́ еди́н от ста́рец, глаго́ля ми́: си́и облече́ннии в ри́зы бе́лыя кто́ су́ть и отку́ду приидо́ша?

¹⁴ И ре́х ему́: го́споди, ты́ ве́си. И рече́ ми: си́и су́ть, и́же приидо́ша от ско́рби вели́кия, и испра́ша ри́зы своя́, и убели́ша ри́зы своя́ в Кро́ви А́гнчи:

¹⁵ Сего́ ра́ди су́ть пред престо́лом Бо́жиим и слу́жат Ему́ де́нь и но́щь в це́ркви Его́, и Седя́й на престо́ле всели́тся в ни́х:

¹⁶ Не вза́лчут ктому́, ниже́ вжа́ждут, не и́мать же па́сти на ни́х со́лнце, ниже́ вся́к зно́й:

¹⁷ Я́ко А́гнец, и́же посреде́ престо́ла, упасе́т я́ и наста́вит и́х на живо́тныя исто́чники во́д, и оты́мет Бо́г вся́ку сле́зу от о́чию и́х.

Глава 8

¹ И егда́ отве́рзе седму́ю печа́ть, бы́сть безмо́лвие на небеси́ я́ко по́л часа́.

² И ви́дех се́дмь А́нгелов, и́же пред Бо́гом стоя́ху: и дано́ бы́сть и́м се́дмь тру́б.

³ И други́й А́нгел прии́де и ста́ пред олтаре́м, име́яй кади́лницу зла́ту: и даны́ бы́ша ему́ фимиа́ми мно́зи, да да́ст моли́твам святы́х все́х на олта́рь златы́й су́щий пред престо́лом.

⁴ И изы́де ды́м кади́лный моли́твами святы́х от руки́ А́нгела пред Бо́га.

⁵ И взя́т А́нгел кади́лницу, и напо́лни ю́ от огня́ су́щаго на олтари́, и положи́ на земли́: ^[304] и бы́ша гла́си и гро́ми и блиста́ния и тру́с.

⁶ И се́дмь А́нгел, и́же име́яху се́дмь тру́б, угото́вашася, да востру́бят.

⁷ И пе́рвому А́нгелу воструби́вшу, бы́сть гра́д и о́гнь, сме́шены с кро́вию, и падо́ша на зе́млю: и тре́тия ча́сть дре́ва погоре́, и вся́ка трава́ зла́чная погоре́.

⁸ И вторы́й А́нгел воструби́, и я́ко гора́ вели́ка огне́м жего́ма вве́ржена бы́сть в мо́ре: и бы́сть тре́тия ча́сть мо́ря кро́вь,

⁹ И у́мре тре́тия ча́сть созда́ний су́щих в мо́ри, иму́щих ду́ши, и тре́тия ча́сть корабле́й поги́бе.

¹⁰ И тре́тий А́нгел воструби́, и паде́ с небесе́ звезда́ вели́ка, горя́щи я́ко свеща́, и паде́ на тре́тию ча́сть ре́к и на исто́чники водны́я:

¹¹ И и́мя звезде́ глаго́лется а́псинфос: и бы́сть тре́тия ча́сть во́д я́ко пелы́нь, и мно́зи от челове́к умро́ша от во́д, я́ко го́рьки бе́ша.

¹² И четве́ртый А́нгел воструби́, и уя́звена бы́сть тре́тия ча́сть со́лнца и тре́тия ча́сть луны́ и тре́тия ча́сть зве́зд, да затми́тся тре́тия ча́сть и́х, и дне́ тре́тия ча́сть да не све́тит, и но́щь та́кожде.

¹³ И ви́дех и слы́шах еди́наго А́нгела паря́ща посреде́ небесе́, глаго́люща гла́сом вели́ким: го́ре, го́ре, го́ре живу́щим на земли́ от про́чих гласо́в тру́бных трие́х А́нгел хотя́щих труби́ти.

Глава 9

¹ И пя́тый А́нгел воструби́, и ви́дех звезду́ с небесе́ спа́дшу на зе́млю: и да́н бы́сть е́й клю́чь студенца́ бе́здны:

² И отве́рзе студенца́ бе́здны, и взы́де ды́м от студенца́ я́ко ды́м пе́щи вели́ки, и оме́рче со́лнце и возду́х от ды́ма студени́чнаго.

³ И от ды́ма изыдо́ша пру́зи на зе́млю, и дана́ бы́сть и́м о́бласть, я́коже и́мут о́бласть скорпи́и земны́я.

⁴ И рече́но бы́сть и́м, да не вредя́т травы́ земны́я, ни вся́каго зла́ка, ни вся́каго дре́ва, но челове́ки то́чию, и́же не и́мут печа́ти Бо́жия на челе́х свои́х.

⁵ И дано́ бы́сть и́м, да не убию́т и́х, но да му́ку прии́мут пя́ть ме́сяцей: и муче́ние и́х я́ко муче́ние скорпи́ево, егда́ усе́кнет челове́ка.

⁶ И в ты́я дни́ взы́щут челове́цы сме́рти, и не обря́щут ея́: и вожделе́ют умре́ти, и убежи́т от ни́х сме́рть.

⁷ И уподобле́ния пруго́в подо́бна ко́нем угото́вленым на бра́нь: и на глава́х и́х я́ко венцы́ уподо́блени зла́ту, и ли́ца и́х я́ко ли́ца челове́ческа:

⁸ И име́яху власы́, я́ко власы́ же́нския, и зу́бы и́х, я́ко льво́в бе́ша:

⁹ И име́яху броня́, я́ко броня́ желе́зны, и гла́с кри́л и́х, я́ко гла́с колесни́ц, егда́ ко́ни мно́зи теку́т на бра́нь:

¹⁰ И име́яху о́шибы подо́бны скорпи́иным, и жа́ла бя́ху во о́шибех и́х: и дана́ бе́ о́бласть и́м вреди́ти челове́ки пя́ть ме́сяц.

¹¹ И име́ли над собо́ю царя́ а́нгела бе́здны, ему́же и́мя Евре́йски Ава́ддон, а е́ллински Аполли́он. ^[305]

¹² Го́ре еди́но оты́де: се́, гряду́т еще́ два́ го́ря по си́х.

¹³ И шесты́й А́нгел воструби́, и слы́шах гла́с еди́н от четы́рех рого́в олтаря́ злата́го су́щаго пред Бо́гом,

¹⁴ Глаго́лющий шесто́му А́нгелу име́ющу трубу́: разреши́ четы́ри А́нгелы свя́заны при реце́ вели́цей Евфра́т.

¹⁵ И разреше́ни бы́ша четы́ри А́нгели угото́вани на ча́с и де́нь, и ме́сяц и ле́то, да избию́т тре́тию ча́сть челове́к.

¹⁶ И число́ во́инов ко́нных две́ тме́ те́м: и слы́шах число́ и́х.

¹⁷ И та́ко ви́дех в виде́нии ко́ни, и седя́щия на ни́х иму́щия броня́ о́гненны и иаки́нфовы и жу́пелны: и главы́ ко́нем [и́х] я́ко главы́ льво́м, и из у́ст и́х исхожда́ше о́гнь и ды́м и жу́пел.

¹⁸ И от трие́х я́зв си́х поги́бе тре́тия ча́сть челове́ков, от огня́ и от ды́ма и от жу́пела, исходя́щих из у́ст и́х:

¹⁹ О́бласть бо ко́ней во усте́х и́х бе́ [и во о́шибех и́х], и ^[306] о́шиби и́х подо́бни змие́м, иму́ще главы́ и те́ми па́кости де́юще.

²⁰ И про́чии от челове́к, и́же не врежде́ни бы́ша ^[307] я́зывами си́ми, ниже́ пока́яшася от де́л ру́к свои́х, да не покло́нятся де́моном, ни и́долом златы́м и сре́бряным, и ме́дяным и ка́менным и древяны́м, и́же ни ви́дети мо́гут, ни слы́шати, ни ходи́ти:

²¹ И не пока́яшася от уби́йств свои́х, ни от волхвова́ний свои́х, ниже́ от блуда́ своего́, ниже́ от та́тьб свои́х.

Глава 10

¹ И ви́дех и́наго А́нгела кре́пка сходя́ща с небесе́, оболче́на во о́блак, и дуга́ над главо́ю [его́], и лице́ его́ я́ко со́лнце, и но́зе его́ я́ко столпи́ о́гнени,

² И име́яше в руце́ свое́й кни́гу разгибе́ну: и поста́ви но́гу свою́ десну́ю на мо́ри, а шу́юю на земли́,

³ И возопи́ гла́сом вели́ким, я́ко ле́в рыка́я: и егда́ возгласи́, глаго́лаша се́дмь громо́в гла́сы своя́.

⁴ И егда́ возгласи́ша ^[308] се́дмь громо́в гла́сы своя́, хоте́х писа́ти: и слы́шах гла́с с небесе́ глаго́лющь ми́: запечатле́й, я́же глаго́лаша се́дмь громо́в, и сего́ не пиши́.

⁵ И А́нгел, его́же ви́дех стоя́ща на мо́ри и на земли́, воздви́же ру́ку свою́ на не́бо

⁶ И кля́тся Живу́щим во ве́ки веко́в, и́же созда́ не́бо и я́же на не́м, и зе́млю и я́же на не́й, и мо́ре и я́же в не́м, я́ко ле́та уже́ не бу́дет:

⁷ Но во дни́ гла́са седма́го А́нгела, егда́ и́мать воструби́ти, тогда́ сконча́ется та́йна Бо́жия, я́коже благовести́ Свои́ми рабы́ проро́ки.

⁸ И гла́с его́ слы́шах с небесе́ па́ки глаго́лющь со мно́ю, и глаго́ла: иди́ и приими́ кни́жицу разгну́тую в руце́ А́нгела стоя́щаго на мо́ри и на земли́.

⁹ И идо́х ко А́нгелу, глаго́ля ему́: да́ждь ми́ кни́жицу. И рече́ ми́: приими́ и сне́ждь ю́: и горька́ бу́дет во чре́ве твое́м, но во усте́х ти́ сладка́ бу́дет я́ко ме́д.

¹⁰ И прия́х кни́гу от руки́ А́нгела и снедо́х ю́: и бе́ во усте́х мои́х я́ко ме́д сладка́: и егда́ снедо́х ю́, горька́ бя́ше во чре́ве мое́м.

¹¹ И рече́ ми́: подоба́ет ти́ па́ки проро́чествовати в лю́дех и во племене́х, и во язы́цех и в царе́х мно́зех.

Глава 11

¹ И дана́ ми́ бы́сть тро́сть подо́бна жезлу́, глаго́ля: воста́ни и изме́ри це́рковь Бо́жию и олта́рь, и кла́няющияся в не́й:

² А дво́р су́щий вну́трь ^[309] це́ркве изнеси́ ^[310] внеу́ду, ниже́ изме́ри его́, зане́ да́н бы́сть язы́ком: и гра́д святы́й поперу́т четы́редесять и два́ ме́сяцы.

³ И да́м обе́ма свиде́телема Мои́ма, и прорица́ти бу́дут дни́й ты́сящу две́сте и шестьдеся́т, оболче́на во вре́тище.

⁴ Си́и су́ть две́ ма́слицы и два́ све́щника пред Бо́гом земли́ стоя́ща.

⁵ И и́же и́м непра́вду сотвори́т, о́гнь исхо́дит из у́ст и́х и поя́ст враги́ и́х: и и́же восхо́щет оби́дети и́х, сему́ подоба́ет убие́ну бы́ти.

⁶ И си́и и́мут о́бласть затвори́ти не́бо, да не сни́дет до́ждь [на зе́млю] во дни́ прорица́ния и́х, и о́бласть и́мут на вода́х, обраща́ти я́ в кро́вь и порази́ти зе́млю вся́кою я́звою, ели́жды а́ще восхо́щут.

⁷ И егда́ сконча́ют свиде́тельство свое́, зве́рь, и́же исхо́дит от бе́здны, сотвори́т с ни́ми бра́нь и победи́т и́х и убие́т я́,

⁸ И тру́пы и́х оста́вит на сто́гнах гра́да вели́каго, и́же нарица́ется духо́вне Cодо́м и Еги́пет, иде́же и Госпо́дь на́ш ра́спят бы́сть.

⁹ И зре́ти и́мут от люди́й и племе́н, и от язы́к и коле́н, телеса́ и́х дни́ три́ и по́л, и тру́пы и́х не оста́вят положи́ти во гробе́х.

¹⁰ И живу́щии на земли́ возра́дуются и возвеселя́тся о ни́х, и да́ры по́слют дру́г ко дру́гу, я́ко о́ба сия́ проро́ка му́чиста живу́щия на земли́.

¹¹ И по трие́х дне́х и по́л, ду́х живо́тенвни́дет в ня́ от Бо́га, и ста́нут [о́ба] на нога́х свои́х: и стра́х ве́лий нападе́т на зря́щих и́х.

¹² И услы́шат гла́с ве́лий с небесе́, глаго́лющь и́м: взы́дита се́мо. И взыдо́ста на не́бо на о́блацех, и ви́деша я́ врази́ и́х.

¹³ И в ча́с то́й тру́с бы́сть ве́лий, и деся́тая ча́сть гра́да паде́, и поги́бе тру́сом име́н челове́ческих се́дмь ты́сящ: и про́чии пристра́шни бы́ша и да́ша сла́ву Бо́гу небе́сному.

¹⁴ Го́ре второ́е оты́де: се́, го́ре тре́тие гряде́т ско́ро.

¹⁵ И седмы́й А́нгел воструби́, и бы́ша гла́си вели́цы на небесе́х, глаго́люще: бы́сть ца́рство міра Го́спода на́шего и Христа́ Его́, и воцари́тся во ве́ки веко́в.

¹⁶ И два́десять и четы́ри ста́рцы, пред Бо́гом седя́щии на престо́лех свои́х, падо́ша на ли́ца своя́ и поклони́шася Бо́гу,

¹⁷ Глаго́люще: хва́лим Тя́, Го́споди Бо́же Вседержи́телю, и́же сы́й и бе́ и гряды́й, я́ко прия́л еси́ си́лу Твою́ вели́кую и воцари́лся еси́:

¹⁸ И язы́цы прогне́вашася: и прии́де гне́в Тво́й, и вре́мя ме́ртвым су́д прия́ти, и да́ти мзду́ рабо́м Твои́м проро́ком и святы́м и боя́щимся и́мене Твоего́, ма́лым и вели́ким, и растли́ти посмра́ждшия ^[311] зе́млю.

¹⁹ И отве́рзеся хра́м Бо́жий на небеси́, и яви́ся киво́т заве́та Его́ в хра́ме Его́: и бы́ша блиста́ния и гла́си, и гро́ми и тру́с, и гра́д вели́к.

Глава 12

¹ И зна́мение ве́лие яви́ся на небеси́: жена́ облече́на в со́лнце, и луна́ под нога́ма ея́, и на главе́ ея́ вене́ц от зве́зд двоюна́десяте:

² И во чре́ве иму́щи, вопие́т боля́щи и стра́ждущи роди́ти.

³ И яви́ся и́но зна́мение на небеси́: и се́, зми́й вели́к че́рмен, име́я гла́в се́дмь и рого́в де́сять, и на глава́х его́ се́дмь вене́ц:

⁴ И хо́бот его́ отто́рже тре́тию ча́сть зве́зд небе́сных и положи́ я́ в зе́млю ^[312]. И зми́й стоя́ше пред жено́ю хотя́щею роди́ти, да, егда́ роди́т, сне́сть ча́до ея́.

⁵ И роди́ сы́на му́жеска, и́же и́мать упасти́ вся́ язы́ки жезло́м желе́зным: и восхище́но бы́сть ча́до ея́ к Бо́гу и престо́лу Его́.

⁶ А жена́ бежа́ в пусты́ню, иде́же име́ ме́сто угото́вано от Бо́га, да та́мо пита́ется дни́й ты́сящу две́сте шестьдеся́т.

⁷ И бы́сть бра́нь на небеси́: Михаи́л и А́нгели его́ бра́нь сотвори́ша со зми́ем, и зми́й бра́ся и а́нгели его́,

⁸ И не возмого́ша, и ме́ста не обре́теся и́м ктому́ на небеси́.

⁹ И вложе́н ^[313] бы́сть зми́й вели́кий, зми́й дре́вний, нарица́емый диа́вол и сатана́, льстя́й вселе́нную всю́, и вложе́н ^[314] бы́сть на зе́млю, и а́ггели его́ с ни́м низве́ржени бы́ша.

¹⁰ И слы́шах гла́с ве́лий на небеси́, глаго́лющь: ны́не бы́сть спасе́ние и си́ла и ца́рство Бо́га на́шего и о́бласть Христа́ Его́, я́ко низложе́н бы́сть клеветни́к бра́тии на́шея, оклевеща́я и́х пред Бо́гом на́шим де́нь и но́щь.

¹¹ И ти́и победи́ша его́ кро́вию А́гнчею и сло́вом свиде́тельства своего́, и не возлюби́ша ду́ш свои́х да́же до сме́рти.

¹² Сего́ ра́ди весели́теся, небеса́ и живу́щии на ни́х. Го́ре живу́щим на земли́ и мо́ри, я́ко сни́де диа́вол к ва́м, име́я я́рость вели́кую, ве́дый, я́ко вре́мя ма́ло и́мать.

¹³ И егда́ ви́де зми́й, я́ко низложе́н бы́сть на зе́млю, гоня́ше жену́, я́же роди́ му́жеска.

¹⁴ И дана́ бы́ша жене́ два́ крила́ орла́ вели́каго, да пари́т в пусты́ню в ме́сто свое́, иде́же препита́на бя́ше ту́ вре́мя и време́н и по́л вре́мене, от лица́ змии́на.

¹⁵ И испусти́ зми́й за жено́ю из у́ст свои́х во́ду я́ко реку́, да ю́ в реце́ потопи́т.

¹⁶ И помо́же земля́ жене́, и отве́рзе земля́ уста́ своя́, и пожре́ реку́, ю́же изведе́ зми́й от у́ст свои́х.

¹⁷ И разгне́вася зми́й на жену́ и и́де сотвори́ти бра́нь со оста́вшим се́менем ея́, и́же соблюда́ют за́поведи Бо́жия и име́ют свиде́тельство Иису́с Христо́во.

Глава 13

¹ И ста́х на песце́ морсте́м: и ви́дех из мо́ря зве́ря исходя́ща, иму́ща гла́в се́дмь и рого́в де́сять, и на ро́зех его́ вене́ц де́сять, а на глава́х его́ имена́ ху́лна.

² Зве́рь, его́же ви́дех, бе́ подо́бен ры́си, и но́зе ему́ я́ко медве́ди, и уста́ его́ я́ко уста́ льво́ва: и даде́ ему́ зми́й си́лу свою́ и престо́л сво́й и о́бласть вели́кую.

³ И ви́дех еди́ну от гла́в его́ я́ко заколе́ну в сме́рть, и я́зва сме́рти его́ исцеле́. И чуди́ся вся́ земля́ всле́д зве́ря, и поклони́шася зми́ю, и́же даде́ о́бласть зве́рю,

⁴ И поклони́шася зве́рю, глаго́люще: кто́ подо́бен зве́рю и кто́ мо́жет ра́товатися с ни́м?

⁵ И дана́ бы́ша ему́ уста́ глаго́люща вели́ка и ху́лна, и дана́ бы́сть ему́ о́бласть твори́ти ме́сяц четы́редесять два́.

⁶ И отве́рзе уста́ своя́ в хуле́ние к Бо́гу, ху́лити и́мя Его́ и селе́ние Его́ и живу́щия на небеси́.

⁷ И дано́ бы́сть ему́ бра́нь твори́ти со святы́ми и победи́ти я́: и дана́ бы́сть ему́ о́бласть на вся́цем коле́не [люди́й] и на язы́цех и племене́х.

⁸ И покло́нятся ему́ вси́ живу́щии на земли́, и́мже не напи́сана су́ть имена́ в кни́гах живо́тных А́гнца заколе́наго от сложе́ния міра.

⁹ А́ще кто́ и́мать у́хо, да слы́шит.

¹⁰ И́же а́ще в плене́ние веде́т, в плене́ние по́йдет: а́ще кто́ ору́жием убие́т, подоба́ет ему́ ору́жием убие́ну бы́ти. Зде́ е́сть терпе́ние и ве́ра святы́х.

¹¹ И ви́дех и́наго зве́ря восходя́щаго от земли́, и име́яше ро́га два́, подо́бна а́гнчым, и глаго́лаше я́ко зми́й.

¹² И вла́сть пе́рваго зве́ря всю́ творя́ше пред ни́м: и творя́ше зе́млю и вся́ живу́щия на не́й поклони́тися пе́рвому зве́рю, ему́же исцеле́на бы́сть я́зва сме́ртная:

¹³ И сотвори́ чудеса́ вели́ка, да и о́гнь сотвори́т сходи́ти с небесе́ на зе́млю пред челове́ки.

¹⁴ И льсти́т живу́щия на земли́, ра́ди зна́мений, я́же дана́ бы́ша ему́ пред зве́рем твори́ти, глаго́ля живу́щим на земли́, сотвори́ти о́браз зве́рю, и́же и́мать я́зву ору́жную и жи́в бы́сть.

¹⁵ И дано́ бы́сть ему́ да́ти ду́х о́бразу звери́ну, да проглаго́лет ико́на звери́на и сотвори́т, да и́же а́ще не покло́нятся о́бразу звери́ному, убие́ни бу́дут.

¹⁶ И сотвори́т вся́ ма́лыя и вели́кия, бога́тыя и убо́гия, свобо́дныя и рабо́тныя, да да́ст и́м начерта́ние на десне́й руце́ и́х или́ на челе́х и́х,

¹⁷ Да никто́же возмо́жет ни купи́ти, ни прода́ти, то́кмо кто́ и́мать начерта́ние, или́ и́мя зве́ря, или́ число́ и́мене его́.

¹⁸ Зде́ му́дрость е́сть. И́же и́мать у́м, да почте́т число́ звери́но: число́ бо челове́ческо е́сть, и число́ его́ ше́сть со́т шестьдеся́т ше́сть.

Глава 14

¹ И ви́дех, и се́, А́гнец стоя́ше на горе́ Сио́нстей, и с Ни́м сто́ и четы́редесять и четы́ри ты́сящи, иму́ще и́мя Отца́ Его́ напи́сано на челе́х свои́х.

² И слы́шах гла́с с небесе́, я́ко гла́с во́д мно́гих и я́ко гла́с гро́ма вели́ка: и гла́с слы́шах гуде́ц гуду́щих в гу́сли своя́

³ И пою́щих я́ко пе́снь но́ву пред престо́лом и пред четы́ри живо́тными и ста́рцы: и никто́же можа́ше навы́кнути пе́сни, то́кмо си́и сто́ и четы́редесять и четы́ри ты́сящи иску́плени от земли́.

⁴ Си́и су́ть, и́же с жена́ми не оскверни́шася, зане́ де́вственницы су́ть: си́и после́дуют А́гнцу, а́може а́ще по́йдет. Си́и су́ть ку́плени от люди́й пе́рвенцы Бо́гу и А́гнцу,

⁵ И во усте́х и́х не обре́теся ле́сть: без поро́ка бо су́ть пред престо́лом Бо́жиим.

⁶ И ви́дех и́наго А́нгела паря́ща посреде́ небесе́, иму́щаго Ева́нгелие ве́чно благовести́ти живу́щим на земли́ и вся́кому пле́мени и язы́ку, и коле́ну и лю́дем,

⁷ Глаго́люща гла́сом вели́ким: убо́йтеся Бо́га и дади́те Ему́ сла́ву, я́ко прии́де ча́с суда́ Его́, и поклони́теся Сотво́ршему не́бо и зе́млю, и мо́ре и исто́чники водны́я.

⁸ И и́н А́нгел всле́д и́де, глаго́ля: паде́, паде́ Вавило́н гра́д вели́кий, зане́ от вина́ я́рости любодея́ния своего́ напои́ вся́ язы́ки.

⁹ И тре́тий А́нгел всле́д его́ и́де, глаго́ля гла́сом вели́ким: и́же а́ще кто́ покланя́ется зве́рю и ико́не его́ и прие́млет начерта́ние на челе́ свое́м или́ на руце́ свое́й,

¹⁰ И то́й и́мать пи́ти от вина́ я́рости Бо́жия, вина́ нерастворе́на ^[315] в ча́ши гне́ва Его́, и бу́дет му́чен огне́м и жу́пелом пред А́нгелы святы́ми и пред А́гнцем:

¹¹ И ды́м муче́ния и́х во ве́ки веко́в восхо́дит, и не и́мут поко́я де́нь и но́щь покланя́ющиися зве́рю и о́бразу его́ и прие́млющии начерта́ние и́мене его́.

¹² Зде́ е́сть терпе́ние святы́х, и́же соблюда́ют за́поведи Бо́жия и ве́ру Иису́сову.

¹³ И слы́шах гла́с с небесе́, глаго́лющь ми́: напиши́: блаже́ни ме́ртвии, умира́ющии о Го́споде отны́не. Е́й, глаго́лет Ду́х, да почи́ют от трудо́в свои́х: дела́ бо и́х хо́дят всле́д с ни́ми.

¹⁴ И ви́дех, и се́, о́блак све́тел, и на о́блаце седя́й подо́бен Сы́ну Челове́ческому, име́я на главе́ свое́й вене́ц зла́т, и в руце́ его́ се́рп о́стр.

¹⁵ И и́н А́нгел изы́де из хра́ма, вопия́ ве́лиим гла́сом седя́щему на о́блаце: посли́ се́рп тво́й и жни́, я́ко прии́де ча́с пожа́ти, зане́ и́зсше трава́ ^[316] земна́я.

¹⁶ И положи́ ^[317] седя́й на о́блаце се́рп сво́й на зе́млю, и пожа́та бы́сть земля́.

¹⁷ И и́н А́нгел изы́де из це́ркве су́щия на небеси́, имы́й и то́й се́рп о́стр.

¹⁸ И и́н А́нгел изы́де от олтаря́, имы́й о́бласть на огни́, и возопи́ кли́чем вели́ким ко иму́щему се́рп о́стрый, глаго́ля: посли́ се́рп тво́й о́стрый и объе́мли ^[318] гро́зды виногра́да земна́го, я́ко созре́ша уже́ гро́здие ея́.

¹⁹ И положи́ ^[319] А́нгел се́рп сво́й на земли́, ^[320] и обере́ виногра́д зе́мский и вложи́ в точи́ло вели́кия я́рости Бо́жия.

²⁰ И испра́но бы́сть точи́ло вне́ гра́да, и изы́де кро́вь от точи́ла да́же до у́зд ко́нских, от ста́дий ты́сяща и ше́сть со́т.

Глава 15

¹ И ви́дех и́но зна́мение на небеси́ ве́лие и чу́дно, се́дмь А́нгел иму́щих се́дмь я́зв после́дних, зане́ в те́х сконча́ется я́рость Бо́жия.

² И ви́дех я́ко мо́ре сткля́но сме́шено со огне́м, и победи́вшия зве́ря и о́браз его́, и начерта́ние его́ и число́ и́мене его́, стоя́щия на мо́ри сткля́нем, иму́щия гу́сли Бо́жия:

³ И поя́ху пе́снь Моисе́а раба́ Бо́жия и пе́снь А́гнчу, глаго́люще: ве́лия и ди́вна дела́ Твоя́, Го́споди Бо́же Вседержи́телю: пра́ведни и и́стинни путие́ Твои́, Царю́ святы́х:

⁴ Кто́ не убои́тся Тебе́, Го́споди, и просла́вит и́мя Твое́? Я́ко еди́н преподо́бен еси́, я́ко вси́ язы́цы прии́дут и покло́нятся пред Тобо́ю: я́ко оправда́ния Твоя́ яви́шася.

⁵ И по си́х ви́дех, и се́, отве́рзеся хра́м ски́нии свиде́ния на небеси́:

⁶ И изыдо́ша се́дмь А́нгел из хра́ма, и́же име́яху се́дмь я́зв, облече́ни в ри́зы льня́ны чи́сты и све́тлы, и препоя́сани на пе́рсех по́ясы златы́ми.

⁷ И еди́но от четы́рех живо́тных даде́ седми́м А́нгелом се́дмь фиа́л златы́х, испо́лненых я́рости Бо́га живу́щаго во ве́ки веко́в.

⁸ И напо́лнися хра́м ды́ма от сла́вы Бо́жия и от си́лы Его́, и никто́же можа́ше вни́ти во хра́м, до́ндеже сконча́ются се́дмь я́зв седми́х А́нгел.

Глава 16

¹ И слы́шах гла́с ве́лий от хра́ма глаго́лющь седми́м А́нгелом: иди́те и изли́йте се́дмь фиа́л я́рости Бо́жия на зе́млю.

² И и́де пе́рвый А́нгел и излия́ фиа́л сво́й на зе́млю: и бы́сть гно́й зо́л и лю́т на челове́цех иму́щих начерта́ние звери́но и кла́няющихся ико́не его́.

³ И вторы́й А́нгел излия́ фиа́л сво́й в мо́ре: и бы́сть кро́вь я́ко мертвеца́, и вся́ка душа́ жива́ у́мре в мо́ри.

⁴ И тре́тий А́нгел излия́ фиа́л сво́й на ре́ки и на исто́чники водны́я: и бы́сть кро́вь.

⁵ И слы́шах А́нгела водна́го глаго́люща: пра́веден еси́, Го́споди, сы́й и и́же бе́, и преподо́бен, я́ко сия́ суди́л еси́:

⁶ Зане́ кро́вь святы́х и проро́к излия́ша, и кро́вь и́м да́л еси́ пи́ти: досто́йни бо су́ть.

⁷ И слы́шах друга́го от олтаря́ глаго́люща: е́й, Го́споди Бо́же Вседержи́телю, и́стинни и пра́ви суди́ Твои́.

⁸ И четве́ртый А́нгел излия́ фиа́л сво́й на со́лнце: и дано́ бы́сть ему́ опаля́ти челове́ки огне́м.

⁹ И опали́шася челове́цы зно́ем вели́ким, и ху́лиша и́мя Бо́жие, и́же и́мать о́бласть на я́звах си́х, и не пока́яшася да́ти Ему́ сла́вы.

¹⁰ И пя́тый А́нгел излия́ фиа́л сво́й на престо́л звери́н: и бы́сть ца́рство его́ омраче́но, и жва́ху язы́ки своя́ от боле́зни,

¹¹ И ху́лиша Бо́га небе́снаго от боле́зни и от я́зв свои́х, и не пока́яшася от де́л свои́х.

¹² И шесты́й А́нгел излия́ фиа́л сво́й на реку́ вели́ку Евфра́т: и изся́че вода́ ея́, да угото́вится пу́ть царе́м су́щим от восто́к со́лнечных.

¹³ И ви́дех из у́ст зми́я и из у́ст зве́ря и из у́ст лжа́го проро́ка ду́хи три́ нечи́стыя, я́ко жа́бы исходя́щия:

¹⁴ Су́ть бо ду́си де́монстии творя́ще зна́мения, и́же исхо́дят к царе́м всея́ вселе́нныя, собра́ти я́ на бра́нь в де́нь то́й вели́кий Бо́га Вседержи́теля.

¹⁵ Се́, гряду́ я́ко та́ть: блаже́н бдя́й и блюды́й ри́зы своя́, да не на́г хо́дит и у́зрят срамоту́ его́.

¹⁶ И собра́ и́х на ме́сто нарица́емое евре́йски Армагеддо́н.

¹⁷ И седмы́й А́нгел излия́ фиа́л сво́й на возду́х: и изы́де гла́с ве́лий от хра́ма небесе́ от престо́ла, глаго́ля: бы́сть.

¹⁸ И бы́ша блиста́ния и гро́ми и гла́си, и бы́сть тру́с вели́к, яко́в николи́же бы́сть, отне́леже бы́ша челове́цы на земли́, толи́к тру́с, та́ко ве́лий.

¹⁹ И бы́сть гра́д вели́к в три́ ча́сти, и гра́ди язы́честии падо́ша, и Вавило́н вели́кий помянове́н бы́сть пред Бо́гом, да́ти ему́ ча́шу вина́ я́рости гне́ва Своего́.

²⁰ И вся́к о́стров бежа́, и го́ры не обрето́шася:

²¹ И гра́д вели́к, я́ко тала́нтес, сни́де с небесе́ на челове́ки: и ху́лиша челове́цы Бо́га от я́звы гра́дныя, я́ко ве́лия е́сть я́зва его́ зело́.

Глава 17

¹ И прии́де еди́н от седми́ А́нгел иму́щих се́дмь фиа́л, и глаго́ла со мно́ю, глаго́ля ми́: прииди́, да покажу́ ти су́д любоде́йцы вели́кия, седя́щия на вода́х мно́гих:

² С не́юже любоде́яша ца́рие зе́мстии, и упи́шася живу́щии на земли́ от вина́ любодея́ния ея́.

³ И веде́ мя в пу́сто ме́сто ду́хом: и ви́дех жену́ седя́щу на зве́ри червле́не, испо́лненем име́н ху́лных, и́же име́яше гла́в се́дмь и рого́в де́сять.

⁴ И жена́ бе́ облечена́ в порфи́ру и червлени́цу, и позлащена́ зла́том и ка́мением драги́м и би́сером, иму́щи ча́шу зла́ту в руце́ свое́й по́лну ме́рзости и скве́рн любодея́ния ея́:

⁵ И на челе́ ея́ напи́сано и́мя: та́йна, Вавило́н вели́кий, ма́ти любоде́йцам и ме́рзостем зе́мским.

⁶ И ви́дех жену́ пия́ну кровьми́ святы́х и кровьми́ свиде́телей Иису́совых, и диви́хся, ви́дев ю́, ди́вом вели́ким.

⁷ И рече́ ми А́нгел: что́ диви́шися? а́з ти́ реку́ та́йну жены́ [сея́] и зве́ря нося́щаго ю́, се́дмь гла́в иму́ща и рого́в де́сять.

⁸ Зве́рь, его́же ви́дел еси́, бе́, и не́сть, и и́мать взы́ти от бе́здны, и в па́губу по́йдет: и удивя́тся живу́щии на земли́, и́мже имена́ не напи́сана су́ть в кни́гу живо́тную от сложе́ния міра, ви́дяще, я́ко зве́рь бе́, и не́сть, и преста.́ ^[321]

⁹ Зде́ у́м, и́же и́мать му́дрость. Се́дмь гла́в го́ры су́ть се́дмь, иде́же жена́ седи́т на ни́х,

¹⁰ И ца́рие се́дмь су́ть: пя́ть и́х па́ло, и еди́н е́сть, [а] други́й еще́ не прии́де: и егда́ прии́дет, ма́ло ему́ е́сть пребы́ти. ^[322]

¹¹ И зве́рь, и́же бе́ и не́сть, и то́й осмы́й е́сть, и от седми́х е́сть, и в па́губу и́дет.

¹² И де́сять рого́в, я́же ви́дел еси́, де́сять царе́й су́ть, и́же ца́рства еще́ не прия́ша, но о́бласть я́ко ца́рие на еди́н ча́с прии́мут со зве́рем.

¹³ Си́и еди́ну во́лю и́мут, и си́лу и о́бласть свою́ зве́рю даду́т:

¹⁴ Си́и со А́гнцем бра́нь сотворя́т, и А́гнец победи́т я́, я́ко Госпо́дь господе́м е́сть и Ца́рь царе́м: и су́щии с Ни́м зва́ннии и избра́ннии и ве́рни.

¹⁵ И глаго́ла ми́: во́ды, я́же еси́ ви́дел, иде́же любоде́йца седи́т, лю́дие и наро́ди су́ть, и племена́ и язы́цы.

¹⁶ И де́сять рого́в, я́же ви́дел еси́ на зве́ри, си́и любоде́йцу возненави́дят, и запусте́вшу сотворя́т ю́ и на́гу, и пло́ть ея́ снедя́т, и сожгу́т ю́ огне́м:

¹⁷ Бо́г бо да́л е́сть в сердца́ и́х, сотвори́ти во́лю Его́, и сотвори́ти еди́ну во́лю, и да́ти ца́рство свое́ зве́рю, до́ндеже сконча́ются глаго́лы Бо́жии.

¹⁸ И жена́, ю́же ви́дел еси́, гра́д е́сть вели́кий, и́же и́мать ца́рство над цари́ земны́ми.

Глава 18

¹ И по си́х ви́дех и́на А́нгела сходя́ща с небесе́, иму́ща о́бласть ве́лию: и земля́ просвети́ся от сла́вы его́.

² И возопи́ в кре́пости, гла́сом ве́лиим глаго́ля: паде́, паде́ Вавило́н вели́кий, и бы́сть жили́ще бесо́м и храни́тель вся́кому ду́ху нечи́сту, и храни́лище все́х пти́ц нечи́стых и ненави́димых: я́ко от вина́ я́рости любодея́ния своего́ напои́ вся́ язы́ки,

³ И ца́рие зе́мстии с не́ю любы́ де́яша, и купцы́ зе́мстии от си́лы пи́щи ея́ ^[323] разбогате́ша.

⁴ И слы́шах гла́с и́н с небесе́, глаго́лющь: изыди́те из нея́, лю́дие Мои́, да не причастите́ся грехо́м ея́ и от я́зв ея́ да не вреди́теся:

⁵ Я́ко прилепи́шася ^[324] греси́ ея́ да́же до небесе́, и помяну́ Бо́г непра́вды ея́.

⁶ Воздади́те е́й, я́ко и та́ воздаде́ ва́м, и усугу́бите е́й сугу́бо по дело́м ея́: ча́шею, е́юже черпа́ [ва́м], черпли́те е́й сугу́бо.

⁷ Ели́ко просла́вися и разсвире́пе, ^[325] толи́ко дади́те е́й му́к и рыда́ний: я́ко в се́рдцы свое́м глаго́лет, [я́ко] сежу́ цари́цею, и вдова́ не́смь, и рыда́ния не и́мам ви́дети.

⁸ Сего́ ра́ди во еди́н де́нь прии́дут я́звы е́й, сме́рть и пла́чь и гла́д, и огне́м сожжена́ бу́дет, я́ко кре́пок Госпо́дь Бо́г судя́й е́й.

⁹ И возрыда́ют и воспла́чутся ея́ ца́рие зе́мстии, любы́ де́явшии с не́ю и разсвире́певшии, егда́ у́зрят ды́м запале́ния ея́,

¹⁰ Издале́ча стоя́ще за стра́х му́к ея́, глаго́люще: го́ре, го́ре, гра́д вели́кий Вавило́н, гра́д кре́пкий, я́ко во еди́н ча́с прии́де су́д тво́й.

¹¹ И купцы́ зе́мстии возрыда́ют и воспла́чутся о не́м, я́ко бреме́н и́х никто́же купу́ет ктому́,

¹² Бреме́н зла́та и сребра́, и ка́мения драга́го и би́сера, и ви́сса и порфи́ры, и ше́лка и черве́ни, и вся́каго дре́ва Фии́нна, и вся́каго сосу́да из ко́сти слоно́выя, и вся́каго сосу́да от дре́ва честна́го, и ме́дяна и желе́зна и мра́морна,

¹³ И кори́цы и фимиа́ма, и ми́ра и Лива́на, и вина́ и еле́а, и семида́ла и пшени́цы, и скота́ и ове́ц, и ко́ней и колесни́ц, и теле́с и ду́ш челове́ческих.

¹⁴ И ово́щи похоте́й души́ твоея́ отыдо́ша от тебе́, и вся́ ту́чная и све́тлая отыдо́ша от тебе́, и ктому́ не и́маши обрести́ и́х.

¹⁵ Купцы́ си́ми обога́щшеся от нея́, издале́ча ста́нут за стра́х муче́ния ея́, рыда́юще и пла́чущеся,

¹⁶ И глаго́люще: го́ре, го́ре, гра́д вели́кий, облече́нный ви́ссом и порфи́рою и червлени́цею, и позлаще́ный зла́том и ка́мением драги́м и би́сером

¹⁷ Я́ко во еди́н ча́с поги́бе толи́ко бога́тство. И вся́к ко́рмчий, и вся́к пла́ваяй в корабле́х, и вся́к ели́к в мо́ри де́лаяй, ^[326] издале́ча ста́ша,

¹⁸ И вопия́ху, ви́дяще ды́м раждеже́ния его́, глаго́люще: ки́й подо́бен гра́ду вели́кому?

¹⁹ И положи́ша пе́рсть на глава́х свои́х, и возопи́ша пла́чущеся и рыда́юще, глаго́люще: го́ре, го́ре, гра́д вели́кий, в не́мже обогати́шася вси́ иму́щии корабли́ в мо́ри, от че́сти ^[327] его́: я́ко еди́нем часо́м запусте́.

²⁰ Весели́ся о се́м, небо, и святи́и Апо́столи и проро́цы, я́ко суди́ Бо́г су́д ва́ш от него́.

²¹ И взя́т еди́н А́нгел кре́пок ка́мень вели́к я́ко же́рнов и ве́рже в мо́ре, глаго́ля: та́ко стремле́нием вве́ржен бу́дет Вавило́н гра́д вели́кий, и не и́мать обрести́ся ктому́:

²² И гла́с гуде́ц и мусики́й, и писка́телей ^[328] и тру́б не и́мать слы́шатися ктому́ в тебе́: и вся́к хитре́ц вся́кия хи́трости не обря́щется ктому́ в тебе́, и шу́м же́рновный не бу́дет слы́шан в тебе́:

²³ И све́т свети́лника не и́мать свети́ти в тебе́ ктому́, и гла́с жениха́ и неве́сты не и́мать слы́шан бы́ти в тебе́ ктому́: я́ко купцы́ твои́ бе́ша вельмо́жи зе́мстии, я́ко волхвова́нии твои́ми прельще́ни бы́ша вси́ язы́цы.

²⁴ И в не́м кро́вь проро́ческа и святы́х обре́теся и все́х избие́нных на земли́.

Глава 19

¹ И по си́х слы́шах гла́с ве́лий наро́да мно́га на небеси́, глаго́лющаго: аллилу́иа: спасе́ние и сла́ва, и че́сть и си́ла Го́споду на́шему,

² Я́ко и́стинни и пра́ви суди́ Его́: я́ко суди́л е́сть любоде́йцу вели́ку, я́же посмради́ ^[329] зе́млю любодея́нием свои́м, и отмсти́л кро́вь рабо́в Свои́х от руки́ ея́.

³ И второ́е ре́ша: аллилу́иа. И ды́м ея́ восхожда́ше во ве́ки веко́в.

⁴ И падо́ша два́десять и четы́ри ста́рцы и четы́ри живо́тна и поклони́шася Богови седя́щему на престо́ле, глаго́люще: ами́нь, аллилу́иа.

⁵ И гла́с изы́де от престо́ла глаго́лющь: по́йте Бо́гу на́шему, вси́ раби́ Его́ и боя́щиися Его́, и ма́лии и вели́цыи.

⁶ И слы́шах я́ко гла́с наро́да мно́га, и я́ко гла́с во́д мно́гих, и я́ко гла́с громо́в кре́пких, глаго́лющих: аллилу́иа, я́ко воцари́ся Госпо́дь Бо́г Вседержи́тель:

⁷ Ра́дуимся и весели́мся, и дади́м сла́ву Ему́: я́ко прии́де бра́к А́гнчий, и жена́ Его́ угото́вила е́сть себе́.

⁸ И дано́ бы́сть е́й облещи́ся в виссо́н чи́ст и све́тел: виссо́н бо оправда́ния святы́х е́сть.

⁹ И глаго́ла ми́: напиши́: блаже́ни зва́ннии на ве́черю бра́ка А́гнча. И глаго́ла ми́: сия́ словеса́ и́стинна Бо́жия су́ть.

¹⁰ И па́д пред нога́ма его́, поклони́хся ему́: и глаго́ла ми́: ви́ждь, ни́: клевре́т ти́ е́смь и бра́тий твои́х иму́щих свиде́тельство Иису́сово: Бо́гу поклони́ся: свиде́тельство бо Иису́сово е́сть Ду́х проро́чествия.

¹¹ И ви́дех не́бо отве́рсто, и се́, ко́нь бе́л, и седя́й на не́м Ве́рен и И́стинен, и правосу́дный и во́инственный:

¹² О́чи же Ему́ [еста́] я́ко пла́мень о́гнен, и на главе́ Его́ венцы́ мно́зи: имы́й и́мя напи́сано, е́же никто́же ве́сть, то́кмо О́н Са́м:

¹³ И облече́н в ри́зу червле́ну кро́вию. И нарица́ется и́мя Его́, Сло́во Бо́жие.

¹⁴ И во́инства небе́сная идя́ху всле́д Его́ на ко́нех бе́лых, облече́ни в виссо́н бе́л и чи́ст.

¹⁵ И из у́ст Его́ изы́де ору́жие остро́, да те́м избие́т язы́ки: и то́й упасе́т я́ жезло́м желе́зным, и то́й пере́т точи́ло вина́ я́рости и гне́ва Бо́жия Вседержи́телева.

¹⁶ И и́мать на ри́зе и на стегне́ Свое́м и́мя напи́сано: Ца́рь царе́м и Госпо́дь господе́м.

¹⁷ И ви́дех еди́наго А́нгела стоя́ща на со́лнце: и возопи́ гла́сом ве́лиим, глаго́ля все́м пти́цам паря́щим посреде́ небесе́: прииди́те и собери́теся на ве́черю вели́кую Бо́жию,

¹⁸ Да сне́сте пло́ти царе́й и пло́ти кре́пких и пло́ти ты́сящников, и пло́ти ко́ней и седя́щих на ни́х, и пло́ти все́х свобо́дных и рабо́в, и ма́лых и вели́ких.

¹⁹ И ви́дех зве́ря и цари́ земны́я и во́и и́х со́браны сотвори́ти бра́нь с Седя́щим на кони́ и с во́инствы Его́.

²⁰ И я́т бы́сть зве́рь и с ни́м лжи́вый проро́к, сотвори́вый зна́мения пред ни́м, и́миже прельсти́ прие́мшия начерта́ние звери́но и покланя́ющияся ико́не его́: жи́ва вве́ржена бы́ста о́ба в е́зеро о́гненное горя́щее жу́пелом:

²¹ А про́чии убие́ни бы́ша ору́жием Седя́щаго на кони́, изше́дшим из у́ст Его́: и вся́ пти́цы насы́тишася от пло́тей и́х.

Глава 20

¹ И ви́дех А́нгела сходя́ща с небесе́, име́юща клю́чь бе́здны и у́же вели́ко в руце́ свое́й:

² И я́т зми́я, зми́я дре́вняго, и́же е́сть диа́вол и сатана́, и связа́ и́ на ты́сящу ле́т,

³ И в бе́здну затвори́ ^[330] его́, и заключи́ его́, и запечатле́ над ни́м, да не прельсти́т ктому́ язы́ки, до́ндеже сконча́ется ты́сяща ле́т: и по си́х подоба́ет ему́ отреше́ну бы́ти на ма́ло вре́мя.

⁴ И ви́дех престо́лы и седя́щия на ни́х, и су́д да́н бы́сть и́м: и ду́ши расте́саных за свиде́тельство Иису́сово и за сло́во Бо́жие, и́же не поклони́шася зве́рю, ни ико́не его́, и не прия́ша начерта́ния на челе́х свои́х и на руце́ свое́й. И ожи́ша и воцари́шася со Христо́м ты́сящу ле́т:

⁵ Про́чии же мертвецы́ не ожи́ша, до́ндеже сконча́ется ты́сяща ле́т. Се́ воскресе́ние пе́рвое.

⁶ Блаже́н и свя́т, и́же и́мать ча́сть в воскресе́нии пе́рвем: на ни́хже сме́рть втора́я не и́мать о́бласти, но бу́дут иере́е Бо́гу и Христу́ и воцаря́тся с Ни́м ты́сящу ле́т.

⁷ И егда́ сконча́ется ты́сяща ле́т, разреше́н бу́дет сатана́ от темни́цы своея́ и изы́дет прельсти́ти язы́ки су́щия на четы́рех у́глех земли́, Го́га и Маго́га, собра́ти и́х на бра́нь, и́хже число́ я́ко песо́к морски́й.

⁸ И взыдо́ша на широту́ земли́ и обыдо́ша святы́х ста́н и гра́д возлю́бленный.

⁹ И сни́де о́гнь от Бо́га с небесе́ и пояде́ я́:

¹⁰ И диа́вол льстя́й и́х вве́ржен бу́дет в е́зеро о́гненно и жу́пелно, иде́же зве́рь и лжи́вый проро́к: и му́чени бу́дут де́нь и но́щь во ве́ки веко́в.

¹¹ И ви́дех престо́л вели́к бе́л и Седя́щаго на не́м, его́же от лица́ бежа́ не́бо и земля́, и ме́сто не обре́теся и́м.

¹² И ви́дех мертвецы́ ма́лыя и вели́кия стоя́щя пред Бо́гом, и кни́ги разгну́шася: и и́на кни́га отве́рзеся, я́же е́сть живо́тная: и су́д прия́ша мертвецы́ от напи́саных в кни́гах, по дело́м и́х.

¹³ И даде́ мо́ре мертвецы́ своя́, и сме́рть и а́д да́ста своя́ мертвецы́: и су́д прия́ша по дело́м свои́м,

¹⁴ И сме́рть и а́д вве́ржена бы́ста в е́зеро о́гненное. И се́ е́сть втора́я сме́рть.

¹⁵ И и́же не обре́теся в кни́зе живо́тней напи́сан, вве́ржен бу́дет в е́зеро о́гненное.

Глава 21

¹ И ви́дех не́бо но́во и зе́млю но́ву: пе́рвое бо не́бо и земля́ пе́рвая преидо́ста, и мо́ря не́сть ктому́.

² И а́з Иоа́нн ви́дех гра́д святы́й, Иерусали́м но́в сходя́щь от Бо́га с небесе́, пригото́ван я́ко неве́сту укра́шену му́жу своему́.

³ И слы́шах гла́с ве́лий с небесе́, глаго́лющь: се́, ски́ния Бо́жия с челове́ки, и всели́тся с ни́ми: и ти́и лю́дие Его́ бу́дут, и Са́м Бо́г бу́дет с ни́ми Бо́г и́х:

⁴ И оты́мет Бо́г вся́ку сле́зу от о́чию и́х, и сме́рти не бу́дет ктому́: ни пла́ча, ни во́пля, ни боле́зни не бу́дет ктому́, я́ко пе́рвая мимоидо́ша.

⁵ И рече́ Седя́й на престо́ле: се́, нова́ вся́ творю́. И глаго́ла ми́: напиши́, я́ко сия́ словеса́ и́стинна и ве́рна су́ть.

⁶ И рече́ ми: соверши́шася. А́з е́смь А́льфа и Оме́га, нача́ток и коне́ц: а́з жа́ждущему да́м от исто́чника воды́ живо́тныя ту́не.

⁷ Побежда́яй насле́дит вся́, и бу́ду ему́ Бо́г, и то́й бу́дет Мне́ в сы́на.

⁸ Страшли́вым же и неве́рным, и скве́рным и уби́йцам, и блу́д творя́щим и ча́ры творя́щим, идоложе́рцем и все́м лжи́вым, ча́сть и́м в е́зере горя́щем огне́м и жу́пелом, е́же е́сть сме́рть втора́я.

⁹ И прии́де ко мне́ еди́н от седми́ А́нгел, иму́щих се́дмь фиа́л испо́лненых седми́х я́зв после́дних, и рече́ ко мне́, глаго́ля: гряди́, покажу́ ти неве́сту А́гнчу жену́.

¹⁰ И веде́ мя ду́хом на гору́ вели́ку и высоку́ и показа́ ми гра́д вели́кий, святы́й Иерусали́м низходя́щь с небесе́ от Бо́га,

¹¹ Иму́щь сла́ву Бо́жию: и свети́ло его́ подо́бно ка́мени драго́му, я́ко ка́мени Иа́спису кристаллови́дну:

¹² Иму́щь сте́ну вели́ку и высоку́, иму́щь вра́т двана́десять, и на врате́х А́нгелов двана́десять и имена́ напи́сана, я́же су́ть имена́ двана́десятим коле́ном сыно́в Изра́илевых:

¹³ От восто́ка врата́ тро́я и от се́вера врата́ тро́я, от ю́га врата́ тро́я и от за́пада врата́ тро́я.

¹⁴ И стена́ гра́да име́яше основа́ний двана́десять, и на ни́х име́н двана́десять Апо́столов А́гнчих.

¹⁵ И глаго́ляй со мно́ю име́яше тро́сть зла́ту, да изме́рит гра́д и врата́ его́ и сте́ны его́.

¹⁶ И гра́д на четы́ри у́глы стои́т, и долгота́ его́ толи́ка е́сть, ели́ка же и широта́. И изме́ри гра́д тро́стию на ста́дий двана́десять ты́сящ: долгота́ и широта́ и высота́ его́ ра́вна су́ть.

¹⁷ И разме́ри сте́ну его́ во сто́ и четы́ридесять и четы́ри ла́кти, в ме́ру челове́ческу, я́же е́сть А́нгела.

¹⁸ И бе́ созда́ние стены́ его́ Иа́спис: и гра́д зла́то чи́сто, подо́бен стклу́ чи́сту.

¹⁹ И основа́ния стены́ гра́да вся́ким драги́м ка́мением укра́шена бя́ху: основа́ние пе́рвое Иа́спис, второ́е сапфи́р, тре́тие халкидо́н, четве́ртое смара́гд,

²⁰ Пя́тое сардо́никс, шесто́е са́рдий, седмо́е хрисо́лиф, осмо́е вири́лл, девя́тое топа́зий, деся́тое хрисо́прас, первоена́десять иаки́нф, второена́десять амефи́ст.

²¹ И двана́десять вра́т двана́десять би́серов: еди́на ка́яждо врата́ бе́ша от еди́наго би́сера. И сто́гны гра́да зла́то чи́сто, я́ко сткло́ пресве́тло.

²² И хра́ма не ви́дех в не́м: Госпо́дь бо Бо́г Вседержи́тель хра́м ему́ е́сть, и А́гнец.

²³ И гра́д не тре́буя со́лнца и луны́, да све́тят в не́м, сла́ва бо Бо́жия просвети́ его́, и свети́лник его́ а́гнец.

²⁴ И язы́цы спасе́ни во све́те его́ по́йдут, и ца́рие зе́мстии принесу́т сла́ву и че́сть свою́ в него́.

²⁵ И врата́ его́ не и́мут затвори́тися во дни́: но́щи бо не бу́дет ту́.

²⁶ И принесу́т сла́ву и че́сть язы́ков в него́:

²⁷ И не и́мать в него́ вни́ти вся́ко скве́рно, и творя́й ме́рзость и лжу́, но то́кмо напи́саныя в кни́гах живо́тных А́гнца.

Глава 22

¹ И показа́ ми чи́сту реку́ воды́ живо́тныя, све́тлу я́ко криста́лл, исходя́щу от престо́ла Бо́жия и А́гнча.

² Посреде́ сто́гны его́ и по обапо́лы реки́ дре́во живо́тное, е́же твори́т плодо́в двана́десяте, на ки́йждо ме́сяц воздая́ пло́д сво́й: и ли́ствие дре́ва во исцеле́ние язы́ком.

³ И вся́ка ана́фема не бу́дет ктому́: и престо́л Бо́жий и А́гнечь бу́дет в не́м, и раби́ Его́ послу́жат Ему́,

⁴ И у́зрят лице́ Его́, и и́мя Его́ на челе́х и́х.

⁵ И но́щи не бу́дет та́мо, и не потре́буют све́та от свети́лника, ни све́та со́лнечнаго, я́ко Госпо́дь Бо́г просвеща́ет я́: и воцаря́тся во ве́ки веко́в.

⁶ И рече́ ми: сия́ словеса́ ве́рна и и́стинна: и Госпо́дь Бо́г святы́х проро́к посла́ А́нгела Своего́ показа́ти рабо́м Свои́м, и́мже подоба́ет бы́ти вско́ре.

⁷ Се́, гряду́ ско́ро: блаже́н соблюда́яй словеса́ проро́чества кни́ги сея́.

⁸ И а́з Иоа́нн ви́дех сия́ и слы́шах. И егда́ слы́шах и ви́дех, падо́х поклони́тися на но́гу А́нгела показу́ющаго ми́ сие́:

⁹ И глаго́ла ми́: ви́ждь, ни́: клевре́т бо тво́й е́смь и бра́тии твоея́ проро́ков и соблюда́ющих словеса́ кни́ги сея́: Бо́гу поклони́ся.

¹⁰ И глаго́ла ми́: не запечатле́й слове́с проро́чествия кни́ги се́я: я́ко вре́мя бли́з е́сть.

¹¹ Оби́дяй да оби́дит еще́, и скве́рный да оскверни́тся еще́: и пра́ведный пра́вду да твори́т еще́: и святы́й да святи́тся еще́.

¹² И се́, гряду́ ско́ро, и мзда́ Моя́ со Мно́ю, возда́ти коему́ждо по дело́м его́.

¹³ А́з е́смь А́льфа и Оме́га, нача́ток и коне́ц, Пе́рвый и После́дний.

¹⁴ Блаже́ни творя́щии за́поведи Его́, да бу́дет о́бласть и́м на дре́во живо́тное, и враты́ вни́дут во гра́д.

¹⁵ Вне́ же пси́ и чароде́е, и любоде́е и уби́йцы, и идолослужи́теле и вся́к любя́й и творя́й лжу́.

¹⁶ А́з Иису́с посла́х А́нгела Моего́ засвиде́тельствовати ва́м сия́ в це́рквах. А́з е́смь ко́рень и ро́д Дави́дов, и звезда́ у́тренняя ^[331] и денни́ца.

¹⁷ И Ду́х и неве́ста глаго́лют: прииди́, и слы́шяй да глаго́лет: прииди́. И жа́ждяй да прии́дет, и хотя́й да прии́мет во́ду живо́тную ту́не.

¹⁸ Сосвиде́тельствую бо вся́кому слы́шащему словеса́ проро́чества кни́ги сея́: а́ще кто́ приложи́т к си́м, наложи́т Бо́г на него́ я́зв напи́санных в кни́зе се́й:

¹⁹ И а́ще кто́ оты́мет от слове́с кни́ги проро́чествия сего́, оты́мет Бо́г ча́сть его́ от кни́ги живо́тныя, и от гра́да свята́го, и напи́санных в кни́зе се́й.

²⁰ Глаго́лет свиде́тельствуяй сия́: е́й, гряду́ ско́ро: ами́нь. Е́й, гряди́ Го́споди Иису́се.

²¹ Благода́ть Го́спода на́шего Иису́са Христа́ со все́ми ва́ми. Ами́нь.

Примечания

1

В нек. греч.: Иоси́а же роди́ Иоаки́ма и бра́тию его́. Иоаки́м же роди́ Иехо́нию в преселе́ние Вавило́нское.

(обратно)

2

Мудрецы, волхвы.

(обратно)

3

Которою веют хлеб.

(обратно)

4

Отойди от Меня.

(обратно)

5

Пустой человек.

(обратно)

6

Верховное судилище, синедрион.

(обратно)

7

Сборщики податей.

(обратно)

8

Богатству.

(обратно)

9

попече́ние

(обратно)

10

На другой берег.

(обратно)

11

Из пещер, где погребали.

(обратно)

12

отто́ргнет бо приставле́ние его́ от ри́зы [не́что], и го́рша дира́ бу́дет

(обратно)

13

Мелкая монета.

(обратно)

14

с ну́ждею восприе́млется

(обратно)

15

Синагога.

(обратно)

16

Льна курящегося.

(обратно)

17

Поле.

(обратно)

18

осо́бь

(обратно)

19

Сюда.

(обратно)

20

пред'ити́ Ему́ на о́н по́л — отправиться прежде Его на другую сторону (синод.)

(обратно)

21

своея́

(обратно)

22

еще́

(обратно)

23

Камень.

(обратно)

24

Отойди от Меня.

(обратно)

25

Жизнь.

(обратно)

26

Две драхмы — определенная дань на храм.

(обратно)

27

Цари земные с кого берут пошлины или подати?

(обратно)

28

Четыре драхмы.

(обратно)

29

без руки́

(обратно)

30

приключи́тся

(обратно)

31

Вес серебра.

(обратно)

32

зело́

(обратно)

33

осо́бь

(обратно)

34

Спасение.

(обратно)

35

не брего́ша

(обратно)

36

Повязки на лбу и на руках со словами из закона.

(обратно)

37

Знаки особого благочестия на одежде фарисеев.

(обратно)

38

и лицеме́рно на до́лзе моли́твы творите́

(обратно)

39

дру́же, на сие́ ли прише́л еси́?

(обратно)

40

и по лани́тома бия́ху Его́

(обратно)

41

зауша́ху Его́

(обратно)

42

Судилище преторское.

(обратно)

43

Полотном.

(обратно)

44

по ве́чери же суббо́тнем

(обратно)

45

отто́ргнет приставле́ние его́ но́вое [не́что] от ве́тхого, и го́рша дира́ бу́дет

(обратно)

46

на Него́

(обратно)

47

Увяло.

(обратно)

48

вжига́ют

(обратно)

49

укроти́ти

(обратно)

50

к Нему́

(обратно)

51

и ощути́

(обратно)

52

удо́бну

(обратно)

53

а́бие

(обратно)

54

осо́бь

(обратно)

55

во окру́г

(обратно)

56

на ку́чи

(обратно)

57

предвари́ти

(обратно)

58

и отпусти́в я́

(обратно)

59

до лако́т

(обратно)

60

омове́ния

(обратно)

61

и́мже бы

(обратно)

62

осо́бь

(обратно)

63

исцеле́

(обратно)

64

Отойди от Меня.

(обратно)

65

о́крест их

(обратно)

66

Подбегая.

(обратно)

67

с ни́ми

(обратно)

68

без руки́

(обратно)

69

чрез страну́ я́же

(обратно)

70

своего́

(обратно)

71

се́м

(обратно)

72

де́лателем

(обратно)

73

да не

(обратно)

74

возмо́же

(обратно)

75

ю́ноши

(обратно)

76

э!

(обратно)

77

одержа́ше

(обратно)

78

во вре́мя

(обратно)

79

черте́

(обратно)

80

Отойди от Меня.

(обратно)

81

кро́в скуде́льный

(обратно)

82

влива́ти подоба́ет

(обратно)

83

я́ко восприе́млите утеше́ние ва́ше

(обратно)

84

неблагода́рныя

(обратно)

85

име́яши

(обратно)

86

во дво́рех ца́рских

(обратно)

87

оста́ви

(обратно)

88

оста́ви

(обратно)

89

осо́бь

(обратно)

90

отве́ржену

(обратно)

91

терза́ет его́

(обратно)

92

попрости́тися с су́щими

(обратно)

93

вас

(обратно)

94

наедине́

(обратно)

95

неотступность

(обратно)

96

в ми́ре

(обратно)

97

не пе́рвее умы́ся

(обратно)

98

к ним

(обратно)

99

зело́

(обратно)

100

вопроша́ти

(обратно)

101

наве́тующе нань

(обратно)

102

ме́жду тем

(обратно)

103

внегда́ избы́точествовати

(обратно)

104

приступи́в

(обратно)

105

истя́жут

(обратно)

106

потщи́ся

(обратно)

107

внима́я

(обратно)

108

от них

(обратно)

109

в греч. ва́тос

(обратно)

110

с ну́ждею вхо́дит

(обратно) name="n_111">

111

Лучше.

(обратно)

112

прише́д

(обратно)

113

благодари́т

(обратно)

114

со усмотре́нием

(обратно)

115

отвержену

(обратно)

116

труди́т

(обратно)

117

наве́тников

(обратно)

118

греч. динарий

(обратно)

119

лицеме́рно надо́лзе мо́лятся

(обратно)

120

в сокро́вищное храни́лище

(обратно)

121

обеща́ся

(обратно)

122

по пред'уста́вленному [сове́ту]

(обратно)

123

наказа́в

(обратно)

124

наказа́в

(обратно)

125

превозмога́ху

(обратно)

126

у Бога

(обратно)

127

у Бога

(обратно)

128

да вси́ уве́руют чрез него́

(обратно)

129

ку́пли

(обратно)

130

ре́вность до́му Твоего́ снеде́ Мя

(обратно)

131

несть

(обратно)

132

утверди́

(обратно)

133

купе́ль

(обратно)

134

Дом милосердия.

(обратно)

135

до вре́мене в свете́нии его́

(обратно)

136

когда́ се́мо прише́л еси́

(обратно)

137

Поставление кущей.

(обратно)

138

не у́ взы́ду

(обратно)

139

вои́стинну

(обратно)

140

пе́рвый

(обратно)

141

Сокровищница.

(обратно)

142

где Той есть

(обратно)

143

Ваш.

(обратно)

144

Власть.

(обратно)

145

поиду́ и

(обратно)

146

извине́ния

(обратно)

147

вину́

(обратно)

148

Каменный помост.

(обратно)

149

вертогра́д

(обратно)

150

Одежда.

(обратно)

151

Прозели́ты, т. н. обращенные из язычников.

(обратно)

152

у́тро

(обратно)

153

Евреи из стран языческих.

(обратно)

154

дабы́ изверга́ли младе́нцы своя́, во е́же не бы́ти им живы́м

(обратно)

155

Острие для погонки упряжных животных.

(обратно)

156

Кожевника.

(обратно)

157

к зло́бе подъусти́ша

(обратно)

158

дожди́

(обратно)

159

власти́теля

(обратно)

160

Заклинателей.

(обратно)

161

стяжа́ние

(обратно)

162

сопу́тники

(обратно)

163

та́мошнии жи́тели

(обратно)

164

Крепость.

(обратно)

165

пред'избра́

(обратно)

166

Крепость.

(обратно)

167

наве́т

(обратно)

168

Умысел, предпринимаемый ко вреду другого; заговор.

(обратно)

169

отрече́

(обратно)

170

такими, как

(обратно)

171

посо́бие

(обратно)

172

в ме́лкая ме́ста

(обратно)

173

бре́г

(обратно)

174

бре́г

(обратно)

175

пла́вания

(обратно)

176

кро́вным

(обратно)

177

о уче́нии бо се́м

(обратно)

178

искуша́ем злы́ми

(обратно)

179

Нет изменения и ни тени перемены.

(обратно)

180

И будем торговать и получать прибыль.

(обратно)

181

нача́льству

(обратно)

182

Разжение, воспламенение страсти, похоти.

(обратно)

183

позна́нием

(обратно)

184

в лихои́мстве льсти́выми словесы́

(обратно)

185

не произно́сят на ня́ пред Го́сподем укори́знена суда́

(обратно)

186

позна́ние

(обратно)

187

посреде́ воды́

(обратно)

188

ми́мо по́йдут

(обратно)

189

Преуспевать.

(обратно)

190

препира́яся

(обратно)

191

растлева́ются

(обратно)

192

душе́вни

(обратно)

193

е́же возмо́жно разуме́ти о Бо́зе

(обратно)

194

Противоестественную.

(обратно)

195

без зако́на

(обратно)

196

без зако́на

(обратно)

197

ко́е у́бо преиму́щество иуде́а

(обратно)

198

наипа́че

(обратно)

199

пре́жде бо обвине́ни есмы́

(обратно)

200

вси́

(обратно)

201

ка́ко еще́ жи́ти бу́дем в не́м?

(обратно)

202

да хо́дим

(обратно)

203

снасажде́ни

(обратно)

204

хода́тайствует

(обратно)

205

бога́тый сы́й

(обратно)

206

но па́че

(обратно)

207

о не язы́це, о язы́це неразу́мне

(обратно)

208

вопие́т к Бо́гу на Изра́иля

(обратно)

209

даде́ им Бог ду́ха нечу́вствия

(обратно)

210

сих ра́ди противле́ния

(обратно)

211

ва́шего ра́ди поми́лования

(обратно)

212

нача́льствуяй

(обратно)

213

всу́е

(обратно)

214

от дома́шних Хло́иса

(обратно)

215

му́дрых

(обратно)

216

суда́

(обратно)

217

мо́лим

(обратно)

218

да не твори́т себе́ необре́зание

(обратно)

219

да не печа́лишися

(обратно)

220

е́же бы́ти

(обратно)

221

усыпа́ют

(обратно)

222

да ра́вно еди́н о друго́м

(обратно)

223

покрыва́ет

(обратно)

224

ищи́те

(обратно)

225

Госпо́дь наш прии́де [Си́рский гла́с]. Да будет отлучен до пришествия Господа.

(обратно)

226

в не́которых о нас

(обратно)

227

но целова́в их

(обратно)

228

посо́льствуем

(обратно)

229

не быва́йте прело́жни ко ино́му ярму́ неве́рных

(обратно)

230

не преизбы́точествова и́же мно́го: и и́же ма́ло не мне́е прия́т

(обратно)

231

Очень усерден.

(обратно)

232

мно́гажды тща́тельна

(обратно)

233

мно́жае тща́тельнейша

(обратно)

234

присовокупля́ти

(обратно)

235

но во всем явле́нны есмы́ во всех к вам

(обратно)

236

отъе́млет

(обратно)

237

вспя́ть

(обратно)

238

поне́же

(обратно)

239

по ели́ку

(обратно)

240

поне́же

(обратно)

241

проти́ву

(обратно)

242

утро́бою Иису́с Христо́вою

(обратно)

243

во отве́т благовествова́ния учине́н е́смь

(обратно)

244

лицеме́рием

(обратно)

245

истощи́л

(обратно)

246

презре́в ду́шу свою́

(обратно)

247

е́же

(обратно)

248

к наме́ренному теку́

(обратно)

249

не удо́бным

(обратно)

250

в по́льзу ва́шу

(обратно)

251

победи́в их на не́м

(обратно)

252

я́же не уве́де [в тех] ходя́, всу́е

(обратно)

253

учине́ни есмы́

(обратно)

254

от вся́каго ви́да зла́го

(обратно)

255

вас

(обратно)

256

не положе́н

(обратно)

257

чрез чадоро́дие

(обратно)

258

че́стностию

(обратно)

259

че́стным

(обратно)

260

че́стным

(обратно)

261

ста́рца не укоря́й, но умоля́й

(обратно)

262

дома́шних

(обратно)

263

ско́рбных снабде́

(обратно)

264

проти́ву Христа́

(обратно)

265

любопы́ тны

(обратно)

266

свиде́тельством

(обратно)

267

предложе́нию

(обратно)

268

подвиза́ется

(обратно)

269

бу́дет подвиза́тися

(обратно)

270

Как рак будет распространяться.

(обратно)

271

Наглый, нахальный.

(обратно)

272

Тайно посланный, лазутчик.

(обратно)

273

це́лость

(обратно)

274

презира́ет

(обратно)

275

утверди́ти

(обратно)

276

да по́льзуюся тобо́ю

(обратно)

277

вои́стинну

(обратно)

278

остае́тся не́киим

(обратно)

279

пе́рвый [заве́т]

(обратно)

280

очисти́лище

(обратно)

281

утвержде́н

(обратно)

282

едва́ не вся кро́вию

(обратно)

283

определено́ есть

(обратно)

284

та́кожде

(обратно)

285

та́кожде

(обратно)

286

мно́г по́двиг подъя́сте

(обратно)

287

согляда́телей

(обратно)

288

бре́мя вся́кое

(обратно)

289

возвращу́ся к вам

(обратно)

290

открове́ние

(обратно)

291

е́же

(обратно)

292

Длинная одежда Иудейских первосвященников и царей.

(обратно)

293

Во́лна.

(обратно)

294

Некий неизвестный металл, сплав. Предположительно зелёная медь, или бронза, род металла из золота и серебра. Согласно другим источникам, это слово означает текущую медь, в расплавленном состоянии, раскалённую добела, и вследствие того производящую ослепительный блеск.

(обратно)

295

и ча́да ея́ убию́ сме́ртию

(обратно)

296

Мои́м

(обратно)

297

изгла́дити

(обратно)

298

во́н

(обратно)

299

и́же е́сть ами́нь

(обратно)

300

о, дабы́ студе́н бы́л еси́ или́ горя́щь

(обратно)

301

та́ко, поне́же те́пл еси́, и ни студе́н еси́ ниже́ горя́щь, и́мам тя́ изблева́ти из у́ст Мои́х

(обратно)

302

Глазная мазь.

(обратно)

303

тмы́ те́м и ты́сящи ты́сящей

(обратно)

304

пове́рже на зе́млю

(обратно)

305

Губитель.

(обратно)

306

и́бо

(обратно)

307

не избие́ни бы́ша

(обратно)

308

глаго́лаша

(обратно)

309

вне́

(обратно)

310

исключи́

(обратно)

311

растли́вшия

(обратно)

312

пове́рже я́ на зе́млю

(обратно)

313

пове́ржен

(обратно)

314

пове́ржен

(обратно)

315

влия́нна нерастворе́на

(обратно)

316

жа́тва

(обратно)

317

пове́рже

(обратно)

318

Обрежь.

(обратно)

319

ве́рже

(обратно)

320

на зе́млю

(обратно)

321

ви́дяще зве́ря, и́же бе́, и не́сть, и предста́нет

(обратно)

322

подоба́ет бы́ти

(обратно)

323

от бога́тства сласте́й его́

(обратно)

324

взыдо́ша

(обратно)

325

наслади́ся

(обратно)

326

и ве́сь в корабле́х наро́д, и корабе́лницы, и ели́цы в мо́ри де́лают

(обратно)

327

бога́тства

(обратно)

328

И го́лоса играющих на гуслях, и поющих, и играющих на свирелях.

(обратно)

329

растли́

(обратно)

330

вве́рже

(обратно)

331

све́тлая

(обратно)

Оглавление

Ева́нгелие от Матфе́я

  Глава 1

  Глава 2

  Глава 3

  Глава 4

  Глава 5

  Глава 6

  Глава 7

  Глава 8

  Глава 9

  Глава 10

  Глава 11

  Глава 12

  Глава 13

  Глава 14

  Глава 15

  Глава 16

  Глава 17

  Глава 18

  Глава 19

  Глава 20

  Глава 21

  Глава 22

  Глава 23

  Глава 24

  Глава 25

  Глава 26

  Глава 27

  Глава 28

Ева́нгелие от Ма́рка

  Глава 1

  Глава 2

  Глава 3

  Глава 4

  Глава 5

  Глава 6

  Глава 7

  Глава 8

  Глава 9

  Глава 10

  Глава 11

  Глава 12

  Глава 13

  Глава 14

  Глава 15

  Глава 16

Ева́нгелие от Луки́

  Глава 1

  Глава 2

  Глава 3

  Глава 4

  Глава 5

  Глава 6

  Глава 7

  Глава 8

  Глава 9

  Глава 10

  Глава 11

  Глава 12

  Глава 13

  Глава 14

  Глава 15

  Глава 16

  Глава 17

  Глава 18

  Глава 19

  Глава 20

  Глава 21

  Глава 22

  Глава 23

  Глава 24

Ева́нгелие от Иоа́нна

  Глава 1

  Глава 2

  Глава 3

  Глава 4

  Глава 5

  Глава 6

  Глава 7

  Глава 8

  Глава 9

  Глава 10

  Глава 11

  Глава 12

  Глава 13

  Глава 14

  Глава 15

  Глава 16

  Глава 17

  Глава 18

  Глава 19

  Глава 20

  Глава 21

Дея́ния Святы́х Апо́столов

  Глава 1

  Глава 2

  Глава 3

  Глава 4

  Глава 5

  Глава 6

  Глава 7

  Глава 8

  Глава 9

  Глава 10

  Глава 11

  Глава 12

  Глава 13

  Глава 14

  Глава 15

  Глава 16

  Глава 17

  Глава 18

  Глава 19

  Глава 20

  Глава 21

  Глава 22

  Глава 23

  Глава 24

  Глава 25

  Глава 26

  Глава 27

  Глава 28

Собо́рные посла́ния Святы́х Апо́столов

  Посла́ние Иа́кова

    Глава 1

    Глава 2

    Глава 3

    Глава 4

    Глава 5

  Пе́рвое посла́ние Петра́

    Глава 1

    Глава 2

    Глава 3

    Глава 4

    Глава 5

  Второ́е посла́ние Петра́

    Глава 1

    Глава 2

    Глава 3

  Пе́рвое посла́ние Иоа́нна Богосло́ва

    Глава 1

    Глава 2

    Глава 3

    Глава 4

    Глава 5

  Второ́е посла́ние Иоа́нна Богосло́ва

  Тре́тие посла́ние Иоа́нна Богосло́ва

  Посла́ние Иу́ды

Посла́ния Свято́го Апо́стола Па́вла

  Посла́ние к ри́млянам

    Глава 1

    Глава 2

    Глава 3

    Глава 4

    Глава 5

    Глава 6

    Глава 7

    Глава 8

    Глава 9

    Глава 10

    Глава 11

    Глава 12

    Глава 13

    Глава 14

    Глава 15

    Глава 16

  Пе́рвое посла́ние к Кори́нфянам

    Глава 1

    Глава 2

    Глава 3

    Глава 4

    Глава 5

    Глава 6

    Глава 7

    Глава 8

    Глава 9

    Глава 10

    Глава 11

    Глава 12

    Глава 13

    Глава 14

    Глава 15

    Глава 16

  Второ́е посла́ние к Кори́нфянам

    Глава 1

    Глава 2

    Глава 3

    Глава 4

    Глава 5

    Глава 6

    Глава 7

    Глава 8

    Глава 9

    Глава 10

    Глава 11

    Глава 12

    Глава 13

  Посла́ние к Гала́там

    Глава 1

    Глава 2

    Глава 3

    Глава 4

    Глава 5

    Глава 6

  Посла́ние к Ефеся́нам

    Глава 1

    Глава 2

    Глава 3

    Глава 4

    Глава 5

    Глава 6

  Посла́ние к Филиппи́йцам

    Глава 1

    Глава 2

    Глава 3

    Глава 4

  Посла́ние к Колосся́нам

    Глава 1

    Глава 2

    Глава 3

    Глава 4

  Пе́рвое посла́ние к Солу́нянам

    Глава 1

    Глава 2

    Глава 3

    Глава 4

    Глава 5

  Второ́е посла́ние к Солу́нянам

    Глава 1

    Глава 2

    Глава 3

  Пе́рвое посла́ние к Тимофе́ю

    Глава 1

    Глава 2

    Глава 3

    Глава 4

    Глава 5

    Глава 6

  Второ́е посла́ние к Тимофе́ю

    Глава 1

    Глава 2

    Глава 3

    Глава 4

  Посла́ние к Ти́ту

    Глава 1

    Глава 2

    Глава 3

  Посла́ние к Филимо́ну

  Посла́ние ко евре́ям

    Глава 1

    Глава 2

    Глава 3

    Глава 4

    Глава 5

    Глава 6

    Глава 7

    Глава 8

    Глава 9

    Глава 10

    Глава 11

    Глава 12

    Глава 13

Апока́липсис Свято́го Апо́стола Иоа́нна Богосло́ва

  Глава 1

  Глава 2

  Глава 3

  Глава 4

  Глава 5

  Глава 6

  Глава 7

  Глава 8

  Глава 9

  Глава 10

  Глава 11

  Глава 12

  Глава 13

  Глава 14

  Глава 15

  Глава 16

  Глава 17

  Глава 18

  Глава 19

  Глава 20

  Глава 21

  Глава 22

*** Примечания ***